☆THE SWEETEST HANDCUFFS☆ - 52 By Dingdi Pachuau

 ☆THE SWEETEST HANDCUFFS☆ - 52 By Dingdi Pachuau

Zodina bulah pawh chuan ka sawi ve a, a nuih a lo za ngang mai, min khawngaih pah bawk si a," Ka thiam loh vek a ni tiraw? Min rawn thawn tùr khân ka ti miau mai si che a, a bul chu keimah ka ni," a han ti ringawt a, chutia keima tihsual a thiam loha a han inpuh vek chu ka khawngaih leh zâwk a," I thiam loh a ni hleinem, ka fîmkhur loh vàng a ni zâwk. Kan unauho group ni lovah ka post ang tih hlauhawm deuh mai asin, min hre chiang vektute bulah ka post ta hlauh zâwk a," ka ti ve leh ta zâwk a.

"Kohhran group-ah emaw bial chhûng group-ah emaw te lo post palh ta la?" a lo tih leh chuan a fiamthu a ni tih hre tho mah ila," Ka thî a ni mai! A chî loh lutuk ringawt!" lo ti vatin ka kut chuan ka hmai chu ka han hup a, a lo nui hak hak a, a han nui hak hak ri hriat chu nuam ka ti kher asin.

Zungbun min pein ka bun vàng tawh a, ka kut chu ka en apiangin hlimnain min tuam thar leh țhìn. Țawngkam mawi lo ni lo se, hlawh nei zâwk ka ni nain ka la pe ve miah lo a, nuam lo ka ti rilru deuh, min pe a, pêk ve ka duh, min pêk ang zungbun kher hi a ni pêk ve ka duh ni. Lei tùrin Lungleiah kal a ngai a, fùr lai hi chuan zin chhuah hi ka huphurh a ni tawp mai. Kan khaw kawng hi, scooty khalh ka hlau mai ni lovin sumo-a chuan pawh ka hlau a ni.

Vànneihthlâk lutuk tak maiin Inrinnî alo thlen chuan khua a țha hlauh mai a, nimin chhùnah lamah pawh ruah tlêm a tla hlek chauh a ni a, khua chuan ka rilru min hriatpui ve a ni ngei ang le, kawng a zia deuh ringin tum láwkna êm ëm pawh nei lo chuan ka insu zo chu ka insiam chûk chûk a, ka inkhalh chhuak ve ta rãwih a. Pu Rovate pawh ka hrilh chuang lo, ka rilru kam tlattu Zungbun lei thuai ka duhna chuan min ur thlu a ni ber ang chu.

Kawng chu ka rin ang ngeiin a lo zia lutuk, ka huphurh theih teh rêng nèn, hetiang hi a nih chuan fùr laia Lunglei kal pawh ka cho zak ngam tawh ang. Nimin lamah ruah a tla hlek chauh a ni bawk a, kawng khuar leh tui tling chu awm nual mah se hêlna tùr a awm ve zêl a, him pialin Lunglei chu ka inkhalh thleng ve ta mai, ka pheikhawk erawh a berh ve nual thung.

Tih tùr dang vak nei hek lo le, tlereuh dàwrah chuan ka kal nghâl a, ka han en kual zung zung a. Min pêk hi Silver a ni a, Silver chu ka en kual ve nasa viau nain ka duh zâwng ka hmu mai lo. Rangkachak zawrhna lamah ka kal leh a, ka en kual leh dan dan hnuah chuan pakhat duh ve deuh mai chu ka hmu ta a, a bun tâwk tùr ni se ka hre chiang ve tawh bawk a, enin ka han teh chhin vêl a, ka duh ai chuan pan deuh mah se ka la ta tho, ni dang ni dang tih leh zawng, a tlai zêl mai mai. Ka pêk hun tùr leh ka buntîr hun tùr ka han mitthlà chhin a, ka nui ru var var mai, a lãwm ve ngawt ang.

Ei tùr leh ka mamawh zualpui ka lei leh hnuah chuan tih tùr dang nei hek lo i, ka tlãn haw leh ta ringawt a.  Ni chu sa hran lo mah se ruah rawn hnaiin a lang hran lo va, khaw țhat laia haw vata in thlen thuai ka duh a ni.

A tûk chawhnuah chuan ka pe ta a, ka buntîr lai chuan," Ka thu lo chuan phelh miah suh ang che, nula dang dang tiamin, tu mahin an phelh tùr a ni lo," ka han ti zui a, ani chuan," An phelh miah lo ang," a lo ti ve sap a, zungbun kan bunna lam kut ve ve chu phar chhuakin kan han en tawn vêl a, kan pharh dun lai chuan thla pawh ka la nghe nghe, nakîna la en atân.

Hlim takin hun kan hmang chho zêl a, a nu leh pa leh unaute chanchin a sawi chhuak ngai lo va, kei pawhin ka sawipui ngai lo. Kan hma lam hun tùr kan la sawi dùn ngai hauh lo nain inphatsan erawh kan tumin ka hre lo va, kan tûn hunah hian kan chêngin kan hlim dùn viau. Kan induh tawn ve tâwk a, mi dang kan ngai lo va, kan pahnih hian kan inawm tlei tâwk viau bawk; mahse, hetia kan hlim dun viau lai pawh hian a châng chuan a ngawi deuh reng leh a melh ngai a melh leh reng țhìn chu ka hmu ru fo a, an chhûngkaw chanchin ngaihtuahin a pu boral tawhte kha a ngaihtuah chhuak țhìn a ni ang ka ti a, chu chu duh lovin chutianga a awm ka hmuh chuan ka be ta vat țhìn, a chhan chu a nunhluia a lêt leh kha ka hlau a, tunah hian a hlim ve viau tawh a, hun kal tawhin a hlimna a lâksak leh mai ang tih ka hlau a ni, chu vàng tak chuan a bulah hun, a tam thei ang ber hman ka duh.

Zan khat chu a lo lèn laiin unauteho chuan group video call an rawn ti a, kei pawh min rawn call nghe nghe. Ka hmu reng a, ka tel ve duh lawk lo va; mahse, a hnuah chuan ngaihtuahna thar nei thutin Zodina lang tel thei ngei tùra a bul hnai sêta țhuin call chu ka chhâng ve ta a. Mi dangin Zodina an hmuh chuan an rawn 'Hi' sap sap a, a hnu deuhah phei chuan keimah pawh min rawn be tawh lo, Zodina chu biain zawhna an zâwt a, interview an neihpui ni berin ka hria! Zawhna an zâwt a, an nuihpui leh țhìn bawk a, an hlimpui viau mai. A țha e, Zodina an lo hmêl hriat sa pawh hi a țha alawm, ka unaute bulah hian ani pawh  inthlahrung viau lo se, kàwm ngeih viau hlawm se ka duh.

Hun a ral a, tunah chuan mi zînga awm pawh a inthlahrung lo ve deuh ta. Inkhâwmnaah ka hmu ve ta fo a, a han inchei deuha thuamhnaw vâr lam a hâk hi chuan Jakob-a kha ka hre chhuak lo thei lo. Ani kha a vâr lam ngaina ve ngang kha a ni si a, a ngaihawm roh mai mai, tunah te hian khawiah nge a awm ve ang le? Mami boral kha a la sûn tluang zêl ang em? Hriat a châkawm ve mai mai ka ti; mahse, he khawvêlah hian kan inhmuh leh tawh pawh ka ring lo, lo hmu ta teh rêng pawh ni ila, eng ang hmêl pu nge tih pawh ka hre dâwn si lo va, ka hre chhuak thei lo tawp ang.

Hotute'n vaccine pe paha min rawn tlawh dâwn avàngin hmá takah U Ropuia chu a rawn inkhalh thleng a, khawtlâng hruaitute tihbuai ai chuan tiin ka inah chuan an ei tùr kan lo siamsak a, pahnih chauh an ni dáwn bawk a, ei siam pawh a hautak lo khawp mai.

Vaccine pe paha rawn kal an ni a, kan hna thawh dàn leh kan office vawn fai dànte chu mit ngeiin an rawn hmu ve a, an lung a ãwi ve viau chuan ka hria. Min sawisêl lo va, min fak hluak chuang lo bawk. Kan enkawl tel ve tho Saisih lamah erawh chuan vawiin chuan kan kal hman ta lo, naktûk lama kalchilh kan tum ta mai.

Zànah Zodina a lo lêng lo va, titau lek leka ka va biak chuan ring vak lo hian a rawn nui phawt a," Rawn lèn chu ka duh viau a, vawiin lama in hna vàngin i chauh ka ring deuh a," a rawn ti a," Chau nâng; mahse, i rawn lèn si loh chuan ka mu daih mai ang," tiin ka han chhâng a, ani chuan," Mu rawh, mut tam hi a țha a nia," a lo ti leh a.

"Nang i mu tawh em?"

"Ka tum țan deuh," a rawn tih chuan," Nang pawh i chau ve tho a ni ang maw, nia, mu tam rawh, mut tam hi a țha a nia," ka han ti deuh kher a, ani chu a lo nui leh hak a," I va hre êm êm! Tu sawi nge i hriat a?" a rawn ti leh a," I intithei a nih chu a!" ka tih leh tâkah phei chuan a nui hak hak a. 

A hmêl leh taksain ngai a awh chho thei meuh lo chu hrehawm ka ti. Ei tùr țha nia ka hriat hi chu ka hrilhin kei ngei pawhin Lunglei kal, ka ngam tlâk deuh chu ka chah zauh zauh a, chu chu ka pe țhìn. A ní pawhin a lo manganpui ve tho a, chaw a ei mumal loh vànga hmêl chu tla a nih thu a sawi chuan," Chaw ei mumal loh chuan țhat chhuah hi a har asin, ngawi rawh, a ei châk zâwng zawh chhuah ka lo tum ang e," ka ti a, zawh chhuah ngei pawh ka tum ruh viau.

Ka han zawh chuan," Chaw ei châkna hi ka nei hlawl lo a ni, bâkah, hmêl han pângngai leh tùr chuan hun a duh rei ve alawm," a lo ti mai a, kei erawh chuan," Châk lo tih vàng ngawtin ei țhat loh tùr a ni lo, ei țhat sauh zâwk tùr, ei châk loh hun lai tak hi taksain a mamawh hun lai tak a ni duh thung a nia, han ei châk deuhte i nei em?" ka ti zui zat a.

A ei châk a sawi chu leisakin ka siamsak a, a han ei ve ngei a; mahse,  duh rei lêm lo," Ka pumin a duh vak lo tlat," a ti tlat a, a pumin a lo duh vak leh duh vak loh ka hre ve mang si lo va, amah berin a sawi miau si a, a dang lehzêl pawh ka leisak ngam tawh lo.

Kimi'n kan chanchin a hre vek tawh a, Pathiannîah pawh hian min zui duh vak tawh miah lo," Chance ka pe ang che u," a ti deuh tlat zêl a," Ngai lo, zànah inkawmna hun kan nei thei tho," kan tih pawh chuan," Ka dîp mai mai che u," a ti leh tlat a, tihluih hleih theih pawh a ni lo.

Kan unauho zîngah palai hmêl hmu kan awm ve ta tlat mai! U Thangpuii a ni a, kan unauho zîngah chuan a upa ber pâwl a ni ve tawh nghe nghe. Aizâwla awm an ni a, U Thangpuii ber hian cosmetics dàwr changtlung ve tâwk tak a nei a, a thawk rim bawk a, a inkhâwl tam ve tawh khawp ang le. Palai tîrtu ni se mi dang daih ni lovin a bialpa lo ni ve ngar ngar, kum nga zet a lo kawp tawh Țana a ni, a sawi dànin tlangvâl fel leh hawiher zau tak a ni àwm e. Kan lawmpui viau rualin kan ui hlawm hle a, group-ah pawh chuan kan sawi lang hial nghe nghe. U Thangpuii nu Nu Mawii lah chuan palaite hnênah chuan kumin chhûnga a fanuin pasal a neih chu a lo remti tlat lo va, palai lam ni se, zâwldawh takin an dàwr zêl a, inneih phal lo pawh ni lova a hun a hlat vàng maia han thinrim lah chu Țana chuan a tum hauh lo a ni ngei ang, nakkum kum tìr lamah daih an innei dâwn a nih tãk chu.

U Thangpuii chuan fiam a hlawh leh ta, group-ah tu nu leh pa mah an awm bawk si lo va, U Thanpgpuii thlavãng hauhin Nu Mawii chu kan sawisël bàwng báwng hlawm a, Țana kan khawngaih thute chu sawiin fiamthuin fuihpawrh kan châk thute chu kan thil sawi langsâr pâwl a ni; mahse, a hnuah erawh U Thangpui rilru thawi dam nân hun leh nîte ral chakzia leh nakkum pawh rei lo té, thlen phâk pawh kan inrin loh laia rawn inher vat țhìn a nihnate chu kan sawi kual leh a, U Thangpuii kan hnèm a nih ber chu.

*******

"Tluangte, i lo kal hman lawk ang em?"

Zodina nî a ni a, ani hian thil ho mai maiah chuan min ko mai mai lo ang tih ka hria, chu vàng chuan, a rang thei ang berin ka kal vat a, Zodina chu a pum a lo nâ niin, a na ve viau a nih ka ring, a lo vial ngalh ngalh mai a, a thlan a tla nasain a lo tuar rei deuh tawh a ni maithei, a aw pawh a thâm viau mai.

A chhan tak ka hre si lo va, a pum nat vànga a vial a vial chu ka khawngaih ém avàng leh en hrehawm ka tih êm avàng chuan ka jection ta tawp a, rilru țawngțaina ka nei nghâl bawk. A thisena ka damdawi kah luh chuan a thawk țha khawp mai, rei nghah a ngai miah lo, a vial muang telh telh a, a hnuah phei chuan a muhil zui daih a ni ngei ang, che lovin awm ta reng a. A bulah chuan țhu dùnin a nî chuan," Tukina kan chawhmehah a taksa huat zâwng, a pum han tina thei a awm àwm ka hre si lo va, eng vàng tak ni ang maw? Amah lah hian thil a ei mai mai ngai si lo va," a ti sap sap a, han rin tùr ka hriat loh avàng chuan lo țawng ve tùr pawh ka hre lo va, ngawi rengin Zodina hmêl chu ka thlír ngawih ngawih mai a ni. A muhìl thaw sâk sâk hmêl chu thlìr nin har ka ti a, ka khawngaih rualin ka duhna a zual sauhin ka hre zui bawk.

A harh hma chu a bulah chuan ka awm ta reng a, a nî pawhin in hnuai lamah min chhuk thlâksanin thil țûl a thawk mawlh mawlh tawh a. Office kha kalhin ka kalsan tawp kha a ni a, min mamawh office-a rawn kal tum an awm loh hrâm ka beisei. Han hawsan daih chu ka hreh si, lo harh phawt se, a pum nâ a reh chiang bal a ni tih ka hriat hunah chauh ka haw ang.

A hnua ka zawh chuan ani pawh chuan a eng eiin nge a pum chu tinâ ber tih a hre bîk lo, an chawhmeh eng ber emaw a ei sual a ni ang kan ti ta ringawt a ni. Tunah chuan a dam tawh bawk a, han ngaihtuah lêt chiam pawh a țûl tawh lo ve.

"Ka hlauhthàwnzia kha...! Ka țap lo chauh a ni," ka tih chuan," Hlau mah ta che, engtin mah ka awm tawh loh hi," a lo ti mai a, kei erawh chuan," A hlauhawm êm mai, khatiang kha chu thleng tawh lul suh se," ka ti leh sap sap a, zungbun kan inbuntîrna lam ve ve kan kut chu a invuan ràn a, kan inen a, kan innuih leh sen sen țhìn.

*MI TIN HIAN KAN DINHMUN ȚHEUH AȚANG HIAN PATHIAN KAN MAMAWH VEK, PATHIAN MAMAWH LO RÊNG KAN AWM LO*  Kan mamawhzia hre lo khawpin kan bosan rei tawh zâwk em?