☆THE SWEETEST HANDCUFFS☆ - BONUS By Dingdi Pachuau

 ☆THE SWEETEST HANDCUFFS☆- BONUS By Dingdi Pachuau

Ka duh aia rei ka awm leh tâk chu. Pu Zuala chu a țawng charh charh reng a, Jakob-a lah chuan lo pui zauh zauhin a hmêlah chuan rilru hahna leh zahna tih lam rêng rêng a lang hauh lo va, hlim hmêl tak a pu reng si a, a pu tân chuan hriat thiam chu a har ve duh khawp ang, hei hi a tupa dik tak Zodina ni lovin mi dang, a taksa rawn luahtu Jakob-a a ni si a, a lan dàn pakhat têah mah danglamna a awm si lo, a chhûngte tân ngei pawh hian hriat thiam har tak tùr a ni rêng a ni.

Chaw chu ka ei leh ta êm bîk lo. Ka haw tùr chu Jakob-a chuan min thlah a; mahse, an compound chin bâk thlah ka duh loh avàng chuan a lungawi lo lek lek a; mahse, a rawn kal lui ta bîk lo," Zaninah ka lo lëng ang a, i insawi fel ve hlek chu a ngai ang aw," a ti zui nang nang a, ka nuih mai a. 

Zànah chuan a rawn lêng ta ngei a, tlai lama mi kha a lo la theihnghilh lo nasa niin, țhut pawh a la țhut rei hma chuan thlah thui ka duh loh chhan chu min han zâwt ta ngei a, kei chuan," Naupang ka ni tawh bîk hleinem," tiin ka chhâng mai a, ani lah chuan," Ka thlah nih kha i duh lo ni zãwkin ka hria,  nge mi min hmuh i hlau zâwk? Min zahpui em ni?" a ti ve leh thung a. A buaithlâk thei a nia, a duh ang thâl chhànna a dawn loh chuan min zâwt sek reng mai a ni.

A hnuah chuan zawhna ka zãwt ve ta thung a, engtin nge Zodina'n a nu a hãl ngei tih a hriat theih tih chu ka zâwt hmasa ber a, ani lah chuan," A chanchin hi hriat loh ka neih i ring em ni?" a lo ti thung a, kei chuan," A bialnu Arini pawh i hriat mang hauh loh kha aw," ka ti ve leh thung a, kan inchhâng tâwk viau mai. 

"A nu kha a dam chhuak a ni lo'm ni? Zâwt se, a hre chiang viau ang chu, a fapain thah a tum tiin a sawi ngei ang. Kha vàng kha a ni lo'm ni a pa pawhin awmpui thei lova a pute bula a rawn dah chhan? Han chhût vang vang teh," a tih chuan chhàn ngaihna rêng ka hre lo va, zawh belh tùr pawh ka haihchham titih dèr. Ani lah chuan," Kha maw, sawi tùr i hriat tawh miah loh kha, ka sawi chhuah kher hi a ngaiin ka lo ring ngai lo va, hêng hi a thiam loh vek a ni. A lo ngaizâwng ve ringawt che a, a inrawlh lohna tùrah a inrawlh tlat a ni," a ti leh nghut nghut a.

"A nih, a nu a hàl lai chu i hmu chiah em?" ka han ti leh a, ringhlel deuh ang pawhin min ngai mah se a pawi lo, Zodina nungchang ka en hian thinrim rilru na tak pawh ni se a nu hãl duh tùr êm chuan ka ring thei hlawl lo a ni ber. 

"Min ring hlawl nange? Chuti a nih chuan amah ngei i zâwt dâwn nia, a nu chu a hàl a ni nge ni lo tih zâwt mawlh ang che, a hàl a nih loh chuan ka kalsan vang vang ang," a ti ta charh charh a, ka en nghãl vat a, a hmël ațang chuan a ti tak nasa mai si a, thu dik ngei a sawi a nih ka ring ta a, ka sawi zui ta lo.

Amos-a pawh ka tlawh fo a, a zia viau tawh. Rin aiin a dam chak ka ti, kan țhui zàna a khua a sik bâk kha a sik tawh lo hrim hrim a, amah pawh a țawng duh leh tawh viau a ni. Ka tlawh laiin a bialnu pawh vawi hnih lai ka hmu a, a lo kan ve a ni ngei ang, ka han en tawn dùn țhìn a, ka nuih an tiza dùn reuh tlat mai a nih chu. A bialnu lah chuan a duat thiam ve hmèl riau a, zaidam pawh a zaidam ang. Ka awm ve vàng nge ni phei chu ka hre lo, Amos-a erawh chuan a be chhum deuh hmuk hmuk thung. A hnuah sawi chhuakin," Ka awm lai kha chuan i'n be chhum deuh hmak hmak a, ka awm loh hnuah erawh i thlĕm viauin ka ring," ka han ti a, a lo nui sûng a," Teuh lo mai! Damloh châng chuan min duat êm êm tùr hi a ni ringawt, 'Țîk' pawh a ti ngam nâng, han ti vaih teh se, a 'get out' a ni nghâl mai," a ti zui ham ham a, a fiamthu tih hre tho mah ila," Zak teh, i ti ngamlo nasa ang, a duat êm che kha, chutiangin fiamthu pawhin ti mai mai suh," ka lo ti ve thung a.

Ngaihtuah loh kârin hun chu a lo inher ve zêl a, Valentine's day pawh kan lo hnaih ve ta. Zodina nèn kan inhmu khât khawp mai a; mahse, ka sawi kha chu a theihnghilh ka ring bîk lo, ka hmuh chhunah lah Biak in chhûngah a ni a, biakna hmun a ni si lo; mahse, inhmu zing lovin inbe tam lo mah ila Valentine's day-ah tal chuan amah Zodina ngei hmuh ka inbeisei tlat a ni. Jakob-a lah chuan kan inhmuh azâtin," Valentine's day chu? Eng nge i duh ang? I duh loh deuh tùr ka pe palh ang che tih ka hlau a," a ti ve ziah a, Zodina hmu lo hian Jakob-a hi ka hmu nulh ang tih ka hlau a nia, a phûr nasa mai si. A châng hi chuan ka khawngaih ru ve reng, duh takin min en a, min kàwm a, ka tân eng mah ui a nei lo, a duh tak Mami emaw min tih vàng a ni si a, ka ni miah si lo, hrilh ka duh viau a, ka tum ve ta fo bawk; mahse, a chan tùr ka ngaihtuah a, ka bumah ngaiin a thin a rim ang tih ka hlau a ni, ka chunga a thinrim tùr hi chu ka tuar thei mai ang a; mahse, Zodina chhûngte bulah a thinrimna a tihlan vak ka hlauthãwng zâwk a ni. Pawisak a nei dâwn si lo, Zodina  taksa hi a kal bopui daih phei chuan... a chhûngte rilru tùr ka ngaihtuah thui ngam lo.

Valentine's day hma ní chiahah Vâlpuia nèn kan inhmu hlawl mai a, nui sen sen chung hian," Nurse, i dam țha maw? Inhmuh a khât hle mai tiraw?" a han ti a, kei chuan," Ka dam țha alawm. Ni e, inhmuh a khât, min haw ta a ni ang tiin ka lo ngaihtuah a," nui chung hian ka ti a, ani erawh chuan," Teuh lo e, ka haw ngai lo ang che, i fel êm hi," thutak zet hian a lo ti a. Office ațanga ka chhuak, haw tum tawh ka ni a, pâwnah kan inhmu a ni.

"Mamawh i neih vànga lo kal chu i ni lo tiraw? Nge i nei zâwk? Han sawi la?" ka han ti a, ani chuan," Nei hran lo ve, rawn hmuh che ka duh vàng a nia, hawh, i inah haw phawt ang," a ti ta daih a, mak ka ti deuh hlek a; mahse, eng mah sawi lo chuan," Ni e a," ka ti vat a, ka in lam chu kan pan zui nghâl a.

A thil sawi chuan min tihlàwm viau rualin chutia Zodina taksa kalsana kal bo ta daih tùr anga a insawi chuan ka lung a tilêng lâwk reuh tlat pek a! En vang vangin," I ti chiah maw? U Jakob-a'n a hriat chuan a thin a rim àwm mang e," ka ti a, za lo tih hriat zeta țhen sak chung hian ani chuan," A hria ang, ka hrilh tawh alawm, a thin chu rim ve deuh tho bawk e; mahse, min tilui thei bîk hleinem," a lo ti mai a, min rawn enin," Ka kal bo chuan ka hmu tawh kher àwm si lo che a, ka ngai ngawt ang che. Mi fel tak i ni si a, hetia ka awm hi hrehawm ti ru viau mah ila ka  tawng tal che a, nuam ka tih phah viau a ni; mahse, hetia awm reng hi thil dik a ni lo tih ka hre chhuak tawh a, chuvàng chuan kal bo hi ka tih tùr chu a ni. Ka kal hmain hmuh leh ngei che ka duh tlat a, làwmthu hrilh che ka duh a ni. Ka la hriat loh leh hmuh ngai loh Birthday min lawmsaka cake min siamsaktu, ka duh tihlawhtlingtu i ni miau mai a, i chungah hian ka lãwm tak zet a ni, dam reng ang che," a ti a, a hmêlah chuan a tih takzia a hmuh theih. Nui hmêl pu angin lang mah se a kal bo tùr chu hrehawm tihna chin a nei ve a ni ang, a lang cool ve tlat.

"Ka lãwm e, kei pawh nang ka tawng che hi ka lãwm tak zet a ni. Mi fel tak nih chhunzawm zêl la, i nu leh unaute tân innghahna tlâk ni ngei ang che. I pa pawh rem takin awm i tum dâwn nia, i fel êm kha tiraw?" ka ti lêt a, ani pawh chuan a lu a bu nghat a," Zodina bulah pawh i felzia hi ka lo hrilh ngei ang, i thu tlûkna siamah hian a hlim ve ngei ang tih ka hre si a," ka ti leh a, ani chuan,"Kan tihbuainaah leh tih hrehawmnaah ngaihdam min lo dìlsak dâwn nia, U Jakob-a pawh hian eng tikah emaw chuan a tihbuai loh ka beisei tlat a ni. Ka han sawipui ve ngial a; mahse, a ngaithla duh mang tlat lo va," a ti leh sap sap a. Kan inhmuh tàwpna tùr a nih hmèl si a, a haw thuai phal lovin ka chelh rih a, a lêng ve deuh reng a; mahse, awm hlen tùr ni lo na nâ nâ chu a tàwpah chuan a haw ve ta hnak hnak a, a lan theih chhûng zawng ka thlîr nghe nghe, kawng lehlam taka ngaihtuah chuan a ngaihawm reuh ngawt ang.

Vâlpuia chuan a kalsan dâwn ta. Kawlpui pakhat chu khen thlâk a ni dâwn ta phawt a, kawlpui dang pakhat, nghet zâwk leh lian zâwk, khauh zâwk hi eng tikah nge khen thlâk a nih ve ang le? Eng pawh chu ni se, Zodina tân zalènna nî a hnai ve hret hret zêl e.

A tûkah chuan Office kan kai leh a, U Ropuia chuan," Vawiin chu bâng hma deuh ila tiraw? Nang pawhin hmanpui tùr i nei ngei àwm si a," nui chung hian a han ti a, kei chuan," Nei hran nâng aw," ka lo ti vat a, âwih loh hmel tak hian a han țhen sak a," Kan bâng hma deuh dâwn nia, keini pawh kan nu nèn dine out kan tum a," tiin," Kum tina kan hman ve dàn a nia," a ti zui leh siam siam a, kei chuan," A ni... maw?! A nuam duh ngawt ang chu," ka lo ti a, zawhna dang ka zâwt zui pah nghâl zat a.

Ka nghâk ràn a; mahse, a hmêl a rawn lang miah lo, a hmêl a rawn lan loh tal pawhin thãwm tal rawn neih ve tùr hi a nia, heti êm êm maia a inla hrang leh min han hmu duh ta lo mai hi, min lo duh tak tak lo a nih ka ring nghet ta viau. Vawiin chu min hmanpui ve ka rin tehlul nèn, ka sawi sa vek tawh a, hrilh chawp chûk chûk lah ka ni hek lo. Dârkâr a liam a, a hmêlin rawn lan tik a nei si lo, ka bei a dawng a, ka thin a rim deuh bawk a, heti taka ka bula hun hman a hrehna chhan hi eng nge ni ang? Min duh tak tak lo tihna.

Thil pêk ka tum, a tuamna mawi tak leh uluk taka ka tuam ve chu ka la kãng  a, paih țhuai ka tum rilrûk lai chuan ka rilruah chuan," Insùm theihna hi mahni inthunun theihna ațang lo kal a ni, mahni inthunun theih hi a pawimawh ber a, insùm theihna leh Mahni inthunun theihna i neih phawt chuan nangma siam harsatna leh zahna i hmachhawn khât ang," tia ka pain min zilh țhinna te kha ka hre chhuak uai uai mai. Ni e, thinrim chiam kha awmzia a awm lêm lo ve, duh leh, hêng ka leisak hi chu ka pa ka pe daih ang a, a nih loh pawhin mamawh tak tak, he khuaah ngei pawh hiann an awm ngei ang, mi țanpuina hmanrua a ni leh mai.

Ka thaw huai a, hlawhchhamna pawh hi hlimna hmanruaah a hman theih tho alawm tiin ka infuih a, tum miah lova hlawhchham nia inngai ai chuan ka indah sãng tho. Kei chuan ka la tum tal a, a hlawhtling lo a ni mai. Ka dawhkàn chunga ei tùr eng eng emaw ka dahte ka dah fel lai mêk chuan kawngkhàr a rawn ri a, lo lût ka hmuh chuan ka nui ta sak a, a tàwpah chuan a rawn lang ta nge nge alawm; mahse, ani erawh chuan min en lêm lo, chair-ah a țhu a, en pawh min en lovin ka hria. Ka sana ka thlêk zawk a, a tlai ve tawh viau a ni.

"I rawn lang a, ka lãwm e," ka han ti sap a, ani erawh chu a la ngawi reng a, hnuai lam a bih tlat bawk. Ka thil tùr eng mah a rawn keng ve lo bawk a ni ang, eng mah rawn ken luh a nei lo va, pawisa leh bengbeh tih vêl a ak a nih ngawt loh chuan thil dang a rawn keng miah lo.

A thil tùr chu ka pe a," Ka lãwm e," a ti sap a, kei chuan,"Eng mah min rawn ken ve nange? Ka lo beisei ru ve viau asin le," ka han ti a, eng mah a rawn keng ve mang si lo va, ka lungawi lo der ve a ni, der pawh a ni chiah lo maithei tho bawk.

*'KÂ KA NEI' TIH VÀNG NGAWTIN I DUH DUH I SAWI TÙR A NI LO, SAWI ȚEUH ȚHÌN AI HIAN NGAWI THEITE HI MI FING AN NI TAWH ZÂWK*