☆THE SWEETEST HANDCUFFS☆ - 51 By Dingdi Pachuau

 ☆THE SWEETEST HANDCUFFS☆ - 51 By Dingdi Pachuau

A insitzia leh a inhmuh hniamzia ka hria, tunah phei hi chuan a pu a chân tawh lehnghâl a, a hma lam hun hi ngaihtuahawm tak a ni, a inthlahrung viau pawh hi ka hre thiam viau; mahse, heti êma a inhmu hniam lutuk hi chu ka duh lo.

"Tung chhoa kal mihring, Pathian siam țheuh țheuhah tu nge sâng bîk awm? Hetia hna chhe tê ka thawh vàng hian em ni sâng ta luaa min ngaih a?" ka ti a, ani chuan," Ni pah tho e, sawrkâr zêm zen i ni miau a, chubâkah, ka chanchin zawng zawng hriain ka chanchin mai bâkah kan chhûngkaw chanchin, ka pa nèn kan inkâr zawng zawng pawh i hre vek, mi pângngai--" a tih lai mêk chuan," Duh tâwk teh, khatiang lam kha ka ngaithla duh hauh lo a nia," tiin ka kut chu ka lo phar a, chutah," Nihna leh dinhmun hian zahawmna  eng emaw chen leh i sawi ang 'sànna' kha a lo keng tel chu a ni maithei; mahse, a ni ber lo, pawimawh ber chu chhûngril nun nungchang hi a ni zâwk. I rinawma, i dik tlat chuan zahawmna chu i nei reng ang, ni lo'm ni?" ka ti ta duah a.

"A dik alawm."

"A nih chuan, eng nge harsatna a la awm em?" tiin cho tak hian ka en ràn a, a hmêl tîm deuh dai chu ngun tak hian ka en reng a, ka mitah tak chuan min rawn en ve ta a, kan inen ràn mai.

"I tân chauh tal pawh hian chhûngkaw pângngai tak neih ka va châk tak êm!"

Ka kuah chawt a, nghet tak hian ka kuah zui bawk. Hmeichhia zâwk ni mah ila ka kuah hmasak a ngai, a insitna zawng zawng hi tih bosak daih ka duh.

"Chu chu chhuanlamah chuan hmang tawh suh aw," ka ti sap a, ani chuan," Tluangte, ngaihtuah chiang rawh, tunah chuan eng mah neih ka neih loh bâkah heti zawng hi ka ni ta mai si a, i hmaah hian chhuan tùr rêng rêng ka nei ve si lo," a lo ti leh a, ka kuahna chu thlahin a hmêl chu ka en chho a," Chhuan tùr neih avàng kherin mi hi an induh tawn tawh ngai em? Kei chuan ka hre ngai hauh lo, a thuhrimin, kei pawhin chhuan tùr eng nge ka neih chuan? Nangmah i nihna vàng hian ka duh che a, kei pawh keimah ka nihna vàng chauh hian min duh ve thei la ka ti tak zet a ni," ka ti ta kalh kalh a.

Ngawi rengin min rawn en chhuk a, a mit khur tla deuh dâk chu enin," Ka la duh reng che a ni, ka rilru ang tho hi i la put ve ngei pawh ka beisei," zak rilru deuh tho si, a langa zahna ti lang duh hauh lo chuan ka ti sap a, he hun hlu tak hi bawh pelh ka tum lo. Ani hi chuan a sawi chhuak hmasa kher lo ang, huaisen zãwkah ka țan mai a ngai a ni.

"Tluangte..."

Muangchâng hian a rawn kûn hniam zui a, ka lo en kar, dìm zet hian a hmui chuan ka hmui chu a rawn sîktîr phawt a, a hmui lum thar thar chuan ka lung a tilêng, ka hawi sawn phal teuh lo. A hnuah chuan dìm leh duat tih hriat tak hian min fâwp ta a, ka lo hnar lo chiang kher asin. 

A hnu lama kan boruak chu a va nuam chiang tak! Ka rilru a hlim êm avàng chuan ka nui deuh reng mai a, tûm hmêl ka pu thei lo a ni. Ka mitmengah pawh a lang chhuak thei vekin ka ring, a khumah chuan innghèng chiala țhuin kan kut kan invawnsak dùn ràn reng a, țawng loin kan inen a, kan innuih a, kan lung hi a âwi veng veng ni berin ka hria. Huaisen ka chhuahna chuan rah țha rawn chhuahin hlimna min rawn thlen ta si a, ka inchhîr lo tak zet a ni.

Haw lam ka sawi rîk tâk hnuah chuan chaw ei nghâl tùrin min sâwm a; mahse," A, vawiin chu ti lo phawt ang, ni dangah zâwk le, ka awm rei tawh bawk si, i nî ngaih pawh a lo țha lo hial tawh ang, ka haw tawh mai ang?" ka ti a, ani chuan," Ka nî chu ngaihtuah duh suh, chaw pawh a chhum kêp tawh hial chein ka ring. Chuan, la haw rih lo la ka ti mang e," a lo ti thung a; mahse, awm dun reng theih ni hek lo le, kan chhuak dùn ta nge nge a.

A nî pawh chuan chaw ei tùr chuan min lo sâwm ngei a; mahse, ka ei lo. Rilru hlim tak pu chung chuan ka haw a, ka pën pawh a zãng vah ta mai, ka hmêl leh mitmengah a lang chhuak ngei ang a, Kimi pawhin min hre chhuak ngeiin ka ring.

Chumi nî ațang chuan hmuh zut ka  tum ta ti ila a dik ang, hmuh reng theih ka duh a, ka hmuh loh chuan ka ngai a, phone-ah tal ka be țhìn. Khawlaiah a tam lo va, a lèn chhuah ngai loh êm avàngin zàna lo lêng  tùr pawh hian ka phût duh vak lo va, a duh hunah rawn lêng ve rawh se ka ti a ni. Hmeichhia zâwkin va pan reng chu ka ti deuh ţhìn nain ka pan leh nge nge zêl, ani hi chu hriat thiamna thûk tak ka neih a ngai a, a rilruah ser lian tak a awm tlat avàng hian dimdâwih taka ka enkawl a ngai tih ka hria. A insitzia leh a indah hniamzia ka hre chiang a, he rilru hi paih bosak hret hret ka duh a, chuvàngin, a lakah hian beiseina sâng tak neih ka duh rih lo va, hun a kal hret hret ang a, a zia chho ve zêl tùrah ka ngai.

Zànah inlêng ka nei ngai vak lo va, lo lëng țhìn Amos-ate țhianho lah ram lamah an riak daih si a, kâr tàwpah an rawn haw chauh a ni si a, kâr laklawh zànah hian Zodina chu rawn lêng ve țhìn se ka ti thei khawp mai; mahse, a bulah chuan ka sawi lang ngai lo thung. Zan khat erawh chu ka rin loh lutukin a rawn lang ve nawlh mai a, ka hmuh sual emaw ka ti lo chauh a ni! Vawiin lamah a lu a mêt a ni maithei, a lang fai sar mai a, a hmêl lang chêr deuh pawh kha a zia deuh sawtin ka hria.

"Sam thar i nei a ni maw? Hmuh i nuam mang e," tiin ka nuih sak a, chutah," Khawi maw," tih pah chuan a bân chu na lo tê hian ka piaisak zauh a, hriat thiam loh hmel zeta min en pah hian," Eng nge ni?" a lo ti vat a, nui var var pah hian," Sam thar neih man maw le," ka ti leh mai a, a thingpui tùr chu ka siamsak zui nghâl a.

A hnuah a bulah chuan thlamuang tak hian ka țhu dar dar a, a chhan pawh Amos-ate an lo lêng dáwn lo tih ka hriat chian vàng a ni," I lo lút ka hmuh che khân ka hmuh sual che emaw ka ti a," ka han ti a, ani chuan," Chu, min lo beisei vak nange? Ka haw leh mai dâwn em ni ang?" a lo ti thung a, a fiamthu a ni tih hre tho mah ila thu tak zet hian," Teuh lo mai! Haw lo ang, i lo lêng khât bawk a, i lêng reng ang," ka lo ti vat a, sawi zawm lehin," I lo lèn beisei êm êmin ka beisei ngam lo țhìn zâwk che a; mahse, zanin ațang chuan zan tin i lo lan ka lo beisei ziah tawh ang," ka ti leh a, a kut chu ka khàl neuh neuh reng a.

"Min ning leh sî ang?"

Rilru inhmu tak hian kan inen a, kan thinlung chu kan inhriat tawnsak ni maiin ka hria. Kan innuih leh sak țhin a, kut inchelhin kan inen a, a hnuah kan infâwp leh a, tu dang mah kan ngai lo.

*******

"In inkawp leh thei ta chu ka lawmpui che u."

"Ka lâwm e," tiin nui sâng hian Kimi chu ka en a. Zodina nèn kan inkawp leh tih ka hrilh zo chiah a, ani hi ka kawm ber a ni si a, a hmaa kan inkawp thu ka hrilh loh pawh khân nuam ka ti vak lo rêng a ni.

"Inkawp tùr hi chu han ințhen deuh mah se an inkawp leh tho țhìn an ti alawm, nangni pawh hi inkawp tùr dik tak in ni a ni ang? Ințhen tawh miah suh u," a tih chuan ka nui leh sak a," Duhthusàm alawm chûngte chu, kan hma lam hun hi hre lâwk thei lo mah ila ani nèna kan hma lam hun chauh hi chu hre láwk thei ila..!" ka ti vang vang a.

Hmeichhe dang lakah chuan min kalsan ka ring lêm lo, mipa rinawm lo a ni si lo va, a rin tlâk a, innghahna tlâk tak pawh a ni ngei ang; mahse, tu mahin hma lam hun kan hre lo, a rilru hi a let but ve thei tho a, dimdâwih taka ka enkawl loh chuan mahni insitna vàngin min kalsan vang vang duh maithei si a.

Tunah chuan a pu a sùnna pawh a zia chho ve ta hret hret a, biak inah lamah pawh a hmêl hmih tùr a awm ve ta zauh zauh e. Lãwm ber chu ka ni lo maithei a; mahse, lãwm ber dawttu chu ka ni bîk hauh lo ang. Hma lam a pan zêl hi ka duh ber chu a ni, hmanhmawh tùrin ka duh lo, a inchhuih tlu palh ang, muangchâng leh fîmkhur takin, kawng en ràn chungin kal zêl teh se.

U Ropuia pawhin a hre lo thei bík lo va, min lawmpui thu sawiin," Tûn țum chu hma sâwn ve deuh in tum tawh ang chu tiraw? Ani pawh kum naupang tak a ni tawh bîk si lo va," a han ti zui zat a, ka lo meng phar ãk, inneih lam a ni a sawi hi!

A hnu deuha,"I lo hmanhmawh lutuk a nih chu!" nui paha ka tih chuan," Hmanhmawh loh viau tùr pawh a ni chuang lo, in induh tawn a, in inkawp a, in inhre chiang ve tawh tho ang chu, hmanhmawh loh ringawt loh tùr," a lo ti leh charh charh a.

"Dik ve leh tho mai." 

U Ropuia thil sawi hi Zodina'n hre ve ta se, engtin nge a ngaih ang le? Kan la sawi chhuak chhin hauh lo nain, a dinhmun ngaihtuah hi chuan hun a la tih ka ring lo ve tawp, hun la ti lo pawh ni se pawi pawh ka ti chuang lo, hun kan la ngah tihna a ni mai.

Pathiannîa kan inkhâwm bâng chu mau ațanga siam țhutna sei deuhah chuan kan țhu khâwm pût a, ka ding leh veiah Kimi leh Zodina an țhu a, nizàn lamah ruah súr mah se tukin lama ni chhuak țang et awtin kan țhutna chu a chhun ro leh vek tawh a ni.

Kimi chuan min rawn enin," Nizàn lama țawngțaipui ngaia an puan Pi Duhchhûngi kha chawhnu lam chu kan va kan ve dâwn em ni ang?  Naktûk lamah chuan ram kan riak leh daih emaw kha a ni ang a, kan hman tlâng lo palh ang," a han ti làr lár a, kei chuan," In tih dàn dàn le, ka pawm ve ve ang," ka lo ti vat a, Zodina lam chu ka hawi zui zat bawk a. Ani chuan," A țha alawm, sawi lo la chuan ka hre miah lo ang, a va bengvàr loh theih ve le!!" a lo ti ve sap a, Kimi chuan," Țawngțaipui ngaiah khân sawi lo se kei pawhin ka hre tawp nâng, chuti chu dâr 2 vêlah lèn tum ta ila, rei deuh pawh lèn kher a ngai hleinem, va lan ve hrim hrim kha a țha a," a ti leh a, ka lu ka lo bu nghat a.

Zodina chu an ina haw lovin ka inah ka luhpui a, thingpui lumin kan in a, Kimi min rawn sàwm hma chu a lêng ve reng rih tihna a nih chu. Ka ning lo va, ani pawhin min ning bîk lo, kan inngai tawn êm êm reng zâwk a ni.

Pi Duhchhûngi kan va kan lai chuan a khua a lo la sik a, inkhâwm bàn hnu khân a thisen chu an lo lâktír ve ngei tawh chu a lo ni a; mahse, eng mah an man lo a ni àwm e. Mi dang dang pawh an lo lêng ve nual a, rin loh deuhin Amos-a pawh ka hmu ve tlat a; mahse, a hnu lawkah chuan a bialnu chu ka hmu zui leh a, Kimi chu ka han zâwt a, tuna kan kan mêk hi Amos-a bialnu nu lo ni reng chuan! A lo awm ve reng pawh chu a lo àwm viau mai.

Kan haw dâwn chuan Amos-a pawh rawn thovin min rawn zui ve a, han fiam deuh hlak chu ka châk khawp a; mahse, ka insûm leh ta zâwk. A hun lo deuhin ka hria a, nakinah, Pi Duhi dam chian hunah ka la fiam ngei ang.

Zàn lamah chuan ruah a sûr bar bar a, inkhâwm pawh kan bâng hman lo.  Kan bàn meuh chuan a tla seng seng chauh a ni tawh, khaw awm dàn a hmuh theih loh avàng chuan kan haw vat vat a, in ka thlen hnu rei vak loah chuan a rawn ri leh ta buan buan mai rêng a, heti a nih chuan Zodina pawh rawn lêng tùrin a beisei chi loh ang.

Mahse, ka rin phâk lohin a rawn lang hlawl mai. Nihliap khum tho mah se a kawr chu a hnawm viau a, a kekawr jean pawdal tlâng lam phei chu huh tih hriat tak hian a rawng a lang tak bîk nghe nghe.

"Ka lo beisei ngam hauh lo che asin," tiin a inhrû hulna tùr puan ka lo be vat a, a inhru thuak thuak a, a hnung lam chu ka hrûksak ve bawk a.

"Zanin chu lo kal ngei ngei ka duh a."

"A pawi loh chu, i rawn kal hi ka lâwm daih zâwk nghe nghe," ka lo ti vat a, thingpui chu thlitsakin ka pe zui a. Thingpui ka pe zo ka kal sawn tùr chu ka bânah min lo mansak a, ka en vat a.

"Lo țhu ve phawt teh," tiin a bul sétah chuan min pawt țhu a, ka hnial bîk lo. Páwn lamah chuan ruah a la sûr buan buan a, ngaihngam takin a awm theih, mi dang chu an rawn lêng hauh lo ang le.

"Ka pu khân nang nèna kan inkawp leh theih kha a duh êm êm a, min sawipui ãwl lo a ni; mahse, khatih lao kha chuan thil engkim kha a la buaichuar zual si a, chhàn pawh ka chhâng lêt ngai lo. A boral tùr kha a lo inhre lâwk a nih ka ring, zungbûn pêk tùr che min lo leisak diam tawh nghe nghe a," a han ti sap sap a, ngawi renga enin ka lo ngaithla kar a, chutah, phawrh sat satin min han hmuh a.

"Mawi tak chu a ni lo; mahse, ka hmuh tirh ațang khân ka pe che a nih chuan thil hlu berah a țang ngei ang tiin ka ngaihtuah a," a ti leh a, a sawi ang tak chuan zungbun mawi leh cial tak chu a ni hauh lo; mahse, amah zungbun ngau ngau hlutna ai chuan min petu vànga hlu mai tùr zâwk a ni tih ka ngaihtuah daih, dik pawh a dik chiah bawk. Hetiang hi chu kei pawhin ka lei mai thei ngei ang; mahse, Zodina min pëk a ni dâwn si lo.

Min buntîr hnu chuan," Ka lãwm e," ka ti sap a, ka kut chu han pharhin ka thlêk vang vang a, ani chuan," Thil man tam tham tak pe thei che nih ka châk khawp mai," a ti sap a, kei chuan," Man tam tak aiin a hlu zâwk daih," ka lo ti vat a, thle hnaiin a biangah chuan ka fawhsak zauh a, ka tawlh sawn zui nghâl daih bawk a.

"Naupang emaw min ti chu a ni êm lo tiraw?"

"I ni hleinem, i ni em ni?" tiin ka fiam zui a, ka ding chhuak tùr chu ka kutah min rawn man hman a, min pawt lét dâwrh mai a, amah chu ka delh rawk rawk ta mai. Ka inthiam lo zui zat a," A nâ em?" ka han ti sap a, ka delh rawk rawk si a, ka delh nat ka hlau a ni. Ani chuan," Min delh na thei ngút pawhin ka ring lo," tiin hnuai lam ațang chuan a han nui suk a," Nula hmêl țha delh chu a na thei lo tawp ang," a ti leh a, min thlah duh mai si lo nèn, inbawh úrin kan inmelh ràn rán reng a, kan lu lam insi chiah lo mah se kan âwm zâwn vêl ațangin hnuai lam chu a insi chët vek a, a hnuah phei chuan kan hmui lam pawh a insi leh ta, kan thinphu inthumrawn tluk tluk ațang chuan kan awm dàn chu a hai theih miah loh ang le.

Mahse, a hnuah fel fai takin kan inthlah thei ta hlauh a, en pawh ka en țha ngam tawh lo hial mai, ka awm dàn kha ka zak a ni. A haw hnuah phei chuan ka thinphu chu ka han dek a, ka thinphu mai bâkah ka mar pawh a phu rang dat dat khawp mai, kan awm dàn kha a fuh miah lo, a chìn tam chi miah loh. Free takin, kan pahnih chauhin kan awm a, chutah pâwn lam ațang lahin thãwm a hriat dâwn hauh si loh a, tlêma tlêmah kan dai pelh țhelh chu a nih kha.

A tûka office ka kai tawh hnu chuan kan thlalâk țhenkhat min rawn dîl teh mial a, eng atân tak chuan ti dâwn ni maw ti rilru nauh nauh pah chuan ka han zawng kual a, ka nei nual si a, eng ber nge a duh tih ka han zâwt leh tê tê a, ani chuan *I duh duh kha a ni mai, chawhma lam chu i thlalâkin lunglèn ka lo inhnèm rih ang e*  a rawn ti a, ka nui deuh sak a, rilru a tinuam leh veng veng mai.

Engtin nge maw ka tih theih teh rêng ni, kan unauho group-ah Zodina nèna kan thlalâk chu ka han thawn ta zâwk a nih chu! Ka lo hre lawk lo zui a, a chhan chu damdawi lam tùr an rawn kal vàng a ni. Ka phone ka han en leh chiah chu, message lo tam hmanzia mai chu mak ka ti zâwk hial a ni. Kan unauho group a ni sia, 'vawiin chu an va lûn êm êm' ti rilru chung chuan ka han en a, chutah chiah chuan ka thawn lohna tùrah ka lo thawn a ni tih ka hre chhuak chiah! Delete dâwn pawh ni ila an hmu vek tawh bawk si a, awmzia a awm tawh lo, min rawn fiam nasa hlawm ngei mai.

Eng mah ka sawi ve duh lo va, insawi fiah dáwn pawh ni ila ka insawi fihlîm zo chuang lo ang, kan inkuah lai te niin, kan pahnih chauh zêla kan lâk a ni si a, a ngaihna a awm lo, an ngaih ngaihin lo ngai phawt se, nakinah ka hrilh hlawm tawh mai ang; mahse, ka huphurh rilru khawp mai thung, min han chilh nek hlawm ang a, han pha tùrin kan thlalâk ațang chuan ka inpuang nghâl ang thawthâwng a ni mai bawk si. A theih chen chen chu zêp rih ka la duh asin, mi fiam an peih hlawm si.

*MAHNI INSITNA, INTHLAHRUNNA LEH MI DANG AIA NÊP BÎK RIAUA INHRIATNA A LO AWM HIAN BEIDAWN PHAH NÂN HMANG LOVA HMA LAM HUN ATÂN CHONA LEH BEISEINA THAR MIN SIAMSAKTU-AH HMAN TUM HRÂM TÙR A NI*