☆THE SWEETEST HANDCUFFS☆ - 50 By Dingdi Pachuau

 ☆THE SWEETEST HANDCUFFS☆ - 50 By Dingdi Pachuau

Ka hawsan lo ang tiin ka hrilh bawk a, ka hawsan lo ta rêng a, a muthilh hlàn chuan a muhìl hmêl chu chiang taka en thei tùrin ka bih hnai a, chîk zet hian ka han en a, a biang lang thãwp lek lek leh a mit khur tla deuh dâk chuan a chêr a ni tih a tilang chiang khawpin ka hria, héng zawng zawng hi a rilru hrehawm vàng chu a ni tak si a. Ka dem phâk ni miah lo mah se a nu leh pa chu ka dem a ni, a pa ka dem nasa zâwk bawk. Mihring chu a fel famkim theih loh tih chu ka hria; mahse, a fapa dik tak a ni a, khâng hun rei tawh lutuka thil thleng kha a theihnghilh thei lo a nih pawhin pa a nihna zâwnah leh beram enkawltu a nihnaah an inkâr boruak siam țhat tum tùr zâwk a ni, engati nge a tih duh miah loh? Amahin a ti thei lo a nih pawhin a fapa tân hian chance siamsak tùr a ni asin, pastor a ni a, a pastor nihna leh tuna a nun dàn hi a inmil thei hlawl lo, mahni fapa pawh be thei lo hian thlarau bo a hruai haw thei dâwn em ni? 

A muhìl hmêl chu ka en reng a, rilru hrehawmna nei hmêl pu lova muangchânga a thaw ve sâk sâk chu khawngaih takin ka en tlawk tlawk a, ka khawngaih avàng chuan ka mittui a tling puau nghe nghe. A tân hian tih theih nei ila ka ti ngawih ngawih; mahse, tihsak theih rêng ka nei si lo, tih theih neih hi ka châk asin, a mal lutuk tùr kawm mai loh hi chu tihsak theih ka nei dèr si lo, hei tak hian ka rilru a tinâ a ni. A biang, hmulin a bawh deuh siar siar chu chùlsak ka châk viau nain a harh palh ka hlau si a, ka insûm ta hrâm, mit khap lovin ka thlîr ngawih ngawih ringawt mai a ni.

A rawn harh hnuah a nîin thingpui min rawn pè a, chumi pah chuan an ina chaw ei ve tùr chuan min sâwm zui nghâl a; mahse, ka lo hnial thung a. Ka haw tlai angreng viau a ni; mahse, Zodina ka kàwm thei a, pawi ka ti lo.

Ni tin a chanchin chu ka ngaichãng reng a, a nuamsam lo kha chu a zia chho  tawh a, ka lãwm viau nghe nghe. Ka lèn hman loh pawhin ka phone mai a, inngaihzàwnna lam hawi chuan vawi khat mah kan la inbe lo, ani pawhin ka ngaihtuahzia chu a hre thiam ve a ni ngei ang," Min ngaihtuah lutuk suh, ka țha a nia," a ti țhìn a; mahse, a tâna ka tih ve theih táwk a ni a, a thil sawi avàng chuan ka biak leh ngaihven chu ka țhulh phah chuang lo.

A nu leh pa leh a chhûngte chanchin lam rêng rêng a sawi chhuak ngai tawh lo va, a pu chanchin leh an inkawm ţhin dànte chu a sawi ve sârh sârh țhìn a, a châng leh a ngawi vang vang bawk a, a rilru a kal ding lutuk ka hlauh țhin vàngin chutih hunah chuan ka lo țawng vat țhìn.

"Ka pu khân a ngaina hlê che asin," a tih chuan," Nia, ka hria alawm, kei pawhin ka ngaina," ka lo ti vat a, min rawn enin," Kan chhûngkua hian kan ngaina vek che a ni; mahse, ngainat loh theih i ni lo tlat a, tu pawh mai hian an ngaina vek ngei ang che," a rawn ti leh a, a thil sawi chu mak ka ti deuh hlek a; mahse, ka hmêlah erawh a lan hlauin ka nuih sak a.

"A làwmawm nasa a nih chu; mahse, min ngaina vek bîk lo ang, min hawtu pawh an awm ve tho ang," nui chung hian ka ti ve thung a, ka rilruah Arini a rawn lang hmasa ber zui a, ka duh lo angreng khawp mai. 

"Awm lo ang, nang chu i fel êm mai. E taka, ka chunga i thil tihah khân làwmthu ka hrilh tawh che em kha?" a rawn tih leh chuan," A ho êm mai a, chutiang chu sawi lo ang," ka lo ti a, ani chuan," Ho lo e, i chungah phei hi chuan làwmthu sawi mawlh mawlh reng tùr ka ni, ka lãwm nawn leh e. Kan dam lai ngei hian làwmthu hi chu kan inhrilh tùr a ni, kan thih tawh hnuah chuan awmzia a awm lo, kan hre thei tawh dâwn chuang si lo va," a ti ta duah a. A ti dik reng mai. Ni e, a duh phawt chuan sawi mawlh mawlh teh se, a dawngtu tân pawh lo ngaihthlâk a nuam alawm.

"Zanin chu hetah chaw ei ve tawh la? Ka nîin a sàwm ngun tawh tehlul che nèn, i ei duh ngai lo va, ka pu kha la awm se chuan i chungah hian a lungawi miah lo ang." 

Ka ei ta nge nge a. Kan pali chuan an dawhkàn lian angreng tak chu kan kîl ve dal a, ka zak  hran tawh lo, Pu Zuala dam lai pawh khân ka ei ve fo tawh tlat a ni. Zodina nî nèn chuan eng eng emaw sawiin kan titi pah a, Zodina erawh chu a țawng vak lo, muangchângin chaw chu a ei chep chep a.

"Ei țeuh rawh aw, zanin chu ei țeuh vek ang u," tiin Zodina nî chuan chaw chu min rawn khawrh belh a, ka duh tawh hauh lo nain Zodina chu pêk belh ka duh vàng chauh chuan ka lo hnial lo va; mahse, ka han pêk dâwn chuan," Ei rawh, i la ei tlêm lutuk," a lo ti tlat a, a ding zui nghâl daih a," Ka thawhsan ang che, ka puar mah mah a ni," a ti leh a.

"I va ei tlêm ve! Chakna tham pawh i ei ngût em maw..." ka tih chuan," Ka ei țeuh, ka ei tam ber țum a la ni hial ang," a lo ti a, a nî chuan ka keah min rawn tlawh zauh a, ka en vat a, a lu a lo thing deuh hlek tih ka hmuh chuan," A nih leh le, kei chu ka ei țeuh dâwn asin," ka ti ta a, ani pawh chuan," Ei țeuh rawh, chaw pawh a la tam kha," a rawn ti leh a.

A kal sawn hnu chuan a nî chuan zàwi sap hian," A ei tlêm thei lutuk! Zanin chu i awm ve vàng nge, a ei țeuh zâwk a nih kha, rawn ei ziah la a țha ang," a ti sar sar a, mak ka ti lêm lo. A rilrua thil tam tak a awm avàngin thil a ei thei lo va, chu chu a taksa pawhin a tuar ta ngei a nih hi, a pu thihna khân a rawn belhchhah leh zui a, a chèr zual phah ta a ni. 

Zàn inkhâwmah pawh ka inkhâwm lo ta mai, han chhuahsan vut kha a nuam lo ve si a ni. Kan titi leh lât lât a, Kimi pawhin min rawn phone nghe nghe a; mahse, ka awm loh avàng chuan Zodinate inah chaw ka ei a nih chu a lo ring ve nghâl a ni.

Ka haw tùr chu ngai ka ti lo chung chungin min thlah a, kawngah mi tawh tùr an awm lêm lo bawk a, muangchângin kan kal a, làwmthu bawk chu min hrilh leh ta. Rang zet hian," Sawi ve ziah lo teh, keini inkárah làwmthu sawi a ngai hleinem," ka lo ti vat a, ani erawh chuan," Chutin an ti ngai lo, ka sawi tawh kha, kan dam lai ngei hian làwmthu chu inhrilh tawn țhin tùr a ni," a lo ti ve leh thung a, kei chuan," Ni e, dik chu a dik ngei alawm; mahse, ka awm i tinuam lo, min en mi hrang tlat," ka ti leh a, a vawi khat nân a nui hak a," Ni lo ve, ka nîte pawh ka hrilh fo alawm, inrèl leh insawisèl ai chuan a dawngtu tân a làwmawm a ni," a ti leh a.

In bul kan thlen chuan," I lo lût ve ang chu tiraw?" ka han ti a, ani erawh chu a ding ta dat a," Ni lo ve, ka lo pêng khawtlai tawh lo mai ang e," a lo ti a, ka rilru a na deuh zawk thei nia. Tunah chuan ka inah pawh luh a hreh ngawih ngawih ta chu a ni si a; mahse, eng nge tih theih ka neih chuan le?

Mut hmuna ka inngaihtuah chian chuan rilru na tùr ka ni hauh lo tih chu ka hre chiang ta a, ka bialpa pawh a ni tawh lo va, ani phei chuan 

a pu vàng liau liauin min la kàwm duh chauh zâwk a ni. Nakinah, hun a han kal deuh ang a, chumi hunah phei chuan biak pawh min be duh tawh kher lo ang, tu mipain nge a bialnu hlui, a țhen tawh chu la kâwm la kàwm ngai ni? Ka țhen hmasak ni loin min țhentu zâwk a la ni zui, a pu min beiseina vàng chauha hetia inbe leha inkàwm leh thei kan ni. Nakinah bialnu thar a neih hunah phei chuan  ka tân pawh lo inrawlh ve sek chu a fuh tawh lo ang; mahse, ka inrawlh a ngai tawh nâng, keia kawm hlim ngai tawh lovin kàwm hlimtu dang a nei tawh dâwn tihna a ni si a.

U Ropuia hnënah chuan," U Ropui, thil ka zâwt mai mai ang che aw, i pa nèn hian in inen hmêlma theiin i ring em? Entîr nán, i naupan deuh laiin thil sual i tipalh a, chumi hnu ațang chuan in inhmu ta lo vang vang a, i puitlin hnuah inhmu leh ta ula, in la inbe lo reng theiin i ring em?" tiin a han zâwt duah a, ani chuan," Eng thil nge maw i han sawi le?" a lo ti a, ka han sawi nawn leh a, a hre chiang ta a ni ang," A, keimahah hi chuan ka pa chu ka hmêlma en thei kher lo ang, ani pawhin chutiangin min en bîk lo ang, tûna ka rilruah hi chuan. Mihring chu thil tisual palh thei vek kan ni a, pafa han inen hmëlma thei tùr êm chuan... thil ni thei lo chu a ni ka ti bur lo; mahse, ka ring chiah lo. Ti ila, mihring hi kan inang lo a maw, kan hmêl a inang vek lo ang chiah hian kan rilru pawh a inang vek lo va," tiin min chhâng ta duah a. Ka lu ka lo bu nghat nghat a, ni e, hetia han ngaih mai hi chuan, Zodinate pafa inkâra thil thleng hi thleng zen zen thei  lo tùra ngaih chu a ni ngei mai; mahse... a thleng miau si a.

Khaw lum zualpui ruah sûrin a rawn țhelh țhen ták zauh zauh hnu chuan zàn mut pawh tlêmin a tui ve thei deuh ta. Chhùn lama níin a hna a tlin viau tawh hi chuan duh ai chuan a lum hret chu a ni. Kan tlawrh dep dep reng a, han inbual ila, tui a lum pûrh bawk si a, inbual zawh, inhrúk hul chiah ațang hian thlan a tla țan lehnghâl ti ila a dik ber ang.

Khaw lum tak hnuaia haw chu ka peih loh vàng leh hun ãwla Zodina kawm ka duh vàng chuan tûn hnai chhoah kan khuaah ka haw khât khawp mai. Ka pain min rawn biak chuan a rawn sawi chhuak ta nghe nghe a, dâwt han phuahchawp ngawt chu ka duh meuh si lo va, hna lam chhuanlam pahin khaw lum lutuk vàng chuan tlàn haw ka peih loh thu chu ka han hrilh ta ringawt a. Ani pawh chuan," Ni ngawt mai, khaw lum hi kan buaipui a nih ber hi maw, ni sa hnuaia two-wheeler khalh phei chu a hrehawm duh khawp ang le; mahse, fùr tak takah chuan i rawn haw thei àwm si lo va, a lo thlen tak tak hmain vawi khat tal chu rawn haw leh la?" a rawn ti a, chu zawng, hnial dàn tùr a vâng khawp mai.

Zodina hawsan chu ka hreh thlâwt. Engtin nge min lo ngaih ve ang tih phei chu ka hre lo; mahse, keimah hian kawm hlim ka duh a, ka hmuh theiha a awm hi ka duh a ni. A bula ka awm hian a hlim ve tak tak em tih hre lo mah ila a pu duh ka tihsakah ka ngai tlat a, ka ngaih a țha tho tho a ni. Min lo nin viau chu ka ring phal bîk lo va, ani chu lo dah țha lawk ila, a níte nufa hi chuan min nêlin min en hrang hauh lo tih ka hre chiang tawh a, ka lèn pawh hian inlêngah pawh min ngai chiah tawh lovin ka hria!

"Naktûk chawhnuah kan khuaah ka haw phei  lawk dâwn a, eng nge ka lo hawn ang che?"

Min rawn en vat a, ka lo nuih sak a, nui ve miah lo chuan," Eng nge i tih dáwn? I awm rei dâwn em? Engtikah nge i rawn phei leh ang?" tiin zawhna pathum min zâwt ta nghâl a,  kei chuan," Ka haw lawk dâwn, ka pain min ngai deuh a ni ang, naktûk chawhnuah ka phei ang a, dam chuan Thawhțanni zîngah ka rawn phei leh nghâl ang," tiin ka chhâng a.

"A va rei dâwn ve!"

A thil sawi chuan min tihlim deuh ngawt nia! Ka inkhawngaih zâwk e a. Amahah hian beiseina ka lo la neihzia leh thil eng emaw a sawi hlekin min la tihhlim theihzia ka hriat chhuah phah uar uar mai. Ni e, ka thinlung hian beiseina a la nei tlat a, chutia ka awm lo tùr huphurh ang deuha țawngkam a neih chuan min tiphúr tlat a ni.

"A rei loh chu, Inrinni leh Pathianni kha a ni mai a, a rei lo. Ka awm loh chhûngin min lo ngai viau lo la aw, i thaw a veng huai thei dâwn zâwk a nih chu," nui deuh chung chuan ka ti  a, ani erawh chu a ngawi ta rauh rauh a, a hnu deuhah chuan," I nu leh pate chu min lo biak dâwn nia, hlim takin chhûngkua va inhmu khâwm ula, tluang takin i rawn haw leh bawk ang a," a rawn ti chhuak ta sap a.

"Teh rêng mai, eng nge ka lo hawn ang che? Thangchhuah kawr i duh ang em? Nge sweet țial lian pui ang chi kha i duh zâwk?" fiamthu ti tak deuha ka tih chuan," A ngai lo ve, tluang takin i haw dâwn nia, ka khua erawh a lo har deuh dâwn a ni," thutak zet hian a lo ti sap a. Han fiamthu leh ka châk deuh tlat a," Tu emaw țawng peih deuh, lo lèn hrât deuh leh ninawm zet kha i hmu thei rih dáwn lo tihna a nia, i thaw huai thei dâwn tihna a nih chu," ka ti ve leh thung a.

Ka haw chuan ka pate chuan min lo làwm khawp mai a, ka pa hlim lutuk chuan ka rilru kal pêng deuh tùr pawh chu a tiziaawm viau, heti tak hian min lo ngai chu a ni si a, eng mah lah chu ka hawnsak mang si lo va.

"Eng mah hawn ka ngai lo, dam tak leh tluang taka i lo thleng thei hi a làwmawm, i chawhmeh duh zâwng tak i nu pawhin a lo siam diam a ni,"ka pa chuan a ti siam siam a, kal sawn lovin ka bulah chuan a țhu reng a, min lo ngai viau tak tak a lo ni.

Nu leh pa leh unaute bulah hlim viau mah ila Zodina ka hre chhuak leh țhìn a, ka hlim dàn a khingbai a nih ber chu, engtin tak hun lo hmang ve  ang maw tiin ka ngaihtuah a, hna a thawh loh chuan a room-ah khân a inkhung leh reng àwm si a. Min lo ning ru viau a nih chuan a thaw a veng huai ang a, min ning lo a nih erawh chuan min ngai ve deuh hlek maithei, kei chuan ka ngai deuh tlat.

Pathianni zànah chuan ka hawn phei tùrte ka nuin a siam fel vek a, chawhmeh rêp, thlai hnah leh arsa rèp tih vêl a ni," I hìp duh tâkin," tiin artu pum sàwm vêl lehkhain a fûn bawk a, ngai lo tiin hnial viau mah ila a tih tawh a ni a, ka hawn phei mai a ngai ngei ang.

Thawhțanni zîngah chuan keimahin ka inkhalh haw ve leh ta par par a, ni sa vîn túk hnuaia thlifímin min han chhêm leh heuh heuh țhìn chu a nuam ka ti, hah a tidam sawng sawng thei hial mai. Zodina ka ngaihtuah pah rauh rauh reng a, kan inbe miah si lo va, a lo dam țhat ring phawt teh ang, a lo mal lutuk lo ang chu maw...

Ka thlen veleh U Ropuia chu ka pui nghâl a, ani chuan," Lo kal kher a ngai hleinem, a nih loh pawhin, chaw ei hmasa tê tê phawt la," a ti a, kei erawh chuan," Thingpui leh chhang ka ei a, ka duh tâwk viau mai," ka ti thung a. Vawiin chu Zodina ka hmu thei lo phawt, zàn hun ka hman ve hunah lah chuan mahnia chhuah ka duh hran si lo.

A tûk chawhnua ka va tlawh chuan eng thil dang vak a lo sawi lo, min lo en vang vang phawt a, a hnuah," Ka ngai hman viau che a ni, i awm loh chuan a reh țhiap a, hun a rei," a lo ti sap a, kei chuan," Țawng nasa deuh țhìn kha ka awm loh chuan a reh țhiap ngei ang," ka lo ti ve thung a. 

A ngawih leh deuh vang vang hnuah chuan,"Ka ngai hlê che a ni," a rawn ti chhuak leh a, làwm avànga thin phu dap dap chung hian," Ka lâwm e, kei pawh ka rawn ngai viau che u a ni," ka ti ve a, a thil sawiin min hneh êm avàng chuan phùrna mak tak ka nei zui lehnghâl a, kei changin ka ngai lo va, ani pawhin min lo ngai ve tho a lo ni si a.

"Ka pian ahnu lama ni hnih rei ka la tih ber țum a ni hial ang, kum hnih ang hiala rei niin ka hria," a tih leh phei chuan ka thin phu hi a sûkin a su dup dup tawh mai. Beiseina ka nei a, ka phúr a, chu ka beiseina chuan thil țha lo lamah min herpui loh hrâm ka beisei.

"Leh êm êm a, min ngai ni la chuan min rawn be êm êm ang, min rawn biak miah loh kha aw," tiin fiamthu ti tak deuh hian ka han chhàl a, ani erawh chuan," Ka thil sawiah khán fiamthu a tel miah lo, rawn biak che chu ka duh alawm; mahse, ka ngam ngang lo a ni," a rawn ti ve leh thung a, ka beiseina chu beiseina dik a ni thei dâwn em tih hriat chian ka duh êm avàng chuan zahna lam chu dah țhain," Engati maw i ngam loh a?" tiin ka zâwt zui zat a.

A ngawi leh vang vang phawt a, min chhâng har ka tih êm avàng chuan chu zawhna ka lo záwt ta kher kher chu ka inchhír hman dâwn dâwn a; mahse," Ka ngaih êm che avàng khân ka bia che a nih chuan ka thinlung ka phawrh fai vek dâwn tih ka hre chiang a ni, chu chu thil dik a ni dâwn si lo," a rawn tih tâkah chuan a mitmeng chu chiang takin ka en ta vat a, hlimna, hrehawm tihna, beiseina leh zahna inpawlh ka hmu theiin ka hria!

Ka huangtau lui sauh a, ka intihuai lui a," Engati nge thil dik a nih loh ang? Min rawn biak ka ring a, ka lo châng reng a," ka ti leh a, kan sawi chhuak ta law law si a, sawi chhuah fai vek ka duh, rilru tuilairap deuha awm ka duh lo.

Kan inmelh dùn vang vang a, ka zak duh bîk lo, zahna hi ka ning, amah vàngin hlim theihna tùrah ka hlim loh phah palh ang.

"Ka tân i sâng êm a ni, ka chanchin engkim hretu i ni a, duhna ka nei ve ngawt che pawh hi a zahthlâk, nang leh keia dinhmun chu lei leh vàn ang hlauh a ni si a."

*RINTLÂK LEH RINAWM TAKIN I HNA THAWK RAWH, CHU CHU HLAWHTLINNA HMAHRUAITU AN NI SI A*