☆THE SWEETEST HANDCUFFS☆ - 35 By Dingdi Pachuau

 ☆THE SWEETEST HANDCUFFS☆ - 35 By Dingdi Pachuau

Kan inkâr dang ta daih chu nuam ka ti a, engtin emaw tak hian ka hlim veng veng maiin ka hria. Tunah chuan min hêl tawh lo ang a, min hmu duh lo ang leh min be duh lo ang khân a awm tawh lo bawk ang, hlim taka awm hi a phû a, hlim takin a nun hmang se, mite bulah mai ni lo ka bulah pawh hian inkiltawih lo se, a dinhmun hre kur tawh lovin hlim takin hringnun hmang ve tawh se ka ti a ni.

Kei pawh hi mak ka inti ve deuh tlat. Amah hi ka lo duh ru reng tihna em ni le ka ti hial a ni, a chhan chu a hlim hmêlin min tihlim a, min duh thu a sawi khân engtin emaw tak hian min chawk phûr tlat a, kha thu min hrilh ațang phei kha chuan ka mit hian zawng angin lang lo mah se thinlung lam hian a lo zawng țhìn a ni chêk ang chu, ka hriat loh lai hian hmuh tumin ka mit hi ka lo lèn leh ruai țhin. Ka duh ve a ni chiang mai, duh lo ila ka kut pawh kha a vuan tawp nâng, min vawn khân nuam ka tih bâkah ka haw miah lo bawk, a bula awm pawh kha ka ning miah lo.

A rawn uang ka ti dâwn nge, zîng ka thawha a message lo awm ka hmuhah chuan heti hian a lo inziak a.

 *Nizàn khân ka muhìl miah lo, ka phal lo a ni ber ang chu, ka muhìl hlauh a nih chuan ka harh chhuah huna mi dang daih ka lo nih leh ka hlau a ni, tuna ka thinlung hlimna hi a bo leh thuai ka phal si lo va* a rawn ti a, ka nui sak phawt a, chutah, ka han chhiar nawn leh a; mahse, ka han ngaihtuah chiang a, a muhìl lo a nih chuan a chàu ngei ang a, a taksa a chauh chuan mi dang rawn lan chhuahna hun țha lutuk a ni thei zâwk lo ang maw? A țha miah lo ang le. Tûnlai phei hi chuan Jakob-a leh Vâlpuia an rawn lang zing zual asin, a bîkin Jakob-a, ani phei hi chu a chak bîk zual a nih ka ring hial, a rawn lan zin dànah hian.

*I taksa kha tichau suh*  tih tê hi ka thawn lêt ve a,'Ka duh che' emaw 'Ka hmangaih che' tih vêl chu ka la sawi duh lo, hunin a la hril zêl tùrah ka ngai. 

Office kal tùra ka chhuah dâwn chuan ka phone chu ka han en a, a message a lo awm leh vàng tawh a, ka han chhiar thuak a.

*Min ngaihtuah ve deuh tihna a ni maw? I aw ka hriat chãkzia leh ka hmuh châkzia che hi, rawn pan ruak ruak che ka duh hial asin; mahse, ka insûm hrâm hrâm ang, tleirãwl mai lah ka ni tawh lo va*  a rawn ti leh pek a, a tàwpa a thu ziak phei hi chuan ka nuih a tiza hial mai, ni e, tleirãwl mai a ni tawh lo va, a upa ve tawh a, tleirãwl anga phî cheng rual a ni tawh lo.

U Ropuia'n chhùn thingpui nèna kan hmeh tùr cookies tui zet a rawn keng a, ka cake ur țhin nèn a taste chu a inang lek lekin ka hria, a tui ka ti, a thlum tâwk dàn lah chu duhthusàm, tui ka ti khawp mai. A chângin ka cake ur kan ei a, a chãngin a lei sa a rawn keng bawk a, rawn keng tawh lo tùra ka hrilh pawhin a rawn keng zêl tho, a inthlahrung ve deuh țhìn a ni ang ka ti ta ringawt, a châng chuan ka cake ur țhin hi tui a ti vak lo a ni ang ka ti leh bawk a; mahse, ani lah chuan tui a tih thu a sawi ve ziah thung a.

"Saisiha kan kal a hun leh țêp tawh a nia," ka tih chuan," A ni maw? I huphurh àwm mang e! Tûn țum chu ka àwl ve tawh ang che, a hma pawh khân min àwl tawh kha maw," a lo ti vat a, kei chuan," A, khatiangte chu theih loh vàng a nia, sawi chhuah chi pawh a ni lo. A hma ang khân ka huphurh tawh hleinem, kein ka kal nasa tawh a, bâkah, tunah chuan ka in-fit ve viau tawh asin, chho kal pawh ka hnehsawh ve tawh viau a ni," ka lo ti ve thung a.

Zàn lamah hi chuan khua a vâwt ve țan deuh tawhin ka hria, Favàng hun nuam inher liam tawhin, khaw vawh hun a rawn inher țan tawh bawk a, a àwm ve tho mai. Chhùn lam erawh ni a lan phawt chuan a la lum nuam viau mai. Ni tin office kan kal laiin kan khua mi țhenkhatte chuan buh an seng tawh a, a țhenin an la seng lo va, ka hre thiam teh nuai lo. A țhen lo lamah an riak tlut tlut a, a țhen an la riak lo bawk a, lo nei ngai ve lo tân chuan hriat thiam a har ve deuh chu a ni. U Ropuia zâwk chuan a lo hre chiang zâwk a,"Buh seng zo tawh hi chuan thar hma an chíng a nih hi," a ti mai a, buhah thar hma leh thar tlai a awm tih ka hre ve chiah a ni, a lo hriat loh theih khawp mai.

Zodina nèn pawh a hma ai ngawt chuan kan inhmu zing ta deuh. Sawi tùr lah hi a'n hre lo thei khawp a, ka mit taka min enin a nui leh ringawt țhin, min en reng kha a zak tawh si lo va, keimah hi zak zâwkah ka țang ta fo a ni. "Min en reng suh," te ka ti leh ringawt țhìn a, ani lah chuan," A hmaa nangmah en ngam lo chea hun ka khawh ral zawng zawng kha i hmêl thlìr nân hian koh kìr theihin hman țhat leh theih se," a lo ti daih thung a, min tilai ve thei hial zâwk a ni. 

A nui hmel hmuh a nuam a, a hlim tih a hriat reng bawk si a, heti taka a awm dàn a thlâk rang viau hian ngaih erawh a tițha lo lek lek thei hialin ka hria! A hma kha chuan inthlahrung leh inkiltawih, dinhmun hre ràn kha a ni a; mahse, tunah chuan khâng kha a bo țan ta ka ti mai, a hmêl a hlimin a mitmeng a nung sar mai a, a chhan ka zãwt ve châk rëng rëng a," I kut ka vawnsak che aţang chiah khân ka rilru leh ka thinlung hi a dang nghâl vek a ni, min haw lo tih ka hriat khân mi pángngai ang pha ve dâwn taah ka inngai a, ka dinhmun leh ka natna hre vektu i ni bawk a; mahse, chuti chung chung chuan mi pângngai enin min en a, mi pângngai takah ka inngaih phah ve thei bawk, a hlû asin, ka tân chuan i hlu tak zet a ni," a ti malh malh a, hei zet chu, ka rin phâk bâk chhànna a ni tlat. Min fakna chu a hlû ka ti a, zahawm ka ti bawk.

Jakob-a ve thung chu, a rawn lan leh chuan," Kan inkârah hian thil dik lo eng emaw a awm em? Eng emaw ka feel thei tlat a ni, thil thleng a awm a ni tiraw?" a ti a, chhâng lovin ka en phawt a, a mitmengah chuan thinrimna a lang lo va; mahse, rinhlelhna ni àwm tak ka chhiar thei thung. Ka en reng lai chuan thil ka ngaihtuah chhuak a, a hmêl saw Zodina hmël a ni a, a taksa pawh saw Zodina taksa tho a ni, duh taka min en ţhintu kha a ni.

"Kha pa Zodina khân i chungah hian eng thil emaw tih a nei em ni? A nih loh pawhin, kha naupang thluak thâwl khân thil eng emaw a hrilh zâwk che? I duh loh zãwngin an awm a nih phawt chuan ka khuahkhirh dùn thei reng a nia, min han hrilh teh," a ti leh ta nghut nghut a, kei chuan," Chutiang thil eng mah a awm lo, khatia i țawng nghut nghut khân a nuam lo a nia, mi sual deuh i ang lek lek a ni," ka ti ve thung a.

"Ngawi tak rawh, an lo tibuai che a nih pawhin kan zin dun hnuah chuan an tibuai ngai tawh lo ang che, an nihna an hai tlat a, mi tak tak emaw intiin mi taksa luahin an awm ve mai a ni tih an hre hauh si lo," a ti leh a, ka en reng ringawt a, sawi ve tùr pawh ka hre thiam lo. Amah hian mi taksa luahin mi tak tak emaw a inti zâwk chu a ni si a, nakinah, ka hriat duh thurûk min hrilh hunah chuan ka hrilh ngei ang, engkim zêp lovin ka hrilh vek ang, chu chu ka la nghâk ve țàng țáng a ni.

A haw tùr chuan thlah a phût miau avàngin ka han thlah leh ta poh a, min rinhlelh ka duh loh avàngin min kuah pawh chuan ka kuah lêt ve a, amah kuahah inngai mah se, ka kuah hi amah ni lovin Zodina taksa a ni a, a hriat laiin kuah lo mah ila, a hriat loh laiin ka kuah ve thung a ni mai tiin ka inhnèm ngawt a, Jakob-a tân lah rinhlelh ka har sauh bawk ang a...

Vâlpuia nen kan inhmuh hnuhnun ber chu a piancham thlen nân ni 6 a la awm tihah a ni a, kan inhmuh leh tawh rih loh tãkah tiin a piancham chu ka sawi hot-pui leh a, a piancham chu lawmsak ngei ka tum thu leh a nî taka ka ina rawn kal tùr chuan ka hrilh mawlh mawlh reng a, ka hrilh mawlh mawlh hian amahah tumruhna nei se, a lo lan ngei ka duhzia hi hre chiang viauin rawn lan tum ngei se tih ka duh a ni. 

A piancham lo thlen hma nî chiahin Lungleiah ka kal a, thilpëk atân kawr leh lukhum(cap) ka leisak a, ka tuam mawisak ve thlap bawk. Lukhum kha a ngainat viau kha maw, ka thilpêk tùr hi a duh ngei ka beisei, cake erawh keimah ngeiin siamsak ka duh thung a, ka inbuatsaih ve nasa viau a ni. A hun takah erawh amah rawn lang lo hian Jakob-a emaw Zodina emaw an rawn lang khurh ang tih chu hlauhawm tak a ni, a duh tak ka tihsak ve thei dâwnin a lang si a, a hun takah chuan amah Vâlpuia ngei mai kha rawn ni thei se ka ti tak zet, ka hmuh hnuhnun ber nî khân ka chah mawlh mawlh kha a ni a, a rawn lang thei hrâm ang chu maw...

Zànah Zodina a rawn lang heu mai a, naktûk lamah hian Vâlpuia a rawn lan theih loh teh chuan aw... Zodina bulah hian sawi ta ngawt ila, awmzia a nei thui àwm si lo, nei thui lo mai ni lovin awmzia a nei lo tawp zâwkin ka ring! 

"Naktûk khi Vâlpuia birthday a nia," ka ti chhuak ta ringawt a, ani chuan ngun zetin min rawn en a, zah ka tum bîk lo, ka lo en ve kar a," A ni maw?! Engtin nge--" a tàwp ta chat a, chutah," Jakob-a lo zâwk, la naupang deuh zâwk kha? Chuan...?" a tih zawm leh a.

Zêp tum lo chuan," Aw, naupang deuh zâwk kha, a birthday lawmsak ka tum a, a hmain a birthday rêng rêng lawmsak a la ni ngai lo va, chuvàng chuan lawmsak ka tum a ni," ka han ti ta a, a ngawi reng a, sawi zawm lehin," Lawmsak tih lêmah cake ka siamsak ve ang. Birthday cake pawh a la ei ngai lo va, ei chu sawi loh, hmuh pawh a la hmu ngai hek lo, a tân thil chhinchhiah tlâk tak a ni dâwn si a, chuvàngin tihsak ngei ka tum ta a ni," ka ti leh a.

"A țha alawm... mahse, a beisei zui hlauh ang che tih erawh ka hlau deuh a ni," a tih sap chuan ka nuih a za lek lek a; mahse, ka nui duh lo. A hlauhthàwn thil a sawi ve a ni mai a, lo nuih a țùlna a awm lêm lo, a tân chuan thil ngaihtuah phâk loh a ni miah lo, mipa chuan mipa vêk rilru chu a hre thiam ngei ang.

"Hlauthãwng suh, a thleng hauh lo ang."

A tûk zîng ațang chuan ka rilru a hah țan a, a rawn lang thei ang em tih mawlh chu, a birthday a ni a, ka lawmsak dâwn chu a ni si a, birthday neitu ber a rawn lan loh chuan khuang lova chai ang lek ka ni mai ang, rawn lang hräm se...

Tûkțhuan ka ei kham a, ka țhu hlè hlé nain ka rilru erawh a țhu hlèhlé thei hauh lo. A rawn kal tawh ang em? Amah a rawn ni ang em? Nge, Jakob-a a rawn ni ang? A la hma deuh tho nain rilru erawh a chàwl thei lo a ni. Ngaihtuahna hrang hrangin ka ngaihtuah a, thil awm thei zawng zawng rilrua dap chhuakin, chu lah chuan rilru hahna bâk min thlen lo.

Chhùn chawlh a hun leh dáwn ta mai, Vâlpuia hi a rawn lang thei dâwn lo tihna em maw ni le? Amah kha mi pawi sawi hlau tak, rilru dâwih angreng tak leh thu áwih thei tak kha a ni roh a, Jakob-a hian rawn lang thei lo tùr hian a lo khap deuh zâwk em ni ang?

Tlai dâr 3 a rawn rîk meuh chuan ka bei a dawng titih tawh a, tûn ang huna a la rawn lan loh chuan a rawn lang tawh dâwn lo tihna a ni ngei ang, rawn lang hrân se ka ti asin le...

Kimi a rawn lût a, Vâlpuia emaw ka ti țëp a ni. A rawn inkhai bâwr nasa, dàwrah a kal a ni ngei mai.

"Rawng i la bâwl nange?" a rawn tih chuan," Ka hmanhmawh lêm lo va; dàwrah i kal em ni?"ka ti lêt vat a, ani chuan," Aw, ka duh aia tam ka leiin ka hria, a rit ta mah mah a ni, ka rawn pêng zawk a nia, ka kal leh nghâl mai ang, hêng hi siam chawp tùr a la ni bawk si a," tiin min chhâng a, a chhuak zui nghâl a ni mai, han uibeh hleih theih pawh a ni lo.

Chawhmeh siam a ngai rih si lo va, ka chaw ei tùr ni se  tlai deuh taka chaw haitho ei kha nuam ka ti a, chhum nân a la hma lutuk si a, ka phone ka bih ta rih a. Chutih lai chuan kawngka a rawn ri karh karh a, ka han chhàwn vat a, ka rin loh deuha Vâlpuia rawn pên lût ka hmuh tâkah chuan," I rawn kal thei dâwn ta lo a nih hi ka lo ti mai a; mahse, i rawn lang ta hlawl a, lo țhu rawh," tiin a țhutna tùr chu ka han kawh hmuh nghâl a.

A țhut hnu chuan," Nia, huan lamah ka liam a, ka lo mangnghilh pek a ni, min hre thiam hrâm rawh, ka hre chhuak zawk a, rawn haw nghâlin ka inbual sawk sawk a, ka lo kal nghãl a nih hi," a ti dap dap a.

A birthday chu a vawi khat nân ka lawmsak ta a, cake a han hmu chu a hlim khawp mai a, hmun dang a en phal lo ni berin ka hria! Thilpêk ka pêk lai chuan," Ka lãwm e, ka lãwm lutuk e," a ti sap sap reng a, kawr leh lukhum bâkah pawisa pawh ka pe tel bawk. A hmel mawlh chu, ka thil tih hlawhtlinna chu a hmêlah a lang chiang ngang a ni, a hlim nui hmêl kâra a mita làwmna mittui tling kiau pawh chu ka hmuh hmaih lo.

"I chungah hian làwmthu sawi dàn pawh ka thiam lo, ka thinlungin ka lãwm tak zet a, làwmthu ka hrilh mawlh mawlh che ni rawh se. Mumang pawha ka la mang chhin phâk loh thil min tihsak hi ka theihnghilh lo ang a, ka hre rei viau ang. Cake a tui si, kawr leh lukhum lah a mawi bawk si a, Nurse, ka lãwm tak zet zet aw," a ti mawlh mawlh a.

Ka inchhîr lo tak zet a ni. Hetiang khawpa lãwm leh hlim hi hmuh a nuam a, ka insenso ve tlêm tê khân mi pakhat tân hlimna leh hriat reng tawh tùr thil a hnutchhiah ta si a.

"I hlim hmel hmuh a nuam, i birthday lawmsak thei chea ka dam hi kei pawh ka hlim a ni, mi fel tak i ni a, fel zël bawk ang che. I piancham pawh rei tak làwm zêl thei tùrin dam reng ang che," ka ti ve dap dap a. Haw a tum pawhin ka phal lo va, ka inah chaw ei se ka duh, ani pawh chuan a hnial bîk lo.

"Nurse, miin min hmuh hlauh chuan i bialpa emaw min ti ngei ngei ang, i inah chaw hial ka ei dâwn a ni si a," a han tih chuan ka nui ringawt a, a la naupan chhiatzia a lang leh zawk ni berin ka hria.

"U Jakob-a rawn inlan a châk khawp mai a; mahse, rawn lan ka duhna a lianin ka tum ruh ve êm mai a, hnehna ka chang ta zãwk a ni, a thin pawh a rim maithei a ni; mahse, pawi pawh ka ti lo, ka lo lang lo ang tih ka hlau daih zâwk," a ti barh barh a, a hmel chu ka en țhin, Zodina hmel leh taksa chu a ni si a; mahse, mi dang daih a ni bawk si a.

Ka thil tum pakhat ka tihlawhtling ta chu a ni a, Vâlpuia'n thil min tihsak lo mah se, Zodina tân hlâwkna awm lo mah se ka hlim tawh tho tho. Tunah rah țha a chhuah loh pawhin ka beiseina a bo chuang lo va, dawhtheih a pawimawh ta rih ni berin ka hria, dawhthei takin ka nghâk ang a, a rawn inher dik hun chu a awm mai ang.

Zodina pawh a hlimin nuam a ti a, min hêl tawh lo va, min hmu duh lo hek lo. Tunah tak hi chuan min duh tih min hrilh ațang khân hun pawh a lo liam ve nual tawh a, inthup tak leh mite hriat hlau rêng rênga nun ka tum lêm lo, chutiang chiah tho chu ani pawh a lo ni a, inkhãwm dâwnah leh țhalai thil tihah pawh min rawn sãwmtu a ni a, kan kal tlâng a, kan haw tlâng a, mite mit tikham khawp tùr erawh chuan kan awm lo. Kan bulah Kimi a awm ve deuh ziah a, mi min sawisep pawh kan hre lëm lo, min sawi peih tawh lo zâwk pawh a ni maithei.

Zodina pu pawh tlêm chuan a zia chho ve hret hret a, ani ang kumah tawh hi chuan țhat lam hi a chak har a, a àwm ve reng mai. Ka tlawh ve zauh zauh a, min ngaina ve tak zet a ni. Zodina hian kan chanchin hi a hrilh kher chu ka ring lo va; mahse, a hriat tho chu ka ring, a fing ve roh si a.

"Ka room-ah chho lawk ang hmiang," Zodina'n a tih sap chuan ka en vat a, tlêmin hlauhthàwnna ka nei deuh a, ka mitah a lang chhuak a ni maithei, min enin a nui sak a," Hlau duh suh, eng emaw hmuh che ka duh a,"a ti mai a, a nî a awm lêm lo bawk a, ka zui chho ve mai bawk a.

"Hei hi a nia ka tih chu," tiin min kai phei a, a room-a dârthlalang lian ve tâwk tak hmaah chuan min dintîr a, ka hnunga dingin ka koki tawn tawna chelh pah chuan," Hei hi ka bialnu a nia, hmuhtîr che ka duh a," a ti ta sap a, dârthlalangah chuan kan inmelh dùn sar mai a, nui sakin," Hmuhtîr che ka duhna a rei tawh a, eng nge ang i tih?" tiin min han zâwt a.

"A chhiat vak loh hi."

A nui leh sak a," Ka lâwm e, hmeichhe duhawm tak a ni, a hmêl leh nungchangah hian sawisèl tùr ka hre lo va, ka duh hluah hluah ni berin ka hria, ka hmuh loh hlek chuan ka ngai vawng vawng ziah," a han ti zui sap a, chutah," Ka bialnu a nihna nem ngheh ka duh a, heti zâwng hian," ti leh supin a rawn thle  hnai a, ka bek veilam chu dawmin amah chu a rawn thle hnai zêl a, dârthlalang hmaah chuan ding reng chungin min rawn fâwp zui ta a, a chêt dàn chu ka rin vak loh thil a ni nâ a, lo dan emaw ka tum hran lo, lo dan ai chuan hlim taka hun hman ka duh zãwk tlat. A tìrah chuan dam tak leh dìm zet hian min rawn fâwp de dé phawt a; mahse, ka lo hnial hran lo mai ni lovin ka lo fâwp lét ve tih a hriat hnu chuan a chêt dàn a dang ta daih mai.

*NIMIN LAWKA BORAL KHÂN NAKTÛKA A TIH TÙR A LO DUANG LÂWK VE NGEI ANG A, CHUTIANGIN TUKINA BORAL PAWHIN ZANIN ATÂN PLAN A NEI LÀWK NGEI ANG, I HMA HUN I HRE LÂWK BÎK LO, HUN I NEIH LAI HIAN THIL ȚHA I TIH TUM CHU HAN TI THUAI THUAI TEH LE, ENGTIA REI NGE HUN I NEIH I HRE BÎK HAUH SI LO*