☆THE SWEETEST HANDCUFFS☆ - BONUS By Dingdi Pachuau

 

☆THE SWEETEST HANDCUFFS☆ - BONUS By Dingdi Pachuau

"Biak che ka duh êm êm laiin keima lam ka inen lêt a, hreh tak têin ka hreh leh a, chu pawh keimah vàng bawk. Hmuh hreh tih pawh kha, ka hmu châk êm êm reng zâwk che a; mahse, ka thu sawi vàng bawk khân ka hmu hreh leh tho bawk che a ni, hmu châk si, hmuh che hreh bawk siin ka awm tihna a nih chu. Ka chungah i thinrim tlat nia ka hriat vàngin thil awmzia hrilh fiah ngei che ka bâ niin ka inhria a, ka lo duh ve ringawt che leh ka dinhmun ngaihtuah lêk lova ka duh thu ka hrilh ve ringawt che kha ka tihpalh liau liau a ni, ka hrilh lai che khân ka rilru a fîm chiah lo a nih ka ring," a ti leh dap dap a, a thil sawi chu ka ngaithla ngun viau a, a inhmuh têtzia leh a inthlahrunzia, a natna vei rûk avànga a inkiltawih theihzia a hriat theih kuarin ka hria. Ni e, mi ti phawr phawr leh chapo chu a ni lo chiang alawm, mi, a thil tih sual lai phâwk ang maiin a ți deuh dai reng a, mi zîngah a inthlahrung a, mi pawi sawi hlau tak a ni bawkin ka hria.

Ka thil ngaihtuah avàng chuan ka ngawi rei deuh a ti a niang, a ding ta uaih a," Ka sawi duh ka sawi zo tawh bawk a, ka haw tawh ang e. Ka thil sawi avàng khân min ngaidamin ka chungah thinrim tawh lo hrâm la chu ka duh tak zet a ni," a ti leh sap a.

Haw tumin a pên țan chiah tihah chuan," I duh i sawi zo a, ka la sawi ve hleinem, ngaithla ve phawt la?" ka lo ti ta thung a, a ding dat a, min rawn en chuan kei chuan a țhutna chu ka lo kawh hmuh leh a, thu âwih tak hian a țhu ve leh mai bawk a.

"I thil min hrilh vàng khân i inchhîr tih i sawi a, ka hre dik tiraw?" tia ka zawh chuan a lo bu nghat a," Chuti, engati nge i inchhìr lehna tùrin ngaihtuah chiang lova thil i sawi? Khatiang thu kha sawi mai mai chi pawh a ni hleinem," ka tih zawm leh a, ani chuan," Ka sawi vàng khân i thinrim si a, chuvàngin alawm pawi tia ka inchhìr ni, i huat thu sawi ka duh lo va," a lo ti ve thung a.

"I thil min hrilh vàng khân ka thinrim maw!!?"

"Aw... i thinrim pawh hi ka hre thiam che a ni. Mahni dinhmun hre lo lêk leh ngaihtuah chiang hauh lova sawi tùr kha chu ka ni lo asin le, ka rilru a buai vàng kha a ni ngei ang," a ti leh a, ka en deuh reng a, ani erawh chu khap deuh fak fak a, en pawh min en țha ngam chiah lo.

"Engin nge i rilru chu tibuai a?"  Kei kher kher pawh hi aw... Hetiang zaeh leh kher kher, ka va sual tak! 

A chil a lem deuh khalh phawt a," Caleb-a khãn a beisei che tih ka hria a, kha khân min tibuai vek a ni. Kha pa rawn lan ațang kha chuan ka ngaihtuahnaah eng dang mah a awm thei lo va, ka dinhmun dik tak ka hrechang tawh lo va, ka hriat chhun chu ka tlai chhiat tak tak hma ngeia ka duh thu hrilh che kha a ni mai," a ti ta a, a chàwl dat a, sawi zawm lehin," Mahse, boruak ka tichhe ta vek zâwk a nih hi, thil ka ngaihtuah chian loh vàng a ni, min ngaidam hrâm mai teh, in lo induh reng tawh tih ka hriat loh vàng a ni," a ti leh a.

Caleb-a nèn kan induhah a lo ngai a nih chiah hi. Thil lah hi a hre tak si lo va, ka thinrim chhan leh ka thinrim chhan nia a sawi pawh a inang tawp si lo, min duh thu a sawi tê tê hnua min be țha duh lo leh min hmu duh lova min hêl tlat mai kha ka thinrim chhan chu a ni a, ani lahin min duh thu min hrilh ka huat vànga a chunga thinrimah min ngai thung a. 

"I thil sawi chu i inchhîr tak tak a maw?" ka ti țha leh a, inchhîr tùrin ka duh lo a ni. A thil sawiah khân chiang se, a thinlung tak tak min hrilh se, inchhîr lovin a tàwp thlengin țang ngam se ka duh a ni.

"Keima lamah chuan ka sawi chhuak kha ka inchhîr lo, ka hrilh a, ka hrilh che a ni mai; mahse, i tân thinrimna mai niin min huatna ka siamsak che a ni si a, kha tak kha hrehawm ka tiha ka inchhìrna chu a ni ta a ni," a lo ti duah a, kei chuan," Ka thinrimna chhan kha chu ka hrilh chiang viau tawh che emaw ka ti a," ka ti ta thung a, ani lah chuan," A inkaida chho vek tawh, a bulpui ber chu ka thil sawi chhuah vàng kha a ni tlat tawh si a ni," a lo ti leh a.

"I ngaih dàn dàn le; mahse, i thil sawi vàng kha a ni lo, min duh thu min hrilh hnua min be duh lo leh min hmuh thih hreh tluka i hreh vàng kha  a ni zâwk. Chuan, min duh thu kha chu chiang taka i ngaihtuah hnuah, i inchhìr lehna tùr ni lovin, i rilru fìm lai takin min hrilh dâwn nia," ka ti ve ta kalh kalh a, chhàn lêt chu ka zak lêm lo. Mak pawh ka inti ve deuh  tho, amah zâwkin min en ţhat ngam loh vàng hi a niang ka ti mai, ka en reng ngam a, a bulah hi chuan ka sawi duh apiang sawi ngamin han zah țît țêt ka nei hran chuang lo.

Mut hmunah chuan a thil sawi kha ka ngaihtuah lêt a, a sawi dàn kha ka hre thiam reng, hriat thiam loh tùr a awm lo.  Caleb-a nèn kan inkawp ta emaw a tih vàngin a thil min hrilh kha inchhîrin theihnghilh tùrin min ti a, chu achhapah, a thil min hrilh vàng khân thinrimah min la ngai zui a, min hmuh hreh phah a ni. Thil hriat chian loh pawi theihzia leh hrehawmzia hi chu... Kei lah, a rilru hre lo lêkin a inthlahrunna, ka laka a inkiltawihna chu thinrim nân hmanruaah ka hmang zui a...

Message lo thlen avànga ka phone nghawr deuh dat vàng chuan ka muhil tui dâwn țan tihah chuan ka harh a, sana en vatin dãr 12 chiah chiah a lo ni! Phak chual chuan ka lukham hnuaia phone chu la chhuakin message pawh en chuang lo chuan ka mute a, ka lukham hnuaiah leh bawk chuan ka thawlh lût leh nghâl a.

A tûkah Vâlpuia ka hmu a, be luamin a hna thawh loh chhante chu ka han zâwt a, ani chuan," Nia, ka inti-awm ãwl ve deuh a nih hi, ka birthday a hnai tawh si a," nui sen sen chung hian a ti a," Ni dâwn tak e!  Lo thleng thuai thuai teh se, kan làwm hup hup ang maw le, a nuam ngawt ang! Gift țha tâwk tak ka pe ngei ngei ang che," ka ti sauh sauh a, ani pawh chuan," Ni e, kan theih phawt chuan kan làwm ngei ang," a lo ti ve a.

Tukin zíng khân nizàn lam leh tukin lama message ka check-na lamah Zodina message ka hmu a, nizàn dâr 12- a min rawn message-tu kha a ni. A phone kha a hmu leh ta a ni ngei ang, a number ngai kha a ni tlat. A message-ah lah chuan

*Chiang taka ka ngaihtuah hnuah, ka inchhìr lehna tùr ni lovin, ka rilru fìm lai tak hian Ka la duh reng che tih thu ka rawn sawi e, mut tui mang țha*   a rawn ti a ni. Chuvàng chuan, vawiin lamah chuan a hmêl hmuh ka inring ve deuh a, hmuh ka chãk viau bawk; mahse, Vâlpuia pawh hi a pawimawh tho a, hmuh ka duh tho. Tûn țum chu birthday lam bâk ka sawipui hman lo, Zodina chungchâng leh Jakob-a chungchâng zawh han duh viau mah ila, a hmanhmawhthlâk rih lo. Hlim takin siam ila, a birthday-ah tak amah ngei hi rawn inlan thei bawk se...

Rin loh deuhin Thawhlehni zànah Zodina chu a rawn lang ve leh hlawl mai a, a rawn luh tirh chuan Jakob-a emaw ka lo la ti zui. A chhan chu a inthuamna chu lang thei lamah chuan 70% vêl chu a vâr a ni tlat a, Jakob-a'n thuamhnaw vár a ngainatzia ka hre tawh si a, ka han hai deuh lek lek pawh hi a àwm ve viau.

"Lo lêng rawh, zanin teh hlawl chu, i rawn lan teh hlawl ni!" Hetia ka tih chhan pawh hi Pathianniah Zodina, Thawhțanniah Vâlpuia niin zaninah Jakob-a a rawn ni leh a, a inthlâk chak lutuk chu mak ka ti a ni,  Vâlpuia ațang khãn Zodin-a ni leh phawt tùrah ka lo ngai deuh ringawt a; mahse, Zodina ni leh tawh kher lovin a chak zâwk zâwk kha an rawn lang a ni ngei ang.

"Zàn hmasaah pawh ka rawn lan tawh kha," a tih chuan ka en chiang vat a; mahse, Jakob-a tho a ni bawk si, a inthuamna leh chezia pawh hi Jakob-a a ni ka ti lo thei lo. 

"Min test kher lo teh!" ka ti ve thung a, ani lah chuan," Tu nge ka nih?" a lo ti phawt a, chutah," Min hai lo hrâm teh, mi danga min ngaih ka duh miah lo a nia," a lo ti leh a.

Jakob-a chu a ni lo, Zodina a ni. "Mahse... I kawr hâk hi... Jakob-a hâk duh chi a nih hi, Jakob-a i ni tiraw?" rilru buai deuh taka ka tih chuan," Ka kawr hãk chu eng maw?! Jakob-a hâk duh chi maw!! Amah chu ka ni lo, Zodina ka ni," a lo ti ve thung a, hmêl leh pian thuhmun, mi pakhat taksa hmang an ni si a, ka tân pawh hriat hran hi a harsa ve țhìn viau a ni.

"Hetiang hian i inthuam ve ngai si lo va."

Ani lah chuan," Ka thuamhnaw vek alawm, ka duh zâwng pawh a inthlâk ve thei a, ka inthuam duh zâwng pawh a pângngai reng thei bîk nâng," a lo ti leh thung a, chutah," Ka message kha i hmu reng si a, engati nge min chhàn loh?" a rawn tih zawm leh zat a.

"Chhàn tùr a awm loh kha."

A thaw deuh hak a," Kutzungpui tala min chhàn ka lo ring deuh a," zàwi deuh sapa a tih tâkah chuan ka nuih a tiza khawp mai a; mahse, ka nuih duh lo, a zah ka hlau a ni. 

"Rilru fîm taka i sawi chauh ka âwih ang."

Thingpui ka pêk lai chuan," Ka rilru a fîm, hei aia a fìm leh zual theih dàn ka hre tawh lo. Ka dinhmun zawng zawng ka hre vek; mahse, chûng zawng zawng pawh chu dâwn zo lovin ka duh ém ém che a ni. Ka sawi nawn leh ang, ka chiang a, ka rilru a fîm a, ka sawi chhuak hi ka inchhîr leh tawh hauh lo ang, Ka duh che," a ti leh ta mawlh mawlh a.

Kei pawh hian ka haw hauh lo. Ka thinrim chhan lah kha thil ho lutuk, ka ngaih dàn anga ka kal thui vàng a ni a, min duhtu chuan min ûm zui zêl ka rin vàng a ni, amah ka duh lèt ve ngei theih nãn; mahse, ani kha chuan min inthiar fihlìmsan daih thung a, ka lo ngaihtuah dàn nèn a lo inpèrsan êm a lo ni.

"Ka lãwm e, min duh thu min hrilh vàngin."

A vawi khat nân, min duh thu min hrilh hnuah ka kut a rawn vuan ve ta. A hma pawhin kei pawhin ka vawnsakin ka chelhsak tawh ang; mahse, min duh thu a sawi hma daihin a ni a, tunah chuan a mi deh dàn a dang ta deuh zakin ka hria.

"I thin a rim tawh lo ang tiraw?"

Kei chuan," Min be duh lova min hêl leh tlat a nih loh chuan," ka lo ti a, ani chuan rang zet hian," Kha thil kha...Um, a thleng tawh hauh lo ang," a ti ta charh a, ka kut chu nghet zetin a vuan pah bawk a.

*KAN RILRUA AWM ZAWNG ZAWNG LEH KAN NGAIH DÀN HRANG HRANGTE HI MI DANG HRIATA SAWI CHHUAH VEK KHER HI A HIM LO FO, THAT LOHNA TAM TAK A AWM THEI ȚHÌN*