☆MIN EN LA☆ - 11 By Dingdi Pachuau

 ☆MIN EN LA☆ - 11 By Dingdi Pachuau

Eng atân nge maw a tih ni?  Lungleiah kei aiin a awm tamin a awm rei daih tawh zâwk ngei a, a la hre lo chu mak ka ti, ti ila a inkhâwm ngai leh si lo tak, a hre kher lo ang.

"Kan kohhran ţhalai hruaitute zînga pakhat a nih kha," tiin ka chhâng a, a hming lang ka sawi kher lo va, a zawhna ka chhâng tho ang chu maw.

"Hetah hian chhùnah thingpui i in ngai lo niin ka lo hria a?" a rawn tih leh chuan ka en zawk a, min zawhna chuan inzawmna nei lo êma ka hriat vàng a nia; mahse, hawi sawn leh nghâlin," Mami mai mai chuh! A va țûl lo tak!" ka ti rilru nghâl mawlh mawlh a, a rì erawh chuan," Kan inah ka in thei reng a, heta in kher a ngai hleinem," ka ti ve thung a.

"Naktûk ațangin hetah hian in ziah tawh ang che, Putara leh Jivan-a pawhin an in ziah, hmeh tùr leina tùr chu Jivan-a hnênah ka lo dah ang," a ti leh sup sup a, a hmel ka en loh avàng chuan min rawn en em tih ka hre lo va, a chhuak thãwm ka hriat hnuah chauh ka hawi chhuak ve ngam chiah.

Kawngka inhawng ațang chuan Polite-i nui leh ar ar țhìn chu ka hre thei a, a bula awm chuan a chhaih hlim thiam viau a ni ngei ang chu. A țha, hlim rawh se, hlim hi a țha a nia. Eirawng chu ka bâwl mawlh mawlh a, ni e, ka hna a ni miau a, phúr takin ka bâwl mai tùr a ni.

Ka bâwl zo țêp tihah chuan an rawn lût ta a, Polite-i chu choka lamah chuan a rawn phei a, ka bulah chuan a rawn ding ve a," A tui hmèl sawr sawr lutuk," tiin, Arsa kan ka chawh kual chu a rawn en a," Chawhmeh siam hi i thiam viau a ni tiraw?" a rawn ti leh a.

Ka nui mai a," Ka thiam viau hran lo, ka siam ve thei a, a ni deuh mai," ka lo ti a, ani chuan," I thiam alawm, i thiam lutuk tlat. I pu pawh hian a chhuang viau che chuan ka hria, zanin tlai pawh hi hmun danga kan ei chhuah leh ka ring a nia; mahse, ina ei hi a rawt tlat a, thiam a tih vàng che a ni tih ka hria; mahse, kan tihbuai phah ta si che a, min lo hre thiam hrâm mai dâwn nia," a ti leh sar sar a, ka en a, a lo nui sâng ka hmuh chuan kei pawh chu ka nui ve ringawt a.

A kal sawn hnu chuan a thil sawi kha ka ngaihtuah lêt a, an sawi dàn kha a inang miah lo. Pakhatin an ei chhuah loh chhan chu pakhat zâwk a mawhpuh a, pakhat zâwk lahin pakhat a mawhpuh bawk a, eng nge a awmzia ni dâwn ni? Ka hre thiam teh nuaih lo ve.

Ka haw veleh Mami chu va biain," Engati nge i unaupa hnênah thingpui chungchâng kha i hrilh kher a? Hrilh kher a ngai hleinem, i ti ho tak tak!" tiin ka han chhuahchhàl titih nghâl țhuai a, ani thung chuan," Eng maw! Thingpui chungchãng a?!!" a rawn ti a, a han hre thiam lo der vêl chu ka ngei lutuk.

"Hre thiam lo der vêl suh," ka han ti leh a, ani lah chuan," Eng thingpui chungchâng maw?! Ka va hre thiam lo tak! Han sawi chiang deuh la maw le," a rawn ti ve leh a, thil awmzia ka han sawi chuan ani chuan," Engah nge maw ka hrilh ngawt ang? Ka hrilh hleinem, hrilh i duh lo tih ka hre ve reng a, bâkah, a ina ka phei khãn ka theihnghilh daih hrim hrim bawk, tunah i sawi a, ka hre chhuak leh chiah," a rawn ti ta heu mai.

"I hrilh lo tak tak maw?" ka han ti nawn leh ngat a, ani lah chuan," Hrilh lo, engkim hi ka hrilh bîk lo a nia," a rawn ti leh a. A thu sawi hi a dik a nih chuan tuin nge hrilh ta ang? Jivan-a leh Putara an la awm a, anni pahnih lah hian an hrilh chu ka ring hran miah lo, engtin nge a hriat ni?

A tûka in ka tihfel lai chuan Jivan-a chu ka bulah rawn kalin pawisa a rawn lek chhuak a," Ka puin 'Chhang leina tùr' a ti a, i duh zâwng han sawi la, ka zuk lei ang e," a ti a, a lo ti tak tak a nih hi.

"Duh zâwng ka nei hran lo, i duh duh zu lei rawh," ka tih chuan," A nih chuan, tui hmèl deuh deuh ka rawn lei dâwn nia. Ka puin kan zavaia ei tùr a tia, ka lei ţeuh ang," a ti a, a nui a, chhang lei tùr chuan a chhuak zui ta nghâl a. Ka en zui vang vang a, a ţha a ni mai alawm, a pawi viau chuang hleinem, ka ei țeuh mai ang.

Nunhlima chuan min sawipui leh tawh rih lo nain a awm dànah engkim ka hre thiam a, a lo lêng zauh zauh a, min duhna a țawngkamin a sawi chhuak tawh a, a cheziain a tilang bawk a, ka tân pawh hai der theih a ni lo. Kei erawh chuan țawngkamin ka la chhâng lo va, ka ngaihtuah ka ngaihtuah hian chhâng kher lo pawhin ka haw bîk hran lo tih chu a hre tawh ngei ang a, kan sawi dùn leh rih tawh lo bawk a, sawi chhuak hmasaah chuan țang lo phawt ang, sawi chhuak ta pawh ni se, tûn dinhmunah tak hi chuan ka 'Yes' thei rih lovin ka ring, a chhan chu kan chhûngkaw dinhmun ka han ngaihtuah a, ngaihtuah tùr ka ngah dâwn lutuk ka ti a ni. A tân inpeih deuh hun ka la nei ngei tùrah ngai ila, tunah tak hi chuan ka hna leh ngaihzawng neih hi a inmil vak lo,  hun ka neih loh bâkah pu ber hian zàn lamah pawh ni se mikhual a neih chãng chuan min ko thut thut thei rêng si a, mikhual hi a nei ve thei bawk si nèn, Nunhlima chan tùr ka ngaihtuah a, ka khawngaih lâwk a ni. Tihian, pu ber hnuaia hna thawk chung hian tuna ka hna ang ni lo, thawh tur dang melh pah ta ila, ka hmu ve ngai te a nih chuan chutih hunah chuan ka inpeih ve tawh ngei ang, tuna ka thawh ang thawk chunga ani kawp chu, a khawngaihthlâk, mi chhiahhlawh ngaizâwng a ni dâwn si a, a chhûngte pawh an zahawm dâwn lutuk.

Zotei exam pawh a zo țêp ta. Subject khat chauh a nei tawh a, Science-in tàwp a khãr dâwn a ni. A huphurh ve khawp mai a, keiin ka enpui thiam ve bawk si lo, kan zir ve hun laia mi nèn a inan tawh loh bâkah ka theihnghilh deuh vek tawh bawk a, chubâkah, ka nin leh ka thiam loh tak subject kha a lo ni bawk nèn, a tâna ka tih theih ve tâwk 'duat' lamah ka ramțang a, a taksa leh a rilru tih chak theihna tùr lam ka ngaihtuahsak ve e ka tia, a lehkha zir chu ka menpui a, ei tùr ka buatsaihsak a, zir ve lo mah ila ka lo țang ve êm êm a, zir ve ang tho ka nih ka ring hial a ni.

Ka nuin rawn biain," Zote, kan lo țawngțaipui reng che a nia, huphurh lutuk lo la, i tihchhiat phah hlauh zâwk ang e. I zir țhata i zir nasat phawt chuan chu chu a tâwk viau a, i theihtâwp i chhuah hnu lam kha chu Pathian kut a ni tawh, rilru hahdam tak khân zir la, zàna rei tak men te kha a ngai kher lo aw, zîng lamah tho hma ta zâwk la, i nu, i u Mâma leh i nau Mateite nèn, kan lo țawngțaipui mawlh mawlh che a ni tih theihnghilh miah suh," tiin a rawn chah malh malh a, kei pawhin ka țawngțai apiangin ka thlen ziah a, hming lam meuhin ka thlen țhìn.

Eirawng ka bâwl mawlh mawlh a, tunah hi chuan zîng khaw vâwt pawh a ziain chhùnah phei chuan a lum mah mah tawh em aw tih tùr a ni tawh a, kei meuh pawhin kawrlum ka ha tawh ngai lo tluk a ni.

Ka hnung lama thãwm awm chu en lêm hlei lo hian," Good morning! I va tho hma ve!" ka lo ti vat a, Jivan-a hian zîngkârah hian hna nei tam lo mah se a tho hma thei riau ka tia, a hrisèl ve viau chhan pawh hi a nih ka ring deuh ngawt bawk.

"Morning!"

Jivan-a a ni lo tawp mai! Ka inher ta thuai a, intuam hlûn chung hian mit sen rûmin min lo en kur niin," Tihpalh, Jivan-a emaw ka ti che a," inthiam lo tak chuan ka han ti zui a, ani chuan lungawi loh hmèl fê hian," Jivan-a emaw min ti teivet suh, ani an ka duh hleinem," a lo ti bung vut a, rawn kal hnai deuhin,"Tuilum a awm em?" a ti leh nghut a.

Ka lo thlitsak thuai a, ka han pe a, ani erawh chuan no tung sei angreng tak chu chhuar ațanga la chhuakin tuilum, noa ka thlitsak chu a ruak chhuak leh vek a, no tung sei chu keng kãngin," Hei hi ka no," a ti sup a, a kal sawn zui ta nghâl a. Ka en zui deuh vang vang a, chutah, tuilum ka pêkna no chu ka en leh a, za lo zet hian ka nui ta ringawt. A chêt dàn chu naupang chhia ka ti lutuk, a no hman thiam a ni ngei ang chu maw, a noa tuilum chu lo tui bîk nghe nghe teh se.

Chaw ka chhuan dâwn lai chuan Jivan-a a rawn kal ve ta thung a, thawh a hai thu chu inthiam lo takin a rawn sawi nuah nuah a, chutah, thil ka ngaihtuah chhuak thut. Pu ber kha exer lain a chhuak miah lo, nichina ka hmuh dàn phei kha chu, puan lumin a inthuam hlûn a, a mit pawh a sen deuh rûm a nih kha, ani kha a khua a sik a ni mai lo ang maw? A ni ngei ngei ang, exer la tùr pawhin a chhuak lo tihna a nia.

Rawn lût chauh e ti lo chuan,"Jivan, i pu kha a damlo em ni va en chhin teh, nichîn khân puan luma intuam hlûn chungin a rawn kal a," ka han ti a, ani chuan," Engtin maw? A damlo maw?!" a lo ti vat a, kei chuan," Ka hre chiang chiah lo, a room-a kalin va hre chiang teh," ka ti a, hmeichhe tân chuan chanchin zâwt tùra a room-a va kal te chu a tihchi hauh loh.

A khua chu a lo sik tak tak a! Jivan-a rawn lêt phei chuan damdawi a ei tawh thu leh a reh vat tùr thu chu min hrilh a, kei pawh chuan," A țhat chu, ni e, a reh mai ang, engtiziaa khawsik thut nge maw a nih rêng rêng le?" ka ti nang nang a, ani chuan," Ni e; mahse, a sawi dàn chuan nizàn a muthilh hlànin a khua chu a lo sik hluah ni àwm tak a ni, nizàn lamah pawh chuan damdawi chu a ei tawh a," a ti leh a.

Eirawng ka bàwl zawh chuan a chinchâng chu hriat duh viau mah ila a muthilh ka rin avàngin ka ngaihven duh ta lo va, ina ka haw chuan Zotei pawhin chaw a lo chhùm hmin țêp tawh a," Aw... i lo chhuang a ni maw? Ka rawn chhuang mai dâwn alawm," ka han ti a, naktipah exam a nei tawh a, zir ngawrh viau se ka duh, chutih lai erawh chuan rilru tihthawven ve zauh zauh pawh hi țha ka ti tho.

"Ka chhuang ve thei reng alawm, sawtah i buai bawk, hetah i buai leh chuan ka inthiam thei lo ang," Zotei'n a tih leh chuan," Buai hran lo ve, dam chuan buai te pawh kan buai ang chu, mitthi tawh an buai àwm kan hre ngai hleinem, kan la dam tihna," nui chung hian ka ti a, ani pawh chuan," Ni e, kan la dam sen lul tihna," a lo ti ve a, kan nui dùn  hak hak a.

Chhùnah chuan in tifel tùrin ka phei a, Jivan-a leh Putara chu pâwn lamah an lo awm a, an bulah chuan ka han ding ve deuh rèn râwn a; mahse, an thil sawi ka hre thiam chuang si lo va, a hnu lawkah in chhûngah chuan ka luhsan a.

Mikhual room ka tifel hmasa ber a, chhuat pawh ka nâwt nghâl thlap. PU BER room erawh chu a hnukháwiah ka ti ve ta chauh. A room hi a tihnawk ngai lëm lo, khum lah a phah mar ţha si, pathlawi duh fìr chin a ni bawk a, a àwm viau thi.

A room chhuat ka nawh hma hret chuan amah, office kal bera chu a rawn lût ta mai, dawhkàn ka hrûk fai lai a ni nghe nghe. Hre thiam lo takin ka lo ringawt a, ani erawh chuan eng mah a sawi lêm lo. A bag khai lai chu a chair-a dahin inthlâk lëm lo chuan khumah chuan a bawk nghâl thlawrh a, a rizai pan angreng tak chu a pawt pharh zui a.

"I nuamsam meuh nange?"

Ani chuan ka zawhna min chhâng lo chuan," Ka damdawi ei chu a thawk lo ve khawp mai," a lo ti daih a, a lo haw ta bawk nèn, chhuat chu ka nâwt sawk sawk a, ka nawh zawh chuan," Puan dang sin belh i duh em?" ka han ti a, ani chuan," Ngai lo mai rawh se, Jivan-a kha rawn luhtír thung la," a ti a, ka chhuak zui ta nghâl a.

Thingpui in hnuah pawh ka haw mai bîk lo. Jivan-a chuan a pu lu chu a hmehsak a, kei erawh chuan va pawh hreh deuh si, a chanchin hre châk ve tho bawk siin ka awm a, a room bul hnaihah ka tàwi ka tàwi ringawt a, a hnu deuha Jivan-a rawn chhuak ka hmuh chuan pu ber chanchin chu ka lo zãwt vat a, ani pawh chuan tlëma a zia deuh thu chu min hrilh a.

Chutia ka hna thawhna pu ber a mu ngût reng mai tih ka hriat chuan zah pawh dâwn duh lo hian a room-ah chuan ka han lút dêk dêk a, hawsan mai ai chuan tia dâk lút ka ni, han hawsan nulh kha chu a màwl thlâk ve deuh ang.

"I harh maw? Eng nge i an zêl?" tiin ka han be hmasa a, che lo chuan a la mu reng phawt a, ka beidawn deuh tawh hnuah chuan," Aw, ka țha," a lo ti sup a, a rawn inher chuang lo.  Thingpui ka in zo chiah a ni bawk a, chhùn khaw êngah chuan a lum duh up up khawp mai.

"A zia lo êm mai; mahse, i țha leh vat tùrah ngai ang, damdawia inentîr i duh lo'm ni?"

Ani chuan," A ngai lo ang, khawsik pângngai a nia, a reh leh vat mai ang," a lo ti a, pawmpui tih hriat tak hian ka lu ka bu nghat a," Ni e, a reh vat tùrah ngai ila," ka lo ti ve a. Rei angreng tak  ka awm rèn râwn hnuah chuan inah ka pheisan ve ta a; mahse, rilru a tinuam miah lo. Min chhawrtu a ni a, damloin a mu reng a, han kalsan daih chu a fuh vak lo.

*Zànah ka rawn lêng ang aw, ka hmu khát si che a, hmuh ve hrim hrim che ka duh a, ka rei miah lo ang* 

Nunhlima hnën ațanga message ka dawn a ni. Ni e, Pathianni liam ta emaw Innrinni khán emaw kan inah a rawn lang miah si lo va, țhalai lamah tih tùr pawimawh tak a nei a, amah pawhin a rawn sawi sa tho a, inhmuh tum deuhin kan inhmu lo a ni.

*I tih dàn dan le*  tiin ka chhâng lêt a, ni e, a thu thu a nia, keiin lo sawi ve tùr lah ka nei hek lo.

Rilru nuam lo ru takin Zotei ei tùr chu ka siam a, ani pawh a zir nasa ve bawk a, a vanduai a a ti țha lua lo a nih loh chuan a pass ngei ka ring. Ani hi chu a pass phawt chuan a duh chen chen lehkha zir rawh se; keiin ka zir thlen ve theih loh leh ui tak chunga ka bànsan kha a ngai miau si a. Chyvangin Zotei hi chu ka theih ang ang thawkin ka zir chhuahtír tho tho ang.

Mami'n min rawn bia a, LeRoy-a chanchin bawk min rawn hrilh leh nghâl a, an intihtauh ve deuh dàn leh tunah chuan an boruak pawh a hma ang chiah a nih leh tawh thute chu min hrilh luam a. Kan inbiak zawh hnua ka ngaihtuahnaa lo lang chu Mami bialpa LeRoy-a hi duh ai chuan a nau deuh mah mah a ni, a lo berah Mami nèn hian inrual tal se, a nih loh pawhin mipa puitling ve tâwk tawh tak niin a dawhtu zâwk ni se tiin duhthu ka lo sàmpui ve a, hetia inthlèm leh reng țhin ringawt chu a daih rei thei lo ang tih ka hlauhpui a ni.

Pu ber ina ka phei leh chuan Jivan-a chuan a chanchin chu min lo hrilh malh malh a, a khawsik chu a lo reh deuh tawh a, a lo muhìl ve tlûn thung. A muhìl hmêl chu ka en vang vang a, khawngaih thlâ a la ka ti ta riau a nih chu. Ka khawngaih phâk ni lo mah se a nun leh hun lo hman tawh zawng zawngte ka han ngaihtuah lét a, ka khawngaih lo thei lo a ni.

"Zonun, Zonun....!!"

Ka en nawn leh vat a; mahse, a meng miah lo. Harh hmêl pawh a pu chuang lo, A mumang lamah a nupui boral ta kha a hmu a ni ngei ang.

"Min kalsan tawh suh, mawh, khawngaihin..."

A aw chu zàwi viau mah se ka hre chiang ngang thung. A kut chu a rawn phar chhuak deuh a, a la maimichhîng reng bawk si a, a awm dàn chu nuihzattu tân chuan nuih a za duh viau ang tih chu ka hria; mahse, ka nuih ve thei lo, ka khawngaih zâwk a ni.

"Ka kut hi thlah suh aw, i thlah a nih chuan a hma ang chiah khân ka chelh thei lo ang che, min chelh tlat la."

A kut phar chhuak chuan vawn tùr a duh hmèl lutuk a, ka lo vawnsak mai dáwn em maw ni ka tih lai chuan a kut chu a thlâk thla ta riai riai a, phun sup sup hian," Zonun, kal suh, min kalsan lul tawh suh," a ti leh mawlh mawlh a, a aw chu zàwi viau mah se ka hre chiang ngang mai. A kut chu khumah chuan a la phar deuh a, Zonuni chuan a kalsan ta tho a ni ngei ang, a mittui chu a bekah a rawn luang thla ta ngiai ngiai bawk a.

"Zonun, ka kut hi..."

A nupui boral ta a hmuh si chuan a khawsik hi a sâng viau ang a, a nupui hian a awmnaa hruai ve ngei a tum a ni ngei ang, eng mah ngaihtuah chang ta lo chuan a kut chu ka vawnsak ta ringawt a, ani chuan nghet zet hian min lo chelh a, a mittui luang ngiai ngiai erawh a la tàwp chuang lo; mahse, a ngaih a țha deuh tawh nge," Thlah suh aw, ka thlah miah lo ang che," a ti leh sap sap a, a hmui chu a la chêt tho nain a sawi a hriat theih tawh loh. A muthilh chian leh hnuah chauh ka kut chu ka la a, kut lâk sawn ka tum hmasak ber țum chuan min la thlah duh teuh lo, a la chelh nghet viau; mahse, a muthilh ngheh leh hnuah chauh ka kut chu a thlah a, a kut lum thar thar lak ațanga ka kut ka lãk sawn chuan eng emaw kim lo ta riaua inhriatna ka nei!

Tlaia eirawng ka bàwl zawh hma deuhin a rawn harh a, a khawsik pawhin a kiansan vek deuhthaw tawh a; mahse, tlêm chu a la awm deuh; amah pawh a rawn tho chhuak peih a, a làwmawm khawp mai, a khawsik hian kiansan mawlh teh se, mumang țha lo pui pui a man phah si a.

A damloh vàng liau liau chuan a zanriah ei lai pawhin ka hawsan duh bîk lo, eng mah min zâwt hran lo va, mak ti hmêl pawh a pu chuang lo. Jivan-a chuan," Pu, naktûk lamah chuan inentîr la?" a lo ti a, ani erawh chuan țawngkaa chhâng lêm lo chuan a lu a thing deuh hlek ringawt a, chutah," Ka muthilh lai khân ka țawng vài em?" a rawn ti chhuak ta sup a.

Jivan-a chuan a lo chhâng vat a, a țawng vài loh thu a sawi chuan lo inrawlh ka tum lêm lo. Ani pawh chu a bu nghat a, chaw chu tlêm a ei a, a kham ta thuai a. A ei kham deuh chiah ang tihah chuan inlêng a nei leh ta, Polite-i  kha a ni a, a damlo tih a rawn hria a ni ngei mai, engtin nge maw a hriat ni?

"I damlo tih ka lo hria a."

"Ka dam reng hi."

"Luhlul chhuah loin sawi țha ve mai la," zaidam taka a tih leh chuan," Min hmuh ang hian ka dam tak tak alawm," ani chuan a lo ti leh mai a, an țawng dàn zawng zawng chu ka hre chiang thei bîk lo, sitting room lamah an awm daih sia, mumal takin an țawng ka hre pha tawh lo a ni.

*I TI THEI TIH I LANTÎR HMA KHÂN A LAN DÀNAH CHUAN THIL TIH THEIH LOH TLUK A NI; MAHSE, I TI THEI TLAT SI*