☆THE SWEETEST HANDCUFFS☆- 31 By Dingdi Pachuau

 ☆THE SWEETEST HANDCUFFS☆ - 31 By Dingdi Pachuau

"Engah nge  a kum zàt ka zawh laia 'Kum 19 ka ni' a tih vei ni?" ka ti leh a, Jakob-a ni lovin Vâlpui a ni a, Zodina pawh a ni hek lo tih hi Kimi hi hrilh hre ta ngat ila chuan dâwt sawia min ngaih loh vêk pawhin ka ã ta emaw a ti hial maithei a ni; mahse, ka kâ ațang hi chuan he thu hi chu a chhuak ngai hauh lo ang.

Ka pa nèn kan inbia a, ka nu pawh a dam tawh a, a ke pawh a hmang thei leh viau tawh a; mahse, thil rit deuh hlek chu chàwi phalsak a ni lo, a kâwng hi a na zing ve a, ka awm lai pawhin rit chàwi lam kher hi chu ka àwl ve țhin.

"Bawihte, scooty hi kan ngaihtuah ve mai dâwn em maw ni le ka ti deuh a, eng eng emawa training i neih châng a awm lo thei si lo va, kha lai phei kha chu motor service kha a chhe riau lehnghâl si a, scooty i neih theih chuan han hawl chhuah mai kha a remchâng riau dâwn asin, bâkah, hun ãwl i neih ve châng pawhin i rawn haw zawk zawk thei ang a," a rawn ti a, chu thu zet chuan min tiphúr ru kher mai! Mahse, phûr deuh anga awm lo tùr chuan ka insûm hrãm hrãm a," Pa, a țha viau mai a; mahse, sum lam hi, kan buai phah mai lo ang maw? Kan buai phah dâwn chuan ka duh hauh lo, nei lo pawh hian kan la awm thei viau rihin ka hria," ka ti ve thung a.

Ani chuan," A, sum chu a awm zêl mai dâwn alawm, mihring hi kan dam phawt chuan sum zawng, a rawn kal zël mai ang. I scooty man tùr na nâ nâ chu kan khâwl ngah ve daih tawh ang chu, hman turin alawm le kan khâwl le," a rawn ti leh a, a han chàwl deuh dat a," Hei, khua pawh a zia tawh a, hun remchâng hun ãwl deuh i neih veleh rawn phei la, zir vak i ngai chuang nâng, cycle khalh kha i thiam sa bawk a," a rawn ti leh a, a rûkin ka nui var var mai. Ni e, training dâwn apianga two-wheeler nei biak ngai ziah leh duh hun huna Lunglei kal mai theih loh hi kawng lehlamah chuan a ninawm ve êm asin, Scooty ka kawl hlauh chuan Inrinniah pawh Lungleiah ka kal ve zawk zawk thei tawh ang a...

Ka pa nèna kan inbiakna chu ka ngaihtuah țhin a, ka rilru a phûr sãrh mai. Thil ka ti rêng rêng pawh chu ka boruak a zängkhài ëm avàng chuan ka zãng vah mai a, naupang thil thar neih châk ang maiin haw hlàn ka nghâkhlel tawh viau a ni. Ka hlawh neih ve hi ka pa hian lâk chhuah a phal ngai lo va," Tikhân, i dah țha a ni mai, ka hlawh chhuah mite angin  tam viau lo mah se, ka nupui leh fate chàwm nân hian a tâwk tiu teu viau a ni," a ti țhìn a, ka mamawh tùr pawh hi ka account-ah a rawn thun mai ţhin. In luah man ka châwi lo va, chawhmeh lam ni se thingtlânga awm ka ni bawk a, lei reng ngai lovin min duhsaktute'n min pe ve reng a, ka leisak châng pawh a awm ve tho mai; mahse, lei lo ang tluk ka ni, tuna ka khawsak dànah hi chuan pawisa hmanna tùr hi a tam vak lo.

Pathiannia kan inkhâwm bâng chu pãwnah kan țhuho tal tal a, kei pawh tlêmin ka inthlahdul ve thei deuh hlek, a chhan chu Arini ka hmu tlat lo va, chutiangin a nu pawh.  Min melh rumtute awm lo chu ka awm a nuam ve alawm, chutah, Zodina a rawn inkhàwm lo bawk a, mi mitmei vèn tùr a awm lo bawk nen, Kimite titi barh barh chu lo ngaithlain ka nui sak sak a. 

Ka hminga min rawn kotu a awm avàng chuan chu lam chu ka hawi vat a, U Vànlala lo niin, a bulah chuan tlangvâl pakhat hi a lo ding ve a, min rawn nuih var var phawt a, a bula mi chu a han be zauh a, kan lam pan chuan an rawn pên zui ta nghâl a.

"Inhmuh a va khât ve! I vâng hle mai," a rawn tih chuan," Nia, tiraw? In rawn lêng duh lo êm mai a," tiin ka han nui phawt a, chutah," Ka țuanna mualah hi chuan ka tam ve teh asin, in dam țha maw?" ka ti leh a.

"Um, dam țha e, kan dam tlâng e. Hei, ka bula mi hi i la hria em? Ngawi teh u, han inchibai rêng rêng teh u, in inhmu khât si a," a han ti leh a, nui hmél deuh hian chu pa kut rawn phar chhuak chu ka en phaet a, a hmël chu ka en chho leh a.

"Hmm...ka hre deuh chuan ka hria a; mahse... ka hre chiang chiah tawh lo a ni ang," nui paha ka tih chuan chu pa chuan," A àwm tho mai, Caleb-a ka nia, kei chuan ka la hre reng che," tiin ka kut chu a rawn vuan a, min hmer nghet viau.

"Kan inneihnî khân cameraman a nia," U Vànlala chuan a lo ti a, kei chuan," O, a ni maw? Ka hmuh hnu i ang ka ti rêng a ni," ka ti ve a, nia, a hming chu hre lo mah ila a hmêl kha chu ka hmuh hnu ni khân ka hre ve rêng a; mahse, ka hmuhna hmun ka ngaihtuah chhuak thei lo a ni.

Kimi chu rawn hawiin," A, Caleb-a chu, eng nge i rawn tih? Engtikin nge i rawn kal a? Eng nge i rawn tih dâwn?" tiin zawhna nèn be hlutin a han chibai ve zui a,"Ranngo zawngin a rawn kal a nih hi, a ranngo duh zâwng tak a hmuh hma chu a châm  maithei a ni," nui chung hian U Vànlala chuan a rawn ti a, ka nui ringawt a,  Caleb-a pawh chu lo nui vein," Ranngo zawng min ti ve ziah lo teh, nulate'n min hlau zo ang a, min kàwm duh pawh an awm nâng," a han ti ve a, Kimi chuan," U Vànlala hniakah i zui dâwn tihna a nih chu," a lo ti vat thung a.

Kan haw chu min zui haw ve nghâl a, Kimi chu a țawng barh barh reng a, U Vànlala nèn chuan an țawng deuh ber, Caleb-a chuan," Nuam i tih ve tawh hmêl viauin ka hria, i awm rei ve ta deuh bawk a," a rawn ti sar sar a, ka lo en vat a, nui sak chung hian," Um, nuam ti tawh e, an fel hlawm êm mai a, nang pawh i chàm rei chuan an felzia hriain nuam i ti ve tho ang," ka han ti a.

Ka inah kan lût dial a, thingpui ka chhuang nghâl a, U Vànlala chuan," Mikhual tlangvâl ka lo lènpui ngawt sia, tu emaw mit hi kan lo tikham viau lo ang maw?" a han ti a," Kham tùr pawh an awm lo," ka lo ti vat a, Kimi chuan," Ani hi chu a luck lutuk a, tlangvãl mai ni lo putar mit thleng pawhin a kham maithei a ni," nui chung hian a lo ti a, kan nui dar dar a.

Caleb-a chu tlangvâl pângngai tak a ni. A țawng duh ve tho a; mahse, ninawm khawpa țawng duh chu a ni lo, bâkah, mi țawng hun a ngaichang thiamin mi thu sawi a ngaithla ngun a, nèlawm tâwk lekin a nui duh ve tho bawk. A hmêl pawh a chhe hran lo, ngo lam niin a lang ria lek lek a, a sàn deuh vàng pawh hi a ni mahna.

An lêng rei ve a, an haw dâwn chuan pâwn lèr thleng ka thlah ve a, zàn inkhâwm bàna rawn lèn leh an tum thu chu sawiin an haw zui ta a, ka en zui vang vang ringawt. Khua a la tlai lo va, eirawng bàwl hun chho dâr 3 vêl a ni a, hawi vêl ila in tin deuhthaw chunga meikhuchhuahna awm ațanga mei rawn khu chhuak ngiai ngiai hmuh tùr a awm, mite pawhin an bâwl țan dâwn a ni ang.

Inkhâwm bànah chuan U Vànlala'n  rawn lènpui tawh lovin min zui haw leh nghâl a, kaengah chuan kan titi thla barh barh a, Kimi pek chuan," Han innei ta thut ula, in inhmeh dùn àwm mang e tih ka lo ngaihtuah pek a nih chu!" a rawn ti chhuak a, Caleb-a chuan," Ngaihtuahna țha tak leh hlimawm tak a nih àwm chu," a lo ti mai a, a nui sâng a, kei pawh chuan," Ani hi chu a rilru hi a țha a, thil hlimawm lam chauh suangtuah hian a ngaihtuahna hi a sêng nasa ve thei a maw, hriat thiam hi a ngai tak tak a ni," ka han ti a, Kimi chu a nui hak a," Buaina lak ata chhan chhuah che ka duh alawm," tiin Caleb-alam chu hawiin," Caleb, châm reng rawh aw, lo-ahte kan kal leh ang a, i châk ve êm kha, hun remchâng tak a ni dâwnin ka hria," a ti zui leh zat a.

"A châkawm khawp mai, nia, khua han vâr phawt se, chuan, dam hi han hauh tlat bawk ila," ani chuan a lo ti duah a, Kimi chuan," Han tum phawt ila, tumna a awm hi chuan kawng pawh hi a awm ve zêl a nia," a ti ve leh a, ka kawt kan thleng a, Kimi chuan," Ka lo pêng ve tawh lo mai ang, ka dãl palh ang che u," tiin a nui sûng a," Thingpui lo in ve phawt rawh," ka tih pawh chuan a hnial tlat a," Mi inlêng lo kawmpui tlat tum ka ang àwm ëm mai," nui chung hian a ti tlat a, a haw zui ta daih a.

Caleb-a nèn chauh chuan kan lût ta a, sawi tùr, han titi tùr ka vàn viau dâwn a; mahse, amah zâwk chuan sawi tùr a hriain titi tùr a rawn țhet ta zâwk a, sawi tùr pawh a tam ve ta, mi pahnih chauh awm ve si-ah chuan kan titi dùn viau a ni.

A tûk zàn lama Jakob-a a rawn lan ve tâk hlawlah chuan mak ka tiin lo chhawnna châng pawh ka lo hre lo lek lek hial a ni. Caleb-a a rawn lèn teh chuan aw... a thin a rim leh ringawt ang chu, a lo lèn laia mi dang inlêng ka neih chuan, a fuh lo. Caleb-a kha a la haw lovin ka hre bawk si, a rawn lêng leh ngei ang.

Rilru bet vak lo chuan Jakob-a chu ka kàwm a," Ka hriat lohin Vâlpuia kha lo titipui tawh lo la ka ti khawp mai, bâkah, naupang mai a la ni a, i bulah eng pawh sawi se a thil sawi chu ring duh lêm suh, ani pawh kha ka țanpui tho a nih kha," a tih chuan," Eng thil vak mah min hrilh lo, kawm kha a nuam reuh--" ka sawi zawh hma chuan," Keimah ni lo mipa dang chanchin chu sawi lo teh ang, an hming leh chanchin i sawi hian thîkna meipui hi ka thinlungah a rawn alh pup pup țhìn a ni. Nang hi chu ka tâ liau liau, ka thinlung tâna serh hran i ni si a," a lo ti bung vut a.

"Mahse, i nau tho a ni alawm, nau angin alawm ka en, i țanpui avàngin ka lãwm e, i fel ka tiin ka tluk lo viau che a ni. Vâlpuia pawh khân fel a tih viau che kha, zah pawh a zah hlê che asin," ka ti lui ta tho a, ngawi vung vungin min en rùn a, ka duh zâwng sawi lui zêlin," I thu pawh a âwih viau a ni; mahse, kan thu âwih viau țhinte hi kan en hniam mai tùr a ni lo va, kan thu hnuaiah kan dah kher tùr tihna pawh a ni chuang lo, anmahni leh an duhthlanna kan zahsak lêt ve tùr a ni, thunun tlat tum tùr a ni lo va, chutianga tih theihna dàn lah kan nei hek lo, duhthlanna inzahsak hi a hlûin a mawi viau bawk," ka han tih chhunzawm leh a. Ka thil sawi chuan a thin a tirim ang nge a rilrem zâwng tak a ni ang tih ka ngaihtuah zui nghâl a; mahse, eng zâwk zâwk pawh chu lo ni se, pawi ka ti chuang lo, ka duh ka sawi tawh tho.

Caleb-a chu a rawn lêng ta lo hlauh, U Vànlala nèn an ram chhuak a, an haw tlai deuh si a, rawn lèn duh viau mah se lèn nân chuan duh aiin a tlai deuh tawh si a  ni àwm e, chutiang chuan min rawn text a, Jakob-a haw hnuah, mut dâwnah hmuin ka chhiar ve chauh. Pawi lo ka tihzia mai chuh, rawn lêng tho na se chuan Jakob-a a thin a rim leh hlur ngei ang.

Caleb-a chu a chàm chhûng chuan zànah a rawn lêng deuh ziah a, ka inlêng neih ve țhin Amos-ate rawn lèn zànah pawh a rawn lêng fuh a, mi fel ve tak chu a ni ngei mai, chutiangin Amos-ate pawh an ni tho. Khual vâl leh khawtual vâlte hi an nula chungchângah leh eng eng emawah an inhmuh thiam loh duh tehlul nèn, chutiang lam awm hauh lo chuan nêl takin an inbe nghâl bawrh bawrh a, an titi a, an nui a, fiamthu thawhin an insawisa a, an chêt chhiatnate nèn lam an sawi chhuak a, kan nui viau a ni.

Caleb-a chuan sawi lang dawt lo mah se, a mitmeng leh chezia ațangin min duhna a nei tih ka hmu thiam ve mai a, bâkah, awmze nei deuh hleka min fiam zauh a hrât bawk, tihngaihna erawh ka hre lo khawp mai thung. Amah chauha a rawn lèn zan phei hi chuan a rilru tùr àwm ka hre ve deuh ruak si a, ka lài ru ve deuh ringawt țhin nia!  Thil hrehawm ngawih ngawih chu ni hran lo mah se, min en duh thei bawk si a, a zahthlâk ve êm a ni.

Zodina'n min rawn bia a, min rawn hmuh lawk a duh a ni àwm e. Eng vàng tak chu ni ang maw? A pu vàng chu a nih loh hrâm ka beisei, nimin lamah pawh a țhat reng kha. Kan inhmu khât ta deuh hlek a, nimina an ina a pu kan va tlawh lah khân ram lamah a lo kal daih si a, a phone lah kha vawm chhiat chu ni êm tawh lo mah se, Jakob-a'n a dah bo daih a, min rawn be ngai tawh lo, tunah pawh hian a nî phone a rawn hmang a nih ka ring.

Office-ah chuan a rawn kal ta ngei a, U Ropuia a hmuh chuan a tàwi deuh hrat a, a ni lah tak a, ani lah chu kawngka bul maiah țhuin ngun zet hian a lo thlêk a, a zathlâk duh ve maithei, mipa mah ni se, ngun zeta han inthlék chu a nuam vak chuang lo ang.

"Lo kal rawh, lo țhu rawh, i pu eng nge a an? Tukin lamahte a tho nuam em?" ka lo ti vat a, ani chuan," Aw, a țha e, a changkãng sáwt lutuk, chaw hi chu la ei tam lo mah se thil tuirîl lam hi a ei tam ve thung a, a chak chhiak thuai mai ang," a ti duah a, a la din reng avàng chuan țhu tùr chuan ka han ti leh a, ka piah chiaha chair chu ka melh pah zauh bawk a.

Ani erawh chuan," Khawngaih takin ka be fâl thei che ang em? Mimal thil deuh hlek a nia, a pawimawh viau mai; mahse, ka be rei lo ang che," a ti leh a, a thil sawi chu mak ka ti deuh hlek a, ka en deuh hau nghe nghe. Eng thil nge ni ang? Thil hriat chhuah thar a nei em ni? Min la hrilh loh a lo la nei em ni zâwk?

Ding uaih pah chuan,"U Ropui, ka inah kan kal--" ka sawi zawh hma chuan U Ropuia chuan," Mai mai a, thil pawimawh tak a nih ngei ka ring, inbe r'u, dàwra kal ka ngai tho a, ka lo va kal ang e," a lo ti a, a tho nghâl vat a, kei chuan," A ngai hleinem, keimahni kan kal chhuak ang," ka ti  ve thung a, Zodina chuan," Nia, biak lawk chhûng kha a ni mai, kan rei lo ang," a lo ti ve a; mahse, U Ropuia a chhuah nghâl tâk avàng chuan ka țhutna ngaiah chuan ka țhu leh a.

U Ropuia ke pên thãwm a zuih ral hnu chuan Zodina chu enin," Eng thil nge ni ta? A pawimawh hmël mai si a," ka han ti a, ani pawh chuan," Umm... ka tân chuan a pawimawh khawp mai," a ti phawt a, a ngawi leh vang vang a, sawi a hrehawm deuh a ni maithei a ni.

"Tluangte, ka tlai tawh em tih chu ka hre lo va; mahse, ka la tlài loh hlauh tâkin ka ti a ni, sawi loh ka tum ve ngar ngar a; mahse, ka sawi loha ka ngawih bopui a nih chuan ka tlãi ngei dâwn tih ka hre si a."

Ka en chho ngar a, ani pawh chuan min rawn en chhuk ràn mai. A sawi hreh ve deuh a ni, a hmui chu a pet zauh a," Sawi ngam tùr chu ka ni hauh lo tih ka hria; mahse, min turtu hian min tur na êm a, ka inchhìrna mai tùr pawh ni se ka duh che tih thu hi ka hrilh ngei che a ngai a ni, engtik ațangin nge ka duh țan che tih chu ka hre lo va, hriat kher pawh chu a pawimawh ber lo bawk, min chhâng tùrin ka phût ngam lo che a, hrilh hriat hrim hrim che hi ka duh chu a ni," a ti chhuak ta sap sap a.

Hriat ka lo inbeisei nèn a thil sawi chu a inpèrsan êm avàng chuan ka en chho hau reng ringawt a, ka la ngawi reng bawk. A lu chu a han tuai zauh a, amah vêk chuan," Eng angin nge min ngaih ang tih pawh ka ngaihtuah ngam lo; mahse, ka duh thu ka hrilh tawh che a, ka thu sawi i ngaithla duh hrim hrim kha ka lâwm tawh a ni, kei tehlul hian khatiang thil kha hrilh ngam tùr che pawh ka ni lo tih chu ka hre reng; mahse, inchhìr ka duh loh vàng a ni. Ka sawi tùr ka sawi zo tawh a, ka kal tawh ang e," a ti leh sap sap a, ka țawng ve hman hma chuan hmanhmawh zet hian a chhuak zui ta nghâl a.

Zodina'n min duh tih a sawi a nih chu! Engtizia teh thut nge ni dâwn ni? Ka lu chu ka han thing nak nak a, ani khân min duh ka ring lêm lo va, kei lahin chutiang lamin ka lo en ngai lo bawk, țanpui a ngai a, țanpui ka tum mai a ni asin le.

Mahse... engtin nge ka tih tâk ang? A thinlung aţanga chhuak a sawi a nih chuan engtin nge ani pawhin a tih bîk chuan ang le? Thup zo thei tawh lovin a sawi chhuak a, sawi chu a hreh ve zia kha, a chanchin min hrilh a,  a awm dàn leh a natna zawng zawng hretu ka ni, chutiang pawh ngaihtuah thei lo leh zah pawh sawi hlei thei lovin min rawn kalchilh ve ngat a nia, lehlam taka ngaihtuah chuan a tiropui khawp mai.

Jakob-a, Zodina leh Caleb-a.   Kimi ka hre chhuak zawk. Aw... ka va luck si êm!!

*ÎTSÎKNA HIAN RAH ȚHA A CHHUAH MAWH KHAWP MAI A, THIL ȚHA LAM AIIN CHHIATNA A THLEN ZÂWK FO*