☆THE SWEETEST HANDCUFFS☆ - 36 By Dingdi Pachuau

 ☆THE SWEETEST HANDCUFFS☆ - 36 By Dingdi Pachuau

Mipa inthlahrung, zakzum leh inkiltawih zet nia ka hriat ţhin tehlul nèn khân, tuna ka chunga a chêt dànah hi chuan zahzumna leh inthlahrunna lam kha chu a lang tawh hauh lo! Duhthawh hi sawi fiah dàn hrang hrang 10 vêl lai awm ta se, tuna a duhthawh dàn hi chu 15 vêl daih a ni hial ang chu, a sen a pèl  var var tihna a nih chu! Min fâwp duhthawh thiam viau a; mahse, min dìm lo chuang miah si lo va. Ding dùn reng chung chuan duhthawh zetin kan indût mawlh mawlh a nih ber chu, 'kan' ka ti lo thei lo, ka chhâng lêt zël miau si a. Hetianga duhthawh hian Arini kha a fâwp ve tho ang em?

Phone a rawn rì a, kan tàwp dùn chiang kher mai. Ringtone aţang chuan ka phone a ni tih pawh ka hria, rîk hun a hre lo lutuk chu ka thin a rim ru lek lek mai ka ti.

"Chhâng la?" Min thlahin a che sawn hret a, a aw chu a pângngai chiah lo, tlêmin a khùr deuh hlekin ka hria. Ka kawrchung hma lama ka phone ah chu ka han phawrh a, company a lo la ni zui, ka thin a va rim tak!

"Company call," aw khùr deuh hlek hian ka ti sap a, ka hmet tàwp nghâl bawk. Ka net pack a thi dâwn tawh a, chuvàng chu a ni ang, message pawhin min rawn hrilh leh zut zut tawh rêng a ni.

A nui hak a," Chutiang tih hriata lo tàwp duh hauh loh tùr!" a ti sap a, ka nuih a za ve deuh tho a; mahse, ka nui lo, ka hmui chu ka pet ka pet ringawt a, ka mit ka khap sak sak bawk a. Awm dàn tùr ka haihchham viau lai chuan min rawn hnaih leh hratin min rawn kuah zui ta nghâl a, dârthlalanga inen thei tùr chuan min her rem leh bawk a.

"Company call vàngin thinrim âwih loh," tiin a han nui sak a," Hun chu kan la ngah dâwn alawm, nichîn khân i duh loh zâwnga ka awm loh hrâm ka beisei, ka duhthawh luatah i pawi ka lo sawi ang em aw ka ti rilru a," a ti leh sap sap a. Dârthlalangah chuan kan inmelh dùn vang vang a, ka zak duh bîk lo a ni.

"Khatiang khân Arini i fâwp ve țhìn tho em?" Ka ngaihtuah rûk, ka hriat châk a nih avàngin ka zâwt tawp a, engtin nge a ngaih ang tih lam ka ngaihtuah lo, khatiang khân a fâwp ve țhìn a nih hlauh chuan...

"Ka infawh lohna a rei tawh a, ka hre chiang tawh lo."

A mitah chuan chiang leh zualin, dâwt a sawi nge thu dik a sawi tih hriat tum chuan khap hauh lo hian ka melh a; mahse, ka hre thei lêm lo. 

"Ka zawhna kha ho i ti em?" ka tih leh chuan min kuah nghet sauh a, a bianga ka biang rawn nawr deuh pah hian," Ho ka ti lo, i duh apiang min zâwt rawh, ka chhâng zêl ang che, i hriat duh phawt chuan," a ti leh sap sap a, a biang lum ham ham chuan ka biang chu a rawn tilum ham ham thei hialin ka hria.

Hetia a room-a kan pahnih chauha rei tak awm chu a țha lo ang, a puin rei min lo ti tawh hial ang. Bâkah, a nîte an rawn haw thut thei, mi dang pawh an rawn kal thut thei bawk, kan pahnih chauhin, a room-ah lehnghâl...

"Kan chhuk dâwn tawh em ni ang? I puin rei min lo ti tawh ang?" ka ti ta daih a, rawn hawi chhuakin dârthlalangah chuan min en ràn rán phawt a, chutah," I tih dàn dàn le," tiin thâwk a la huai a, ka bekah chuan a fâwp leh zauh phawt a, chumi hnuah chuan min thlah ta chauh a.

Keimah chauha ka awm châng chuan  Zodina nèn kan pahnih chungchâng chu ka ngaihtuah fo a, ani hi chu mi tak tak a ni bawk a, ka rilru pawh a nawm deuh bâkah hlim pawh ka hlim phah viau mai. Jakob-a ațanga ka hriat a ni a, Jakob-a khân min rawn pawh hmasa lo se chuan tunah pawh hian Zodina nèn hian kan la inkawp kher lo maithei a ni, Jakob-a zârah heti hi kan ni chho ta chu a ni a, eng nge kan an chhoh zêl ang chu ka hre lo; mahse, kei pawhin ka duh ve leh viau tawh chu a nih hi. Bâkah, amah a damin min duh thiam a, a thiam ang tâwkin min ngaihsakna a tilang ve bawk a, nuam pawh ka ti. 

Caleb-a pawhin min la rawn be chhunzawm ve zêl a; mahse, min beiseina erawh mi dang ka neih tawh thuin ka chhànsak ta thung. Ani hi zawng, a fel a, sum a thawk chhuak țeuh thei ngei bawk ang a, mi dang kei aia țha fé fé a hmu thei țeuh ngei bawk ang, a ngaihtuahawm loh. Ka chhànna erawh chuan a tikhãek hlauh lo a ni ngei ang, min la rawn be fo a," Mi dang i neih tawh avàng maiin biak loh tawp che ka tum lo, țhian ang pawhin kan inbe thei alawm, țhian ni ang aw?" a rawn ti a, chuti na nâ nâ chu ka ti a, min rawn biak chuan țha takin ka chhâng ve zêl tho bawk.

Jakob-a'n," Vawiin hi ka birthday a nia, min lawmsak ve dâwn em? I inah nge kan inah? Cake pawh i siam thiam viau niin ka hria a," a tih chuan," Vawiin Dec ni 2, i birthday a ni tak tak maw?! Chuti chu, Happy Birthday le," ka han ti a, ani chuan," Thank you. I inah nge kan inah? Kan inah chuan nuam i ti lo zãwk ang a?" a ti leh a, ngaihtuah vak lo hian," Ka inah ti mai ang hmiang, a remchâng zâwk ang, hmeichhia zâwkin mipa ina va lènchilh chu a mawi chiah lo bawk a," ka lo ti ve bawk a.

"Vâlpuia pawh cake i siamsak a, ani ve mai pawh i siamsak chuan kei phei chu tui tak leh mawi taka min siam ka phût che a ni. Ani kha keimah vànga lo awm ve chauh a ni a, ani ai kha chuan min ngaihpawimawh pawh ka phût tlat a ni," a tih leh chuan," Loh theih nâng, nang chu i lal ber alawm," ka lo ti vat a, a nui suk a.

"Zin dun chu ka châk tawh tak zet a ni, kumin Krismas dâwnah emaw Krismas leh Kum thar inkârah emaw zin tawh ila tiraw? A chhan chu hun dangah chuan chawlh i nei leh thei dáwn chuang si lo va, chawlh i neih chhûng ngeia ka duhna min tihhlawhtlinsak ngei hi ka duh a ni," a ti leh a, nuih pah hian," A, nakin zànah kan la sawi țha dâwn nia," ka ti ta rih a, tunah hi chuan thu tlûkna ka la siam thei mai rih lo, ngaihtuahna sèn ve deuh a ngai alawm.

Tlaia rawng ka bawl lai chuan Kimi a rawn lêng ve zawk a, eng eng emaw kan sawi a, rei a lêng lo, a haw hnu chuan Jakob-a thil sawi kha ka ngaihtuah rauh rauh a. Zin dun hma leh a thurûk ka hre hma thei dâwn tihna a ni a, a thurûk ka hriat chu Zodina tân thil pawimawh tak a ni thei a, chuvàngin, hriat chhuah vat vat hi a pawimawh a ni. Chuti a nih chuan a sawi ang chiah khân hun ãwl ka neih ve lai Krismas chawlh lai bâk hi hun remchâng a awm thei lo; mahse, duh ai chuan a teptèr deuh tawh chu a ni, vawiin ni 2 a ni leh tawh a nia, ka nute eng mah ka hrilh ve loh chuan... bâkah, zin daih chu phal pawh an phal nâng, hunpui lai lehnghâl chuan, an rem ti lo tawp ang.

Mahse, zin ngei chu țha ka ti alawm, Krismas chawlh lai bâk hun ka nei lo, Jakob-a chu engtin nge ka chhàn ang le? Lo Yes ta ila ka nute bulah engtin nge ka sawi ang? Ka țhiante nèn zin chhuak tùr angin ka insawi mai dâwn em ni ang? Chu pawh chu lo ni se, zin chu an phal kher ang em? Vànneihthlâk takin ka nuin lo phal pawh ni se ka pain a phal ve kher lo thei a? Hmmm, ngaihtuah tùr a va tam êm! Ka rilru a buaiin a vâk kual nasa tak zet a ni.

Zànah chuan a rawn lang ta ngei a, chhiat hi chu a chhe lo alawm, a inchei duh dàn lah hi pà ka tih chi tak hi a ni zui a; mahse, dik tak chuan a hmaa ka duh ang thinlung mitmeng kha chuan ka en thei tawh lo, a mi duh ka ni lo tih ka hriat chian ațang khân. Bâkah, tunah chuan kei pawhin mi dang duh ka nei tawh a, ani chu mi tak tak a ni bawk. Jakob-a hian han hre chhuak ta se...

Ka vànneih asiamin Lunglei ka kala ka pa tâna ka lei mawza set ka lo la kawl hlauh mai a, chu chu eng mah pêk loh ai chuan tiin ka pe ve a, a lo lãwm thiam viau mai. 

"Ka birthday ka hrilh thut si che a, cake-a min lawmsak bâk ka phût loh che nèn, cake tui tak bâkah, mawza min han pe tel a nia, ka roh khawp ang," a ti a, kei chuan," A, eng mah a nih loh kha, roh kher a ngai lo, bun hmiah hmiah la ka lãwm zâwk ang," ka lo ti thung a, ani chuan," Bun dâwn tho e, kan zin dun hunah pawh ka bun ang. E taka, eng tikah chuan nge kan zin dun theih ang? I lo ngaihtuah fel tawh tùrah ka ngai a," a ti leh duah a, a khûpah a kiu nghatin a kutin a khabe a dawm a, ngun zetin min han en a.

"Krismas chawlh lai chuan ti ila?"

A mitmenga hlimna chu ka hmu thiam vein ka hria, a han meng sawr sawr a, hlim tih hriat tak hian a nui zui bawk a," Aw le, engkim ka buaipui vek ang, i buaina tùr a awm lo aw," a ti sârh sârh a, a hlim hmêl chu hmuh a nuam viau, Zodina hmêl tho a ni si a, Zodina ni kher lo mah se Zodina hmêl leh taksa a pu reng tho a, hmuh nuam ka ti tho a ni. 

Jakob-a a nih loh pawhin Zodina chu a rawn lang ta fo a, Krismas chawlh hmangin ka haw thuai tawh dâwn tih a hria a, hun kan neih chu ãm takin kan hmang ve a ni. A bulah ka awm tam telh telh a, ka duhna a zual ve telh telh mai, a theih ang ang chuan min duat ve a, țawng erawh a țawng tam lo, bâkah, țawngkam a thiam viau lo bawk. A nungchang belhchian dàwlzia ka hre chiang telh telh a, ka duhna a zual tawlh tawlh mai.

Jakob-a nèna Krismas chawlha zin kan tum thu ka hrilh erawh chuan țawng lovin min en reng ringawt a, a ngawih reng avàng chuan nuam lo ka ti ve deuh hlek a," Ka zinpui thuai loh chuan min kiansan chuang lo ang, bâkah, a thurûk min hrilh tùr kha thil pawimawh tak a ni thei a, hriat thuai thuai ka duh a ni," ka ti dap dap a, a țawng chuang lo. Han sawi leh mai tùr ka vàn tawh a, ka ngawi ve ta rih a.

"I chungah thil țha lo tih tum ta se... Ka chhan thei dâwn si lo che a," a hnu daiha a rawn tih chuan," Chutiang lam chu hlau duh suh, ka duh loh zâwngin thil țha lo tih a tum lo ang, thinchhe ve viau țhin mah se mi sual tak chu a ni bîk lo a nia," ka lo ti ve thung a.

"Chu pawh ni se, ka ngaih a tițha chuang lo, min țanpui i tum vàng tih ka hria; mahse, ka rem ti thei ngang lo a ni, ka ngaihtuah dâwn lutuk che, mipa dang nèn, chutah, nangmah ngaizâwngtu a la ni zui..." tiin a han chek tlak zui a, thâwk a la leh hawk țhin bawk a, a rilru a buai ve a ni; mahse, țhulh ka tum lo, Jakob-a bulah ni se ka sawi vek tawh a, țhulh leh lam kha chu a tihchi tawh loh. Min ring vek tawh a, bâkah, hei hi a tân vek a ni, a tân thil țha zâwk rawn chhuah theihna hmanrua a ni thei tlat si a.

A rawn lêng ve țhìn bawk a, mi pawhin min sawi leh țan tawh tih ka hria; mahse, engah vak ka ngai tawh lo. A hmain Arini nèn an nih laiin min sawi hrep tawh a, tunah chuan thu dik a ni tawh bawk a, an peih phawt chuan min lo sawi ve mai mai teh se ka ti mai, kan chanchin sawi hi nuam an tiin an lo puar phah a ni ang e.  Mihring hi kan lo inang lo thei khawp a, kan tâna țangkai lêm lo pawh hi 'Kâ ka nei ve alawm' kan tih vàng nge ni, mi chanchin sawi rêng rêng hian kan hun hlu tak hi kan hmang ral peih a, hmaichhanah ni lo, social media thlengin. Mi chanchin sawi hi chu eng tikah mah kan tàwpsan thei dâwn lo hlawm chu a nih àwm hi, ka rilru ka siam sauh sauh a, tunah chuan min sawi min sawi mah se inkhâwm ka tui loh phah tawh lo va, office ni se ka kai țha reng tho a, min sawi chiam avànga danglam phah ka tum hran lo.

Ka haw hma Pathiannî tàwp nî ber tùra ka inkhâwm bâng ka haw tùr chu Arini chuan ka hriat theih ngei tùr hian," Mi bialpa hluiah khân lo lungawi ve viau mai teh, kei chuan secondhand hi ka ngaina lo, ka duh tâwka ka khawih hnu duh takin i lo pawm ve chu a ni àwm si a," tiin a han nui kar kar a, ka bulah mi dang an awm lo hlauh a, ka lâwm hle mai. A bulah erawh a țhiannu pakhat a awm ve a, kan pathum bâkin kan hre lo ang. Han chhàn lêt sak chu ka duh viau a; mahse, han chhâng lêt ta chiah ila amah ang level ka nih dâwn bâkah a duh ka tihpuitlinsak dâwn tihna a ni si a, chumi ka ngaihtuah chhuah vàng chauh chuan ka insûm leh ta zâwk a, inkhâwm bâng e ti lo chuan ka thin erawh a rim ru viau thung a ni. 

Tlaia Zodina a rawn lèn pawh chuan ka thin chu a la rim ru deuh țùng a, ka thinrimna chhan chiah hi ka hre thiam lo, Arini'n min țawng khum vàng khân nge, a duh tâwka a khawih hnu nia Zodina a sawi vàng zâwk kha em ni ang, ka thinrim tlat avàng chuan ka hmêlah a lo hriat viau a ni ang," I lung a awi chiah lo niin a lang, keimah vàng em ni? A chhan min hrilh thei ang em?" tiin dam dap hian min zâwt a.

Engtin nge ka tih ang? "A duh tâwkin Arini'n a khawih țhin che a ni maw?" ka ti dâwn em ni ang? A nih loh pawhin ,"Engtin nge Arini nèn in awm dun țhin?" ka ti zâwk dâwn em ni? Ti ta ila, engtin nge min ngaih ang? Thîkthu chhia min ti ngawt ang, bâkah, thil kal tawh a ni lehnghâl a, ho a lo tih viau phei chuan...

"Engati nge i inkhâwm loh?" ka ti ta daih a. Ni e, a inkhâwm loh chhan ka la hre hauh lo, inkhâwm ni se kan haw dùn thei ang a, khatiang khân Arini khân min țawng khum ngam lo bawk ang.

"Ka pu ka lo awmpui a, ka nîte nufa an inkhâwm thung a," tiin min chhâng a, ka hriat sa vek tho a ni. A pu chu tu emawin an awmpui a ngai tih ka hria, ka zawh duh tak a ni lo, ka zawhna min chhâng mah se ka hlim phah chuang hauh lo.

"Chu pawh chu ni se..."  Ka va han naupang chhia tak! Ka hre reng, ka awm dan âtthlâkzia leh mawi lohzia chu; mahse, ka thin a rim ve laklawh tlat tawh, han hrïkthlâkna mai tùr leh inàn thàwlna tùr ka mamawh a ni ang. Tu chungah nge ka thinrim? Zodina chungah nge Arini chungah?

"Ka tihpalh, i lung ka tihawi loh vàngin min ngaidam rawh. I haw dâwn aruaia tihlungawi loh che hi ka duh lo asin," inthiam lo awka taka a tih chuan keimah chu ka inthiam lo zui zat a, hrehawm ka ti leh si," I thiam loh pawh a ni lo," te chu ka ti leh ang lawi a, ka awm dàn teh hrep hi, hetiang hian ka la awm ngai tawp si lo.

"Vawiin inkhâwmnaah thil thleng a awm a ni tiraw? Eng thil nge thleng a? Min han hrilh teh."

"Eng mah a thleng lo," ka tih chuan min rawn hnaihin," Ni lo, thil thleng eng emaw a awm a ni, i lungawi lo hmêl leh awka hriat tùr a awm chhan hi chu thil thleng vàng chu a ni tiraw? Min han hrilh teh le, min hrilh loh chuan ka hre ve dâwn si lo va," a ti leh dap dap a, ka kutah chuan a rawn vuan a.

"Mawh, min han hrilh teh le."

A hmêl chu en duh lovin," Secondhand i ni em?" ka ti ta sap a, ka țawng zàwi deuh hlek a, ani chuan," Eng maw? Secondhand... maw?!! Eng nge a awmzia?" a awka chhuaka a ngaihna a hriat lohzia chu ka hre thei hial mai.

Sawi chhuak ta sa sa, sawi vek ang.

"Arini khân a duh tâwkin a khawih țhin che a ni maw? A ni em? Engtin nge in awm dun țhin dàn chiah?" Ka sawi zo chu zak ve deuh mah ila ka thin tâwt chu tlêmin a thâwl deuhin ka hria! 

Min chhâng lawk lo, a ngawih vang vang dànah Arini thil sawi kha a dik a ni ngei ang chu, ka hmui chu ka pet leh ta fan fan a. Ni e, min lo insawi theih khum pawh ni se a lo dik a nih chu, a àwm viau e, a bialpa hlui, kum tam tak a lo zui tawh kha a ni miau alawm.

"A dik a nih chiah chu."

"Min han en phawt teh, min en loh chuan thu dik ka sawi leh sawi loh i hre thei lo palh ang," a rawn tih chuan muangchâng hian ka en chho ve a. Gas stove bulah kan ding dùn ràn a, ani'n ka kutah a chelh a, kan inmelh dun ta ràn mai.

"Ka bialnu hlui a ni a, nangmah ka hriat hma daih ațanga ka lo kawm țhin leh kawp tawh a ni a--"

"A dik, ka thinrimna tùr a awm lo, ka lo lan hma hma hma daih tawha i bialnu a ni a, lo insawi thei viau pawh ni se a àwm a ni," ka lo tih khalh zung zung a, min țawng khum dàn leh an awm dàn tùr chu ka mitthlà zut zut a, ka thin a rim thar leh tlat pek a nih chu, heti khawp hian ka thîkthu a lo chawk thoin a lo chhe thei ang tih pawh ka lo hre pha lo!

*MAHNI HNA THAWH ȚHAT INFAK PAHA CHAPO DEUH ÂRA MI DANG SAWISÈL ZUT ZUT CHÎNG MI HIAN LAWM AN HLAWH VAK LO, LAWM AHNEHIN HUAT AN HLAWH CHÁWK*