☆MIN EN LA☆ - 12 By Dingdi Pachuau

 

☆MIN EN LA☆ - 12 By Dingdi Pachuau

Hun a liam a, Pathian zârah kan dam țha a, Zotei chu a exam zawh tawh avàng chuan kan khaw lamah a haw ta rih a. Min la awmpui chu a duh viau tho nain in lamah ka nute an buai ang tih a hlau ve tho a, keiin haw tùrin ka ti ve tho bawk nèn, hetah eng mah ti lova nilêng lênga awm țhin ringawt chu thil dik ni mawlh hek lo le, a haw chhoh hnu chuan khua a har ve duh reuh khawp mai; mahse, hetiang hi chu ka tuar țhang ve tawh a, hrehawm ka ti viau lêm lo, bâkah, a hman chângin Nunhlima a rawn lêng zauh zauh tho bawk a, ka khawhar pawh a hnèm viau.

"Electric chhit manah eng zât nge i chàwi ţhin?" microwave oven-a a ei tùr ka tih lum mawlh mawlh lai chuan a rawn ti thut a, ka bul lawkah a lo ding tih ka hre miah lo. Ka melh chho zawk a, thil ka tih lum lam en leh nghâlin," A, a inang lo hlawm a," tiin ka chhâng a, ani erawh chuan," A average-a chhútin thla tin eng zah nge i chàwi ang?" a rawn ti leh a, chhàn loh theih ni hek lo le," Rs 300 - 400 inkâr a ni tlângpui," tiin ka chhâng ta a. A rûk tak chuan chawi tam ka inti ţhìn a; mahse, han complain ka hreh bâkah chumi ti tùr pawh chuan hun ka nei lo ve êm a ni.

"Rs 300- 400 inkâr... In châwi tam a ni maw? Zànah bâk hmanna in nei àwm si lo va," a ti leh sup sup a, kei pawh chuan," Nia, zànah pawh hian kan awm lohna room apiang hi chu ka off ziah a, keima ngaih chuan ka hmang ren ve viau a ni," ka lo ti ve leh a. Ka rin loh deuh hian," Inlêng i nei rei thei viau a niang," a rawn ti chhuak leh sup a, min chhaih ve ngei a nih ka ring, ka nui ringawt a.

A ei tùr chu dawhkànah ka hûng khâwm a, a lo țhu ve kur tawh a, a mi uap a nâ ka ti, zei vak lo leh nervous ve thei zet mai ka nihna rawn langin thlèng sâah chuan ka han indep leh zauh pek a, ka inrin hman hma chuan," A sâaaa..!!!" ka ti chhuak a, a rawn tho nghâl vut a, thleng sâa  ka indehna lai ka chül tùr chu min rawn dangin tui dehna hmunah chuan min kai phei nghâl a, tui herh hawin ka kut chu a'n khawhtîr a, kal sawn lehnghâlin khawiah chuan a kal dâwn ni maw ka tih laiin Colgate kengin a rawn lang leh a, tui herh tàwpin ka kut thlèng sâa ka dehna lai chu chhêmin colgate chu a tât ta luai a.

"A la sa hat hat em?"

"Umm... aih," ka ti bah nak a, a bula amah hnaih zeta ka awm avàng chuan ka buai vek ni maiin ka hria. Ani chuan," Tikhán, a reh thuai mai ang, durh lo tùrah ngai ila," a ti hniam leh ruih a, ka hmui chu ka pet fan fan ringawt, nâ ka tih vàng erawh a ni lo, a thil sawi hi chhàn dàn tùr ka hre lo a ni zâwk, chhàn kher a ngai ang em? Chhâng lo ta ila a mawi lo viau ang em?

Ka kut chu a durh nasa viau lo nain chêt erawh min tikhawr deuh hlek, colgate kha min hnawihsak lo phei se chuan a durh nasa viauin ka ring, hnawih tùr dang ka han zawng a,  Aloe vera a țha nia pu berin a sawi avàngin ka hnawih ve leh a, ka ngeih ta viau mai. Vawi thum vêl ka hnawih hnuah chuan a hil ta duak mai a, ka lâwm tak tak a ni. Pu ber lah chuan min hmuh apiangin ka kut chanchin chu min záwt ziah a, a dam tawhzia thu ka hrilh chuan," A țhat chu," tiin a bu nghut a, ani hian min hrilh lo phei se chuan ka hre leh tawp nâng. Nunhlima pawh khân a sawi ve ngei a, ka hnawih tawh hnuah khân a nia, ani pawhin a lo hre dik ve chiah a lo ni.

Ka khawvêl hi a zau lo khawp mai a, pu ber quarter leh kan in hi ka kàr tawn chhên a, dàwrtêah mamawh leiin ka kal leh zawk a, kawmthlang lawkah chawhmeh, thlai hnah leiin ka chhuak leh a, Pathiannîah ka inkhâwm a, ka hman chuan țhalai inhmuh khâwmnaah ka kal ve leh a, chu chu ka hun hman dàn chu a ni mai. Ka bial hi a zîm êm êm mai a, a châng chuan ka nuih a za zâwk hial, Singapore ka kal hmasaka ka awm dàn leh hun hman dàn kha ka hre chhuak zauh zauh a, khami-ah pawh khân inah hna ka thawk a, khawiah mah chhuak lovin ka awm tlawk tlawk mai a nih kha.

"Kârleh Inrinnî khian kan picnic dáwn asin, i lo kal ve thei ang tiraw?" Nunhlima'n a tih chuan," A nuam ngawt ang chu; mahse, kei chu ka thei ve lo ang, ka hnaah hian chawlh a awm ve thei lo va," nui deuh chung hian ka lo ti a, ani chuan," Chawlh a dìl theih mai lo'm ni?" a ti leh a," Theihin ka ring lo, entîr nân a zin hlàn te a nih ngawt loh chuan, eirawng bàwlsak ziah a ngai alawm," ka ti leh a.

A rûm deuh nghat a," Ka lo sawi tùr chu a awm miah lo nain i hna thawh dàn hi tlêmin ka'n sawisêl hlek teh ang," nui hmêl pu lek lek chung hian a ti a, kei chuan," E, sawisêl bawrh bawrh rawh khai," ka lo ti ve a, ani chuan," Chawlh i nei miah lo tihna a nia, a fuh zân lo a ni. Hun thâwl neih pawh i mamawh ve alawm, hetia inchhawr chawrh chawrh, hun ãwl pawh neih theih loh hi chu a fuh chiah lo deuh ka ti, țhiante nèn hun thâwl neiha inkawm ve pawh i duh ang a, han lèn khawthawn vêlte pawh, i pu hian a ti deuh mah mah chu a ni, i ti ve deuh lo maw?" a ti leh barh barh a.

"Nia, i sawi chu a dik ve reng mai; mahse,  ka thawh hma ațanga hre sa ka ni tho a; bãkah, hlawh hi a ţha a, hna hahthlâk tak thawk ka nih loh bâkah hna hrehawm pawh a ni chuang lo va, hrehawm pawh ka ti lo. A ti mah mah pawhin ka hre chuang lo, hna sâng leh zahawm chu a ni lêm lo; mahse, hlawh hi min pe țha a, a hun chat chatah min pe a, sawisèlna tùr pawh ka hre lo, chawlh chungchâng tak chu, a theih loh bur pawhin ka ring chuang lo a; mahse, picnic duh avànga chawlh han dìl tawp mai chu, a ho ve mah mah deuh lo maw?" ka ti lêt ve ta thung a.

Nunhlima thil sawi chu ka mut hmunah ka ngaihtuah a, dik tihna chen chu ka nei ve tho. 'Hetia ni tina hun han hman ringawt mai chuh' tih châng kei ngei pawh hian ka nei ve tho, 'mi hnuaia mi chhiahhlawha han țan reng mai chuh' te pawh ka ti ngei mai; mahse, dinhmunin a zir hlawl rih si loh chuan tihngaihna awm hek lo le, bâkah, tunah hi chuan hlawh hi a țha ve ëm mai a, Zotei zirna atãn a lo remchâng bawk nèn, in luah man chawi loh ringawt mai pawh hi țha deuh mai a nia, tûn atân chuan hei aia hna thlanawm tùr ka hre lo a ni.

"I nau kha, in khuaah a haw em ni?"

"Aw... a haw ve rih a nih kha, exam a zo tawh bawk sia..." tiin ka chhâng a, chaw ka chhuan chu ka suan pah nghâl a, ka haw phei thei țêp asin le, a rawn thleng leh hman kher a, rawn thleng hman lo se ka ti asin.

Tui chu a in khawlh khawlh phawt a, a in zawh chuan," Naktûk khian Aizâwlah ka phei dâwn a, min zui phei ve ta mai che," a rawn ti ta mai! A ngaihna hre lo tak leh makti tak hian ka en phei vat a, eng a hria chu ni maw? A bialnu Polite-i niin min hria em maw ni le? Âwihawm loh lutuk mai.

"Inah chuan awmpui ka nei tho nain ei a siam thiam vak lo va, ti ila ka duh zâwngin a siam thiam lo ka ti dâwn nge, a ei siam tui ti tùrin ka hrawk ka her rem thiam lo ka ti zâwk dâwn ni, chu vàng chu a nia. I nau a awm loh tho chuan harsatna a awm thei dâwn em ni?" a rawn tih chuan min sàwm chhan chu ka hre thiam ta uar mai, ka thil lo ngaihtuah ve chu, ka zak chem chem mai, min sàwm chhan nèn a inang lo nasa mai si a.

"A, awm pawh ka hre chuang-" ka sawi zawh hma chuan," A țhat chu, lo insiam la, zîng dâr 7-ah kan chhuak dâwn nia," a lo ti vut a, a room lam panin a kal zui ta nghâl a, ka sawi zawh hma hmaa a lo pawt chat daih khân min tihamhaih lek lek a ni, ka duh pawh ka la sawi zawh loh bâkah hnialna hun ni se min pe bawk si lo. Hnial ka tum pawh a ni chuang lo va, a rûk tak phei chuan ka ei siam a ngaina ve viau chu làwmawm ka ti zâwk a, ka rilru pawh a hlim veng veng.

A tûkah chuan zîng dár 7 chiah chiahah kan chhuak a, thil pawimawh ti tùrin nge a phei dâwn ka hre hauh lo va, a car a khalh phei a, a hna thawhna motor erawh garage-ah a dah thung. A ken loh dànah a zin phei mai mai dâwn a ni ang ka ti ve ringawt a, dik tak maw?

Kawngah chuan a țawng mang lo va, kei pawh chutiang tho, phone call a rawn kalin kan țawng a ni mai a, kan pahnih hrim hrim chuan kan inbe tam lo, 'zeuh' kha a ni deuh mai. Tûkțhuan kan eina khaw hming pawh ka hre chhuak zo leh tawh lo, ka kal ngai lohna lam a nia, mi bengvâr leh hawi zau chi nih loh chuan a hriat loh ve theih khawp mai.

Aizawl chu hma takah kan thleng a, ding lovin kan tlãn zël a, khawi vêngah nge an awm ang aw tiin ka lo ngaihven ru ve reng a; mahse, ding lovin kan la tlãn zêl a, traffic jam a lo la awm lo va, Chanmari lamah tlãn zêlin chuta țangin Chaltlâng, eng mah sawi lovin kan tlãn mawp mawp a, Durtlâng lamah kan luai chho leh ta zêl a, Durtlângah a awm a lo ni.

A in chu building lian pângngai tak a ni a, chhãwng hniha sak niin a in bul hnaih deuhah chuan in dang ding a awm ve mang lo, tlêmin a fâl deuh nalh bîk a, compound pawh a nei țha viau.

Inah chuan nupa awmpui a lo nei a, an pu lo haw chu an lo buaipui vat vat a, min hmuh chuan min rawn chibai vat a, min be ve ngei bawk. An țawng rî ațang chuan Mizo dik tak an ni lo tih a hriat theih a, an hmêl hrim hrim pawh a Mizo vak lo.

Zanriah ei tùr chu ka bàwlpui lo nain ka enpui ve tho a, tih tùr a awm si lo va, țhut ngawih ngawih ringawt mai chu hrehawm ka ti a ni. Pu ber chuan ei tùr siam lova hah chàwl mai mai tùrin min ti a; mahse, hah chàwl tùrin eng mah ka ti lo va, ka hah lo va, nuam ka ti lo a ni. Mary ei siam bulah chuan awmin a thil siam dàn chu ka lo thlîr ve a, Mizo rilrem zâwngin a siam lo tih a lang reng mai  a, Pu berin a lo sawi pawh kha àwm ka ti reng mai, a ei siam vêl dàn chu an khaw lama an tih dàn a nih ka ring.

Pu ber na nâ nâ chu, an zah ve bawk a, a rualin chaw pawh an kîl ve lo. A bulah chuan Mary chu dingin a vil deuh chawt ni maiin a lang a, kei erawh chu," Ei ve nghâl rawh," min tih tlat avàngin ka ei ve nghâl a, ka rin ang ngeiin chawhmeh chu a thak sep sep deuh vek a, ttui ti lêm lo tân chuan ei luih a nuam fahran lo tawp ang; mahse, kei chuan ka sawisël  ve thei lo, a ei siam laia a inpêk zawhzia kha, ei țeuh a phû tlat a ni.

In chhûnga han luh kual vêl chiah chuan architect thiam ve tâwk tak design a nih ngei a rinawm viau mai, Singapore ka hre chhuak leh ta vuai vuai a, anni lam pawh kha pâwn lam ațanga en chuan an in kha a len hmèl miah loh a; mahse, in chhûnga luh chuan pâwn lam ațanga teh chi a lo ni lo tawp tih ka hre tawh, chutiang chiah chuan he in pawh hi páwn lam ațanga teh chi a ni tlat lo.

"I room chu a nuam ang em?"

Tlaiah khãn ka thuamhnaw ka dah lût tawh a, a nuam viau tih ka hre tawh bawk a. A in chhûnga room hrang hrangte pawh hi ka riahna tùr room ang vek hi a nih ka ring. Mary-te nupa chu in hnuai lamah room neiin an riak a, pu ber chu in chung lamah, chutiangin ka room tùr pawh in chung lamah tho.

"Nuam viaù ang, A zauin a thawveng si," tiin rang zet hian ka lo chhãng a, ani chuan," A țhat chu, bathroom-ah khân i mamawh chu i awm ngeiin ka ring," a ti a, sawi zawm lehin," I chau àwm sia, mut hma i tum dáwn nia," a ti leh sup a, min chhuahsan zui ta nghâl a.

'Ka chau lo' ni khân ka sawi a; mahse, ka lo chau ve deuh a nih ka ring, khuma ka mutin ka meng rei hman lo, mumang bo țhakin ka muhìl a, thawh pawh ka hai lek lek. Ka thawh hun aia tlai hretah ka harh a, ka awmna ka hai țêp zui; mahse, ka inthing harh thuai a, ka tho ta vat a, duh aiin a tlai tawh a nia.

Mary pawh a lo tho ve chiah a; mahse, a hmun ruak chu ka luah hmasa zâwk a, ka han siam zar zar a, a theihnaah min lo pui zêl a, mi pahnih tân chuan a harsa lo lutuk, Mary pasal Tlinga a rawn tho ve a, chumi hnu lawk, chawhmeh kan siam zawh hma deuh siin pu ber exer la pawh a rawn haw a, Tlinga chuan zah takin a lo be vat a.

Chaw ei khamah chuan a chhuak zui  daih a, ka tih tùr a sawi lo nain Lunglei lama ka tih țhin tho chu ka tih chhunzawm a; Mary pawhin," A ngai lo, lo awm mai mai rawh, ka ti thei vek alawm, hna dang ka nei chuang lo va," a tih pawh chuan ka tih chhunzawm zêl tho. Helai hi chu a in dik tak a nih vàng nge, a thil neih ho pawh a changkâng a, Lunglei quarter dawhkàna lehkhabu inrem țhút ang kha hmuh tùr pawh a awm lo, bangah chuan thlalâk pakhat chu a târ ve a, putar lam anih avàngin a pu emaw a pa emaw a nih ka ring ve ngawt bawk.

Pu ber rawn haw hma chuan inbual faiin kawtah ka chhuak ve a, ka han fang kual a, Tlinga'n a lo enkawl fai bawk a, hmuh a nuam khawp mai. Hmeichhe dangte tih angin thla ka'n la ve chuai chuai a, ka chhûngte pawhin an hmu ve chãk ang.

Ka phone chu a rawn nghawr dar dar a, Nunhlima a lo ni a, ja zin ve thut si a, ka chanchin ka la hrilh miah lo tih ka hre chhuak zawk mai, zahthlãk hian, amah pawh ka lo hrechang tawh miah lo bawk nèn, ka inthiam lo ru viau mai.

Kan inbia a, rei tak erawh kan inbe lo. Kan inbe zo chiah tihah chuan pu ber pawh a rawn haw ve ta a, in chhûnga luh daih ka duh viau nain a rawn thleng tawh tho sia, luhsan daih chu fuh loin ka hre ve a ni. Car ațanga a rawn chhuak chu ka lo en ru reng a, a inthuamna chu a dum vek a ni leh a; mahse, a màwipui viau a ni, Choâk ka hre chhuak zawk nain duh lovin ka paih bo leh ta vat. Choâk hi chu ka ngei deuh tlat mai a, an han âk tuar tuar phei hi chuan mi râp tlat, a ramhuai tlat ka ti țhìn.

"I khua a har a ni maw?" a rawn tih chuan ka en chiang vat a," Har hran lo ve, ka lo en kual mai mai a," ka ti a, min rawn en tih ka hriat avàng chuan a lam chu ka en duh lo va, in bul vêl chu enin ka hawi kual leh a ni.

"In pawh i nei țhain a nuam khawp mai," ka tih leh chuan," Tak tak maw?" a lo ti sup a, ka en vat a, a lo nuih deuh sâng ka rin tehlul nèn, nui hmël a pu chuang lo. Ni dâwn tak, a nuih ngai loh kha, a nui ka la hmu lo, Zotei erawhin vawi khat a hmu tawh thung.

"Tlinga hian a enkawl fai êm a, ka awm loh chângte hian ngaihtuah lutuk lovin ka awm theih phah a ni," tiin ka rin loh deuh chuan a in chungchâng chu a sawi ve sup sup a, hetiang lam hi chu min hrilh ka ring ngai hauh lo, tunah phei hi chuan ka pu, min chhawrtu kha a ni ang tih pawh rin thiam a har.

"Zànah chhuah leh ka ngai dâwn si a, chaw hi kan ei tawh dâwn em ni?" a tih chuan," I tih dàn dán le," ka lo ti ve mai a, rangkachak rawng sana a bun chu a thlêk zauh a, chutah, in chhûng lam pan chuan a pën zui ta nghâl a. Zui lovin ka en zui phawt a, a hnung lam ațang pawhin a lo chhe lo tho a lo nih hi.

Chaw ei kham hma deuh takah chuan a chhuak leh a, eng nge a va tih dâwn ka hre lo, Tlingate lahin zawh pawh an tum lo a ni ang, anni hi chuan an pu hi an rin hmel êm mai a, zawh tinah pawh an tin lo a niang.

Hmun kan tihfel vek hnuah chuan Tlingate nupa nèn chuan titiin chanchin kan inzãwt a, Tlinga chuan an chanchin chu a sawi zar zar a, pu berte nèn an inhriat chhoh dàn thlengin, kei pawhin ka hrilh ve nual bawk, an chanchin tam tak han hriat hnu chuan an khawngaihthlâk hlë ani tih ka hre thei nghãl a, Pu ber an lo tawng hi an vànnei tak zet a ni.

"Ka ngei lutuk che! I rawn phei tih engah nge min hrilh loh?!" tiin Mami chu a rawn ãng barh barh a, kei chuan," Ngei lul lo ve, țhian ka neih loh êm hi, min ngei lul suh. Rawn lêng la," tiin ka han sâwm zui chat a, ani lah chuan," Min sâwm tak tak em?" a rawn ti leh a.

A rawn kal tak tak a. Țawng duh ngang a ni bawk nèn, Tlingate nupa pawh chuan an nël viaù tih ka hria a, an bulah ka lo awm ve reng a, an titi dàn ațang chuan he inah hian a la kal ngai lo em maw ni chu ka ti hial a; mahse, ka ring chiah si lo.

"I lo lêng a ni maw?"

Chu aw rawn chhuahna lam chu kan en țhap a, a dum leh bawk! A dum hi a ngaina viau a nih àwm hi, sawi tawh angin a inhmeh leh viau a, a tân liau liaua an țhui ni àwma mawi a ni.

"Lêng ang chu; Hei, ţhiani hi ka hmu khât a, hmuh ngei duhin ka rawn tlãng vang vang a nih ber hi," Mami'n a tih chuan Pu ber chuan," I duh ang ngeiin i hmu thei a, zanin pawh chaw i ei ve nghãl ang chu," a lo ti ve leh zat mai, ani pawh chuan," Loh theih nâng," a lo ti vat a. Pu ber chuan min rawn enin,"Mikhual 2 ka nei dâwn, ka țhiante," a ti leh sup sup a.

"An hmël țha em?" Mami chuan a lo ti leh vat a, ani chuan," Lêrh suh," a lo ti ve vut a, Mami chuan," Țhiani tân hian han hualsak ve ka duh deuh a, chu tê mai chu maw le," a lo ti awlsam êt a, meng phâwk zet hian ka melh phei a.

"Hualsak...! Hualsak a ngai hleinem, amahin a inzawn ve ang chu," pu ber chuan a ti leh a, Mami lah diau hek suh," A țha zawnsak a ngai alawm, i ţhiante an nih phawt chuan an țha  ngei ngei dawn tih ka chiang, Rêngpuii tân lah a fuh hlauh chuan malsàwmna," phúr tih hriat zet hian a ti leh a.

"Ka chanchin lam kha chu duh tâwk  ang," tiin ka lo inrawlh ta vat a, ani erawh chuan," Lunglei lama mi kha chu Lungleia haw leh hunah; tunah hi chuan Aizawlah i awm mêk a, nun tihnawm nân mai mai pawh a țha," a lo ti leh mai a.

"Ka țhianteah chuan lo inrawlh tum lo mai teh, awmzia lo lutuk!" ti nghutin Pu ber chu a kal zui ta nulh a, en zuiin Mami chuan a han ko zui a," Jacob, i țhiante zinga țha ber chu min hrilh ang che, min hrilh loh vaih chuan!" tiin; mahse, a rawn en lêt lo va, a kal chu a muangchàn phah hek lo.

"Ngel ngul mai," Mami chuan a han ti zui leh hlak a, a nui țha zui a, a sawi anga Pu ber țhiante zînga pakhat min tihpui a tum ta tak a nih teh zawngin a zahthlâk haih haih ang chu, mi nuihzat mai ka ni ang.

*TLAR HMA LAMA ȚHUT CHÎNG RAWH, CHU CHUAN INRINTÂWKNA A PE THEI CHE*