☆MIN EN LA☆ - 10 By Dingdi Pachuau

 ☆MIN EN LA☆ - 10 By Dingdi Pachuau

Mami chu min hrilh lâwk hauh lo hian a rawn zin phei a, kan inah chuan a rawn innghat a, kei lah pu ber in lama zanriah ei tùr ka siam lai a ni a, min rawn be bawk si lo. Ina ka haw pheiin țhutthlènga phar diaia a lo țhu ka hmuh chuan ka au chûl a. Ani lah chuan," Au vak vak mah ta che, bengchheng mai mai," a lo ti a; mahse, ani pawh chu a bãng bîk chuang lo. Phone-ah inbe reng reng mah ila, hmaichhana han inhmuh theih meuh chuan sawi tùr a lo tam a ni ang e, ka intleuh zawk hnuah ințhutchilhin an chanchin chu min hrilh ta mial mial mai a.

"En teh, min ngai viau a niang, inneihpuiah min sâwm pek a nih chu! A ngaihna a awm lo, engtin nge kan inenkawl teh lul ang? A la naupang chhia sia e, a ngaihna a awm hlawl lo, tunah pawh lehkha a la zir a nia! Engtia min khawsakpui nge maw a tum ni?" a ti sar sar a, a nuih a za pah bawk a ni ang, a nui zui sak sak a.

"A la naupang ve êm a, a thil duh lam pawh neih nghâl rum rum duh chi a nih ngei dâwn chu," ka lo ti ve a, ani pawh chuan," Ni ang chu, zan tin min rawn biak a duh a, ka lo hman reng hman bîk si lo nèn, ka chhàn hman loh chângin a titau a, a han thinrim a; mahse, chu chuan a daih rei ngai lëm hlei lo va," a lo ti leh a, sawi zawm lehin," Ka lo duh ve hman tho bawk si a, han thinrim khum ve lam hi chu ka ngaihtuah ngai lo. A han thinrim chânga a chêt dàn naupang chhia leh lutuk hi chu a châng chuan ka dawh thei lo lek lek fo a, thlèm pawh ka thlëm duh hek lo.  Chu vàng pawh chu a ni mahna le, ka hriat loh chhûng hian a lo lungawi ve leh țhìn mai bawk a," a ti leh a.

"A inhmeh lo e, a hmêl nèn kha chuan," ka tih leh chuan a nui hak hak a," A àwm ve tho, fapa mal a nih bâkah a nu leh pate hian an duat nasa a maw, a farnu pahnih lah hna thawh nei an nia, a duh duh hi chu  an tihsak ţhìn ni maiin a lang," a lo ti leh a, ka lo chek tlak tlak a.

"Mihring khawsak inan loh theihzia hi chu aw...!" ka ti leh vang vang a, ani lah chuan," Hêngho hian alawm hringnun chu tihring țhìn le, a bîkin LeRoy-a phei hi chuan a tihring ngawih ngawih," a lo ti leh vat a, mit ko sàn ãk pahin," A tihring nghulh," ka lo ti sap a, kan inen a, kan nui dùn ta tlãwrh tlãwrh a.

Zanriah ei lai chuan," I unaupa chu i tlawh ve ang chu tiraw?" ka han ti a, ani lah chuan," Ani tlawh tùrin ka rawn phei hleinem, ka peih lo," a lo ti thung a, chutah," Ţhian inlêng leh rawn tlawhtu a nei thei sia, a inah lah an ngampa thei si, ka hmu peih hlawm lo," a ti leh zat zat a, mita ka lo hmuh ve tawh, ka thil tawn tam takte mitthlà rauh rauh pah chuan ka bu nghat a, chu lam chu kan sawi zawm ta lo.

Chaw eina kan tihfel hnu kan țhut muan ar ar lai chuan a phone chu a rawn ri a, en vatin," Kha maw, amah a nih leh chiah hi, a hun leh tawh a," tiin nui chung hian min rawn en a, a tho zui ta nghâl a, bathlàr lamah chuan a chhuak phei a, ka nuih a za angreng khawp mai. Tleirãwl chhusk zawt zùnah a han uai ve ta mai chu a ni si a.

An inbiakna hlàn chuan Nunhlima a rawn lût zui ve zat a, a hmel hmuh hi a nuam ka ti țhìn, hlim hmèl taka a nui sâng reng thei mai hian a tingaihawm ka tih țhin bâkah, a bula awm pawh a tinuam ka ti tak zet. A tak rùn bík lo va, kohhran țhalaiahte inhmang ve viau a, țhalai member tam tak zîngah hruaitu ni pha mah se, a inla-zahawm rùn lo ka ti mai, inlâk zahawm tùr a ni ka tihna ni chuang lovin, kan bulah kher ni lo mi dang bulah pawh kan bula a awm ang tho hi a nih ngei ka ring bawk.

"Mikhual in nei em ni?" a rawn tih chuan ka en deuh hâ a, engtin nge a hriat ni? Ka han hawi kual a, Mami a awm ve a ni tih hriat theihna tùr a bungrua eng mah a awm si lo va, mak ti taka enin," Engtin nge i hriat?" ka han ti a, ani chuan," A, hriat a har hleinem, in kawtah scooty a inhûng a, chuan, in bathlàr lamah sâwn țawng ri ka hre zauh zauh bawk a," a lo ti a, bu nghatin," I va'n hre thei! I che detective riau mai ka ti," tiin ka han nui phawt a, sawi zawm lehin," Vawiin tlai khân ka țhiannuin Aizawl ațangin a rawn thleng a, phone-ah mi a be rih a nih kha," ka ti leh a.

Kan titi barh barh a, Mamite inbe zo pawh chuan min rawn fin a, Nunhlima awm lai chuan min ringhlel ang leh mak ti àwmin a awm duh hauh lo va, a biain a țawng bawrh bawrh a, a haw hnuah erawh min dem zui nasa ta mai. Kei erawh chuan," Min dem mai mai teh," ka ti ringawt a, ani lah chuan," Ngaizawng lo che se a rawn lêng lo tawp ang, mi fel tak a nih ngei ka ring, a hmel pawh a chhe hran lo, nihpui hmiah rawh, chhuah miah suh, tûnlaiah chuan mi țha hi an țha ngai," a ti leh ringawt a, a tih dàn teh tawp chu, ka nuih a tiza angreng khawp mai.

A tûka in ka tifel tùr chu min zui chhuak ve a, inah pawh chuan a rawn lût ve ngei; mahse, a chhuak leh thuai a, khawiah nge a kal dâwn ka hre lo. In chu ka tifel mawlh mawlh a, pu ber room ka phiat zo sitting room lam ka phiah leh chuan parda chu ka han zâr tawm deuh a, chutah chuan parda chu hmun hnih laiah a lo țet a ni tih ka hre chiah, zàr kha chuan a lo lang lo mai mai a lo ni. Ka han pawt deuh chhin a, a țet deuh hak mai, a puan a lo mawih ve deuh tawh a nih hi. Pu ber hnêna hrilh a ngai dâwn a nih hi, ti ila hetiang lam hi chu a ngaih pawimawh loh hmèl ve e. Jivan-a hrilh ila, ani'n a pu chu hrilh zâwk ta mai se...

Thingpui in tura ka phei chuan Mami a lo awm dar dar tawh a, thingpui lo lumin a hmeh pawh a lo lei sa vek niin, a lo in tawh bawk. Min lo hmuh veleh chuan," Thingpui ka lo in tawh a, nang pawhin i in tawh ang chu tiraw?" a lo ti vat a, kei chuan," In lo ve, engati nge chhangte kha i lei țeuh a? A ngai lo asin, i insêng nasa dâwn si," ka ti a, chhang chu a lo lei tam ve bawk a, dawhkànah chuan a lo dah thluah a.

"Thingpui i in lo maw?!! Sawtah sâwn  i in nghâl lo maw?!" 

Lu bu nghatin," Hetah ka in thei reng alawm, i chhang lei lah chu a tui hmèl hlawm bawk si, ka ei châk tawh lutuk! In ve leh rawh aw," ka ti sauh sauh a, thingpui no pahnih lain thingpui chu siam ka han tum a, ani erawh chuan," Kei chu ka in peih tawh lo, min siam kêp suh. Taka, i hah àwm tehlul nèn, ka lo siam ang che," tiin a rawn tho a; mahse," A ngai lo ve," tiin ka insiam zui nghâl a.

A inla tlawngàwl ve deuh a, min rawn tlawh tak tak chauha rawn kal a ni bawk nèn, chàm rei duh mah se dàwr lamah a nu a buai ve a, kei pawhin rei châm tùrin ka chelh ngam bîk lo, ni hnih a châm a, a haw phei hma nîa zanriah tùr ka bàwl laiin pu ber a rawn hãwng a, chokaa a rawn lût ka hmuh veleh chuan amah ka hmuh hmasak ber nîa ka lo chhawn dàn kha ka hre chhuak uar uar a.

"I lo haw hma riauin ka hria," tiin ka lo be ve ringawt a, a lo lût ka lo en ve bawk sia, biak loh teh tawp chu ka inthlahrung deuh a ni. Ani pawh chuan," Nia," a lo ti ve sup a, filter-a tui chu inin," Carolene-i (Mami hming pakhat) chu engtika haw phei nge a tum?" a ti leh a, mak ka ti ru kher mai, engtin nge a lo hriat ni? A sawi chhuak ngai bawk si lo.  Min rawn en chuang lo nain ka chhànna chu a nghâk tih ka hriat chuan," Naktûk khian a tum deuh a," ka ti ban deuh chat a, ani erawh chuan sawi zui leh tawh chuang lo chuan a kal sawn zui leh mai a, min tihawihai lek lek a ni.

Zanriah ei dâwn chuan Mami chuan," Nakinah chaw ei khamah ka va tlawh ve lawk ang e, ka haw phei leh tawh dâwn sia, han tlawh loh teh tawp chu ka ngai ngam chiah lo deuh hlek," a ti a, kei chuan," Nia, va tlawh ngei ngei rawh, tlawh miah loh chu a fuh lo ve alawm," ka lo ti ve a, Zotei chuan," U Mam, pu ber hi i unaupa maw ni a?! In va inang si lo ve!" a lo ti ve a. Ani chuan," Unau piang hmun chu ni chiah lo ve, ka second cousin a nih ber chu," a ti leh a.

Chaw ei lai chuan Singapore-a kan awm hun lai chanchin chu kan sawi chhuak a, Zotei pawhin ngaihnawm ti takin a lo ngaithla ve a, zawhna min lo zâwt zauh zauh bawk. Chaw ei kham hmun tihfel hnu lawkah chuan Pu ber inah chuan a phei ta a, a phei hnu deuh lawkah Nunhlima a rawn lang leh a, eng eng emaw sawiin kan phûl hlut a, Zotei chu room lamah a inkhung a, a exam dâwn tawh a, a țang ve viau bawk, kei pawhin ka theih ang anga àwlin ka duat ve a, theihtâwpin lehkha chu zir se tih ka duh, țha taka a pass chhuah theih ka duhpui a ni.

"Rêngpui, thil hrilh che ka duh a."

Ka beng ka dawh țha nasa, en hau lo mah ila eng pawh sawi se ka ngaithla ngunin ka beng ka chhi ngun lutuk ringawt! Min duh thu a sawi tawh dâwn a ni ngei ang, ka zãm, engtin emaw tak ka awm.

" Eng  thil nge ni ta?" ka ti vat a, chutiang chuan an chhâng țhìn em tih pawh ka hre lo, star hi chu ka nei ve zauh zauh tawh a; mahse, star mai a nia, ka star a ni tih pawh an rawn hre ve lêm lo ang.

"Rêngpui, ka duh che a ni, ka duh che tih hi ka chezia leh awm dàn ațang pawhin i hriat tawh tho chu ka ring a; mahse, țawngka ngeia hrilh che hi ka duh a," a rawn tih chhuah chuan engtin emaw tak hian ka awm a, chêt pawh ka che ngam lo va, melh pawh ka melh ngam hek lo. Nuam ka ti tho bawk si, ka zak êm êm bawk si,  ka awm dàn pawhchu a lài vek, kut dah dàn tùr pawh ka thiam lo, ka lài hú vek mai!

"A làwmawm hle mai," ka ti sap ringawt a, chhàn dàn tùr pawh ka hre lo; mahse, ka chhàn dàn chu ka inchhîr zui deuh zat, 'Ka lãwm e' tiin lo chhâng ta zâwk ila, a dik deuh zâwk ngei ang maw le; mahse, ka sawi zo tawh si.

"A làwmawm ringawt maw?"

Kha, a dik lo chiang, min tilai zo vek a, ka buai a, țawngkam hman tùr ber, han sawi hmasak ber tùr kha ka hre lo alawm, ka chhàn dàn avàng chuan a thin a rim ang em le?

"A, ni chuang lo ve, a làwmawm êm a, sawi tùr dang ka hre mai lo a ni, kei chu i hriat angin heti mai hi ka ni a, pa nei tawh lo ka nih bâkah chhûngkaw chãwmtu ang ka ni rih a, duh tlâk pawh ka ni hlawl lo, tunah tak phei hi chuan ngaihzâwng nei ve thei tùr dinhmunah pawh hian dingin ka la inhre meuh lo a ni," ka ti ve ta a, ka rin aia țha daihin ka sawi chhuak, ka sawi buai nuai ka rin tehlul nèn.

"Rêngpui, i chanchin hi ka hria, ni e, i naute i chàwm bâkah chhûngkaw chãwmtu ber i ni tih thleng pawhin ka hria asin; mahse, chu chuan ka duhna che hi a ti boin a tih tlèm phah chuang lo, ka hmu zing tawlh tawlh che a, i nungchang leh mizia ka hre chiang telh telh a, chu chuan ka duhna che hi a ti zual tawlh tawlh mai zâwk a ni," a ti leh dap dap a, zak ru viau mah ila ka lãwm, a thil sawi lah chu ngaihthlâk hrehawm tak a ni lo bawk si!

Kawngkhàr a rawn ri a, Mami rawn lútin a hmêl ațang chuan a hlim tih a hriat kher mai. A rawn nui lút sâng a, kan pahniha inhlat lo taka kan țhu dùn a rawn hmuh chuan," Awh, ka tihpalh lutuk! Ka rawn tibuai vek che u a ni maw?" a rawn ti lût a, a hmui chu hupin a awm dàn ațang chuan a inthiam vak lo tih ka hre thei a, kei erawh chuan a rûk tak chuan chhan chhuaktu-ah ka ngai ve hmiah, a chhan chu sawi tùr ka hre lo, ka zãm, ka lài bawk si a, chu vàng chuan," Tibuai lo ve, i va lo haw hma ve a.." ka lo ti vat a, ka aw chu pângngai taka chhuak thei tùrin ka thunun nasa a ni, a chhuak pângngai viau bawkin ka hria.

Nunhlima pawh chuan," Tibuai nâng, hun lam ka lo ngaihtuah miah lo a lo nih hi, nula hmël țha deuh ina ka lèn chuan ka heti tlat zêl, nula lêng a lo haw tawh si a, a lo tlai deuh tawh a nih chiah hi, tlangvâl luck lo lèn chen zet ka'n lèn leh dâwn chu le!" a lo ti ve a, a nui pah sãng a, a tho deuh uaih zui a. Mami'n," A la tlai lo, lêng rih rawh, ka lo hàwn tâk vàng mai a, kei chu ka mu mai dâwn," a tih pawh chuan Nunhlima chu a țhu tawh lo, kawngka bul thlengin ka thlah a, a rûk tak chuan ka khawngaih roh, a sawi duh ang tak a la sawi zo àwm si lo va.

Mut hmunah chuan," Eng nge in lo sawi mêk a? Ka rawn lút kha in lo reh dùn bawk si a, in lo inmuah lai a ni lo maw? In hmëlah lah khân, ka sawi thiam chiah lo, eng emaw tak chu a awm a ni," tiin min han dâwp a, kei chuan," Chutiang a awm mai mai lo," ka ti ve thung a, Nunhlima'n min duh thu min hrilh a ni tih ka hrilh duh ang em tih ka ngaihtuah lai tak chuan," A nih chu, ka han ringhlel deuh mai che u a nia. En teh, J-a quarter-a ka phei khân ka rin loh lutukin nula inlêng a lo nei a nih chu! Mak ka tihzia mai chuh! A chhan chu, inlëng satliah hi chu ka hre thiam ve tho a, kha nu khân a duh tih ka hmu thiam ve a, J-a lahin a huat loh hmèl ve tho bawk si, ka làwmzia mai chuh, ka hlim lutuk ringawt! Hmeichhia melh ngai tawh lo khân Tluangtei ni lo mi dang, hmeichhe dang hi an lo la awm ve a ni tih a rawn hre chhuak ve leh ta niin ka hria a," tiin, hlîm leh phûr tih hriat tak hian a sawi sârh sârh a, ka lo ngaithla reng a, lo inrawlh ka tum lêm lo, a sawi hi Makimi kha a nih ngei ka ring.

"En teh, J-a ngeiawm thiamzia chu maw,  ka lût phei kha min han hmu lo der phawt a,'l ka han biak pawh khân 'Tu nge i nih?' te min lo ti vêl a nih chu. Ka tlawh lawk si lo bawk nèn, tlêm chuan ka inthiam lo ve det tho nain a inlêngnu ka hmuh khân chûng chu a bo nghâl vek! A lo țawng duhin a lo polite phian bawk nèn, kan pahnih chuan kan inkàwm ta mial mial a nih ber chu, ka va lèn chhan bera pawh chu ka hrechang lo lek lek hial a ni, a cousin ka nih thu a hriat hnu ațang phei chuan min be țha râp maw le," tiin a han nui leh hak hak a," Mahse, ka duhpui khawp mai, Tluangtei hnua hmeichhia a kawm leh hmasak ber a nih ka ring a,  a duh phawt chuan nei ngei se ka ti. Awi, ka hlim tawp a ni mai," a ti leh barh barh a.

Mami haw phei hnu chuan a reh leh ta rãih mai. Ani kha a țawng duh barh barh a, thãwm dim viau a thiam vak lo bawk a, a thlen chin kha chu a hriat ve thei viau; mahse, a han awm lo chu a ngaihawm, Zotei lah a exam tawh avàngin lehkha a zir ngawrh si, a reh ruih mai a, Nunhlima ni se Zotei exam chhûng chu insûmin kár tàwpah chauh lo chuan a rawn lèn tawh rih loh tùr thu min hrilh tawh bawk a, a chhan chu Zotei lehkha zir a tihbuai phah a hlau ve a ni. Zotei lehkha zir hi chhiar ri vak vak chi ni se chuan a reh lo ang; mahse, lehkha zir ka awmpui a ni tih hriat miah loh khawpin a reh țhap thung.

*******

"Carolene-i nèn khán engtin nge in inhriat a?"

Ka en vat a; mahse, ani chuan min en lo chuan a newspaper ken lai chauh chu a melh a, mit khap deuh sakin," Singapore-a inhlawha kan kal dâwn khân hostel-ah awm tlângin kan han kal tlâng leh bawk a," tiin ka chhâng a, chhuar ka hrûkna pawnchhia chu ka hmet neuh neuh a. Ani chuan," Singapore chu nuam i ti em?" a rawn ti teh daih a!

"Aw... ti ve tho mai."

"I lung a lëng em?"

A hun lai ngaihtuah chhuakin ka han țhen deuh sak a," Aw, lêng e, ka mittui a tla fo mai," tiin thu dik takin ka chhâng a, ka kal vawi hnihnaah pawh khân ka lung kha a lêng êm êm tho a; mahse, thla khatah vawi khat lèn chhuahna hun ka nei ve tawh a, țhiante nèn kan inhmu thei a, tlêm chuan lunglèn pawh a zia deuh chu a nih kha.

"I han awm rei em?" a tih leh chuan ka awm hun chhûng chu ka hrilh leh a, kan chhûngkaw harsatna avànga ram danga inhlawhfaa kal nih chu ka zak lêm lo va, zêp lah ka tum hek lo.

"Kekawrbùl tãwi tê tê i han ha ve lo maw?" Ka en vat a, ka inen leh a, ka chhuahnaah kha chuan ka ha ngai lo nain inah kha chuan ha ve chiang mai a, khua a lumin an bulah kha chuan a zahthlâk loh bâkah chétpui a lo nuam bawk a, inah kha chuan kekawrtluan kha chu ka ha ngai lo.

"Inah chuan ha ve tho e, a lum lutuk a maw, bâkah, anmahni pawh khân an hâk vek bâkah kekawrbùl ni lo hák tùr dang min pe tlat lo a," ka tih chuan min rawn en phei a, ka chhîp ațangin ka ke lèr thlengin a en chhuak a ni tih ka hriat chuan ka va lài tak! Kekawrbùl ha ang chuan min mitthlà loh hrâm ka beisei.

"Ei siam i thiam phah a, a țha e," ti supin a tho ta nulh a, a newspaper ken lai chu dawhkànah dahin a room lam pan chuan a kal zui ta nghâl a, tuna a thil sawi dàn kha, min fak ve pah deuh tihna a ni ang maw? Ni e, hetah hi chuan khita ei ka siam țhin dàn tam zâwk kha ka la practice chhunzawm zêl thei a, a zia viau. Kan inah erawh chuan engkim lei chawp vek ngai a nih dâwn avàngin practice a har a, ka chhunzawm thei lo rêng a ni.

Pathiannîah erawh chuan kan inkhâwm bâng chu Nunhlima chuan min zui haw a, Zoteite nèn chuan titi barh barhin, fiamthu an telh pah bawk a, kan nui kan nui mai; mahse, a ţhiannu pakhat, an class-a mi ve tho Zotei'n a hmuh chuan an inbe ta rih a, nghâk lêm lo chuan Nunhlima nèn chuan kan kal zêl a, ani lah chuan hlim tak hian fiamthu a thawh chhunzawm zêl a, pahnih chauh e ti lo chuan kan nui bãwk bãwk a.

Kan in thleng tùr hian Pu ber quarter bula kal a ngai a, gate bulah kan kal tlang a nih ber chu. Hlim taka kan nuih bãwk bãwk lai chuan ka hawi phei mai mai a, gate nghèng deuhthaw chuan a lo ding zuah niin, ka hmu thut mai chu, ka phu deuh zawk thei nia! Ani pawh chuan mit khap hauh lo hian min lo en ve rùn a, engtia rei nge min lo en tawh ang tih chu ka hre miah lo, kei lah chuan min lo en rengtu a awm tih hre miah lovin ka nui tak bãwk bãwk si a, nui hmêl la pu deuh reng chuan ka en a, ani erawh chu a nui ve miah lo.

Mahse, a hnung deuha Polite-i ka hmuh tel tákah chuan ka hawi lêt ta vat a, engtia rei nge kei pawh chuan ka en ni, ka nuih deuh kha a nia, min nuih lêt ve hauh si lo, zahnain min rawn tuam ta chûk chûk mai a, ka biang sa hat hat chu ka han khawih ringawt a, awmzia lah chu a awm lo nasa, zahzèlah Nunhlima chu ka'n en phei leh a, ani lah chu ka awm dàn hre ve hayh lo chuan a lo la ţawng tui viau zui bawk.  Pu ber gate chu kan kal pèl a; mahse, ka tukkhum lam chu a hit deuh mam mamin ka hria, min rawn en zui zêl tihna a ni thei ang em? Ka hawi lêt ngam tawh teuh si lo.

Chawhnu dâr 2 vêlah chuan rin loh deuhin Jivan-a a rawn lang hrãwk mai a, lehkha a rawn keng a, ka han chhiar chuan Zanriah buatsaih tùra min hrilhna a lo ni a, a ziak tawi tek tawk viau mai, ngenna lam pawh niin a lang meuh lo.

"Mikhual a nei dâwn em ni?" tia Jivan-a ka zawh chuan a lu a lo thing a," Ka hre miah lo, kha kha pe tùr chein min ti a," a ti leh mai a, rei awm lovin a chhuak zui leh nghâl mai bawk a. Polite-i kha a lêng ngei mai a, ani khân chaw a ei ve nghãl dâwn a ni ngei ang. Nunhlima a haw deuh chiah a, thlasik nî a la liam loh avàngin muan suar suar chu a tih chi miah loh ang, zanriah ka buaipui dâwn a nih chuan buaipui thuai ka ngai, thim tak tak hmain chaw ei a duh țhìn si a, Pathianni tlaiah hi chuan ka bâwl khât viau asin le, eng a hria chu ni maw? Pathianni tin hi chuan a lêng chhuak ve deuh ziah kha a ni si a, vawiin kha chuan inah ka hmu tlat  bawk si.

Zotei chu ka kalna leh tih tùr chu ja hrilh phawt a, ka phei deuh nghâl mai. Ka va phei lai pawh chuan Polite-i nèn chuan kawtah an lo la awm a, ka lût chu min lo en ve ve bawk si nèn, lài ru tak; mahse, lài lo ang tak chuan ka kal zêl a, in chhûng ka luh hnuah chuan ka thaw huai huai a, ka kal pelh lai khân ka lo thaw mang lo a ni ngei ang chu!

Chawhmeh tùr ka ngaihtuah lai chuan," Min hre thiam a ni ang chu, i lo awm remchâng bawk nèn, ani sâwn hmun danga ei chhuah a duh tlat lo va," ka hnung lam ațanga a rawn tih dút dút chuan ka inhûm ruh a, min tiphu teuh lutuk chu ka ngei ru angreng khawp mai.

"Harsatna a awm hleinem," tiin awlsam tak hian ka lo chhâng ve mai a, ka insehruh deuh hlek thung.

"Kha pa kha tu nge?"

Ka meng chiang kâwk ang chu.

*I DUH DÀN THLAPIN THIL THLENG TÙR I THUNUN THEI LO, TUM PAWH NI LA I THEI CHUANG LO. CHU AI CHUAN, ENG PAWH LO THLENG SE, FÎM TAK LEH DAM TAKA LO HMACHHAWN TUM ZÂWK RAWH, CHU CHU I CHAKNA HMANRUA TÙR A NI*