☆THE SWEETEST HANDCUFFS☆ - 43 By Dingdi Pachuau

 ☆THE SWEETEST HANDCUFFS☆ - 43 By Dingdi Pachuau

Mahse, ka duh vàng ngawtin ka duh hun hunah ka hmu thei ngawt tawh lo, ka bialpa a ni tawh lo zui, tunah tak phei hi chuan a zin daih lehnghâl a, engtikah nge a rawn haw dâwn pawh ka hre lo a nia...

Khua a'n rawn lum chho leh a, thlasik lai a ngaihawm leh vawng vawng mai. Thuamhnaw chhah leh lum lam rêng rêng chu hâk chu sawi loh, hmuh ringawt pawh a hrehawm leh tawh a, ka khung bo vek rêng a ni. Keimah chauha awm ka nih vàngin tui ka hnianghnãr viau a, ni tin vawi hnih ka inbual thei a, a zia viau mai.

Kâr tàwpah ka pa min ngenna angin ka haw phei a, haw phei ka hreh țhinna chhan ber Zodina hmuh tùr a awm bawk si lo va, haw daih mai pawi ka ti lo a ni, ka chhûngte bulah awm ila, ka rilru pawh a hahdam ve deuh thei ang.

Ka thlen chuan  chhûngteho an rawn lêng țak țak a; mahse, an lêng rei hlawm lo, eirawng bàwl s hun hnsi zàna zanriah kan kîl lai chuan ka pa chuan," Scooty i kawl tawh bawk a, hna lama i buai viau loh chuan kâr tàwpah hi chuan rawn haw tum țhìn la a țha ang, i khalh thiam viau tawh bawk a," a han ti a, ka nu chuan," Chuti tùr em ni? Kei, amah tê chauha a rawn inkhalh haw leh bap bap țhìn tùr chu ka lo ngaihtuah ru viau asin, mipa chu ni se zia tak a la awm deuh a, kawng lakah buaina pawh tâwk thut thei reng a ni si a," a lo ti thung a, ka pa chuan," A, i ngaihtuah thui lutuk a nih chu, mite pawh an tlãn fo a, him dam takin an tum ram an thleng ve mai zêl, vawiin lamah pawh him takin a rawn inkhalh thleng thei alawm le, a țha lo lam hi ngaihtuah kai zêl lo la," a lo ti ve leh a, ka lo inrawlh ve lêm lo, ka nu leh pa min ngaihtuah dàn, an ngaihtuahna inang lo lutuk chu ka ngaihtuah zui vang vang a.

Zànah chuan tih tùr awm hek lo, ka nu leh pa TV en bulah chuan ka han țhu ve deuh reng phawt a, kan titi luam hnuah erawh chuan room-ah ka luhsan ta daih a, mut ngawt mai lah chu ka peih rih si lo, computer hmaah chuan țhuin thlalâk hlui ka en kual ta mai mai a. Chutia thlalâk ka en kual tâkah chuan ka hriat rengna chuan a hun laiah min hruai lût a, ka lung a tihlèn veng veng rualin min tihlim deuh tho bawk si, Mami nèn inkuaha nui sâng chunga kan in ngeia kan lâk dun chu ka thlîr vawng vawng a. Hemi ni hian kan birthday, kum 17 kan tlin nî kan làwm a, kan unaute, chhûngkhatte nèn hlim takin hun kan hmang a, he thlalâk hi ka pain a phone camera-a min lâksak ngei a nih nghe nghe kha. Hemi nî hi chuan kan hlim asin, kan chunga thil thleng tùr kan hre lâwk miah si lo, tunah chuan Mami zawng, a thlalâk en mai hi kan chantâwk a lo ni ta mai si a, la dam ve se, ka rilru hrehawmnate hi ka han hrilh ang a, tuna ka buaina tam takte hi ka tawng miah lo tùr a nia, chutiangin Zodina pawhin...

Mahse, ka inngaihtuah harh ta thuai a, thil țûl lo ngaihtuah chiam hian eng mah a siam țha lo va, kan rilru a tihrisêl lovin mahni tân hrehawm kan insiam mai a lo ni țhìn. Thil thleng rêng rêng hian chhan a nei vek a, ka chunga thil thleng pawh hi thil thleng palh mai a ni lo, chhan neia thleng vek a ni.

Thlalâk chu ka en kual zêl a, thil ngaihtuah chhuah ka nei ta thut a, ka phone-ah chuan Mami nèna kan thlalâk dun țhenkhat chu ka dah lût ta nghâl a. Thlalâk hlui en hian lung hi a lêng thar duh riau a lo ni, a hun lai kan ngaihtuah lêt lo thei si lo va, kan hriat rengna chuan a hun laiah min hruai lêt a, khâng hun lai leh tûn hun hi chu a inpèrsan tawh hlê mai si a.

A tûk lamah chuan kan chhûngkuain kan inkhâwm dial a, kan chhûngkua hi tlêm tê mah ni ila kan inkhâwm țhap thei hi ka lãwm viau țhin a ni. Mi aia kan țhat bîk vàng a ni hauh lo; mahse, dam țhat hi chuan Biak ina làwmthu sawi tùr leh Amah faka A thu ngaithla tùra kal hi chu kan tih ngei tùrah kan ngai ni berin ka hria, kâr khata ni khat, chutah pawh dârkâr 2/3 chhûng ang chauh hun kan hmang a, hetiang pawh tih theih loh êm hi chu a fuh chiah loin ka hre țhìn; mahse, mihring hi kan inang lo va, kan hming leh kan hmêl a inang lo ang chiahin kan rilru puthmang leh ngaih dàn pawh a inang lo si a.

A tûk maia ka phei leh tawh dâwn avàng chuan zànah chhûngte an rawn lêng lât lât a, titiin kan nui tlâng  leh dar dar țhìn a, ka kawm rualpui an awm lo vek si a, nu leh pate bulah ka tawlh ve hrawt hrawt lo thei lo a ni. Min zilh ni paha min fiamna hrang hrangte chu lu bu nghat nghat pahin ka nuih liam mai a.

"Saw lamah chuan bialpa va nei hauh suh ang che, thingtlânga nupui pasal neih chuan a buaithlâk, fate hmakhua a thim," an tih loh leh," Thingtlângnu han nih ringawt chu a fuh ber lo ang, chuvàngin, bialpa i neih phal a ni rih lo, i neih dâwn pawhin sawta min chu ni suh se," an ti a, a țhenin," A, chutiang ringawt a ni thei nâng, lunglèn deuhtu pawh a lo hmu ve tawh maithei asin," an tih laiin a țhenin," Eng nge pawi? A duh a hmuh ahnu, keini'n sawi theih kan nei hauh lo, thingtlâng nun hi a nuam daih zâwk asin, khawpuia changkàn tuma intlànsiak rêng rênga nun leh hun hman ai chuan rilru engthâwl taka changkàn leh rual el lam êm êm pawh ngaihtuah lova hun hman hi a nuamin rilru pawh a hrisêl daih zâwk ngei ang," an ti bawk a, an thil sawi chuan dikna chen a nei vek si a, chhàn ngaihna pawh ka hre hlawm lo.

A tûk tûkțhuan ei kham hma deuh takah chuan keimah chauh chuan ka inkhalh haw leh ta bap bap a, khua a lum si a, tlàn thâwt chu a nawm viau rualin ni sa lutuk chuan min chhun tlang thei mai dâwnin ka hria, daihlim a vâng si, kawng laka chawlh ringawt lah ka duh si lo, vawiin pawh U Ropuia'n min lo hmui dâwn ringawt a nia... a inthlahrunawm, bâkah, thil țûl tak a awm vàng pawh ni lêm lova haw leh ringawt țhin hi thil țha ber a ni lo ang, ni khat ang ka chawlh zêl a ngai dâwn si a.

Lungleiah pawh ka ding lo, ka mamawh tùr chu in ațangin ka keng phei vek tawh a, lei tùr ka nei tawh rih lo. Ka tlãn vang vang a, Lunglei ațanga kan kawnga ka han tlãn leh zet chu a khu țha khawp mai, ka thlen hunah meuh chuan ka paw țha leh ngawt ang chu. Vut tlin khâwmna deuh chu ka hêl ve zêl a; mahse, chuti chung pawh chuan a khu êm êm tho, ka lo hêl nasa mah mah a ni ngei ang chu, ka hëlna lamah lung ka rah a pial thet a, kawng chhak lamah chuan ka ãwn ta ruai ruai mai, tlûk loh hrâm chu ka tum nasa a; mahse, ka balance a dik thei tawh lo.

Ka tlu ta ngei a; mahse, ka tho rang kher asin. Scooty pawh ka pawt ding ve nghâl a, min hmu an awm leh awm loh ka en kual vat vat phawt a, chumi hnuah chauh chuan ka scooty chu ka en, ka tlûkna lam ding lam chu a paw deuh thûr a, ka han tifai nawk nawk a, a hnung chu lunga tauhna tlêmin a lo râng deuh hlek a, ka zuk delh ber kher chu a lo chang țha viau a ni ngei ang. Ka han chuang a, ka tlãn ve leh mai bawk a, vaivut hêl viau tawh lo mai teh ang.

In chu paw thârin ka thleng a, in chhûnga ka luh hma chuan ka han inbêng fai thak thak phawt a, chumi hnuah ka lût ve chauh. U Ropuia a la haw lo bawk a, office-ah ka kal leh zawk ang.

U Ropuia'n min lo hmuh veleh," I lo thlenna a rei tawh em? Engati nge i rawn kal duh kher a? A ngai hleinem," a lo ti sawk sawk a, a la rei loh thua chhângin a lo buai leh buai lohte chu ka han zâwt luam a, a hnuah erawh thingpui lum tùrin ka chhuahsan leh ta a.

Thingpui kan in lai chuan U Ropuia chuan," Tih dàn ka hria, electric hmanga tui lumna kha ka lo lei ang a, chu chuan thingpui kan lum țhìn  tawh dâwn nia," a ti sârh sârh a, kei chuan," A ngai hleinem, ka lum thei reng alawm," ka lo ti thung a, ani erawh chuan," Ni lo ve, heta awlsam taka a lum theih reng laiin i phe buai ziah a, a țha lo, naktûkah emaw ka lo lei dâwn nia, chini leh bâwnghnute pawh kg 2/1 kan lei bawk ang a," a ti leh a.

*******

Zodina rawn haw hun chu nghâkhlel takin ka lo thlîr a, nî ka lo chhiar a; mahse, a reh vung vung reng mai. A zinna hmun hre tawp lo leh a lo haw hun tùr hre hauh lo chuan a lo haw hun chu ka lo sakuh sèr nghah ngawt ngawt mai a nih ber chu. Ka hmuh duh hun lai taka hmuh tùr a awm lo chu a châng phei chuan ka thin a rim deuh ringawt a; mahse, a hnuah erawh a chunga thinrim ringawt thei ka nih lohzia ka ngaihtuah chhuak leh țhin. 

A pu pawh ka tlawh leh tawh a, a zia viau mai. Zodina chanchin chu han zawh khawl mai ka duh deuh a; mahse, ka hreh deuh bawk si. Záwt mah ila ani hi chuan a hriat ka ring meuh lo, a nî saw chuan a hre mial mahna. Chanchin hrilhin a rawn phone mial thei asin, a zinna hmun leh a rawn haw hun tùr pawh a hrilh vek maithei a ni.

Vànneihna hi ka lamah a țang thut a nih ka ring, thingpui min rawn pêk pah chuan," Zodina pawh naktûk khian rawn haw a tum a nih chu, ka pa. Mamawh rawn lei haw tùr kan neih leh neih loh min rawn zâwt a," a rawn ti ta chiah mai a, chutia ka zawh ngai hauh lova a nîin a rawn sawi chhuak chu ka va lãwm tak! Ka thin pawh a phu nghâl dawt dawt thei hial mai!

Pu Zuala chuan," A țhat hlauh chu, a rawn haw duh tawhte chuan rawn haw rawh se, ka damdawi ei tùr Vitamin kha chah la a tâwk mai ang," a lo ti a," Tluangte, Zodina rawn haw hnuah pawh chuan i rawn lêng leh ngei ang chu tiraw? A awm dàn a danglam tâk êm avàng hian rawn lèn hreh phah chuang suh aw," tiin min rawn en phei a. Kei chuan," Hreh lah lo ve, ka hman phawt chuan ka la rawn lêng leh zêl ang," ka lo ti ve a, ka chhànna chuan a tilãwm a ni ang, a nui suk a.

Zodina rawn haw tùr chuan min tihelhhawlh tlat a, ka chhûngril lamah hian ka phî deuh ruai ni berin ka hria, eng vànga hetia awm nge maw ka nih hi? Hmuh tum ta ringawt pawh ni ila, ani'n min lo hmu duh tawp nâng, 'inhmuhna chhan tùr kan nei tawh lo' te kha lo ti hmak ta se, ka hawi hil dèr ang chu; mahse, chutiang zawng, thleng lul suh se.

A rawn haw ațangin ni thum a liam a, a hmêl ka hmu hauh lo.  Jakob-a rêng rêng pawh hi a va reh tak! A rawn lèn mai ringin zànahte hian ka lo inpeih ru ar țhìn a; mahse, a rawn lang hauh lo. A hma kha chuan kan inhmu zing thei hlê si a, a chak viau tawh lo tihna em ni le? Nge a duh tak zâwk  Mami ka ni lo tih a hre chhuak tawh zâwk? Ni lo, hei hi chu thil theih a ni lo, tu mahin an hrilh lo ang, kei bâkin, tu mahin an hre lo.

Ka kâwlhràwn ka chhuah a, amahin min rawn pan hmasa dâwn lo tih hriain keimah zâwk chu ka va lêng ta chawt a, a zin lo hawna pawh kâr khat a tling deuhthaw tawh nghe nghe. Hmuh ka duh zâwk miau si a, ka pan mai loh nâkah, a lo inkhung bur loh hrâm ka beisei.

Chawhnu dâr 3 a ni tawh a, a nî a lo awm lo va, Pu Zuala chuan min lo chhàwn vat a, in chunga Zodina awm pawh chu a ko vat nghe nghe, a lo chhuk duh kher pawhin ka ring lo, ka hming a sawi lang kher bawk si a, min hmu duh kher lo ang.

Mahse, rin loh deuhin a lo chhuk ve mai nia! Ka lo en ngun deuh a ni ang, a hmël tla deuh dâwk leh a mit hnuai val dum phei deuh kalh ka hmuh chuan ka tum loh deuhin lainatna leh khawngaihna thinlung ka nei nghâl a, a zinna lamah nuam ti takin hun a hmang hran lo a ni ngei ang. 

A pu hriatah chuan mawihnai atân tiin min be ve ni berin ka hria, a pu chuan," Lo inkàwm rawh u, ka'n inbual lawk ang e, a tlai tak tak hma hian," a ti a, muangchâng hian a tho țaih țaih a, kei chuan," Puih i ngai lo ang maw?" ka lo ti vat a, ani lah chuan," Ngai lo ve, ka dam țha alawm, a làwmawm tho tho e," tiin min rawn nuih a, a room lamah chuan a lût zui ta a.

Hun remchâng chuh vat ka duh vàng chuan," Biak che ka duh ngawt mai," ka han ti tâwng a, ani erawh chuan min en lo va, min chhâng chuang lo, chhuat lam a bih ngar mai a. Ka sawi ngai chu ka sawi nawn leh a, chutah, rawn hawi chhuak ve deuh hlekin," Eng thilah maw?" a rawn ti chhuak ta sap a.

"Thil ka zâwt duh che a, hmâna thil thleng chungchângah khân."

"Sawi chhuah pawh ka duh tawh lo'," a lo ti thung a, a rilru a hrehawm a ni ang, chhuat lam bawk chu a bih leh ta a, kei chuan," Ni lo, i sawi chhuah ngei a ngai, kha thil kha i tih a ni ngei a ni tih engtin nge i hriat?" ka ti ta vat a.

A ngawi reng a, a kun reng bawk a, min chhàn ngaihna a hre lo a nih ka ring. Chu chu remchângah lain," I thil tih ngei a ni tih i sawi theih miah loh kha, chu chu remchângah hmangin Jakob-a khân hnawh bo nân che i tih angin a sawi mai a ni ngei ang," ka ti leh zung zung a.

"Ka tih a ni ngei ang, ka nu kha ka hua asin, khatih lai khân ka thin a rim êm êm bawk."

"Ni lo, a ni lo tawp ang. Khatiang ti duh tùr khawpin i nun a rãwng lo, i thin pawh lo rim viau mah se i ti thei lo tawp ang," ka lo ti ve thung a, țawng lo chuan a maimichhîng vang vang a," Thil thleng kha han ngaihtuah lêt tum chhin teh," ka lo ti leh a.

"A rei tawh êm a, chiang fakin ka hre tawh lo," a ti sap a, thâwk a la hak phawt a, chutah," Khatih lai khân ka thinrim kha ka ã ruai ni maiin ka hria, ka ngaihtuah lêt vek thiam tawh lo, ka rilru nâ thinrim bawk si khân kha thil kha ka ti a ni ngei ang, khatih lai khân ka thinrim êm a, rilru fîm ka hmang thei tawh lo  a ni ngei ang," a tih zawm leh a.

"Chu pawh chu ni se, i thinlung khân khatiang thil kha chu a ngaihtuah thleng phâk hauh lo ang, Jakob-a tih a nih ngei ka ring a ni, a hmain Vâlpuia pa pawh kut a thlâk tawh a, i nu chunga thil titu pawh kha amah ngei a nih ka ring tlat a ni," ka ti leh a, ani chuan," Ka thinrim angin a thin a rim ve nãng, bâkah, ani chuan ka nu huatna chhan tùr a nei ve hleinem, chuan, ka nute pawhin kha thil kha ka tih ngei a ni tiin an sawi vek a, kei pawhin ka phâ hauh lo," a lo ti leh thung a.

"I tân chuan phat ngaihna a awm nâng, kha thil titu khân i hmel ang leh i pian ang a nei tlat a, i taksa a rawn chènchilh miau a ni," ka tih pawh chuan," Ni lo, mi dang puh ka tum lo, awmzia a awm hauh lo bawk, mi dang puhin kan chhûngkaw inkâr a siam țha thei chuang lo," beidawn hmel tak chuan a ti leh ta a.

A thil tihah a ngai tlat dâwn a ni. A tih ni lovin sawi dâwn ta se, a natna hi sawi chhuah vek a ngai ngei dâwn a, natna common lo lutuk mai a vei a ni tih an hriat chuan mi en dàn a dang nghâl vek ngei ang, chu chu a hriat sa vàng a ni ngei ang, sawi chhuah a duh tlat loh ni. A dik ve tho mai, damdawi eia enkawl dam mai chi a ni mang si lo, thil buaithlãk tak chu a ni.

Jakob-a ka hmuh leh thuai a ngai a ni. Engkim ka zawh chian hnuah Mami ka nih loh thu pawh ka hrilh ngei tawh ang, a pawi lo, eng pawh thleng rawh se, a thin pawh rim se, thu dik tak hi ka sawi chhuah ngei a ngai tawh. Thinrim lo leh zaidawh takin ka hrilh ang a, a hre thiam ve êm ang chu, a thinchhe deuh e tih lohah chuan mi sual tak a ni bîk hleinem.

*A HNUA KAN INCHHÌR LOHNA TÙRIN THINRIM LAIA INSÙM HRÂM HRÂM TE, ȚAWNG VAK LOH LEH INTHUNUN HRÂM HRÂM TE KAN TUM ȚHÌN TÙR A NI*