☆THE SWEETEST HANDCUFFS☆ -29 By Dingdi Pachuau

 ☆THE SWEETEST HANCUFFS☆ - 29 By Dingdi Pachuau

Ka ngawih reng avàng chuan,"Nula fel tak, mi pawi sawi lo leh awm chet chet i ni emaw ka lo ti a; mahse, i mizia an lo hriat chian loh vàng chiah a lo ni. Pâwn lam lan dànah chuan mi pawi sawi ngai lo ang chu i ni ngei ang; mahse, tunah chuan i nihna dik tak chu a rawn lang ta a nih àwm hi. I awm chet chet emaw tih laiin mi pahnih, induh tawn êm êm țhìnte inkâr chu nasa takin i tibuai ta vek si a, mihring i hlauh loh tal pawhin Pathian hi chu hlau ve ta êm êm che," a tih chhunzawm leh a, ka la ngawi reng tho. Ka zak êm êm mai si a, sawi tùr pawh ka hre lo a ni. 

"Zodina hian a thlèm hmasak che ka ring hauh lo va, a mizia pawh a ni lo, a duh tak tak che lah ka ring hek lo, nang hian Arini bialpa a ni tih pawh vawi duai lo i hre ngei ang a, chuti chung chung pawh chuan i nêp zo lo tihna a ni, i taksa hmangin em ni i lo kawih lunglèn a? Bâkah, i chungah hian eng thil nge thleng ve thei tih lam i ngaihtuah pha lo a nih ka ring, khati chen kha an lo inkawp tawh a, an induh tawnin inneih hial pawh kan tintuah chhoh tawh laia hetiang buaina leh hmingchhiatna a lo thleng ta mai hi hriat thiam har tak a ni, hriat thiam theih pawh a ni lo. Arini pawh a rilru a nâin a țap reng a, a chhan pawh nangmah vàng hi a ni, i hria em? Mi inkâr tibuai tùr leh mi rilru tina mai mai tùr chuan lo piang chhuak lo tawp la țha tùr hi a nia!" a ti leh hmuar hmuar a, a thil sawi tàwp lam chuan ka thinlung a dek zak mai. 

"Ka pi, a pawi ka ti lu--" ka sawi zawh hma chuan," Min chhâng lêt ngam ve a ni maw?! I va zak thei lo êm êm ve le! I nu rual zet ka nih hi, pawi tih thute i la sawi ngam maw?!! I nu leh pate pawh hian an zilh ngai lo che em maw ni?" tiin ngaihnêp hmel zet hian a han chek tlak tlak a,  ka chungchãng ațanga ka nu leh pate a chham chhuak chuan ka rilru a tina tak zet, eng mah ka sawi chhuak duh tawh lo, sawi duh pawh ni ila ka thei lo ang, a thil sawi hian min tina lutuk si a.

"Pawi tih thu sawi ringawt hian sawi thil a siam țha thei lo, ka fanu rilru lah a dam phah dâwn hauh lo bawk. A mittui hian ka rilru a tinâ asin, nu thinlung hi a tina ngawih ngawih. I thil tihsual hi pawi i ti tak zet a nih chuan Zodina hi kalsan la, ka fanu hnënah ngaihdam dîl ang che, a lo ngaidam thei hlauh che a nih chuan ka ngaidam ve thei maithei che a ni," a ti leh a, hmui pet fan fanin a rúkin ka kut chu ka hûm ruh ngat ngat a, min țawng khum avànga ka thinlung nâ, a lan chhuah tumna ka mittui erawh chu ka dang kîr hrâm hrâm, hmuhtîr ka duh hauh lo, eng ang pawhin na mah ila ani hi chuan engah mah min ngai dâwn chuang lo, ka nat hi a duh dàn chiah pawh a ni ngei ang.

A chhuah hnuah pawh chuan ka che sawn lo, ka țhutna ngaiah chuan ka țhu reng a, ka melh ngai ka melh tlawk tlawk ringawt. Ka zahna zawng zawng kha ka thinlung natna chuan a rawn thlâk a, ka thinlung chu a țap vawng vawng ni berin ka hria.

Ka han maimichhîng a, ka bianga eng emaw lum thla pap pap ka hriat rual chiah chuan ka mittui a lo tla a ni tih ka hre ve chiah. Um, tla rawh se, ka sûm rei tawh alawm, mittui chuan tlâk bâk eng thil nge tih theih a neih chuan? Tu mahin min rawn hmu chuang lo, min hmu lo tùra ka duh ber lahin min chhuahsan daih tawh bawk, a duh tâwkin ka mittui chu tla rawh se, țah chhuah erawh tum lo chuan ka thaw hawk hawk a, chu chuan min tizia khawp mai.

"Tluangte..??"

Ka meng chhuak nghâl kâwk a, ka hmaah chuan Zodina chu a lo ding reng tawh niin! Ka hawi sawn nghâl vat a, kûn pah chuan ka mittui chu ka hru zuai a, en lo chuan," Eng nge ni ta?" ka ti ta vat a, ka mittui kha a hmuh loh hrâm ka beisei.

"Eng ni lo ve, ka rawn kal zawk a ni. Eng thil nge Nu Tlângi khân a rawn tih a?"

Pângngai thei tùr ber chuan," A rawn kal ve zawk a nih kha," ka han ti a, ka aw pawh pângngai thei tùrin ka thunun nasa khawp mai a, a pângngai ve viau chuan ka hria; mahse, tlêm chuan a khùr deuh tih erawh ka hre tho.

A ngawi vang vang a, min en reng a nih ka ring, kei erawh chuan ka dawhkàna ka lehkhabuho chu ka rem țha mai mai a, rem țhat ngai pawh a ni chiah lo; mahse, Zodina hmachhawn tùrin ka la inringtâwk chiah lo deuh, thil felhlel awma min rinhlelh ka duh lo a ni.

"A nih tak chu, i haw dâwn tawh lo em ni? I haw hun a ni tawhin ka hria a," a tih leh chuan," A... aw, haw dâwn e, ka hman chiah," ka ti a, ka ding a, ka țhutna bula tukverh chu ka khãr zui nghâl a.

A haw mai ka ring a nia, haw lovin ka in thlengin min rawn zui ve zêl niin, kawng ka hawn dâwn chuan ka hmu thut a," I lo lêng dâwn em ni?" ka han ti ringawt a, ani chuan," Aw... rei lo tê chauh a ni ang," a lo ti mai a, ka peih lo viau nain hnar haw ringawt chu thil mawi a ni si lo va, țawng tawh lo chuan kawngka chu ka hawng a, ka lût zui nghâl a.

Țawng ka peih loh êm avàng chuan ka ngawi deuh reng a, ani pawh a țawng bîk lo. Thingpui chhuang pah chuan chawhmeh siam tùr ka han melh a, thlai rah a la tam a, anhnah lam pawh a la awm nual e, maian tlak mai mai ila...

"Engtin nge i rilru nâ kha ka thawi damsak theih ang che? Han sawi teh, eng thil nge ka tih ang? Nu Tlângi thil sawi țhenkhat kha ka rawn hre hman a, ka ngaithla rù che u a ni lo a nia, ka rawn hre ve tawp mai a ni," a tih chuan ka ding zum ta reng a, a lam pawh ka hawi ngam lo. Eng chena thui nge a rawn hriat ang? Ka nu leh pa chungchâng a sawi chhuah mawlh kha. A va zahthlâk tak!!

"He thil chungchângah hian eng mah tihsual i nei lo, tuar lo tùr berin i tuar ta ber hi pawi ka ti hlê mai. Ka thiam loh vek a ni, he thila ka hnûk lût che hi ka tisual chhiava a ni tih ka hre chiang viau tawh a, keimah vànga zahna leh rilru natna i tawng hi min ngaidam mawlh ang che, pawi ka ti tak zet a ni," harsa tih hmêl tak hian a ti ta mawlh mawlh a, che sawn deuh hretin a lam chu ka hawi deuh a, a lo țhu kun deuh lap a ni tih ka hmuh chuan hrehawm ka tiin ka khawngaih ve lehchhãwng a.

"Ngaihdam min dîl lo teh, eng nge tihsual i neih? Ngawi teh, chutiang lam chu sawi lo ang. Thingpui hi a hângin nge i duh ang a thlumin?" ka ti ta daih a, a duh rêng vànga he natna nei hi a ni lo va, hrehawm a tiin mi zîngah a inthlahrung thei êm êm zâwk a ni si, a hrehawm ti hmêl chu hmuh ka duh lo va, ngaihdam min dîl tùr pawhin ka duh hek lo, tihsual a nei hleinem.

A lêng rei lo tak tak. Mipa a ni a, mi chanchin sawi vak a duh lo ang tih chu hriat sa, a sawi lo rêng bawk a, a sawi teuh ber chu," Tihsual i nei lo va, ngaihdam dìlna chhan tùr i nei lo, har viau mah se hriat reng ai chuan theihnghilh tum hrâm la, thil dang ngaihtuah i tum hrâm bawk dâwn nia, keiman engkim ka tifel ang," a tih chu a ni. Arini leh a nu hming a sawi lang tawh lo va, a rêl bawk hek lo.

Engtin nge miin an lo hriat ka hre miah lo, Kim'n min zâwt nawlh mai a, mak ka ti tak tak a ni! Zodina'n a sawi chhuah ka ring si lo, a sawi chhuak hauh lo ang. Chuti a nih chuan, min lo ngaithla rù an awm a nih loh chuan amah, Arini nu kha a ni thei ang; mahse, an thil sawi dàn chu a letling leh tlat thung. An sawi dan chuan, Office-a Arini nu rawn kal chuan thuphungin a fanute chanchin chu a sawi a, keiin zahpah lo taka lo țawng khuma hmusit lam rawng lek leka lo țawng khum angin min sawi! Thil hi a mak thei asin.

"Nu Tlângi chu a rawn kal tak tak em?" a tih chuan," Aw, kal e," ka lo ti mai a," Chuan, i lo țawng khum ta a?" a tih leh chuan," I ring em?" ka lo ti ve thung a, ani chuan," Teuh lo mai! Țîk pawh i ti ngam nâng?" a ti leh a, chhãng lovin ka nui sak ringawt a, chhàn ngai pawh ka ti lo. Kimi bulah hian ka rilru natnate han sawi chhuah vek chu ka châk, ka thâwl hawk ngeiin ka ring; mahse, han sawi chhuah leh kher kha a țûl ber lovin ka hria a, bâkah, sawi pawh ni ila awmzia a awm lêm lo, thu dik chu a ngai reng tho alawm.

"A pawi ngawt mai, mi heti zawng zawng zînga an nufa ber kher bakkaiha i awm hi, ka sawi tawh kha, zah an hre vak tawh si lo va, an nasa ve bawk si nèn, anmahni ang nih si loh chuan ngawih theih mai hi thil  țha ber chu a ni, anni khing tùr hi chuan mi eng emaw tak nih ve a ngai ang," a ti leh ringawt a, ani pawh hian han sawi chiam dàn tùr a hre bîk lo, nasa a ti viau tih bâk chu.

A khaw khahin kan khat ngei ang chu; mahse, ka ngawi tlat a, biak ina min han melh leh ralh ralh țhìnte pawh chu ka hmu ru ve reng; mahse, ka hai der tlat a, danglam duh miah lovin ka inthunun lui tlat a, min sawi avàng maiin inkhâwm țhulh phah lah ka tum hek lo. Amos-ate pawhin an hre ve vek tho nain an sawi lang ngai lëm lo; mahse, an pathum chauha an rawn lèn châng erawh chuan Amos-a chuan min fiam zuk zuk țhìn a, chu chuan Remsiama leh Nunmawia hmui kawngka a hawnsak ziah a, zêldin thu hmangin min sawisa nghek țhin. Amos-a ka ngei theih țhinzia mai chu a, za lo deuh deuhin ka nui ka nui ringawt mai a ni.

Pu Zuala a nuamsam lo deuh a, keima lam hlîr ka lo inngaihtuah vàngin Zodina hnêna a chanchin han zawh pawh ka lo mangnghilh daih a lo ni. Mi min sawina vàngin ka be khâtin ka kan khât ta deuh a, ngaihsak lo min ti ngawt ang chu, a rûk chuan nuam lo ka ti. Zodina nîin min rawn koh pawh chuan," Aw le, ka lo kal thuai dâwn nia," ka lo ti vat a, a nîin min rawn koh dànah Zodina a awm lo a nih ka ring deuh nghâl ngawt bawk a.

Pu Zuala chu a khumah a lo mu bâm a, pâwn lam țhutthlèng pawha mu lova khuma a mut avàng chuan a peih ngang lo tak tak a nih ka ring a," Ka lo kan khât deuh che a, pawi ka ti khawp mai. I eng lai ber nge nâ le?" ka han ti a, ani chuan," I buai viau țhin a ni ngei ang," a lo ti sap a, nuih sak pah hian," Mahni tâwkah hi chuan buaina neuh neuh hi chu a awm ve reng mai; mahse, dam chuan buai tùr alawm kan nih tiraw? I Bp check lawk ang aw?" ka han ti zat a.

Ka awm ve deuh reng a, a Bp a sâng leh deuh hlek a lo ni. Damdawi a ei țhat thu min hrilh chuan," A țha lutuk! Zànah hma takah i mu ang a, i mut tam poh leh i taksa tân a țha a ni mai. Chuan, hun remchângah rawn kan che ka tum ziah dâwn nia," ka ti a, ani lah chuan," Ka upa ve tawh a, ka dam rei pawh hi ka ring vak tawh lo asin," a lo ti daih thung a, kei chuan," E khai! Chutiang an sawi ngai lo, rei tak i la dam dâwn alawm le, lungngai miah suh, i dam ţha leh vâk mai ang," ka han ti ve a.

"Ka thu hrilh che kha vawng reng rawh aw, ka lo dam rei ta lo a nih pawhin hlim taka kawm i lo tum țhin dâwn nia, i bulah hi chuan hlim tak takin a hlim thei ang tih ka ring tlat a ni," a ti leh a, a kut chu ka han dawmsak a," Ka pu, min rin avàngin ka lãwm e, eng mah ka sawi chhuak hauh lo ang. Damdawi kha i ei leh tawh dâwn em ni ang?" ka ti zui zat a, ka haw hma chuan damdawi chu ka eitîr a, a ei hnu deuh lawka a muthilh avàng chuan kei pawh ka awm rei ta lo.

Room ațanga ka chhuah chuan Zodina nî chuan," Haw i tum mai elo?" a lo ti vat a, kei chuan," Aw, tum mai ang, a muhìl thei tawh tho si a, eng emaw harsatna a awm a nih chuan min rawn hrilh hreh lo ula aw, inthlahrung miah suh u," ka ti a, hawi kual deuhin," Khawiah nge Zodina hi?" tiin ka han zâwt leh a," Lungleiah mamawh lain a kal ta a nih kha, i haw hmain thingpui in leh phawt ta che?" a tih chuan hnialin ka haw ta thuai a.

Mahnilo maha rilru hrehawm ve nèn, in ka thlen hnu lawkah Arini a rawn lang leh zui a," Vênghimtu che i nei țha bawk a, i thu pawh a ãwih khawp mai. Zahna tlêm erawh nei ve la chu ka ti khawp mai thung, min hneh anga i lan avàng hian hawi champ viau duh chuang suh, mi zawng zawngin i nungchang leh tenawmzia chu an hre vek tho. Chutiang ka sawi avàng chuan ka tihbuai che erawh hlau duh suh, ka tibuai lo ang che, hetiang mi dukdak lo, mi inkâra inrawlh chîng hi ka khing peih lo che, nang khing tùr che hian ka tê tâwk lo bawk!" a rawn ti hliam hliam mai!

"Arin, a pawi ngawt mai, i hre sual a ni, engkim hi i hre sual vek, thu dik lo a ni tih pawh i hria, thu dik lo hmangin--" ka tih lai mêk chuan," Eng mah sawi suh, ka ngaithla peih lo, i hmui dukdak lo ațang khân dâwt thu bâk phuh chhuah tùr i nei lo, mi tenawm tak chu i lo ni, i ngam chuan nangmah hian min hmachhawn mai tùr a nia, mi dang mi dang rawn tirh ngai lovin, i bialpa bulah i lo insawi thiamin i lo insawi khawngaihthlâk vêl tih hriat reng reng. A, hetiang mihring bulah hian awm tam pawh ka duh lo, i zia hi ka kai ve ang tih ka hlau," tiin a han ner kual vël a, chutah," Kan inhmuh tàwpna ni rawh se, mi dang inkâr țha lai chu tibuai tawh ngai suh, kei ang hian an dawh ve mai mai lo ang che," a ti leh a, hawi dâk vah chungin min chhuahsan zui ta nghâl a.

A va han buaithlâk țhin êm! Han sawi fiah ve dâwnin a ngaithla duh bawk si lo, ama angin han țawng ve par par dâwn ila, ani a lo ngawih ve duh chuan si loh chuan kan țawng a ring vak ang a, awmzia a awm chuang lo ang,  thinrimin kan inchhuah ve ve emaw a ni ang a, thil a buai thui zâwk ngei ang le. Hm, 'Kan inhmuh tàwpna ni rawh se' a tih kha maw, ka inah a rawn kal tawh dâwn lo a ni ngei ang, chuti a nih chuan, a țha hlauh a ni mai alawm,  boruak hap a hrehawm thei êm mai.

Kan boruak hi ka hnê tak zet tawh a ni. Hnê tak hi ka ni ringawt, Zodina ka ngaihtuah a, a chanchin engkim min hrilh ngam a, ka țanpui theih a beisei vangin, a pu lahin min ring viau bawk a. Hrehawm tih avànga han kalsan daih chu a dik meuh bawk si lo, hun hi her lêt theih se, bul țan țhat leh theih se ka ti, he khua hi ka post ni lo thut bawk se...

Mahse, ka nu thil min hrilh țhin kha ka ngaihtuah chhuak a," Thil thleng hian chhan a nei țhìn a, thil thleng palh a awm ngai lo, chhan neia thleng vek a ni," a ti țhin. Hna avàngin he khuaah hian ka lût a, Zodina personality pakhat Jakob-a'n min hai avangin min bèlbul a, Zodina'n a chanchin, a natna thurûk min hrilh vek bawk a, kei kher min lo ring chat pawh hian chhan a nei ngei ang, a nei tùr a ni. Chutiangin, Jakob-a pawhin, chuan, Vãlpuia a ni leh bawk a. Zodina țanpui theih dàn ka ngaihtuah a, chumi kawngah chuan ka ngaihtuah phâk loh eng eng emaw harsatna a lo awm ve ta ngei a, chuvàng chuan ka bànsan mai dâwn tihna em ni? Ni lo ve, a tawp thleng lova bànsan mai ka huat theihzia kha, chuvàngin, he thil pawh hi ka theih phawt chuan a tàwp thleng rakin le, tihngaihna a awm ta ngang lo a niha tih theih ka nei ta lo a nih chuan thuhran ni se.

Tih theih erawh ka la nei alawm, hetiang eng emaw vàng mai hian ka bei a dawng mai mai tùr a ni lo, ka nu leh pa fanu ka nih hi.

Jakob-a hi a luhlul a, a duh hun têah lo chuan thurûk a tih kha min hrilhin ka ring lo, ka zinpui hunah chuan min hrilh ve mahna, Vâlpuia tak zâwk hi thil zawh tùr ka la nei nual a, ani hi chu a hmuh zin theih loh deuh hlek a, a chhan lam phei chu ka hre lo, a nun a nèm deuh vàng hi a nih ka ring deuh ngawt. Jakob-a hi a luhlulin a huaisen a, a kâwlhrâwng bawk a, Vâlpuia hi hun a pe tam duh lo a niang, bâkah, thil ka zâwt tih kha a lo hre ve bawk si a.

Pu Zuala ka va kan leh lai chuan Zodina pawh a lo awm ve a, min hmuh a inring vak lo a niang, a lo meng phâwk deuh hlekin ka hria.

"I pu ka rawn kan dâwn a," ka tih chuan," I va fel ve! A sawi a sawi tak che a, a lo beisei reng che a nih ka ring," a lo ti ve mai a, a pu room lamah chuan kan inzui lût ta nghâl a; mahse, a lo muhìl teh tlat a, thãwm dim tê hian kan chhuak leh ta daih a.

"Țhu rawh, i rawn kal ta sa sa, thingpui in ang, ka'n siam ang e," a ti a, U Ropuia ka ngaihtuah chhuak zawk a, ani pawh nakinah a rawn kal ve ang, mi dang a kan kual lawk a ni.

"Khawnge i nî? Lo lamah em ni?" ka tih chuan," Um, a nih kha. Ina ka awm nî a ni hlauh chu ka vànnei hle mai, i lo kal dâwn tih hre sa ang maiin," a lo ti vat a, ka va en chuan a lo nui deuh tih ka hmu a, thil ngaihtuah chhuak zawkin," Tûn hnaiah Arini i hmu em?" tiin ka han zâwt zui a.

"Engtia hmuhin?"

"Ka hre chuang nâng, eng emaw sawipui tùr pawhin a ni mahna," ka tih chuan,"Lo sawipui ni ta ila... a pawi i ti deuh tihna em ni? Nge, a rawn hmu leh tawh zâwk che em ni? Eng thil nge a sawi?" a rawn ti ve leh ta thung a, chhâng lovin ka en phei ringawt, kan tih dan hi kan inchhâng tâwk dáwn riau mai.

"Pawi lo ve, ka ti mai mai a nih kha," ka tih chuan thingpui chu rawn chawi pheiin," Eng thil nge i bulah chuan a rawn sawi a?" a rawn ti a, thingpui no chu ka hma dawhkànah chuan a rawn dah nghâl a.

"A rawn sawi ka tih loh chu."

Ka ep chiaha țhut pah chuan," Ti lo mah la a rawn kal a ni tiraw? Sawi tùr nei lo chuan a rawn kal hauh lo ang le," a ti ve leh thung a, kei pawh chuan tlàwm bîk duh lo chuan," A ni mahna, nang pawhin sawi tùr nei lo chuan i hmu hauh lo ang le," ka ti ve leh a.

Ka rin loh deuhin a rawn nui ta sak a," Vei reuh che chuan! Tu emaw bulah i awm tam tawh a, i luhlul ve phian reuh ang ka ti," nui hmel pu chung hian a rawn ti a, tùm vuau thu awm hek lo, a rawn sawi dàn chuan nuih a tiza ve tho a, ka lo nui ve ta ringawt a.

Țawng tawh lëm lo chuan thingpui chu kan in a, ka en ru leh zauh zauh țhin, a en ngai a en deuh reng a, thil eng emaw ngaihtuah mûk deuh hlek a nei a nih ka ring a, chuvàng chuan ka be buai duh rih lo va.

"Eng emaw hrilh che ka duh a..."

Ka en vat a, a mitmengah chuan inkiltawihna leh nuam tih lohna eng emaw tak a langin ka hria, ka hriat sual loh chuan.

"Han sawi la?"

A ngawi leh vang vang phawt a, min rawn en leh zawkin chhuat lam chu a en leh ta daih a, chutah," Ka chanchin ka hrilhah che khân thil pakhat hrilh loh che ka la nei a," a ti ban deuh chat a, thaw dep dêpin ka lo en reng ringawt, eng thil tak chu ni ang maw?

"Ka nuhrawnin ka pa a rinawm lohsan lai ka phâwk a." 

Ka rei leh! Ka meng pãwng zãwrh lo a nih pawhin a phâwk ngawt ang! Ka hre sual a ni lo maw?! A țawng zàwi viau mai a, sawi pawh a harsat viau mai; mahse, thil ri dang a awm lêm loh avàngin chiang takin ka hre thei tho. Ka hre sual chu a ni lo ang.

"Ka la têt deuh lai khân a nia. I bulah chauh ka la sawi chhuak a ni, chu pawh min țanpuina kawngah awmzia a neih theih tâkin ka ti a, ka kâ ațang chuan a chhuak leh tawh ngai lo ang," a ti leh sap a, a rawn hawi chhuak ngam miah lo tih ka hmuh chuan khawngaihna nasa tak neiin a rilru hrehawm tùrzia chu ka ngaihtuah nghâl lo thei lo.

*MI DANGIN NGAI ROPUI CHIAM LO CHE MAH SE, NANGMAH KHA CHAK TÂWK, HUAISEN TÂWK LEH TLING TÂWK NIA I INHRIAT PHAWT CHUAN I HMAA THIL AWM TAWH PHAWT CHU I TI THEI ZÊL ANG*