☆THE SWEETEST HANDCUFFS☆ - 53 By Dingdi Pachuau

 ☆THE SWEETEST HANDCUFFS☆ - 53 By Dingdi Pachuau

Ka ngaihtuah êm avàng chuan ka theih ang angin doctor hmêl hriat ka neihte ka han be lâwr ve dun dun a, anni pawh chuan thuràwn min pêk dàn an hre vak bík lo, a inentíra a kawchhûng  an lo check a nih ngawt loh chuan; mahse, tunah chuan a reh tawh a, nâ a sawi leh tawh lo chu a nia. Chu vàng chuan, a hmaa kan rin dàn 'Thil ei sual a nei a ni ang' tih chu kan ring ta ber. A nî lah chu a chawhmeh siam chungchângah chuan a inthiam lo teh ngawt bawk a, Zodina nèn chuan," Ei sual palh châng chu a awm ve thei alawm, inthiam loh phahna chi pawh a ni lo," kan ti a, ka rilru dik tak pawh a ni, a hma pawhin a siam ve fo tawh ngei ang a, bâkah, ei sual vànga nâ a ni ngei em tih pawh kan hre hek lo; mahse, a inthiam loh êm avàng chuan ka khawngaih reuh khawp mai. Chutiang kan sawi vàng ringawt chuan a rilru a nawm phah sawtin ka ring hran chuang lo bawk.

Kimite loah thlai phur tùrin ka feh ve a, Vaimîm chu an han ngah êm êm khawp mai a, han hawi ila Vaimîm kûng hi a ding hring suau ti ila a dik ang. A țan nân thlâm bula mi chu Kimi chuan a'n phih thla tawp a, a mei chhèmah chuan ka han rawh sar sar a, ka rawh chhûngin thlâm bula hnim chu a lo pawt fai thung. A naute pahnih erawh lo mawng lamah hlo an thlo thung a, chawfâk tùrin an rawn chho țêp tawhin ka ring. An riahchilh lo va, zîng hma takah an kal a, Kimi'n chaw a pe țhìn a ni.

Pakhat chu ka rawh hmin thuai a, ka han bung a, Kimi rawn lût chu a bung lehlam chu ka lo pe vat a. A lum vat vat lai chuan ka han keih sar sar a, a hâng tui si a, ka lei ka lem tel lo chauh a ni. Kan ei zawh hmain pakhat ka rawh chu a lo hmin hman leh tawh a, ka han bung leh a.

Nilêngin loah chuan hun kan hmang a, Kimi'n chaw a keng tam bawk a, chawhnu lamah maian a bai a, thlai rah nèn, purùn a han râwt thak a, chaw kan ei leh ringawt bawk. Ka  chaw ei a tui lutuk a, kan chawhlui chu ka thawhsan thei lo țêp chu a ni. Ka cousin-teho ka'n intihtheih khum a, ei ve an châk thu leh loa kal ve an châk thu chu an rawn sawi tliar tliar hlawm a, ka nui var var reng mai.

Chawhmeh chi hrang hrang leh Vaimîm ka phur haw ve țeuh a, keimah chauh phei chuan ka ei sêng hauh lo ang, zànah Zodina lênga ka sàwm a ngai a ni, a ei châk ve viau ang. Ti ila, an nei ve tho tak e, a hmain Vaimîm pawh min hawntîr tawh tak kha. Chu pawh ni se, inlêng tân ka chhùm hluah tho ang.

Ka Vaimîm hawnte chu thlâ lain ka status chuai chuai a, an rawn comment tliar tliar hlawm a, ka va han intithei tak! Thingtlâng lama thawk vànneihna nî a ni, min awt dâwn tih ka hre reng.

Mahse, Vangvat ka lo kai a ni chêk ang chu, ka chàwn chu a thí ta tlat mai a, amah lah chu ka hmu si lo. In chhûng chu ka han zawng kual a, vawiin lama ka pheikhawk bun chu ka va en leh a, ka mawza nèn; mahse, ka hmu chuang lo. A hnu deuhah erawh veranda ding lam sîr deuha puar zeta a lo mu tul chu ka va hmu ta a, ka râp ngei mai.  Ka han hawi kual a; mahse, ka ngam lo, chutah, in chhûngah lût leh vatin ka hmuh hmasak ber ka dawhkàn hrûkna chu lain ka zai thla a, Vangvat chu ka va khuh ta ringawt, ka that ngam teuh lo mai! 

Ka chàwn han thì duhzia lah chu, lehkha ka han bel a, a reh chuang lo. Ka kekawr hâk lai pawh ka khúp chungah ka thlep ta ringawt a, a thï ka hrûk loh hlek chhûng lah chuan  ka chàwn chu a lo zùl thla hman ziah lehnghâl a, zàn mut a huphurhawm ka ti. 

Kimi rawn kalin min rawn hmuh chuan," Vangvatin a lo zûk che a ni maw? Eng nge i hnawih?" a rawn ti a, hnawih tùr ka hriat loh thu ka hrilh chuan a haw leh lawk a, a rawn luh leh chuan eng emaw hi lehkhaah a rawn keng a, eng nge pawh ka hre lo, Vangvat min zûkna laiah chuan tlêm tê a han bel a," A reh vat mai ang," a ti leh a.

"Veranda  ding lam síra puanthem kha han la sawn chhin teh, ka khuh tawp a," ka tih chuan min rawn en vatin," Eng?" hriat thiam loh hmel tak hian a rawn ti a, kei chuan," Vangvat chu maw le," ka lo ti mai a, a chhuak vut a, a va en a ni ngei ang, a rawn nui ta kar kar a.

"I va duat ve a! Puan i han sintîr ngei a nia? Vangvat duat ber i nih ka ring a ni," tiin a nui leh kar kar a, kei chuan," Ka duat vàng a ni lo, ka thah ngam loh vàng chauh a nih kha, chu vàng chuan ka khuh tawp a nih kha aw," ka lo ti thung a, a la nui kar kar reng mai.

A chhûngte bulah a lo sawi a ni chêk ang, min hmuh apiang chuan an nui leh ringawt zêl a, "Vangvat duat thiam ber," min tih loh leh," Vangvat puan sintîr awmchhun," min ti a, an nui lo thei lo, han chhàn lét dàn ka hre țhìn si lo va, ka nui ve ringawt țhìn. Mi dangin an lo hre kai zêl a, mi fiam chîk takah an nei a, huat thu a awm bîk bawk si lo. Zodina'n a hriat ve chuan," Ani hi chu a ngilnei êm a ni, ka hriat thiampui," a lo ti deuh ngei a, lei sei fê chhuahin ka ner khum vak ringawt.

Hun remchâng dangah Zodinate loah ka feh ve ta leh a, kan pahnihin chaw ei khamah kan kal a, khua a țha bawk a, ka phûr sârh mai. Kal pah chuan min fiam pah a,"Vawiin chu i Vangvat kài ai kei hian ka zûk zâwk dâwn che em maw ni le?" a ti țhin a, a chângin," Vangvat chu ni ngat ila chuan ka zûk chiang ngawt ang che; mahse, i chàwnah mai chuan ka duh tâwk ve hauh lo ang," a ti a, ding meuhin ka han melh râm râm a, ka haw tak tak teuh lo tih a hre chiang ve bawk a, min lo nuih sâng thung.

"I kal țhat loh chuan ka zûk che i duh tihna a ni ang," a ti leh a, ka kal țha chiang teh asin. A nui hawk hawk a," Rawn hawi leh chiah la?" a tih pawh chuan amah hlat deuh taka ka kal chauhin ka lei ka chhuah khum ngam a, rilru a hlim bawk a niang, kawng kal chhûng rei lo ka ti kher mai.

Lo tih lëmah, leipui an tih ang hi a ni ber ang chu, a sawi dànin. Hla deuh hlek ațanga an thlâm ka hmuh chuan," In thlâm reuh chu, a va tê reuh ve!" ka ti chûl a, ani chuan," Thlâm pawh a ni pha lo, bêktê a nih saw," a lo ti mai a, nui chung hian," A, thlâm tê ka ti tho tho ang," ka ti ve thung a, nui hak hakin kan kal zêl a. Bêktê chu ràlkhat ațanga hmuh ai ngawt chuan a hmunah chuan a lo lian a, kan han innghat a, kan țhu chàwl dar dar phawt a.

An leipui chu a fai hle mai a, an thlawhna a la rei lo a ni ngei ang, hnim hmuh tùr a awm pawhin ka hre lo. Hawi vêl a nuam hle a, thlî pawh ni sa vel vawl kárah chuan a rawn thaw heuh heuh reng a, hah a dam nghâl sawng sawng thei hial a ni. A hmun a zâwl viau lo nain a âwih lutuk hran lo va, a zau fahran lo nain Vaimîm leh thlai chi hrang hrang a awm kim hmèl viau mai.

Feh tih lêmah chawhmeh la tùra Zodina'n min sàwm vàngin a nia ka kal ni, bâkah, a bula kal ka châk ve hrim hrim, ani nèn hi chuan khawi hmunah pawh ka kal châk reng hialin ka ring! Chaw kan fûn a, bêl pakhat, thingpui lum nâna an hman ţhin ni àwm tak, mang zetah chuan chawhmeh tùr kan siam a, chumi pah chuan Vaimîm ka rawh bawk a, nî a țang țhain mei lum bulah ka tâp a ni bawk a, thlan a tla duh bawrh bawrh khawp mai. Ka puan ken chuan ka inhru deuh reng a, ka biang pawh a tai leh nasa tawh ang chu. 

"He lai hi a mang a nih hi," tiin ka khabe chu a rawn tuai fai a, bêl ka khawihna khân ka khabe kha ka tuai ringawt kha a ni a, a lo mang a ni ngei ang.

"A mang nasa em?" ka tih chuan min han thlêk vang vang phawt a," Nasa lo ve, ngawi teh, i inhmeh tho mai ka ti," a han ti a, kei chuan," Âwihawm loh lutuk!" ka lo ti hlak a, ani lah chuan," Ka ti tak tak alawm, engkim mai hi i inhmeh vêl vek a nih àwm hi," a ti leh a, min han tih vêl dàn chuh, làwmthu sawi nân a malah chuan ka chumsak taih a.

"A na lo, ka hmangaih che."

A hmêl ka en chuan a nui miah lo, fiamthu thawh hmêl pawh a pu lo, min en ràn a. Khap hauh lova en lêt ve rân pah chuan," Eng maw i sawi!" ka han ti sap a, ani chuan," Ka hmangaih che, ka thinlung zawng zawngin ka hmangaih che," a rawn ti leh a.

"Tak tak a ni tiraw?!!" Âwih tho si, âwih ngam chiang lo deuh si chuan ka han ti ve leh a, hlimna chuan min tuam hlup hlup niin ka hria, hah vang ni hauh lo chuan ka thinphu chu a rawn rang a, rang zet zetin a rawn phu dawt dawt mai, ka marphu pawh chutiang bawkin. Ka thisen kal laite pawh chu an intlànsiak vawn vawn ni berin ka hria!

"Aw, ka ti tak tak! Ka hmangaih che a ni, Tluangte."

Kan inhnaih telh telh a, kan hmai a insi deuhthaw ta. Chutah, a rawn thle hnai lehzual a, lungchim takin min rawn fâwp ta a, ka lo chhâng lêt rang teh asin. Kan kut leh hmai a balh leh balh loh pawh kan ngaihtuah tawh lo, kan inkuah a, kan inchûl a, ka biang tawn tawnah a vuan thùl, eng thil dang mahin min tibuai pha lo a ni ber mai.

"Kei pawhin ka hmangaih che."

Ka hlim êm avàng chuan nî sa vel vawl tak chu sá ka ti phal lo va, khua pawh chu lum ka ti phal tawh lo. Kan insi chêt reng a, bêkte chhûng chu mi pahnih lek tân chuan zau viau mah se insi chêtin, chêp zetin kan țhu a; mahse, hrehawm kan ti lo va, chêp lah kan ti hek lo, nuam kan ti zâwk!

Kan ni hman dàn chu ka duhthusàm a ni, ka theihnghilh tawh hauh lo ang le. Mitmei vèn tùr a awm lo va, chutih rual erawh chuan humsual dai lo tùrin kan insûm ve ve thung. Kan țawng loh kârin kan infàwp a, kan inen a, sawi duah loh pawhin kan induh tawnzia kan inhriatsak a, thlifîm lo thaw leh heuh heuh țhìn chuan kan induh tawnna leh kan inhmangaihna chu a rawn nem nghet ni hian ka hre nghe nghe.

Ka hlim a ni. Ka hlim êm êm a, min hmangaih thu min han hrilh ngam kha amahah inrin tâwkna a rawn nei leh tawh tih ka hriat phah a, ka hlim zual phah lo thei lo. A inhmu hniamin a insit êm êm reng a, han hrilh ve sateh mah ila a rilru hliama a awm tlat avàngin a tân a harsa tih ka hria; mahse, tunah chuan a rawn zia chho a, a rawn pângngai țan ta viau tih a lang reng a, hei hian min tihlim lo thei lo a ni.

Tunah chuan khuaa mi zawng zawngin kan inzui tih an hre tawh a, mi pawh an fiam tawh lêm lo; mahse, țhenkhat țawng duh deuhte'n," In inhmeh ngawt mai, innei thuai thuai teh u," tia min fiam leh zauh țhìn tih loh chu a pâwnga takin min fiam hlawm tawh lo. Pi Vani pawhin," In inhmeh bawk a, ințhen miah suh ang che u. Zodina lah mi sual a ni lo va, nang lah nula fel tak niin, in inkawp rem ngawt ang," a lo ti ve bawk a, min duhsaknaah leh min faknaah chuan ka lãwm a, ka làwm rualin ka zak pah tho bawk.

Arini pawhin palai hmêl a hmu ta a ni ang, sawi thãwm a awm tlat mai. Ka rin aiin neih hma a tum tlat; mahse, a țha e, nei rawh se. Hmu zo hi chuan nei thuai thuai se, inneihna chu thil hlimawm a ni alawm. Amos-a kâ ațanga ka hriat a ni a, a hnuah Kimi'n a sawi leh bawk a, thingtlâng hi zawng, thu thar deuh hi chu a darh hma deuh chu a lo ni. An inneih hun tùr an tifel nghâl vek a, October ni 27-ah an innei dâwn ta a ni. 

"I lawmpui em? Nge chêng khatin ka râl dàwn che?" nui chunga ka tih chuan thutak zet hian," Ka lawmpui khawp mai, a pasal tùr nèn chuan inhmangaih takin awm dùn se la, rei tak dam dùn rawh se," a lo ti daih mai a, a thutak hlê mai si a, ka inthiam lo țêp a ni. A hnu deuhah erawh chuan nui chung hian," Ràl ka ngai hauh lo, duh leh amah va râl zâwk la ti nia," a ti a, kan nui hak hak a.

Dam chuan hun hi chu a ral ve zêl chu a nia. Kan inhmangaih thu kan inhrilh tawh a, next step chu inneih lam chungchâng a ni tawh ang; mahse, pakhat tê mahin a la sawi chhuak chhin hauh lo va, a la hma deuh a ti pawh a ni maithei a ni. Ni e, chutiang meuh han sawi tùr chuan kan la inkawp rei lo deuh a ti a ni mahna, a  hmeichhia zâwkin sawi chhuah thu awm hek lo le, a sawi chhuah hun ka nghah tawp mai loh chuan; mahse, ka nghâk rei àwm mang e.

Ka nute hnênah Zodina nèna kan chanchin hi ka hrilh hran lo va, nakinah hmaihmaah chiang zâwkin ka la hrilh mai ang chu ka ti a ni. Anni pawhin min duh lohpui chu ka ring hran lo, a chhan chu an fanu hi min hmangaih hlê si a, ka hmangaih chu min hmangaihpui ngei ka ring tlat a ni. A nun dàn leh a nungchang tak tak an hriat phei chuan duh loh chu sawi loh, an khawngaih viau zâwk ngei ang.

Zan khat chu a rawn lêng dâwn emaw ka ti a, a in tùr thingpui pawh ka lo lumsak diam tawh a; mahse, a rawn lang miah lo mai a, 'ani hi, eng buaina emaw a nei a ni ngei ang' ka ti rilru nauh nauh a, han biak mai pawh chu duh viau mah ila a lo buai viau tâkin ka ti a, ka be ngam ta lo va.

A tûk chhùnah chuan titau lek lek hian ka han bia a, dam raih hian," Ka thiam loh a ni, rawn hrilh tùr che ka nih tehlul nèn, min ngaidam rawh," a rawn ti a, a aw chhuak dam raih mai avàng chuan ka titau zawm duh ta lo va," Ka lo beisei reng che a, a chhan tal min hrilh thei ang em?" ka han ti a, ani chuan," A pawi ka ti tak zet a ni, tûn hnuah chuan a thleng tawh lo tùrah ngai ang. Nizàn kha chuan ka kua kha a rawn chiang lo ringawt a, ka tlàn sek vàng a nia," a rawn ti ta a.

"Chuan, tunah eng nge i an? I țha em? Damdawi i ei em? Eng damdawi nge i ei?" tiin hlauthãwng tak chuan ka han zâwt nghâl sawk sawk a, ani chuan," Aw, ei e, ka zia tawh e, zia tawh tho mah ila min rawn tlawh tho ang em?" a rawn ti a, kei chuan," Aw, tlawh ang, i eng ei nge ni ang le? Tunah i tlãñ tawh lo tak tak maw?"  ka ti leh a, ka ngaihtuah lo thei lo. A taksain ngai a la awh loh tehlul nèn, kawțhaloin a han zùt leh phei chuan, a tla dáwk dâwn asin.

Chawhnu lamah ka va tlawh leh ngei a, ka rin ang tak takin zan khat chauh mah ni se a hmêl chu a lo tla dâwk tak tak nia! Damdawi ei tùr ka pêk chuan," I fel țhìn mang e! Ka tawng lo ang che tih hi ka hlau țhìn," min en vang vang pah chuan a ti phawt a, chutah, sawi zawm lehin," Ka țha tawh tak tak a nia, i rilru tihah miah suh, tukin ațanga tûn thleng hian vawi khat chauh a ni ka la tlàn ni, ka damdawi ei kha ka ngeih a ni ngei mai," a ti leh sap sap a.

"A țhat hlauh chu, eng emaw harsatna, buaina leh natna i tawh hi chuan min rawn hrilh zêl thei la ka ti, thil harsa pawh a ni lo va," ka han ti a, ani chuan," Aw le, teh rêng mai. Ka țawp roh i ti ngawt lo maw?" nui hmêl pu deuh hian a han ti a, kei erawh chuan," Țawp lo ve, tu pawh chunga thil thleng thei a ni alawm, i pum khân a nawm loh phah ngei ang a, tunah a la nuam lo em?" ka ti a, ani chuan," Eng mah nawm lohna a awm lo ve, ka pângngai vek tawh e," a lo ti a, a nui deuh var var bawk si a, ka ringhlel lêm lo.

Arinite inneih nî a lo thleng a, kan biak inah ngei chuan an innei ta. Khuaa mi zawng zawng min sàwm vek avàngin ka kal ve a, Kimi'n min sâwm tlat a, bâkah, a inthuamna vêl ka hmu châk tlat pek a; Zodina erawh a rawn kal ve lo thung. Ka fiam a," Bialnu hluite inneihnaa kal te chu a," ka ti hlak a, chu vàng chu ni maw a kal duh tlat loh ni, pawi pawh ka ti hran chuang lo.

Arini chu an chei mawi khawp mai a, a kawr pawh a mawi, inhmeh pawh a inhmeh hlê bawk a ni. Hmuh a nuam a, a hlim bawk a ni ang, a nui sâng reng a, a lawmpuiawm khawp mai. Amah hi huatna ka nei tawh hran lo va, khati khawp khân min àn khumin min han ti kual vêl mah se, Zodina a duh ve êm vàngah ka ngaihsak mai a, kan duh a inang a, chu vàng chyan ka haw chhunzawm thei bîk lo a ni, hetia pasal a han nei thut pawh hi ka lawmpui a, Zodina sawi angin a pasal nèn hlim taka nun an hman chhoha fate nèn hma lam hun hlimawm an neih ka duhsak a ni.

Kum tàwp pawh kan lo hnaih leh ta, Krismas rim a rawn nam leh țan deuh tawh a, lo neite pawhin buh an seng zo tawh a, inah an thlen zo deuh vek tawh bawk. Kimite pawhin buh thar chu a faiin kg 5 lai min rawn thar tem ve a, ka lãwm khawp mai. Ka chunga an țhatzia hi mak ka ti țhìn, heti tak maia Pathian malsàwmna ka han dawng mai hi, A hnênah làwmthu ka sawi fo rêng a ni. Chutih rualin Zodina nèn kan inkâr pawh ka thlen fo va, thil dang zawng aiin Zodina tân hlimna ka dîl ngawrh deuh țhìn.

Krismas kan khuaa ka hman dâwn vàngin ka haw hmain a peih vak lo chung chu Lungleiah ka bazàrpui a, lei tùr erawh ka hre lo khawp mai. Ka thil tùr ka en ve lo va, ngai lo a ti chung chungin Krismas inkhâwmnaa a bun tùr pheikhawk mawi tâwk tak ka leisak a, a man pawh a to ve deuh hlek; mahse, a tlo khawpin ka ring. Ani pawhin kawr, biak ina hâk tlâk min lei ve bawk, ka hnial phal teuh lo mai.

Mipui zi hulh hulh chu tlànsanin Serkawn lamah kan tlãn chho a, mi tlèmna hmun kan pan a ni ber. Restaurant-ah kan inhnawh puar leh phawt a, chuta țangin hmun thengthaw nuam leh mi min chîm phâk lohna hmun ka hriatah chuan ka kalpui leh a, chutah chuan țhuin kan titi sap sap a. Kan hma lam hun, kan inhmuh theih loh chhûng hun chu sawi chhuak lo mah ila kan rilruah chuan a awm ve vein ka ring, hun kan neih rei lo te hi tih chhiat ka duh loh avàngin ka sawi chhuak duh bîk lo a ni.

Kâwl kil tàwp lam thlìr vang vang pah chuan,"Thil ka zâwt ang che aw, i thil zir tawh ngaihtuah lêt hauh lovin, kâwl kil tàwpah sâwn eng nge awma i rin?" a han ti sap a, mak ka ti deuh hlek a; mahse, ka chhâng ta tho a.

"Ram nuam tak a awm ka ring țhìn, TV vêla kan en țhin cartoon ram nuam tak ang hi, chutiang chuan i mitthlà ve tawh ngai em?" 

A ngawi vang vang phawt a, chutah, rawn hawiin min rawn en a," A nih duh hmel khawp mai, a nuam ngawt ang!" a ti sap a, kei chuan," Kan thil zir ngaihtuah lêt kha i phal si lo va, ka lo suangtuah țhin dàn dik tak a nih kha," ka lo ti leh a, nui sakin," I suangtuah thiam hle mai, chutianga suangtuahna neih bîk chu, kal a châkawm ngawt ang!" a han ti ve leh a.

"Um...a nuam lo thei lo. Cartoon ram pawh a nawm hmel theih êm hi, ka kal châk țhin asin, a tak takah hian awm ve thei se ka ti asin..." ka han ti vang vang a, ani chuan," Tuna kan awmna hi cartoon ram ai chuan a nuam zâwkin ka ring, ka hmangaih ber ka kiangah i awm miau si a," a lo ti ve ta thung a.

Làwmthu sawi nân a hmuiah chuan ka fawhsak zauh a, ani erawh chuan a lo duh tàwk hauh lo, min kuah betin duhthawh zet hian min fâwp a, kei pawh ka lo țang chhin eih lo, ka lo chhâng lèt mial mial mai a ni. Thlifïm a rawn thaw leh heuh heuh a, chu chuan kan induh tawnzia leh kan inhmangaihna chu min hriatpui ni maiin ka hria.

*KAN THAWHRIMNA HIAN LUNGAWINA MIN THLEN LOH CHUAN THIL ȚHA LO LAMAH MIN HERPUI VE DAIH THEI, BEIDAWNNA KHURAH MIN TLÂKPUI THEI A NI*