☆THE SWEETEST HANDCUFFS☆ - 39 By Dingdi Pachuau

 ☆THE SWEETEST HANDCUFFS☆ - 39 By Dingdi Pachuau

"Warning ka pe nasa tawh a, tunah chuan ka ngawi mai mai tawh lo ang, engkim ka sawi chhuak vek dáwn, a nihna dik tak hi tu pawhin hre vek tawh rawh se, mahni huang lo dâi lo tùra ka hrilh pawhin engah mah min ngai duh lo, a hre khawp ang!" a ti nghut nghut tawh mai si a,   thinrimnaa a khah tawh tlat avàng chuan eng mah ka zâwt chiang ngam lo, engtiang takin nge Zodina chu a nu chungah a chêt tih pawh hre châk viau mah ila ka zâwt zui ngam tawh rih lo, a thin a chhe ve bawk si a, a thin a rim bawk nèn, boruak țha lo zâwk a chhuah mai ka hlauthãwng a ni.

Ka chungah erawh thinrim ve tho mah se engtin mah min ti lo, a thinrim hmêl ka hmu a, a thinrim țawng nghut nghut țhìn chu ka hre leh a ni mai a, a thinrimzia ngaihtuah chuan kut min thlâk duh mai ang a tih tùr khawp a ni a; mahse, chutiang chuan a awm lo.

A tûk lamah pawh chuan a la lungawi loh hmel viau mai a; mahse, min be tho a, min ngaihsak a țhulh hek lo. Thlawhnaa kan thlawh chhûng zawng erawh chuan a maimichhîng tlat a, a muhìl lo ang tih erawh ka hria a, ka melh ru zauh zauh ringawt. Ka kuta a zungbun min pêk chu ka en a, a kut ka en leh a, thinrim taka a paih ka rin tehlul nèn, a nih loh pawhin a phone kha a vawm chhiat leh bur ka ring a nia; mahse, a ti miah si lo va, a inup rei deuh dâwn a ni maithei a ni. Ka huphurh sa ngawt mai, kan khuaah Kum thar ka han hmang ngei ang a, ka hna ka zawm leh hunah engtiangin nge boruak a lo neih ang a, engtin tak nge Zodina thil tih chu a sawi chhuah ang? Chutiang chu ka ngaihtuah ngut ngut a, ani hi chuan Zodina thil tih leh a hmingchhiatna tùr chu engah mah a ngai dâwn hauh si lo, thlêm ta char char ila, a lungawi thei mai ang em? Kan khuaa kum thar hmang ve mai tùr hian sâwm ta ila, eng angin nge a ngaih ang? Mahse, a tih chi hauh loh, eng angin nge ka nute'n an lo ngaih ang? Han zui haw dâwn ngawt ila, Krismas pawh hmangho hman lovin ka zin bo daih kha a ni si a, Kum thar hmanho loh chu ka nute ngaih dàn a ni tawh hauh lo ang le. 

Ka rilru a va tibuai tak!

*******

Rilru khingbâi leh hrehawm ti takin Kum thar chu kan khuaah ka han hmang chu a ni a, hlauthãwng rêng rêngin hun ka hmang liam ti ila a dik ber ang. Jakob-a chu ka be fo a; mahse, Zodina lam rêng rêng chu a sawipui theih loh, ka han sawi chhuak lui deuh a, a thil tih chu sawi chhuak rih lo tùra ka han thlèm deuh dâwn pawhin a țawng tàwp hmak a, a châng lahin phone a off thùl, Zodina a rawn ni har tawh ka ti tak zet a ni.

Mahse, Zodina pawh rawn ni se, eng tin nge ka hrilh ang? "I nu rinawm lo lai i hmuh khân i thin a rim lutuk a, kha vàng khân i lo hãl a ni maw?" tiin ka zâwt mai dâwn em ni? Ka lu ka thing nak a, tih chi nâng, chu thu chuan eng angin nge a țhàwn nasat ang? Thil tisual ang maiin mi zîngah inthlahrung leh inkiltawih takin a awm țhìn kha a ni a, kan inkawp chhoh ve hnu, chûng a indaidanna bang ka tihchhiat chhoh ve beuh beuh mêk laia chutiang thu hriat nuam lo chu ka hrilh a nih hlauh phei engtiangin nge a awm ang?  A, Jakob-a thil sawi kha thu dik tak a ni kher dâwn em ni? Ni tùr chuan ka ngaingam chiah lo deuh nain a dik chu ka ring tho bawk si, ring phal lo, ring lo chiah bawk si lovin ka awm a nih deuh ber chu. Ka ngaihtuah ka ngaihtuah a, a lo inthlahrun dêk chhan leh a lo inkiltawih tlat chhan pawh kha hei vàng hi a ni thei ang em? Thu dik ni ta se, Zodina hian a lo zêp char char tihna a ni dâwn a, hriat chhuah a duh lo tawp ang. Chu tak chu Jakob-a hian a hre kar tihna a ni a, a thin a tihrim avàngin sawi chhuah piap piap kha a tum a ni. Miin a thurûk dik tak an hre chhuak tih a hriat hunah chuan Zodina chu a zak lutuk ang a, hrehawm tih vàngin khaw eng a hmu ngam hauh lo ang le, amah mi inthlahrung chi a lo ni sa bawk nèn.

Zodina nèn kan inbiak theih meuh chuan January ni 3 a lo ni tawh! Amahin min rawn be hmasa zâwk a, chu pawh a nî phone ațangin a la ni zui. Ka chanchin a hre lo rei si a tiin min rawn bia a lo ni, keiin thil thleng thar a awm leh awm loh ka zâwt ve bawk a, kan inbe rei lo thei lo. 

"Eng nge, buaina a awm deuh em ni? Chutiangte min han zawh a?" a rawn ti a, kei chuan," Awm lo ve, ka zâwt deuh mai mai che, nangmah i rawn ni lêt har ta si a, ka mang a ang lek lek tawh zâwk a," tiin ka lo chhâng a. 

"Nia, ka ngai che asin, ka duh hunah keimah ka rawn ni ringawt thei si lo va, hei tûn țum phei chu a hma aiin ka bo rei chu a nih hi. Taka, Jakob-a chuan thurûk chu a hrilh ta che em? Eng lam nge ni?" a rawn ti leh a, a awka chhuak chu a hlim hmel si a, ka hrilh ngam teuh lo mai, thu dik a lo nih hlauh chuan e...

"Tikhân, inthunun tlat la, nangmah kha nih reng tum tawh mai rawh, i bo rei chuan a hrehawm êm mai," ka tih chuan," Ka duh asin, chu chu khawvêla ka duh ber a ni, chumi ni thei tùr chuan nangmah hian min țanpui theih ka ring tlat bawk. Ka ring che a ni, a hma kha chuan mi dangah hian beiseina ka nei ngai lêm lo; mahse, nang ka tawn hnu che hian beiseina êng ka nei a, chu ka beiseina êng chuan min nawr kal reng a, Pathianin ka tân liau liau a lo ruat che a nih pawh ka ringhlel hek lo, beiseina min neihtîrtu i ni si a," a rawn ti ta sap sap a.

Kimi ka biak pawha boruak danglam a awm lëm loh avàngin Jakob-a chuan a la sawi chhuak lo a nih ka ring teh ngawt a, tlêmin ka ngaih a țha ve deuh. Zawh dawt ka hreh si a, hriat chian erawh ka châk viau thung. Han zâwt ila," Eng boruak lam nge ni?" rawn ti ta se, engtin nge ka chhàn ang? A ngaih ka ti țha lo tê tê ang a, min zawh sek chuan ka puang vek zâwk mai lo ang maw?

Unauteho lah chuan chanchin min zâwt sek a, zin e ti lo chuan eng vak ka lei haw bawk si lo va, hna lam vànga ka zin lah chu an ring hauh bawk si lo. Ka zungbun an hmuh hnu phei chuan min han zâwt chîk khawp mai a; mahse, dâwt ka hrilh hlawm ta ringawt. Mawi ka tih vànga ka lei a nih thu ka hrilh hlawm hnuah chuan min zâwt sek ta bîk lo va; mahse, min ringhlel deuh tho tih erawh ka hria. Mawi ka ti ve tho a, Jakob-a min pêk mah ni se Zodina pawhin a hmu ve tawh tho a, ani pawhin a bun ve bawk 

a, thîktu tùr ber a ni a, a thîkna a tihlan hran lêm loh avàngin tunah pawh hian ka la bun reng a ni.

Hna zawm tùra ka phei hma nîa thil ka lei tùr dàwr ațanga ka chhuak deuh chiah tihah chuan ka hminga min kotu an awm avàng chuan ka en vat a, nui sâng chunga Arini'n min lo en reng chu ka hmu zui a. A aw ațang khân tu nge tih ka hre lawk thei lo va, a aw lah kha tlëmin a lo chhãng ve deuh bawk nèn, tu nge tih ka hre lawk lo pawh chu a àwm ve tho mai. Krismas leh Kum thar vêlah a zaikháwm nasa a ni ang, Kimi'n an zai tui viau țhìn nii min hrilh nghe nghe kha, a ni ngei ang.

"In zin dùn niin ka lo hria a, a nuam bawk ang chu maw? Secondhand i lo ngaina viau mai hi ka lawmpui che; mahse, i ti mak hi chu ka la ti tho tho, mi inkâra inrawlh tùr khawpa hniama ka hmuh loh țhin che nèn; mahse, pâwn lam lan dàna inteh ngawt hi a lo dik hauh lo tih a takin ka hre chho zêl chu a nia," a ti nghâl bawrh bawrh mai a, chawhmeh ka lei ka inkhai báwr ve deuh a, ani a nalh zaih mai a, nuihsawh hmêl deuh hleka min en pawh chu a àwm viau.

"Secondhand angin sawi mah la, engah mah ka ngai lo. Keimah ber hi ka ni chuang lo va, a tâwk a ni mai alawm," ka ti lêt ve ta a, a duh duha min țawng khum hi ka ngaithei bîk lo, ka ngawihsan mai mai tawh dâwn lo. Kan bulah kan țawng hre pha an awm chuang lo, duh tâwkin țawng khum ve teh ang.

"I bialpa pawh khân tunah hian secondhand tho a ni a kawp ni, ni lo'm ni? Secondhand han sawi chhe thei i nih loh tawp kha," ka tih leh chuan rum zet hian min rawn melh a, 

"I va țawng thei reuh tak!"

Ka nui mai a," Ka chhùn zo tawh che a niang," ka ti leh a, min chhàn tuma a ka a àn zuau lai chuan a bialpa nia an sawi, biak ina a rawn inkhâwmpui tawh ngei mai khân a hmingin a rawn ko ta a, a kal sawn rang khawp mai. A kal ta chu ka en zui reng a, a bialpa khân rawn ko lo ta se, eng nge kan la sawi mêk ang aw?  Ka nui leh sak a, ka chhâng lét ngam chu mak a ti ve maithei a ni, ni dangah kha chuan ka chhâng ngai si lo va.

Aizâwlah an zin dâwn a ni maithei, nge kan tih thîkin zin dun ve an tum ni le? A bialpa bike R15 dumah chuan a han lâwn a, bike-ah a lâwn zing ve tawh a ni ngei ang, a zei thlarh thlarh khawp mai. An inphur chhuak, tlân zui ta chu  ka en zui zêl a, an lan tàwp thlengin. An tlàn liam hnu chuan ka thaw huai a, in lam panin ka haw zui ta nghâl a. 

Zànah kan inah rawn lêng lût kháwmin min rawn thlah a, inthlahna lam programme eng mah kan sawi sa loh avàng chuan ei tùr pawh kan nei meuh lo va, kan han lei chawp chûk chûk a, ei siam paha hlim taka kan titi mar mar kai chuan Rosy chuan," Mami kha a ngaihawm mai mai, la dam ve ta se, eng hna nge a thawh ve tawh ang le?" a rawn ti chhuak phawng a, Muanpuii chuan rang zet hian," Ni e tiraw? I rawn sawi chhuah tâkah chuan, ani kha chu lehkha kha a thiam thei a, hna zahpuiawm lo tâwk tak chu a thawk ve tawh ngei ang," a lo ti ve vat a. Mami chanchi chu kan sawi chho nak nak a, chutih lai chuan ka phone a rawn rì a, ka han en chuan Jakob-a a lo ni a. A nî phone ațangin a nih loh dànah Zodina chu a ni lo ang, amah Jakob-a ngei a nih ka ring. Eng tak rawn sawi ang maw? Thil țha lo lam chu ni lo hrâm teh se.

Ka rin ang chiahin amah a lo ni tak tak a, min rawn bia chu a ni ngei si a; mahse, a țawng țha duh lo khawp mai thung. Mi dangho lah chuan min lo fiam sek a," Eu, tu nge ni? Kan be ve duh, a chhe lo em?" fiamthuin an lo ti a, ka han khap ve deuh pawhin engah vak min ngai lêm lo, an țawng pawh chu a hre thei ngeiin ka ring. A țawng țhat duh loh êm avàng chuan han thinrimsana han biak tàwp daih chu ka ngaihtuah ut ut a; mahse, a tih chi meuh si lo, tûn dinhmunah hi chuan ka dah pawimawh a ngai si a," Naktûkah ka rawn phei dâwn a," ka han ti ringawt a, ani chuan,"Rawn phei rawh, ka ngai tawh che alawm," a rawn ti sup a, han thinrimin han titau ve deuh mah se min hmu châk tih ka hre ve tho a ni. 

"I thinrimna kha a reh deuh tawh em?" ka han ti dëk dëk a, ani chuan," Reh lo, i chungah chuan ka tilang lo ang; mahse, Zodina erawh hi chu ka hrem a ngai, ka sawi tawh a, ka sawi ang ngeiin ka ti țhìn bawk," a lo ti charh a, a lo sawi tawh tak tak em ni le? Min tihlauthãwng ta kher mai. 

"I sawi tawh maw?!! Tu bulah?"

"A chhûngte bulah ka sawi.  Ram ri pèla a awm leh chuan mi zawng zawng hriatah ka sawi tawh ang, chu chu a tân tàwpna dik tak a ni tawh bawk ang," a rawn ti leh charh charh a. A chhûngte bula a sawi chhuah tawh chuan a chhûngte chuan eng hmuhin nge an hmuh tawh ang le? Zodina chu an la hrilh loh hrâm ka beisei, Jakob-a hi a ni zing ta lutuk a, Zodina chuan a la hre hman kher lo ang... em? Ka ngaihtiah chhuak thut a, Jakob-a hian min vau nân a hmang mai mai a ni lo maw le? Thu dik tak pawh a ni lo maithei asin, dâwt mai ni se ka ti.

"I thil min hrilh kha thu dik a ni tak tak em? Dâwt a ni lo tak tak maw?"

A huat zâwng tak ka sawi em maw ni teh rêng ni, a hmet tawp ta hmak mai a! Ka phone chu ka en ka en ringawt, biak ka han tim a; mahse, a tlang thei miah lo! Ka thaw hawk a, khua a váwt bawk a, ka thaw khu liai liai mai. Che lovin ka han ding deuh vang vang a, a vâwt bawk nen, a tàwp nân tiin in chhûnga ka luh hma chuan ka han be leh dâwn chhin a; mahse, a tlang thei chuang lo, ani hian a phone kha a lo vawm chhe leh hman pek em ni ang?

In chhûngah lah chuan ka boruak hre ve hauh lo chuan a țhen ring zet zetin an lo țawng luar luar a, a țhen an lo nui bawk a, ei tùr lo ei tâwk lah bo lo, kan indaihzâi teh mang e. 

"Pàwnah i chhuak kher a, kan bulah khân be ve mai ta la, vâwt pawh i ti hauh lo tùr hi a nia," pakhatin a lo tih chuan a bula mi chuan," Thurûk sawi hi chuan..." a lo ti thung a, a nui pãwt pãwt a," Kan mâkpa tùr chu eng ang mi nge a nih a?" lo ti an awm bawk a, zanin kher hi zawng rilru hahna boruakin hmun a nei lo.

Zàn ka mut dâwn pawh chuan biak ka tum leh chhin a; mahse, a hma ang thovin a theih chuang loh. A nî han biak chu ka tum deuh thut thut a; mahse, 'ém a' ka ti leh deuh a, a chhan chu Zodina a ni mang si lo va, keiin hre hrang mah ila an hre hrang ve àwm si lo, bâkah, a muhìl daih tawh ang.

Scooty chuan ka tlãn leh ta vang vang a, boruak chu nuam viau angin lanģ mah se ka rilru chhûngril lamah buainain thlà a zâr thung. Zodina hmuh ka hreh, ka hmu leh ngei dâwn si a, chutiangin a chhûngte pawh. Engtin tak nge Jakob-a chuan Zodina thil tih dàn kha a chhûngte bulah chuan hrilh ang maw? Jakob-a chu ka hmuh veleh chipchiar takin ka zâwt tak tak tawh ang, ka ngam tawh ngei bawk ang chu maw.

Rin loh deuhin Lungleiah chuan Jakob-a'n min lo hmuak teh rêng a nih chu. Ka hmu thut chu Zodina a ni emaw ka la ti zui a, ka be sual țêp a ni, be sual na ila chuan a thinrim a zual phah leh ngawtin ka ring!

Restaurant-ah min chawlhpui thlap a, thinrim tho siin min ngaihtuah viau bawk si a, a chêt dàn hi ka hre thiam lo lek lek zâwk. A țawng țha duh lo han inhmuam ûp vël hmêl lah chu pà ka ti tlat a, ka mitsìr ru reng mai. Jakob-a ni mah se Zodina hmel a ni reng tho si a, hmuhnawm ka ti tho a ni.

"Engtin nge i chhûngte bulah chuan i hrilh chiah?"

"Ka chhûngte an ni hleinem," a lo ti sup thung a," Ni dâwn tak e, Zodina chhûngte bulah chuan engtiang chiahin nge i hrilh a? Mak an ti àwm?" ka  ti leh vat a. Ani chuan," Ti ve  awk ang chu," a lo ti leh mai a.

Ka ngawi deuh vang vang phawt a, a hrilh ta ngei chu a ni a, kan inhmuh hunah kan tawng tawng chu kan tawng ve tawh mai a ni ang chu, hrilh tawh miau hek, tih theih awm tawh hek lo le, mi dang dang hriat loh tùr erawh chuan fîmkhur chu a ngai ang.

" Rawn biak che ka tum a, a theih miah loh, khawnge i phone? Min block em ni?" ka ti ta daih a, ani chuan," A chhe sawm vek tawh! Engah nge ka thu sawi i áwih duh tlat loh ni! Min ringhlel vei a nih kha," a lo ti nghut a, ka rin dàn dikzia chu, a vawm chhe leh tawh tih hriat reng.

"I thin hi chu aw... i awrh ve ngawt mai! Pawisa tam tak i vawm chhe leh ringawt tihna a nia, thinrim avànga han vawm chhiat leh ngawt țhin hi thil țha tak chu a ni lo asin," ka tih chuan," Ka thin a chhia tih hre rengin ka thil sawi i ringhlel a nih kha," a lo ti sup a, dik ka ti leh phian bawk si a, ka ngawi ta rauh rauh a. A hnu deuhah," Mi dang chu i la hrilh lo tak tak maw?" ka ti țha leh a, ani erawh chuan min chhâng tawh lo, min lo melh kur ringawt. A mitmengah chuan," Kha maw, min ringhlel leh ta," tih chhiar theiin ka inhria!

*MI, AN THIL TIH DIK LO LAI NGAWT I SAWI LAN HIAN  AN HLIMIN AN LÃWMIN I RING EM? I THIL TIH ȚHAT LAI SAWI LANG LOVA I TIH DIK LOH LAI CHAUH ZÊL RAWN SAWI ȚHÌNTU CHU NANG, I LÀWM ANG EM?*