☆THE SWEETEST HANDCUFFS☆ - 54 By Dingdi Pachuau

 ☆THE SWEETEST HANDCUFFS☆ - 54 By Dingdi Pachuau

Zan tina hmuh chu duh mah ila ka duh dàn ang ngawtin a awm theih bîk loh a,  innei pawh kan la ni lo va, bâkah, a hman reng thei bîk lo a ni. Chhûngkaw pa ber ang a ni ve tawh a, a buai ve viau ta pawh hi ka hre thiam viau, ni e, patlinte han zir chho ve se, inneih hunah pawh a ngaihtuahawm lo deuh ang chu.  Ka thil ngaihtuah avàng chuan ka hmai chu ka hup ringawt a, ka zak leh hnuhnawh vàng a ni, kan la sawi dùn ngai hauh si lo va, ka lo ngaihtuah thui deuh mah mah chu a ni, hre ta se engtin nge a ngaih ang le? Mahse,  a sawi chhuak lo ve rih mai pawh a ni ve thei tho, zungbun pawh min pe tawh a, a ngaihtuah kai ve tawh tho tihna a ni thei tiin ka inthiam chawp leh rih a.

Ka haw hma deuh chuan kan kohhran țhalai buatsaihin kan biak inah chuan crusade kan nei a, speaker atân țhalai lama tla na ve tak mai kan hmang nghe nghe a, a țan tìr zàn ațangin boruak pawh a nuam nghâl viau mai. Zodina chu inkhâwm tùrin ka sâwm ve ziah a, Inrinni zàn leh Pathianni zànah a rawn inkhâwm ve, Ningà zàn leh Zirtàwpni zàn lam erawh a hman ngang lo a ni àwm e, Kimi nèn erawh chuan țan zàn ațangin kan inkhâwm char char thung.

Speaker thu sawi a ngaihnawm thei khawp mai, sual lama experience lo nei țha ve tawh tak mai a ni a, amah chu chhûngkaw keh chhia ațanga sei lian niin, a nu leh pa ințhen hnuah a nu hnênah a awm a, a nu chuan retheih viau a hlau a, a fapa chàwm nân chuan thil zuara dàwr nghâkin a awm lauh lauh phawt a, hlâwk lo a inti deuh a ni ang vawilehkhata hlâwk deuha thil zawrh lamah a ngaihtuahna a sêng ta a, a han ti chu a hlâwk ta rêng bawk a; mahse, sum lamah chuan duh tâwk ngah a har a, sum lam chauh a ngaihtuah avàng chuan  Pathian lam rêng a ngaihtuah ngai lo. Chutiang hnuaia sei lian a nih vàng chuan ani pawh țhat bîk thu awm hek suh, têt tê ațangin ruihtheih thil a ti țan ta a, sum lamah thlaphànna awm hek lo le, a nuin sum a thawk chhuak tam bawk a, a nu sum thawh chhuah chu a tlàn hiau hiau mai a ni, țhian pawh a nei thei; mahse, rui ta reng chu, a taksain a tlin reng thei bîk lo va, damdawi in dêngin vawi thum lai a awm nghe nghe, a vawi thumnaah phei chuan a harh chhuah leh theih rêng an ring tawh lo a ni àwm e; mahse, Pathianin a thih a la phal lo a ni chêk ang chu, thla hnih chuang damdawi ina a awm hnuah dam pângngaiin a chhuak leh mai a; mahse, a nun dàn erawh a danglam chho ta. Damdawi in a awm laia a khum bul lawka awm ve tlangvâl awmpuitu pitarte chuan Bible hi a chhiar ri bal bal țhìn a, thil dang ngaihthlâk tùr awm lo ta chu, a ngaithla ve reng țhìn a, chuta țang chuan Pathian thu-ah tuihàlna neiin Pathian chu a zawng ta a ni àwm e. A sawi thiam bawk a, mi dài ram ni lo a dài ram ngei sawi a ni bawk nèn, a ngaihnawm bîk hliah hliah.

Pathianni zànah chuan inkhâwm kan tam khawp mai, a tàwp zàn a ni bawk a, piantharna chungchâng bawk sawi lehin piantharna nun chu mimal ațanga țana chuta țanga chhûngkuaa put luh a pawimawhzia te,chhûngkua ațangin khawtlângah, khawtlâng ațangin ramah, chutiang zêlin mimal tin kan pawimawhzia chu a sawi dap dap a, dik ka ti tak zet a ni. Mahni chhûngkua pawh siam țhat tuma vei lova mi chhûngkua va vei daih a fuh lohziate a han sawi kai leh a, ka lo 'Amen' thei khawp mai.

Kan bàn meuh chuan a tlai deuh tawh si a, Zodina chu ka ina pêng haw tùr pawhin ka sâwm ngam tawh lo, kawngah erawh chuan a kut chu ka vawnsak rauh rauh thung a, ka ngai ve alawm, kan inhmu khât ve deuh bawk si a, inbe reng reng tho mah ila ka ngai tho, ka la hawsan thuai dâwn zui, ka ngai dâwn lutuk.

Ka haw tùr ka huphurh thu ka hrilh chuan," Hetah Krismas hmang ve daih la, i haw kher a ngai chuang em ni?" a lo ti a, kei chuan," Chawlh hun laia ka haw ve loh chuan, bâkah, an neih chhun ka ni tawh si a, Krismas hunpui laia han haw loh ringawt chu, a fuh lo ang, an bula ka awm theih lai hi chuan awm a țha, pasal ka hmu zo ve ngai te a niha ka neih ve hunah chuan ka awm thei tawh àwm si lo va," ka ti ta duah a, ka melh deuh ralh a, ani pawh chuan min lo en reng a, ka zak leh deuh chuan," Mi ang sa ang kan nihte chuan nupui pasal kan la nei ve ang chu tiraw?" ka ti ta ringawt a.

"Nia, hmangaih berte nèn ngat le."

Kan sawi zui thui lo. Naktip khian ka haw phei tawh dâwn si a, ka thuamhnaw țhenkhat ka pack fel a, insiam fel sa diam hi țha ka ti a ni. Teptèr lutuka insiam zawng, kan buai nuai duh a, fel fai taka lo insiam lâwk hi a fuh ber, thil theihnghilh palh pawh a awm lo nge nge.

A tûkah chuan ka haw a hnaih zual tawh avàngin a rawn lêng reng a, ei tùr chhang ka siam a, zàn lamah inthlahna angreng kan nei dâwn tho nain eng mah a ti chuang lo va, a rawn lêng a ni. Office kai a ngai tawh lo bawk a, free takin, nuam ti tak si leh naktûk hun lo thleng tùr huphurh ru tak chung si chuan kan awm dùn a, sawi tùr ngah viau e ti lo chuan țawng lovin kan inen a, kan nui leh ringawt țhin; mahse, hlim vànga nui erawh kan ni hauh lo thung.

"Ka ngai ngawt ang che."

"Kei pawhin ka ngai dâwn lutuk che," ka ti sap a, nuih ka han tum a; mahse, ka lung a rawn chhe deuh tlat mai a, ka țhen ve sak nain ka mitah erawh mittui a rawn tling ta kal mai, ani pawhin a hmuh hmaih hauh lo ang le.

"Khati kha chuan awm lo ve, hlim takin inthlah tum zâwk ang, i rawn lêt leh thuai dâwn alawm," tiin min han hnèm ve a, duat takin min kuah a, min kuah dàn ațang erawh chuan ani pawhin min thlahlel tak zet a ni tih ka hre tho, țawngkain min hnèm a, min hnèm mai mai a ni.

"Mahse, U Thangpuiite inneihna lamah ka liam leh daih dâwn asin, kan inhmu har dâwn lutuk!" ka ti țiau a, a âwmah chuan ka hmai ka phûm a, tunah tak hi chuan țah hawm hawm ka châk tak zet a ni, duat takin min kuah bawk si a.

Țawng tawh lo chuan kan inkuah vawng vawng a, tuna kan hun hi ral thei lo se, ding reng tawh mai se ka va ti tak! A kianga awm reng mai hi ka duh, kalsan ngai leh țhìn hi ka ning.

Zanriah ei ve nghâl tùra ka sàwm chuan min hnial a, ka hre thiam lo lek lek a ni. Zanriah ei kham veleha rawn kal nghâl tùr anga a insawi chuan," Ei ve nghâl mai la ni tùr, ka ngaih dâwn tehlul che nèn!" ka ti a, ani chuan," Thil tih lawk tùr ka nei a," a lo ti thung a, tûm deuh lek lek chuan," A va pawimawh àwm ve!" ka ti leh ngat a, ka ti lui ve deuh a ni, zanriah chu min eipui ve mai se...

"Vawk enkawltute hmuh lawk ka ngai alawm le," a tih tâkah chuan a hmel chu ka en vat a, a inthlahrung hmêl ka hmuh chuan ka inthiam lo kher mai, hman lo takin vawiinah a lo lêng reng tawh a, thil pawimawhah, rei lo tê chauh min hawsan lawk dâwn a, ka han titau vêl a nia, ka zak zâwk e a.

"'Ka tih palh," ka ti ta sap a, ani erawh chuan," Tih sual i nei hleinem, chutiang sawi mah ta che," tiin min en vang vang a, chutah," Ka haw tawh ang e aw, ka lo kal leh thuai záwk ang," a ti a, min kuah leh vang vang hnuah chuan min kalsan ta a, ka ruak deuh huaiin ka hria.

Zànah erawh kan awm ta nual a, Zodina nèn pawh hun fâl kan nei thei lo, inthlahna kan siam tih hre hauh lovin Amos-ate țhianho chu an rawn lût ve a, boruak an han hria chu chhuah leh nghâl mai an tum a; mahse, Kimi nèn chuan kan chelh a, an han țang ve viau nain kal chu kan phal tlat lo va, a tàwpah Amos-a chuan," Pawi lo, kan lût ta sa sa, ei țeuh ila ni mai," nui chung hian a ti a, an țhu ve leh ta a.

Hlim takin hun chu kan hmang a, Zodina chu ka melh ru zauh zauh reng a, a țawng tlêmin ka va melh apiang chuan min lo en reng hman ziah bawk! Ka nuih lêt sak țhìn a; ani erawh chuan min nuih lét ve lém lo chuan mit khap mang lo chuan min en reng mai țhìn a, ka zak deuh hlek a, hawi sawn hmasaah ka țang zâwk ta țhìn a ni.

Mahse, Amos-ate hi mi â an ni lo va, hàwn hun chu an hre lutuk ringawt. An haw hnu lawkah Kimi pawh a haw ve thuai a, kan pahnih chauhin kan awm ta. Hun tháwl pêk kan ni a, kan hun neih rei lo të hi ãm taka kan hman a ngai, kan inhmu thei lawk tawh dâwn si lo, thla khat deuhthaw hmu lovin ka awm dâwn a nia...

"I hmêl hi chhinchhiah tlat ka duh," tiin min en leh ta veng veng a, kei chuan," Min tilài zo dâwn, min en  tawh rih lo teh," ka lo ti thung a, ka kut pahnihin ka hmai chu ka han hup der a, ani lah chuan," Ka mitthlaa châm reng tùrin ka duh che a ni, min hawsan daih dâwn si a, kan inhmuh loh hun chhûng zawnga ka mitthlaa hmuh reng che ka duh dâwn si a," a ti leh a, khaw dangah hawi sawn a tum lo.

Kan țawng ta mang lo. Kan inchelh ràn reng a, țawng vak ai chuan hetia awm hi nuam kan ti zâwk a ni mahna, a kut chuan ka hmai ka khawihtîr a, ka lo maimichhîng chial thung, kei pawhin hetiang hi ka mitthlâah lang se, tuna ka hmaia a kut lum ham ham ka feel dàn hi hriat reng ka duh, ka hmu har tawh dãwn si, U Thangpuii vàng vek, pasal a neihnaah kal tura min phût tlat vàng a ni, ka chan tùr, ka lunglèn dàn tùrzia chu min chhûtpui hauh lo ang.

Inhmangaihin la inthlahlel viau mah ila hunin min nghâk bîk si lo va, a haw tlai lutuk chuan ka ngaihtuah tho bawk si nèn, kan inthlah ta nge nge a. Khawlai chu a reh ruih tawh nghe nghe a, kan inthlahna țhin thing buk hnuai thleng chu ka thlah leh a, kan ding leh rèn ráwn phawt a. A hnua a kal dâwn tak tak chuan thlahlel tih hriat tak hian min kuah leh rih a, ințhen chu kan harsat a ni. Ani pawhin harsa a ti a, kei pawhin harsa ka ti thlâwt, ințhen hi ngai tawh lo se...

"Naktûkah ka chhuah hmain min rawn hmu leh ang tiraw?" ka ti sap a, ani chuan ka aw anga zàwi tho chuan,"Ka rawn tum ngei ang," a ti ve sap a, kan inthlah hlei thei lo chu a ni, inthlah hmasatu nih kan hreh ve ve avàng chuan," Tihian ti ang, tunah hian ka thlah hmasa ang che a, naktûkah erawh chuan min thlah hmasa ve thung ang, a țha em?" ka han ti a, chutiang chuan rem ka ruat ta ringawt a ni.

Zànah chuan ka mu tlêm khawp mai, zîngah ka tho a, ka thuamhnaw ka siam fel vek tawh a, han insiam leh chuan tùr a awm tawh lo, mutna lam pawh ka têl fel thlap tawh a, ka inpeih viau tawh. Chaw hma takah eiin Zodina lo lan hun ka nghâk vàng tawh a, Kimi a rawn lang a, a hnuah a nu leh pate, a hnuah Zodina chu a rawn lang ve bawk a. Thingpui háng an in hnu chuan Pu Rova chuan," I haw dâwn tho tho si a, a hmâ lama chhuah hi a țha, kawng lakah eng pawh tâwk thei i ni si a," a ti a, a dik khawp mai. Kimite an awm ve reng si a, Zodina nèn han inthlahna hun, han inkuah lehna hun pawh kan nei thei ta lo, a lunghnùr loh hrâm ka beisei.

"Mang țha le, tluang takin i thleng ang a, dam takin i rawn lêt leh dâwn nia."

Min thlahna thu a rawn sawi chhuak ta, nizàn lama ka thil sawi kha a la hre reng a ni chiang. Kan inkuah thei ta si lo va, țawngka talin min thlah hmasa ta a nih hi. Mi dangte pawh chuan min thlahna thu chu an sawi liam liam a, ka in bula rawn kal remchângte pawh chuan ka haw dâwn tih hriain min 'mang țha' ve sap sap a, ka inkhalh chhuak ta. Hnung lam ka hawi thei tawh lo, ka scooty dârthlalang ațang chauh chuan ka hmu thei ta, min rawn vai lauh lauh hlawm a, Zodina pawhin a kut a rawn phar chhuak ve a, ding meuhin ka kut pakhat chu ka phar chhuak ve a, ka vai lêt lauh lauh a.

Kawngah ka tlãn tluang a, Lungleiah petrol ka la a, ka thlen chin Zodina leh ka pa ka hrilh hnuah chàwl muang lovin ka tlãn nghâl par par a. Ka tlãn chak lo va; mahse, ka thleng tlai tehchiam bîk lo. Ka pa lah chuan min lo làwm khawp mai lehnghâl a, ka lung chu lêng viau mah se ka pa hlim hmêl chuan tlêm chuan min chhâwk deuhin ka hria.

Zànriah ei hma lawkin Zodina chu ka bia a, rei deuh tak ka be nghe nghe a, a chhan chu zanriah ei kham lamah chuan bengchheng deuh chi an rawn lêng khâwm leh ngei dâwn si a, ka lunģlènna hre lêk lovin an rawn ri leh luai luai dâwn tlat a ni.

Ka sawi ang tak takin a lo thleng leh ta; mahse, tûn țum chu ka nu leh pa bulah Zodina chanchin chu an sawi chhuak ta a, dâwt a ni tih ngawt theih ni hek lo le, min fiam a, an thil sawi dikzia nem ngheh nân evidence lah an nei țha bawk si, an phawrh lang chuang lo nain nui pâwt pâwt chungin an han sawi ri zeuh zeuh a, an chimawm hlawm a nia.

Urlâwk zàn chu rilru hlim kim lo takin unaute nèn chuan kan hmang ho a, Zodina ka hre chhuak lo thei si lo va, mal takin a awm rauh rauh dâwn si a, ka hlim kim thei lo a ni. A tûkah pawh chuan a langah hlim ang takin awm mah ila ka hlim viau lo, ka lung a lêng a, Zodina mai bâkah ka in tê pawh ka ngai bawk. Zodina mawlh mai chu, khawhar taka a hman loh hrâm ka beisei. Ka phone tho a; mahse, kan inbe reng thei bîk si lo, țhian leh unauteho an rawn lèn tawh phei chuan mi dang biakna hun hi a awm lo hrim hrim.

Kim lo takin Krismas chu kan hmang liam a, kumin chu kum dang ang lo takin Biak inah leh lènkhâwmnaah kan lang tam ve a, zai a tui bawk a, a nuam viau mai. 

U Thangpuii pasal neih nîa kan hâk tùr kawr chu kan țhuitîr sap sap a, theme tur an thlan har êm avàng leh an lo mangnghilh deuh avàngin kan tlãi deuh ta a ni; mahse, a pawi lo, kan duh tàwka cheina hun kan la nei tho tho. Rosie a rim lehpek khawp mai, ani hi thil mawi hria a ni a, a mit a lêrh a, a confi bawk a, a duhtui bawk nen, ani a awm tawh hi chuan a chhuak nalh lo thei lo a ni, tuna kan kawr țhuitîr pawh hi a mawi hlawmin a changkâng hlawm khawp mai.

Kum thar hnu lawkah chuan Aizâwl lamah chuan kan phei ta hlawm a, țhalai deuh chauh kan la phei a,  chêtpui tùr leh a țûl țûl thawk turin. Puitlingho chu naktipah an rawn phei thung ang. U Thangpuiite in hnuaiah kan innghat khâwm a, an in a zau a, in hnuai pawh chu a zau viau mai a, an pin dàn thliah thliah chu hostel hlui a ni ngei mai, khum kan inchang kim vek a, nakinah mi dang lo kal an awm chuan khum ruak awm pawh an rawn luah ve mai ang chu.

U Thangpuii pasal tùr Țanate in pawh a nuam kher asin, a chhûngte an fel bawk si a, U Thangpuii chu a vànnei dâwn khawpin ka hria. Țana lah hna nei niin mi fel tak a ni si a, naupang vak bîk tawh lo mah se a lang upa chuang hauh lo.

A țûl țûl chêtpui bawrh bawrh kan ni bawk a, ka nuteho rawn thlen phei ve meuh chuan kan ti zo vek tawh a, kan unauho chuan U Thangpuii kan pêk ve tùr kan ngaihtuah a, pawisa nei tam lëm lo mah ila man to tak lei  kher a țûl lo hlauh a, duhsak taka kan present a nihna kha a hlutna chu a ni mai.

Inneih nî chuan kan va mawi suau suau tak. Puanchei kan bih vek a, kan kawr țhui mawi hlawm êm êm mai nèn chuan a inchawih kher mai. Keimahni ngei pawh chuan mawi kan inti a, kan chhuah hmain Rosie'n min chei leh vek hlawm a, ani hi a lo piang lo ang tih a hlauhawm asin, kan hmai mawi takin a awm theih phah si a.

"Rosie, Jindabad."

Chutiang chuan kan au rual țhat țhat a, ani lah chuan," Eng thil nge in sawi ka hre phâk lo, han sawi leh lawk teh u," a han ti zui a, kan han au rual leh a, Rosie pawh nui var var chungin a lu chu a bu nghat nghat a. 

Vawiin zet chu, Zodina hre chhuak reng reng mah ila ka hlim ve khawp mai, mi tin mai chu an mawiin an hlim ni berin ka hria. U Thangpuii ni se a nalh si, pasal ka neih ve hunah a kawr hák design ang deuh khân ţhuitîr ve ila ka inhmeh ve thoin ka ring, ka nui deuh sak sak a, ka ngaihtuahnaah mo kawr hain Biak inah ka lût a, min lo nghâk rengtu Zodina lam panin ka kal delh delh mêk a ni.

*HNA THAWHNA, CHHÛNGKUA LEH KHAWTLÂNGAH HIAN THIL ȚHA KAN HRIATTE HI A TAKIN TI ILA, A ȚHA ZÂWNG LEH A NGÎL ZÂWNG HIAN NGAIHTUAHNA SÉNGIN NEI BAWK ILA, NUN A VA NUAM DÂWN ÊM!