☆THE SWEETEST HANDCUFFS☆ - 37 By Dingdi Pachuau

 ☆THE SWEETEST HANDCUFFS☆ - 37 By Dingdi Pachuau

Ngawi rengin min en a, a țawng chhunzawm loh avàng tak chuan ka thin chu a rim zual sauh a, a bialnu hlui ni tawh mah se, a la duhin a la ngaihtuah reng ka la ring tlat a ni. An awm dàn te ka zâwt si a, a han ngaihtuah lêt ang a, a mitthlaah a thar chuai chuai ngei ang chu. 'Ka thinrimna tùr a awm lo' te kha ka han ti ve tak a, ka sawi ve mai mai a ni, tunah pawh ka thin chu a rim reng hi. A țawng ta bawk si lo nèn, a mitah pawh en duh tawh lo chuan ka meng hnuai ta daih a.

"Min en teh."

Leh lawi chuan; mahse, ka en duh lo lui ve tlat a, ka lu pawh ka kûn ta daih bawk. Ka awm dàn chu a naupang chhia tih pawh ka hre ve tho a; mahse, ka thin a rim ve laklawh tawh tlat.

"A tih theih chhun chu țawng khum che leh insawitheih khum che a ni, chu bâk tih theih eng nge a neih tawh? A tih theih chhun a ti ve maiah ngai thei la ka ti khawp mai, a lam ka hawi dâwn tawh lo tih a hre chiang a, kei pawhin ka hre chiang bawk. Kan hun kal tawh chu eng pawh lo ni se, tûn hun hi alawm pawimawh ber chu, nang ka nei tawh che a, eng dang mah ka mamawh tawh lo."

Ka hmui chu ka pet a, kan indin hnaih bawk a, a thil sawi chu ka hre chiang khawp mai, thu dik tak pawh a sawi ngei ang, ka ring bawk; mahse, ka la en duh chuang lo.

"Min en tawh la, aw... ? I thin a rim chuan nangmah ang thovin hrehawm ka ti ve a nia, hawh, i thinrimna kha paih bo daih ang, a nuam lo êm mai," dam tak hian a ti leh sap sap a, ka bân chu zàwi tê têin a chûl hliau hliau bawk a.  Ka awm dàn chu dik ka inti bîk lo, Arini min țawng khum vàngin Zodina ka thinrim khum teh ringawt a, awmzia pakhat mah a nei lo.

"A duh tâwka a khawih hnu niin a sawi che a, ka phal lo alawm, ka ngaihtuah zâwng ringawt pawhin ka thin a la rim."

A âwmah chuan min pawm bet ta chawt a, nghet zetin min kuah zui bawk. A chêt dàn chuan min tihamhaih deuh a; mahse, a hnu deuhah pawh chuan ka tãl chhuak phal chuang lo, min kuah chuan ka thinrimna chu a reh tial tialin ka hre deuh tlat mai a, bâkah, nuam ka ti tlat a.

"I va duhawm reuh tak! Duhawm tàwp i ni! Engtiziaa ka duhna che hi hrilh har viau che nge ka nih le? A hma khân ka lo ã a ni ngei ang," a ti sap sap a, tlêma min kuahna thlah dulin ka hnung chu a han chûl a, chutah," Tu hmeichhia mahin an duh tâwk chuan min la khawih bîk lo a nia, thinrim tawh miah suh," a ti leh ta sap sap a, kei chuan," Nih, engati nge a sawi ngam si? Second-hand a la ti zui che a nia," ka lo ti ve thung a, a sawi lai hmêl chu ka ngaihtuah lét leh a, ka thinrimna chu a rawn inlâr thar leh a.

"Chuvàng chuan i thin a rim a, i rilru a na ta a..." a ti sap a, duat tak chuan ka hnung chu chúlin ka samah a rawn sâwn chho leh a," Engtin paehin min sawiin, Second-hand ang hial pawhin min chhuah mah se ... min duh loh phah chuang lo  ang ... tiraw?" a ti ban deuh chat a, rang zet hian," Teuh lo mai! Engtin pawn sawi che se la... A, ka thin a tirim tho tho, a duh duh dànin a sawi tùr che a ni lo," ka lo ti vat a.

Min kuah leh ta vang vang a," Ka lâwm e," ti sapin min thlah a, ka en chho hau a, ani pawh chuan min rawn en chhuk ve tho, kan inen vang vang lai chuan," Hawh, hetiang thil hi chu theihnghilh daih ang, thil țha lo lam hi zawngin hriat reng a phú lo, hre reng lova theihnghilh daih hi a țha zâwk ngai a nia, kan inkâr boruak tichhetu atân phei chuan hman ka phal miah lo, ka phal lo bur," a ti leh a, a mitmeng nung ser sawrah chuan min duh vezia leh a thil sawi chu zàwm tura min duhzia chiang takin a lang reng mai si a, a duhna tihpuitlinsak chu ka tihmâkmawh niin ka hria.

"A țha alawm; mahse, min țawng khum leh chuan ka dawh mai mai tawh bîk lo ang, nangmah a sawi chhe leh che a nih hlauh phei chuan..." ka la ti khar khar a, a lo nui hawk a," I thinrim hmêl ka hmuh ve vawi khatna a ni hial ang; mahse, i hmêl chu a la țha tho a lo nih hi, ka laka i rilru puthmang ka hriat chian phah lehnghâl a, mipa vànnei tak chu ka ni! Vànnei ber ka ni hial zâwk ang," a ti ta daih a, a thil sawiin ka thinrim a tihreh chianzia chu mak tak a ni.

Zànah inkhâwm tùrin min rawn sâwm a, Kimite nèn kan kal tlâng a, Kimi hi ka la hrilh chiah lo va; mahse, a hre ve thuak tawh maithei, min dem vêl hi chu a hre ve fo ngei a, kan induh tawn tawh tih erawh a hre kher lo ang, nakinah ka la hrilh ve ang chu, hun han kal phawt se.

Ka haw tùr chu sawi lang lo mah se a huphurh lâwk khawp tih ka hria, a chhan chu Jakob-a ka zinpui dâwn tih a hre ve kar mai a, zinpui lo tùrin min thlêm nasa, ka chungah thil țha lo a thlen a hlau a ni, bâkah, kan chanchin kha a hre ve vek bawk si a, chuvàng tak chuan a phal lo a ni, a phal lo pawh hi ka hre thiam reng, mi dang pawh ni se a tih ang hian an ti ve tho ang; mahse, ka tum tawh a, Jakob-a ni se ka hrilh tawh bawk a, țhulh leh ka tum tawh lo.

Jakob-a ve thung chu a hlim khawp mai a, phûr zet hian zinna tùra engkim a tih fel vek tawh thu chu min hrilh a, mak ka ti viau. Ka haw hma ni thum chhûngin vawi hnih kan inhmu hman bawk! A rawn lang zing ta lutuk chu mak tih loh rual a ni lo, ka haw dâwn zînga Zodina'n min rawn thlah pawh chuan," Ka hre thiam lo, amah hi a chak ta viau a nih loh pawhin keimahah hian dik tâwk lo a awm a ni ang, ka ngaih a țha lo lek lek hial a ni, hmuh zin che ka duh tehlul nèn!" a rawn ti hial a, ani pawhin a hriat thiam loh chu ka tân phei chuan hriat thiam har zual tùr tak chu a ni; mahse, ka thiam ang ang chuan hnèm hrâm hrâm a.

"A, a phùr vàng pawh a ni thei ang chu, kan zin dâwn miau si a, keini pawh kan duh zâwng tak kan tih dâwn chuan kan phùr theih êm hi," ka ti a, ani chuan," A ni mahna; mahse, ka ngaih a ngam zân chuang lo, ka ngaihtuahna a vâk kual nasa a, thil țha lo tak tak ngaihtuahin, nang hmu thei tawh lo tùr che hian min siam ang tih te ka hlau a," a lo ti leh a, chutiang thil a sawi avàng chuan kei pawh chu ka rilru a nuam zân lo va; mahse, a hnênah erawh chuan," Hlauthãwng duh suh, thil țha lo lam a tih duh chu ring lo phawt ang, ngaihtuah pawh ngaihtuah duh miah loh tùr, bâkah, kan zin dun hun chhûngah pawh amah a ni reng bîk nâng, ni hnih khat hnuah chuan nang pawh i lo ni leh daih thei a," tiin beiseina a neih theih nân ka ti leh hrâm hrâm a.

Scooty-in ka inkhalh haw ve ta vang vang a, driving license la nei hek lo le, L lian pui ka bel vâ a, ka zak lêm lo. Kawngah harsatna ka tâwk lo va, motor erawh ka tâwk tam viau thung. Krismas hunpui a ni dâwn tawh a, mi tin mahni awmna khua leh chhûngte awmna lam kan pan sung sung a, motor chu tâwk tam lo thei ka ni lo.

Ka nute bulah chuan dâwt vâr ni chiah lo ka sawi a, tûn Krismas chawlha thawhpuite nèn zinho kan tum thu ka hrilh chuan ka nu chuan," A ni maw? Țha chu ka ti lêm lo viau nain chawlh in neih ve chhun a ni si a, in lo tum tawh phei chuan han remtih loh ngawt bîk thu a awm bawk si lo, a hun thu erawh ka duh dàn chu a va ni chiah lo êm!" a ti niah niah a, rin loh deuhin ka pa ve thung chuan," A țha, zinkhawthawng ve rawh khai, hun ãwl i neih ngai loh hi. Pathian zârah kan dam ang a, harsatna leh buaina tâwk lovin in rawn haw leh thuai dâwn alawm. Tute nèn maw in zin dâwn i tih kha? In rei dâwn êm?" a rawn ti duah a, kei chuan kan chàm chin tùr chu ka lo sawi vat a, a ngawi deuh vang vang phawt a, chutah," Ka lo rin aia in chàm rei dâwn loh chu maw. I kal ngei dâwn nia, ni dang leh kum dangah pawh i zin ngai lo va, i tum tawh thil a ni bawk nèn, i kal ngei dâwn nia, bâkah, khaw hmuh zàu hi a țha a nia, i la kal ngai lohna hmun a ni dâwn lehnghâl a, zin in rawt chu in ti țha viau e," a ti leh bawrh bawrh a, ka nu tân pawh lo hnial buaina chî  a ni tawh lo. Ka pa hrilhhriat hi ka huphurh tak zâwk kha a ni a; mahse, rin loh deuhin a phal zâwk zâwkah a lo țang si a, mak ka tiin ka lãwm viau nghe nghe a ni; mahse, dâwt ka sawi erawh ka inthiam lo ru khawp mai thung.

Ka cousin-te an rawn haw khâwm tel tel a, hlim tak ĺeh dam taka kan inhmu khâwm leh thei chu a làwmawm khawp mai a, tih dàn ngai téa urlâwk zàna ei tùr lam an han sawi tel tel chuan," In tùr lam chu ka lo tum ang e," ka lo ti a, Rosy chuan," A țha, sawrkâr hna thawk nge nge, a hlawh pawh in tùr kan lei nân lo pung thûr thûr zêl rawh se," a ti leh kher a, ka melh a, min lo en kuau tih ka hmuh chuan ka hmui chu ka tihpawrh khum vak a. Urlãwk zàn ka hmang hman ve dâwn lo tih erawh ka hrilh duh hlawm rih lo, hrilh lovin ka zinsan daih ang a, ka zin hunah ka la hrilh ang chu.

Zànah Zodina'n min rawn be zauh zauh a, an khua reh a tih thu leh min ngaih thu a rawn sawi ziah. Kei pawhin ka ngai, biak hmasak erawh duh ve viau mah ila Jakob-a emaw Vâlpuia emaw a lo nih lai a ni thei si a, ka be hmasa ngam lo.

Jakob-a nèn kan zin tum ni a rawn inher chhuak ta ngei a, Krismas urlâwk hma chiah nî-ah a ni nghe nghe. Vànneihthlâk takin ka ti dâwn nge inlêng kan nei a, ka nute chuan min thlah hman lo hlauh mai. Min thlah ta se Jakob-a an hmuh si chuan min ringhlel ngeiin ka ring; mahse, min ringhlel lo thei tho bawk a, zin ve mai mai tùrah pawh an ngai ve thei tho a ni.

Kan zin chhûngin Jakob-a a ni reng theiin ka ring hauh lo. Zodina a nih chuan a zia viau ang a, Vâlpuia a rawn nih hlauh erawh chuan a nuihzatthlâk duh ngawt ang, mak a ti dâwn êm asin. Ka duh dàn takah erawh chuan Jakob-a ni reng se, a kal duhna, min kalpui a duhna hmunah min kalpui char char se, chuan, a thurûk min hrilh tùr kha min hrilh bawk se...

Engkim a tifel vek bawk a, eng mah ka ngaihtuah ve a ngai hauh lo. Aizâwlah kan riak a, a tûkah pawh chuan amah Jakob-a tho chu a la ni a, buaina a awm lo phawt. Ka hlauhthàwn rûk thil a la thleng rih lo chu a nia, mi dang, Zodina emaw Vâlpuia emaw chu rawn ni thut se chuan kan buai pherh êrh maithei a ni, an bo hû mai dâwn asin.

Ka cousin-teho chuan min rawn phone nasa ta mai. A țhenin min rawn chhuahchhàl a, Rosy phei chuan," Sawi ve nghâl mai tùr che a nia, sawi ni la ka zin ve duh dáwn tehlul nèn, tu nèn maw in zin a?" a rawn ti nghat nghat a, rawn thinrim angin lang mah se a thinrim tak tak lo tih ka hre tho a,"In tùr leina tùr chu i account-ah ka rawn transfer ang e, in duh tâwkin in lo in dâwn nia, 31 zàn chu kan hmang ho hman tawh ngei ang," ka han ti ve a.

Tluang takin, min kalpui a duhna hmun chu kan thleng a, kan thleng ti ila a khawpui kan thleng a nih zâwk chu, a college hmun kan fan tùr chu naktûk lamah emaw a tûkleh lamah emaw kan fang ang chu. 

Jakob-a hi ka hre thiam chiah lo, an awmthei ve tâwk ang tih chu ka rin sa tho a ni a, a dik ngei tih ka mitin ka hmu bawk. Hotel nuam ve tâwk takah ah min thlenpui a, thlen man pawh a tlêm fahran lo ang, hêng khawpuiah phei hi chuan hotel thlen man a tlêm thei lo hrim hrim. Amah lah chuan,"Hêng lai hnaiah hi chuan hotel hi a awm ve nual a; mahse, hei hi ka duhin nuam ka ti ber. Thlen man hi a to vak loh bâkah a hmun hi a nuam a, an ei siam pawh a tui bîk a ni, an ei siam ringawt pawh hi thlen nuam ka tihna chhan a ni ve tlat," a ti mai a, a kal fo tawh tih a thil sawi dàn ațang chuan a hriat hliah hliah, nia, college a kalna hmun kha a ni miau mai a, a hre bel ve thawkhat ang chu.

"Țhian hnai tak tak pawh ka nei nual a; mahse, thlen chilh erawh ka duh hauh lo, hnam dang mah ni se ka țhiante hi an fel viau a, an polite bâkah an rilru tak takin min kàwm ve țhin bawk. A changkângho hi chu e, kawm an nuamin țhiante tân hian ui an nei ngai lo teh asin, ti ila nang pawhin hnam dang țhian i nei ve nual tho ang chu, ni lo'm ni?" a ti leh duah a, kei chuan," Nei nual lo ve, ka nei hran lo," tiin ka lo chhâng thung a. Ani chuan," Ni thei tho mai, mipa hi chu kan kâwlhrâwng deuh hlek a, kei phei hi chu mahni mizopui awm lohnaa chetla țhang ka ni a, hnam dang hi ka kàwm lo thei lo a ni. Hmeichhe tân chuan hmun danga hnam dang lehnghâl țhian neih duah hi a ţangkai tam lêm lo," a ti leh mai a.

"A nih, kan zin dùn tawh sia, i thurûk chu min hrilh dêk dêk chhin tawh la?" nui deuh hlek chung hian ka han ti a, ani erawh chuan," A la hun chiah lo. Nakinah, ka hmun hlui kan fan dun zawh hnu lamah le," a lo ti thung a, ka zâwt nawn ta bîk lo, min hrilh hun nghah mai a fuh ang.

*THU DIK TAK CHUAN HUN REI LO TÊ CHHÛNG ATÂN A TINA ANG CHE; MAHSE, DÂWT ERAWH CHUAN HUN REI TAK CHHÛNG A TINA THUNG ANG CHE*