☆MIN EN LA☆ - 1 By Dingdi Pachuau

 ☆MIN EN LA☆ - 1 By Dingdi Pachuau

Ka nu aw ka han hre leh zet chu, ka lung a chhia a, ka mittui a tla zawih zawih thei hial mai! Ni e, thla khat chuang ka chhûngte leh ka țhiante ka hmuh tawh loh bâkah an aw takngial pawh ka hre tawh lo a nia, ka nu aw ka hriaa ka lung a chhe ta viau mai pawh hi àwm ka ti ngawih ngawih. "I aw ka hre thei ta a, tunah chuan ka hahdam ta huai e. I kal achin i chanchin kan hre thei ta si lo va, tih theih a vângin a ngaihna ka hre si lo nèn, ka țawngțai apiangin i hming lam meuhin i tân ka dîl ziah ringawt a, tunah erawh chuan ka țawngțai chhànna ka hmu ta a nih hi," ka nu chuan a ti sap sap a, ani erawh hi chu a rilru a sehhel a, a lung a chhiat ve pawh ka ring hauh lo, a aw pawh a dam dap reng a ni. "Min lo ngaihtuah viau ang tih chu ka hre reng; mahse, ka awmna pi ber hnênah hian rawn biak che u ka dîl ngam lawk lo va; mahse, tunah chuan ka duh hun hunah ka rawn be thei tawh ang che u, biak theihna tùr che u card min leisak tawh a," ka ti ve sap sap a, sawi zawm lehin," Ka dam țha a, min lo ngaihtuah miah suh u, ka hna pawh a hautak hran lo, kan ina ka thawh ang tho kha a nia ka thawh ni; mahse, motor pahnih erawh zîng tin sil ziah a ngai ve thung a," ka ti leh a.

"A nih tak chu, a hautak viau loh chu tiraw? Chuan, i awmnate, i pi leh pute an fel bawk em?" tia min rawn zawh leh chuan," Aw, fel e, ka pu hi chu a țawng tam lo va, ka pi erawh a țawng duh barh barh viau. Fa pahnih an nei a, a upa zâwk hi hmeichhia niin kum 21 a nia. A naupang zâwk mipa ve thung erawh hi chu kum 15 chauh a la ni thung, Mama nèn an inrual vêl a nih chu; mahse, a lian viau thung a," ka ti leh malh malh a.

Dârkâr chanve zet kan inbia nia! Mahse, rei ka ti chuang miah lo; mahse, ka nu hna thawk tùr ka tikhawtlai rei a ni tih ka hria a, kei pawhin ka tih tùr ka chhêk khâwl ve zêl bawk, biak la kham lo viau mah ila a tûk lama inbiak leh intiamin kan duh tâwk ta rih a. Kan inbe zo chu ka thâwl deuh huai nain ka lung a lêng zui vawng vawng mai. Ka nu chu ka ngai a, ka naute leh kan in, kan khua pawh ka ngai, ka suangtuahna mitthlaah an rawn inlâr zut zut a, ka lung a lêng tak zet a ni. Tunah tak hian ka naute chu inah an awm ang a, ka nu pawh kan leipui thlo tùrin a zîng kal ngei bawk ang, hna a thawh laiin ka be buai tih ka hria. Awm ve ila chuan ka zui ngei ang a, ka thlawhpui ang a, thlo pahin kan titi leh ngei ang; mahse, ka awm ve ta si lo. Ka nu chuan amah tê chauhin a thlo kârh kârh dáwn ta chu a ni si a. Ka lu ka thing nak a, inngaihtuah lungpuama lung lêng hman ka ni lo, tih tùr ka la ngah lutuk tlat. Thâwk ka la hawk a, tho thuaiin phúr fahran lo chuan in chung lamah hmun phiat fai tùrin ka chho zui ta hnak hnak a.

Kan khua Chêkàwnah hian kum 10 kalta khân awmhmun kan bêngbel ve țan a, a hma chuan Dârlàwnah kan awm țhìn a, kan unau pawh Dârlawnah hian kan piang hman vek bawk. Ka pa hi mistiri a ni țhìn a, hna thawh tùr a hmu theiin a kut hnu a mãn viau mai a, chuvàng tak miin an duh ve viau țhìn a, kan khawsak pawh a harsa lutuk bîk lo; mahse, hun lo taka min boralsan ațang chuan kan buai ta viau mai a, ka nuin eizawnna mumal a nei loh bâkah amah chauha kan unau lîa min han enkawl a ngai ta mai chu ani, hmeichhe âwmnêm tân chuan a rit lutuk a, kan la naupang hlawm bawk nèn, ka nu pa, ka pute khua Chêkàwn lamah kan insawn phah ta a ni. Ka pute pawh hi chhûngkaw khawsak nuam tak an ni hran lo va, ka nu chhang chiah ka puteate nèn awmin an chhangchhe berh ve hle mai si a, an inah chuan rei awm lovin an kawmthlang lawka in pakhat, hlui ve lam tawhah chuan kan invawm lût ve ta rãwih a. Kan chhûngkaw khawsak harsatzia mai chuh, la naupang viauin a zawng zawngin hre vek lo mah ila, a țhen a zâr chu ka hre thiam phâk ve ruai ruai tho. Ka naute an la tê bawk si a, kei chu ka leikãng ve tawh a, ka naute pawh ka awm ve thei tawh a ni, sikul bàn veleh khawiah mah ka lêng ve hman ngai lo. Nau ka awm a, ka nu chuan a țûl țûl a thawk a ni ber. Harsa viau mah ila sikul kan chawlh mai a phal tlat lo va, zirtîrtute hriat thiamna tam tak nèn, sikul chu kan zawm ve hrâm hrâm a ni ber. Sikul kan kal theihna tùr a nih phawt chuan tiin a thawh theih theih a thawk a, a  inhlawh lâwp lâwp bawk ţhìn. Kan zirna chu kan chhunzawm ve hrâm hrâm zêl a, matric ka pass hnuah erawh chuan kei chu ka chàwl ta daih, mi hnuaia inhlawh tùrin ka thâ a țha ve tawh a, ka nu puih ka duh ve a ni, ani erawh chuan rem a ti lo viau thung a; mahse, ka chàwl ta tho. Hna chu ka han thawk ve lâwp lâwp a, thawh duh zâwng thlang thei ka ni lo va, min chhawr duhtu apiang hnênah ka thawk tawp mai a ni, ka naute erawh harsa chung chungin sikul an la kal chhunzawm ve thei hrãm hrãm a ni.

Hetia ni sensa hnuaia hna țûl țûl thawh tawp ai chuan tiin hna thawh tùr dang, awlsam leh pawisa hmuh tam ve theih deuhna, thla bîa hlawh neihna lam a rûkin ka zawng chho ve reng a, newspaper pakhat ka chhiar ațangin Singapore lama Housemaid chungchâng advertisement chu ka hmu fuh ve ta hlauh mai, contact number an dah ațang chuan ka nu hriat lohin ka be pawp ve ta ringawt a, a țha dâwn khawpin ka hria. Ka kal ve thei ngai a nih chuan thla tin pawisa thawh chhuah ka nei ve thei ang a, kan chhûngkaw khawsak pawhin a zia phah thei ngei ang, ka nu pawhin a hahdam phah ve thei dâwn asin. 

Chumi chungchâng chu a hnu daihah ka nu ka hrilh ve ta a, a remti lo viau dâwn a; mahse, thil awm dàn ka han sawipui viau hnuah chuan min hnial duh ta bîk lo.  Hun remchâng hmasa berah Aizawlah kalin chuta țang chuan Agency lamin engkim min tihfelpui ta a, rei pawh nghâk lovin Singapore lamah keimah ang thoa hna thawh tum hmeichhe pali nèn, kan thlâwk chho ta vuah vuah mai a, ka tân chuan engkim mai chu a vawi khatna vek a ni a, ka phûr a, lunglèn leh hrehawm tihna lam a lang hauh lo. English pawh chu ka thiam viau hran lo va, ka bo lohna tùr táwk vêl ang chu ka thiam ve a; mahse, ka huphurh hran lo, kan miss-te'n Singapore-a an English hman chu a broken viau a ni tih min hrilh sa a, chu bâkah, ka sum thawh chhuah tùr lam leh ka nu leh ka naute ka chàwm theih dàn tùr mawlh chuan min uai rit zâwk miau a ni.

Ka piin ka hna thawh dàn tùr routine min siamsak thlap a, vawiin hi Thawhțanni a nih vàngin thuamhnaw dang kârah mutpuan ka su tel a, ni tin insu țhìn mah ila mutpuan tak hi chu kâr khatah vawi khat chiah ka su țhìn. Zîngah ka thawh veleh ka pi leh pu in tùr sèrtui ka sâwr ziah a, chumi hnuah motor ka sil a, motor ka sil zawh hi chuan ka pite chhûng chu an rawn tho ve tawh țhìn a, ka pu coffee ka siamsak vat a, breakfast an ei fel hnuah an chhuak dial a, thuamhnaw sûk tùr ka la khâwm a, machine-a ka sûktîr laiin breakfast ka ei a, chumi hnuah chuan machine-a sûk phal loh thuamhnaw chu ka kutin ka su ta țhìn a ni.

Hmun chu ka han hâwl zung zung a, bàl awm hek lo le, ka nâwt nghâl bawk a, an room pakhat tal hi chu kan ina awm atân ka awt ru țhìn. Chĕng an tam lo nain room a tam angreng a, mi hausaho khawsak dàn phung ka hre chho ve țan mêk chu a ni si a, Mizoram lama kan chêt dàn nèn chuan khàikhin chhin pawh ka ngam lo, anni hi zawng an sâng êm mai.

Mahse, sum neih tam hi an phû ka ti ve tlat. Hna an thawk nasa êm mai, an taima ka ti lo thei lo, zîngah an chhuak a, zàn dâr 7 vêlah an rawn haw hman țâwk a, an chhúngkua pawh hi inhmuhna hun hi an nei tam lo khawpin ka hria, hei erawh hi chu țha ka ti viau hran lo. Hausa viau mah se, an ei châk zâwng thil an ei ţawk țawk chuang lo va, an taksa hrisèlna an ngaipawimawhin an insûm thei viau mai ka ti. An fanu Abigail-i phei hi chu zîngah hian kein a kal ziah țhìn, a thuamhnaw hâk pawh a sáng hran lo viau, kekawrbùl leh T-shirt a ha mai a, slipper a bun leh mai bawk. Ka pi erawh hi chu a inchei ve deuh țhin thung a, makeup pawh a uar ve viau chuan ka hria. Ka pu nèn hian Engineer an ni ve ve a; mahse, ka pu ai hian ka pi hi chu a hausain a hna thawh pawh a sâng zâwk tih Jean-i'n min hrilh. Ani hi an fapa Isaac-a enkawltu a ni a, Isaac-a hi Autism natna nei a ni a, khawi ilo a kalna apiangah a zui țhin. In khata awm dùn e ti lo chuan ani pawh hi ka hmu khât khawp mai.

Chhùn lamah hi chuan ka ãwl ve thei deuh hlek a, che muang tak ka ni lo hi ka vànneihna a ni. Ka tih tùr ka ti zung zung a, ka àwl deuh hnuah ka diary ka ziak leh zung zung a. Zàn lamah hi chuan ka mu har thei si a, ka ziak hman meuh lo, ka ziah ve dâwn pawhin ka muthilhsan hman ziah.

Thuamhnaw sûk ka seng lai chuan țhenawm chiaha ka thawh ang thawk ve Nan-i ka tih mai chuan min lo ko a, an in bul chiaha thei rah chu a lo ei niin, kan indaidanna thîr kawkalh kárah chuan min rawn pe ve a, nui var var chung hian làwmthu ka han hrilh ve a, ani pawh chu a nui ve sak sak a. Kâr hmasa deuh lawka rawn awm thar a ni a, a pi hian a ko phar nasa ve thei khawp mai, ani pawh hi thil tih zei fahran lo chi a ni ve a, English pawh a nãl bîk lo, kan inbe țha hlei thei lo chu a ni; mahse, min duhsak ve lutuk thung.

Thuamhnaw nawh ngai chu ka han nâwt a, khua a lum viau mai; mahse, ka thuin table fan emaw ceiling fan emaw rêng rêng hi ka la on chhin lo hrim hrim a, AC phei chu khawi lam, ka room-a table fan erawh mut dáwnah ka on a, zankhuain ka on thung, a lum lutuk a, on tlaivàr loh chi a ni lo.

Ka pi hian dâr 3:30 vêla zanriah ei tur bâwl țan tùrin min hrilh țhìn a; mahse, chumi hma chuan ka bâwl țhìn thung. Mizoram lam nèn kan ei siam dàn a inang lo nasa mai si a, ka peih hman lo ang tih ka hlau țhìn,  rawn haw tlai viau țhìn mah se lo inpeih diam hi țha ka ti a, bâkah, Jean-i'n Isaac-a a rawn hawpui hma țum hi chuan min pui zauh zauh thei a, ka lãwm thei khawp mai. Ani hi Phillipino niin an ei siam dàn leh Singaporean ei siam dàn a lo inang deuh bawk a, a siam thiam viau a, siam dàn tùr pawh min hrilh zauh zauh rêng a ni.

Zànah ka piin ka hlawh min pe a, an pawisa chuan a tlêm viau tih ka hria; mahse, ka tân chuan a tlêm hauh lo, an ram pawisa leh kan ram pawisa a inthlau hlê si a, bâkah, hetiang zât ka hlawh thei hi ka lâwm a ni. Nakînah, ka kalna leh Aizawla hostel-a ka awmna man ka rulh zawh hnuah phei chuan ka hlawh tam tawh dâwn asin, ka chhûngte ka thawn thei bawk ang a...

Ka dam țha chho zêl a, hun pawh a liam ve zêl a, ei leh in țha eia in ta chu, ka taksa pawhin a ngeih viau a, in chhûng daihlim hnuaia awm reng ka ni bawk nèn ka vun pawhin a ngeih bawk a, ka mâm sâwt khawp mai. Chêt dàn pawh ka thiam tawhin ka pi leh pu mit pawh ka tlung chho ta viau a, chhùn lama mahni chauha ka awm châng hian ka awm țan tirha ka piin thil tih dàn tùr min hrilh kha ka ngaihtuah chhuak țhìn, Chinese a ni a, kei mi ina che khawr chi ka lo ni si a, ka che chhe zing si, min han vìn dawt dawt a, huat enah pawh ka en lo. Tunah hi chuan khâng hunte kha a lo ngaihawm dâwn lek lek ta mai, ngaihawm viau lo mah se. A tìr lama ka țah rûk nasat theihzia leh ka mu tùr ka han țawngțaia ka lo muthilhsan daih țhinte kha, khâng hun lai kha chuan taksa leh rilru kha a hah êm a, chawlhna hun kha an nei thei mawlh lo chu a ni.

Day-off ka nei ve lo va, ka țhiante ka kalpuite pawh kha an chanchin ka hre zui miah lo. Eng nge an an ve zêl ang le? Anni kha chu day-off nei  tùr an ni a, an inhmu thei bîk ngei ang chu. Day-off ka neih dâwn loh avàngin ka hlawh pawh hi mi dang ai chuan a sâng hlek a, hna hahthlâk tak erawh ka thawh phah chuang lo.

Ni khat chu Mami'n min rawn be ta nawlh mai! Ka âu chèl chúl mai a, ka hlim tak zet a ni. Engtin nge maw number a rawn hriat ni? Ani hi ka kalpuite zînga pakhat kha a nia, kan han inbia chu kan țawng dùn nasa asin, țawng hmasak kan inchuh a, chanchin kan inzâwt mawlh mawlh mai a ni. 

Ruthi leh Baby-i number a hriat leh hriat loh ka han zâwt a, off-day an neihnna lamah an lo inhmu țhìn niin, an number chu min pe ve ve a, an number ka han nei ve ta chu ka hlim veng veng a ni. Tunah chuan ka mal lutuk tawh bík lo ang, an off hun ka hre tawh a, kan inbe thei tawh dâwn si a.

Ka chhûngte pawh ka pawisa hlawh chhuah a full-in ka thawn ve thei ta, ka nu pawh a hlim tak zet a, thla khatah chêng sîng hnih chuang lai ka thawn ve thei ta si a, mamawh a phuhru ve vek thei tawh ngei dâwn si a, ka nu nèn kan hlimna chu a inchen ngeiin ka ring.

Ka pite pawhin ina ka awm reng chu min khawngaih ve ta a ni ang, an inkhâwmnaah min hruai ve ta a, anni ho orthodox an ni a, inkhâwm pawh an tam tehchiam lo; mahse, boruak thar ka han tem ve chu ka lãwmin ka hlim, tihtak zetin ka țawngțaiin hlã pawh ka sa ve thei ta. Pathian hla sàa ka zài lohna pawh a lo rei ta hle mai, biak inah a nia ka tih ni, inah chuan ka zâi rât rât ve fo a; mahse, zài tak takin a zài theih bîk loh a, biak inah erawh chuan ka zái pàwng páwng mai, nuam ka ti viau bawk.

Ka vànnei viau a; mahse, kum hnih hna ka thawh chhûngin day -off ka nei lo tluan parh; mahse, Pathianni zîngah ka inkhâwm thei a, ka lãwm tâwk viau tho mai, țhiante nèn erawh kan inhmu lo tluan ta a ni. Krismas-ah pawh ka haw lo, ka piin haw ka duh leh duh loh pawh min zâwt ve reng nain haw ka duh loh thuin ka chhâng, ka haw a nih chuan kal leh ka peih tawh lo ang tih ka hlau a ni, Krismas nî takah chuan inkhâwm bànah hmun hrang hrang min fanpui a, dinner pawh kan ei chhuak bawk. Phone ka nei ve tawh a, ka hlawhin ka piin man to vak lo min leisak a, thla ka la kual ve nasa viau, nakinah ka haw hunah ka nute leh ka naute ka la hmuh ve duh àwm si a.

Ka haw ve meuh chuan ka țhiante, kum hnih kal taa ka kalpuite kha chu an haw vek tawh a, keimah tê chauhin ka haw ta a, ka helhawlh êm avàng chuan kan thlâwk chhuak har ka ti khawp mai a, chhûngril lamah ka phûr tawh over si a, in thlen hlàn mawlh ka nghâkhlel a ni. Ka thlawhna ticket leh tihfel ngai zawng zawng min tihfelsak vek a, ka buai hran lo ve. Vànneihthlâk takin Kolkatta-ah Mizo hnahthlâk, Manipur lam mi ka hmu fuh a, thlawhna nghah chhûngin ninawm lo takin hun ka hman theih phah a, kan titi tui viau a ni. Singapore dollar ka hawn nual avàngin kan han thleng leh rih bawk a, pawisa fai ka hàwn nual bawk e.

Lêngpuiah Mami'n min lo hmuak a, ka lãwm teh asin. Haw kawngah chuan kan titi chho barh barh a, phone hi chuan kan inbe zauh zauh tho a, kum hnih zet inhmuh loha hmaichhana han inhmuh theih tâkah chuan sawi tùr a lo tam bîk a ni ngei ang. Anni chhûngkua hi chu an rethei lo va, a pa pawh College lecturer niin Vaivakàwnah dàwr lian ve pângngai tak an nei bawk, chutiang chhûngkaw fanu ni si Singapore-a a kal ve chhan kha ka hrethiam thei lo a, ani lah hian," Ka kal ve chhin châk alawm," a ti mai zêl a, kum khat zet chu a awm ve nghe nghe, an in leh lo ka han hmuh zet chuan Singapore-ah khân a awm rei peih ka ti ta viau mai.

An chhûngkua chu member 7 lai an lo ni a, a pî( a pa nu) awmpuiin u mipa pakhat a nei a, a u hmeichhe pakhatin pasal nei tawhin pakhatin MZU lamah Master degree a zir leh mêk a, ani hi chuan college chhuak hman lovin Singapore-ah khân a kal ta daih a, a chhûngte pawhin an zilh ve hlak tih min hrilh tawh, tunah hi chuan a nu dàwr a nghahpui țhìn a ni àwm e.

"Lehkha zir ka tui loh bâkah awmna ngai renga awm hi ka peih lo, hna ngai reng pawh ka thawk peih chuang lo, zin kual vêl hi nuam ka ti ber a, Singapore-a ka kal chhan pawh kha ka zin châk vàng a nia, an remti thei si lo va, ka kalchâk tawh bawk sia, an hriat lohin ka kal ru ta a nih kha," a tih chuan kan inan lohzia leh kan dinhmun inthlauhzia chu ka hre chiang uar uar mai, ani chu a duh duha awm theiin sum lamah an buai ve lêm lo va, ani sum thawh chhuah tel lo hian an khawsa thei viau si a. Kei ve hi, chhúngkaw harsatna vàngin lehkha pawh zir zawm thei lovin inhlawhna hlâwk ve deuh zâwk duh vàngin mi ram pawh sawi thei lovin ka han kal ve hrâm hrâm a ni tak si a, chhûngkaw khawsak hi a va lo inchen lo thei tak!

"I kal leh ang em?" tia min zawh chuan," Ka hre lo le, in han thleng ve phawt ila," tiin ka han nui a, ani chuan," Macau lam hi kan ti ve chhin dãwn em ni ang? A nih loh pawhin Dubai lamte hi?  Kan pawisa hmang chuan kan thlen loh hmèl sia, ram hmuh tamna a lo ni bawk nèn, kei ka kal châk riau asin," a ti leh a.

"A him meuh ang maw? Kei chu ka hlauthãwng ru deuh asin," ka tih chuan," Dik ve tho mai, Singapore anga security țha kha chu an ni lo tawp ang le; mahse, ka châk tho mai, housemaid lo ang deuha kal dànte hi awm se," a ti leh puat a. Nia, ani hi chuan a thei mai ang, English a thiam bâkah kei ai ngawt chuan a bright alawm, eng eng emaw thawh tùr chu a hmu mai ang, kei ve hi chu...

Zàn khat ka riah hnuah kan khaw lam panin ka haw ta vang vang a, Mami chuan ka naute ei atân tiin eng eng emaw min hawntîr țeuh a, ka hnial nasa a nia; mahse, min ngaithladuh teuh lo mai, khawpui ațanga thingtlâng lama haw tùr ka nih vàng chu a ni ngei ang, fel ka va han ti tak! Țhian tawng fuh ka inti tak zet a ni.  Ruthi leh Baby-i kha chu Aizawla awm an ni bîk lo va, pakhat Mamit lam niin pakhat erawh chu Lawngtlai lam mî a ni thung.

Ka chhûngte nèn kan han inhmu chu hetiang aia boruak nuam hi a awm thei tawh lo ang ka ti hial, kan hlim a, kan hlim vàngin kan mittui a tla a, kan inkuah thuak thuak bawk. Ka nuin hlim taka in ka thleng thei chu Pathian hnênah làwmthu sawiin a țawngțai a, ka puin,"I han hmêl țha sawt mai ka ti, nula tak tak pawh i ang viau tawh e," tiin min han fiam a, kan nui dar dar a. Ka naute chu an lo țhang hman viau mai, Mâma pawh a lo sâng tawh viau mai a, intithei takin ka chhîp a han chhêm thuak thuak a! Zotei leh Mercy pawh an țhang ve bawk a, an lo chêr dùn țhai țhai viau.

Thil ka hawnsak ka sem diat diat a, ka pêk lai chuan ka pu pawh a mittui a tling ve kul mai, a hlim vàng a ni tih ka hria, ka nauteho hmëla hlimna chuan min tihlim a, hetianga an hlim hmêl hmuh hi ka ning thei ngai lo ang.

Mahse, thil han mak theihzia hi aw..!!  Singapore ka han awm chu mi ţhenkhat helh tâwk leh sawi duh zâwng tak a lo ni ngei ang, ka han inkhâwmte chu min han en duh thei khawp a, țhenkhatin hlim hmêl taka min biaa," I lo haw tawh maw? I han ngeih hlê mai, han kal leh vat rawh khai," tia min chibai lâwp lâwp laiin a țhenin," Mi chhiahhlawha han awm chu a ropui tehchiam lo êm mai," lo ti tâwk an awm bawk a, ka zak ve lek lek mai. Ni e, kei chu heta inhlawh ngawt ai chuan tiin, pawisa ka thawk chhuak tam ve thei deuh ang a, ka naute pawh ka chãwm pah thei ang tih vàngin mi chhiahhlawhah ka han țang a, chu chu ka hnualsuat thei lo, pawisa thawh chhuah ka duh miau si a ni. Hna hnuaihnung ka sawi thei lo va, duh thlang thei ka ni hek lo, duh thlang thei turin ka zir sànnain a phâk lo va, kan chhûngkaw dinhmunin a zir ve hek lo. Kan chhûngkaw dinhmunin zir se chuan ka han kal bîk kher lo ang; mahse, dinhmun a inchen lo va, ka han kal avàngin ka naute chàwmna tur pawisa ka thawk chhuak thei a, chu pawh rinawm takin. Chêng khat pawh ka ei ru lo va, hmuhsitna hnuai ațanga ka thawh chhuah liau liau a ni, dik lo taka thawk chhuak ka nih loh avàng erawh chuan ka inhmu hniam thei lo. Mihring rilru a inang vek thei lo va, min lo sawi duh an awm a nih pawhin tih theih ka nei lo, ţawng chhuah ve erawh ka nuin a phal lo.

"E, i rilru tihrehawm miah suh, țawng chhuah ve pawh a ngai lo. An sawi rei peih miah lo ang, kei chuan ka chhuang viau zâwk che a ni; mahse, hrehawm leh lunglêng taka i han awm erawh ka inthiam lo viau a ni, khatiang dinhmuna dahtu che kha ka ni si a, kal lo thei lovin dinhmun harsaah ka dinpui tlat si che a," a ti koh koh a, kei chuan," Nu, ni lo ve, chutiangin sawi suh, tu thiam loh mah a ni lo. Kan dam ang a, kan ei khawp tùr chu kan thawk chhuak zêl ang, bâkah, nang ang nu ka nei che hi ka lãwm asin, tu pawhin min lo sawi mah se, tu chhûngkua mah hi ka awt lo, nang ka nu i nih chhûng chuan," ka lo ti ve vat a, ka rilru tak tak ka sawi a ni. Ka nu hian Pathian a țih tih hi ka hre chiang a, a takin a nunpui bawk a, ka zahpui ngai hek lo, hetiang nu ka nei leh a fanu ka ni thei hi ka lãwm êm êm zâwk a ni.

Țhalai fellowship kan neihnaah kan hruaitu chuan min ko dingin," Kan kohhran țhalai ațanga Singapore han ķal awmchhun i niin ka hria a, i hna thawh chu eng pawh lo ni se, an ram nawmzia leh thianghlimna an ngaihpawimawhzia chu kan lo ràlkhat hriat ve a, chutiang chu a ni rêng em? Bâkah, ami chêngte ațanga zir chhuah i neih ngei ka ring bawk a, țhalaite tâna entawn leh zir chhuah tùr thil țha tak tak a awm ngei ang, pakhat tal han sawi teh, report han pe pah la?" a rawn ti ta mai! Ka zak ru angreng khawp mai a, kan kohhran țhalai zîngah pawh hian min sawi duh deuh deuh an awm tih ka hre ve bawk si a, ka huphurh kher asin; mahse, min sâwm ve miau si a, ka han sawi ta a.

"Ka lãwm e," ka ti phawt a, sawi zawmin," Nia, Singapore chu kan lo hriat angin ram nuam leh thianghlim a ni a, a ni rêng bawk a. Ram changkâng a ni a, fai tùr pawh a ni; mahse, ka hmuh dàn chuan an dàn khi an ngaipawimawh êm a ni, dàn leh dàn bawhchhiat avànga hrem theihna khi an vawng tlat a, dàn bawhchhia chu dàn bawhchhia a nihna angin hremna an lek mai a, hmel hriat neih țhat tih ang vêl kha chu a awm ve lo a ni maithei," ka tih chuan an lo nui dar dar a.

"Chuan, an taima êm êm bawk a, an taksa an hmangaih thiamin an polite êm êm bawk. An polite dàn khi Mizoram chu ni se chuan 'Polite over' kan ti hial maithei; mahse, khi khi kei chu ţha ka ti, han practice ve thei țheuh ila," ka ti ta duah a.

Kan khuaa awm reng ringawt chu țha ka ti chiah lo va, ka naute'n zirna sâng zâwk an chhunzawm zêl theih nân tiin inhlawhna tùr ka han ngaihtuah kual ve leh a, ka thawh àwm tâwk a vâng bawk si a, ni sa hnuaia mi hnuaia inhlawh ringawt chu sum hmuh chhuah a tlêm ka ti bawk si, Singapore-a han kal leh mai chu ka rilrûk a, ka nu bulah chuan ka sawi chhin a, ani pawh chuan," Țha i tih phawt chuan kei chuan hnialna tùr che ka nei lo, i peih loh deuh tawh erawh chuan tihluih che ka duh miah lo a nia,"a lo ti a, rei awm lovin Aizawl lam ka pan leh ta a.

Mami erawh chuan a lo peih tawh lo va; mahse, thil min tihpuiiin engkimah min buaipui thung. Ka nuin kan khua ațanga kal ve tum an awm thu min hrilh chuan ka nui sak a, awm mai mai ai leh lo lama hnathawh vak vak ai chuan ka duhpui hlawm rêng a ni. Kal ve mawlh teh se, chhûngtechàwm nih ai chuan thawk chhuaktu nih hi a ropui tlat, eng ang hna pawh ni se rinawm taka kan thawh phawt chuan a țha vek mai, Pathian duh loh zâwng a nih ngawt loh chuan; mahse, kan khuaa mite chu ka rual khân kal ve awm tak, tute nge maw ni le? Ka nu ka han zawh lah chuan a lo hre chiang bîk si lo.

*I TIH TÙR I SAWIAH CHIANG LA, CHU CHU TIHLAWHTLING NGEI BAWK RAWH, MIIN AN CHÎK RU RENG CHE A NIA*