☆THE SWEETEST HANDCUFFS☆ - 34 By Dingdi Pachuau

 ☆THE SWEETEST HANDCUFFS☆ - 34 By Dingdi Pachuau

A tûk chawhnua a pu tlawh tùra ka kal dâwn chuan scooty chu ka keng sak dâwn em ni ang tih ka ngaihtuah deuh ràn rán a; mahse, 'êm a' ka ti leh ta deuh a, bâkah, intivei deuh tak ka an duh hmel riau dâwnin ka hre leh bawk a, chuvàng chuan ka keng ta lo, chawhma lama chhang ka ur erawh ka keng thung a, ka chhang ur ei ve rêng rêng se ka ti a ni. Kan ina ka awm ve theih châng khân ka ur nasa țhìn a, a tìr lama mi erawh ei tlâk a tam lo khawp a ni; mahse, ka ur ka ur a, ka thiam chho telh telh a, a hnuah phei chuan ka hman a nih phawt chuan dàwra mi ka lei tawh ngai lo, ka ur ngei ka duh zâwk a ni.

Inrinnî a ni bawk a, inah chuan an chhûngkuain an lo awm kim țhap a. An chhûngkua an kim țhap ti mai ila, Zodina leh a pu leh a nîte nufa, heti zawng hi ni tùrah ka ngai mai a. A nî chuan min lo hmu hmasa ber a, min lo chiauau vat nghe nghe. Nuih duh tak hi chu a ni lo ve chiang a ni; mahse, chutia ka tih avàng erawh chuan thinrim hmêl a pu reng e ka tihna pawh a ni chuang lo.

A pa room lamah chuan min hruai lût zui nghâl a, Zodina'n ka tlawh tùr thu a lo sawi ve pawh a ni maithei a ni. Pu Zuala chu khumah lo muin phone ațangin chanchin thar a lo ngaithla a, kan inzui lût min lo hmuh veleh chuan a phone chu titàwp vatin," I hmêl ka han hmuh leh tâk hlawl chu, ka dam nghâl sawng sawng maiin ka hria ka ti! Min rawn tlawh khât ta deuh si a, i buai chu ring tho mah ila, i pawi kan sawiin i thin kan tirim ta a nih ka lo ring rum rum tawh zâwk a, chutiang a lo nih hlauh chuan min ngaidam hrâm ang che," a lo ti chuar chuar a, chhâng vatin," A khai, thu âwihawm loh deuh chu sawi lo teh ang! Engtizia nge ni i lo nawmsam loh leh mai mai a? Damdawite i ei țha em?" nuih sâng pah chuan ka han ti nghâl a, ka thil khai lai chu a khum bul dawhkàn chungah chuan ka han dah a, ani chuan," Ei țha e, a hunah tak ka ei ziah alawm. Eng nge ni min lo kensak a?" a lo ti vat a, dawhkàn chunga ka thil dah chu a kâwk vâ bawk a, kei chuan," Thil tui deuh maw le," ka han ti phawt a, sawi zawm lehin," Cake i ei châk ringin ka ur a, eng nge maw a an dâwn ni? A la lum vat vat nghe nghe asin, i ei châk em?" ka ti leh a, ani chuan," E, a va làwmawm ve! A tui ngawt ang chu," a lo ti ve a, Zodina nî chuan," Thingpui nèn i ei duh ang em?" a lo ti ve vat a, ani chuan," Han ti rawh, Tluangtei pawh a rilțâm tawh ang chu," a ti a, a chhuah dâwn chuan cake chu ka khài chhuahtîr nghâl a," A lian țha a, ka rawn siam kêp vek che u aw, in ei chhin vek dâwn nia," ka han ti zui a.

A Bp chu a che deuh hlek a, khawsik erawh a awm hran lo. Zodina sawi dàn takah a upa ve tawh a, ngaihsak a phût a, a pangchang ve tawh a ni tih ka hria, damdawi in dênga a awm ațang khân a chhuak ta meuh lo tih theih a ni a, ka kan ve zauh zauh tho a nih kha; mahse, tûn hnai chho deuh ațang khân ka kal ta lo va, lo vui ve deuh pawh mah se a àwm viau tho mai; mahse, a vui hauh lo, min lo làwm êm êm zâwk a ni si a.

"Lêng reng rawh aw, chuan, zanriah i ei ve nghâl ang a? Ârpui tui lai ka talhtîr dâwn nia, chaw pawh i lo ei khât ta," a ti a, mu lovin khumah chuan a țhu thluang duai a, mu tùra ka tih pawhin a mu duh tlat lo.

"Chaw ka heh si a, min sâwm ve ziah lo mai teh, ka ei țan chauh tihah i kham leh daih ang a," ka lo ti thung a, ani lah chuan," I ei dâwn nia, i lo kal hi ka lãwm êm mai a, làwmthu ka sawi nân ni bawk rawh se," a ti leh a, room kawngka rawn inhawngin Zodina nî chuan tray-in thingpui no hnih leh cake zai tlang lian vak lo panga vêl hi a rawn keng tel bawk a, ka lo pui vat a.

"A tui dâwn tih ka hre mai, a hmêl pawh a mawi," tih pah chuan cake chu a han keih a, han țhialin," Umm, a tui hlê mai, i siam ngei a nih ka ringhlel lo, a tui êm mai," a han ti zui a, kei chuan," A làwmawm a nih chu, tui i tih phawt chuan ei țeuh rawh, kan la siam leh zêl dâwn nia," ka lo ti vat a. Tui a ti tak tak a ni ngei ang, zai hnih lai a ei ve a, a làwmawm ka ti khawp mai. 

Chaw eiah min sâwm mah se ei ka tum lêm lo a nia; mahse, Zodina nî chuan hnial hleih theih lohin sàwm tak têin min sâwm tlat a, Zodina pawh chu a lo țawng ve sup sup a, ani min sàwm vàng hi chuan ei ka tum hran lo; mahse, a nîin chaw min chhum kêp vek tawh thu a sawi leh tâkah chuan chuti na nâ nâ chu tiin ka hnial lui ta bîk lo va, kei akâr min sâwm ve duh a nih ngai chuan ka ei ngei ang a, ka ei leh țeuh bawk ang.

Hma deuh takah chaw chu kan ei a, a chhan chu inkhâwm ka duh an rin vàng a ni, a pawi lo. Nia, ka hman chuan ka inkhâwm ang. Chaw ei lai chuan Zodina nî fanu, tleirãwl chho ve țan tawh chuan," Au Tluangte, i scooty kha a mawi kan tia, i khalh thiam bawk a, i hmel a țha bawk nèn, i inhmeh e tiraw?" a rawn ti chhuak ta pek a, ka scooty khalh lai min lo hmu a ni ngei ang, a làwmawm viau rualin a zahthlâk ve duh teh asin, ka hmaah min hmachhawn chiahin Zodina a țhu zui a, min hmu chiang khawp ang chu.

"A va làwmawm ve aw," ka tih chuan a nu chuan,"'I inhmeh kan ti lutuk a,' ti zâwk ta che, amah zawhna i zâwt zui daih a," a lo ti vat a, ani lah chuan," Aw, a inhmeh lutuk alawm, Rammawii phei chuan 'TV vêla lang ţhìn hi a nih duh hmel e, kan vêng nulaah chuan a hmêl țha ka ti ber' a ti nghe nghe a," a lo ti leh a, a pu chuan," I u Tluangtei hi chu a fel a, a hmêl pawh a țha bawk alawm, narsi  a ni zui bawk a," a lo ti ve a, min fakna chu hriat nuam viau mah se ka hnâr ka hmu lian telh telh tho, ka zak tho tihna a nih chu. Ka zah vàng chuan ka ke chu ka dah sawn deuh sek a, chutah, tu emaw ke hi ka tawk fuh lehnghâl a, Zodina ke bâk a nih ka ring lo, ka hma chiaha țhu a ni si a, a ni ngei ngei ang. Ka en zawk nghe nghe a; mahse, engtin mah a awm loh bâkah min rawn en ve hauh lo, a ke a ni ngei àwm si a, engtin nge ngai reng sâwn a țhut theih ni? 

Chaw ei kham veleh chuan ka haw a, ka duh lo chung Zodina'n min thlah bawk. Duh lo chung ti ila thlah kher kha ngai ka ti lêm lo a ni, bâkah, ani, min hmu hreh leh min be hreh ngawih ngawihtu a lo ni a, chuti na nâ nâ chu min be lovin min hmu lo mai se ka ti; mahse, min be duh se chuan ka be duh tho.

"I puar meuh maw?" Inbe lova kan kal deuh ngar ngar hnuah chuan a rawn ti ve ta hrãm a, kei pawh chuan a rilru hriain," Umm... puar," ka lo ti mai a," Puar khawp mai, ka puar lutuk ringawt," tia han thluaithlum ve pawh ka duh viau a nia; mahse, min biak dàn tâwk tê hian chhâng ve ang ka ti ta zâwk a ni.

"I thin ka tirim niin ka hria," a hnu daiha a rawn tih leh chuan," I hre dik a nih chu!" tia chhàn mai ka duh laiin," Teh ngawt a! Eng aiah chuan maw?" ka ti ve ta duah a, ka duh aiin ka chhâng thui mah mah!

"A pawi ka ti, ka thil sawite kha chu theihnghilh daih rawh, hriat reng tlâk pawh a nih loh kha," a ti leh a, eng a sawina chu ni maw? Min duh thu a sawite kha em ni? Theihnghilh 

daih tùrin min duh a nih chu, eng nge a awmzia? Engtizia nge ni? Min duh thu a sawi a, a inchhîr zui a... A va mak àwm hnì hnè ve! Mipa a ni emaw ka ti.

Ka in thleng min thlah a, thingpui in rih tùr pawhin ka sâwm khawmawi lêm lo bawk a, a haw zui nghâl daih. A bula ka awm dàn hi ka inhre thiam thei lo, engati nge a chungah hian ka lungawi loh tlat ni? Jakob-a leh Vâlpuia lĕm, an lungawi loh ka hlauh theih tehlul nèn, an duh loh zâwng chu sawi loh, keimah zâwkin ka be hmasa dùn ziah a nia, hlim hmël takin ka chhàwn dùn a; mahse, engtizia nge ni Zodina bulah hian mi dangte bula ka awm ang hian ka awm ve theih loh ni? Min ngaihsak lo lutuk hi ka thin a rim em ni zâwk pawh ka hre thiam lo.

A tûka inkhâwmnaah chuan ka hmu leh a, min rawn hmu ve chiah bawk; mahse, ka sualzia chu, ka hawi sawn nghâl daih a! Eng ang takin min ngai ang maw? Sual chu ka inti ru ve reng; mahse, a thil sawi theihnghilh tùra min han ti khân ka thin a tirim tlat a nih chu, engtin nge theihnghilh daih se min tih theih zâwk? Dâwt min lo hrilh mai mai tihna em ni? A rilru lo pui min hrilh a ni ngei ang, ka rilruin ka nui hawk a, nge ni, a buai viauna tùr hian ka chhaih buai hrep zâwk dâwn?  Ngaihtuah loh ka tum lah chuan ka ngaihtuah lo thei si lo, a hma kha chuan 20% ang vêlin ka ngaihtuahna kha a luah a, tunah, hetia a awm tâk hnu hian 80% vêl zetin ka ngaihtuahna a luah tawh hial ang chu le! 

Biak in tuala kan awm lai chuan ka phone chu a rawn nghawr dat dat a, ka han la chhuak vat a, Caleb-a a lo ni a, ka ner deuh sak a; mahse, ka chhâng tho. Kan inbiak lai chuan kan piah deuh hleka Zodina bula tleirãwl chhuak chho kum 17/18 bâwr vêl ni ngei tùr pahnih, ngo dùn zette ding chu ka va hmu zui a, chu mite pahnih chuan Zodina chu an bia a ni ngei ang, an lam hawiin a inher nghâl a, a nui pah deuh sak bawk.

Ka thinlungah hian eng emaw hi a rawn nghawr dat mai! Ka hmui chu ka pet fan fan a, ka beng bula Caleb-a rawn țawng pawh chu ka hre reng a'; mahse, ka ngaihtuahnaah a lût lo lutuk a, eng nge a sawi ka hre hauh lo. Ka mitin tu emaw a hmu a, a biakate pahnih chuan ka mit an la viau bawk, a tu emaw zâwk zâwk saw ka hnêna a thu sawi a inchhìr chhan kha a ni thei ang em? A ni thei ang, khawi zâwk saw nge ni ang? Mahse, an la naupan hmel viau si a, sawtiang êma naupang saw chu a duh ngam dâwn em ni? Kum an la tlin loh phei chuan...

Ka phone-in ka ke chung a zuk den khawl tâkah chuan ka harh chhuak ve chiah! Ka ke chu a na cham cham mai a, kûnin phone chu ka chhar ta vat bawk, Kimi chuan," Engtin nge i thlauh theih a? In inbe mawlh mawlh emaw tih laiin," a rawn ti a, ka nui ringawt a, ka han ngaithla leh chhin a, Caleb-a chu a lo la țawng reng a! Tunah chuan ka ngaithla chiang ve tawh ang.

Chawhnu dâr 3 vêlah damlo tlawh tùrin ka inkhalh chhuak a, ka khalh chhuah tam hi a pawimawh ve tlat. Ka khalh tam poh leh ka thiam mai dâwn si a, driving license neih hmaa lo thiam bel tlal hi a pawimawh, road sign pawh a thiam viau tawh bawk.

Hmâna damlo Pu Zâra nupui ve thung kha a nia, U Ropuia chan lam a ni deuh nain khuaa awmchilhtu ka nihna laiah ka kan ngei hi a ngai a ni, khaw neitu ka ni ve tlat.

Ka rin ai chuan a lo țha a, khumah pawh a lo mu lo, inlëng bulah chuan a lo țhu chhuak ve a, inlëng chu pathum lai an lo awm ve nghe nghe. Pu Zâra chuan," I fel hle mai," tiin min lo fak luam a, ka tih theih ve tâwk a Bp check leh a khawsik awm leh awm loh check, a awm a nih chuan a khawsik sàn zâwng ensak chu a ni mai a, a Bp chu a hniam deuh hlek a, khawsik pawh a awm hlek bawk. A khawsik hi a zing hran lo va, Asha hnênah ni se thisen a lâktîr tawh a, malaria a man si lo, a khawsik leh ringawt țhin chhan hi hriat a châkawm khawp mai ka ti.

Rei tak ka awm lo, thingpui min rawn pe tlat a, chu chuan min tihrei phah zâwk a, dârkâr chanve vêl zet chu ka lêng ang chu. Ina haw nghâl mai lovin ka inkhalh kual a, eirawng bàwl a ngai hran lo va, chawhmeh țhing a la awm nual nèn, haw lam chu ka hmanhmawh tehchiam lo.

Kawngah chuan ka tlãn beuh beuh a, YMA Park kawngah tlânin ka han kual a, chuta țangin kawngpuiah chuan ka tlãn leh a, kawng diak țhin kha a ro vek tawh a, vaivutah chang vek tawhin han tlàn chuan a khu țha duh khawp mai; mahse, ka tlãn chak duh chuang lo. Tlàn chak loh hi a him, vànduai thilah lo accident pawh ni ila kan na lo deuh nge nge ka ti ve tlat.

In ka luh hnu rei vak loah chuan Kimi rawn lûtin," Vawiin chu khawiah nge i inkhalh chhuah teh tlat a? I chhuak rei phian zui a," tiin dawhkànah chuan bowl te reuh tê hi a dah zui nghâl a, ka țhutna ațang chuan tho vatin," Eng nge ni a?" ka lo ti vat a, ani chuan," Hmarcha ràwt ka rawn suah hlek che a nih kha, a thak vak lo ang," a ti a," A va tui dâwn ve! Chawhmeh hi min rawn pêk loh leh min rawn suah a, keiin eng mah ka pe ve ngai si lo che u a," tiin bowl te reuh têa hmarcha chu a dangah ka ruak a, bowl tê chu ka sil fai zui nghâl a.

"Cake tui tâwk min rawn pêk kha, bâkah, chawhmeh nei zâwk kan nia ti mai ang, lo nei kan ni a, chawhmeh kan thar țeuh a, a thar zâwk chuan thar ve tùr nei lo chu kan pe ve ang chu, bâkah, neih zâwng hi a inang lo va,"  a tih chuan," Ni e; mahse, min rawn suah zing tawh lutuk a, ngaih loh lamah ngai lo la, a zahthlâk ve lek lek tawh hialin a nia ka hriat ni," ka lo ti ve thung a, ani lah chuan," Ho mai mai, a tlèm êm kha, zak duh rêng rêng suh," a ti leh mai a.

Inkhâwm zàn a ni bawk si a, chaw ka ei hma ve a, Kimi'n inkhâwm tùrin min rawn sâwm a, kan inkhâwm a. Sermon sawitu Upa Lalkima chu țawng muang cherh chawrh, hmanhmawhna pianpui lo zet hi a ni a, țawng rang pângngai takin minute 15 vêl tùra an sawi hi ani chuan dârkár dâwn a hawlh ta mai țhin a, zanin phei chu a țawng a muang zual emaw tih tùr a ni a, kan bàn meuh chuan sanain dâr 8: 30 a kâwk vah tawh.

Tlai a ti deuh tawh a ni ang, Kimi pawh a rawn pêng lo va, kan inmangțha hnu chuan a kal zui nghâl a, kawngka kalhna ka hawng zo chiah tihah chuan," Ka nghâk chhuak ta hrâm e," tih rî ka hre thut a, ka phu zawk nghe nghe, ka hlau țhelh a; mahse, Zodina hmêl ka hmuh tâkah chuan ka pângngai nghâl vat a.

"I inkhâwm lo a ni maw?" Ka biak hmasak tâk chu. Ani chuan," Aw, ka off ta mai a nih kha," a lo ti a, in chhûngah chuan lûtin ani pawh chu a rawn lût ve a," Pu Kima hi chuan a bei rei ve thei ngawt mai," a ti zui zat a, ka chhâng lêm lo. Eng nge maw a rawn tih dâwn ni? Min lo nghâk reng tihna a ni àwm si a, ani pawh hian Jakob-a zia a kai zo tawh a nih àwm hi.

Thingpui tùr ka chhuang nghâl a, inthlâksan chu a fuh ber lova ka hriat avàngin ka inthuamna ngai chuan ka inthuam ta rih a. 

"Inthlâk la, a hrehawm lo em ni?" a rawn tih chuan," A ngai lêm lo," ti ringawtin ka chhâng a, a lam pawh hawi duh lo chuan ka thingpui chhuan lam chu ka melh deuh reng a. Ani chuan," I thin ka tihrim vàngin pawi ka ti a, i hnêna ka rilru ka phawrh chhuah ve ringawt avàng pawh khân pawi ka ti tak zet a ni, hetia i awm chhan hi keimah vàng a ni tih ka hria, engtin nge ka siam țhat anga a ngai ang khân kan awm leh theih ang tih ka ngaihtuah nasa țhìn," a rawn ti chhuak ta sap sap a.

Thingpui chu ka siamsak phawt a, ka pêk hnuah chuan,"'I thin ka tirim' i tih kha chu a dik chiah, ka thin a rim rêng a ni, ka chunga i awm dàn hian min tithinrim a ni, eng vànga min be duh lova min hmuh pawh hreh ngawih ngawih nge i nih tih hi ka hre duh a ni," ka ti chhuak ve ta a, ka rilru tak tak sawi ka ni bawk a, ka zia ta deuh huaiin ka hria!

A lo nui deuh hak a, ka melh nghâl râm mai. Vawiin khân tleirâwl pahnih bulah khân hetiang chiah hian a nuih ka ring bawk; mahse, tuna mi hi chu min nuihzat vàng a ni ngei ang.

"Chu chu, engtin nge? Ka be duh lo chein ka hmu hreh ngawih ngawih che niin i hria maw?!!"

A'n haider vêl a! A hre chiang hlê si a. 'Aw' pawh ka ti peih lo, min tih vêl dàn hi, ka hre thiam teh nuai lo ve!

"Mawh, ka be duh lo che niin i hre thei maw?!! Biak che ka duh asin, a hma ang chiaha inkawm leh bawrh bawrh theih kha ka duh; mahse, ka thil hrilh che khân thil engkim a tipawi zo ta vek a, ka dinhmun hrechang lêk lovin mi pângngai dinhmunah ka ding emaw ka lo intih vàng a ni. Chuvàngin a ni theihnghilh vek tùra ka duh che, theihnghilh vek la, a hmaa i hlim hmêl ang kha ka bulah hian pu leh thei la ka duh a ni," a ti ta duah a. A sawi thui viau nain ngun takin ka lo ngaithla a, a sawi zawh chuan mak ti takin, mit pawh khap lovin ka en ta reng a.

*KAN HARSATNA CHUNGCHÂNG, TUTE EMAW HNÊNA HAN SAWI HLIAM HLIAM HI NUAM KAN TI ȚHIN MAI SIA TIRAW? MAHSE, HARSATNA AI CHUAN KAN HLIMNATE HI HAN SAWI CHHUAK NGUN TA ZÃWK ILA, AWMZIA A NEI THUI ZÃWK NGEI ANG LE*