☆THE SWEETEST HANDCUFFS☆ - 32 By Dingdi Pachuau

 ☆THE SWEETEST HANDCUFFS☆ - 32 By Dingdi Pachuau

U Ropuia lo lût chu a rawn nui lût var var a," A pawimawh viau a nih ka ring a ni, a nî tùrte in sawi fel nghâl em?" a ti zui zat a, kei chuan," Um, sawi fel nghâl vek mai e," ka lo ti ve mai a, ani lah chuan tàwp duh mai lo chuan," Ka sawi kha i la hre reng em? Thingtlângah pasal neiin i awm dâwn chu a nih hmel ta si a; mahse, duh berte nèn chuan khawi hmun pawh hi a nuam vek a nia, bãkah, he lai hi chu thingtlâng chengker tak pawh a ni lo va, a zia deuh ang chu," a ti leh duah a, ka nui chhuak ta hawk a.

"I sawi thui lutuk! Ka la suangtuah chhin ngai loh ram a nih chu i sawi ni," ka ti phawt a," Nang dàwr kalah eng nge min rawn hawn?" ka ti zui zat a, ani lah chuan," Dàwrah ka kal awzâwng lo, ka chhuanlam siam mai a nih kha. In thãwm hriat phâk lohna tùr chinah inthiarfihlîm a ngai si a, ni sensa hnuaiah ka va teihawi mai mai a nih kha, nangmahni vàngin, kan nu chuan hria se chuan min khawngaih ngawt ang!" a lo ti muang raih a, a thil sawi chu a ni  tak tak ang em le? A fiamthu mai mai a niang; mahse, lo ni lovin thu dik a lo nih hlauh chuan... Inthiam lo ru tak chuan a hmêl chu ka en phei ta vat a; mahse, a lo nui hmêl ka hmuh tâkah chuan a tifiam mai mai tih ka hre thei ta nghâl a, ka thaw huai mai.

Keimah chauha ina ka awm hnu chuan vawiin lama Zodina thil min hrilh kha ka ngaihtuah lêt a, a tider mai mai lo ang tih chu ka ring a; mahse, ani nèn hian, engtin nge ni ang? Amah ațanga mi dang rawn lang țhìn Jakob-a nèn kan inkawp a, zêp theih lah ni hek lo, ani pawhin a hre vek a, chutiang pawh pawisa lo chuan min hrilh chu a ni si a, chhàn ngaihna ka hre lo viau a ni. Bâkah, ani hi ka lo duh ve rêng rêng em? 

Zàna Caleb-a a rawn lèn chuan," Zanin chu rei deuh hlek lèn ka duh maithei a ni, naktûk lamah ka haw tawh dâwn si a," a han ti a, en vatin," A ni maw? Haw i va tum hma leh sî ve!" ka lo ti ve vat a, thingpui chu ka pe nghâl a. Ani chuan," Ka châm rei ve tawh alawm; châm rei chu ka la inti chuang hauh lo nain, in lamah min mamawh ve tawh si a. He lama awm rih chu la châk rih viau mah ila, min ngai tùra ka duh lah hian min ngai țha duh meuh si lo va," a han ti leh a.

"A va sual ve a! Tu nge ni? Min han hrilh teh, ka'n hau hrep teh ang," ka lo ti ve a, ani lah chuan," A, hauh ka phal teuh lo mai! A thlalâk lian pui ka nei tho a, chu chu ka lunglèn zual chãngin ka thlîr leh ţhìn mai a niang chu," a lo ti ve leh zêl a. A thingpui chu inin a han ngawi deuh vang vang a,"Ka hman hmasak berah rawn zin leh thuai ka tum ang, ka hmuh loh rei che chuan ka ngai leh dâwn si che a, ka ngaih viau ang che hian min han ngai ve tal la ţha tùr hi a nia! Tlêmin ngaih pawh a țha deuh thei ang a," a tih leh chuan," Mi rilru i hre thei ngawt ngawt em ni? Engah nge maw ngai lo tùr chea min ngaih ngawt a?" nui chung hian ka lo ti ve a.

Kawngka a rawn ri a, Amos-a leh Nunmawia an rawn lût a, mi dang an awm ve tâkah chuan chu lam chu sawi rîk thu awm tawh hek lo le, a rûk tak chuan ka thaw a veng deuh huai mai, a chhan chu Zodina ang khân min duh thu a sawi ve ka hlau a ni, chhàn ngaihna ka hre dâwn si lo, a lehpekah hmuh ka hreh phah vek mai ang, Zodina pawh hi ka la hmu leh ta lo va, ka hmu hreh dâwn tih ka hre sa reng mai.

Caleb-a haw chu a reh ve rawih maiin ka hria, zàna a rawn lèn ve deuh ziah a ni ngei ang; mahse, haw mah se phone lamah min rawn be ve leh ta thung a, min rawn biakna hmasa berah chuan min ngaih thu leh min duh tak zet thu a rawn sawi ta chiah a! Mak pawh ka ti lêm lo va; mahse, hmaichhan ai chuan phone-a inhrilh chu tlêm chuan a zahthlâk loh deuh nain zâwng-sih-siam-sual ang maiin ka țawng zo chiah hi ka insiam chhe nghâl zêl maiin ka hria! A chângin ka țhen vak a, a chângin ka maimichhîng leh vak bawk a. Min lo hmutu awm ngat se zawng, min hlau hial ta ve ang, a nih loh pawhin, mak chu min ti ve ngawtin ka ring!

Jakob-a'n," Eng thil țha lo nge Vâlpuia i lo sawipui chiam le? Ka thu sawi a ngaithla țha duh mang hauh lo va, a awm dàn a nin tawh thu sawiin min hnial ngam ve deuh tlat mai. Nang hian i lo fuihpawrh a ni lo maw? Ka ring phal chiah si lo, Zodina  nèn inthurualin hetiang thil hi ti i ni mial em?" a tih chuan ka en ringawt phawt a, ka chhâng nghâl duh rih lo. Ani lah chuan mitmeng hriat thiam har zet hian min en rùn mai a, kan inen reng. A hmel hi chu a chhe lo chiang a ni, ka pawm thlap, a chezia leh awm dàn lah hi hmeichhe duh chi tak a ni zui. Kei pawhin ka duh țhin alawm; mahse, tunah chuan ka duh ngam tawh lo, thil dik lo tak a ni tih ka hre tawh a ni, Mami a duh tih ka hriat ațang khân ka tih dik lohzia ka hre chiang zual deuh deuh a, eng tikah nge Mami ka ni lo tih pawh hi ka hrilh ang ni? Ka hrilh ngei a ngai, thu dik a ni tlat. Zanin hian ka hrilh mai dâwn em ni ang? Mahse... a, a la hun lo deuh, kan zin hunah, thurûk min hrilh zawh hunah le, a hriat hun tùr mawlh chu, ka bumah ngaiin a thin a rim ngei ngei dâwn si a, ka huphurh lâwk sa.

"I ring em?" ka han ti ta sap a, ani chuan khap hauh lo hian a mit chu a'n zìm deuh ser ser a," Eng vànga Zodina hi țanpui duh nge i nih? I țanpui theih chiah i inring em?" a rawn ti ve ta thung a, ka hmui chu ka han liak huh deuh a, hawi sawn pah hian," A nun dàn pângngaia nung thei lova hetia a awm ngai tlat hi thil dik a ni meuh lo chuan ka hria, a khawngaihthlâk i ti ve lo maw?" ka ti ta sap a.

"Chuvàng alawm ka puih, pui lo ila chuan tuna a nun dàn ang pawh hian a nung pha nâng!" a lo ti ve thung a, kei chuan," I ti làwmawm ka ti ngawt mai, țanpui ngai i hmu a, kalsan mai lovin i țanpui a, i felin i ti țha ka ti. Zodina chungchângah mai ni lovin Vâlpuia chungchângah pawh. Chuan, i puih thu hi i sawi ta zauh zauh a, engtiangin nge i țanpui dàn hi ka hre châk. Engtin nge țanpui ngaia an awm theih? Eng vànga țanpui ngai nge an nih ka hre châk tak zet a ni," ka ti ve ta thung a.

"Chu chu Vãlpuia'n a hrilh che maw? Chu pa mai mai chuh!" a ti ta nghut a, ka sawi sualzia ka hre chhuak ta chiah mai. Vâlpuia chungchâng kha chu sawi chhuak lo tùr ka ni asin le, ka lo ngaihtuah chiang lo deuh a ni; mahse, amahin a rawn sawi chhuak hmasa a nih kha, a thinrim pawh ka lo ring hran hleinem.

"Mawh, min han hrilh teh, i țanpui dàn tak kha ka hre châk!" ka lo ti leh a, a sawi chhuah lai tak hian zawh chhuah ngei ka duh, a hun lai tak a ni si a, bawhpelh ka tum lo.

"Tunah chuan ni lo ve, kan han zin dùn tê tê ang a, chumi hnu lamah chauh ka hrilh ang che. Kan zin dùn dâwn tiraw?" 

"Aw, ka hman hunah. Ka hna tikhaihlak thei zâwng, entîr nân chawlh ka neih loh hun, ka la hman loh hun, tûn hun angahte hi chuan zin dun i tih deuh bur chu ka ring lo a nia," ka lo tih chuan bu nghat pah hian," Ti dâwn nâng, i hman hunah chauh. I rilrua thil dang ngaihtuah rùn chung chuan hun a hman nawm theih dâwn loh, chuvàng chuan, hun thâwl i neih hunah chauh, ka nghâk thei che," a rawn ti a.

A haw dâwnah chuan ka thlah a phût deuh tlat a, veranda thleng thlah tum ka nih laiin ka kutah a chelh tlat a, ka in piah deuha thing buk hnuai thleng chu ka kalpui a, min hmu tur an awm lêm lo bawk nèn, ka hnial lo mai a ni. Thing buk hnuai, hmun dang aia thim deuh hmak bîkah chuan min dinpuiin muangchâng hian min rawn kuah a, kei pawh chuan tîm deuh hlek chung chuan ka han kuah lêt ve a, a rimtui hman rim nam chêk chu ka han hnìm vang vang a, a rim a tui leh vang vang khawp mai.

"Thil tam tak ngaihtuah lo la, a hun takah chuan engkim ka hrilh vek dâwn che a ni, min ring hmiah rawh, ka hrilh dâwn loah che ngai miah suh aw," a ti sup sup a, kei pawh chuan," Um, ka ring che alawm," ka lo ti ve sap a, chutah, ka biang tawn tawnah chuan vuanin ka chal chu dìm tê hian a han fâwp zauh a," In chhûng ai chuan hetia pâwnlèr êng vak lo hnuaia awm dun hi a romantic zâwk daihin i hre ve lo maw?" a han ti zui a, a nui suk zui a, ka chhâng lêm lo.

"Ka haw tawh ang e, miin min hmu palh ang," ka ti sap a, ka kuahna ka thlah dâwn chuan min kuah nghet leh sauh pah hian," Ka kuahna che a rei tawh ëm mai, ka'n kuah leh vang vang teh ang che, ka ngai riau chein ka hria zanin phei chu, thlah che hi ka hreh ngawih ngawih țhin, thlah ngai lova kuah reng theih che hun hi ka nghâkhlel tak zet a ni," a han ti zui a, min thlah lawk duh lo nghe nghe.

Dam miau chuan hun a ral ve zêl a, Pu Rovate pawh chuan an bike chhia chu motor remchângah Lungleiah an phur thleng a, workshop-ah an dah lût nghâl a. A chhiatna a lo ril hran lo a niang, rei lo tëah Puia'n a rawn khalh haw thei ta mai a, Pu Rova chuan," Tunah chuan rilru buai a zia ta, i training leh a nih pawhin mi dang biak buai a ngai tawh lo ang," a han ti a, kei pawh chuan," Nia, in siam țha chu a làwmawm ngawt mai; mahse, ka training dâwn hunah hian Puia hian min lo ning viau mai ang tih chu a hlauhawm angreng," ka lo ti ve a, Puia pawh chuan," Chhuanlam hi ka lo siam deuh reng mai ang ah," a lo ti ve a, Kimi rawn inrawlhin," A, ngawt ngawt a, lo hauh deuh tlattu pawh a awm ràn reng thei asin, hmêlma neih a hlauhawm, kan ngam dâwn si lo," a rawn tih chuan ka lo melh rum a, Pi Vàni chuan," A daih rei ngût ang em maw le? In han inphur ve ang a, kawng lakah hian a chhe leh daih si ang a, tihngaihna hre lovin in hawihil nasa àwm mang e," a lo ti ve leh a, chutianga insawisa chho chuan kan nui dar dar a. 

Ka pa thil min hrilh kha ka ngaihtuah reuh reuh reng a, calendar ka thlêk phah fo bawk. Haw phei lawk theih hun tùr ka melh a ni, zirtàwpni chawlh awm ka han melh deuh a, a vâng phian mai a. Thawhțanni lam ka han melh leh a, chawlh awm chhun chu Thawhțanni chu a ni ngei mai a; mahse, haw phei duh avànga han chawlh ngawt mai pawh chu; mahse, chutia ka tih mai chu a ngai ang, ni khat chauh chàwlin ka haw phei ang a, Zirtàwpni chàwlin  haw phei ila, Thawhțanniah phei leh ta ila...

Biak ina ka hmuh chu min duh thu min hrilh hnua ka hmuh lehna hmasa ber a ni. Amah ngei a ni tih hrilh ka ngai lo, min rawn hmu ve tho a; mahse, ka hawi sawn hmasa zâwk, hmuh ka inring lo viau a, bâkah, min rawn en ve tih ka hmuh khân engtin emaw tak hian ka awm tlat a ni. Min rawn hmu tlang vek nia hriatna ka nei tlat pek a nih chu! Ka biang chu a sa deuh hat hat a, chutiangin ka beng pawh, ka han tuai zauh nghe nghe.

Bànah chuan mau hmanga țhutna siamah chuan kan țhu khâwm tal tal a, Kimi pawh a titi leh barh barh tawh a, kei erawh chuan a rûkin Zodina ka ngaihven deuh reng a, a rawn kal thut ka hlau a niang ka hre thiam chiah lo ka awm dàn hi, hmuh hreh siin hmuh châk deuh tho si hian ka awm ni berin ka hria! Rawn kalin min rawn bia ang tih chu ka hlau viau tho bawk si, rawn kal ta chiah se ka lài chhe viau ang em?

Mahse, vànneihthlâk ka ti dâwn nge, vànduaithlâk ka ti dâwn zâwk ni, mi dang a bia ka hmu a, a rawn hawi loh bâkah a bulah chuan an ding khâwm ve deuh țiai bawk a, ani hi țhian a lo nei ve nual a ni ngei ang, țhian a kàwm erawh ka hmu khât hlé si, ka lo hre chiang lo viau a nih dâwn hi.

Haw kawngah erawh kan kal tlâng leh ta tho a, han biak lûmlãm pawh ka hreh zo ta vek mai. Ka boruak hre ve miah lo chuan Kimi chuan a titipui bawrh bawrh a, ani pawh chu a țawng zauh zauh a, kei erawh chu ka lo inrawlh ve lo, kal pahin an titi  ka lo ngaithla a ni ber ang chu.

"Tluangtei chu, i va ngawichawi ve!" Zodina'n a rawn tih chuan ka en vat a; mahse, ka hawi lêt leh vat a, Kimi chuan," A, hre thiam rawh, mikhual tlangvâl kha a ngaihtuah a ni ang, a ngai viau a nih dâwn hi ka lo ti mai asin," nui har har chung hian a lo ti a, ka melh rum deuh hlak, Zodina chuan," A ni maw? A va bengvàr loh theih ve le! Mahse, nula hmel țhate hi chu an luck duh viau tak asin. Chu, mikhual tlangvâl lakah kan chân dâwn a ni maw?" a rawn ti leh a, en lo mah ila min en tih ka hria.

"Maithei a ni, kan vêng tlangvâlho hi  fuihpawrh deuh an ngai a ni, kan khuaa hna thawka rawn awm nulate hi chu chhuah chi miah loh a nia, lo chàr hmak hmak tùr an ni asin le! Kei tlangvâl ni ve ta ila ka han hlah loh dâwn tehlul nèn! Ni tin zan tin deuhthawh ka birh tluk tluk ang a, min duh loh pawhin min ning lutuk ang a, tihngaihna hre lovin a tàwpah min nei tho tho ang," a han ti zat zat a, amah lah chu a nui sûng bawk si a,  ka nuih a tiza khawp mai. 

"Min ning lutukin Police-a min report ta a nih leh chutiang case avànga tàn lah chu ka tàn rei ka ring si lo va, ka chhuah veleh a hma aia ngawrhin ka birh țha leh ang a, min ning neih tho tho ang," a tih leh phei chuan tu mah insûm thei lo chuan kan nui ta vek a.

Pi Vàni sawi ang deuh tak takin an bike chuan a daih rei vak lo, bâkah, Vâltea'n a lo tlûkpui deuh ni àwm a ni, a chhe leh ta daih a, an hmang rei lo kher mai. Siam an han sawi leh deuh a; mahse, Pu Rova chuan a chhia thawm thawm ai chuan nakin deuha a thar lei mai țhaa a hriat zâwk thu a sawi avàngin Puiate pahnih chuan siam țhat leh lam chu an sawi ta lo.

Zirtàwpniah haw tùr chuan sumo-ah ka chuang ta vàng a, kâr tìr lamah daih tawh khân U Ropuia ka sawipui tawh a, ani pawh chuan," E, va haw rawh, chutia scooty i neih theih dâwn chuan a țha lutuk, i mamawh lutuk tlat. I sawi har ka lo ti tawh zâwk a, i mamawh viauin ka hre si a. He lam chu ngaihtuah miah suh, ka lo enkawl țha viau ang, i awm lo tih an hre miah lo ang, tu emaw chauh lo chuan," nui chung hian a lo ti thên a, min fiam dàn kher kher chu, ka nui ringawt nghe nghe. A fel bawk a, ngaihngam takin ka haw theih phah a ni.

Mak tak maiin Zodina Lunglei kal tùr a rawn chuang ve chiah mai a, ani chu bike-in a kal thei reng àwm si a. Kei lah ni danga Lunglei kal ngai hlei lo, a kal ve țum taka ka han chuan ve leh khauh bawk chu, a mak ka ti ru viau mai, ka bulah chiah a rawn țhu zui.

Min be luam a,"I Lunglei ve dâwn teh tlat elo? Training i nei leh ta a niang maw?" a ti a, ka haw lawk tùr thu ka hrilh chuan a ngawi deuh vang vang a, Remsiama chuan," I nu leh pate i ngai leh tawh a ni maw?" a lo ti ve a, chhâng lêm lo chuan ka nui mai a.

Lunglei kan thlena ka chhukna tùr hmuna ka chhuk chuan ani pawh chu a rawn chhuk ve nghâl a, a chhukna tùr hmun a ni ve tho a nih dâwn hi ka ti rilru mai a; mahse, ka kal min rawn zui tâkah chuan," Khawnge i kal ve dâwn?" tiin ka han zâwt a.

"Ka lo thlah liam ang che."

Ka ding deuh dat a, a lam chu hawi deuhin," A ngai lo, tunah lah ka kal nghâl dâwn pawh a ni lo lehnghâl a, i tlãi vek mai ang," ka han ti a, ani lah chuan," Tlãi lo ang, lei tùr ka ngah lo," a lo ti leh mai a, chutah," I ril a țâm tawh àwm si a, kan chàwl lawk dâwn em ni ang? He laiah hian momo, chow leh rice an siam tui thei viau asin," a ti leh zat a.

Hmuh ka hreh tawh tih hi a hre thiam ve tak si lo va. Hmuh ka hreh a, hmuh hreh viau e ti lo chuan ka ngaihven ru deuh tho bawk si, kan chawlh dun chuan inhmachhawnin kan țhu ngeiin ka ring a, chu tak chu ka huphurh chu a ni.

Kan chàwl ta nge nge a, amahin ei tùr chu a oder vek a, a order hma erawh chuan ka duh min zâwt thlap tho. Inhmachhawn chuan kan țhu ta ngei a, ka khawr deuh țût mai bâkah melh tùr ka vàn tak zet, khatiang thu min hrilh hma kha chuan hetiang hian ka awm ngai lo asin le!

"Motor i be sa vek tawh em?" a tih chuan ka lu ka bu nghat a, ka hmui chu ka pet zauh bawk a. Amah vêk chuan," Thil eng emaw thleng a awm vàng chu a ni lo ang tiraw? Entîr nân, thil țha lo lamte," a ti leh a, lu lo thingin," Aih, chutiang a awm lo," ka lo ti vat a.

"Chuan, engtikah nge i rawn phei leh ang?" 

"Thawhțanniah," ka tih chuan," A nih tak chu, tluang deuhin i va thleng ang a, hlim takin i chhûngte chu i va hmu dâwn nia," a lo ti sap a. Ei tùr order a rawn thlen chuan țawng tawh lêm lo chuan kan ei dùn ta mawp mawp a, han biaka han titipui pawh duh viau mah ila keima lamah hian dik lo eng emaw, dangâwk deuh tlatna hi a awm tlat mai a, biak dàn tùr pawh ka hre thiam tawh lo a ni.

Ei man pawh ka pe hman lo, kan ei zo dàwr ațanga kan chhuak chu ka hminga min rawn ko an awm avàng chuan ka hawi lêt vat a, Caleb-a lo nui var var chu ka hmu zui ta nghâl a. 

"Ka hmuh thut che chu le!"  a rawn tih chuan," Nia... khawiah nge i kal a?" ka han ti ve a, ani chuan," Ka thil chah a rawn thleng a, lam tùrin ka chhuak lawk a nih hi, ka peih lo viau a nia; mahse, ka rawn chhuak lo ang tih ka hlau hnuhnawh ta hle mai, rawn chhuak lo ila chuan ka hmu lo maithei si che a," a ti leh a, kan bulah chuan a rawn ding tawh a, Zodina erawh ngawi rengin a ding thung.

An pahnih chuan ka hnial chung chung chuan ka chuanna motor dinna thlengin min thlah dùn a, kan chhuak nghãl mai lo lehnghâl a, minute 10 dâwn hnuah kan chhuak thei ve dâwn chauh. Caleb-a chu a țawng siam siam reng a, min biain Zodina pawh a be zauh zauh a, ani erawh chu biak a nih chauhin a țawng thung.

Kan tlãn țan tihah chuan Sumo tukverhah chuan dâkin ka han hawi lêt a, Caleb-a chuan a kut a rawn vai a, ka vai lêt ve a, Zodina erawh chu a din ngaiin a ding reng a, che lo chuan min rawn en reng thung. Ka han nuih sak a, ka bye bye liam dùn ta, ka hmu thei ta lo.

*HARSATNA HI AWMZE NEI LOVIN A LO THLENG LO, MIN TICHAUIN MIN BUAN HNEH TUM VIAU ȚHIN MAH SE MIN TICHAKTU, MIN TÂT HRIAMTU A NI HLAUH ȚHÌN*