☆THE SWEETEST HANDCUFFS☆ - 42 By Dingdi Pachuau

 ☆THE SWEETEST HANDCUFFS☆ - 42 By Dingdi Pachuau

Lungawi loh der rei ka han tum ve ngial a nia; mahse, ka thei lo, vawiin bâk hi hun kan nei tawh dâwn si lo va, ka tih chhan chu ani nèn hian inkawpin hun kan hmang tawh dâwn lo tihna a nih chu. Chu vàng tak chuan hlim taka hman duhna ka nei, chutih rual erawh chuan ani hi ka tihlim zo ngût ang em ka hre lo thung.

"Hetianga ngawi ngul reng lo hian hlim takin awm tum zâwk teh, hun rei lo tê chauh kan neih hi, hma lam hun tùr ngaihtuah lo ila, tûn hun chauh hi ngaihtuah ang, chu chauh chu ka ngèn duh che a ni," ka han ti dap dap a, ani erawh chu a la ngawi reng thung a, en pawh min en lo. A lungawi lo a nih chu ka ring chiah lo deuh ringawt a, Valentine's gift chu a khàl nauh nauh reng a, hawn erawh a la hawng lo. Thilpêk min pe ve ta si lo va, nuam lo a tiin a inthiam lo ve deuh pawh a ni maithei a ni.

"Thilpêk min pêk loh vàngin ka lungawi lo miah lo aw, ka fiam mai mai che a nih kha, ka pe che a, ka lâwm, bâkah, ka thil hrilh che ngaipawimawhin, i rawn kal a, châk lo chung chung pawhin. Hlim taka i  awm hi ka duh ber a ni, min beisei anga ka țanpui thei lo che erawh hrehawm ka ti, min ngaidam hrâm dâwn nia; mahse, chuti chung chung pawh chuan vawiin chauh tal hi chu thil dang ngaihtuah lovin hlim takin, a hma ang chiah khân awm ang ka ti a ni,"  ka ti leh dap dap a. Ka thil sawi ka tih tak takzia hria se ka duh êm avàng chuan ka en reng a, chutah, rin loh deuhin ani pawh chu muangchânga rawn hawiin kan mit chu a intawng ta sak mai.

Hmun danga hawi sawn lo chuan kan inmelh reng a, a mitmeng ațang chuan a ngaihtuahna àwm ka hre thei lo. Ka nuih deuh sak a, ka duhna hi hre chiang viau se ka duh tak zet a ni, a rilru hi sawh sawn leh se, ințhen lam hi chu sawi tawh miah lo se, hlim tak khân inkawp leh ila..

Tho chhuaka min rawn pan ka hmuh chuan mak ka ti tih ka mitmeng ațangin a hre thei ngei ang chu, a nui ta suk a, min rawn hnaihchilh pah chuan," A țha alawm," a ti sap a, a âwm nghèng chial thei tùr chuan min kuah zui ta a, min kuah ang ang chuan ka awm tawp mai, min kuah êm hi chu ka beisei phâk tawp si lo va, tlêmin ka hamhaih ve pah a ni. A hnuah erawh chuan ka kuah lêt ve chiang ngang mai, hetiang hun hi ka tawng tawh ngai dâwn si lo, kuah châk viau mah ila ka kuah theih a ni dâen tawh lo, vawiin chauh kuahna hun ka nei tawh.

A hnu lama kan hun hman dàn chu ka duhthusàm ang chiah a ni. Ka rin phâk bâkin ka hlim a, ani pawh chutiang ve tho chuan ka hmu, ka rin phâk miah loh leh ka suangtuah phâk loh, chaw ei dun a rawt tlat a, ka hlimzia mai chu, rawng kan bâwl dùn a, kan ei tùra ka siam ve ngei cake tui tak pawh chu kan ei dùn a, vànneihthlâk takin rawn lêng an awm lo hlauh zui bawk nèn, vawiin hun hi ral thei lovin ding rih thei se ka ti tak zet a ni.

"Ka hmangaih chein ka hria."

Tûn hun chauh hi kan nei tih ka hre chiang a, chu vàng chuan," Kei pawh," ka lo ti ve vat a, ka nuih sak a, tûn hun atân chauha sawi kan ni bawk a, eng thu pawh sawi ila, kan hlimna a nih phawt chuan a pawi lo, nâktûkah chuan eng mah lo mai a ni tawh dâwn, kan theihnghilh tawn ve ve ang.

Kan inkuah a, kan infâwp a, tu dang mah kan ngai lo. Thu tam kan sawi lo, kan inen a, inhre thiam takin kan innuih leh bawk a, kan khawvêl hi a pâr chhing chheng ni berin ka hria. A hlim thei ang bera hman kan duh miau mai a, chaw kan ei lai pawhin kan inthlah mai lo, kan kut a inchelh loh chuan kan ke lam tal a insì a, kan inthlah lo ti ila a dik ber ang.

"Zanin hi ral thei lo se."

Ka nuih sak, kei pawhin ka ti ve tho; mahse, ani chuan min tihhlim nân mai a sawi a ni, a ti tak tak hauh lo ang.  Thlèng kan sil dùn a, keiin sahbawnin ka nuai a, ani'n a lo tleuh fai zêl bawk a, a chimawm thiam roh lutuk lehnghâl. Tui chuan ka hmaiah min pen per leh sek țhìn a, thinrim tak tak chuang lo chuan ka han hau a; mahse, a tilui leh zël tho, kan han inmelh a, ka melh rum a, ani lah chu lo nuiin a rawn kûn hniam zui zat a. A rûk tak chuan nuam ka ti, tleirãwl të ngaihzâwng nei hi ka inchan deuh a, kei chuan vawiin, zanin a ni tawh zâwk ang chu, atân mai ni lovin ni dang atân leh zël pawh hrtisng hun hi ni reng se, ințhen lo ila ka ti; mahse, ani tân zawng zanin atân chauh tak tak a ni dâwn si.

Eng mahin min tihbuai kan duh loh avàngin ka phone pawh ka ngaihsak lo va, kan inlàwm heuh heuh a ni ber ang chu. Ãm thei ang berin kan hun tlêm tê neih tawh chu kan hmang a, hun kan nei tam tawh lo tih hrilh hriat kher kan ngai lo, dâr 8 a pelh hnu lamah phei chuan țawng pawh kan țawng phal tawh lo a ni ber ang chu, țawng nân hun a uiawm tawh lutuk tlat.

A haw tùr chu ka huphurh ru khawp mai a, ka ngai ru sa nghâl tlat si a, kan ințhen hlei thei lo chu a ni. Kan inkuah a, minute rei lo tê chauh kan nei tawh si a, ani pawh chuan min thlah hlei thei bîk lo; mahse," Haw tawh rawh, ka lo en zui ang che," ka ti ta sap a, ani erawh chuan," Min thlah la?" a lo ti thung a, kan inzui chhuak leh ta nge nge a. Kan office piah deuha thing buk thleng chu ka thlah a, kan ding dùn leh rih a.

A tàwp tak tak dâwn ta. Tûn hunah chauh hian ka kuah thei tawh ang a, ka thlah veleh kan inkâr a tawp nghâl tawh ang. Harsa chu ka va ti si êm! Zanin hun ang hi ka lo suangtuah lãwk miah lo va, dam tak leh rilru na ém ém lova ka kaltîr theih mai kha ka lo ring a nia; mahse, a ni hauh lo. Zanina kan hun hman dun angte kha ka suangtuah phâk bâk thil a ni a, hlim taka hun hman dun hnua awlsam taka thlah mai chu a lo har a nih awm hi.

"Kal tawh rawh." Ka inthunun nasatzia chu a hre kher lo ang, êng awm tho mah se kan inhmu chiang thei chuang lo va, chuvàngin ka mittui tla pawh chu a hmu thei lo ang tih ka chiang, min hmu thei lo mah se, ka aw chhuakah leh ka awm dàn ațang pawh chuan min hriat chhuah loh hrâm ka beisei.

"Ka thlah lêt leh zâwk ang che."

Ka veranda êngah ka hmêl min hmu thei dâwn asin, a theih loh. Heta țanga ka thlah hi a ngai, min kalsana a liam tùr chu hmuh duh lo viau mah ila min en liam tùrin ka duh lo zâwk, ka phal lo, ka khawngaih lutuk dâwn asin.

"Ni lo, kal tawh zâwk rawh."

Ka chala a fawh leh vang vang hnuah chuan,"Mang țha," a ti sap a, a kal zui ta nghâl a. Ka biang lum thla pap pap chu ka hre reng a, ka mittui tla a ni tih pawh ka hria, hrûk erawh ka tum lêm lo. Tla rawh se, a phû a ni, ka duh tak nèn chuan kan ințhen ta. A kal ta pawh chu ka en zui lo a, ka maimichhîng tlat, min kalsan lai hmuh ka duh lo a ni, ka mitthlâah a châm reng dâwn si a, chu chu ka duh lo.

Inah pawh chuan dan sèn rual lohin ka mittui chu a tla zung zung reng a, ka hawi kual a, amah hlîr mai chu ka hmu zêl si a, chu chuan ka mittui chu a tihul thei lo ni berin ka hria. Nichin lawk kha chuan ka bulah ngei hian a awm ve reng kha a ni si a, 'Sawtah sâwn a țhu a, hetah hian kan țhu a, kan inkuah a, kan infâwp bawk a, kan inning lo a nih kha' tiin ka ngaihtuah lêt zut zut a, a nui hmêl leh a hlim hmêlte kha ka hmu leh thei ang em?  Zanina hun kan hman ang kha chu kan hmang nawn leh tawhin ka ring lo, a chhan maw, kan ințhen tawh alawm. Ani nèn khân ințhen tak takin kan ințhen tawh, beisei tùr a awm tawh lo. Zanina kan hun hman kha a hlimawm êm a, kan hlim êm mai a, hlim deuh pawh hi a lo țha lo a nih dâwn hi te ka ti leh a, awmzia a awm hauh si lo. 

Ka mut țhat loh êm avàng chuan mit thial úrhin hma takah ka tho a, zîng țawngțai inkhâwmah erawh ka kal ta lo, ka hmêl aţangin ka ţap a ni tih an hre palh ang. 

Chhùnah U Ropuia chuan eng mah hre ve lo chuan min fiam zauh zauh reng a," Nizàn chu in ãm viau a ni maw?" a tih loh leh," Nimin lam kha chuan a na hauh si lo va?" tiin; mahse, ka nuih liam mai mai thung, tukin ka thawh hlim ațanga hetia lo awm ngawt a nih thu chuan ka chhâng mai. Ani lah chuan nui var var chung hian," Nizànah i țap a nih loh chuan in meng rei dùn lutuk a ni ngei ang," a ti tlat a," A àwm ve tho alawm, nula tlangvâl la nih lai chuan," a ti leh a, ka chhâng tawh lêm lo.

Hna ka thawh hian a zia, thil dang ngaihtuah tùr nei lova awm zawngin Zodina bâk ngaihtuah dang ka nei thei si lo va, ka ngaihtuah ngut ngut zêl mai si a, a hrehawm êm mai. A la hlimchhãwng ve êm bawk a ni, nakinah hun liam deuh hlek se ka zia deuh mahna!

Unaute leh țhiantehovin Valentine's Day-a an hun hman dàn report WhatsApp group lamah an rawn pe sap sap hlawm a, a țhen chuan an pic pawh an rawn dah tel bawk, ngaihtuahna ding tak neiin an pic chu ka thlîr vang vang a, chutah, gallery-a kan pahniha kan thlalâk hrang hrang chu ka hmet chhuak ve ta a, group-a dah tum ka ni lo, en ka duh vàng a ni. Kan pahniha lâk dun hi ka ngah ve a, hmuh nuam lo uchuak taka lâk erawh kan nei lo. A rilru a thianghlim ka ti viau țhin, a chhan chu hun thâwl kan neih pawh hian remchângah lâk a tum lêm lo va, induh takin kan inkuah a, kan infâwp mai țhin a ni.

Ka mittui rawn tla chu duh lovin ka hru tãwk a, a nih dàn hre sa veka duh leh kawp ka ni a, mi chak lo tak anga mittui tlâktîr reng mai hian eng mah a siam țha lo ang, thil dang tih tùr ka ngaihtuah a ngai.

In ațang chuan ka chhuak a, intih-thawven nân ka chhuah a ngai a ni. Dàwrah ka kal a, field lamah ka kal leh a, mi ka hmuhte chu biain an dam țhat leh dam țhat lohte chu ka zâwt kual a, ka hnaa tel a nih miau avàngin bengvàr te hi ka chhuah a ngai, zak ve țhìn tho mah ila zak anga lan erawh ka tum hauh lo thung, 'Zahzum chu mi fel lo nihna, zakzum tak chu an fel thei lo' tia ka pa min zilhna chu ka ngaihtuah chhuak uai uai mai.

Jakob-a rawn lêng chuan," Valentine's day hmanpui che ka tum teh lul nèn, ka thin a rim tak tak a ni," a ti nghut nghut a, a thinrim chhan àwm ka hria a, ka sawipui duh lêm lo, thil dang daih ka sawipui a. Valentine's day chu han sawi zeuh ila chuan a rawn pàwr thar leh dâwn viau tih ka hria a ni.

"I pu eng nge a an?" ka tih chuan," A pãngngai reng ni tùrah ka ngai," a lo ti mai a, a sawi dàn chu a ngaihtuah loh hmel êm avàng chuan," I ngaihtuah peih loh châng pawhin i ngaihtuah reng a ngai a ni, hre ve lo mah se a tân chuan a innghahna ber, a tupa  kha i ni miau a," ka han ti vat a, ani lah chuan," Ka ni lo, kei chu mi dang daih alawm ka nih, bâkah, min ko peih lutuk a, ka ning deuh tlat, min tîr peih bawk si," a lo ti leh a.

"Ning leh tùr siin engati nge Zodina dinhmun kha i rawn luah si?" ka ti khauh a, ani chuan," Ka țanpui vàng chauha rawn dam chhuak thei a nih kha," a lo ti a, kei chuan," Țanpui i ti ve ziah? I sawi ve ziah a, eng tin nge i țanpui dàn chiah chu min han hrilh la?" ka han ti leh a, ka en ràn a. Ani chuan," A chanchin ka sawi peih lo, engati nge a chanchin chu sawi chhuah a rawn nih daih a?! Ka sawi chhuah a ni miah si lo," a lo ti leh hmuk a.

"A nih leh le, i sawi chhuah a nih si loh chuan. I pu erawh ngaihtuah viau ang che, hna kan ngah deuh si a, ka rawn kan hman tawh rih si lo, ka ring che a nia," ka ti ve leh a, ani lah chuan," A tupa tak taka min ngaiin Zodina'n a nu a tih dànte min zâwt maw le, hahthlâk hlawm a nia," a ti leh charh charh a.

Vâlpuia chu a kal bo chiang ta a ni ngei ang, ka hmu ngai tawh lo va, a ngaihawm roh khawp mai, Jakob-a hi zawh chian duh viau țhin mah ila a thinrimna a rawn chhuak ang tih ka hlau a ni. Válpuia hmu tawh lo tùr leh titipui tawh lo tùr khân min hrilh ngun ve viau a nih kha; mahse, ka thiam loh a ni bîk lo, kan inkàwm ngeih ve a, a lo fel roh bawk nèn, inhmuh tlat chuan inbiak loh theih ni hek lo le.

Pu Zuala pawh ka tlawh khãt  viau tawh a, Jakob-a ka hmuh hi chuan a chanchin erawh ka zâwt chàmchî thung. An ina kal ka hreh tawh a, Zodina a lo awm ve kur ang tih ka hlau a ni, Valentine's day aţangin chawlhkâr 2 zet a liam leh tawh a, a rawn inkhãwm ngai bawk si lo va, ka tân hmuh theihna chance a vâng ve êm a ni. Kimi pawh ka hrilh ang ka ti zet kha a ni a, hetia kan awm leh tâk hnu hi chuan hrilh tumna pawh ka nei tawh lêm lo; mahse, Jakob-a rawn lêng hi a hmu ve zauh zauh tho si a, min ring tho ang.

Zodina nîin min rawn bia a, tlai lam tawh a nih leh nih loh pawh sawi lo chuan an in lam chu ka pan vat a, a lo chau deuh thut lo niin; mahse, a bp vàng a lo ni hlauh a, a hnu deuhah chuan a rawn pângngai chho ve leh mai a, min biak a duh avàng chuan ka haw leh thei lawk lo va.

"A awm dàn hi ka hre thiam tawh lo viau a ni. A chângin room-ah a tawm tlat a, biak hleih theih pawh a ni țhin lo. Chutih rualin a chângin room-a tawm chu sawi loh, a lêng chhuak vang vang reng a, ka hre thiam hlawl lo. A nu chanchin, a chunga a chét dàn ka zawh chian lahin awlsam takin a thil tih vek a nih thuin min chhâng leh a, a tûk lawkah ni se biak țhat theih lohin a awm leh a, min biak chhunah ni se a nu chunga a chêt dàna hrehawm a tih thu leh pawi a tih thu min hrilh a, room-ah a inkhung leh ta ngut ngut a, rilru hrehawm leh buai rêng rêngin ka awm a ni," a ti chuar chuar a. Hm, chutih lai tak chuan Zodina a ni chiah tihna a ni, a nu chunga a chét dàn chu a hre ta ngei tihna a ni si a, hrehawm a va ti dâwn tehlul êm! Eng tiang takin nge a awm ang? A hma khân tu mahin an hre chhuak si lo va, amah ngei pawh khân a thinrim át vek vangin a hre chhuak lo a ni maithei, tunah chuan an hre ta vek si a, hrehawm a tiin pawi a ti lo thei lo.

Pu Zuala hnênah chuan Zodina dinhmun dik tak chu hrilh ka han tum zuau zuau a; mahse, ka țhulh leh ta. A hma pawha ka hrilh fiah ve deuh pawh khân a hre thiam tak tak lo a nih kha, Zodina natna thurûk a ni ve a, sawi chhuah zen pawh hi a nuam bîk lo, natna neituin a sawi chhuak țhìn a nih ngawt loh chuan.

"Tunah hian khawiah nge a awm a?" ka tih chuan," Tukin lam khân a inkhalh chhuak ve ta a nih kha,  a vâk harh ve dâwn pawh a ni mahna, chhuak harh ve rawh se, nimin leh nimin piah lamah room-ah a inkhung reng tawh a, a ning ve a ni ang, boruak thianghlim a hìp zeuh zeuh loh chuan a ã thei mai ang," a ti leh a. Jakob-a ni lova Zodina a lo nih vàng chiah a nih chu nizàn lamah a rawn lang lo ka lo tih ni, ni e, zin harh rawh se, a rilru hrehawmnate chu zin harhpui se a zia deuh mahna.

Mahse, khuaah a awm lo tih hriat chuan a ngaihawm zual sawtin ka hria. A reh hian a reh vawng vawng mai si a, zànah a thãwm hriat tùr a awm lo va, Jakob-a tal kha chu a rawn lêng ve ziah a, a hmel kha Zodina hmêl a nih miau avàngin khawhar tam tak min chhâwk thei a ni, tunah erawh chuan ani pawh a reh ta vawng vawng si. Zodina chu a zinna lamah chuan a hlim thei ang em? A rilruah min ngaihtuah chhuak ve ang em? Nge min paih bo hmak tawh zâwk ni ang?

Zodina rilru tùr ka ngaihtuah a, Jakob-a rilru tùr pawh ka ngaihtuah tel tho bawk. Zodina chuan hrehawm a ti a, páwnah pawh chhuah loh phahin room-ah a awm tlawk tlawk a, a tihah a ngai hmiah tihna a ni. Jakob-a hian ' Ka țanpui' a ti ziah a, a țanpui dàn a sawi lang miah lo. Vâlpuia khân Jakob-a'n a țanpui dàn min hrilh kha chu a pa kut a thlâk niin a sawi a, Zodina hi eng tiang berin nge a țanpui tâk le? 'Țanpui a ngai' a ti a, 'Dâwihzep' tiin a sawi lang ve ziah bawk, mi dâwihzep tak chuan eng tin nge a nu chungah thil țha lo tak a tih ngam ang? Jakob-a hi a thin a chhia a, mi kutthlâk mai pawh a hreh lo tih Vâlpuia kâ ațangin a hriat mai a, bâkah, kei pawhin a chezia leh țawngkam ka hriain ka hmu fo bawk, a thinrim chânga a chêt duh dàn ka hre bawk.

Ani hi, Zodina nuhrawn chunga thil titu chu a ni thei mai lo'ng maw?!! Zodina nungchang en hian hetiang ti duh tùr hi a ni thei tlat lo, a thinrim rilru nâ chu a hmu ang a, chutah chuan țanpui ngai nia hriain... Zodina hmuh ka va duh tak êm! Zâwt chiang ila, hêng hun lai vël ațang hian he natna ngeiawm tak hi a nei țan a ni thei mai lo'ng maw? 

Zodina biak a pawimawh ta ber mai, ka hmuh ngei a ngai a ni, min hmuh duh lo pawh ni se, hmuh ka duh tho tho.

*TUNA I HUN TAWN MÊK LEH I AWM DÀN KHA I TÀWPNA TÙR A NI DÂWN LO, KHA AIA ȚHA ZÂWK LEH CHHE ZÂWK TAWNG THEI I NI; MAHSE, BEISEINA NEI LA, I HMA LAM HUNAH A ȚHA ZÂWK ZÊL LO THLENG TÙRIN BEISEINA NEIIN I NUNG DÂWN NIA*