☆THE SWEETEST HANDCUFFS☆ 49(B) By Dingdi Pachuau

 ☆THE SWEETEST HANDCUFFS☆ - 49 B By Dingdi Pachuau

Kan ngawi dùn vang vang a, kan thil ngaihtuah erawh thil dang vak chu a ni lo tawp ang le. A pa chuan a nupui chunga a fapa thil tih vàng khân a fapa chu a la ngaidam hauh lo tihna chu a nih hmèl a, a fapa tân chuan a va hrehawm dâwn tehlul êm! Amah hringtu ngei a pa chuan a mi hrang en bâkah a chungah lungnih lohna a la nei reng tihna chu a ni si a.

"A châng chuan ka nu khân min lo pãi miah lo se, a nih loh pawhin min hrin hma khân min lo chhiat daih zâwk se tiin ka ngaihtuah țhìn."

"Zodin..!" ka lo ti vat a," Chutiang chu sawi lo hrâm teh, a malsáwm lo êm mai. I pa leh i nute chuan thil awm dàn dik tak an la hriat ve loh vàng a ni, thu dik tak hi hriain, i tih a nih lohzia hre ta se an rilru pawh a dang ngei ang," ka ti leh a, ani chuan," Hrilh ka tum asin; mahse, hun min pe duh lo, tunah hi chuan hrilh hriat tumna ka nei tawh hauh lo, ka thih ni thlengin. A hma khân lo hrilh ta pawh ni ila, min rin ka ring chuang lo, a chhan chu ka nu chunga thil titu kha an tân chuan keimah tho a ni si a, an âwih chuang lo ang," a ti leh a.

"Mahse, thil awmze dik tak, i natna chungchângte i hrilh chuan, an hre thiam ngei ang," ka lo ti leh thung a, ani chuan," Ni lo ve, awmzia a awm chuang lo, lo sawi pawh ni ila a bul rêt ațangin sawi a ngai ngei dâwn a, kha thil kha mi dang hriat atân ka duh hauh lo, chhûngkaw mualphona, zahna leh thinrimna tùr sawi chhuah kher kha thil țha a ni lo," a lo ti ve leh a. Ni e, a ti dik tho mai, hun kal tawha nunhlui țha lo sawi chhuah leh chuan awmzia a nei lêm lo ang a, thil țha aiin thil țha lo a rawn hring chhuak zâwk maithei bawk. 

Mahse," Nunhlui țha lo sawi chhuak lovin i nu chunga thil titu kha i ni lo tih chauh i sawi mai dâwn alawm," ka ti leh țâlh a, ani erawh chuan," Ka tum tawh lo, Pathianin a hre chiang a, ka duh tâwk tawh mai ang," a lo ti thung a, sawi zawm lehin," Sawi sawi chuan chhúngkua  kan mualpho ang a, thil țha lo zâwk pawh a thleng thei a ni. Tunah chuan min puihna vàng liau liauin ka natna lak ațangin ka fihlîm tawh a, i chungah hian ka lãwm tak zet a ni, làwmthu ka sawi nawn leh e," a ti leh  a.

Ka haw hnu chuan Zodinate chhûngkaw chanchin chu ka ngaihtuah zui zêl a, Zodina'n an chanchin tam tak chu min hrilh ve ta ngei a; mahse, mak ka la tih fo chu amah hringtu a pa ber chu a ni. A nu chu a nuhrawn a ni a, tlëmin ka la hre thiam thei deuh. A pa chu Pastor lai a ni a, kohhran enkawltu, thlarau bo Krista hnêna hruai thlengtu tùr ni àwm takin a fapa a ngaidam thei tlat lo mai chu ka hre thiam thei lo, mite hnênah Pathian ngaihdamna chungchâng a sawi ve fo ngei ang a, chhûngkua mai bâkah mite nèn pawh hlim tak leh lungrual taka khawsaho thei tùr chuan inngaihdam tawnna a pawimawh thu pawh a sawi tawh ngei ang; mahse, amah berin a nunpui tlat si loh chuan awmzia a awm lo! A fapa ngei pawh a ngaidam thei lo a nih chuan a piangthar hauh lo tihna a ni dâwn a, lemchangin kohhranho a lo enkawl țhìn tihna a ni ang.

Zànriah ei khamah chuan Kimite ina lêng phei lawk tùr chuan ka chhuak a, Zodina ka zawh hreh ve deuh sí avàng leh thil ka hriat belh duh ëm avàng chuan tum nei deuh ràn chuan Pu Zualate chanchin chu kan titi kârlakah chuan ka han sawi chhuak ta zauh a, a fate chanchin, a bîk takin Zodina pate chanchin chu chîk deuh tak hian ka zâwt a. Kimi chuan," I va zâwt chîk ve! A țha lo ang a?" tiin min lo fiam zauh a, țawng chhunzawm lehnghâlin," Kei chuan ka hre chiang viau bîk lo. Ka pa hian a hre chiang ber ang," tiin a pa chu a han en nghâl a, ani chuan,"A lo rei ve leh deuh ta, U Rinawma hi an unau zînga upa ber a ni a, nau mipa  pahnih leh hmeichhe pakhat a nei a, hmeichhe awmchhun ber chu hei, in pui changin a awm ta chu a nih hi. A unau mipate chu hmun dangah an awm ta vek a, U Rinawma tih loh chuan sawrkar hna an thawk ve ve bawk," a ti a.

"Pu Rinawma pawh ngaihtuahawm a nih loh hi, a hna lah Pastor, hna zahawm leh mi zahkai a ni a, mi fel tak a ni zui bawk a," Pi Vàni chuan a lo ti ve a, Pu Rova chuan," Ni e, nupui pawh a nei hmêl țha alawm, an kum pawh a inthlàu viau; mahse, a mak khawp a, hmeichhia hi chu naupang deuh mah se a hnu lawkah an inàwm leh thei mai zêl, kum inthlau tak an ni tih pawh hi a hriat tawh ngai loh," a ti leh a.

"Kum eng zât fakauin nge an inthlauh a?" Kimi'n a lo tih chuan," Kum 20 a hawlh hial mai lo'ng maw? A chhan chu an inneih khân a nupui kha kum 20 a la tling kher lo maithei, an sawi dàn hmangin," a lo ti leh a, Kimi nèn chuan kan inen a, kan meng phâwk dùn vak nghe nghe a. Ka ngaihtuahnaah chuan 'chu vàng chu a lo nih chiah chu, a pasal laka a lo rinawm loh,' ka ti nauh nauh a, a pasal chu a upa ve deuh tawh ang a, nupa nun pawh an hmang regular thei lo maithei a, bâkah, han zinsan zauh zauh țum pawh a nei ngei ang, a lunglêngin mipa dang a lo kuan pawh a ni mahna...

"Inrèl thil ni lo se, U Rinawma nupui kha chu Pu Zuala khân a hrawn rei vak hman lo na a, mi sawisep kha a kai hman tho a ni. An sawi ber pawh U Rinawma kha a hneh lutuk a ni àwm a, a nupui thil sawi apiang kha chu a âwihin a ring bur ni àwm tak a ni. Han sawi leh ta zêl ila, helaia a pasala chhûngte hrawn pawh kha a peih rei lo, an awm rei lo rêng bawk a. Pu Zuala a fing hlauh a, an mualpho zui lo ni maiin ka hria, Pu Zuala boral pawh khân a rawn lan kha ka ring lo sa hrim hrim a, a rawn lang lo ta ngei bawk a... Mahse, a fel ve bawk a ni ang, tûn thlengin an la innei reng thei a, keini lo hriat leh sawi ve hi a dikhlel deuh pawh chu a lo ni maithei a ni," a ti ta duah a. Pi Vàni chuan," I sawi a, ka hre ve chiah, ka lo hre ngai hauh lo nia; mahse, ka ti mai mai a, an nupaa an hlim phawtte chuan a țha vek ni mai tùrah ka ngai, mi sawi tih vêl mai mai hi chu innghahna tlâk a ni lêm lo," tiin a lo tuihnih ve zat a.

"An sawi ve miau si alawm le, dâwt chu a ni vek bîk lo ang, pastor nupui a nih vàng ngawtin mi fel a ni thei bîk nâng, mihring ve tho a nia," Pu Rova chuan a ti leh a, Kimi chuan," Ni e, mihring hi chu kan sual khawp a, kan tlinna lam aiin kan tlin lohna lam kan insawi vàwngsak char char a, mi pakhat thil țha tih 99 ai chuan a tih sual zeuh 1 lek pawh kan sawi langsàr duh zâwk tlat țhìn," a lo ti ve leh a, chutiang lam chu kan sawi chho zêl a, ka tum aia rei daih ka lèn phah.

Mutnaah chuan Phone-a thlalâk chi hrang hrang chu ka en kual a, Jakob-a nèna kan thlalâk ka han en chuan a lunglènthlâk ka ti, a hun lai kha ka mitthlaah a rawn lang uar uar a, tunah chuan hmuh theihin a awm ta si lo va, engtikah nge kan inhmuh leh ang? Ka ring chiah tawh lo, ka hmu leh ngai a nih pawhin ka hriat ka ring lo, ani pawhin min hre lo tawp ang, ani nèna kan chanchin kha chu hriatrengnaah chauh a awm tawh ang.

Zodina nèna kan lâk dun ve thung chu chîk zet hian ka en hlawm a, hêng hun lai hi chuan a hlim viau a nih kha, thlalâkah pawh chuan hlim hmêl leh mitmeng nung sar zêlin a lang tlat. Kan hlim dùn a, tu dang mah kan ngai lo, kan hlim lutuk kha chunga Pathian khian 'Êm êm a' tiin min thîk a ni ngei ang, tuna hetia kan awm tâk tlat ni; mahse, tih theih kan nei chuang hleinem. Keimahni chauh hi kan ni bîk lo, inhmangaiha induh tak takte pawh an ințhen ve fo alawm, chutiang hun chu kan tawng ve a ni mai.

E taka, zanina Pu Rova thil sawi dàn ațang khán Zodina nuhrawn chu mi pakhat a tlin ve hmel riau. An pa a hneh viau anih si chuan amah vàng zâwk hian a pa khân Zodina kha a be țha duh lo a ni thei mai ang em? Mahse, chuti êm êma a thunun tlat chu ka ring meuh si lo, hmánah khân a nupui hian mipa dang lakah a rinawm lohsan a ni tih hre chhuak ve chiah ta se, eng ang rilru nge a put ang le?  Thil thleng thei zawng zawng a ngaihtuah avàngin Zodina kha chuan hrilh loh kha a titlu tawh a, chhúngkaw keh sawm leh tlabal neih a duh loh vàng a ni ngei ang, amah chauhin  a tuar tlawk tlawk chu a ni tak si a.

Ni khat chu Office-a ka awm laiin Zodina patea, Zoa khân min rawn be ve teh tlat a, a number ka neih loh miau avàngin ka lo hre lawk lo nghe nghe a; mahse, amah rawn insawiin Zodina ka kawm tawh leh tawh lohte chu min rawn zâwt a, ka kawm țhin thu ka hrilh chuan," A làwmawm nasa a nih chu, ka lãwm e, ka pa khân a ngaihtuah êm êm mai si a, kalsan a hreh chhan pawh kha a ni chiah a; mahse, tunah chuan mal takin a awm lo tih ka hria a, ka pa pawh a lãwm ve ngawt ang le,  hun remchâng i neih hun apiangah lo kàwm hrâm hrâm zêl rawh aw, a mal êm kha," a rawn ti a, kei pawh chuan ka lo 'aw' ve vat a, kan inbe rei teh chiam lo.

Kan inbiak zawh hnu chuan Zodina pate Zoa'n min hmuh a duh thu a sawi laia a chunga ka rilru put dànte kha ka ngaihtuah lêt a, ka la zak ru thei deuh hial nia! Ka lo ngaih dàn leh a thil min hrilh inpèrsan ta lutuk si kha, ngaihtuah cheuh cheuh hian a zahthlâk ka ti. A chungah khatiang ngaih dàn kha ka nei tih hre phei ta se...

*******

Remsiamate nèna lui kan kal chu ka rin aiin nuam ka ti daih mai. Khua a lum bawk nèn, a àwm ve tho, kan lui kalna hi a kuang a lian hran lo va; mahse, sangha leh kaikuang a awm ve nual thung. Tu mahin tûrin an hrãi ngai lo va, VC leh YMA-in an khap tlat bawk nèn, tilui an awm ngai lo. Nilêngin luiah chuan hun kan hmang a, chaw leh chawhmeh siam tùr kan pai bawk a, chaw pawh ka ei tam viau a ni. Tui han chèn chákawm viau mah se chènna tùr khawpa li lian leh thûk, zau deuh a awm loh avàng chuan kan khûp chen àwmah chuan kan chêng mai mai a. Tlai dâr 4 vêlah hawin Tumbu khailêng pathum ka hawn a, dïl sangha sen chi pakhat nèn, nuam ka ti ve êm êm tho a ni.

Ka lui kal chu ka chàu deuh bawk a, zàn inkhâwm bàn veleh chuan ka mu nghâl daih a, zîngah lah chuan thawh ka la hai deuh zui a, fuh lo ve khawp mai. 

Inkhâwm bànah Zodina ka tlawh khât ta deuh sia tiin Kimi chu lènpuiah ka han sáwm ve a; mahse, tih tùr a lo nei hlauh mai a, keimaha ka lèn mai a ngai dâwn ta a ni. Pawi lo, keimah chauh pawhin ka kal ve fo tawh țhìn alawm, ka tlawh khât ta deuh a, mal a lo inti lutuk palh ang e.

Chawhnu lamah ka va lêng ta a, a nî a lo awm a, min lo hmuh veleh," Lo lêng rawh khai, nimin lamte i reh sia, zàn lamah tal i rawn kal ka ring leh a, i rawn lang bawk si lo va," a lo ti sawk sawk a, kei chuan," Nia, luiah ka kal ve pek alawm le, ka rawl deuh hlek a, inkhàwm bànah ka mu zui nghâl daih a," ka ti ve a  Ani pawh chuan," A nih tak chu, engtizia nge aw ka lo ti mai mai a," a ti ve leh a, chutah," Zodina pawh in chung lamah a awm leh tawh a nih kha, a nuamsam meuh lo niin ka hria," a ti leh ta sap a.

"Engtik ațangin?" ka han ti vat a; mahse, amah ngei zawh a fuh zâwkin ka hre leh hnuhnawh a; mahse, a nî chuan min lo chhângin," Zirtàwpni zàn ațang khân niin ka hria, ka hre sual maithei bawk," a han ti a, ka rilru a hmanhmawh ta deuh hlek a, eng eng emaw kan sawi leh hnu chuan in chung lamah ka chhohsan ta a.

Khua a lum teh rêng nèn, rizai a lo sin a ni ngei ang, a khumah chuan a lo inpharh nuai a," I nuamsam meuh nange?" ka han tih chuan," Nuam lo hran lo ve," a lo ti mai a, a hmel chu ka han en a, a hmai chu a lo sen deuh tal a, a mit pawh a sen deuh râm bawk.

A khawsik sàn zâwng ka check-sak a, " Damdawi ka ei a, min chhâwk dâwn tawh ang," a tih chuan a nuamsam lo chiang a ni tih ka hre nghâl vat a; mahse, a khawsik erawh a lo sâng hran lo ve, ka thaw deuh huai a," Engtik ațangin nge i nawmsam loh a?" kan han ti leh a, ani chuan," Vawiin hi a ni mai, damdawi pawh ka ei tawh a, a reh vat mai ang," a ti leh a, kei chuan," Mu rawh, țhu duh kher suh, i lu a na tel em?" tiin ka han zâwt leh a,  a lu a lo thing mai a.

"Nimin lam khân i rawn lan ka ring deuh ngawt a."

"Luiah kan kal alawm, kal ve tùrin sàwm pawh ka sàwm nghe nghe che kha," ka lo ti vat a, ani chuan," A nuam bawk ang maw?" a ti leh sap a, kei chuan," A, nuam ve tho mai, kal loh chuan hriat thiam a har," ka ti leh  a, ka nui deuh a, ani erawh chu a nui hran lo.

"Patea'n a rawn bia che tiraw?"

A thil sawi inpèrsanzia chu a! Engtin nge maw a lo hriat ni? Ka biaksawm hmasak ngai lova min be ve bawrh bawrh thei tawh hi ka lãwm a, thil hlimawm lam a ka ațanga a chhuak khât lutuk erawh hrehawm ka lo ti ru ve deuh țhìn thung.

"Um..."

A ngawi leh vang vang a, chutah," Ka pa lo ni zâwk se ka ti țhin," a ti ta sap a, chu chuan a rilrua thil awm tam tak chu a târlangin ka hria. A pa nèn an inkár a țha lo va, a chhûngkua thlengin, biak pawh an inbe hlei thei lo a nia, hun a kal liam tam tawh nèn.

"Muhìl phawt rawh, kan sawi țha leh dâwn nia," ka ti ta ringawt a, ani chuan," Min hawsan ang em?" a lo ti ve thung a, mu pahin a maimichhîng tlat thung.

"Hawsan lo ang."

"Ka lãwm e," a ti sap a, a țawng zui tawh lo, kei pawh ka țawng tawh chuang lo.

*TIHNATA KAN AWM LAI  LEH KAN THINRIM LAI CHUAN FING LEH REMHRE TAKA CHÊT CHHUAH AIIN THUNGRULH DUHNA KAN NEI THUAI ȚHÌN*