☆THE SWEETEST HANDCUFFS☆ - 48 By Dingdi Pachuau

 ☆THE SWEETEST HANDCUFFS☆- 48 By Dingdi Pachuau

Pu Zuala boral nîa thlâ ka lâkpui ve tlat kha mi pawhin mak an lo ti ve a ni ang, a chhan min zâwt chiah si lo hian ka bulah an sawi chhuak leh nawlh țhìn a, ka bula Kimi a lo awm fuh ve châng hi chuan," An inngainat tawn bâkah an inkàwm ngeih ve alawm, Pu Zuala phei kha chuan a fanu emaw a tunu emaw ang deuhthawin a duatin a ngaina hial ang chu," a lo ti țhìn a, kei hi chuan chhàn ve vak ngaihna ka hre lo țhin. 

Kimi nèn Zodinate inah chuan kan léng dun fo a, a chhan chu Zodina nï hian min nêl ve laklawh tawh a, a pain min ngainat vezia a hria pawh a ni mahna le, lêng tùrin min sâwm fo a, a pa boralna a la rei vak lo bawk nèn, hun kan neih remchàn hun zàn lamah kan lêng țhin. Pu Zuala khân min ngaina ve êm mai a, khatiang kha chu ka tân pawh ngainat loh theih a ni lo va, pu ka nei tawh bawk si lo nèn, hetia a han awm lo thut ta mai hi kei pawhin ka ngai ve viau a ni, hrisêl lo chho viau mah se a hetih thut hi chu ka la ring phal bîk lo a ni.

Zodina erawh hmu fo mah ila min be hmasa khât khawp mai a, ka biak hmasak loh chuan min be lo a ni ber mai. A awm dàn hi hriat thiam a har ka ti, a nîin inchhûngkhurah pawh a țawng ngai loh thu a sawi zauh zauh chu ka âwih ta viau bawk. Inlêng kan la awm ve reng bawk a, room lamah chuan a awm ngai bîk lo; mahse, a țhu ve tawp a ni ber ang chu, a ngawi reng a, a awm ngaiin a awm deuh reng mai a ni, a pu thihna hian a rilru lamah nghawng nasa tak a nei a ni ang ka ti tawp mai. A tân tih theih nei hek lo i, ka țawngțai  apiangin a tân dìlsak ziah, ka theihnghilh ngai lo, a hma pawhin amah kha mahni inkiltawihnain a khat tawh kha a ni a, a pu a han boral a, hun rei tak a lo hmuh tawh loh a pa nèn an inhmu lo thei si lo va, a rilruah hun kal tawha nunhlui tam tak a thar lo thei dâwn si lo, a pa nèn khân an inbe ve ang em tih leh an inkár a pângngai ang em tihte ka ngaihtuah a, ka han ngaihtuah thui deuh chuan, hun a liam tam tawh a, nunhlui hre chhuak mah se an inbiak ve ngei chu ka ring chho a, an inkâr pawh a pângngai deuhthawin ka'n ring ta deuh ngawt a, ka thil han ngaihtuah kual chu thil țûl lo tak chu a ni tih ka hria; mahse, ka hre châk ve a ni mai.

"Pu Rinawma chu a lo haw khât tawh bawk a, a lo haw theih chhunah chuan a cham rei ve khawp alawm. A hna vàngin hmun hrang hrangah sawn kual a ni lo thei lo va, a pa ngei pawh a duh hunah a rawn tlawh hlei thei bîk lo a nia, tunah lah chuan a boralsan ta daih bawk si nèn, hrehawm chu a ti ve ngawt ang; mahse, enkawl hmanin a hun hnuhnung lam a hmanpui a, dawmhlumtu-ah hial a la țang tal a, a ziaawm deuh chuan ka ring," Pi Vani chuan a ti barh barh a, Kimi chuan," An chhûngkuaa an rawn lan kim theih ka rin rin nèn, a pawi ngawt mai, a fate pawh hmuh an châkawm," tiin a lo tuihnih ve zat a.

Pu Rova chuan," Nula tlangvâl an ni ve vek tawh ngei ang, a rawn hruai ber kha an milai kha a nia tiraw? Puia nèn hian an inrual em kha?" a lo ti a, Pi Vàni chuan," Rual chiah lo ang, Vâltea nèn hian an inrual zâwk lo ang maw?" a lo ti thung a, Puia chuan," Kan inrual niin an sawi ka hria, khawpui lama awm zâwk ta chu len pawh a lian bîk khawp mai, keini angin rit phurin hah takin hna an thawk ngai dâwn si lo va," a lo ti ve a. Kimi'n," Mai mai a, nang pawh i lian reng alawm, kei aiin i sàn daih tawh hi," a lo tih chuan a nu pawh chuan," Ni e, i tê bîk hauh lo. I pa pawhin a chen tawh hauh loh che hi maw, thingtlânga awm chuan thingtlâng hna hi a thawh loh theih loh miau a, kan hmaa thawh tùr awm ang apiang țha tak leh taima taka a kan thawh hian thawkrim leh mahni hnaa rinawm kan lo ni mai, mi dangte nun awt lova chhúngkuaa hlim taka awm tluka hlû hi a awm hauh lo," a tih zawm leh barh barh a. Chuta țang chuan chhûngkaw chanchin sawi chhoin hrisêl taka dam tlàn hlutzia, inkawmngeih nawmzia leh inhmangaih tlàn pawimawhzia chu an sawi chho ta zêl a, an thil sawi chu ngawi rengin ka lo ngaithla ve reng a.

A hnu daihah chuan Zodinate in lama lêng leh tùrin Kimi nèn chuan kan inzui chhuak leh ta a, ka inah kan lût leh lawk a, ka insiam ve sawk sawk a, ka hman nghâl a ni mai. Vawiin lamah kan lang thei lo va, a pu boral ațanga thla khatna chiah a ni si a, zanin tal chu va lan ve hrâm țha kan ti a ni.

Kan va thlen chuan mi pawh an lo awm nual tawh a, mikhual hmel pawh hmuh tùr a awm leh nual. Zodina pate erawh an rawn lang tawh lo a nih hmèl, an hmêl ka hmu lo tlat. An awmna a hla ve êm mai a, a àwm ve tho mai. 

Pu Zuala vui liam nîa thlalâk hrang hrangte chu Album lian puiah hian dah khâwmin en duh tân dawhkànah an chhawp chhuak a, keini pawhin kan en ve nghe nghe a, ka lâkpui pawh kha a lo awm ve kiau mai. Kan en mawlh mawlh lai chuan," Nang hi kha thlalâka mi kha i ni tiraw? Ka pa vui liam nía a kuang thlâ lákpuitu kha?" mipa aw hian a rawn ti a, ka hawi chhuak ta vat a, tlangvâl nge pa a nih ang ka hre lo; mahse, naupang tak erawh a ni tawh lo ang tih ka ring thung, Zodina pa nèn an hmêl chu a inan êm avàng chuan a patea a nih ka ring nghâl ringawt a.

"Aw, ni e."

"Ka pain,'Tluangtei' tia a sawi ve ziah kha i ni chiang mai, hmaichhana ka hmu thei che hi ka lãwm e, ka pa damloh lai, damdawi ina a awm lai khân a sawi ve ziah che a, a ngai viau che a ni," a rawn ti leh a, min rawn chibai tumin a kut a rawn phar chhuak zui a, ka lo ban ve vat a, sawi tùr erawh ka hre lo viau mai. Zodina patea a nih ka lo rin erawh a dik tih ka hria, Pu Rinawma nèn khân an inang tak zet si a.

"I hriat theih dàn tùr chuan Zodina patea ka nia," a tih leh chuan," A nih ka ring a, Zodina pa nèn khân in inang hlé si a," tiin ka han nui a," Ka hmu che a, kei pawh ka lãwm e," ka ti zui leh zat a. Kan bulah chuan rawn țhu vein a pa damdawi in awm lai vêl chu a sawi chhuak a, țawng suam suam pah chuan min en leh vung vung țhin a, nuam lo ka ti lek lek a ni, a țawng tui si a, thlalâk pawh en chhunzawm tawh lovin Kimi nèn chuan kan lo ngaithla dùn a.

Chutih lai chuan in chung lam ațang chuan Zodina chu step-ah chuan a rawn chhuk ve mêk bawk a, ka hmuh veleh chuan a lo chèr hman tawh hle a ni tih ka hre zui bawk. A kawr hâk ațang chuan a hriat loh theih loh, tlangvâl pian țha pângngai tak kha a ni si a, tunah chuan a taksa mai ni lo, a hmêlah pawh a tla deuh dâk a ni tih a hmuh theih reng tawh si a. A pu boral a tuar viau mai hi mak ka tih deuh rualin ka khawngaihin a chhiat phah vek ang tih ka hlauhpui, țha takin inkàwm thei ila ka ti, kawm ka châk, kan inkâr engmah ni tawh lo mah se hetianga tu mah a kawm loh chhoh chuan a tân a pawi thei ang tih ka hlau a ni.

A hnu deuha mikhual lam ațanga hunserh angreng deuh hmang tùr a rawn din tâkah chuan kan titi pawh chu kan tàwp a, kan piah lam, sîr deuh taka Zodina țhu chu ka hmu thei reng a, va melh reng chî lah ni hek lo, ka mitsîr erawh chuan ka hmu reng thung. Che lovin a țhu reng a, a kut emaw a ke emaw pawh a chêt àwm pawhin ka hre lo. Heti êm êma a nungchang a thlâk chho ta mai hi a pu boral vàng chu ni tho mah se a nunhlui vàng kha a ni pakhatin ka ring tel bawk a, kàwmin engkim a êng zâwngin sawipui thei ila...

Kimi chuan min rawn nghawk deuh salh a, ka en nghâl vat a, mitmeiin thil awm dàn chu min hrilh a, a mamichhîng zui nghâl daih bawk. Kei pawh chu harh chhuak vein a tih angin ka han chhîng ve zui a, ka rilru ngaihtuahna ka lo kal kualtîr nasa mah mah a lo ni, buaithlâk thei khawp mai.

Kan haw dâwn chuan Zodina patea chuan an compound tàwp thleng min thlah a," Naktip khian haw leh mai kan duh tawh dâwn si a, naktûkah office lamah ka rawn lêng thei ang em? Han titipui che ka duh hle si a," a tih chuan," Thei teh rëng mai," ka lo ti a, ka rilruah erawh ngaihtuahna țha lo lam daih a rawn lût thung, min en duh viau si a, min ngaizawng ru deuh a niang ka ti a ni; mahse, chutiang han ngaihtuah kài chu ka inthiam lo leh deuh nghâl a, thil hriat chian hmaa thil lo zêldin chiam ka chìn țhan hi sim ka duh tak zet a ni.

"Tlangvâl senior a nih loh pawhin nula làwm ve tak chu a ni ngei ang, U Zoa hi kan têt laia ka hmuh bâk kha ka hmu ta miah lo va, ka lo hre lo lek lek hial a ni, nupui a neih tawh leh neih tawh loh pawh ka hre lo, zawnglai a lo la nih hlauh chuan,  a fuh dâwn e," Kimi'n a tih sap chuan ka lo nui hak a, kan ngaihtuahna a inang viau mai a lo ni. Sawi zawm lehin," Mahse, ka ring dik lo thei tho bawk, a en duh che sia ka lo ti mai mai, a lérh hmèl ka lo tia," a tih leh chuan," I lo hmu ve elo? Nuam lo ka ti lek lek hial a ni," ka lo ti ve a, ani chuan," Engati nge an chhûngkhat lamhnai hlîr mai hian an ngainat viau che ni? Pu Zuala a nia, Kob-a ni lehin tunah lah a patea, an duh chî tak i ni ngei ang," tiin a han nui kar kar a, kei pawh chuan fiamthu hian," Ka hmël hi an duh zâwng tak a ni mahna," ka lo ti ve a, ka rilru chhûngril tak erawh chu a nuam hran miah lo.

U Ropuia a rawn kal hman loh avàngin keimah chauhin office chu ka kai a, bp check tùr ringawta rawn kal pawh hi chu an awm ve reng reng țhìn si a, ni khat lek chawlh pawh hi ka hreh phah ţhìn a ni, keima tâwkah ka kai regular viau bawk. 

School vênga Pi Dâri bp ka check-sak laiin Zodina patea chu a rawn kal ta ngei a, biain țhutna ka lo kawh hmuh vat a, Pi Dâri chu ka ngaihven zui leh ta rih a. A chhuah hnuah erawh chuan ka inlêng lam chu hawiin," I lo lêng tak tak a!! Ngawi rawh, nakinah thingpui pawh kan lum dâwn nia, han țhu chàwl phawt la," ka ti a, ani chuan," A ngai hleinem, ka rawn tibuai viau zâwk ang che tih pawh a hlauhawm hial mai ka ti," a lo ti ve a, hawi kualin," In office pawh a nawm viau reuh hi a, heta ka la awm ve lai kha chuan a bang pawh dâp mai mai kha a la nia, tunah chuan a changkãng tawh khawp mai," a ti leh a, kei pawh chuan," Nia, a nuam ve reuh reng mai, khaw lum lutuk pawh hi a zia deuh a," ka lo ti ve leh a.

Thingpui hâng ka lumsak a, ka pêk hnua ka țhutnaa ka țhut leh hnu chuan," Ka rawn lèn chhan tak chu Zodina chungchâng hi a nia. Ka pa khân a ngaina viau che a, Zodina nèn pawh in inkawmngeih viau thu a sawi nghe nghe a, a dik ang tiraw?" a rawn ti ta a. Ka melh zawk a, min lo en reng a, fîmkhur tak hian," Aw, kan inkàwm ve fo a; mahse, mi dang pawh a kàwm ve tho a, inkàwmngeih viau bîk erawh kan ni lo," ka ti ta duah a.

"Ka pa khân Zodina hi a ngaihtuah êm êm a, a boral dâwn thleng pawhin Zodina hi ngaihsak tùrin min chah lawm lawm a ni, a chhan ka hre bîk lo, a sawi si lo va. Chutah chuan, i hming hi sawi chhuakin nang nèn hian in inkàwm țhìn tih a sawi a, i puih theih a ring bawk a ni," tiin a pa thuchah, a țawngkam ang chiah chuan a han sawi chhuak dap dap a, ka rin loh lam daih a ni. A hmaa ka lo zêldin thu nèn kha chuan chhim leh hmàr ang hlauh a ni ta.

"Ka pa thu hnuhnung a ni a, a boral lai bàwr vêla ka rawn kal lai kha chuan hun ka nei lo tluk a ni a, hna lamah ka buai lai tak niin ka châm rei hman si lo nèn, ka zawng chhuak hman ta lo che a ni. Ka pain a ngainat dàn ațang che khân mi fel tak i nih ka ring mai a, ka hmu che a, ka rin dàn a dik ngei tih pawh ka hria. Heta awm i ni bawk a, kan hawsan hnuah Zodina hi lo kawm hlim tum hrâm hrâm tùrin ka chah che a ni, ka pa thil min chah hnuhnung ber a ni bawk si a, i thei ang tiraw?" a ti leh ta bawrh bawrh a.

A haw hnu chuan ka ngaihtuahnaah Pu Zuala a lo lang hmasa ber a, a tupa chu a lo ngaihtuahin a lo hmangaih àwm hle mai, a boral dáwn tak takah pawh a thuchah hnuhnungah a tupa chu hlim lo tak leh mal taka a awm hlauin ngaihsak tùrin a chah lawm lawm chu a ni tak si a, a va khawngaihthlâk roh tak! A hlauh ang ngeiin a tupa lah chu a awm loh ațang khân a malin a khua a har hlë si a, khawiah mah a chhuak ngai lo chu a ni ta mai si, a awm dàn hi hre ve ta se, a rilru a va hrehawm dáwn teh lul êm!

Zodina pawh leh hmasak dàn tùr chu ka han ngaihtuah a, va pawh hmasatu nih chu thil harsa ve tak chu a ni ngei ang, hmeichhia zâwk ka ni a, ani min lo ngaih dàn tùrah pawh hmeichhe zak thei lo tak ka ni ngei ang; mahse, pawi ka ti thei ang em? A hrisèlnain a tawrh phah ai chuan a pu thuchah hnuhnung tihlawhtling tùrin ka pan hmasa rãwih mai ang, mi dangin an hriat vak chuan loh chuan pawi lo mai rawh se. A pate Zoa khân min ngèn ve lawm lawm si a, va pan hmasa ta ila, ka thih phah ëm lo ang chu maw.

Mikhualho haw ațanga ni thum a ral leh hnuah, Inrinni zàn inkhâwm bànah chuan Kimi nèn kan va lêng leh a, Zodina hmuh ngei ka duh avàng chuan a nî chu Zodina awmna ka zâwt sauh sauh a, in chung a room  awmnaah ka chho ve ta hmiah mai.

A kawngka ka kik phawt a, ka nghâk rei, min rawn chhâng dâwn lo emaw ka tih tawh hnuah a rawn hawng ve ta hrãm a, min hmuh ruala a mitmeng danglam hlek chu ka hmu hman zawk; mahse, làwmna mitmeng nge thinrimna mitmeng ka hre hman lo.

"Ka lo lût lawk thei ang em?"

Min chhâng lo chuan a ding reng ringawt a, a mit khur tla deuh dâk chu enin," Rei lo tê chauh a ni ang," ka ti leh sap a, min chhànna pawh ngaichãng lo chuan ka lût zui hmiah a, ani pawh chuan remtih lohna awka a chhâk chhuak zui bîk lo.

A chair-a ka țhut vàng nge ni, a ding reng a, min en lêm lo. Kei chuan hun hlu tak khawhral lo tùr chuan," Zodin, i dam țha em? Zànahte i mu țha thei em?" ka han ti phawt a, ka rin loh deuha," Aw, ka țha, min ngaihtuah suh," tia min rawn chhàn tâk khauhah chuan ka țawng leh tùr pawh ka tàwp nghâl daih a, makti takin ka en ta hau ringawt a. Min chhàn ka ring hauh si lo va, țawng ring lêm lo mah se a țawng kha ka hre fiah viau a ni.

"I pu boral hi i tuar viau ang tih ka hria, ka tawrhpui tak zet che. I pu kha ka ngaina ve tho a, nang ang êm chuan ngaina pha lo mah ila ka ui êm êm a ni. Min ngaina der ve ëm êm bawk, min ngainatu chu tu tân pawh ngainat loh theih ni nghâl lo chuan. Chu lam chu duh tâwk ila, i pu khân a ngaihtuah êm êm che a, mal taka i awma i hlim loh hi a hlau a ni; mahse, hei a hlauhthàwn chu a thleng chho mêk chu a ni si a, chuvàng chuan, khawngaihin, ka kawm che hi remti hrãm rawh, tu ma chîm buai loha mahnia awm veng veng chu i duh zâwk pawh a ni maithei; mahse, chu chu i tân thil țha ber a ni lo, i pu duh dàn pawh a ni lo, khawngaihin, ka kawm zauh zauh che remti hrâm rawh? Chu chauh chu ngen che ka duh a ni,"ka ti ta duah a.

Ani chu a ngawi reng a, min rawn en chuang lo; mahse, a ngaithla tih ka hre thung. Chu chuan beiseina min pe thar a," Kan inkár hi siam țha leh ang ka ti lo, i malna leh khawharna hi hnem theih che ka duh vàng a ni, hetia mal tak leh khawhar taka i awm hmuh hi hrehawm ka ti a, i hrisèlna pawhin a tuar mai ang tih ka hlau a ni," ka ti leh a, ani chuan," Ka ţha ka tih tawh kha," a lo ti sap a, min rawn en ve ta bawk.

"I țha tih thu i sawi a; mahse, i sawi ang hian ka hmu ve si lo che a ni. Mahnia awma room-a inkhung ngawt ngawt lo hian chhuak harh ve la, luiah emaw khawi khawiah emaw, i chhuah duhna apiangah ka chhuahpui ang che, vah harh hi i mamawh a ni," ka ti a, ka thil sawi dàn chu intithû deuh ka ang deuhin ka hria, a fuh chiah lo maithei; mahse, ka sawi zo tawh.

"Min ngaihtuah a nih kha, kei chu ngaihtuah ka ngai hleinem, nu leh pa leh unaute pawhin an hlauh leh țihkhai ka nih hi."

"Ka hlau ve lo che, miin engtin pawhin min lo ngaiin engtin pawhin sawi mah se kei chuan ka hlauh loh che bâkah mi fel tak i ni tih ka hria, chu chu thu dik tak a ni, khawngaih takin, ka kawm che chu phal hrãm rawh, i duh loh dànin ka awm hauh lo ang," ka lo ti vat a, amah a inhmu hniam lutuk leh a indah hrang lutuk chu ka duh lo, a nunhlui a inbawh behtîr lutuk leh a nunhluia a chêng rei lutuk hi nawr kal a ngai.

"Ka lakah chuan inham buai duh tawh suh, i hun a hlu, eng mah ka nih loh hi," zàwi sapa a rawn tih chuan," Hun hlu bîk ka nei lo, kan hun hlut zâwng a inang vek," ka lo ti thung a, chutah," A țan nân rei tak inkawm kher a ngai chuang lo, Kimi pawhin rei min lo ti tawh ang, ka chhuk ang e. Naktûkah ka rawn kal leh ang a, tuna kan inkawm ang hian min lo kawm duh leh tho ka beisei bawk ang, i duh phawt chuan mi thar ang pawhin kan inkàwm thei ang, la inhre ngai lo leh la inhmu ngai lo ang pawhin," ka tih zawm leh a.

*ENG ANGA HAUSA, HMEL ȚHA LEH FEL PAWH NI ILA KAN NUN HI A LA TÀWP VEK DÁWN, KAN NI TIN HUN HMAN DÀN HI NGAIHTUAH CHIANG ȚHÌN ANG U*