☆THE SWEETEST HANDCUFFS☆ - 56 By Dingdi Pachuau

 ☆THE SWEETEST HANDCUFFS☆ - 56 By Dingdi Pachuau

A rawn harh lai chuan a bula ka țhut  hniam lai tak a ni a, a rawn meng chhuak thut a, a hmu fiah lo a ni ang, a mit chu a han khap leh sak sak a, ka lo nuih sâng a.

"I lo harh ta maw?"

Rawn țhut chhuah a tum chu ka lo nem mu leh vat a," A ngai lo, mu rawh, i bulah ka awm dâwn alawm," ka ti vat a, ani pawh chuan a tum lui lêm lo. A mitmeng dãvã taka min en ràn pah chuan chuan," I va fel ve tiraw? I rawn kal vang vang a nia; mahse, office i chàwl ringawt tihna a ni àwm si a? A țha ka ti chiah lo," a rawn ti chhuak ve thung a, kei erawh chuan," U Ropuia a awm tho alawm, rawn kal ngei ngei ka duh si a. Nâ i nei em?" tiin ka záwt a, ani chuan," Nei lo ve, ka chau deuh mai chauh a nih hi, ka lo haw thei thuai ang. Patea kha khawiah nge?" a ti leh a, dàwra a kal lawk thu ka hrilh hnu chuan," I ril a țám em? Kha, ei tùr kha ei la?" tiin a bul dawhkàna ei tùr chu min kawhhmuh a. 

A damloh lai lehzêl pawhin amah inngaihtuah aiin min ngaihtuah zâwk chu a ni si a, he pa tak hi chuh, ka thinlung chu a rûm ru vawng vawng nain a hmuhah hi chuan lungngai leh hlim lo hmêl ka tilang hauh lo ang, hlim tak zêlin ka bia ang. Ni e, a sawi ang tak khân a dam thuai ang a, a rawn haw leh thuai ang, chuan, hlim takin kan awm dùn leh ang.

Ka awm chhûng chuan hlim takin ka bia a, a țawng ve vak phal lovin keimah zâwk chu ka țawng barh barh reng a. A bula awm reng duh mah ila hunin min daidang si a, khua a lo tlai țan ta nèn, en vang vang pah hian," Ka hawsan rih ang che aw, ka rawn kal leh thuai ang," ka ti a, kalsan ka hrehzia chu, natna khuma a mu reng lai ka han kalsan dâwn a nia, hrehawm ka ti ngawih ngawih.

Min chhâng lo chuan min en lêt reng ringawt a, ani pawh hian ka hawsan chu a huphurh tih ka hre ve mai. Min ngai dâwn tih ka hria a, chutiang bawkin kei pawhin. Hawsan mah ila rilru nuam takin ka awm dâwn lo, ka ngaihtuah reng dâwn tih ka hria a ni.

Zànah chuan ka muhìl lo tluk a ni. A patea thil sawi kha ka ngaihtuah chhuak lo thei lo a; mahse, chutiang ni tùr êm chuan ka ring phal thei lo, ni turin ka duh lo bawk; mahse, ka rilru a nuam thei chuang si lo. Ka rilru tâwt hrehawm lutuk chu ka țap deuh reng hi a ni mai, ka țawngțai leh ringawt țhin a; mahse, min chhâwk lo, a ngai reng tho. Khawvàr dáwnah ka lo chhîng ve sek a ni ang, ka men leh chuan khua a rawn vâr zui chu a ni mai a, mit thîp úrhin ka tho zui a, ka lu lah chu a na deuh tluk tluk bawk a.

Office-ah U Ropuia chuan chanchin min zâwt a, ka hrilh chuan," Ka hman veleh ka lo kan ve dâwn nia, a zia lo ëm mai," a ti a, sawi zawm lehin," Nang pawh, kan i duh chuan min vêngthãwng miah suh, kei office ka lo kai thei a, hna pawimawh tak kan nei azeng pawh a ni lo, i inthlahrung mah mahin ka hria," a ti leh a. Kei chuan," A, inthlahrung lo ve, nimin lamah pawh ka kal mai kha," ka lo ti ve thung a; mahse, a sawi hi a dik ve tho, ka inthlahrung ve a ni. Ni tin a bula awm duh mah ila hna nei ka ni a, ka hnaa ka duty a ngai a, U Ropuia hi a lo fel êm zâwk a, min hre thiam êm êm a, ani ang mi fel ka lo thawhpui hlauh hi chu mi vànnei tak ka ni. Ka la sawi lo nain ka tum dàn takah chuan Zirtàwpni chawhnu lamah awmpui tùrin ka inkhalh chhuak ve tawp ang ka ti a, Zodina pawh ka la hrilh chuang lo.

Thawhlehnîah damdawi inah a lût kha a ni a, vawiin hi a luh nî nèn, ni lìna a ni ta, a patea ka phone fo a, Zodina chanchin zâwtin, zàn lam an mut țhat theih thua min chhàn deuh ziah avàng chuan ka ngaih a țha ve phian a, bâkah, țawngțaipuina a dawng nasa tih ka hria a, dam taka a rawn chhuah theih ka beisei êm êm bawk. Heta tawrh tawp ai chuan damdawi ina luha boruak dang han hìp chu a tân pawh a țha ngeiin ka ring a ni. Doctor-te pawhin a natna tak hriat chhuah tumin an bei nasa a, an la hre mai thei lo. Test neuh neuh tùr a la awm nual a, vawi khata tih zawh vek theih pawh ni lo chuan.

Ka hrilhlâwk loh avàngin min lo hmuh chuan mak a lo tih hmel khawp mai a, ka riahpui dâwn a ni tih ka hrilh laia a mitmenga hlimna lo lang chu hmuh hmaih rual a ni lo. Mi dang awm ve pawh zah zo lo chuan min kuah a, mipa mah ni se a insûm thei lo, a mittui a tla hial a ni.

Ka rin aiin ka hmu țha daih lehnghâl a, ka beiseina pawh a sâng sawt bawk. A rilru hnual thei zâwngin ka țawng chhuak hauh lo va, dam taka a chhuah leh thuai theih dàn tùr hlír ka sawipui a, ka riahpui dáwn vàng nge amah pawh chu a harh țhain min enin a nui leh sak sak țhìn, a hlim ve viau a ni ngei ang.

Mut dâwnah a khua a sik leh avangin damdawi a ei phawt a, harsatna dang nei lovin zàn chu kan tlingtla thei mai a, ka rin ai daiha a harsat loh avàng chuan ka lãwm a, Pathian hnênah làwmthu ka sawi mawlh mawlh nghe nghe a, a patea ka phone apianga min chhàn dàn kha ka ngaihtuah chhuak a, hetiang hi a nih ngei ka ring ta. Na tak leh hrehawm lutuk tuar lova hetia a awm leh zànah pawh buai ngai miah lova a awm thei hi ka lãwm a ni.

A tûkah chuan rin loh deuhin U Ropuia a rawn lang hlawl a, ei tùr a rawn kensak nual nghe nghe, a hnu deuh lawkah Kimi leh a nu leh pate an rawn lang ve bawk a, anni pawh chuan a ei theih tùr nia an rin an rawn ken ve bâkah kan nân pawisa an rawn pe bawk. A patea awm lai a ni hlauh a, ani chuan lo dawngin làwmthu a sawi pah bawk a, Zodina pawh chuan aw thâm deuh chhèl chuan a chunga an thil tih ropuizia làwmthu sawi pah chuan a sawi sap sap a.

Doctor-te chuan glucose a tlachham nia hriain búr khat an khaisak phawt a, drip a khai ve nual tawh bawk si a, a nin thu a sawi lang miah lo nain a ning viauin ka ring. Tlangvâl țhalai ve si, chutia natna khuma mut reng chu tlàwmthlâk pawh a ti ngei ang, ka khawngaih tak zet a ni; mahse, a tân tih theih réng ka nei hauh si lo, ti thei ngat ila, ani tân hi chuan ka huam thui viau ang. A muhìl hmêl dâng del chu thlîrin ka rilruin ka țawngțai mawlh mawlh reng a, a tân hian damna ka dîl a ni. Ina ka awm lai pawh khân ka room-ah țhingțhi meuhin a tân damna dîlin Pathian ka au a, a tâna dìl beidawn hi ka duh lo, a dam hma chuan ka dîl tlauh tlauh ang.

Ka awmpui chhûng chuan harsatna dang a nei lo, thil a ei thei lo lutuk ber chu a buaithlâk. Drip a khai deuh reng a, chu chu a chaw a ni. Ka ei theihna hi pêk țhen theih ni se, a zia ngawt ang, a nih loh tal pawhin eisak thei ila, ka thil eia chakna awm rêng rêng erawh a taksaah awm thei vek thung se...

Ka awmpui chhûngin vawi khat chiah a pum a nâ a; mahse, an chiu vat a, a chhâwk har lo; mahse, a chhâwk hnuah chuan a chàu ve roh lutuk a, chêt pawh che sawn peih lovin a mu dèr mai a ni. Ka khawngaih khawp mai a, tuilum ip ka kensak chu a ke lamah dahsakin a kut chu ka tuaisak hauh hauh thung. Khua a la vâwt a, tuilum ip chu kan hmang țangkai khawp mai, ka riahpui dâwn khân pakhat ka lei leh hlauh a, pakhat ve vein kan insem a, a zia viau a ni. Kimi leh mi dang dangin chanchin min rawn zâwt ve țhìn a, ka nu leh pate pawhin Zodina damdawi in awm thu hi an hre ve daih tawh a, a chanchin pawh an rawn bengkhawn ve viau nghe nghe a, rawn kan pawh an duh viau nain ina lo awm tùr an awm dâwn si lo va; mahse, chanchin min rawn zâwt ve ziah thung. Kârleh lamah, ka awmpui leh hunah rawn kan ve chu an tum a ni àwm e.

A harh țha ve zél a, pawi ta ber chu thil a ei thei lo lutuk chu a ni, thil ei loh chuan taksa chak ngaihna a awm si lo va. Ka han tilui ve viau dâwn a; mahse, a rim a hriat ringawt pawhin a uak nghâl zêl a, a uak chuan a taksain a chauh phah zêl bawk si. Ka han fiam leh ringawt ţhìn a," Nang hi i rai te hi a ni lo maw?" tiin, a nuih a za thei nasa, nurse leh doctor ka țawng hre pha chin pawh an lo nui ve țhâ nghe nghe a.  A natna chungchâng ka zâwt ngai lo va, eng natna nge tih pawh ka zâwt ngai lo, hriat pawh ka duh lo, a bula awm hi ka duh chu a ni mai.

Riahpui reng duh mah ila a theih bîk si loh a, Thawnțannî a lo inher chhuaha ka hawsan dâwn chuan ka huphurh ru khawp mai a, ka ngaih viau dâwn  bâkah ka ngaihtuah leh reng dâwn tih ka hre sa reng si a, ani  erawh chuan dam tak hian," I hman veleh min rawn awmpui leh mai dâwn alawm; mahse, i hman hunah meuh chuan ka rawn chhuak thei tawh maithei a ni," zãngkhãi tak hian a lo ti a, kan han inen vang vang a, min tihhlim nân ka ti mai, min nuih sak bawk a. A damlo hmêl thû deuh that mai hi ka lainat bâkah ka hmangaih zual sauhin ka hria a, a bula awma enkawl lah ka ning hek lo. 

Ka hawsan dâwn tak tak tâkah chuan inthlah nân kan inkuah a, a biangah chuan ka fawhsak zauh a, a patea bâkah mi dang an lo awm ve kher bawk si a, a hmuia fawhsak erawh ka ngam lo. Hlim hmêl hmuh lui hrâm hrâmin," Lo dam țha zêl la aw, ka rawn kal leh vat ang, vawiin chu ka han haw ve hrim hrim phawt ang e," ka ti a, min chhâng lovin min en vang vang ringawt. A patea chuan," I fel lutuk e. Ni e, han haw zawk la, i lo kal leh vat dâwn nia, kan ngaih dâwn êm che hi," nui deuh chung hian a lo ti a. 

U Ropuia chuan," Office kai i ngai pawimawh leh lutuk a ni, ka awm tho a, ka lo tifel vek thei tho alawm, thil harsa lah a ni hek lo," a ti a, a țawngkam țha han ûm leh mai chu a châkawm viau mai; mahse, inhuam viau mah se ka hna a ni ve tho a, ka chàwl zauh tawh bawk nèn, a inthlahrunawm ka ti tawh, nakinah kâr tàwpah ka awmpui thei leh mai dâwn a, ni tina awmpui chu duh viau mah ila a fuh ber bîk lo tlat.

Damlo damdawi ina awmpui ta chu, khuaa mite chuan chanchin min lo zâwt ve sap sap a, Zodina nî pawh ka inah a rawn lêng ve hial nghe nghe a.  Làwmthu min hrilh sep sep paha a mittui tling piau chuan a rilru chhûngril a târ lang chiang viauin ka hria. An inchenchilh rei ve tawh a, bâkah, a unaupa fa a ni bawk a, a hmangaih viau ang tih ka hre bawk a ni.

Thawhlehni zînga Patea Zoa ka phone chuan nizàn lama Zodina khawsik a rawn chhuah leh thu chu min hrilh a; mahse, damdawi a ei a, a chhâwk leh tawh tih min hrilh a, chutih rual erawh chuan tukin chu a chau deuh a ni ang, a la thawh harh peih loh thu chu a rawn sawi leh zat a. Patea Zoa hi zêp êm êm nei lo, fel ru deuh si hi a ni a, Zodina leh a pa inkâr pawh a hre vek a ni. Tuna hetia damdawi ina a awm pawh hi a pa chu hrilh buai rih lo tùra Zodina'n a ngen avàngin a la hrilh lo va; mahse, a awm rei dâwn chuan a la hrilh tho ang tih a sawi.

Nilêngin ka ngaihtuahnaah a awm a, naktúk lama kan tùra kal leh mai ka duh hial a ni. U Ropuia hrilh leh mai ila, min lo hre thiam leh viau chuan ka ring, inthlahrung viau mah ila kal ngei ka duh si a ni. A tân tih theih ka neih loh vàng tak hian a nat chhûng tal a bula awma ngaihsaka enkawl ka duh, min mamawh hun lai taka a tâna awm reng tluka hlû a awm nâng, a dam tawh hnuah chuan ka enkawl a mamawh tawh nâng, nupa kan nih hunah erawh chuan thu dang lo ni se.

U Ropuia chu ka hrilh ta nge nge a, min lo hre thiam leh viau mai," I inthlahrung lutuk a ni, inthlahrunna tùr a awm lo, hna hautak kan nei pawh a ni lo a, hna lam rawn ngaihtuah hauh lovin awmpui tawh ang che," a ti zêk a, min hre thiamin ka awm lo a ni tih hriat miah lovin min lo awi leh dâwn chu a ni tak si a, a chunga ka làwmzia hi, làwmthu ka hrilh mawlh mawlh a, Zodina lo chhuah theih hunah pawh kan pahnih ngeiin làwmthu kan la hrilh dùn ang chu.

A damlohna lam chu dah țhain ka hmuh leh thuai theih dâwn avàng chuan ka hlim rilru hle a, zànah Pate Zoa chu ka bia a, naktûk lama Zodina tlawh tùra ka kal tùr thu ka hrilh chuan," A va làwmawm dâwn ve! A hlim ve ngawt ang, ka'n hrilh nghâl ang e," a lo ti vat a, Zodina mai ni lovin Pate Zoa pawh hian ka awm chu nuam a ti vein ka hria, ka awm ve khân a thlamuang ve pawh a ni mahna!

Mahse, thil hi kan duh dàn leh kan lo suangtuah lâwk ang hian a thleng vek lo tih ka va hmu chiang tak êm! Damdawi in ka thlen hma deuh chuan Zodina thâwk a lo buai niin, ka thlen ve meuh chuan ICU lamah an lo nawr lût tawh a, chutiang rum rum boruak ka tawn avàng chuan ka rilru a mang chhuih mai a, hlauhthàwnnain ka khat a, Pate Zoa thil min hrilh pawh chu chiangkuangin ka hre lo.

Ka rilruin ka țawngțai char char a, eng emaw thãwm ri hlek chu ka ngaichang pah reng a, Zodina thih thu min rawn hrilh ang tih hlauhna chuan min zèm tlat a, hrehawm ka va ti tehlul êm! Ka țhu a, ka ding leh a, ka awm hlè hlé thei lo, ka thâwkte chu a buai ve dâwnin ka hre hial mai.

Pate Zoa chuan mi dang a lo be kual tawh a ni ngei ang, Zodina nî hmêl ka hmu hlawl mai a!  Ani pawh keimah ang tho, kan inen a, kan hlauthãwng tih kan inhre nghâl mai, kan mittui a tling a, țah chhuah êm chu kan la hreh ve ve tih erawh kan țawng chhuah loh dàn ațang chuan a lang chiang thung.

An chhûngte dang dang an rawn lang zêl a, tih theih kan nei chuang hauh lo. A chanchin lah chu țha lam hriat tùr a la awm thei si lo va, a hnu deuhah erawh a thâwk chu a ziaawm ta deuh a ni tih kan hre thei ta a, ka làwmzia mai chuh; mahse, ka ngaih erawh a la țha chiah chuang lo.

Hmuh ka duh a; mahse, ka sawi ngam lo. Helaiah hian kei aia a thisen zawmpui hnai tak tak leh amah hmangaih tak taktute an awm khâwm a ni a, chulai kâra lo inrawlh ve chu, ka inhmu hniam rawih rawih mai. A harha thil a hre thei a nih chuan hnema a kut vuana a kianga ka awm reng thu hrilh ka va duh tak êm! Hlauthãwng lo tùra hrilh ka duh bawk, chak taka awm tùr pawhin ka chah duh.

A thâwk a ziaawm tih an hriat hnuah pawh an la awm nual tho a, a țhen chu thil ei tùrin an chhuak bawk a, Pate Zoa pawhin thil ei tùr min rawn pe a; mahse, ka ei châk lo. Ka hmangaih dam chhuah tuma a beih lai hian thil lo ei thei ka ni bîk lo, a tân ka tih theih chhun chu țawngțai a ni mai, ka han țawngțai țhin a; mahse, mumal tak pawhin ka țawngțai thei lo, ka hlauthãwng a ni, min kalsan ka hlau.

Hmeichheho chu inhnèma inbe thei pawh kan awm lo, hlauthãwng rêng

rêngin hun kan hmang a. Pate Zoa chu a zia deuh ber a, a virvat pawh a țha, doctor leh nurse a be reng a; mahse, chanchin thar min hrilh loh dànah hmasâwnna tam a awm lo a ni ngei ang. A hnuah erawh chuan a duh tân Zodina chu a hmuh theih thu a rawn sawi a; mahse, a la chak loh avàngin minute hnih aia rei pakhat tân hmuh theih a ni lo, chutah pawh hmuh duh nazawng hmuh an la remti lo zui a, hmuh ka châk viau nain a chhûngte tak tak hian hmu rawh se.

"Tluangte...??" tia min rawn koh chuan ka en vat a, Pate Zoa chuan," I hmu ve dâwn lo'm ni?" a rawn ti leh a, ka hmuh châk êm avàng chuan ka hnial phal lo, ka tho ta vat a.

Ka luh chuan ka țah chhuah mai loh nân ka hmui chu ka pet fan fan a, a awm dàn chu hmuh hrehawm ka ti tak zet a ni. A mutna kiangah chuan ka ding reng a, a mit a rawn chêt tâkah chuan a muhìl lo tih ka hre chiah, min rawn hmu ve tih ka hriat tâkah chuan harsa tak hian ka han nuih ringawt a; mahse, mask ka vuah a, ka nuih tih a hre lo tawp ang.

Sawi tùr ka ngah a; mahse, sawi pawh ni ila a hre thei kher lo ang. Khâwl a ri țêt țêt reng a, en tlawk tlawk chu ka tih theih chhun a ni deuh mai. Mahse, a hmalam hun ka hre lo va, he kan hun neih hlu tak hi holam taka ka liamtîr chuan nakinah ka inchhîr thei a ni tih ka ngaihtuah chhuak thut a, hnaih sauhin a kut chu ka vuan ta dà dá a. Min rawn hmer lêt ve hlek chuan ka hria, a chàu êm a, min hmer lêt ve tùr pawhin ka beisei ngam lo, thâ a neih ka ring lo a ni. 

"I ti thei aw, chau viau mah la, i ti thei tih ka hria, ka tân chuan i chak tâwk a ni. Ka hmangaih che, chak takin bei la, lungngai lo la, i kiangah ka awm reng tih i hre dâwn nia aw."

A mit chu muangchâng hian a'n  khap a, kei erawh chu ka insûm thei tawh lo, ka mittui chu a rawn tla ta hrâm a, ka mittui tla hmuhtîr ka tum loh tehlul nèn; mahse, he room chhûngah hian insùm a har êm a ni.

"Ka hmangaih che, ka hmangaih reng che, engtiang pawhin awm mah la, i chan chhiat ber lai pawhin ka hmangaih che a, ka thlahin ka kalsan ngai lo ang che, chuvàng chuan min kalsan chu tum bîk suh aw, min kalsan thei lo ang."

Ka mittui chu a far ta zung zung a, insùm buai pawh ka tum duh ta lo. A kut chu nghet takin ka chelh a, zungbun ka pëk ngei mai kha thâwl deuh hlek hian a lo la bun ve ràn a, chu chuan ka hnuk a tiulh zual, min kalsan mai ang tih ka va hlau tak êm! Min kalsan hlauh chuan...

*HE KHAWVËLA KAN AWM CHHÛNG HI CHUAN HREHAWM TAM TAKIN MIN HUAL VÊL RENG A, MIN BAWH BUAI A, MIHRINGAH NI SE KAN RILRU MIN HLIAMTU AN AWM FO BAWK, FAMKIM LOH KHAWVÊL A NI MIAU SI A NI*