☆THE SWEETEST HANDCUFFS☆ - 45 By Dingdi Pachuau

 ☆THE SWEETEST HANDCUFFS☆ - 45 By Dingdi Pachuau

"Dâwt ka sawi lo," ka lo ti vat a, ani lah chuan," Zodina ka kalsan theih pawh chu i lo duh àwm hlê mai, i tân eng nge a lo nih chiah a? Min bum tum hauh suh ang che. Chuan, Zodina ka kalsan theih nân dâwt min hrilh kher suh, hmanraw dang hmang zâwk rawh, min hneh thei zâwk mahna," a ti bung nghut a, a mitmengah chuan ka thu sawi a rin lohzia chu ka hmu chiang kher asin.

"Zodina hi i lo țanpui tawh pawh chu a ni maithei, a làwmawm ka ti khawp mai, i fel pawh ka ti; mahse, a taksa hmanga mi dang daih rawn khawsa ve țhìn si hi a tân a hrehawm dàn tùr hi i ngaihtuah chhin tawh em? I thil tih leh i awm dàn lah hi ani awm dàn leh nunphung nèn a inang hauh si lo, nang chuan a awm dàn leh nungchang hi chu i hre chiang viau tawh ngei ang, ani tân erawh chuan hmel hriat ngai loh, mi hrang daih i ni si a, a tân nunphung pângngai taka nun hman chu a har viau ngei ang le," ka han ti dap dap a, min en kur reng pah chuan," Ani awm dàn chu engah nge i lo ngaihven viau? I eng nge a nih?" a lo ti leh thung a, thinrim hmêl chu a pu hran lo va; mahse, hlim hmêl zawng a pu hauh lo thung.

Tunah hi chuan kan ințhen tawh a, a tân eng mah ka ni tawh lo. Ka bialpa hlui a ni a, ani tân pawh a bialnu hlui mai ka ni tawh a, kan inkârah awm a awm tawh lo, a tân erawh thil țha ka duhsak a, nunphung pângngai takin nung se, hlim takin hun hmang ve thei se ka duh bawk a ni.

"Ka mihringpui pakhat, țanpui ngai tak angin ka hmu a, tuna ka nun hman ang hian nunphung pângngai takin nung se, a nu chunga thil thleng avànga amaha inthiam lohna awm zawng zawngte hi paih bo thei se ka duh a ni, a tân eng mah ka ni lo va, ka tân pawh ka sawi tawh angin ka mihringpui, țanpui ngai tak a ni, chu bâk eng mah a awm lo," ka ti duah a.

"Ka kalsan theih i duh a... A nih leh, i tân eng nge ka nih chiah?" a rawn ti ve ta thung a, hei zet chuh, chhàn a har ta țalh mai. Ka ngawi deuh reng phawt a, fîmkhur takin chhànna tùr ka ngaihtuah phawt a ngai. Dik taka ka chhàn tawl chuan a thinrim ang a, kalsan duh lovin a hma aia nasa zâwk hian Zodina tân buaina a thlen palh ang tih ka hlau.

"Ka rilru i tina hlê mai," a ti sup phawt a, chutah, a room kawngkhàr chu a va hawng a," I chhuak thei ang," a han ti zui nghâl bawk a, a chêt dàn teh thut avàng chuan ka hamhaih deuh hlek a, ka en deuh hau nghe nghe; mahse, ka harh chhuak vat a," Jakob, dâwt ka hrilh lo che, min hai vàng a nia, ni-a min hriat kha ka ni lo, khawngaih takin, thinrim lo hrâm teh, ka hriat chhuah veleh khân hrilh tùr che ka nih tehlul nèn, min ngaidam hrâm dâwn nia," ka ti sawk sawk a, ani lah chuan," I chhuak dâwn nge ka chhuah luihtîr dâwn che?" a lo ti daih thung a, a mitmeng chu thinrimna hlîrin a khat tawh a, a hmêl pawh hmuh a nuam fahran lo, a lang hlauhawm tawh tlat.

"Jakob, ka thiam loh vek--"

"Ngawi tawh rawh!" a rawn ti chhuak leh hrâwk a, a awki chu sàn lo tùrin a insûm nasa bawk a ni ang, a kut chu a hûm ruh tlat a, a țawng chhuak pawh a zàwi deuh rêng bawk a; mahse, a sehchilh nak thung. A thin a rim hmel êm avàng chuan thil dang sawi leh zêl chi niin ka hre ta bîk lo va, a room ațang chuan ka chhuak zui ta a, ka chhuak chiah tihah chuan a room kawngkhàr chu a khãr nghâl țhuai a, ka phu zawk nghe nghe. Chutah, eng emaw hi a tla ri chher chhuai a, ri dangin a chhunzawm zui nghâl a, a dawhkàn chunga ka thil dah țhatsakho kha a vai thla a nih ngei ka ring.

Duh leh vai thla vek rawh se, thinrim avànga hetianga chêt lâk chîng hi ka  ngaina lo, a awm dàn hi a țha lo ëm mai. Thu dik erawh ka hrilh hman tawh tho a, pawi ka ti lo, ka tih tùr pakhat ka ti tawh a, hun han kal leh hret se, a thinrim a reh deuh ta maw tihah ka la be leh ang chu.

In hnuaia ka chhuk chuan a nï chuan hlauhthàwn hmèl tak hian min lo en reng a," Eng thil nge thleng leh ta?" a lo ti sar sar a, kei chuan," A pawi ka ti hle mai, ka tithinrim zual niin ka hria; mahse, a reh leh vat tùrah ngai ila, ka la rawn be leh dâwn nia," ka ti a, ani chuan," Nia, a reh leh thuai ang, inthiam lo duh rêng rêng suh," a lo ti ve thung a. A pa a muhìl tui siai siai bawk si a, tih tùr ka nei ta bawk lo nèn, kei pawh chu ka haw zui ve ta nghâl a.

Ka rilru chu a nuam fahran bîk lo. Jakob-a rilru ka tihnat bâkah a thin ka tirim hlê si a, tunah chuan hmuh pawh min hmu duh tawh tawp lo ang le. Zodina nuhrawn chunga thil titua ka rin chhin lah khân a thin a rim viau tawh bawk a, kei hian ka lo ring dik chiah lo pawh chu a lo ni maithei, ni lo, a dik ngei ang, Zodina tih hi a nih ka ring thei hlawl lo, thinrim viau pawh ni se a ti thei lo ang. Jakob-a hi a thinchhia a, a thinrim thinbutut chhuakin inngaihtuah chiang hman lovin a ti a ni ngei ang, a tih a nih pawhin mi dang hmuhah chuan Zodina tih a ni vek dâwn tho, a pâwn lam lan dànah Zodina ni dáwn miau hek le. 

A thinrim vangin kei hi chu min hmu duh lo mah se a pawi ka ti vak lo; mahse, Zodina tal hi kalsan duh se chu ka ti, mihring nun pângngaiin hun a hmang ve thei tawh dâwn asin, a nunhlui chu engtiang pawh lo ni se he a natna vei rûk hian han kiansan phawt se chu chu a țha a ni mai, chu chu ani pawhin ka laka a beisei pawh a nih kha, ka țanpui theih kha a beisei tlat a nih kha.

"Kob-a nèn khân in inkârah eng emaw kha a awm ve deuh khân ka hria a; mahse, hei a reh ta riau mai, inhauhna deuh in nei em ni?" tia Kimi'n min zawh chuan," Ni mai ang chu, a thin ka tirim a, a duh loh zâwng tak thil ka sawi a," ka lo ti ve a, ani chuan," A nih tak chu, a zia lo hle mai, in inhmeh reuh ka tih tehlul nèn," a ti leh a, a hre ve ta rau rau bawk a tiin kei chuan," Hrilh che kha ka tum ve ràn rán a; mahse, hetiang hi kan ni leh ta sia, ka hrilh duh ta lo che a nih kha, i thin a rim loh hrâm ka beisei," ka han ti ve leh a, ani lah chuan," Engah nge ka thin a rim ngawt ang? Thinrimna chhan tùr a awm hleinem," a lo ti vat thung a.

Zodinate inah chuan ka kal zauh zauh lo thei lo. A pu ka chiu zauh zauh a ngai tlat si a, chhùn lamah U Ropuia chu a han kal ve zauh nain min rawn koh hun hi chawhnu lam a ni tlângpui a, chu pawh U Ropuia haw tawh hnu lamah. Ka chìu loh chu Pu Zuala hian a duh mang tlat lo va, U Ropuia awm remchàn ve lai pawh hian keimah zâwk hi ka kal leh nge nge țhin. A upa ve tawh a, tlêm lai deuh ațang khân a hrisël lo chho ta riau nèn, rei tak a dam pawh hi ka ring ta vak lo, hmunpui lam pan hi vawi khat kha chu ka sawipui tawh ngei a; mahse, a duh tawh lo ni berin ka hria, ina thlamuang taka a tu leh fate enkawlna hnuaia awm hi a duh zâwk a ni ang e. 

Zan khat chu Remsiama leh Nunmawiate nèn kan nuihho dar dar lai chuan rin loh deuh hian Jakob-a a rawn lût ve hlawl mai a, a inmèh fai loh a a rei ve deuh tawh a ni ang, a lang bawrchhawr zual kher mai. Ka lo chiauau vat a, Remsiamate pahnih pawh chuan an lo be ve luam a, rin loh deuhin ani pawh chuan pângngai takin a lo chhâng ve lêt ve mai bawk a, a thin a rim tawh lo a ni maithei. a pu chanchinte chu ka zâwt luam a, a zia thuin min lo chhâng leh mai a.

Haw hun pângngaiah Remsiamate chu an haw a, ani erawh chu a la țhu ngar mai a. Remsiamate an haw tawh si a, han titipui mai tùr chu a vâng țan ta riau, a dam ţhat leh țhat lohte chu ka han zâwt kual ta vêl mai mai a.

"Zodina nu kha ka hàl a ni lo," a rawn ti chhuak daih thung a, ka en vat a, ani pawh chuan min rawn en ve rân a, a vawi hnih nân," Ka hàl a ni lo," a rawn tinawn leh a, kei chuan," Thu dik a nih chuan a țha a nih chu, a nih, tu tih nge i hria em?" ka lo ti vat a, ani chuan," Ka sawi kher a ngai lo," a lo ti thung a.

Kei erawh chuan hriat chian ka duh avàng chuan,"Zodina hàl ni khân i sawi a, i hàl a nih si loh chuan Zodina hàl chu a ni ta tihna a ni maw?" ka ti leh a, ani chuan," A chunga ka thinrim vàngin ka sawi mai a nih kha, nang hi ka duh che tih hre rengin a lo inrawlh ve tlat a," a lo ti sup a, a tih a ni lo tih chu a sawi tawh ngei mai a; mahse, Zodina tih a nih leh nih loh a la sawi chuang miah lo.

"A chunga i thinrim vàngin dâwt i sawi ta a?" 

Ani chuan," Nang ka chàn lohna tùr leh ka hum theihna tùr che a nih phawt chuan eng thil mah tih hreh ka nei hleinem," a lo ti leh a, chiang lehzuala min enin," Nang pawhin Zodina ka kalsan theih nân dâwt sawi pawh i huam ve tho kha, kan inkawp lai rengin ani kalsan tùrin min ti thei a nia, ka rilru pawh i tina viau a ni, i tãn hian a lo hlu hlê a nih ka ring ta bawk, eng vàng nge? Sawi tawp rawh, thinrim viau pawh ni ila i chungah eng thil mah ka ti lo ang," a ti ta duah a.

Ka ngawi vang vang phawt a, ka mit chu ka han khap sak sak a, chutah," Jakob, a hmaa ka hrilh che kha thu dik tak a ni, ni-a min ngaih tlat, Airport-a i hmuh kha keimah ka ni lo, ka phìrpui Mami a ni zâwk," ka ti chhuak leh ta a, ka thil sawi chu dâwt a ni lo tih ring se tih ka duh êm avàng chuan hmun dang ka melh sawn duh bîk lo, a mitah tak chuan ka en lêt ve kar a.

"A finfiahna i hmu duh em? Ka hmuhtîr ang che," tiin ka phone chu ka han hmet êng a, gallery-ah lûtin Mami nèna kan thlalãk chu ka han hmet chhuak te te a, ka phone chu ka han pe zui a," 'Zonun' tia min koh khân mak ka ti deuh rêng nghe nghe a, tu mah hian khatiang khân min ko ngai si lo va," ka ti zui a, ani chuan phone-a thlalâk chu a han en vang vang a, a hmêl chu ka lo en ve reng a; mahse, a ngaihtuahna àwm ka hre thei lo.

Ka phìrpui ni bawk, ka u ni bawk Mami kha keini a chhûngte chuan 'Mami' tiin ko țhìn mah ila mi dang hi chuan 'Zonun' tiin an ko ve fo bawk a, kan hming hi a inang viau, kei hi Zonuntluangi ka nih laiin ani kha chu Zonunmawii a ni thung. Phìrpui tih takah, kan inang hlê a, min hai ve fo rêng bawk a ni.

"Engtin nge a nih theih?!! A mak hlê mai!" Thlalãk ațang chuan a mit chu a la sawn hlei thei lo ni berin ka hria. Ka inthiam lo ru ve tho a ni, ka hriat chhuah țantirh khân lo hrilh nghâl ni ila hetianga thui hi chuan kan buai lo maithei si a.

"Hmêlah na nâ nâ chuan kan inang viau a ni, chutih lai erawh chuan, ani'n pawnfèn a ngainat viau laiin, kei chuan ka fêng ve ngai lo tluk a ni, bâkah thuamhnaw vâr i ngainat tluk zetin ani pawh khân a ngaina bawk, han en chiang la, a khabeah khuavàng a neih chiah kha tiraw? Kan khuaa i rawn kal laia thlalâk min dil kha i la hria em? Kha kha Mami thlalâk a ni a, a khuavàng pawh a lan chian viau kha," ka tih lai chuan," Hei hi edit chu a ni si lo va tiraw?" a rawn ti ta sup a.

"Ni lo ve, edit a ni lo."

"A nih, ani chu khawiah nge a awm tâk?"

Hei zet hi chu chhàn ka hreh ve asin; mahse, thu dik tak hi a châng chuan sawi hrehawm ve deuh ţhìn mah se sawi chhuah loh theih a ni lo.

"Accident-ah a boral tawh a ni." 

Chechàng lo chuan thlalâk chu a en reng a, sawi nuam tak chu ni lo mah se sawi chhunzawmin," Kum a lo liam tam ve ta, ka unau neihchhun a ni a, a boral kha kan tuar thiam lo viau nghe nghe a ni. Min hre thiam la, kha thil ka hriat chhuah ațang kha chuan i lakah hian rilru ka pe thei tawh lo va, hlatsan che ka tum ta ngar ngar a, i duh tak kha keimah hi ni lovin ka laizawn Mami zâwk a ni tih hrilh che kha ka duh viau laiin ka hrilh hreh êm êm bawk si che a, tûn hun hi ka lo thleng ta a ni," ka ti sap sap a.

Ka phone-a tui far thla ka hmuh chuan makti zet hian ka en chho a, a mit ațanga lo far thla a ni tih ka hmuh phei chuan mak ka ti lehzual. Jakob-a mit ațangin mittui a far nia! A mittui a lo tla ve thei a nih chu! Thil mak tak a ni.

"I laizawn thlalâk i neih zawng zawng min lo thawn vek teh."

*PATHIAN TEL LOVA HLAWHTLINNA KAWNG ZAWH HI CHUAN REI A DAIH LO, BEIDAWNNA A LO CHHUAK A, A TÀWP CHU BORALNA MAI A NI*