☆THE SWWETEST HANDCUFFS☆ - 33 By Dingdi Pachuau

 ☆THE SWEETEST HANDCUFFS☆ - 33 By Dingdi Pachuau

Motor ka chuang khât deuh bawk nèn, ka chuang fuh lo khawp mai. Ka rùi a, ka uak ka uak nain ka luak hlei thei lo va, ka pum chhûng lam chu a let but butin ka hria a, âwmah min rawn hnawh leh up upin ka chil a rawn rial a, ka bula țhute lakah ka inthlahrung khawp mai; mahse, chuti chung chung pawh chuan ka luak thei chuang lo, in ka thlen thlengin.

In ka thleng chu min lo làwm khawp mai a, chutih rualin motor ka rùi tih ka pain a hmuh chuan," Kha maw, ka lo rin dàn chiah a ni, thingtlâng bakberhah i awm a, chaw kawpuar ei lovin i rawn tlãn bawk si a, a țha lo êm mai," a lo ti vat a, ka nu chuan ka ei duh tùr àwm leh ka ruih reh theihna tùr àwm chu min rawn ngaihtuah sak vat nain ka ei peih lo va, țhutthlèngah chuan ka mu deuh ngût mai a ni; mahse, chutia awm reng chu a fuh loh avàngin intleuh lawk tùŕin ka tho chhuak leh ta zâwk a, ka zia hawk phah loh pawhin ka fai zual phah deuh ngei ang chu.

Zanriah kîl lai chuan ka pa chuan," I patea scooty ang saw em ni kan tih ang? Mahse, ka ngaina tehchiam lo va, a hnung saw varak mawng a ang leih luih ka ti deuh a," a han ti a, ka lo nui hak a, ka chaw ei pawh ka hák țhelh a ni. Ka patea scooty chu ka han mitthlà chhin a, a nih duh hmel ta viau chuan ka hria a; mahse, tûnlaia an khalh țhin hi chu hetiang deuh vek hi ni vek tawh maiin ka hria. Hmãn deuh tawh khân Nutei khân Lets kha a lei a, mawi kha ka'n ti khawp a, a tâwk reuh ka ti bawk si a; mahse, tunah hi chuan a chhuak tawh lo niin ka hria, ka hriat sual loh chuan. Han duh deuh bîk leh lei atâna han awh ngawih ngawih ka nei hran tawh lo, a eng pawh lei ila, a tlàn theiha ka chuan theih chuan a țha vek a ni mai. Chaw kan ei chhûng zawng chuan scooty chanchin kan ngaithla a ni ber, ka pa chuan țha deuh nia a hriat ang ang chu a sawi barh barh a, ka nu a lo inrawlh zauh zauh bawk a, kei erawh chu ka țawng ve mang lo.

Mutnaah erawh Zodina leh Caleb-a ka ngaihtuah chhuak ve ta thung a, Zodina khân vawiin khân ka kal hma kha chu min awmpui char char a, kan tlàn chhuah thlengin min thlah a nih kha, tih tùr neia Lunglei kal a ni ngei dâwn si a, inlei zo hman tak ang maw? Caleb-a erawh kha chu Lungleia awm a ni a, hmanhmawh chiam ngai lovin a duh hun hunah a thil chah chu a lam thei ngei ang, Zodina hun ka paihsak ţeuh avàng chuan ka inngaihtuah inthlahrung thar leh deuh thut a, làwmthu hrilh pahin ka va be dâwn em ni ang? Làwmthu lah kha ka hrilh miah si lo. Ani lah kha eng vak sawi lêm lo khân ka bulah khân a awm ve reng a...

Caleb-a message a rawn thleng a, ka mu hma ve deuh bawk a, ka mut a la ring lo a ni ang, ka thlen tluan a rin thu rawn sawiin biak ka theih leh theih loh min rawn zâwt a, mut mai ka duh zâwk lai chuan 'ka chanchin min rawn ngaihven ve a ni si a 'tiin ka be ta zâwk a, rei tak erawh kan inbe lo, eng emaw mai mai a rawn sawi.

Zodina chuan min rawn be dâwn lo a nih ka ring. Min be dâwn lo rau rau a nih pawhin, message takngial pawhin ka chanchin min rawn zawh ve àwm tak hi a nia, ani hi a lo inthlahrung pek em ni ang, a va ho thei tak! Keimah zâwk hian ka va be mai dâwn em ni ang? Làwmthu ka sawi pah ang a...  A number chu ka han hmet chhuak a; mahse, thil ka ngaihtuah chhuak leh thut, Jakob-a'n phone kha a dah bo daih a nih tak kha, chuti a nih chuan min rawn text kher lo ang, a nî phone a rawn hmansak kher a rinawm loh bawk si.

*******

Scooty chu kan lei ta ngei a, ka patea'n rem fel takin min ruatsak a,  amahin engkim min tihsak vek bawk. Pathianni chawhnu lamah kan in bul zâwl zau laiah khalh min zirtîr a, balance ka thiam sa nèn, a harsa lêm lo. Bâkah, scooty kher kher hi chu khalh ka zuam ve êm a, hlauhna leh han tìm chhinna pawh ka nei lo hrim hrim bawk, chuvàng pawh chu a ni ang, ka thiam thuai a, nervous ka neih lêm lohna chuan min tihthiam chak phah niin ka hria.

Ka haw phei lam chuan ka patea vêk chuan min thlah phei a, kei pawhin thui ve deuh tak chu ka khalh phei ve nghe nghe a, khalh thiam ka phurh vàng nge, ka confi zual a, motor kan tawh châng pawhin ka zãm lo. Patea pawh chuan min fak pahin min han zilh bawk a," I huai êm mai a, i khalh tam phawt chuan thiam tak i ni thuai ang," a hmaa a tih dàn ang chiah chuan a ti leh a.

Kan bâwr ve reuh hle a, ina ka awm loh avàngin ka nute'n oven an hmang ngai si lo va, Vâlpuia birthday cake ursak nân țha dâwn hian ka hre tlat a, ka keng phei ta a, chuvànga bâwr zual ta chu kan ni. Lungleiah mamawh tùr zawng zawng lei sa vek bawk ila, kan phurh zawh theih loh pawhin Remsiama chah ta mai ila...  A țha dâwn lutuk! Bâkah, chhùn vëla ei tùr cake ur zeuh zeuh nân a țangkâi dâwn bawk a.

Ka mamawh tùr Lungleia ka han inlei khâwl chu scooty ringawt chuan kan keng zo thei lo nasa, parcel lian vak lo pahnih lai a ni si a, Remsiama ka pun ngei chu a ngai dâwn ta a ni; mahse, a pawi lo, a thlàwnin a ni dâwn chuang lo  va, inthlahrun viauna chhan tùr a awm hleinem.

Kan khaw kawnga scooty a khalh lai chuan," Fùrah chuan a diak kâwi ve țhìn viau dâwn a ni maw? A lei a țhat hmèl êm mai," a han ti a, kei chuan," Nia, duhthusàmin a diak ve ţhìn, a hlauhawm viau bawk. Kawng erawh chhuk chho a awm lo va, zâwl a nih vàng hian accident tak hi chu a hlauhawm loh deuh a," ka lo ti duah a. Ani chuan," He lai kawng hi i tlàn thiam hunah chuan khalh thiam tak i ni mai ang, tunah pawh i thiam viau tawh a, han tlãn tam deuh la, i confi zual leh sauh mai ang, hmeichhia hi chu in ngaihtuahawm lêm loh hian ka hre țhìn, in tlãn chak ngai hran lo va, in khalh dìm thiam viau bawk," a ti ve leh a.

Ka patea chu haw leh nghâl theih ni hek lo le, a riak ang a, naktûk lamah motor a awm remchàn chuan haw leh nghâl mai chu a tum dàn a ni bawk; mahse, naktûkah khian Remsiama hi a tlãn kher ang em? A tlàn loh hlauh chuan hàwnna a vâng khawp ang, scooty hi a khalh haw leh te a nih ngawt loh chuan.

"I in chu a nawm ve viau hi, ka hmuh tum aiin ka hmu lian zui a, i vànnei viau niin ka hria, thingtlângah hi chuan hei aia țha tùr hi chu a beiseiawm loh êm asin," tiin a hawi kual vat vat reng a,  kei chuan," Ni e, ka luah tâwk viau bawk si a, vànneih thu-ah phei chuan vànnei tak ka ni, thingtlâng ni mah se Lunglei kan hnaih tho sia, a awmna hmun lah hi a nuam reuh êm êm bawk si a, a lum ve deuh țhìn e tih lohah chuan," ka lo ti ve a, ani erawh chuan," Kan khua pawh a lum tho alawm, nipuiah hi chuan lum lo lai tak tak pawh a awm tawh loh hi maw," a lo ti leh mai a, pâwnah te chuan chhuakin a han fang kual vêl a.  Zàn lamah inlêng kan neih ka rin lêm loh laiin Kimi leh a nu leh pate an rawn lang a, anni hi zawng, ka chhûngte tak tak ni àwm an ni, an beng hi  a vâr tak zet, an fel pawh ka ti, rei tak erawh an lêng lo va, tlangvâl inlêng lam erawh an reh hmak thung.

A tûkah Remsiama chu a tlãn ta hlauh a, ka patea pawh harsatna awm lovin a haw ve thei ta nghâl a. Remsiama chu kal lo ta se chuan a  tûkleh lamah muang mar deuh hlekin scooty-in Puia'n a thlah mai ang chu tiin ruahmanna kan lo siam ru ve deuh a nia; mahse, tunah chuan ngaihtuah buai a ngai ta lo.

Ka hman chângin Scooty chu ka khalh chhuak ve țhìn a, min en duh thei viauin ka hria. A àwm ve tho, scooty nei hi an tam lêm lo va, a nei chhunate zîngah pawh hmeichhe khalh țhìn chu pahnih khat bâk an awm lo, mipain an khalh zãwk zêl a, min en duh pawh hi hriat thiamna chin ka nei viau e.

Amos-a leh Remsiama'n min fiam nasa a, Amos-a phei chuan," A hma daih khân neiin rawn keng phei ni la, i buaina tam tak hi i pumpelh mai tùr, Arini hmél dur leh hmai sen pawh i tawng lo tùr hi a nia," a ti leh pek a, han chhàn lét vak chi ni hek lo le, za lo deuhin ka nui ka nui ringawt mai a ni. Min fiam na țhìn a, amah pawh hian fiam lêt a dãwl a, thinrimin kan inchhuah ngai lo. Min nèl vezia leh min ngainat der vezia ka hre chiang a, kei pawhin ka ngaina, inlêng ka neih regular deuhte an ni bawk nèn, kan inngam bawrh bawrh viau a ni.

Zodina aiin Jakob-a ka hmu hmasa zâwk! Zànah a rawn lêng a, veranda-a scooty ka hùn chu a hmu nghâl lo thei lo bawk a, rawn luh pah hian," Scooty thar i nei a, eng tikah nge Lungleiah kan kal ang? I khalh thiam sa a ni maw?" a rawn ti nghâl a, kei chuan," Thiam sa ang a ni mai ang chu, a har hran lo va," nui chung hian ka lo ti a, chair-a a țhut hnu chuan," A thar lawm nân, eng tikah nge kan zin ang? Zin kha chu ngei ngei tùr a ni a, i khalh chhuak hmuh ve hrim hrim ka duh avàngin a hnaivai deuh ber Lungleiah bazâr tùrin hun remchâng hmasa berah kal ila?" a ti leh duah a.

He pa hi thil a hre ve hrim hrim ka ti, a tuina lam pawh a ni mahna, scooty chanchin leh Mizorama a rawn chhuah kumte, a hming hrang hrang, an siam chhuah kum leh an company hming nèn lam chuan a sawi thei vek mai a, dâwt a sawi êm chu ka ring meuh si lo, mak ti rilru takin ka en ka en ringawt mai a ni.

A haw dâwnah erawh," In khuaah i haw dâwn tih min hrilh loh man," tiin ka biangah chuan a fâwp zauh phawt a, ka lo îp deuh chãwih mai! La duhtâwk mai lo chuan," Scooty thar neih manah ka lawmpuina che tihlan nân," tiin a rawn kûn hniam leh a, lo thlêk sawn chu rilruin duh viau mah se ka thle sawn ngam lo, min rinhlelh mai ka hlau, bãkah, hei hi a tàwpna pawh a ni tawh maithei si a tiin ka inthiam ru deuh a, ka hmuiah chuan a rawn fâwp ta vang vang a.

Zodina awmzia hi ka hre thiam lo, ka la hmu miah lo. Ka haw nî ațanga chhiarin kâr hnihna a tling țêp tawh a, ka la hmu miah lo! Jakob-a erawh vawi hnih ka hmu leh tawh a nia! Ka hre thiam lo, min hmuh a hreh nge a inthlahrung ni ang, nge min hmuh a hreh? Min hmuh a hrehna chhan tùrin kei hian eng thil nge a chungah tih ka neih? Ka han ngaihtuah lêt a, kan khuaa ka phei dâwn nîa Caleb-a a hmuh ve vàng kha a ni thei ang em? Min thlah ve pawh khân ngawi reng khân min en a, min bye bye ve miah lo a nih kha.

Pathianni inkhâwm bànah ka hmu zuai a, min rawn hmu ve teuh nâng, min rawn hmu tùr pawhin a rawn hawi chhin lo hrim hrim! Patling pakhat nèn an inbia a, a biak chu Pu Zâra a ni nghe nghein ka hria, hmân deuha damlo ka tlawh kha. En zui reng ka tum lo viau nain ka en zui ta reng a! Kimi'n min rawn nghawk deuh zauh paha," En nghâl lo la, Arini sâwn bialpa thar a nei a ni ngei ang," a rawn tih sap chuan ka hawi sawn ve chiah, 'En nghâl lo la' a ti tak nain ka hawi kual nghâl ruai tho a, ka va hmuh lah chuan Arini chuan min rawn en ve chiah lai a lo ni bawk a; mahse, rei kan inen lo, a bula ding tlangvâl ding lam chu a melh chho ta daih a, eng emaw sawi pah hian a nui sak zui a.

Ka thaw huai mai.

Chutah, hawi kualin Zodina lam chu ka han en leh a; mahse, ka hmu tawh miah lo. A haw hman a ni ngei ang chu, he pa hi, a thil min hrilh kha dâwt mai a ni ang em? Min hrilhna lah kha a la rei loh tehlul nèn, heti hian awm lo ang maiin min en leh tawh si a, ka hre thiam hlawl lo. Nge ni, Caleb-a kha ka bialpaah ngaiin a beidawng leh ta zâwk?

Mak hi ka inti ve ngawih ngawih. Ngaihtuah loh ka tum viau pawhin engtizia nge maw ni teh rêng ni, Zodina chu ka ngaihtuahnaah a rawn lût ngut ngut zêl mai a, chu chu duh lovin thil dang ka han ngaihtuah a; mahse, a ngai tê bawkin a tàwp lamah chuan amah bawk chu ka ngaihtuah leh țhin, min duh tih a sawi hnu aţang khân hetiang hi ka ni tlat tawh. Jakob-a nèn kan inkawp a, Caleb-a a lo lang a, Zodina'n min duh thu a sawi bawk. Mi pahnih hi chuan min kiansan zai rêl lovin tûn thlengin min la biain pakhat lahin min intineitu viau bawk. Min hmuh loh tuma min hêl ngar ngartu, min duh tih min hrilh tê tê hnua hmuh pawh min hmu zui duh lotu chuan tunah hian ka rilru a luahin ka ngaihtuah zui ber chu a nih tâk hi. Ka duh ve chiah em tih chu la hre lo mah ila ka haw lo tih erawh chu ka hre chiang bàng, bâkah, hmu hreh ru deuh chung si hian hmuh tumin ka mit ka lén ka lèn fo bawk.

Tlai khat chu dàwra ka awm laiin a rawn lût ve a, ka lo awm ve khar si a, a rawn lût laklawh ve tawh bawk si, kan mit a intawng sak a, 'mit la sawn hmasaah ka țang lo ang' tih rilru pu chung hian ka en reng a, ani erawh chuan rei min en lovin, nui hmél pu lek lek chung hian a hawi sawn ta daih a, hnehna ka chang ta chu a nia; mahse, ka hlim hran chuang lo.

'Min biak loh chuan ka be bîk lo ang' ka ti rilru leh a, a mamawh chu a la khawm a, min ngaihsak lêm loh avàng chuan kei pawhin ka thil lei man chu pawisa pein ka chhuak zui ta daih a; mahse, a rawn chhuak ve zui nghâl a ni ngei ang, ka hnunga pên thãwm ka hriat avàng chuan ka hawi lêt a, amah chu a lo ni reng a! Ka hawi lêt rang kher mai, tûn țum chu hnehna ka chantîr mai ang, ka thin lah chu a phu rang deuh ang dawt dawtin ka hre zui!

"Scooty khalh chu i thiam viau tawh em?"

Min rawn be hmasa ta, hnehna chu ka tâ a ni ta e. Ding deuh dat chung hian," Thiam viau tawh e," ka han ti phawt a, chutah," I vâng hle mai, ka hmu ngai si lo che a, engtin nge scooty ka khalh tihte chu i lo hriat ve theih zâwk a?" ka ti leh a, min rawn ûm phàin, ka ruala kal pah chuan," Ka tamna hmunah hi chuan ka vâng lêm lo asin, nang pawh i vâng ve tho lo maw?" a ti ve thung a, min chhàn dàn ang chiah chuan," Ka tamna hmunah chuan ka vâng bîk lo," ka lo ti ve leh a, zàwi deuh tak hian a nui hak a, a nui hmêl chu hmuh châk ru viau mah ila ka en ngam miah lo.

"I inhmeh ngawt ang!" 

A sawi awmzia ka hriat loh avàng chuan ka en ta zauh a, a nui hmêl chu ka hmu ta; mahse, ka hawi sawn leh nghâl vat a," A awmzia ka hre lo," ka han ti zui a, ani chuan," Scooty khalh chu maw le, i inhmeh dâwn tih ka hre sa mai, ka mitthlà chhin che a," a lo ti a.

"I pu a dam țha maw?" ka tih leh chuan," Aw, țha... a ni mai," ban angreng tak chuan a lo ti a," Chu, a lo chiangkuang lo leh deuh tihna em ni? Engtin nge a awm a? Engati nge  min rawn hrilh loh?" ka ti zung zung a; mahse, ka thil zawh chu ka han ngaihtuah chiang leh a, ka inchhîr leh deuh zat mai, min rawn hrilh duh lo a ni mai a, engah nge thiam loh ka han chantîr ngawt ni? Inchhìr lah chu awmzia a awm tam lo nasa, ka sawi zo vek tawh si a.

"A, a awm dàn chu i hriat kha, a upa ve tawh a," a lo ti mai a, chutah," I hman hunah chuan rawn tlawh thei la chu ka ti khawp mai, khawngaihin. A ngai țhìn che a, a sawi fo țhìn bawk che a ni; mahse, i buai ve țhìn tho tih ka hria a," inthlahrung aw deuh taka a rawn tih leh chuan ka ding deuh dat a, amah ena inherin," Engati nge... " ka tàwp leh chat a," Naktûk chawhnu lamah ka rawn tlawh dâwn nia," ka ti leh a, ka in pêng kan thleng ta bawk nèn, ka in lam pan chuan ka kal zui ta daih a. 

Ka awm dàn chu a mak ka ti ve tho, khatia awm tum pawh kha ka ni bîk lo; mahse, ka thin a tirim deuh tlat mai a, min biak duh loh avàng maia chutia awm tlat? A puin min ngai a, a dam țha lo va, a tàwpah min rawn be ve ta hrãm tihna a nia, a pu chu dam țha se min be tawp nâng.

*I HARSATNA SUT KIANSAKTU TÙR CHE ZAWNG LOVIN HARSATNA I TAWH LAIA KALSAN NGAI LO TÙR CHE, I KIANGA AWM TLAT TÙR ZAWNG ZÂWK RAWH*