☆THE SWEETEST HANDCUFFS☆ - 57 (Last) By Dingdi Pachuau

 ☆THE SWEETEST HANDCUFFS☆- 57 By Dingdi Pachuau

Ka mittui tla mah se, a hmuh leh hriat laia țah chhuah chu ka tum chuang lo, ka heh chu ka pet fan fan a, ka țang nasa lutuk a, nat pawh a na viau nghe nghe.

"Pàwnah i chhûngte nèn kan lo nghâk reng che aw, lungngai lo la, i kiangah kan awm tlat tih theihnghilh miah suh, i tân kan țawngțai reng bawk a ni."

Rei inhmuh theih bîk ni hek suh, pâwnah a chhûngte, a thisen zawmpui zâwkte an la awm țeuh a, hmuh an duh țheuh bawk ang, ka chhuahsan a hun ta.

"Zodin, ka hmangaih che, chutiangin i chhûngte zawng zawng pawhin an hmangaih vek che, pâwnah sâwn an awm vek a ni."

A țawng thei ve si lo va, min rawn en chho reng a, a mitmeng ațang chuan ka thil sawi chu a hre ngei niin ka hria, khawngaihna leh hmangaihna inpawlha min rawn en bâk chu tih theih a nei rih lo, ka kut pawh a rawn hmer lêt thei lo achha a ni si a, a chau tak zet a ni; mahse, a chauh lai ber pawh hian hmangaih a ni tih hi hria se ka duh, hmangaih loh, kalsan, duh loh leh a nu leh pa huat nia a inngaih tlatna hian a chauh lai tal hi chuan kiansan teh se.

Mahse, nunna chunga thu kan neih lohzia chu a takin ka hmu chiang leh ta. Chawhnu dâr 3 pelh hretah a awm dàn a dik lo leh a, a thâwk a buai leh a, doctor leh nurse-in an buaipui vat vat a; mahse, mihring thiamna leh theihna hmanga a nunna chu chelh din theih a ni ta lo. A kal ta, chawhnu dâr 3: 16-ah ka hmangaih chuan min kalsan ta. He hringnun nurãwng tak hi hnuchhawnin a nu, amah lo nghâk rengtu bulah chuan a kal ve ta.

Hmeichheho chu an țap nghâl chuah chuah a, ka ţap ve thei miah lo; mahse, ka rilru tâwtzia leh hrehawm dàn chu, țawngka hian a sawi fiah zo thei lo ang. Ka buai niai a, ka tâwt up up a, ka âwmah hian min hnawh tlattu a awm bawk, thâwk pawh harsa ka ti. Rilru fîm tak put chu ka tum ve hrâm hrâm a, a chhan chu ka mualpho mai ang tih ka hlau ve a ni; mahse, a hnuah erawh ka mualpho zui ta tho.

Chiangkuang takin kan haw dàn pawh ka hre lo. Ka rilru a tãwi muih a, a mang chhuih a, ka awm ve tawp ni berin ka hria. Zodina nî(ka nî ti ve tawh mai ang) chuan min kuah tih erawh ka hre chiang, țapin a insút leh hlap hlap țhìn a, kei erawh chu ka la țap chuang lo, ka țah a chhuak thei lo ni berin ka hria.

Zàna kan tlaivàr pawh chuan ka hun hman dàn chu mumang ang ka ti ber. Ka sawi fiah thiam lo, mumang hrehawm deuh mang ila, thâwk harsa ti êm êm ila, chutiang chu ka awm dàn chu a ni. Kimi'n min awmpuiin min țhutpui a, ani pawh a insûm thei bîk lo a ni ang, a inhru reng mai a, kei erawh Zodina hmêl tla kiam leh dâng del, vâwt thlar leh eng mah hre tawh lo chu ka chûl ka chûl ringawt mai a ni.

Ka bula a awm chhúng a rei tawh dâwn lo tih ka hria a, ka kalsan phal lo. Ka țhu reng a, ka en a, a biang chu ka chùlsak a, nakin lawkah chuan chùlsak pawh duh eng ang mah ila ka chûl thei tawh dâwn lo tih ka hriat avàng chuan ka thawhsan chhin lo hi a ni tawp mai. Ka bia a, min chhâng lo mah se ka biakna chu a ngaithlain ka ring tlat a, ka hmangaih thu bawk chu ka hrilh nawn leh țhìn.

"Zodin, ka hmangaih che. Tunah chuan i thâwk pawh a hrehawm tawh lo ang tiraw? I pum pawh a na tawh lo ang a, damdawia chìu pawh i ngai tawh lo ang. A nuam tawh ang tiraw? Chuan, i nu i hmu tawh em? Ka pu pawh i hmu tawh ang tiraw? An lo ngai ngawt lo che maw? An lo làwm nasa che em? In pathum chuan nuam in ti tawh àwm mang e."

Ka dàra kutin min rawn vawn chuan mit thial úrh chuan muangchâng hian ka en chho a, ka nu hmël ka hmuh chuan ka en reng phawt a, a mitmenga min khawngaihna leh min duatna lo lang chuan ka lung a tichhe ta tlat mai. Zodina hnuk chah ațanga la țap chhuak miah lo kha ka nu mitmeng chuan min vèl ta a ni ber ang chu, ka mittui chu rawn tla nghâl zawih zawihin ka țap chhuak ta hawk hawk a. Ţap thei lovin ka awm rei tawh bawk a, ka țah theih tâkah chuan chhuak takin ka țap hawm hawm a, ka nu chuan min kuahin ka bulah chuan a rawn țhu ve ta nghâl a.

"Zodin, ka nu a nih hi, i hria tiraw? Min hmangaih ëm êmtu ka nu hi, lo tho la, lo chhàwn teh, i lo hmuah dànah hian a lung a awi lo palh ang e."

Zai ri dap dap chuan min tilungawi hlawl lo. Chutiang hla Zodina vànga sak a han ni te chu nâ ka ti a, min hnem loh bâkah ka mittui ko chhuak tamtu a ni zâwk.  Thihna hi ka hua. Ka laizâwn min chhuhsak tawh a, tunah lah ka hmangaih min lâksak leh a, engtik hunah nge ka hmangaih dangte chungah a țuan leh ang? Hmuh theih ni se sah sawk sawk ka va châk êm!

A biang chu ka chûl a, hei hi ka chûl rei tawh dâwn lo, a bulah pawh ka awm rei thei tawh dâwn lo, duhthawh tak chuan ka chûl zêl a, a mit hmul dum buk zette chu ka chûl zêl a, vawi khat chauh a mit hi han meng leh se, duh leh hmangaih tih hriat tak khân min en leh se...

Aw thihna hi ka haw vawng vawng êm mai. Kan hlim dùn ve leh țan chauh asin, hetiang hi a ni dâwn tihte chu lo hre lâwk ila chuan damdawi in ațang pawh khân ka hàwnsan miah lo tùr hi a nia, riahpuia enkawl kha ka la kham lo asin.

"Zodin, a pawi ka ti êm mai. Damdawi in ațangte khân hàwnsan miah lo tùr che kha ka nia, min ngaidam rawh aw, hrehawm i tih dâwn tehlul nèn, a pawi ka ti ëm mai!" tiin ka rûm tlawk tlawk a, ka inthiam lo a, ka hawsan dâwn khân ţha deuh pawhin min thlah lo a nih kha, a huphurh tih ka hre reng a, ka hawsan tho a; mahse, hetiang hi a ni ang tih ka hre bîk si lo. 

Ka țap nasa bawk a, ka chau hlê a, ka nî chuan mu handam tùrin min ti a; mahse, Zodina hi ka bulah a awm rei tawh dâwn lo va, kalsan hlek pawh ka ui tawh, hun kan nei rei tawh si lo. Min hre ve tawh lo mah se kei talin ka hria a, kalsan ka tum lo bur a ni mai.

Thlànmual lamah an kalpui dáwn ta, ka hmu thei lo țêp tawh, engtin nge ni ta ang? Ka la hmu kham lo asin, a bula awm pawh ka la duh a, phùm bo daih ka phal lo.

"Zodin, ka phal lo, ka phal thei lo, min kal bosan i tum dàn hi ka duh thei ngang lo, ka phal thei lo, i kawng zawh hi a va dang ta êm! A hrehawm êm mai, hrehawm ka ti lutuk!" tiin ka rûm vawng vawng a, ka thinlung hi a rûmin a țap tlawk tlawk a ni.

Thlàn khura an dah luh dâwn chuan zah pawh dàwn lovin vawi khat chauh a hmel hmuh leh ka dîl a, min phalsak a, ka thlîr vawng vawng a," Mang țha ti phal lo che mah ila tûn atân chuan ka mang țha rih ang che aw, hrehawm ti lo la, vâwt pawh ti suh aw, ka rawn tlawh leh thuai ang che," tiin ka phun sep sep a, ka nu leh Kimi'n min ràwn kaih tâkah chuan a tàwp nân tak tak a hmel dáng del chu ka thlîr leh a, ka mittui vàng erawh chuan ka hmu fiah kâk thei tawh lo.

******

Ka nute'n kâr hnih deuhthaw min awmpui a, ka rilru hrehawm leh khawhar lutuk tùr min chhâwk khawp mai. Zodina boral lai leh vui lai vêla ka thil hriat kha ka mang hriat deuh ruai a, a hnu daihah Zodina pa leh a naute pawh an rawn kal ve a ni tih ka hre ve chauh. A fapa thih nî-ah meuh chuan a pa pawh a rawn kal ve leh ta alawm, eng rilru nge a la put ang aw?

Ka nîin Zodina lehkhabu leh a thil roh deuh deuh a dah khâwm chu min pe vek a, khawih pawh ka la khawih che ngam lo. Khawih ta ngat ila min vèl nasa dâwn tih ka hria a, ka la en ngam hlawl lo a ni ber. Nî tin chawhnu lamah a thlànah chuan ka kal ziah a, ka nuin min kalpui ziah bawk, khua a la vawh avàng chuan váwt a ti ang tih ka hlau țhin, ka bia a, pangpâr ka hmuh ang ang la kháwmin ka khàwisak ziah bawk, hei tĕ chauh hi a tâna ka tih theih chhun chu a ni ta mai si a.

Ka nu leh pate chuan min fuih nasa a, ka tân an țawngțai a, ka nu phei chuan nu tihtakah, min ngaihtuah zual a, an ruala haw phei ve rih mai tùrin min ti nghe nghe a; mahse, Kimi'n," Ka lo awmpui thei alawm, rawn ngaihtuah miah suh u," a tih avàng chuan hna nei ka ni bawk si a, ka phei ve ta lo.

Inrinnî a ni a, thuamhnaw ka su zo tawh a, Kimi pawh an in lamah a phei zawk a. Ka hawi kual a, Zodina thil roh êm êm ka dah khâwm lam chuan ka mit chu lain en châkna leh khawih châkna chuan min rawn tuam nghâl a. Ni e, hetia dah reng ringawt pawh hi a țha lo, a roh êm êm thil an ni a, țha taka ka dah khâwm ni tho mah se hrûk fai pawh an ngai tawh ang.

A hmasa berin a lehkhabu lam chu ka en phawt a, a roh theihzia ka hria, Jakob-a khân a paih darh vek a nih kha; mahse, ka dah țhatsak leh vek kha a nia. Tunah chuan anmahni roh êm êmtu khân a kalsan vek tawh a, kei hian ka enkawl zui mai an ngai dâwn ta a ni, a neitupa ang khân ka dìm thiam ve ang em maw...

Lehkhabu indawt dàn chuan ka kéu chhin diat diat a, dìm têin ka dah thla leh zêl a, pasarihna tùr ka han kèu chuan a kut ziak ni ngei tùr hi ka hmu ta a, ngun taka ena ka han chhiar chuan a ziak ngei a ni tih ka hre zui ta a. Ka maimichhîng vang vang a, thâwk la leh hawkin ka han meng leh a, ka chhiar țan ta nghâl a.

*He khawvêla mal leh khawhar taka ka inhriatna chuan min kiansan ve hret hret a, nu leh pa duh loh ni mah ila min hmangaihtu dik tak ka tawn ve tâk ațang hian hlimna dik tak nei ve thei tùrah ka inngai a, ka thinlung pawh a hlim a ni. Pathianin ka tân kan khuaah a rawn hruai lût a, hlimna tak tak min temtîr a, he khawvêla mal leh khawhar tak ni țhìn kha, mi hlim leh hmangaihtu nei  ka lo ni ve ta. Ka phû loh ni mah se kan inhmangaih miau avàngin ka phû lo ka ti phal lo, inhmangaihte inkârah phú lo a awm thei lo ka ti ve tlat*

Ni e, a dik chiah, kan inphû ve ve, kan inhmangaih a, chu chuan mi tlingah min siam a ni. Keimah vànga hmangaihtu nei nia inhriain a lo hlim viau a lo nih chu, ka va lainat roh tak! Duh aiin ka hmangaih thu kha ka lo hrilh uar lo a ni, nî tin khân lo hrilh ni ila...

*Mahse, ani hi hmangaih thei ka ni lo tih ka hria asin, a chhan chu ka kiangah chuan a hlim tluantling thei dáwn lo, ka natna hi a na êm a, tu doctor mah hian a damdawi an la hmu chhuak lo a ni. He ka natna hian ní tin min hnûk chàu hret hret a, thlàn khura min hnuh luh hunah chuan, a lungngai êm êm dâwn asin; mahse, ka hmangaih tluk zeta min lo hmangaih ve tâk sî-ah chuan ka inthiar fihlîmsan thei lo a ni, hlimna tak tak ka tawn ve ngai loh tùr nia ka hriat chu a hnênah hian ka tawng tlat si a, hlim chu ka duh ve alawm, hlimna min petu bula awm hi nuam ka ti asin*

Ka mittui a tla a, ka bula a awm khân a lo hlim viau țhìn tihna a lo ni a, a natna pawh hre vekin a thi dâwn tih pawh a lo inhre lâwk vek a ni ngei mai, hrehawm a lo va ti dâwn chiang êm! Phêk dang ka kêu a, hei chu lehkhathawn a ang zâwk, ka han chhiar leh a.

*Tluangte, hei hi i lo chhiar a nih chuan kei chu i kiangah ka awm tawh lo tihna a ni ngei ang*

Ka mittui a far zãwih avàng chuan ka chhiar zawm rih lo a. Ni e, tunah chuan ka kiangah a awm tawh lo, a taksa chu piallei thuah riat hnuaiah zalh a ni tawh a, ngaihtuahna mitthlaah chauh ka hmu thei tawh a ni.

*Ka natna vàng hian min ngaidam suh aw, ngaihdam ka phû lo, ka hrilh thei ngang si lo che a. Mi sual tak chu ka lo ni. Hlim takin hun kan hmang rei thei dâwn lo tih pawh ka hre sa, chuti chung chung chuan i lak ațangin inthiar fihlìm ka tum chuang si lo va tiraw? Mahni hma ka sial i ti em? Ni e, mahni hmasial tak ka ni, min ngaidam thei lo a nih pawhin ka dem hauh lo che, keimah hi ka indem zâwk a ni, hmangaih miah lo tùr che hian ka lo hmangaih tlat si che a, hlimna kha ka lo ban ve lo thei lo a ni... mahse, tihlungngaih che hi chu ka duh lo asin; mahse, ka va tilungngai dâwn tho si che êm!*

Ka țap leh hlap hlap phawt a, hêng thu a ziah lai pawh hian hrehawm a lo va ti dâwn êm! A rilru tùr chu ka ngaihtuah a, ka thinlung chu a na ngawih ngawih a ni. A thinlung chhûngrila natna kha engati nge ka lo hmuh fiah ve theih loh?

*Ka natna vàng hian indem miah suh aw, a chhan chu tihdam theih a ni tlat sî lo. Ka taksa chhûng ei chhetu hian ka rilru a ei chhe hmasa tlat a, rilrua natna chu tuin nge hmu thei ngai ni? Indem hauh suh ang che. Eng natna nge tu mahin an hre lo va, eng damdawi mahin a tidam thei hek lo. Hei ai hian lo tawng hma deuh hlek che ila chuan chhanchhuah ka ni thei mial mahna, 'mahna' chauh a nih chu aw, chumi vàng erawh chuan ka dem che tihna a ni lo, Pathian pawh ka dem chuang lo a nia, a kawng min ruatsak a nia, sawisêl thei rual ka ni lo. Nunna min petu a ni a, min lâksak theitu pawh a ni tlat a ni.

Ka hmangaih che, i hria tiraw? Ka engkim hian an hmangaih vek che a, i hlim nui hmêl ka hmu kham thei lo va, i țawng ri lah ka hre ning thei hek lo, nî tin ka kiangah awm thei la ka ti țhìn; mahse, hma lam hun ka neih tam lohzia ka hria asin, inneih lam pawh ka sawipui ngai miah loh che kha tiraw? Tunah chuan a chhan chu i hre ta, hëng zawng zawng ka hrilh loh che avàng hian min dem rawh, ni e, ka demawm lutuk a ni, insawi thiamna tùr ka nei lo, ka thiam loh vek a ni, thil awmzia ka hrilh loh vàng che a ni e*

Ka thinlung a tâwt a, ka âwm chu ka nem ngawt ngawt ringawt. Hmangaih ti hlê sîin a natna ka lo țâwmpui ve hauh si lo, ka va han na tak êm! Aw Lalpa, min hawisan lul lo teh, a nâ ka tiin hrehawm ka ti êm mai!

Kimi rawn lût chuan min rawn kuah a, ka țap hlei thei lo, ka thinlung a na lutuk a ni. Engati nge, engtin nge... ka buai nuai a ni mai.

Thla khat liam hnuah a lehkhabu chu ka kéu leh ta chauh a, tunah chuan ka zia ve tawh a, ka țap reng tawh lo bawk. Mi an fel a, min ngaihsak a, ka nî phei chuan min rawn tlawh ãwl lo a, an ina chaw eiah erawh min la sâwm ngam bík lo. Ani pawh hian Zodina awm ta lo chu a tuar hlê a; mahse, amah chauh puitling a awm tawh a, engkim a kut a ni ta bawk si nèn, lungchhiaa kûr kûr hman pawh a ni lo.

*Ka hun tàwp a hnai deuh deuh a, ka rilru pawh ka siam nasa viau tawh a ni. Kei hi mi sual tak chu ka lo ni e, huatna thinlung nei rengin ka lo nung țhìn a, he lei dam chhûng rei lo têah hian huatna hi paih bo hmak tùr zâwk a lo ni a, engati nge ka lo pài reng ni? Hei hian min ei chhe viau tih ka lo hre hauh si lo.

Tluangte, keimah vàng hian tu mah haw suh aw, huatna thinlungin rilru a ei chhiat dàn hi chu sawi maia fiah chi a ni lo. Chu vàng chuan tu mah haw lo la, i nun mawi tak kha lo pàr vultîr zêl ang che. Kei pawhin ka chhûngte huatna ka paih bo hlek hlek a, ka hun tàwp hnaih tak takah phei chuan ka paih bo zo vek tawh ang, huatna thinlung put hi zawng, a hlâwk lo êm mai.

Ka hmangaih che, Tluangte. Ka thâwk tàwp thleng, ka taksa pialleia phum bo a nih thleng pawhin ka hmangaih ang che, min hmangaih tih ka hre chiang a, i chungah hian ka lãwm êm êm a ni. Làwmthu ka hrilh leh ang che, ka lãwm e aw, làwmthu hrilh che hi ka ning ngai lo ang, damlai ngeia làwmthu inhrilh tùr ka tih kha i la hre reng em?*

A phêk hnung berah chuan heti hian a lo inziak a.

*Tunah chuan ka hun tàwp a hnai ta. Ka chhûngte hi hrilh ngai lo mah ila ka hmangaih vek a, ka chunga hmangaihna an lantîr zawng zawngte hi ka tân chuan a ropui lutuk. Rulh lêt theih an châkawm, ka nï leh patea phei hi chu ka tân ka lei pathian an ni.

A tàwp nân, Tluangte, ka hmangaih che tih ka sawi leh e. Ka sawi zak lo va, ka sawi ning ngai hek lo, ka awm loh hnuah min lo ngaihtuah vak vak lo la, ka hmangaih che avàngin i tân hlimna țha ber ka duh a, kei awm tawh lo (tùr) hi țûl loah chuan min ngaihtuah lo la, i tâna thil țha ber ber ka duh avàngin hlimna nei la, nei tùrin zawng la, i hlimna tùr dàltu atân min hmang suh ang che. Keimah anga hmangaihtu che i tawng leh ngei ang tih ka hria, i hlimna ka duh tih theihnghilh ngai suh aw.

Ka chhûngte ka hmangaih vek a, ka pa pawh ka haw tawh lo a ni, ka hrilh hman ta lo a nih pawhin nangin lo hrilh thei hrâm la ka ti, ka nu leh pa leh ka naute ka hmangaih vek tih lo hrilh hrâm rawh aw, chu chu ka chah che a, i lo tihlawhtling ngei ang tih pawh ka hria a ni.

KA HMANGAIH CHE*

Rei tak ka mittui a tlâk tawh loh hnuah a tla leh ta; mahse, tunah hi chuan ka țap hawm hawm tawh ngai lo a, ka rilru a kal ding dâwn pawhin thil dang ka ngaihtuah daih mai țhin; mahse, tunah hi chuan ka mittui hi tla khât tawh bawk a, Zodina hian ka mittui hi a phû a ni ka ti, a thu min chah pawh hi ka tihlawhtling ngei ang.

A pa biak chu ka huphurh ru ve reng a; mahse, a thu chah hnuhnung a nih vàngin ka tih ngei a ngai tih hriain ka be ta rãwih a, Zodina thu min chah ka han hrilh chuan mipa mah ni se insùm har a ti a ni ang, a țap hawk mai a, kei lah ka mittui a lo hnai ve nghâl bawk a, kan han țap dùn leh rih a, a hnuah erawh inhre thiam takin kan inbiakna chu kan ti tàwp ta a. 

Ka thâwl huai mai. Tunah chuan a thu min chah ka tihlawhtling ta bawk a, ka rilru pawh a zãng, thlàna ka kal leh ngei a ngai a ni, ka hrilh ve a ngai alawm.

*******

Zodina boralna pawh kum hnih zet a lo ni ve ta. Hun kal chakzia hi, hmãnni lâwk ni khân ka hre sia, kum hnih lai a lo vei ve tawh chu a ni si a. Ní tin amah hriat chhuah loh châng hi ka nei ngai lo va, zîng ka harh veleh ka ngaihtuah chhuak hmasa ber a, zàn ka mut hmunah ka ngaihtuah ngei ngei bawk. Ni e, tunah chuan hriat rengnaah chauh ka tawng thei tawh a, hun hlimawm tak tak kan hman dunte pawh nunhlui ngaihawm mai an chang ta, hei hi Pathian rorèl dàn chu a ni tlat si a.

Zodina lung pawh kan phun tawh a, sènso tum vek lo mah ila, an remti lo chung chungin a țhen azár ka tum ve tho a, min hnial lui duh ta bík lo a ni. A thlàn bul chu a fãi reng a, Lunglei ka kal apiangin pangpâr ka lei haw ziah a, thlànah chuan ka han dah țhìn a ni, ka pu thlànah pawh ka dah ve ziah bawk, an tâna ka tih theih tâwk a ni tawh miau si a ni.

Ka post-ah ka awm rei ve ta a, hmun dangah ka awm ve tawh dâwn a, naktûk khian khua hi ka chhuahsan tawh dáwn a ni. Ka ngâi ve ngawt ang, ka thawhna hmasa ber a ni si a, zànah pawh chuan mi an rawn lêng ve sap sap a, Remsiamate ţhianho pawh nizàn lamah rawn lang tho mah se an rawn lang kim leh tho, Nunmawia leh Remsiama phei hi chuan nikum khân nupui an nei tawh nghe nghe a, Amos-a chiahin a bâk tawh a nih chu. Kimi pawh nikum kum tàwp dâwna crusade rawn nei zînga pakhat nèn an inbe țhìn a, an sawi ril sâwt viau. An inhmeh ngawt ang, an fel dùn dâwn si a.

A tûkah chuan ka kal hmain thlàn ka tlawh leh phawt a, thlahna hun ka hmang a ni. Pu Rovate leh Ka nîte ka tlawh leh bawk a, tlawh leh ngei intiamin khua chu ka chhuahsan ta, min thlahtute nèn kan inhmuh theih chhûng chuan kan in-bye bye lauh lauh a, kãwi kan thleng a, an lang thei ta lo.

"Mang țha rih aw, ka la rawn tlawh leh ngei ang che."

*******

Hna ka zawm tak tak hma chuan hun thãwl ka nei hlek a, ka nu leh pate chuan zinkhawthawng tùrin min ti a, ka hnial phal lo. Boruak nawm hun lai a ni bawk a, Rosie nau Sharon-i awmna Goa lam pan chuan kan chhuak ta a. Rosie a lo hman hlauh mai a, ama min sawi hmuh hi a ni nghe nghe a, a lo remchãng ve lehzél pawh hi ka vànnei tak zet a ni, mahni mai chuan khua a har duh rak rak dáwn êm asin.

Sharon-i chuan min lo làwm khawp mai a, kan thlenna tùr pawh ama min lo tihfelsak vek hi a ni. Kei phei chu ka zin khât a, Goa pawh hi ka kal vawi khatna a ni. Rosie chuan,"Ka fanpui hrep ang che, lungngai suh, tlangvâl chhe lo an tam a nia, foreign tlangvâl i duh pawhin an awm vek," a ti a, a nui awr awr lehnghâl a, ka melh râm ringawt.

A tûkah chawlh pahin kea kalin kan chhuak mai mai a, a hmun a nuam a, mit pawh a tlai ka ti. A ninawm pawh ka ti miah lo, Rosie țawng duh leh lutuk erawh chu tlêmin a ninawm hret; mahse, ka sawisêl chuang lo, ka hlim loh hlaua min kalpuitu a ni tlat.

A tûk lamah erawh chuan fan tak takin kan fang ve ta thung a, Sharon-i pawhin a hna lamah chawlh a la a, kan pathumin kan kal dal dal a, hmel hriat an hmu zauh zauh a, kei erawh chu ka hawihil reng thung.

Mizo țawng ngei maia," Lo kal mai mai teh, khatiang buaipui hman pawh i nih rih loh kha," ti nghut rî ka hriat chuan chu lam chu ka hawi vat a, ka thin a rawn phu rang nghâl dat dat bawk. He aw hi ka hriat hnu a ni, khawiah nge ka hriat tawh kha? 

Chu pa chu min hnungchhawn zâwngin a ding a, T-shirt vâr sar leh kekawrbùl vâr a ha a, a chapal erawh a buang thak thung. A inthuam dàn ațang chuan hriat chhuah ka nei nghâl a; mahse, chutiang ngaihtuahna chu ka dah bo vat thung. Thil ni thei a ni tlat lo.

"Kan kal a ngai, hna i neih kha," a ti bung leh vut a, ni e, a aw chhuak ațang chuan amah ngei kha a ni, ka hriat sual a ni lo ang, ka hre chiang ve êm asin. Chutah, rawn inherin kan lam a rawn hawi ta, Jakob-a ngei a ni, Zodina hmêl ang kha chu a pu miah lo; mahse, amah ngei a ni tih ka thinlung hian a hre thung.

Ani pawh chuan min rawn hmu ve ta chiah a, a pên lai chu a ding dat mai, kan inkâr a hlat lêm loh avàngin mit khap hauh lovin min rawn en tih ka hria, mak ka tih êm avàngin kei pawhin ka en lêt ve reng a. Chutah, ka en thla zél a, a kutzungțanga zungbun a bun pawh chu ka hmu, hmâna mi kha a ni ang em?

Ka lam panin a rawn pên hnai leh hrat a, chutah,"Kawaī!" tiin a rawn phun chhuak ta sup a.

*A CHÂNG CHUAN KAN HUN HMANTE HI MITTHLA SUANGTUAHNA RAMA HRIAT RENG TÙRA A CHAN PHAWT LOH CHUAN A HLUTNA TAK TAK KAN HRE CHHUAK LO ȚHIN*

~~~A TÀWP TA~~~

(Buai tak chungin he story ' The Sweetest Handcuffs' chu a hmâwr kan lo bâwk ta, ka regular lo tih ka hria, chuti chung chung chuan sêl lovin min lo nghâk țàng țâng a, hre thiam tak leh phunnawi hauh lovin; in fel hi ka ti tak zet a ni. A phuailuai tih ka hria; mahse, chuti chung pawh chuan in lo chhiar tluang purh lui zêl tho a🥰 Ka lãwm, in mi hriat thiamna leh țàwiàwmnaah làwmthu ka sawi tak meuh meuh, nangni tel lo chuan eng mah ka ni lo tih ka hria, ka tâna mi pawimawh rual awm khâwm VERY VERY VERY VIP in nih hi👏👍👌

In zavaia chungah ka lãwm nawn leh e, Zodina iangin😍🥰😘 Love You All)