☆THE SWEETEST HANDCUFS☆ - 41 By Dingdi Pachuau

 ☆THE SWEETEST HANDCUFFS☆ - 41 By Dingdi Pachuau

"Zodin, i rilru a buai rih a nih kha, thu tàwp siam tùr chuan hun thâwl kan mamawh ang, tûn rup rupah chuan sawi rih lo ila?" ka ti ta ringawt a, ințhen thu a sawi chhuak thut hian min tichî-ãi ve deuh a, bâkah, ani pawh a rilru a buai ve deuh thut a ni ang, rilru buai laia thu tàwp siam mai zawng, thil țha lo zâwk a thleng thei tlat a ni.

"Ni e, i tih chuan le; mahse, ka rilru chu ka sawhsawn kher lo ang, kawp chi ka ni lo," a lo ti leh sap sap a, ka en vang vang a; ani erawh chuan min en lo, min en ngam lo nge min en duh lo pawh ka hre thiam lo.

"A nih leh, Arini nèn khân engati nge in inkawp si? Kawp chi ni lovin i insawi a, kum kha leh chen kha in inkawp tho si a, engati nge kei nèn kher kawp chi ni lova i insawi? Min duh tak tak loh vàng a nih kha," ka ti ve leh ta thung a, ka ngaihtuah chhuak thut a, ka sawi chhuak nghâl bawk a ni, ka sawi hi a hun nge hun chiah lo tih pawh ka ngaihtuah hman lo.

A rawn hawi chhuak ve ta a, min rawn en chuan ka lo hawi sawn ve ta thung a, ka en duh lo lui ve ngat a ni. A dinhmun leh nihna zawng zawng ka hria a, ani pawhin min hrilh vek, chuti chung chung chuan ka duh a, ka pawm a, ani pawhin min duh, kan han inkawp ta chêng a; mahse, ințhen a rawt leh ta thut si, a rilru tùr hi chu ka hre thiam tho a; mahse, thinrima han hriat thiam loh der hi ka duh rih.

"I hre thiam lo a ni," a ti sap a, a thaw hak bawk a. La en duh lo lui tlat chung chuan," Ni e, ka hre thiam chiah lo, i nihna hre miah lo Arini pawh hun rei tak i nihpui tho a, kei chuan i nihna hre vek chungin ka duh che a, hun rei lo tê chauh kan inkawp tihah ințhen i sawi leh si hi ka hre thiam chiah lo a ni," ka ti leh a, a rilru tùr àwm hriat thiampui tho mah ila hetia han tih ve hi ka duh tlat, ințhen a sawi ri kher hian ka rilru a chî-ãi ve êm a ni.

"I pawi ka sawi a nih chuan min ngaidam hrâm dâwn nia, ni leh lo, i pawi ka sawi nasa tawh zâwk tih ka hria, keimah vànga harsatna leh rilru hrehawmna i tawh zawng zawngte pawh ka hria, ka hre kim vek lo zâwk hial ang. Ngaihdam dìl dàn tùr che pawh ka hre lo, nang hi duh miah lo tùr che ka ni a..." tiin a han tàwp leh rih a, ka mitsìr ru reng a, a lu a thing nak a ni tih pawh ka hmu.

A haw hnu chuan ka rilru pawh a buai ve viau mai a, thil ka zawh ngei ngei tùr ' I chanchinah hian thil min hrilh kim loh i nei em?' tih pawh ka zawh loh phah a, tûn hunah pawh hetiang hi a nih chuan nakinah, amah ngei hi a nu hãltu a nih thu ka hria tih a hriat chhuah hunah phei chuan a awm dàn tùr pawh ka ngaihtuah thiam lo zâwk, a buai vek ngei ang.

Mahse, amah hian a nuhrawn kha a hãl a nih si chuan engati nge min hrilh miah loh le? Engati nge a zêp tlat? Tu ma bulah a sawi chhuak lo a nih pawhin a thurûk dang pawh min hrilh tho si a, min hrilh tel ve mai àwm tak. A chanchin dang min hrilh vek a, kha thil tak kha, a sawi hreh nge ni ang a, min hrilh chuan râpthlâk ka ti viauin ka hlauh phah a ring zâwk ni ang? Jakob-a ka ațanga hre lovin a kâ ngei ațang zâwkin ka hre duh asin le.

Thil ka ngaihtuah chhuak thut a, sana enin," A la tlai chhe chuang lo," ti rilruin zah loh takmeuh chhuahin a nî chu ka va bia a, a chhan chu naktûk lamah eng nge thleng dâwn ka hre lo, Zodina ni lovin mi dang daih a rawn ni leh thei a, tuna amah a nih lai ngei leh kan buaipui lai ngei hian sawi fel ka duh a ni.  Tûn rup rupa ințhen kha chu ti bîk kher lo mah se, a rilru a sawh sawn loh tùr thu a sawi a nih kha, min țgen a tum tho tihna a ni.

A nî bula Zodina biak lawk ka duh thu ka hrilh chuan," A room-ah a chho tawh a, ka han pe lawk ang e aw," a rawn ti a, ka lo nghâk a.

"Hello?"

"Zodin, min țhen dâwn a nih pawhin Valentine's day  hma chuan min țhen suh, i duh chuan Valentine's day hnu lamah min țhen thei ang, chu chu a rem ang tiraw?" ka ti nghâl tâwng a, ani erawh chu a ngawi vang vang a, a inngaihtuah buai a ni ngei ang," Chumi hma chuan min țhen ka rem ti lo ang," ka ti leh a.

"I tih dàn dàn le."

"Chuan, i chanchinah khân min hrilh kim loh i nei mial lo maw? Entîr nán, i nu leh pa, i naute chungchângah a nia ka tih?" ka han ti leh a, ani chuan," Hrilh loh che ka nei lo, ka hrilh vek che," a rawn ti leh sap a. Hmm, hei hi zawng a sawi chhuak duh lo ang, a thih thlengin a zêp hlen duh ngeiin ka ring, a tân pawh han sawi chhuah dawt chu a hrehawm ve dâwn êm asin.

"Aw le, tui deuhin i mu dâwn nia, mang țha le," ka ti a, a sawi ve hman hma chuan ka off ta daih a, tunah rih hi chuan ka rilru a nâ pawhin ka hre lo; mahse, ka hma lam huna ka rilru tùr erawh ka la hre rih lo.

'Valentine's day hma' ka tih kher chhan kha chu amah hi bialpa tak tak anga ka neih vawi khatna a ni a, Jakob-a kha chu mi tak tak a ni si lo va, mi tak tak, kei ngei pawhin ka duh ve êm êm Zodina ngei hi ka bialpa hmasa ber chu a ni. Chuvàng tak chuan, 'Hmangaihte Ni' an tih mai ' V-Day' hian hmangaih takin thilpêk pawh pêk ve ngei ka duh a, a hmasa ber a nihna angin hriat reng ka duh vàng a ni, ka tân chuan  tlàwmthlâk  ve deuh mai asin, khatia inkawp hun chhûng pawh sei han dìl kha; mahse, V-Day hlim taka hmanpui ve tal ka duh si a ni, a hriat reng tlâka hmanpui ka duh, min țhen a tum tih a hriat bawk si a.

Jakob-a chu ka hmu reng reng a, a thin a rim tawh lëm lo a ni ang, hmêl hlim tak puin a rawn lêng țhìn a, a duh ber Zodina chhûngte bulah a sawi chhuak ta bawk si nèn, han dem viau dâwn ila a chan ațang hi chuan a thil tih kha thil tih àwm tak chu a ni ve thei tlat a ni.

Vâlpuia erawh ka hmu khât deuh a, kum tharah vawi khat chiah ka la hmu, chu pawh a hna thawk tùr a hnung lam ațangin ka hmu a, Zodina emaw ka la ti zui; mahse, ka hre chhuak leh vat a, rei lo tê chauh kan inbe hman a ni. Ani pawh hian min biak leh min hmuh hi a hreh ve deuh tawh a nih ka ring, Jakob-a'n a lo vau leh pawh a ni maithei, kawm chian a châkawm viau rualin amahin min rawn pan loh chuan chhuanlam siama va hmuh a ngai a, hna thawka a lo chhuah daih phei chuan awmzia a awm lo ang.

Zodina erawh ka hmu khât khawp mai, Jakob-a hian a lo hre chiang khawpin ka hria, a thurûk min hrilh  hma khân," A nihna dik tak hriat chhuah a nih hunah chuan khaw ëng a hmu ngam lo ang," a ti a nih kha, a nunhlui chu sawi chhuah a rawn ni țan ta chiah a, Jakob-a thil tum chu a hlawhtling ta êm êm a ni, heti khawpa a lo hre chiang pawh hi a àwm ve viau tho, kum tam lo chènchilhin a lo hre tawh tlat a ni; mahse, he thil rawn irh chhuak leh hian Zodina a tikhawlo zo vek thei tak tak dâwn, tunah pawh a dik tawh miah loh hi, tih dàn eng emaw chu ka ngaihtuah a ngai. A hma pawhin ka țanpui theih beiseiin a chanchin, a natna chungchângte min hrilh a nih kha, kha thil kha kan induh tawn hma daih tawh khân min hrilh tawh a ni, a duh anga kan ințhen hmiaha ka kaltîr a nih chuan min beiseina kha a thlàwn dâwn tihna a ni a, chu chu ka thlentîr thei lo ang.

Khua a la vâwt ve deuh rih a, zàn lamah pawh boruak a la peveu deuh tlat a, tuilum ip ka hmang țangkai khawp mai, tuilum ip nèn mu ţhin mah ila mut hun hi ka huphurh lo thei lo. Amos-ate lah chuan min fiam peih khawp a, a vawh thu ka sawi apiangin," Malpui pali nèn mut a ngai tawh a nih kha," an ti ve ziah a, ani phei chuan a'n uar fâl leh khawp a," Malpui pahnih dang chu ka lo volunteer thei reng a nia, man chàwi ngai lovin sum ka pêk belh phal zãwk ang che," a ti leh pek a, a nuih loh theih loh, he pa bulah hi chuan khiang rah tla ang maiin kan khi sûng reng mai a ni.

Arini pawh ka hmu leh tawh a, a bialpa nèn an ni leh; mahse, engtin mah min țawng khum tawh lo va, min hmu ang pawhin a awm lo. Ka chhàn lét ve sak vàng kha a ni maithei a ni, min zuam tawh bîk lo a ni ngei ang, tunah tak phei hi chuan min țawng khum leh pawh ni se ka huaisen ve tawh ngawt ang, ka insûm tawh bîk lo ang.

Ka en reng lai chuan Arini chuan min rawn mwlh zawk a, a bialpa kutah chuan chelhsakin a han be sap a, ani pawh chuan Arini chu a en nghâl vat a, a nuih bawk. An lan dàn ațang hi chuan an induh hmel viauin ka hria, khati khawpa Zodina nèn inkawp reia duh viau nia lang si, heti taka tlâng hriata mi dang duh a han nei leh thei mai hi kawng lehlam takah chuan a lawmpuiawm viau mai. Hlimna a hmu leh thuai thei a, hlim lo taka awm reng ai chuan a țha daih zâwk alawm.

Office-a kan awm laiin Vêng tàwp lama chêng, Pi Thangmawii a rawn lût ve hlawl mai a, ka lo chiauau vat a, țhutna ka kawh hmuh chuan ani chuan," Ka țhu hman lo, thil in nei em ka tia," a han ti a, kei chuan," Eng chu maw? Thil han tih ngawt chu hriat a har e," nui deuh chung hian ka lo ti a, ani chuan," Englo a nia, ih....  Chhang zin lohna ka tihna, khatiang kha in nei em? Rai theih lohna ang kha," tîm deuh hlek chung hian a ti a, U Ropuia ka melh vat a, ani pawh chu a hmui hup deuh chung hian a lo nui a; mahse, a nui chhuak lo.

"Ei chi em ni i duh?"ka lo ti a, ani chuan," Ka hre chuang lo, ei chi a nih leh nih loh pawh ka hre lo, ei chi a awm chuan ka duh tho a, ei loh chi pawh ka duh tho, rai lohna tùr kha ka duh chu a ni tawp mai," a ti leh a, a zak deuh a ni ang, a hmai chu a han hup leh rih a. A che deuh sek reng chu ka en vang vang a,  amah chu a upa ve tawh bawk si a, han rai tùr êm chuan upa ve tawhin ka hre bawk si a, a hmêl ațang lah chuan hna a thawk nasa tih lah a hriat reng si nèn, a awm dàn, zak ve deuh leh lài deuh chuan nuih a tiza ru khawp mai.

"Ka pi, fa eng zât nge in neih tawh a?" U Ropuia chuan a lo ti a, ani chuan," Panga," tiin a lo chhâng a, U Ropuia chuan," I ei atân em ni i tih a?" a ti leh a, ani chuan," Ni nâng aw, ei ka ngai ve hleinem, ka rai ve dàwn lo, rai tùr pawhin kan ti tawh ngai lo hrim hrim," a lo ti a, min en tawn a, a chhànna vàng chuan a zak leh deuh a ni ang," Awi, ka inpuan vek tâk chu a, hre lo der mai teh u, theihnghilh ve ve r'u," a ti leh hnuhnawh a, a zak a ni ang, a hmai chu a han hup leh rih a, a chezia chu a nuih loh theih loh.

"Kan monu ei atân a nia ka tih, kum zâwnin fa an nei tawh a, kumin hian a pai leh nghâl ang tih ka hlau tawh êm mai a, ka rawn dîl tawp mai che u a ni, ei chi leh chi loh chu a pahnihin min pêk theih ve ve chuan ka duh ve ve ang," nui deuh chung hian a han ti leh a, keini pawh chuan nui sûng chungin chhang khàtna damdawi leh  condom kan kawl chu kan pe a, U Ropuia chuan," A hman dàn tùr hrilh i ngai em?" a han ti zui a, a nui sûng a, ani pawh chuan nui chung vêk hian," A, kei chu hrilh kher ka ngai lo ve, a hmangtu tùrte'n a tih dàn chu an hre ve mai tùrah ngai ang," a lo ti deuh tlat a," Ka hrilh châk che alawm," a tih pawh chuan," A ngai lo, a zahthlâk êm mai a! Zak chung chungin ka lo kal ve a nia," a ti hlak hlak a, a chhuak zui ta dàwr dáwr a, kan nuih zui hak hak a.

Chawhnu lamah Amos-a a rawn lang ve hlawl mai a, Nunmawia'n a rawn kalpui a, hlim hmêl takin ka lo be vat a, chutah, ka nui hmêl chu a tàwp ta chat mai, Amos-a kekawr vâr lam lek lek khûp dinglama thisen kai sen nuai ka hmuh veleh chuan," Engtizia nge ni?!! I inhliam elo?" ka ti ta vat a, Nunmawia chuan," Aw, a insât palh hlauh a nih kha, țhui a ngai dâwn a," a lo ti a, Amos-a chuan," Nang chuan min țhuisak miah suh, ka duh miah lo a nia," a lo ti ve thung a.

A lo sát na phian mai lehnghâl a, a kak a zàu bâkah a thûk phian bawk. U Ropuia'n a țhuisak a, Nunmawia nèn Amos-a chu kan lo vuan a, a khûp vun chhah lai a lo ni bawk nèn, a na viau ang, țhui pawh a har tih ka hre mai. A na bawk a ni ang, Amos-a thlan chu a tla bawrh bawrh thei hial a, ka khawngaih roh tak zet a ni.

Tlaia eirawng ka bàwl lai pawh chuan ka ngaihtuah zui reng a, 'zànah kan ila a țha ang, Kimi pawhin a duh ngei ang, sâwm ila' ka ti rilru nauh nauh a, Amos-a ni lovin Zodina rawn ni zâwk ta se ka hlauthãwngin hrehawm ka tih dàn tùrte chu ka suangtuah kai a, Zodina chu ka ngai ru veng veng mai, tunah te hian eng nge a tih ve ang le? Min ngaihtuah chhuak ve ang em? Min ngaihtuah ni ta se, eng angin nge min ngaihtuah ang? Min ngai ve tho ang nge, rilru hrehawm takin a awm ang?

Amos-a kan va kan chuan mi dang pawh an lo awm ve nial a, an lo kan ve hlawm a ni ngei ang, țhutthlèngah a lo mu bâm a, hlim hmêl tak chuan min lo chhàwn na a, a khua a lo sik hluah niin, puan a lo sin hlûn a, a mitmeng pawh a sen râm mai. Kimi chuan a han fiam deuh nain a hmaa an infiamna anga nâ kha chuan a fiam na bîk lo, mi hrisêl tak leh harh ve tak a nih vei nèn, a mu ta bâm chu a ni si a, ka khawngaih reuh mang e.

Rei pawh kan țhut hma chuan rin loh lutukin Zodina a rawn lang ve nawlh mai! Jakob-a ni lova Zodina ngei a ni tih ka hriat avang chuan ka lo en reng nghe nghe a, min rawn hmu ve thuai a; mahse, min hmu sng pawhin a awm lo, a hawi sawn vat nghe nghe a. A awm dàn chuan ka thinlung a tina veng veng maiin ka hria, tunah chuan min en pawh a duh tawh lo a nia, ka mitsìr ru deuh reng a, a țhut ngheh lohzia chu ka hria, rei pawh awm lovin a chhuak zui ta thuai nghe nghe a.

Haw kawngah chuan," Zanina Kob-a awm dàn kha a va mak ve! A rawn biak che ka rin tehlul nen," Kimi chuan a ti sap a, kei chuan," Kei pawhin ka biak chuan loh kha," ka lo ti mai a, min rawn en zawk a, thaw hawkin," Intih thiam lohna deuh in nei a ni lo maw? A ni chiang mai, in inbe duh lo vêl a nia, in awm dàn tê hi, a lawmawm reuh mang e, tleirãwl tê inkawp in nih duh hmèl tawp," a ti zui leh barh barh a.

A tûkah Office-a ka awm laiin Zodina pu chuan Zodina nî phone ațangin min rawn bia a," I hman chuan lo lêng leh tawh teh, ka ngai leh tawh che a nia," a rawn ti a, ka hman veleha lèn ka intiam hnuah kan inbiakna chu a ti tàwp ta a. Lèn chu ka duh viau rualin Zodina hmuh tùra a lo awm chuan nuam a lo ti lo viau ang tih ka hlau a, chutih rualin ka tân ngei pawh a zahthlâk ve lek lek thei tho, a zahthlâk bawk ang. Va hĕla va lènchilh ka ang dâwn êm asin, ințhen sawi laia va lèn leh dâwk dâwk kha, a tlàwmthlâk riau.

Mahse, a tûk chawhnuah ka va lêng tho. Zodina erawh ka hmu lo, Lungleiah a kal a ni àwm e, a puin  min hrilh a," Tûnhnai chho vêla a awm dàn ka chîk ka chík hian eng emaw dik lo chu a awm a ni, ka thil zawh vàng kha a ni thei ang em aw ka ti a, kan bulah a awm tam lo va, hlim hmêl a put loh bâkah a țawng tlêm êm êm mai a, chutianga awm e ti lo chuan, a châng chuan chawhlui kîl laite hian a țawng bawrh bawrh a, inchei deuh taka lèn chhuah țum a nei bawk a, eng mah sawi lova hna thawka a chhuah daih châng a awm bawk, han titipuina hun pawh hi a awm meuh țhin lo," a ti charh charh a.

Ka lo ngaihtuah ve a, inchei deuha a chhuah chuan Jakob-a a nih hun lai a ni ang a, a țawng tlèm viaua hlim hmel a put loh bawk chuan Zodina dik tak a nih hun lai a ni thei ngei bawk ang.

"Nimin piah lawk khân a pa ka be chhin a, Zodina chungchâng chu ka zâwt chiang a, hun kal tawh niin a rei deuh tawh bawk a, chiang takin a lo hmu ve lêm lo bawk nèn, han sawi fak tùr a hre chiah lo va; mahse, ka han zawh zêl tâkah chuan a nu hâltu chu amah Zodina ngei hi a nih thu a nupui kâ ațangin a hria ni àwm a ni. Ka sawi tawh kha, kha thil thlen hun lai pawh khân amah kha rinhlelh ber chu a ni tho a; mahse, chiang faka sawi a awm loh bâkah chhûngkaw thil a ni a, an sawi zui ta lo a ni; mahse, tûn hnuah a nu chuan amah hãltu chu Zodina ngei hi niin a sawi a, chu chu a pa chuan min hrilh a ni," a ti leh charh charh a.

"Zodina ngei hi amah hãltu niin a sawi maw?" ka lo ti vat a, muangchânga a lu bûk nghat pah chuan," Aw, a hre chiang ngang a ni àwm e; mahse, a fapa a nih avàngin a sawi chhuak duh lo a ni, miin mak an tiin an sawi zui nasa dâwn si a, ngawih mai kha a thlang ta ni àwm a ni," a ti leh charh charh a, kei chuan," Mahse, a sawi chhuak leh tho si a?" ka lo ti vat a, min chhâng lo chuan min en ta reng a.

A nuin a pa a rinawm lohsan a hmuh khân a thin a rim lutuk ang a, a pa rilru na tùr duh lovin phuba lâk nân a thinrim lutuk chuan thil thleng thei ngaihtuah chiang hman lovin chutiang chuan a che ta a ni ngei ang, râpthlâk viau mah se a a rilru dinhmun tùr ka han ngaihtuah a. Ka nuin ka pa a rinawm lohsan lai hmu ve ta ngat ila... ani phei chu hmeichhe rilru nêm ni lovin mipa rilru pû a ni lehnghâl a, mi chuan mak min ti maithei a ni, a nu chunga a chét dànah ka dem mang miah lo nia! Thinrim rilru nat lai chuan rilru fîm put a har dâwn bâkah a thinlung a keh sawm vek àwm si a, a tum loh thleng thlengin a che ve thei tlat a ni.

Bike a rawn ri ta dat dat mai a, Zodina a rawn thleng chiah tihna a ni ngei mai. Ka lo helhhawlh a, ka țhu hlè hlé thei ta miah lo. Ka ding a, ani chuan," Haw i tum ringawt elo?" a lo ti vat a, kei chuan," Tum lo ve, ka mawng a kham deuh a," ka ti ta ringawt a, a âwih kher lo maithei, chhuanlam han siam mai tùr a vâng ve bawk êm a ni.

A room-ah kan awm lo bawk a, bike rî a reh fel hnua kawngka a rawn rîk chuan kan lo en dùn vat a, a rawn luh rual chuan min rawn hmu zui nghâl zat a, mitko sàn deuh ãk hian," I inah ka rawn pëng a, i lo awm lo va, heta hmuh che chu ka lo inbeisei miah lo," a rawn ti nghâl zat a, a nui suk zui a, Zodina ni lovin Jakob-a a ni tih ka hre nghâl mai. A inthuamna chuan ka mit a la nghâl vat a, thuamhnaw vâr lam a ni hauh lo; mahse, inhmeh ka tih zâwng tak a ni tlat thung, a pà ka ti!

"Zonun...?!"

"Aw... A, nia, i pu ka rawn tlawh a," ti buh deuh nuaiin țhutthlèngah chuan ka țhu thla zui zat a, a rûkin ka inzilh mawlh mawlh mai.

"Haw lovin awm ve nghâl tawh mai la?" tia a rawn țawng leh chuan a pu chu a lo nui hawk a, a rûkin  ka insehruh nghâl vat thung. Ka zak pah ve deuh tho bawk si a, tihngsihns hre lo chuan ka melh vak ringawt. Ani lah chuang engah vak ngai lo tih hriat tak hian," A țha daih zâwk i ti lo maw? In pahnih kàr tawn reng hi chu a ninawm ve a," a rawn ti leh a, ka bul lawkah chuan a țhuthmun a rawn rem ve nghâl zat bawk a.

"Vawiin chu Tluangtei hmêl kan hmu ta bawk a, kan hlim tlâng ta niin ka hria," a pu chuan a lo ti a, kei chuan," Chuti, ka'n haw tawh ang e, ka lëng rei tawh bawk a," ka ti vat a, ka ding hluai bawk a, ka bula mi chu rawn ding ve nghâlin ka kutah a rawn vuan a," Haw rih bîk lo ve, ka rawn thleng chauh a i haw daih te chuan... Thingpui min han siam teh, ka pu pawhin a duh leh tawh ang," a ti leh zat a.

"Ni dâwn tak, kan pathuma in tùr han siam rawh le, kan inna pawh a rei leh tawh e," a pu chuan a lo ti ve leh mai bawk a, Jakob-a min vawnna chu a nghet phian si a, a pu hmuh laia han tàl chiam chu ka duh chiah bík lo nèn," Min thlah rawh, thingpui ka siam dâwn chu," ka ti ta zâwk a, ani pawh chuan min thlah zui ve mai bawk a.

*ENG EMAW DUH TAK TAK I NEIH CHUAN NEIH DÀN KAWNG I ZAWNG NGEI ANG, CHUTIANG A NIH LOH CHUAN CHHUANLAM I SIAM THUNG ANG*