☆THE SWEETEST HANDCUFFS☆ - 47 By Dingdi Pachuau

 ☆THE SWEETEST HANDCUFFS☆ - 47 By Dingdi Pachuau

Ka han ngaihtuah chiang a, Jakob-a kha a kal bo tawh dâwn tihna a ni chiang mai, chuti a nih chuan Zodina taksa chu rawn luah tawh lovin a kalsan tawh dáwn tihna a nih chu, a va làwmawm dâwn êm! Zodina min beiseina chu tihhlawhtlinin a awm dâwn ta, chutah, rilru hrehawm rêng rênga nun a lo hman tawhna zawng zawng chu a tân mangchhia mai a ni tawh dâwn, a tih emaw a lo tih ve char char  a nuhrawn hãltu lah chu amah a lo ni hauh si lo, hrilh ka va châk tawh tak! Nun pângngai takin a nung ve thei tawh dâwn asin, chu bâka thu làwmawm chu a awm thei dâwn chuang em ni?

Jakob-a chu ka ngaihtuah chhuak leh zat a, ani chuan kumtluang atân min mang țha ta a nih kha. Vawi khat mah kan inhmu tawh dâwn lo tihna, chutiang thil ka ngaihtuah chuan ka rilru a hnîm ve deuh ruih thei a, a chhan pawh ani kha rilru hlim takin a kal bo dâwn si lo, a duh tak emaw min tih laiin a duh tak laizâwn ka lo ni zâwk si a, chu chuan a țhàwn dáwn tehlul nèn, a duh tak thih tawh thuin a han dêng zui leh zat a nia... Nun pângngai tak a hman theih nân Zodina taksa chu kalsan se ka duh alawm; mahse, nichin lawka kan ințhen dàn kha chu ințhen dàn hlimawm leh lungawithlãk chu a ni lo; mahse, thil thleng kha eng mahin a tidanglam thei lo, a hmangaih êm avàngin Mami kha thlàn ațangin kan ko lêt leh thei tawh lo. Mittui parawl chungin min thlahna thu kha a sawi kha a nia, hrehawm a tih vezia kha, ka khawngaih thar kher asin.

"Mang țha le, Jakob. I tân tih theih neih ka châk hle mai; mahse, tih theih ka nei hauh si lo, i hma lam hunah hlimna tam takin hmuak che se la tih hi i tân ka țawngțaina ni rawh se. Ka laizáwn Mami i hmangaih avàngin ka lãwm e, kei pawhin ka hmangaih asin, ka hmangaih i lo hmangaih ve avàngin mi vànnei tak a ni, a vànneihzia leh hmangaihtu țha tak a neih thu che hi han hre ve teh hlauh se aw... ani pawhin a hmangaih ve ngawt ang che, thih hnu piah lam ramah inhmangaihna hi a lo la awm reng a nih ngai chuan Mami nèn hlim taka in awm dun theih ngei ka beisei, i duh tak 'I Zonuni' ngei chu duh takin i kuah thei tawh ngei ang," tiin ka phun sap sap a, zàn a rei ve deuh tawh bawk a, thãwm hriat tùr awm lovin a reh vawng vawng mai.

Jakob-a chu a kal ta ngei a ni ang, hmuh zui tùr awm lovin a reh ta vang vang a. A sawi ang ngei khân Mami thlànah kalin Zodina chu a kalsan ta em tih chu hriat ka châk a, zawh tùr ka hre hauh bawk si lo. Thu dik tak ni se, Zodina rawn ni tak tak se chuan a rawn haw a hun tawh bawk si, eng nge thil awm dàn dik tak hi ni ang aw?

Thu dik a sawi ngei em tih hre fiah tùr chuan kâr tàwpah kan khuaah chuan ka haw ta ringawt a, ka haw tùr thu chu ka nute pawh ka hrilh lâwk lêm lo. Ka va thleng thut chu mak an lo ti viau nghe nghe a, an mak ti hmêl kâra hlimna hmél lo lang tel chu hmuh nuam ka ti tak zet. Min ngai a, min thlahlel a, Mami awm loh hnu ațang phei kha chuan min thlahlel zual a ni tih pawh ka hria.

Ka thlen tlaia Mami thlàn tlawh nghâl rum rum chu ka duh viau laiin ka nute ngaihțha lo tùr bula insawi fiah chiam ka peih loh avàngin ka insûm hrâm hrâm a, Jakob-a chu a kal ngei em tih mawlh chu ka ngaihtuah lo thei lo, a tûk Pathianni chawhnuah chuan phûr zet hian ka inkhalh chhuak a, kawnga ka tlàn lai chuan ka ngaihtuah a, engtin nge Jakob-a kal ngei leh kal ngei loh chu ka hriat theih ang? A ke hniak ka zawng dâwn em ni?  Kal ngei pawh ni se engtin nge ka hriat theih chuang ang? A lo la țhu reng te a nih ngawt loh chuan... Ã ka inti ta viau mai. Ka phùrna pawh chu a reh nghâl rawih rawih maiin ka hria; mahse, amah ngeiin kal a tum thu a sawi kha, dâwt a sawi lo tawp ang.

Thlànmual chu ka thleng thuai a, ka tlãn zêl a, Mami thlàn dinna zâwnah chuan ka ding ta a, Scooty ațanga chhukin Mami thlànlung dinna lam  chu ka pan thla chhat chhat a, a thlànlung nghènga pangpâr vâr, a fresh ngei lo inkhâwi ka hmuh tâkah chuan ka ding ta chat mai! Pangpár khu tu dah nge? Ka nute'n tûn hnaiah thlàn hi tlawhin an dah em ni ang?  Ni lo, ka rilruah Jakob-a a rawn lang vat a, Jakob-a'n thlàn hi a tlawh a ni chiang, a dah a ni ngei ang, amah ngeiin a sawi kha.

Pangpâr chu ka han khawih chhin a, tui nèna khàwi a nih vàng chuan a lo la chuai lovin a la pâr parh țha hle a, chutia ka khawih chêt deuh avàng chuan a rim a rawn chhuak a, a rim pawh a tui viau mai. Pangpâr hi mawi chu ti ve tho mah ila, a hming hrang hrang hi ka hre ve hran lo va, tuna mi pawh hi a hming ka hre lo, mawi erawh ka ti viau. 

Thlànlung dum tliang hluaua Mami hming, rangkachak rawnga inziak, hawrawp mawi zet chu ka han thlêk a, chutah, a thlâ ziah kài, a nui sâng hmêl chu ka han thlêk leh vang vang a. Jakob-a chuan a hmu ve ngei àwm si a, a rilru a na thar ngawt ang chu, Mami hmêl chu mittui tla pahin a chûl ngei bawkin ka ring.

"Mam, a rawn kal tiraw? A rawn kal tih ka hria. I thlàn tlawha tlangvâl khawngaihthlâk tak rawn kal kha i lo hmu tiraw? Nangmah emaw min ti a, min ngainat phah viau asin, kei pawhin ka ngaina; mahse, nangmah ka ni si lo, a hmangaihin a duh lutuk che asin, i bulah a rawn țap ngei ang tiraw? Tlangvâl sual a ni miah lo, ka chungah pawh a fel lutuk, pangpâr pawh hi i tân liau liaua rawn dah a ni tiraw? A khawngaihthlâk asin, ka khawngaih tak zet a ni," tiin Mami chu ka be sap sap a, thãwm dang hriat tùr a awm lo va, thli thãwin thing hnah a chhèm rîk seng seng bâk chu, a reh vawng vawng mai a ni.

"Ka lo tlawh khât deuh che a, min ngaidam dâwn nia, i kalna ramah chuan nuamti taka i awm ka beisei, Jakob-a kha a awmna apiangah lo en zui la, a dam chhûng zawnga hlim taka hun a hman chhoh theihna tùrin Pathian hnênah khân lo dìlsak ang che, nangmah ngai rêng rênga hun a hmang tùr hi ka duhpui lo a ni, a tân hlimna lo dìlsak hrâm ang che, in pahnihin ka ngai hlê mai che u, ka kawm ngeih ve ve in ni a, he khawvêlah hian zawng, kan inhmu ngai tawh dâwn si lo," ti leh malh malhin, thlànlung chu ka chûl ka chûl a, Jakob-a pawhin ka chùl ang tho hian Mami be paha a chùl ka ring.

Ina ka haw chuan ka nu hnênah a thuphungin tûn hnaiah Mami thlàn a tlawh leh tlawh loh ka han zâwt a, ani chuan a tlawh loh thuin min lo chhâng a, ka lo bu nghat a, Jakob-a chuan thlàn chu a tlawh ngei a, pangpár dahtu pawh amah Jakob-a ngei a ni tih ka hriat chian phah ta. Ngaihawm rilru viau mah se a thil tih avàng chuan mi pakhatin a nunhlui aţangin zalènna a hmu thei dâwn ta si a, amah leh a thil tih hi ka theihnghilh thei tawh dâwn lo a ni.

Khuaa ka lêt leh hnuah pawh chuan Zodina chu a lo la haw lo ta fo a, a pu chanchin ngaihven paha Kimi nèn an ina kan lèn țumin a nî chuan a chanchin chu a rawn sawi chhuak ta hlauh a, a pu kan tùrin Aizâwl lamah a phei a ni àwm e. Thênzâwla Mami thlàn a tlawh lai kha chuan Jakob-a a la ni ngei àwm si a, amah Zodina dik tak a rawn nih leh hunin a hawi buai viau em le? Thênzâwla a awm lai a nih phei chuan, a hre thiam lo leh ngawt ang.

"Kob-a hi chuan a pu hi chu a ngaihven lo thei lo a ni, hetia a va kal ve pawh hi a àwm viau, kum tam tak lo enkawla kawng engkima lo kaihruai țhintu a pu ber a damlo miau si a, a thlahthlam theih kha a rinawm lêm loh a ni," Kimi'n a tih chuan," Ni e, a pu pawhin a lo ngai hman tawh viau ang," ka lo ti ve a, kan haw tawh a, kawngah kan kal mêk a ni.

"An inngai tawn viau asin, a pu hi țawng thu chhe loah lo boral ta se, Kob-a hi a khawngaihthlâk ngawt ang, ngaihtuah thui ngam pawh a ni lo," Kimi chuan a ti leh sap sap a, Zodina leh a pu chu ka han mitthlà a, a sawi dik viauin ka ring. A pu hi han boral ta chiah se, Zodina a mal dâwn lutuk! Keiin hnem duh viau mah ila ka hnem a rem dáwn si lo, ani nèn hian kan inkârah eng thil mah a awm tawh si lo va; mahse, lo haw thuai thuai se chu ka ti, Jakob-a thil min hrilh kha hrilh hlàn ka nghâkhlel tawh êm mai, ani pawhin mak a ti ve ngawt ang chu, chuan, a hlim tawh bawk ang a...

An ina kan lèn ațanga chawlhkâr khatna chiahah chuan Pu Zuala boral thu chuan khawtlâng min rawn dêng ta, ka hriat veleh chuan mak ka tiin min țhâwng khawp mai a, nâ ka ti ve tawp bawk. Zodina ka lainat a, ka khawngaih êm êm bawk; a pu erawhin natna a nei tawh dâwn lo va, eng mah hre lovin a kal ta a ni mai a, Zodina rilru nat tùrzia leh a tuar dàn tùrte chu ka lo suangtuahpui ve a, ka thinlung hi a tâwt up up ni berin ka hria.

Mi khawsak harsa lo leh țhenrual ngah a ni bawk a, mikhual rawn thlahtu pawh a ngah, kan lumen a, țhalai mai ni lovin nupui nei tawhte leh Pu Zuala țhian kawm ve deuhte pawh an meng tlang nual a, ani zawng uitu leh hmangaihtu pawh a nei tam e. Zodina chu ka zawng ru zël a, ka hmu nghâl mai lo; mahse, rei zawn erawh a ngai lo, ka hmu ta; mahse, a va lang pawr tehlul êm! A pu boral chu a tuar viau a ni ngei ang, a țhu kun chal mai a, dah pawh a dâk chhuak lo. A nî leh mi dangte an țah laih laih lai pawh chuan ani chu a che sawn lo va, a melh ngai a melh tlawk tlawk mai a, a thinlung a rûm vawng vawngin ka ring.

La thingtlâng ve ngang a ni bawk a, țhalai an tam a, zài pawh a nuam. Khua a rawn êng țan a, nu leh pate lo kal tak tak hmain hmun kan tifel a, tual phiah hnuah a țhen an haw a, a țhenin mikhual lo kal tùrte ei tùr rawng kan lo bâwl a, Kimi pawh a mawng a zãng khawp mai.

Chaw ei khamah hawin ka mu daih ang ka ti rilru deuh a nia; mahse, ka tum angin ka awm lo. Inah chuan ka haw ve ngei a; mahse; ka kal leh tho. Vui hunserh a zo a, engkim an tih fel hnu chuan kuang chu pâwnah rawn zãwn chhuakin thlá an lâkpui hlawm a, a tàwp dâwnah chuan ka hming an rawn lam ri tel ve ta tlat mai! Ka hriat sual a nih ka han ring ringawt a; mahse, min rawn lam nawn leh ta. Ka hming ngei a ni e.

Thlâ chu ka lâkpui ve ta a, min hsn lam ve ringawt chu mak ka la ti fan a, mite pawhin mak an ti ve ngawt ang chu, an chhûng-leh-khat paeh ka ni si lo va. Zodina nî țap rãwih rãwih chuan ka hnuk a ti-ulh deuh tlat a, ka lang țha ang em tih lam pawh ngaihtuahnaah a awm thei lo, ka mittui chu tlâktîr lo tùrin ka mit chu ka khap sek reng a ni.

Zànah țhalai kan léng leh a, kan zai a, Kimi'n hla a hril a, zài pawh a nuam dap dap viau mai. Țap ri hriat tùr a awm zeuh zeuh a, chu erawh chu ka ngaihtuah lo lui tlat, ka mittui a pawnlâng si a, a lo tla leh ringawt ang tih ka hlau a ni. Zodina pa leh a nau pakhat pawh an rawn kal a, pahnih dang erawh chu an school kal dàn a laklawh deuh a, a nuin a awmpui a, an rawn lang ve ta lo ni àwm tak a ni; mahse, ka ngaih dànah chuan Zodina hmuh loh dàn a dap a nih ka ring, Zodina pa pawh hian kal ve kher ngai a ti lo a ni ang, an awm dàn hi a hahthlâk ve ngawtin ka ring. Sawi chhuak si lovin an thinlungah khâkna emaw thinurna emaw an pãi țhêm hlawm ang a, hlim taka inbiak seuh seuh chu a har viau ang le.

Kan hun tawn avàng chuan Zodina pawh ka hmu fâl thei lo. Hmuh fàla Jakob-a thil min hrilh kha hrilh ve vek ka duh; mahse, hun remchâng a awm thei mai bîk lo.

Mahse, tum ve na nâ nâ chu, U Ropuia nèn kan lèn țumin ka hmu thei ta a( U Ropuia hian Pu Zuala ràl a duh avàngin ka kalpui a ni) Ani erawh chu min hmu ang pawhin a awm lo, min hmu kher lo thei bawk. Pâwnah thing buk hlim hnuaiah che hauh lovin a țhu a, chu chu ka pan ve tawp a ni.

"Zodin...?" tiin ka han ko a, hria ang pawhin a awm lo; mahse, pan hnaih pah chuan ka han ko nawn leh a, chutah chuan a rawn hawi ta a, a rawn hawi ve tawp a ni ber ang chu, a hmêlah eng mah a hriat loh.

"A pawi êm mai tiraw? Mahse, natna awm tawh lohnaah a chàwl tawh a, a tân a nuam tawh zâwk ngei ang," ka han ti sap sap a, a bulah chuan ka ding a, lainat tak hian ka en ràn bawk a. Ani erawh chu a ngawi reng a, min rawn en nain min hmu ang pawhin a awm lo, ngaihtuah dang a nei a ni ang.

"Thil hrilh lawk che ka duh a."

A maimichhîng ta daih a, a ngaithla peih lo a ni ngei ang, a rûk tak chuan ka zak rilru khawp mai a; mahse, hrilh ngei ka duh si a, ka intingêng lui a. Aw thian deuh kharhin," Jakob-a khân a kal dáwn khân min hrilh a, i nu hãltu kha nangmah ni lovin mi dang thil tih niin a sawi a, ka ring thlap bawk. I tih a nih ka ring ngai hauh lo, tunah chuan rilru hahdam takin i awm thei tawh ang, rilruah inthiam lohna leh hrehawm tihna nei tawh lo la, hlim i phû a, i phù ang ngeiin hlim takin i hma hun chu hmang tawh ang che, ka sawi zo ta bawk a, ka kal tawh ang e," ka ti dap dap a, a hmel chu ka en leh vang vang hnuah inherin in lam pan chuan ka kal zui ta nghâl a.

Tunah chuan ka sawi tùr ka sawi thei ta bawk a, ka thâwl huai mai. Jakob-a chuan a sawi chu a hlen a, a kal bo ta a, tunah chuan Zodina chu a rawn tibuai ngai tawh lo ang. Ani pawh a awmna hmunah hlim taka a awm ka duhsak a, chutiangin Zodina pawh, he a pu thihna hian a dêng na hlê ang tih chu ka hria; mahse, a heti kumkhua lo ang, hlimna tam takin a la rawn hmuak ngei ang tih ka beisei a ni. Ka hmangaih a, ka duhsak a, kan pahnihin awm dùn lo mah ila, hlimna ka duhsak êm êm a ni. Hlim se, a hlimna a nih phawt chuan hmeichhe dang pawh kawp mai se ka duhpui hial a ni. Kei zawng, tunah hi chuan inlaichìnna lam hi hawisan rih ka duh, ka inpeih tawh rih lo, a harsa êm mai.

*SAWISÊLTU LEH SAWICHHETU NIH TUM LO LA, CHUTIH RUAL ERAWH CHUAN SAWISÈL THAM LOH LEH SAWI CHHIAT THAM LOH KHAWPA TÊ NIH TUM NGAI SUH*