☆THE SWEETEST HANDCUFFS☆ - 46 By Dingdi Pachuau

 ☆THE SWEETEST HANDCUFFS☆ - 46 By Dingdi Pachuau

Mami kan vui liam nîa ka pa mittui tla bâk kha chu mipa mittui tla hi a takin ka hmu leh tawh hauh lo va, mipaah pawh inla pà ve tâwk tak, ngêng ve zet Jakob-a mittui tla hi hmuh ka la inring chhin ngai lo, ka rin loh bâkah ngaihtuah pawh ka la ngaihtuah ngai hek lo; mahse, hei ka hmaah ngei, a tak ni ngei si chu ka hmu ta a nih hi. Mak ka tih êm avàng chuan ka en reng ringawt a, țawng tùr pawh ka hre lo, ani pawh chuan ka phone-a Mami thlalâk chu mit la sawn lêk lo chuan a la en  reng a.

"A pawi ka ti, ka hriat țantirh khân hrilh tùr che ka nih tehlul nèn," ka ti sap ringawt a, ani erawh chu a la ngawi reng a, chutah, phone chu dahin a tho thut a, a chhuak zui ta nghâl a. A mittui a tla a, min tihhrilhhai tawh nâklaiin, țawng hauh lovin a chhuak zui leh ta vut a... Min tihamhaih zual a, chêt nachâng pawh ka hre lawk lo rêng a ni, ka hriat chhuah meuh chuan ka chhuak ve vat a; mahse, a mawng phê pawh hmuh tùr a lo awm tawh lo, țawngkam țha pawhin ka thlah lo chu a ni tak si a.

Rilru khingbai zet chuan mu tùrin ka inbuatsaih a, hmun ka phiah fel hnu chuan ka intifai leh tê tê a, khum ka pan chauh. Ka mu tùr ka țawngțai dâwn chiah tihah chuan message tone a rawn ri dat a, ka han en leh rih a, Jakob-a niin  *I laizáwn thlalâk i neih zawng zawng min rawn thawn teh*  tih tê chauh hi a lo ni a. Țawngțai ta rih lo chuan thlalâk chu hmet chhuakin ka thawn ta vek a, kan khuaa ka hàwn khân thlalâk computer-a ka dah luh ka la chhuak nual kha a ni a, ka vànnei ta hlauh a ni.

Ka muhìl thei lawk lo va, Jakob-a chu ka hrilh ta chu a ni a, ka rilru pawh zãng hawk tùr a nih tehlul nèn, a zãng hawk chuang hauh lo, a hma aiin a rit zâwk mah em maw ni tih tùr a ni. Jakob-a rilrua a thawh dàn tùr ka ngaihruat thiam chiah lo va, a âwih ngei chu ka ring, a mittui tla kha Mami thih thu ka hrilh vàng kha em ni ang? A tuar viau tihna a ni thei ang em? Mipa mittui hi chu a tla ve mai mai ngai si lo va, mak ka ti viau lo thei lo a ni.

Mi rethei an ni lo va, chhûngkhat laina hnai an ngah bawk a ni ngei mai, Pu Zuala damlo rawn kan tùr chuan hmun dang ațangin an rawn kal khâwm țak țak a. Kimi nèn kan va kan țum pawhin an kawtah motor pathum lai a lo inhûng a ni, haw leh daih ka duh hial a, chhûngkhat hnai leh țhiante awm nual laia lo lèn ve kha nuam ka ti chiah lo a ni.

"An va tam hmèl ve aw..." ka ti sap a, ani chuan," Hmun dang ațangin an rawn kan nasa a nih chiah hi, chhûngkhat țhenrual ngah an ni bawk a,  a àwm reng mai. Zodina pate hian an rawn kan ve ang em le?" a lo ti sap sap bawk a, luh nghâl tâwng kan hreh deuh avàng chuan pâwnah chuan kan han tãwikhawmuang leh rih a ; mahse, Zodina nîin min lo hmu ta hlauh a, min ko a, kan lût zui ta a ni.

Zodina ka hmu hauh lo va; mahse, in chung lama a awm khiau ka ring, Zodina emaw Jakob-a emaw pawh ni se, an hun tawn mêk leh tuna mikhual awm deuh luih luih hi chu a inhmeh lo khawp ang le, mahni chauha fianrial taka inngaihtuah cheuh cheuh an duh ber ngei ang.

Pu Zuala pawh a harh țha ve reng, Kimi nèn min lo hmuh phei chuan kan kan avàng chuan làwmthu a lo sawi chiar chiar a, Zodina nîin theitui vâwt min rawn pe dùn vat a, ka han in chiah chu ka pum a vâwt thla raih raih thei hial mai, a vawt tui bawk si a, min tidài nghâl sawng sawng nèn, Nipuiah chuan a tihchi viau dâwn a lo nih hi.

Damdawi ina awm a duh bawk si lo nèn, pu ber damlo ta chu khualkhua ațangin an rawn kan ruih ruih reng a, Zodina pa beng hial pawh a thleng lo thei bîk lo va, a rawn lang ve ta. A fa upa ber a ni bawk a, pastor hial a lo ni bawk nèn, a unau dangte ai chuan khuaa mite pawh chuan an welcome bîk riauin ka hre ngawt a. A nupui fanute rawn lang tel lovin amah ngâwih a nih avàng erawh chuan thil awm dàn ni thei àwm chu ka lo suangtuah ve lo thei lo va, Zodina nèn eng angin nge an indawnsawn ang tih mawlh chuan ka ngaihtuahna a luah hmasa ber a ni.

Mi kâ ațanga hria ka ni a, Pathianni chhùn inkhâwmnaah thu a sawi avàngin ka hmu lo thei lo va, Zodina pa chu ka hmu ve ta a ni, Zodina erawh ka hmu chuang lo. Zodina nèn an inangin pafa an ni ngei ang tih a hriat hliah hliah a, a hmël lang upa ve deuh tawh mah se pa hmêl chhe lo tak a ni tho tho, tét pawh a té hran lo. A thu sawi chhûng zawng chuan Zodina'n an chhûngkaw chanchin min hrilh kha ka ngaihtuah chhuak lo thei lo va, tûn hnuah hian hmâna a nupuiin a rinawm lohsan chungchâng kha a hre chhuak ve tawh ang em tih mawlh chu ka lo ngaihtuah a, a fapa hian a nupui rinawm loh lai a hmuh avànga a rilru natzia leh hrehawm a tihziate, chu vànga tuna a natna vei mêk hian a luhchilh a ni tihte hi a hre chhuak ve tawh em? Nge a la hre lo tluang zêl? Thil thlen hun kha a rei tawh deuh bawk a, an theihnghilh tawh zâwk em ni ang? Mahse, ka ring meuh si lo. A nupui chunga a fapa thil tih chu a theihnghilh ta zâwk nge, a la hre reng ang a, tuna a rawn kal pawh hian a fapa chungah chuan a thin a la rim reng zâwk ang? Chutiang thil chu ka lo ngaihtuah kual ve vak vak a, a chhànna ka hre chhuak chuang hauh bawk si lo.

Fapa upa ber thu chu a hnial thei ta bîk lo a ni ngei ang, a tûk Thawhțanni chawhnu lamah chuan Pu Zuala chu Aizâwl lam pan tùrin an phur phei ta a, in lam ngaihtuah a țùl ve tho avàng chuan Zodina nî chuan a zui thei lo va, Zodina pawh a kal lo. Zodina ka hmuh theihna hmanrua ber a pu Aizawl lama a phei tâk avàng chuan an ina kalna chhan tùr ka nei ta si lo va, a chanchin pawh ngaihven ru viau mah ila ka hre thei lo va, hmuhna hun lah ka nei thei ta hauh lo mai.

Mahse, zan khat chu a rawn lang leh hlawl mai a, Zodina erawh a ni lo va, Jakob-a zâwk a ni, a chèr rohzia chu, a hmêl han hmuh chiah chuan khawngaihna rilru a rawn piang lo thei lo. A hmêl chu a tla deuh dâk a, a mit khur pawh a thûk, a mit hnuai chu a dum phei val kulh a, mut a hmu țha lo tih a hriat ngawih ngawih.

"Inhmuh loh chhûng a rei vang vang hle mai," ka ti ringawt a, ka nui lui sak a, ka nuih erawh a za hauh lo. Ani erawh chuan," Rawn hmuh che chu ka duh țhìn; mahse, ka ngam lo a ni, nang ka hmuh che chuan i laizawn ka hre chhuak lo thei dâwn si lo va, beisei tùr awm hauh lo beiseia ka lo nun reizia ka hre chhuak a ni; mahse, chuti chung  chung chuan nang chuan ka rilru hrehawm tùr ngaihtuah rànin i laizawn angin ka hmuhah nun i hmang char char a, i rilru hrehawm dàn tùr leh ka lo tihhrehawmzia che ka ngaihtuah a, i chungah hian làwmthu sawi ka duh a ni. Ka lâwm e, nun pângngai pawh hmang hlei thei lovin kei hian ka chhaih buai che a, chuti chung chuan ka chungah thinrimna i lantír ngai lo va, i tân min pawm a harsat tùrzia ka ngaihtuah a; mahse, chuti chung chung chuan ngilnei takin min chhàwn zêl a," a han ti dap dap a, makti takin ka lo en reng ringawt. Chutiang thu chu a ka ațanga a chhuah hi ka ring lo va, ka beisei hek lo; mahse, a chhuak miau si, thu dik ka hrilh khân a dêng danglam vek a lo nih dâwn hi.

"A pawi ka ti, țanpui theih che ka duh a, hnem theih che pawh ka duh--" ka la tih lai mêk chuan," Mi ţanpui nia ka lo inhriatna hi thil dik lo mai a ni tih pawh ka hre chhuak tawh. Țanpui ahnêkin ka lo tibuai mai a lo ni," a ti leh a, kei chuan," Ni lo, Vâlpuia pawh i țanpui kha, i chungah a lãwm teh asin, i chanchin sawi pawh kha nuam a ti viau a ni," ka lo ti vat a, a nui suk a, a nuihzat lohzia erawh ka hre chiang.

"Nang hi tawng lo che ila chuan engtin zêl nge ka hun hi ka hman chhoh ang ka hre lo; mahse, tunah chuan ka tih tùr ka hre chiang tawh a ni. I chunga ka chêt dàn țha lo zawng zawngah khân min ngaidam ang che. I thei lo a nih pawhin i laizawn Zonuni hming talin min ngaidam  hrâm ang che. Ani kha ka dam chhan, he khawvêla siam ka nih chhan a ni si a, a tel lova hringnun hman chhoh zêl chu suangtuah ngam lo mah ila a thlarau ka zah êm êm si, a tel lo chuan hlim nî ka hmu ngai dâwn si lo," a ti leh ta koh koh a. Ka khawngaih roh kher mai, Mami a lo duhzia chu ka hriat chian phah zual a, a tel lova nun hman a huphurhzia pawh chu a lang chiang viau a ni.

"I laizawn ni lo mah la, amah anga nun min hmanpui kha ka ngaihlû a ni, hlim takin hun rei tak ka hman theih phah a, ka lãwm tak zet a ni. Tûn hnuah chuan ka tibuai tawh miah lo ang che tih rawn hrilh che tuma lo kal ka ni, ngaihngam takin awm tawh rawh. Khua ațang hian ka chhuak ang a, i laizawn thlàn chu ka tlawh ang a, chuan, ka kal bo vang vang tawh ang," a ti leh a, kei chuan," I chhuak dâwn maw?! Engtikah maw?" ka lo ti vat a, ani chuan," Naktûk khian ka tum. Ka chhuah hma leh Zodina a zalèn hma dâwn tihna a ni mai, chu chu i duh tak pawh kha a ni lo'm ni? Min ngen lawm lawm kha?" a ti leh a.

Zodina a zalèn thei tawh dáwn maw?!! Tak tak a ni em?! Mit khap hauh lo chuan ka en reng a, ani chuan," Ka chhuah hma a țha, ani pawh rilru dam takin hun a hmang thei tawh ang, rilru hahna tùr a nei tawh lo, hlim takin hun in hmang dâwn nia, ka kal tawh ang e," a ti a, a ding nghâl uaih a. Kei chuan," Engtin maw?! Zodina chu engtin nge rilru dam takin hun a hman theih ang? Hun kal tawha a thil tih chuan a vaw lêt zêl lo thei si lo," ka lo ti ve leh thung a, ani chuan," A nu chunga thil thleng kha a tih a ni hleinem, a titu sawi chhuah kher a ngai tawh lo ve, tihpalh vànga thleng a ni si a," a ti leh mai a.

Kawngkaa a chhuah dáwn chuan a ding leh vut a," Kan inhmu leh tawh àwm si lo va, a tàwp nân vawi khat chauh ka kuah thei che ang em? Vawi khat chauh, ka thlah nân che?" a han ti sup a, tlêmin ka tîm deuh hlek a; mahse, a tàwpna tùr a ni tih leh Zodina a zalèn theihna tùr a ni tih ngaihtuah chhuakin," Aw le," ka ti sep a, muangchâng hian min rawn kuah ta dà dá a.

"Kuah châk eng ang mah ila, engtikah mah Zonuni dam lai chu ka kuah thei ngai tawh dâwn si lo, a laizawn tal ka kuah hian nasa takin min hnèmin ka ring," a ti sup sup a, min thlah hnu chuan," Ka lãwm e, tunah chuan ka mang țha tak tak tawh ang che," a ti leh a, min enin a han nui lui leh sak a," Mang țha le, kumtluang atân," ti leh supin a chhuak zui ta nghâl a, chhâng lêt ve lo chuan ka en zui reng ringawt. Tunah pawh khân a mittui a parawl chiang a ni, ka khawngaih roh mang e. Chutih rual chuan Mami vànneihzia chu ka ngaihtuah a, a thih hnuah pawh tihtak zeta hmangaihtu a nei si a, a vànnei tak zet a ni; mahse, Jakob-a erawh kha chu ka khawngaih a ni.

*HLAWHTLINNA HI ZIR CHHUAH TAMAH NI LOVIN THAWH CHHUAH TAM LAMAH A INNGHAT ZÂWK. VAWI TAM TAK HLAWHCHHAMNA AȚANGIN HLAWHTLINNA HLUTZIA TAK TAK A LO LANG ȚHÌN*