☆THE SWEETEST HANDCUFFS☆ - 30 By Dingdi Pachuau

 ☆THE SWEETEST HANDCUFFS☆ - 30 By Dingdi Pachuau

"Zonun, ka thinlung natzia hi, engati nge... ni lo, engtin nge hetiang hian ka hnung lamah ka hriat hauh lohin min lo bum reng theih zâwk ni! Ka thinlung zawng zawngin ka ring che a--" a la tih lai mëk chuan ka lo inrawlh ve vat a," Ni lo, Jakob, i rin ang hi a ni lo, Zodina hian rilru natna tam tak a neih avàngin min rawn be ve țhin a, a harsatna ka lo ngaihthlâksak --" 

Kei pawh chuan ka sawi zo hman lo, țèng ring zet hian," Bialnu a neih reng kha, kha nu kha a be thei reng alawm, nula tam tak an awm laia engah nge nang khera rawn biak che ni?! Bâkah, tlêm lai deuh ațang khân i awm dàn a danglam, phat tum duh suh, nang pawhin i hria, " a rawn ti chher leh chhuai a, chutah," Mipa thinlung hi a lo na thei viau a lo nih hi, hetiang hian ka natna tùr i ni tih chu lo hria ila chuan... " a ti chhuak leh tuarh a, a aw chhuakah chuan a rilru a nâ a ni tih a hriat ngawih ngawih. Ni e, a nâ ang, a hma kha chuan kei pawhin ka duh ve viau a, mi tak tak a ni lo tih hre reng chung pawh khân ka hnar hlei thei lo a nih kha; mahse, a duh tak zâwk chu kei ni lova Mami a ni tih ka hriat chhuah ațang khân ka awm dàn dik lohzia ka hre chiang zual a, duh miah lo tùr ka nihzia pawh ka hria, keima tâwkah chuan ka hlatsan telh telh rêng a ni.

Mahse, tûn ang boruak hi... kan tawn chu ring tho mah ila hetiang êm hi chuan a rilru ka tihnat ka ring pha lo. A pawi ka tih rualin a bul ber chu keimah ka ni tih ka hria, engtin nge mi tak a ni lo tih hre reng chung khân bul ka lo țanpui ni?  A rilru a na tak zeta a kal bo a nih teh chuan thil pawi tak a thleng ngei ang.

"Jakob, min ngaithla hrâm teh, hawh, țha takin thil sawi dùn ang, dâwt ka hrilh lo che, nangmah hi alawm ka duh, ka phatsan lo che, khawngaihin, khatiang khân awm suh," ka ti lawm lawm a, miin min lo ngaithla ang em tih lam pawh ka ngaihtuah thei lo, a thin a rim zui zêl chuan thil pawi lutuk a thleng thei tlat, a rilru nâ ka thawi dam a ngai.

A thaw ri leh hawk hawk țhìn chu ka hria a; mahse, a rawn țawng tawh hauh lo. Ka hlâuthãwng a ni," Jakob, damdawi inah i awm lo a nih chuan khawngaihin, i lo tlãn haw lawk thei ang em? Hmaichhan ngeia hmuh chea sawi fiah ka duh a ni, i thei hrãm ang em?" ka ti leh a, tunah tak hi chuan thil pawi a thleng ang tih ka hlau ber a ni, miin min sawi ang tih lam kha chu ka ngaihtuah peih lo, an duh leh, min lo sawi se... 

Kan inbiak zawh chuan ka thaw huai a, ka maimichhíng vang vang phawt. Vawiin lama hun ka hman nawm tehlul nen, kawng kalnaah ka chàu deuh hlek tih a ni mai a; mahse, tûn lawka kan boruak khân min tichau ngawih ngawihin ka hria. Rei fe chu ka awm ngaia awmin ka maimichhîng reng a, a hnu deuhah chuan inthing harhin peih lo zet chuan inbual tùrin ka inbuatsaih a, ka thâ a za lo kher asin.

Jakob-a a rawn thlen chuan khua a  thim țan tawh a, kan inbiaknaah khân ka ina chaw ei ve mai tùr khân ka chah bawk a, ka in kawtah a rawn ding chat rêng a. A hmêl chu a dur deuh hlek a, hlim hmël a pu lo va, thinrim tak hmël pawh a pu chuang lo; mahse, a thin a rim ang tih chu ka hre tho, a thinlung ka tina ëm êm si a; mahse, chuti chung chung pawh chuan ka thu sawi ngaipawimawhin a rawn haw a, ka lãwm tak zet a ni.

"I lo thleng hma khawp alawm tiraw? I ril a țâm tawh em? I țhu chàwl lawk dâwn nge chaw ei ka siam nghâl mai dâwn?" tiin in chhûnga kan luh hnu chuan ka han bia a, ani chuan," Eng harsatna fakau nge a neiha nang kher rawn biak che a duhna chhan? Chu chu min hrilh phawt rawh," a lo ti nghut thung a, a ril a țâm vak lo a ni ang e.

"I hre tho ang a, nu leh pa bula awm lovin a pute bulah a awm a, chu chuan mi zînga a awmin amahah, rilru lamah eng emaw inkiltawihna a neihtîr țhìn a, chutah, a bialnu nèn an inkãr a lo buai chho bawk nèn, zànahte a mu țha thei lo țhìn a, damdawi ei tùr min rawn zâwt a, a harsatnate chu zawh loh theih ni hek lo le, min hrilh ta vek a, damdawi lama thawk ve ka nih vàng a nih ka ring min rawn biakna chhan tak chu," ka han ti dap dap a. Hei hi chhàn dàn tùra ka lo inruahman dàn chu a ni, ka inbual lai leh rawng ka bàwl laite pawh khân ka ngaihtuah nasa a, dâwt ni tho mah se tlêma a rilru a lo thawi dam ve theih hlek chuan pawi ka ti lo. Däwt muhlûm chu a ni vek bîk lo va; mahse, kan inkãrah thil a awm lo tih hriattîr ka duh a ni.

Chaw ei lai chuan ka melh ru leh zauh țhìn a, min hmu ru vek a ni chêk ang chu," Min melh dàn kha, chaw heh min tih hmel hle mai," a ti a, chutah," Zanin chu hetah ka riak ve thei mai ang em?" a 'n ti zui zat a, ka chaw ei chu ka hâk chiang mai mai asin! Ka han khuh khak khak a, ka hnung a rawn zút a,"Dìl àwm loh a nihna ka hre lo, i chaw ei hâktîr tùr che erawh chuan ka sawi kher lo a nia," a ti zui leh zat a, ka âwm chu ka dawm  vang vang a.

Zànah pawh inkhâwm lo chuan thil awm dan chu ka sawi a, kan insawi fiah nasain min zâwt dîlchhút bawk a, min zawhna apiang chu confi takin ka chhâng zël bawk a, tlëm chuan a thinrim pawh chu a zia ta deuh chuan ka hria; mahse, tlêm tê pawhin a nui chhin duh hauh lo thung. A pu chanchinte chu ka han zãwt leh hnuhnawh a, ani lah chuan," Chu, a pu chanchinte min han zâwt a nia, eng emaw hi chu a awm a ni," a lo ti hluk a, kei chuan," Ni lo, chutiang lam a ni lo, ka zawh loh che chuan he laia thawk hi ka ni a, he khuaa damlo awm rêng rêng an chanchin ka hriat a ngai țhin alawm, a chanchin ka zawh loh che chuan ka hna ka tlin lo viau tihna a ni dãwn asin," ka lo ti thung a.

Țawngkam pawh ka lo thiam ve viau e, zàn pawh a riak ta bîk êm lo. Zàn riahtîr te zawng a tihchi hauh lo, ka duh miah lo bawk. 

A tûk lamah pawh chuan a rawn kal leh a, inkhâwm ka tum avàng chuan ka lo inpeih deuh at tawh a, ani lah chu inkhâwm tum angin a awm dèr mai si lo va, 'eng thuamhnaw pawh a inkhâwmpui theih a, pâwn lam lan dàn aiin chhûng lam rilru put dàn hi a pawimawh zãwk' ti ti ţhin mah ila, chhûng lam hmuh theih tawh hek loh le, pâwn lam hi kan en lo thei lo chu a ni. Tuna a inthuamnate pawh hi han inkhâwmpui ta chiah se, sawisêl tâwk chu an awm tho ang.

"Inkhâwm ila?" tiin ka han sâwm ve chhin hrim hrim a, ani chuan," In ka lo nghâk zâwk ang, muthilh ka duh," a lo ti sup a, țhutthlèngseiah chuan ãwn zet hian a țhu a, ka sâwm nawn tawh lo. Kimi'n min rawn sâwm a, pâwn lamah kawngka ka lock a, ka kalsan ta a. 

Kan inkhâwmnaah chuan ka hawi kual lëm lo, ka zâi a, thu sawi ngaithlain a sawitupa ka en kar a, hmun dang ka melh lo. Mite chuan Zodina a lo haw tiin an hre ngei ang a, ka in kawtah dingin zàn dãr 10 vëlah a haw tih pawh an hre leh vek tawh ngei ang chu. Ni e, hre ve lo tân chuan chu chu an sawi dàn tùr a ni rêng a, Zodina tân a natna hi a thurûk ni kher lo se chuan, Arinite nèn pawh kan buai hrep ngai lovin ka hrilh ngei ang; mahse, tu bulah mah ka sawi chhuah a rem si lo.

Bàn hnua biak in tuala min en deuh hrek hrek chu ka feel thei rêng a, awm pawh awm rei duh lovin Kimi hnënah chuan haw nghâl mai ka duh thu chu ka hrilh ve a, ani chuan," Nia, i thu thu," a lo ti mai a, ani hian Zodina rawn haw chungchâng hi a hre ve ang em? A nih chuan, min ringhlel ve tho ang em le? Min zâwt lêm lo va, kal lam pawh khân min zawhna hun chu a nei reng si a, ka hrilh a ring vete pawh a ni mahna, min ring ve ëm êm si a, min ring êm êm mah se, eng mah lah chu ka hrilh thei bîk si lo, hrehawm chu ka ti ru ve ngawih ngawih a ni.

A lo muhìl tak tak a! A mut tui hmel viau lehnghâl a, thãwm dìm takin ka inthlâk a, damdawi inah a pu kha awmpuiin a meng rim ve ngei ang, chuvàngin mut kham lovin a chàu ve viau ngei ang le, a duh tâwkin han muhìl bawrh bawrh teh se. A lo harh huna kan ei tùr ka buatsaih nghâl a, 

kan khuaah hi chuan cake tharlãm tak tak lei tùr hi a vâng ve si a tiin cake ka ur chawp a, cooker-ah ka ur hluah mai, siam awlsam ber chi a ni bawk a, tui ve viau tùrah ka ngai.

Kimi inkhâwm bâng a rawn pêng a, chutah pawh chuan Jakob-a chu a la rawn harh chuang lo. Zàwi têin kan phun dùn sar sar a," A rawn haw tih ka hre miah lo a nih chu, eng mah lah hi min hrilh duh lo va," tiin a han vui der phawt a, chutah," Thil zawh àwm a ni em tih chu ka hre lo nain in inkârah hian thil awm a awm tak tak chiah em? Min hrilh hreh chu ka ring lo a nia aw," a han ti leh sar sar a.

"Nang leh zêl hi chuan min ringhlel lo teh," ka lo ti ve thung a, ani chuan," Ni tho a... mahse, rinhlelh tùr ting hian i bulah hmuh tùr a awm leh țhìn miau alawm le!" tiin a han nui pût pût a," Vawiin inkhâwm bàn, pâwna kan din lawk lai pawh khân tu emaw chuan a rawn melh rum êm che kha; mahse, nang chuan i hmu lo hlauh a. Tunah hian a bialpa hlui, amah avànga àn khum i tawrhna ngei kha, i inah a muhìl a ni tih hre phei se chuan..." tiin a han chek tlak tlak a, kei chuan," A, a ho êm mai, tunah hi chuan eng mah ka hlau tawh lo, àn khum kha a na lo va, mi min sawi lahin ka taksaah nâ a rawn thlen chuang hek lo, en liam zël mai hi a țha, chhâng lêt lêm hlei lo ila," ka ti a.

Jakob-a a rawn harh meuh chuan eirawng ka lo bãwl țan tawh a, a rawn țhu chhuak hlawl a, lo be vatin," I mu tui bawk em? I chàu ngang a ni ngei ang," ka lo ti vat a, ani chuan," Chàu... Engtia rei nge ka mut?" a ti sup thung a, a hmai chu tuaiin a sam a tuai zui zat a, kei chuan," I mu rei ve riau, i ril a țâm tawh ngawt ang, thingpui ka lo siam ang che," ka lo ti a, thovin ka siam zui ta nghâl a.

"Ka thinrim kha a la reh lo a nia."

Thingpui leh cake a hma dawhkàn têa chhawpsak pah chuan,"I ril a țâm viau tawh ang, ei nghâl rawh, ka siam ve ngei a nih hi," ka ti a, kal sawn leh mai ka tum chuan ka bânah manin," Min kalsan thuai hi châk viau lo teh," a ti sup a, a bulah chuan min pawt țhu a, a chêt dàn teh thut chu mak ka ti deuh a; mahse, thawh san nghâl chu ka tum hran lo.

"A nih chuan, engtin nge kan tih reh ang aw?" ka han ti a, ani chuan," Ti khân țhu phawt rawh," a ti duh chauh a, thingpui leh cake chu a ban zui nghâl a, kei chuan," Ka thil tih lai a laklawh viau asin, ngawi lawk aw, gas saw ka va off phawt ang e," ka ti a, eng mah a sawi lêm loh avàng chuan ka tho a, ka thil chhuan so bawrh bawrh chu ka va off a, suanin chawhtawlhah chuan a tui chu ka bun chhuak a, chumi hnuah chuan chhìn tawh lêm lo chuan tui awmna bulah chuan dahin ka kalsan a, a bulah chuan ka va ţhu leh a.

A intilal thiam bawk sia, a țawng duh hauh bawk si lo, a ngêng thiam ka ti mai, ka be duh bîk hauh lo va, a hnu daihah amah zâwk chu rawn țawng chhuak hmasain," Ka duh i tihhlawhtlin hunah chauh ka thinrim a reh ang," a rawn ti ta sup a. Kei chuan," Chumi hma chuan âtthlâk takin eng thil mah i ti lo ang tiraw?" ka lo ti ve thung a, ani lah chuan," Âtthlâk takin ka che ngai lo; mahse, ka thin a tihrim belh leh hlauh chuan--" tiin a sawi zawm duh lo va. 

Mi dang rawn kal an awm lêm lo bawk a, pawi lo tùrah ngaiin eirawng bâwl pah chuan ngaihtuah vak loh hmel hian," A la naupan zual deuh laia Zodina'n a nuhrawnin a pa a rinawm lohsan lai a hmuh kha i hria em?" tiin ka han zâwt a, ani chuan," Eng maw?!! Engtin nge?! I lo hre ve maw?!! A hrilh che em ni?!! a rawn ti ta vut a, a aw chhuak ațang chuan mak a ti tih a hriat theih avàng chuan ka en vat a, ani pawh chuan min lo en ngun khawp mai.

"I thurûk vawn țhat khiau kha a ni ngei ang maw?" ka lo ti ve thung a, ni e, Zodina khân tu ma hnênah a sawi lo tih kha a sawi ngei a, Jakob-a hian a hre khiau a nih hmèl si a, a thurûk chu a ni ngei ang, 'Zodina thurûk' a tih ngei kha.

Kâr khat a liam hnuah chuan Zodina pu Pu Zuala pawh a rawn chhuak ve leh thei ta a, a natna hre chhuak lo mah se, damdawi in ngê ngêah chuan an lo enkawl țha a, dam takin an rawn chhuak a, a làwmawm. U Ropuia'n damdawi ina a awm laiin Sèrkawnah khân a han tlawh ve a, damdawi ina a awm laiin tlawh ve thei lo mah ila in lama an rawn chhuah hnuah ka lêng ve thung a, a țha tho e. 

Pu Zuala rawn chhuah hnu rei vak loah chuan Vâlpuia pawh ka hmu ve leh ta a, a birthday a hnai tawh si a, a birthday-ah tak amah hi ka hmu thei lo ang tih ka hlau, Jakob-a a nih hlauh chuan awmzia a awm dãwn lo, chutiangin Zodina pawh, Vâlpuia tak hi rawn lang se ka ti ber. A thil duh tak kha tihpuitlinsak ka tum si a.

"Kumin i birthday-ah chuan thil eng emaw tak i dawn ka ring e," ka han ti phawt a, ani chuan," Dawng lo ang, chutiangin miin ka birthday a ni tih pawh an hre nâng," a lo ti a, kei chuan," Keiin ka hria alawm, ropui deuhin kan làwm ang chu," nui sâng chung hian ka han ti a, ani chuan," Tak tak maw?!!" a han ti phawt a, chutah," A, U Jakob-a'n a rem ti lo ang," a ti zuai raih a.

"Rem ti ang, a hre dâwn hleinem," ka tih chuan," A hre leh tho ang, nangma lam kaihhnawih hi chu a hre chhuak zêl alawm. Tuna hetia ka hmu ringawt thei che pawh hi ka lãwm tâwk tawh êm êm a ni, i fel ka ti tak tak a ni, min kàwm hlim a, i bula awm a nuam bawk a, hei vàng hian heta ka awm ve pawh hi nuam ka tih phah ve ta deuh zâwk a ni, nang i lo awm hma kha chuan nuam pawh ka ti ngai lêm lo; mahse, U Jakob-a'n min sâwm tlat a, min țanpui tawh bawk si a, ka hnial thei si lo a ni," dam dap hian a ti a.

"A nih leh, U Jakob-a thu lo chuan i kal bo thei lo tihna em ni?" tiin ka han zãwt a, ani chuan," Aw, hetia kan awm hian mi kan țanpui tih U Jakob-a'n a sawi a,'keimahni ang thoa rilru natna nei kan țanpui a ni' a ti a, chuvàngin kal bo duh pawh ni ila ka thei lo țhin a ni, a chhan chu ka hrehawm tawrh ang kha tu mahin tuar ve lo se ka duh a, mi ka țanpui thei a nih phawt chuan ka dam chhûng pawhin ka țanpui mai ang ka ti a ni," a ti leh dap dap a.

Jakob-a chuan a lo fuih nasa hlê a lo ni. Ni e, ani pawh khân a sawi ve ziah a, eng kawngin nge maw an lo țanpui ni? An pathum hian inanna, rilru natna inang tak chu an nei vek ngei mai a, pahnih chu nu/nuhrawn vànga rilru natna niin pakhat thung chu pahrawn vàngin; mahse, Zodina tân a fair lo. Hetia a taksa hmanga an rawn inlan hian amah chu țanpui taah an inngai a ni ngei ang chu, țanpui ahnëkin harsatna an siamsak tih an ngaihtuah pha miah lo a ni ngei ang.

"Vâlpui, in țanpui pawh chu a lo ni maithei a, U Jakob-a'n a sawi miau si chuan; mahse, hetia in awm hian eng emaw kawng takin harsatna in siamsak thei ang tih lam i ngaihtuah ngai em?" tiin ka han zâwt chhin a, ngun takin ka en ràn bawk a, min chhâng lo chuan a ngawi reng a. Sawi zawm lehin," Nang pawhin he laia awm hi nuam i ti lêm lo va, a chhan chu i chhûngte tak tak bulah i awm lo țhin miau mai a, mikhual ang deuhin i awm țhin tihna a nih chu. U Jakob-a bulah chuan i chhûngte bula kala an kianga awm i duh tak tak tawh thu sawi chhin la maw; a lo rem ti mial maithei asin, bâkah, i duh tak tak a nih chuan i duhna chu a zahsak chein a tilui thei hauh lo ang che," tiin ka han thlêm leh a.

"A thin a rim leh chuan... "

Ka chhàn hma chuan Kimi a rawn lût thut a," Eu, ka rawn tibuai che u em?" a rawn ti lût nghâl a, Kimi mai mai hi, kan țawng kha a rawn hriat hman loh hrâm ka beisei., ka nuih ringawt a, chutah, Vâlpuia chu ka han en a, a hmelah chuan nuam tih lohna ka hmu thei nghâl a, Kimi pek chuan," In inkârah hi chuan eng emaw chu a awm chiang a ni, tiraw Kob-a? Tluangtei lah hian a zêp tlat a," a ti zat zat a, Vâlpuia nuam ti lo hmêl mawlh chu, a zak a ni tih a lang chiang viau bawk.

"Kan inkârah eng mah a awm lo, a nite chu ka u alawm," a ti zàwi raih a, chutah, tho thutin," Ka haw tawh mai ang aw, tih tùr ka nei a," a ti leh a, chelh zui theih loh chuan a chhuak nghâl daih a, Kimi chuan," A zak deuh a ni maw?" a han ti zui a, chutah, nui hak chung hian," Engati nge 'Ka u' a tih che a?!" a ti leh zat a.

"Min 'û' rawh ka ti tlat a," ka lo ti mai thung a, ani lah chu a nui uar sauh a," Chu pawh ni se, ni dangah pawh a 'u' angin a sawi ngai chuang hleinem che, vawiin ataka! Common lo ve chiang a ni," a ti a, a nui leh hak hak a.

*KALSAN DUHTU CHE CHU CHELH NGAI SUH, KALTÎR HMIAH RAWH, CHUAN, I HMA LAM HUNAH LEH I NUNAH A TEL VE NGAI TAWH DÂWN LO NIA*