☆THE SWEETEST HANDCUFFS☆ - 44 By Dingdi Pachuau

 ☆THE SWEETEST HANDCUFFS☆- 44 By Dingdi Pachuau

An ina ka lèna ka hmuh bâk Zodina chu ka hmu lo leh ta vang vang a, hmuh theih tùrin a inlàr chhuah loh bâkah a inkhâwm ngai si lo va, kei lah an inah ka lêng leh tawh rih bawk si lo nèn, ka tân chuan hmuh ngaihna a awm lo ve bawk a ni.

Zodina nèn kan ințhen hnu hian ngai viau mah ila amah ngaihtuah loh hi ka tum ve nasa țhìn a, ka tum ve bawk a, chhùn lamah hi chuan ka thei viau; mahse, zàn mut hmunah tak hian ka ngaihtuah chhuak lo thei lo, ka ngaihtuah chhuak ziah a, thil dang ngaihtuah tuma phone-a zai leh thawnthu ka play pawhin awmzia a awm lo, ka zëp lo, zàn hi ka mu tlêm a ni. A chângin khumah ka țhu reng a, a chângin meng rengin ka mu a, ka maimichhìn châng pawhin ka muhìl thei chuang lo. Dârkâr thum emaw dârkâr li emaw vêl chauh hi ka mu țhìn a ni.

Miin min la sawi duh reng em tih ka hre lo va, ka ngaihtuah hran hek lo. A chhan chu ngaihtuah tùr apui ka ngah lutuk a, hetiang lam hi ka ngaihtuah hman lo a ni ber, min lo sawi a nih pawhin min sawi ve châk ni mai teh se, min sawina tùr a tam dâwn tih lah ka hre kar bawk.

Kan inkhâwm bâng chu Kimi chuan," Min lo nghâk lawk aw, Pu Biaka ka'n be lawk, ka rei lo ang," a ti a, Biak in thlang lawka thing buk hnuaiah chuan țhuin ka lo nghâk a, ni a sa țhain khua a lum ve bawk a, thing buk hnuai pawh chu a lum viau tho mai.

"Kei ai chuan a kawp rei peih lo zâwk che chu a ni tiraw? Mi inkâra inrawlh hi chu an tluang duh lo châwk asin, ka khawngaih phâk chu ni lêm lo mah la ka khawngaih ru riau mai che." A han nui hak a, en kher lo pawhin Arini a ni tih ka hria a, ka en lo va, chhàn lêt pawh ka tum chuang lo.

Mi dang chuan min rawn kal pèl zêl a, ani pawh min țawng khum tawh a, a kal sawn ve mai ang chu ka tih lai chuan a lo la duh tâwk hauh lo a ni chëk ang chu," Zodina nèn in inzui ngai ta lo ka lo tih ka lo tih chhan hi in lo ințhen tawh vàng lek lo niin, hetiang hi a thlen ka ring rêng a! Zodina pawh ka khawngaih phâk ni lo mah se, ka lainat ru khawp, in inkawp rei lo tehlam lutuk kha a zak viau a ni tih a inlàr chhuah loh dàn ațang hian mi pângngai chin chuan kan hre thiam vek ngei ang, engkim hi i thiam loh vek a ni tiraw? Mi inkâr i tibuai a, tunah i hawihil leh a, hei hi i chan tùr dik tak chu a ni-" a tih lai chuan chhak lam ațang chuan tu emawin a rawn ko ta hlauh a, min diriam zui tawh lo chuan a chho zui nghâl vat a.

Ka thin pawh a rim lo. A duh a sawi ve ni maiah ka ngai, a tân chuan ka runawm ve dâwn ëm asin, a chan ka chanah ka dah chhin a, tunah hi chuan thinrimna rilru put pawh ka tum tawh lo, ka thin a rim chuan keimah ka intina mai mai, rilru hrisêl lo put hi zawng a hahthlâk bâkah taksa tân pawh a hrisêl lo, hei hi ka vawng reng tùr a ni.

Kimi a rawn thleng thla ve nghâl chiah a," Eng nge Arini khân a rawn sawi a?" a rawn ti nghâl chiah a, kei chuan," A, ka puan hi mawi a ti deuh a ni ang, ka leina hmun leh a man zât min rawn zâwt a nih kha," ka lo ti vat a, ka nui pah deuh bawk a, ani erawh chuan âwih chiah lo tih hriat tak hian," A va mak àwm ve! Mi thil neih hi mawi tiin a awh ngai ka hre si lo va," a ti nuah nuah a. Kei erawh chuan," A rawn ti miau sia," ka lo ti leh mai thung a, a ngawi vung vung a, chutah," Mak ka ti hlê mai," a la rawn ti chhuak leh țâlh a. Tho vutin," Vawiin chu a lum nuam bawk a, haw veleh fan on-in mu der der mai teh ang," ka ti zui a, a lo nui hawk a," A nuam viau tak ang chu! Mahse, kei, chhùnah ka mu ngai mang hauh lo, ka tih ngai loh a nih vàng pawh a ni mai thei," a ti a, kal pah chuan," Kei pawh ka mu ngai bîk chuang lo; mahse, vawiin chu inkhâwm chhûng zawng khân ka mut a chhuak reng mai a, ka'n ti ve chhin ang e," ka ti a, kal pah chuan kan titi zui zêl a.

Khua a lum ve bawk a, fan ka on sauh sauh a, ka muthilh hlàna mi an rawn kal palh ka hlauh avàngin chhûng lamah kawng ka kalh a, ka mu ta diai mai; mahse, ka tih țhan loh a nih vàng nge ni, ka rin angin ka muhìl nghâl thei miah lo, ka han maimichhîng a, ka mut dàn ka siam rem thùl, a dik chuang lo. A mak ngawt mai, biak inah lëm, ka mut a chhuah tehlul nèn, kha kha tunah tak hian ka mamawh asin le, hun lo lutukah mut chhuak a rawn kal a, a hunah tak paih bo ang hmak a ni leh si.

Phone chu ka en kual ta mai mai a, movie en tùr ka dap a, ka zawn kual fê hnuah vawi thum zet ka en tawh hnu 'Dear John' tih chu ka hmu fuh a, a vawi lì nân ka en leh ta a, a lo țha khawp mai, rei lo têah mut chhuak a rawn kal a, minute 10 vêl bâk ka en hman lo, ka muhìl zui ta daih a.

Ka harh chuan dâr 3 a lo ri țêp tawh a, thova ka hmai ka phih hnu chuan ka harh vãwk maiin ka hria. Zàn lamah ka mu tlêm țhìn si a, tih tùr neih loh chuan mut zeuh zeuh tùr a nih hi ka tih phah ta hial a ni.

Rawng ka bàwl kârh kârh lai chuan Kimi a rawn kal zawk a, tumbu pickle a siam chu min rawn suah ve a lo ni. Làwmthu ka hrilh luam hnu chuan a haw leh nghâl a, a thil min rawn suah chu ka han hnìm chhin leh a, a tui leh dâwn tih ka hre chiang, zanriah tui takin ka ei leh theih phah dâwn a nih hi.

Zànah ka inkhâwm ve leh a, inkhâwm bànah haw nghâl vat lovin Kimi'n khawi khawiah emaw min pèn kualpui a, in thum laiah min luhpui hman nia, kan haw meuh chuan dâr 10 a ri thuak tawh mai! 

In ka thleng ka lút deuh chiah tihah chuan," I lêng rei hlê mai," tih rî chu hriain ka hawi lêt rang kher mai! A rawn lût chiah a nih hmèl, hmuh ka duh êm êm, amah Jakob-a ngei a lo ni, ka thinphu chu làwmna avàngin a phu rang dat dat nghâlin ka hria!

"I va reh ve...!?"

Teh thlâwt a. Ni e, a reh êm a ni, hmuh ka duh êm êm a; mahse, tunah tak hi chuan  duh ai chuan a tlai deuh tawh chu a ni, ka thil hrilh tum lah hi hun rei lo tê chhúnga hrilh fiah vek hman a ni dâwn si lo.

"Min ngai ve tihna a ni tiraw?" tiin a han phun zui sup a, atua mah mah la țhu lo chuan kan inhmachhawn ràn mai. Ka en țhìn, Zodina taksa leh hmêl a put miau avàngin tlêma a biang lo lang lo chér zual ta deuh chu ka hmuh hmaih hauh lo, ka rilru a tina ru ngawih ngawih.

"Ka buai ve lutuk a; mahse, tunah chuan a zia tawh e, kan inhmu zing thei tawh ang, ka ngaih țhinzia che chu a," tiin min rawn din hnaih sauh a," Ka ngai hlê si che a, ka kuah thei ang che tiraw?" a ti leh sup a, chhâng lo chuan ka lo en reng ringawt thung. Eng buaina tak nei ve ang maw? A buai viau tak tak a nih ngei ka ring bawk, chhuanlam mai a nih ka ring lo.

Chhâng lo mah ila min rawn kuah tho, min kuah nghet telh telh a, ka nam sawn hran lo. Min ngai ve a ni mai; mahse, rilru lamah inthiam lohna ka nei nghâl zat a, kuah pawh ka kuah lêt loh phah a ni. Rei mawi tâwk tak min kuah hnu chuan," Ka lo nghâk reng che a, tunah chuan i hmêl hmuin ka kuah ta bawk che a, ka hahdam ta. A tlai deuh ta bawk nèn, i mut a chhuak tawh ang, ka kal tawh ang e, naktûk lamah kan inhmu leh dâwn nia," a ti a, min en vang vang hnuah chuan a lo luh laia thãwm a nei lo ang bawk khãn thãwm nei lo chuan a chhuak zui leh nghâl a, kan inmang țha miah lo tih ka hre chhuak nghâl vat a.

Mahse, ka ûm zui lo.

Mut hmunah chuan ka ngaihtuahna ka kàwm kual leh a, Jakob-a ka hmu leh ta chu a ni a, ka rilru pawh a zãng ve deuh hlek, tunah chuan a sawi kha a dik a nih ngat chuan ka duh ang takin kan inhmu leh zut thei tawh ang, hrilh ka tum hi ka hrilh thei ngei tawh ang a, harsatna a awm loh ngei pawh ka beisei.

A sawi angin a tûkah chuan a rawn lêng ta ngei a, office-ah min rawn lènchilh rap mai nèn, U Ropuia lakah ka inthlahrung ru angreng; mahse, Jakob-a'n nuam a ti lo ang tih ka hlauh avàngin țha takin ka be reng tho a. U Ropuia nèn chuan sumdàwnna chungchâng sawiin an titi pah bawk a, a hnuah phei chuan an titi tui ta lutuk a, thingpui ka lumsan daih nghe nghe.

A lêng rei ngar ngar viau a ni, chawhnu dâr 3-a U Ropuia a haw pawh chuan a la awm reng a, inah min la zui haw leh bawk a, thei ve ngar ngar tak chu a ni. Ka bula awm a thlahlel ve tih ka hria a, chubâkah, a hlim vein nun nuam takin a hmang ve bawk a, Mami chanchin ka hrilh huna a awm dàn tùr ka ngaihtuah hian a țhâwng ve viauin ka ring bawk si a, hei vàng tak hian ka thil hrilh tùr pawh hi hrilh ka hreh phah ve a ni. 

"Ka awm loh chhûngin Zodina'n a rawn be leh che em?"

Ka en vat a, min lo en ve kur mai. Hawi sawn leh nghâlin," Be lo ve, i thil sawi chhuah vàng khân hrehawm a ti a, hmuh pawh ka hmu ngai lo," ka tih chuan," A țhat hlauh chu," a lo ti duh lek a.

"A nu kha a hàl a ni lo tiraw?"

"Ni lo tiin a sawi a ni maw?"

Lu thing pah chuan," Chutiang eng mah a sawi lo, a nungchang ka chîk ka chîk hian thinrim eng ang mah se a nu meuh hãl duh tùr khawp chuan ka ring thei lo a ni," ka ti ve ta thung a, ani erawh chuan," Chu, a tih a nih i rin si loh chuan tu tih nge nia i rin tâk? Keimah maw?!! Kei aiin ani chu i ring zâwk a maw?!!" a rawn ti ta tuar mai a, ka phu deuh zawk nghe nghe.

"Ni lo, i hre sual a nih kha," ka han tih chuan," Ni lo, ka hre sual lo. Ani chuan thil sual a tih theih i ring lo va, a nu hãltu-ah pawh i puh thei hek lo. Chutih rual chuan, kei erawh chu mi sual leh a nu meuh pawh hãl duh tùrah chuan min ngai tihna a ni, a va mak êm!! Engtin nge ani aiin kei hi  min rinhlelh theih?!!" a ti leh ta chhur chhur mai a, a thin a rimin a rilru a nâ a ni tih a hmêl ațang chuan a hmuh theih reng mai. Ni e, kei hian ka tisual em ni? Zodina ringhlel lovin amah hi ka ringhlel zâwk tlat si a.

"Ka rilru i tina hlê mai," tiin a tho ta thut a, a chhuak zui ta vut a, ka ûm zui a, ka ko zui a; mahse, a ding chhin eih lo, hawi lah a rawn hawi chhin eih lo bawk. Ka en zui reng a, kei hian ka tidik lo em ni le? Jakob-a khân a hàl a nih chu ka ring daih zâwk alawm; mahse, kha, a lãwm lo viau chu a nih kha.

Ka hmu zui ta miah lo, nî a liam a, ni hnih ni thum a liam hnu pawh chuan ka hmu ta rêng rêng lo va, min rawn be hek lo. Biak chu ka duh viau mai a, ngaihdam han dìl mawi ve pawh ka duh khawp mai, ka thil hrilh tùr lah ka la hrilh hman si lo va; mahse, hmuh tùr rêng a awm si lo, inah ka va panchilh tawp mai dâwn em ni ang? Mahse, thil ni thei niin ka hre meuh si lo, bâkah, min lo hmuh duh loh phei chuan, ani hi zawng a luhlul nasa mai si a, min hmu duh lo chung chu ka hmu lui thei ngût lo ang.

Mahse, ka vànneih asiamin ka ti dâwn nge, a pa dam țhat loh chungchângah Zodina nî chuan min rawn be leh ta hlauh mai, mi damlohna ka vànneihnaa ka lo chhiar ve ringawt chu 'mak' pawh min ti ngawt ang chu; mahse, Zodina emaw Jakob-a emaw ka hmuh phah mial thei asin.

Pu Zuala chu a khua a lo sik deuh bâkah a pum chu nâ a ti a ni àwm e, ni thum kalta ațang khân a khawsik hrim hrim chu a lo tuar tawh a lo ni. Thisen lâksakin damdawi ei turte ka han hrilh a, a pum nâ vàng chuan damdawi ei aia inchìu a duh avàngin ka chîu bawk a, rei lo têah chuan a pum nâ chu a reh mai a ni ang, a muhìl thei nghâl mai a. Ka han ngaihtuah a, he laia nâ tawrh deuh tawp ai chuan Lunglei lam pan mai se ka tih lai chuan Zodina nî chuan," Amah hian a duh tlat lo va, 'Damdawi in pan atân zawng ka upa ve tâwk tawh alawm,' a ti tlat mai si a, tihngaihna tak pawh ka hre lo," a ti sap sap a, a rilru chu a hrehawm hmêl ka ti, ka khawngaih roh mang e.

"Khawnge Zodina hi?" 

In chung lam melh zoh pah chuan a han thaw hak a," A room-ah a inkhung reng mai a ni. Eng eng emaw a ti ri bur bur reng mai a, a buaithlâk khawp mai. Engtik tlai nge ni ka hre chiang ta lo, a rawn haw phei kha chuan a room dawhkàna a thil dahho kha a nih ngei ka ring, a tla ri rum rum mai a, a thinrim lungawi lo, inhrithla thil tih a nih ka ring deuh ngawt a, ngaihven tùrin ka pa lah han chho thei chi pawh a ni tawh mang si lo va, kei lahin ka ngaihven ngam mang meuh bawk si lo," a ti leh sar sar a.

"Han hmuh ve chhin ka tum dâwn em ni ang?"

"A lo hmu duh che pawhin ka ring lo, tûnlai tak hian a nungchang hi a thlâk hlawk zual niin ka hria, eng chu nge maw a thinrim chhan leh a lungawi loh chhan chu ni ang? Kan hau mang bawk si lo va," a ti leh a, a rilru chu a hrehawm hmel si a,  ka khawngaih roh tak tak a ni. A thinrim inhrithlà a nih chuan Jakob-a a ni ngei dâwn si a, Jakob-a a nih hlauh chuan a thinrim chhan lah ka hre chiang nasa.

A room kawngkhàr nghèng chuan ka ding vang vang phawt a, thãwm ka ngaithla pah deuh bawk a; mahse, hriat tùr erawh a vâng khawp mai, ani hi a awm lo a ni zâwk lo maw le? A hnu deuhah chuan kawngka chu ka kik ta dat dat a, a hming pawha ko duh lo chuan," Zonuni ka nia, khawngaihin, kawng min lo hawn teh," ka ti zui a, 'Jakob' tia ka koh chuan Zodina lo ni ta se, min hawn duh loh ka hlau deuh a, 'Zodin' ka tih chuan Zodina ni lova Jakob-a a lo nih leh si chuan a thin a rim leh nasa sauh dâwn tih ka hre sa kar bawk si, chuvàngin a hmingin ka ko lo tawp mai a ni.

"Haw rawh, ka hmu duh lo che, min ring lotu hi ka hmuhna chhan tùr ka hre lo," a rawn ti ta hmak mai. Um, Jakob-a a ni ngei e, hmuh ka duh zual sauh mai.

"Jakob, lo hawng teh, ngaihdam dìl che ka duh alawm."

Ka rin loh deuhin, ka inrin hma chuan a rawn hawng ta thut a, kan inhmachhawn ta ran mai, kik leh tuma ka kut ka lo lek chhoh lai a ni nèn, ben tuma tin uaih ka ang ngawt ang chu. A hmêl chu a bawrchhawr viau mai lehnghâl a, a lang hlauhawm thei lek lek hialin ka hria.

"Sawi rawh!"

Kawngkaah chuan a din tlat avàngin ka lût thei mai lo, en chho deuh pah hian," Eng maw ka sawi ang?" ka han ti leh hê hâw a, chutah, hriat theih loh khawpa zàwi hian a phun sup a, kawng chu a khâr leh zat a.

"Jakob, hawng teh, thil hrilh tùr che ka nei a nia."

"Sawi tùr i hriat loh kha," chhûng lam ațang chuan a rawn ti dût a, keichuan," Ka hria alawm, kawng i rawn hawng thut a, ka hamhaih a nih kha," ka ti lêt ve thung a, thãwm a rawn nei lo. Beidawn ka tum loh avàng leh tu nge luhlul zâwk kan hria ang chu ka tih rilrûk tlat avàngin luh chu ka dîl ngar ngar a, a tàwpah chuan a rawn hawng leh ta nge nge a, inher nghut pah chuan," Luhlulnu," a la ti sup zui, ka nui sak, ka haw teuh lo mai.

Room chu a lo hnawk deuh nuai mai a, a dawhkànah chuan eng thil mah a lo awm tawh lo, chhuatah chuan a let hût hlawm a, lehkhabu, woofer, a perfume leh tui bottle tih vêlho ka hmu chîrî nuai mai. Engkhaw sawi set set lo chuan ka han chhar khâwm nghâl a, a perfume leh tui bottle chu a lo keh lo hlauh a, woofer erawh a play theih tawh kher loh ang, ka rin dànin. Lehkhabu zîngah pawh chuan a phêk thlêr pawh a awm nual; mahse, țha takin ka dah khâwm a.

"Khâng chhar khâwm tùr khân i lo lût niin ka hre lo."

Muangchângin a lam chu ka hawi a, tukverh hnungchhawn záwnga dingin a kekawr ipte zenin a ding ngur mai a, a inthuamna chu a dum vek bâkah a lang bawrchhawr a, min melh kul mai bawk nèn, a lang hlauhawm ve thlâwt a ni; mahse, ka hlau tùr a ni lo, nichinah pawh luhlul zâwkah țangin hnehtu ka nih tawh kha tiin ka infuih ru sauh sauh a.

"A pawi ka ti khawp mai, ka thil sawi vàng khân min ngaidam rawh, khawngaihin?"

Che eih lo chuan," Eng thil nge i sawi a?" a rawn ti chher chhuai a, kei chuan," Zodina nuhrawn hãltu-ah ka puh che kha, kha vàng khân min ngaidam hrâm rawh," ka ti leh a, ka hlauh loh nân ka kut chu ka hûm ruh sauh sauh a.

"Ngaidam che pawh ni ila ka hàl a nih i ring reng tho ang."

A tidik tlat. Jakob-a lo hian tuin nge hãl tehlul ang? Zodina hi chu ka ring lo ve tawp a, amah lah chuan a inpuh hmiah mai bawk si a, Jakob-a hian țanpui a inti bawk a, kha thil kha Zodina'n a tih lai hre chhuak lo tùrin a taksa a luhchilh lai vël tak a nih ngei ka ring tlat a ni.

"Tu hàl nge ni ta ang?"

"Kha maw, min rin loh tawp kha, chhuak rawh, min ring lotu bula thil sawi hi a sâwt lo," vâwt raih hian a rawn ti leh ta a, a hmël chu a lang chang bèng bàwng viau mai lehnghâl a, thinrim tih hriat zetin min melh kul bawk si a, chhûngrilah ka khùr der derin ka hre hial mai!

Ka ngawih vang vang hnuah chuan insang marin,"Jakob, min ngaidam hrâm rawh aw, i thin ka tirim a nih pawhin ka hre thiam ang che. Khawngaihin, Zodina hi kalsan tawh teh, eng thil pawh lo ti ni se, hun kal tawh chu hun kal tawhin liam se, tûn hun hi pawimawh ber chu a ni si a, a awm dàn hi a khawngaihthlâk tawh êm mai," ka ti chhuak ta a, tlêm chuan ka thâwl deuhin ka hria.

"Eng mah sawipui suh, awmzia a awm chuang lo."

Ka hmui chu ka pet a, min chhànna chuan min tibeidawng mai tùr a ni lo.  Thil hrilh tùr pawh ka la nei alawm, a thinrim lai hian sawi chhuah a chî ang em?  Thinrim belh ta se, thil pawi zâwk a thleng ang em? A, ka dâwn thui mai mai...

"Chuan, thil pakhat hrilh che ka duh a, kei hi i duh rûk êm êm, Airport-a i hmuhnu kha ka ni lo, kha kha chu mi dang daih a ni. Ka khabe hnuaiah pawh khuavàng ka neih ve miah loh hi, kha nu kha chuan a nei a ni," ka tih chuan," Zodina ka kalsan theih nân eng hmanrua chiah nge rawn hman i tum dâwn a? Dâwt ka ngaina lo a nia," vâwt raih hian a rawn ti ve thung a.

*HO TÊA KAN NGAIH LEH KAN BUAI PHAH LOHNA TÙR NIA KAN HRIAT HI ȚHENKHAT TÂN CHUAN TLÛKNA LEH SUAL KAWNG ZAWHNA REMCHÂNG TAK A LO NI THEI*