☆THE SWEETEST HANDCUFFS☆ - 40 By Dingdi Pachuau

 ☆THE SWEETEST HANDCUFFS☆ - 40 By Dingdi Pachuau

Khaw chhûng kan luh chuan tlai dâr 3: 30 vël a ni tawh a, ka inah a rawn lût ve leh rih a, scooty chahbi ka bàn lai chuan," I khalh thiam viau tawh kha le; mahse, ka duh dàn chuan hmeichhia i nihna ang takin mipa hi min mamawhin awm la ka ti, scooty i neih hnu chuan ka hruai che i duh loh bâkah mamawhin ka awm tawh dâwn si lo, kha tak kha ka duh lo a ni. Hmeichhia chu nu hnâp mai se, mahnia engkim tih tum lovin mipa hi a mamawhnaah min pùr țhìn se ka duh. Hmeichhia, mipa mamawh lo nia inhre tlat hi chu a buaithlâk," a ti ta duah a.

"Mi dang pùr buai lova awm theih chu a țha fê zâwk ang chu," ka lo ti ve thung a, ani chuan," Țha fê zâwk lo, mipa chuan hmeichhiate hian min mamawhin min ko se, min pùr ţhìn se tih kan duh, mamawh nih hi nuam kan ti alawm," a ti ve leh a, a thil sawi leh amah chu inrem lo riau hian ka hria a, a hmël chu ka en a, min lo en lêm lo.

Rei a awm lo va, a haw hnu lawkah Kimi a rawn lût a," I rawn thleng tawh a... Nuam bawk em?" a rawn ti lût bawrh bawrh a, chaw tùr chhuang pah chuan," Umm... Lo țhu rawh, i rawn lang har ka ti rêng a ni," ka lo ti ve a, ani chuan," Tu emaw khân a lo hmuak che a ni maw? In inhmeh ka ti ngawt mai, min hrilh țha duh lo mah la," a ti leh a, nui hmël deuh a put avàng chuan a thin a rim chu a rim chiah lo a nih ka ring deuh ngawt a, ni e, Zodina nèn kan inkawp tih hi ka hrilh chiah lo a nih kha; mahse, mit neia meng ve reng leh beng neia mi thil sawi hriat ve reng bawk si chuan a hriat loh theih loh a ni, miin min sawi duh ve bawk si a.

"A, chutiang thil pawh a awm hran lo, nakinah chiang takin ka la hrilh vek ang che," ka ti ta ngawt a, Zodina natna hi a dam chian hunah( a dam theih ngei beisei ila) he khuaah hian ka la thawk reng a nih ngai chuan ka la hrilh fiah vek ang, tunah hi chuan thil a buarchuar rih êm mai, sawi loh tùr a la tam si, mi tân chuan hriat thiam a har dâwn êm asin.

Mi fate hi chu an fel țhìn teh e. Ka haw tih hriain zànah Amos-ate țhianho chu an rawn lêng vat a, Krismas leh kum thar hman dànte inzâwtin kan inbe luam hman chauh tihah Jakob-a pawh a rawn lût ve bawk a, lo lêng hmasa zâwk an nih angin an lo be hmasa a, ani erawh chuan a rùl tâwk chauhin a chhâng thung. An lo lêng ve chu a lãwm fahran lo tih ka hre thei nghâl mai; mahse, engtin nge ka tih chuan ang? Nula ka nia, anni tlangvâl an ni a, nula inah an lo lêng ve thei miau si a ni.

Amos-a lehpek chuan fiamthu thawh lehin an school kal laia an thil lam dàn nuihzatthlâk deuh deuh chu a sawi chhuak leh a, kan nui dar dar a, a hnuah Lunglei an kal țuma a kalpuite țawng leh thil hriat dàn nuihzatthlâk chu a sawi chhunzawm leh a," Lily, Lawngtlaia pasal nei ta kha in hria tiraw? Thil kha an hre maksak leh pek a, a țhiannu Bti nèn dàwrah ka kalpui alawm, ka nuin bulb pângngai, broiler ina chhit tùr 60w pahnih min chah avàngin ka lei a, Bti chuan dàwr nghâktu hnênah chuan,' Ka pu, All-out a awm em?' tiin a han zâwt a, ani chuan an neih loh thu chu a lo hrilh ve mai a, thosi hlauh ang chi kha a zâwt ni-ah ka ngai a. Lily chuan,' All-out a ni lo, get-out alawm,' a lo ti ve leh thung a, dàwr nghâktupa chuan nui hmêl pu chung hian,' Eng maw?!" a ti phawt a, chutah," Han sawi chiang teh u, cut-out a ni zâwk lo maw?' tiin a zâwt țha leh a, pakhatin All-out a ti leh a, pakhat lahin 'Get-out a ni zâwk' a ti leh bawk a, hre chiang an inti-dùn bawk si a, kan zawng buai teh asin. A hnuah dàwr nghâktupa chuan,' Han en kual ula, in thil zawn ang chu kan dàwrah hian a awmin in hria em?' a ti ta a, holder lei an lo tum chu lo niin, kan hriat chhuah hnuah chuan an nui ta tlâwrh tlâwrh a," a ti a, amah lah chuan a sawi thiam si a, a hmêl zawng zawng nèn a thil sawi chu a inhmeh lutuk a, kan nui vak vak a, Jakob-a erawh a kiai suk suk duh chauh thung!

Nunmawia chuan," Chutia i sawi tâkah chuan ka u pawhin holder lei ve a tum a, hold-all zawnin a zawng ve tho alawm," a lo ti ve a, Amos-a bawk chuan," A hun laiin zahthlâk deuh mah se a hnuah a nuihzatthlâk  duh viau a ni. Ka nu pawhin pangpár dàwrah hmeichhe hmaia inhnawih chi foundation ang hi a zawng ve tawh tho alawm, dàwr nghâktute lah chuan an lo nuih nasa mai a, an nuih nasat êm avàng chuan ka lo zak ve lutuk a, ani lah chuan,' Aw... i ute'n dàwrah an zuar țeuh alawm an ti vei a nih kha, dàwr a ni tho sia, ka zâwt ta mai a ni,' a lo ti mai a, a zak ve chuang miah lo," a ti leh a, kan lo khi sûng hlawm a.

An lêng rei vak lo va, an haw thuai a, an haw hnu chuan Jakob-a chuan," I nui nasa viau mai, an bula awm chu nuam i ti hlê a ni maw?" a ti bul bul a, kei chuan," Ti e, an thil sawi a nuihzatthlâk alawm, nuih ve fo tùr asin, hrisèlna atân pawh a țha a, i nuih a za ve lo em ni?" ka ti ve thung a, ani chuan," Za vak nâng, an țawng ring bawk si, nang pawh i nui ring mah mah," a ti leh bul bul a, a lungawi lo hmël chu ka en țhìn, a aw chhuak nèn chuan a inhmeh ngawih ngawih êm mai.

"I hman remchàn hunah Lalpu-a'n rawn leng rawh se a ti che a, i tlawh a phût a nih ber chu," a tih leh chuan lo en vatin," Aw le, amah a dam țha hrim hrim em?" ka lo ti vat a, bûk deuh nghat pah chuan," Aw; mahse, naupang chhia ang maiin a pangchang ve a, ngaihsak a phút thei khawp mai, a châng chuan a ninawm lek lek hial a ni," a ti leh a. Ni e, a sawi dik, ngaihsak kha a phût thei viau a nih kha, hun remchâng hmasa berah ka tlawh mawlh ang.

Pu Rovate'n chaw eiah min sâwm a, chaw ei pah chuan kan titi barh barh reng a, eng emaw sawia kan phùl hlut hnuah Pu Rova chuan," Thu dang deuh hlek, tu emaw chu a vànnei țan dâwn a ang riau mai, bâkah, a fing riau ka ti bawk, thlan tùr a hre nalh nalh êm mai che," tiin min han fiam chho țan ta a, kei chuan a thil sawi chu ka han hre thiam lo der vêl phawt a, Kimi lah chuan," A'n hre thiam lo der vêl ah! A hre reng si a," a lo ti ve bawk a, Pi Vàni chuan," In han sawi tâkah chuan ka lo hre thawi ve deuh a, in inhmeh ngawt tak ang, Zodina hi mi sual a ni lo," a lo ti ve leh bawk a, ka nui ringawt, sawipui chî ni pawhin ka hre lo.

Zirtàwpnî chawhnuah, U Ropuia haw hnuah Pu Zuala tlawh tùr chuan ka chhuak a, kein ka kal a, eirawng bàwl ka ngai lêm lo bawk a, ka hmanhmawh lëm lo. An in ka va thlen chuan Zodina nî ka va hmu hmasa ber a, min lo chiau-au vatin a pa tlawh tùra kal ka nih a lo ring ve nghâl bawk a ni ang," Room lamah a awm a, va lût nghâl mai rawh, a lo ngai tawh viau ang che," a lo ti nghâl a. Zodina nî hi nu țawng duh tak chu a ni lêm lo; mahse, a sual lêm lovin ka ring.

Khumah a lo mu duai a, ka lût min lo hmuh chuan," E, nang i ni maw? Ka lo beisei reng tawh che a, i dam țha maw?" a lo ti charh charh a, pan hnaiin," Aw, dam țha e, nang pawh i lo dam țha tiraw?" ka ti a, a kut a lo phar chhuah avàng chuan ka ban ve vat a, kan inchibai a.

"Chaw ei ve nghâl rawh aw, kan inhmuh lohna a rei tawh a, titipui che ka duh a ni," a tih leh chuan," A, chaw ei kher a ngai hleinem, min titipui i duh phawt chuan kan titi char char dâwn nia," ka ti a, a sam țuak chu a hma ai chuan a lo tam zualin ka hre deuh ngawt a, chu bâkah, a hmêl pawh chu a hma ai chuan tlëmin a lo zùr belh bawkin ka hria, rilru hrehawmna a nei pawh a ni mahna.

"Zodina'n thil hrilh che a nei em? Krismas lai bàwr vêl khân in zin dùn niin ka hria a," a ti țan ta phawt a, kei chuan," Aw, zin e," ka lo ti ve mai a, ani chuan," Tlêm lai deuha ka thil hrilh che kha i la hre reng em? Bawiha chungchâng a nih kha," a ti leh a, ka lu ka lo bu nghat a," Khami zûl deuh kha tûn hnai lawk khân a sawi chhuak a ni àwm a, bâkah, a awm dàn hi a danglam deuh hret hret niin ka hre bawk, i lo chîk ve em? A châng chuan a thin hi a chhe viau a, tûn hnai chhoah phei hi chuan a chhe zual niin ka hria.Tukin erawh chu a ze pângngai tak, hmân ațanga ka lo hriat țhin ngei, min ngaihsakna leh min hmangaihna tihlan hreh ngai lo zia kha ka hmu leh a," a ti leh charh charh a.

"A nih tak chu, khawnge amah hi a awm a?" tiin ka han zâwt a, ani chuan," Huan lamah a kal ta a nih kha, in inkàwm ve nasa tawh tho a, a nungchang inthlâk deuh thut thut țhìn hi i hre țhìn ang tiraw? Kei pawhin ka hria a, ka hai der țhin, a nu leh pa bula hun tam zâwk a hman loh vàngah ka ngai țhìn a, nu leh pate thlazàr hnuaia awm lo chu eng emaw kawngah hian dik tâwk lohna a awm ve țhin hi, hei vang hian hre thiamin ka en liam mai țhin, tlêm lai deuh...a, a rei ve leh deuh ta, a thil min hrilh kha ka hriat thiam ve zâwng chi a ni lo va, amaha dik lo awm a sawi niin ka hria. A nu leh pate bula awm lo a nihna vàng nia ngaiin ka hre thiam ka tih tawh kha; mahse, a nîte bula a nuhrawn hãltu nia a insawi thu zet kha chuan min țhâwng viau a ni, a hàl chhan lah a sawi lang miah si lo. Ka hrilh tawh ang che khân a nuhrawn khân accident kha a tâwk ngei a; mahse, Zodina hi a ni ngei tih tu mahin an sawi lang lo, kha thil thlen hnu khân a pa khân a rawn thawn haw tawp a, a chhan ka zawhin an bula a awm theih tawh loh tùr thu min hrilh ringawt a ni. Zodina ka zawhin eng mah min hrilh duh si lo va,eng mah a zawh chhuah theih loh a ni tawp mai, a ngawi reng ringawt mai a ni. Tunah chuan hun a lo liam tam ve tawh a, amah ngei pawhin hun liam ta chu theihnghilhin rual a pâwl a, kohhran leh khawtlângah pawh mite angin inhmang lua lo mah se a inkiltawih lutuk tawh lo va, hlim hmêl tak puin a nui ve thei tawh ka tih laiin thu thin țhâwng tak kha a rawn sawi chhuak leh ta si a," a ti leh dap dap a.

A hma khân Zodina chanchin, a nuhrawn-in accident a tawh hnua a pain Zodina a rawn thawn haw tawp dàn min hrilh tawh a nih kha, a rawn thawn haw tawp dànah Zodina khân eng emaw thil țha lo deuh tak tih a neih a rinhlelh deuh thu pawh min hrilh a ni; mahse, mi hnêna sawi chhuak miah lo tùrin min ngèn kha a nia, sawi chhuah tumna lah ka nei hek lo. Mi chanchin țha lo lam a nih vàngin sawi chhuah kha a țangkai lo va, hláwkna lah a awm hek lo.

"Eng rilru puin nge a nuhrawn chu a huat anga a hàl kher ang aw tih ka ngaihtuah a, hun kal tawh niin țhangkhat lian zet aia tam hun liam tawh mah ni se ka ngaihtuah lo thei lo. An pafa inkârah hian eng thil chiah nge thleng tih leh eng vànga a nuhrawn chu hãl nge a nih tih hi ka ngaihtuah ngut ngut reng mai a ni, chu chu a nia, thil hrilh che a neih leh neih loh ka zawh chhan che chu," a ti leh charh charh a, a nuhrawn a huat chhan chu ka hre kar nain sawi chhuah mai chi niin ka hre lo, an pafa inkârah chuan eng thil nge thleng tih erawh ka hre hauh lo thung. Amaha mi dang lo awm ve țhin Jakob-a ka ațangin he thil hi ka hria tih hrilh ta ila, eng angin nge a ngaih ang le?

"Tukina ka room-a a rawn kal chuan min ngaihsak viau a, ni dang zawng aiin min ngaihsakin min duat niin ka hria a, làwm pawh ka lãwm viau. A zaidam leh tâk êm avàng chuan zawh chhuah theih inbeiseiin a pa nèna an inkâra thil thleng, hun kal tawha mi chu ka lo zâwt chhin leh pek a, tah chuan a ngawi zui ta daih a, chu lam hawi chuan eng mah a sawipui theih loh, a nuhrawn a hãl chhan zawh ka tum ve deuh phei chu sawi pawh ka sawi chhuak duh ta lo nghe nghe a," a tih chuan," Tukinah maw? Tûk dangah ngaihsak tùr chein i room-ah a rawn lût ngai lo em ni?" ka lo ti vat a.

"Min ngaihsak tho nain min ngaihsak nêp deuhin ka hre țhìn, a châng phei hi chuan ka koh ka koh pawh hian hre lo angin a awm leh tlat zêl nia, thil a ngaihtuah nasa țhin a nih hi ka ti rilru mai țhin a, tûn hnai chho, A... Krismas hma chho bàwr vêl ațang khán a ni zualin ka hria, chutih rualin eng emaw châng hi chuan min ngaihsak leh êm êm bawk a, sawisèlna tùr awm miah lo khawpin a nia min ngaihsak ni, a nungchang hi a inthlâk thut thut ni berin ka hria,"  a tih leh chuan ka bu nghat nghat a, Jakob-a a rawn nih lai chuan a ngaihsak nêp deuh ang a, Zodina a rawn nih leh chiahin a rawn ngaihsak thar leh ang, Vâlpuia phei chuan ngaihsak dàn pawh a thiam vak lo tawp ang, ram lamah hna a thawk deuh ngar ngar ang a...

"Nang hi chu ka ring che ka tih tawh kha, kan chhûng zînga mi ang maiin ka ring che a ni. Zodina thil sawi chu a nî min hrilh a ni a, mi dang bulah phei chuan sawi chhuak miah lo tùrin ka ti nghe nghe a ni. Eng vànga sawi chhuak nge a niha i rin? A sawi lai chuan a nî chuan a thinrim hmel viau niin a sawi a, Matei phei chuan a hlau deuh hial a ni àwm e," a tih chuan thâwk ka la hak phawt a, a thinrim chhan ka hre reng bawk si a; mahse, sawi chhuah dâwn chuan a thui dâwn lutuk, chuvàng chuan," A, ka hre thiam bîk chiah lo, eng emaw thilah thinrimna a neih vàng pawh a ni mahna, a chhan amahin a sawi chhuah si loh chuan hriat a har maithei a ni," ka ti ta ringawt a.

Kan titi tui bawk si a, ka haw mai a phal bawk si lo nèn, chaw ei ve tùr chuan thu kan titlu ta ringawt a. Zodina pawh a rawn haw a, a pu bula min rawn hmuh chuan min nuih sak nain a reh leh nghâl riai riai a, a nui hmêl chu inthlahrung hmêlin a rawn thlâk a nih chu. A mitmengah pawh chuan hlimna aiin inthlahrunna ka hmu, heti a nih hrim phei chuan engtin nge Jakob-a thil sawi kha ka hrilh ngam tehlul ang? A puin a pa nèn an inkâr a zawh pawhin a hrilh duh lo a nia, thil sawi nuam, hlimawm lam lah a ni dáwn hauh si lo.

Zanriah tui tak kan kîl ho a, Pu Zuala pawhin kîl ve mah se a ei tam lêm lo, a titi luam thung. Zodina nî pawh chu pângngai takin a awm tho a, a fanu erawh chu a țawng hauh lo thung, a kham thuai nghe nghe a, a pu chuan han ko zui deuh mah se a puar thuin a chhâng. An boruak awm dàn chu a nuam fahran lo, engtiang chiahin nge Jakob-a khân a lo sawi chhuah anga, a lo chét chhuah ang aw ka ti hial a ni, Zodina nî fanu hian a hlau tawh ngawtin ka ring, a awm dàn ațangin a hriat theih tlat.

Ka haw tùr chu min thlah haw leh ngei a, ka laka a inthlahrung deuh ringawt mai chuan ka rilru a tina ru viau a, amah mi inthlahrung mi a lo ni tawh nèn, kum tam tak a lo hriat chhuah duh tawh loh leh a ngaihtuah duh loh a pa chanchin a puin a zâwt si a, bâkah, a thil lo tih tawhte a ngaihtuah chhuak lo thei lo ang a, chu chuan a rilru chu a pawt hniam lo thei lo ang. 

"Vawiin chu i hah àwm si a, lêng tùr pawhin ka sâwm ngam lo chein ka ring," ka han ti tê tê a, ani erawh chuan," Hah hran lo ve," a lo ti mai a. Kei chuan," Hah deuh deuhin hna hi thawh loh tùr a nia, thawh dàn tâwk hi thiam a țha. Chuan, i lo léng ang tiraw?" ka han ti zat a, min chhâng lawk lovin a ngawi deuh phawt a, rei lêm lo mah se hrehawm ka lo ti hman viau a ni; mahse," Lêng ang, i phal chuan," a rawn tih tâkah chuan a kut chu vawnsak pahin," A țhat hlauh chu, ka ngai tawh che alawm. Chuan, rawn lêng lo ila chuan rawn lèn i tum miah lo ang, tiraw?" tiin ka han zâwt zui a, zàn a nih avàngin a kut vuan hmasatu nih chu ka zak hran lo.

"Nia, tum lo maithei a ni."

Ka lo chek hlak a," Min ngaih lohzia kha, kei chuan ka ngai che a, i pu pawh ka rawn chhuanlam duh a nia, i rawn lèn loh tal pawhin  i nî phone talin min rawn biak ve tùr a nia," ka ti leh a, țawng a tum ûk ûk lai chuan lo țawng khalh lehin," Mahse, zanin chu i lo lêng dâwn bawk a, ka ngaidam ang che, ni dangah chuan phone-ah tal min rawn biak ka phût tawh ang," ka ti leh a. Ani pawh chuan," Aw le, ka rawn bia ang che," a lo ti ve a.

Ka inah chuan inthlahrung angreng tak hian ka bulah pawh țhu lo chuan ka epah a țhu a, thingpui lumsak ka tum pawh chuan a duh lo va," Zanin chu in lo mai ang, thil sawipui tùr che ka nei," a ti tlat a, a awm dàn chuan min tingaihțha lo deuh tlat a, en reng chung hian," Eng nge ni ta?" ka lo ti vat a.

"Tluangte, ka chanchin kha ka hrilh tawh che tiraw?" a ti phawt a," Aw, hrilh nual tawh e," ka lo ti vat a, ani chuan," Kan chhûngkaw chanchin pawh ka hrilh tawh bawk che. Nang chu chhûngkaw pângngai tak leh fel tak nei i ni a, nu leh pa enkawlna hnuaia țha taka sei lian i ni bawk. Kei chu i hriat angin nu thihsan ka ni a, ka pate bulah pawh awm lovin ka pi leh pu hnuaiah ka sei lian a, mi fel ka ni lo, nu leh pa hnuaia sei liante  phâk lohna tam tak ka nei tih pawh ka inhria. Chutiang mi ni chung si chuan engtin nge ka lo beisei ngam zâwk che le? Eng rilru nge ka lo put aw..??" a ti ta daih a!

"Zodin..?!"

Za lo tih hriat tak hian a nui sak a," Ka lo huaisen deuh mah mah a ni tiraw? Ka nihna hre lo lêkin ka lo beisei che a nia, enkawlna țha tak hnuaia sei lian tih takah i lo fel êm a, ka mualpho lo ni maiin ka hria. Ka ngaihtuah lét ngai tawh loh nunhlui, ka nihna tak tak, ka kalsan tawh emaw ka tih kha, tukin ațang khân ka ngaihtuah lêt a, a hma pawhin ka hrilh tawh che kha; mahse, hriat nawn ka duh loh thilte chu ka ngaihtuah nawn lo thei lo, nunhlui chu liam tawh mah se rawn sawhkhãwk châng a awm țhìn. I tán ka tlin lohzia, ka lo âtzia leh i tân zahna mai thlentu tùr ka nihzia ka hre chhuak a, ka nihna dik tak hre chhuak tawh lo leh ngaihtuah chhuak lo lêkin i felna chuan beiseina min siamsak a ni tih ka ngaihtuah hian ka zak ngawih ngawih a ni," a ti leh sap sap a.

Rilru mangang ru zet hian," Chutiang sawi suh," ka lo ti ringawt a, a hmel dul deuh raih leh hlim lo hmel chuan min tihrehawm a ni.

"I mualphona leh i zahna tùr ka thlen hma che hian ințhen mai ang, keimah vàngin hrehawmna leh hmingchhiatna tam tak i tuar tawh a, kha vàng pawh khân nang hi beisei ngam miah lo tùr che hi ka ni a; mahse, tih-âtin ka awm tlat a nih ka ring, min ngaidam hrâm ang che, kei ang mipa, nu leh pate pawhin an enkawl loh, nunhlui chhui tlâk nei lo hi chu inkungkaihna neihpui miah suh," a ti leh ta a.

*HUN KHIRHKHÀN LO THLENG ȚHÌN HIAN TIH CHAK LOH CHE A TUM PAWHIN NANG CHUAN CHAK LOH PHAH NÂN HMANG LOVIN I NUN KAWNG SIAL NÂN LO HMANG THEUH ZÂWK RAWH KHAI*