☆THE SWEETEST HANDCUFFS☆- 55 By Dingdi Pachuau

 ☆THE SWEETEST HANDCUFFS☆- 55 By Dingdi Pachuau

"Mak veng veng ve...!! Eng thil nge i lo ngaihtuah a?" Muanpuii'n min nghawk deuh salh paha a rawn tih tâkah chuan ka harh chhuak zawk a,  bang nghèngin ka melh ngai ka lo la melh reng a ni tih ka hre chiah, a zia lo thei a nia, mi ã ka ang ngawt ang chu; mahse, ka thil ngaihtuah kha a țha ém asin, an hre ve hauh si lo.

Nilêng mai chuan kan inha mawi ah reng a, nilêng lênga intihmàwi ngai ta chu, zànah phei chuan ka chau viau mai, After Party an buatsaihah pawh chuan ka zuan a zãng ve thei lo, ka boruak chu a rit mah mah tlat tawh a ni; mahse, ka insûm hrâm hrâm a, a lang lamah chuan hlim àwm tak chuan ka awm lui ve zêl tho, a chhan chu U Thangpuii a hlim loh phah ang tih ka hlau ve a ni, a ropuina nî a ni si a.

Ka duh dàn takah chuan naktûka haw nghâl daih ka duh; mahse, an tih loh hmel bawk si, ka nute phei chuan 'Remchàn lai' tiin chhûngte min tlawh kualpui an tum, an rilru leh kan rilru a inang lo hle mai si a, a buaithlâk khawp mai; mahse, kan haw nghâl vut kha chu ka ring bîk chuang lo.

Zodina ka ngai tawh mang e. Hmuh leh tawh ka châk, phone-a inbiak leh ringawt țhin hi chu a tâwk zo lo, ka duh khawp lo a ni. Nimin lamah khân ka be hauh lo va, kan buai ve êm avàng khân ka text ringawt kha a ni a, naktûk lam chu ka biak ngei a ngai tawh ang.

Mahse, mihring hi tum ang hian kan va awm lo tehlul êm! A tûkah chuan be hman pawhin ka khawsa lo, kan che char char a, hun ka neih laia biak ka tum ve lahin min la chhâng thei lo zui, buaithlâk khawp mai. A phone a tichhia chu a nih loh hrâm ka beisei, nakinah a nî number-ah ka try leh mai ang.

A nî ka biak chuan Zodina chanchin, biak ka tuma min chhàn theih loh dàn chu ka hrilh a, a phone a tihchhiat thu a sawi chuan ka bu nghat nghat a," Chuvàng a nih chiah chu, engtin nge maw a tihchhiat theih le aw?" ka ti vang vang a, ani erawh chu a ngawi deuh reng thung, a tihchhiat dàn a hre bîk lo a ni ngei ang.

"Amah a awm rêng rêng em? Biak theih maiin a awm hnai em le?" ka tih chuan a ngawi deuh dat phawt a, a signal a chiang lo a ni maithei," Hello?" ka'n ti leh a, ani chuan," Aw, ka hre thei e, Lungleiah a kal a, riah a tum nghe nghe a," a rawn ti a," A nih tak chu, thil pawimawh pawh a awm hran chuang lo, han biak ka duh deuh mai mai a nia," ka ti leh a, chutih lai chuan mi dang chuan min rawn ko chhên a, rei inbe lo chuan ka titàwp zui ta nghâl a.

Toilet ațanga ka chhuah chuan," Phone i ken luh vàng a ni maw i rei êm êm a.. A chhuak tawh lutuk a, a ìp theih tawh loh a ni," Rosie chuan a lo ti vat a, inhup deuh țai leh kûn deuh hlek hian a lût zui ve nghâl a, ka thaw hawk ringawt. Êk lah hi an ngah sia, toilet hi an tã emaw an ti tlat bîk lehnghâl a, ka awm rei ve hman ngai miah lo, tunah pawh Zodina biak ka duh vànga inthiarfihlîm ve ka nia, a hahthlâk thei tak tak a ni.

Ni hnih kan chàm leh hnuah kan haw  ta chauh. Kan haw tùr chu U Thangpuii leh a pasal Țana'n min vai liam a, zin leh thuai tùrin min chah hlawm bawk. Mi dang chu hlim takin an țawng barh barh hlawm a, kei chu ka ngawi deuh ran thung. Min han fiam leh rih bawk a, kan khua thlen huna thil tih tùr an sawiho a, an sawi leh țeuh mai. Kei chu kan khuaah ka awm rei hman tawh lo, office kai a hun mai dáwn, ka han sawi lang ve a; mahse, a rûk tak chuan ka phûr over thung, Zodina hmuh hlàn ka nghâkhlel tawh a ni.

An han inrawt phûr leh a, vawi khat na reng reng chu rawn kal ve an tum thu, ka in leh khua chu rawn hmuh ve hrim hrim an duh thu chu an sawi chhuak a, an phûr hlawm khawp mai, a hun tùr erawh chu an rêl fel thei nghâl lo, tûn hnai sun sunah chuan an hman kim thei dâwn si lo va, nakînah, April/May thla chho vêl chu an hman tlàn theih hun ber nia ngaiin an han duang chhin a.

"Nuam viau ang, zàn hnih khat kan riak ang a, Zdate huanah te, luiah te kan kal ang a, picnic tênâu kan ni mai ang," Rosie chuan phúr sârh hian a han ti a, Muanpuii chuan," Ni ang chu, a nuam dâwn lutuk! Huanah chuan thlâm a awm ngei ang a, lui a awm bawk chuan sangha kan han man ang a, kan han chhùm hâng ang a...Awii, tui dâwn lutuk, ka chil a tipût sa!" tiin a'n sîi deuh hlap hlap pah a, a chêt dàn avàng chuan kan lo nuih vak vak a.

Kan khuaah chuan ka awm rei ta lo rêng a; mahse, ka awm chhûng pawh chuan chaw ei khâwm lêt lêt leh han lèn khâwm lêt lêt an rawt reng a, kan inah an rawn kal khâwm a, eng emaw tih khâwm an rawt leh ringawt zêl, kei kal chhuak hmasa ber tùrin han sawisela phat bîk kha a fuh chiah si lo va, a rûk tak chuan ka ning ngawih ngawih.

Zodina ka ngaih êm êm dàn hi mak ka ti, ka ngaihtuahna a luh ngut ngut țhìn ni berin ka hria. Engtiklai pawhin ka ngaihtuah ka tih chuan dâwt ka sawi hlek maithei a; mahse, ni khata dârkár 24 awmah hian ka muthilh lai(dârkâr 7 vêl) tih lohah chuan ka ngaihtuah reuh reuh reng ti ila ka sawi sual tam lo ang.

Ka phei ve ta, ka phùr tawhzia leh thlen hlàn ka nghahhlelh sizia chu, ka thinlung hi a zãng vah a, phùrna mak takin min zem chiai a ni ber ang chu, min lo en chîk deuh awm phei se chuan ka nui deuh reng niin an sawi ngei ang.

Tluang takin Lunglei ka thleng a, Zodina ei châk zâwng tùr nia ka rin eng eng emaw ka lei hnuah chuan ka tum ram lam pan chuan rilru hmanhmawh ru tak, phûr tak si chuan ka tlãn khu leh ta chûk chûk a, khua a ro bawk a, a khu leh tawh viau mai; mahse, ka pawisa lêm lo, khù tih mai mai, ka tlànsan zêl alawm le, hei aia speed chak hian khalh ngam zâwk ila, ka thleng thuai mai dâwn asin. 

Khua ka thlen chuan a la tlai vak lo va, in ka thlen hnu lawkah Kimi a rawn lût ve a, ka scooty thãwm a hria a ni ngei ang. Ka thuamhnaw chu ka phawrh a, ka dah fel zung zung a, chumi chhûng chuan thingpui ka lum a, Kimi chuan a siam a, kan in lai chuan inneihna kan hman dànte chu min zâwt pah a, a tlângpui zawr zawr ka hrilh a, a hnu deuha a bula ka țhut thlâk chuan," Tu emaw i hmu châk tawh àwm sia?" nui sâng chung hian a lo ti a, zêp lêm lo chuan," Nia, châk ve tawh reng mai," ka ti ve mai a.

Ka phei tùr thu hi Zodina ka hrilh miah lo va, han țhàwn deuh thut ka tum ve a, zaninah ka phone ang, a hmeichhia zâwkin va lènchilh deuh tawp chu ka hreh ve deuh a ni; mahse, ka hmu châk, a rawn lêng lo a nih teh chuan aw... ka thil hawnsakte pawh hi a ei hauh lo ang.

Kimite inah chaw ka ei, min sâwm ve tlat sia. Ei rèl buai leh ai chuan tiin aw ka pawh ta ringawt a ni, ka la ei tui êm êm zui a, ka ei țeuh mai. Kan ei kham hnuah rei ka awm lo va, ka haw hnuah Zodina chu ka phone ta chauh a, a la leh thei lo. Ni dâwn tak, a phone a chhe tak alawm, a nî chu ka phone leh mai dâwn em ni ang? Mahse, ka hreh ve zo tawh, ka tibuai ngun tawh êm mai. Ka rilru chu a inkhâp a inkhâp a, a tàwpah chuan phone loh rih mai ka titlu ta a, naktûk lamah va țhâwng thut ta zâwk ila a țha ang.

A tûk chawhnua an ina ka va kal chuan a nî a lo awm a, min hmu thut chu mak a tih hmêlin a phu deuh zawkin ka hria, ka inthiam lo ru khawp mai a; mahse, nui chung hian," Ka rawn lang thut mai, in lo dam maw?" ka han ti a, ani chuan," Ka rin loh lutukin ka hmu thut che a! Engtikin nge i rawn phei? Engati nge min rawn hrilh loh a?" a lo ti a, kei chuan," Nimin khân ka rawn phei a, rawn țhàwn deuh thut che u ka duh deuh vàngin ka rawn hrilh lâwk duh lo che u a," ka ti ve zaih a. Zodina awmna chu zawh ngai lovin in chung lam chu a han melh zauh a," A awm, han chho mai rawh," a ti zui sap a.

Kan thãwm hlut sia, ka țawng ațang pawhin min hriat ve mai ka ring asin le, a rawn lan ve mai ka ring a nia; mahse, a rawn dîkdãk hauh lo, ka vui ru deuh lek lek hman hial a ni; mahse, amah ka hmuh châkna chuan min tur nasa tawh a, vui deuh rilru pu thei pawh ka ni tawh lo.

Mahse, a room-a ka luha ka thil hmuh chuan min va barakhaih si ve!

Ka ding deuh reng a; mahse, ka harh chhuah hnu chuan ka pan phei vat a, khuma a lo țhu ràn hmêl, hmêl tla kuam mai chu hnaih vatin," Eng nge, i lo damlo em ni a?!! Engati nge i hmêl hi?!!" ka ti ta ruai mai a, amah khawngaihna avàng chuan ka mittui a rawn hnai zui bawk, tìmna nei lo chuan a biang hmul țo ser ser chu ka chùlsak a, ka ngai tawh êm asin; mahse, ka hmuh dàn hi ka duh dàn a ni lo, dam țha tak leh hlim taka inhmuh ka duh zâwk. A biangte chu a lo sa vur mai lehnghâl a, engtik ațangin a lo damloh ni?

A mit khur tla deuh dâk ațang chuan min rawn en lêt ve kuau a, min ngai ve tho tih ka hre mai. Kan inen vang vang a, ka mitmeng chuan thu tam tak kan sawi a ni ber mai, ka mittui tling kul mai chu a far ta koh a, a kut chu rawn phar chhuakin min kuah ta a, min kuah tâkah phei chuan a taksa pawh a lo chêr viau hman tih ka hre zui nghâl bawk a.

"Dam taka i lo lêt avàngin ka lâwm e, ka ngaihzia che hi!" thâm deuh chhàla ti sapin a han thaw deuh hak a, a aw ri ka han hriat leh tâkah phei chuan ka lung a chhe zual, ka mittui chu a rawn tla ta zung zung a, ka lung a âwi thei hlawl lo, engtin nge hetiang hian kan inhmuh loh kâr lek chhûngin a lo awm theih? 

"Dam taka lo hmuah chea hlim taka lo chhawn che ka duh tehlul nèn; mahse, ka hmu leh thei che hi ka hlim lutuk! Dam taka ka lo hmuah loh vàng che erawh chuan a pawi ka ti, min ngaidam rawh aw," a ti thâm leh sap sap a, chhâng lêt lovin ka kuah nghet sauh sauh ringawt, ka chhàn chuan ka țap chhuak mai ang.

A hnuah a nî chu room-ah chuan thingpui leh a hmeh kengin a rawn lût a, kan inkuahna ata kan inthlah fel tawh a; mahse, kan kut erawh a la inchelh chial thung, a nî lo luh pawh chuan min thlah chuang lo, a chhuak leh nghâl thuai a, ka mittui tlâkna avànga ka mit thial úrh chu min rawn hmuh loh hrãm ka beisei.

"Le, thingpui saw in rawh le, i ril a țâm tawh ang," a ti sap a, ani damlo zâwk hian min ngaihtuahna a tilang  zâwk chu a ni tak si a.

"Damdawi ei phawt la? I khua a sik bawk si a," ka ti ve ta thung a, ani chuan," Ka eina a la rei lo, min chhâwk vat mai ang, thingpui chu in tawh rawh le," a ti ve leh thung a, a thu chu âwihin thingpui no chu ka ban a, ka hre thiam chiah lo, no khat chiah a nih hi a nî khân a lo dah ni! Zodina hian a in tawh tihna em ni?

Ka ngaihtuahna hria ni àwm tak hian," Kei chuan ka in tawh a," a lo ti vat a, ka en vat a, a nui sak a, ka en leh reng ringawt. Ka rilru a dam thei lo a ni, hetianga hmuh hi ka inring hauh si lo, ka phei har lutuk chu ka inthiam thei lo a ni. Ka ngaih ëm êm chhan pawh kha a lo hetih vàng hi a nih ka ring ta rum rum mai.

A nat țan hun leh a nat chhoh dànte chu ka zâwt a, ani pawh chuan zàwi thâm chhèl chhàwl hian min lo chhâng ve zêl a, a hnu deuhah chuan a tân pawh țawng reng chu a hrehawm ringin ka zâwt zawm zêl duh ta lo va, damlo tân chuan țawng reng mai a chauhthlâkzia ka hre chiang ve tawh e.

Ka ngawih vang vang hnuah erawh ka insûm leh thei lo va," Hetiang hian i damlo tih te chu min hrilh ve tal tùr a nia," ka han ti leh ringawt a, ani chuan," Tihpalh," a ti sap phawt a, chutah,"Min rawn ngaihtuah viau dâwn tih ka hriat vàng a ni, hre ta la, i unaunu pasal neihnaah te khân kal loh kha i tum ringawt emaw te kha a ni ang a, chu chu ka duh lo a ni," a ti leh ta duah a. A sawi dik chiah, a damlo tih hre na ila chuan U Thangpuii pasal neihnaah khân ka kal kherin ka ring lo.

Hawsan ka hrehzia chuh! Mahse, ka haw loh chuan thuamhnaw sûk pho ka nei bawk si, bâkah, heta chaw ei leh ngawt țhin pawh hi a ni lo, ka ei ngun tawh bawk si a, a zahthlâk. A remti lo deuh chung chu ka hawsan ta rih a, haw kawngah chuan Zodina damloh chungchâng hi Kimi khân a sawi miah si lo va, a hre bîk lo a ni ngei ang, a sawi dàn ang a nih chuan a damlohna a la rei vak lo bawk a, hriatna hun a la nei pawh pawh a ni thei tho.

Kim lo rilru tak chuan chaw chu ka han bâr ve a; mahse, ka mitthlâa Zodina hmël mawlh ka hmuh avàng erawh chuan ka ei tui loh bâkah ka lung a chhe thar leh tlat a, ka melh ngai melhin chechàng lo chuan ka țhu reng mai a ni.

A tûklehah pawh chuan ka va kal leh a, zîng lamah a nî phone-ah va be tho mah ila ka kal lo thei lo, min pawt tlat ni berin ka hria. Ka khawngaih a, ka hmangaih a, ka ngai êm êm a, a damlohna chu tihbosakin tidam thei ila ka ti. Pathian hnênah ka țawngțai leh ringawt țhìn a,  tlêmin ka rilru hrehawmna chu a kiang ve deuh țhìn bawk; mahse, a hnu lawkah hrehawm ka ti leh țhìn.

A khawsik chu damdawi a ei chuan a reh ve leh mai țhìn a; mahse, damdawi hnathawh a zawh hunah chuan a rawn sik leh țhìn. A ngaihna ka hre lo, hetia ina tuar ngawt ngawt lova damdawi ina kal thuai mai țha ka tih thu chu a nî bulah chuan ka han sawi thâwr a, ani chuan," A duh tlat lo alawm, nangin a rilru hneh han tum teh chhin. A lo duh hlauh thei si a, nangmahah hian ka rinna ka nghat tawp aw," tiin beisei nei tak hian min han melh a. A va huphurhawm dãwn ve, a lo duh lo bur thei tho si a.

A lo duh lo tak tak a! Rei ngial ka han thlêm a, ani lah chuan,"Ka kiangah i awm tawh a, ka hmu thei che a, a tâwk viau," a lo ti tlat a, a thil sawi chu làwmawm viau mah se damdawi in chu damdawi in hi a ni tak tak a, damlo tân chuan a ni tak tak ngei ang.

A tàwpah chuan Zodina pate Zoa chu a rawn lang ve ta hrãm a, motor a rawn keng a. Kimi nèn kan va lèn lai chuan mi pawh an lo awm ve nual a, Lungleia phurh tùr a ni tih an lo hre ve tawh a ni mahna! Mipui nâwlpui kian hun nghâkin kan awm ve ta reng a. Pawisaah an harsa lêm lo ang tih ka hrereng na a, pêk ve ngei ka duh si, chutiangin Kimi pawhin.  "Kan zui ve thei mang si lo va, țawngțaina lamah hre tho mah ila pawisa dawn hlutzia hi ka hria a, kan tih ve theih tâwk, kanna pawisa tlëm azawng pêk hi chu a țha," a ti tlat a, a ti țha ka ti teh a nia.

A nî chuan a kalpui ve hman ta lo, in lamah tih tùr a tam a, kei pawh office ka ngaih avàng chuan ka zui lo; mahse, ka kan thuai thung ang. A patea chu chanchin zãwtin ka be ãwl lo a; mahse, hma a la sâwn rih lo a nih hmel. Naktûk lamah khian kan tùra Lunglei ka kal a ngai a ni.

Tlaia a ní hnêna ka va lèn chuan Zodina nat chhoh dàn chu ka zâwt chiang leh a, ani chuan zêp nei hauh lo chuan min hrilh ta kêlh a! Ka haw hnu ațang khân chaw a ei țha tawh mang lo va, hna pawh a thawk lutuk lo. A chhan a han zawh lahin a pum lam a chiangkuan vak loh thu a sawi 

ringawt a, chaw ei țha lo ta chu, a taksain a tuar a, damdawi a ei bawk nèn, a tla ta kâwk kâwk a ni.

"Inentír ran hi a țha asin le aw," ka ti vang vang a," Mahse, dam takin a lo haw leh ngei ang, Damdawi in hi zawng, a boruak hi a dang ve tlat a, a zia thuai mai ang," ka ti a, ka hnèm ve a ni, ani pawh chuan," Ni e, beiseina nei ang, Pathianin engkim a ti thei a, kan țawngțaina pawh a chhâng ngei ngei ang," a lo ti ve luam a.

A tûka damdawi ina ka kal lai chuan a lo muhìl bâm a, a bulah chuan țhuin a kut chu vawnsak chãl hle mah ila a harh ka hlauh vàngin ka vawnsak lo, a patea chuan," I fel hle mai, i rawn kal hman pawh ka ring lo asin," a lo ti luam a. Ni e, U Ropuia bulah Zodina kan ka duh thu ka hrilh tawp a, chawlh ka inpe a nih mai chu, hreh teh mah ila Zodina kan ka duh miau a ni.

A kawchhûng lam an test-na result hrang hrang chu ka zãwt chipchiar deuh a, an neih chinah chuan harsatna awm angin hmuh a ni lo, ani pawh chuan a hriat ang ang chuan min hrilh ve a. 

"Eng natna nge ni ang aw?" ka tih vang vang chuan ani chuan," Zêp nák emaw, a awm dànah hi chuan cancer a ang ka ti; mahse, a ni ngei tih erawh ka sawi lo a nia, a ang ka ti, hetiang hian kan țhianpa pakhat pawh kum naupang têin a boral a," a ti duah a, cancer hming a sawi rîk ațang khân phâwk zetin ka melh reng tawh!  

Mahse, a ni lo ang, a ni thei lo tawp ang, ni lul suh se.

*NUNNA HI A HLU ÊM ÊM A, HUN ȚHA NEIH LAIA HMANGAIHTE TIHHLIM LEH KAN HUN HMAN MÊK PAWH HLIM TAK ZÊLA HMAN HI KAN TIH NGEI TÙR A NI, HUN DANG PÊK BELH KAN NI DÂWN SI LO*