☆MIN EN LA☆ - 13 By Dingdi Pachuau

 ☆MIN EN LA☆ - 13 By Dingdi Pachuau

"Khatia han tih kha ka duh ve hrim hrim alawm. Tihpui tak tak che chu ka tum teuh lo mai; mahse, ka han ti chhin ang a, a lo fuh viau chuan..." tiin a han nui leh kar kar a, kei chuan," A ngai lo, fiamthua sawi chi pawh a nih loh kha, zahthlâk lutuk!" ka lo ti ve thung a, nuih pawh ka nui duh miah lo.

"A ho lutuk! Nang chuan eng mah lo sawi ve suh aw, a țhiante chu ka'n chhaih kual tak tak ang e, lehkha thiam sângho hi hetiang lamah hian an sâng vek bîk lo, hrilh fin an ngai," a ti leh zat zat a, ka sawi zui duh ta lo, sawi lehin hnial leh pawh ni ila awmzia a awm lo ang, a ti lui tho ang.

A ti tak tak a!! Ka hriatna chhan pawh an rualin chaw a ei ve a, min sâwm ve nain ka duh lo, pu ber bula chaw ei pawh nuam tih loh nâklaiin a țhiante nèn an la ni zui a, nakinah Mary-te nupa ei hunah ka ei ve ang ka ti. Chawhmeh lam chu suah belh a ngaih avàngin thlèng hnih chawiin Mami chu a rawn phei a, ka lo pui vat a, ka chàwi pheipui ta nghâl a. 

Chaw eina pindan leh choka hi pindan hran a ni a, pindan indawt deuh chiah erawh a ni thung. Chaw eina pindan hi a zau lutuk lo nain a thawveng reuh a, choka erawh hi chu a zím deuh hlek a, fridge lian zet awmin chhuar inchherchhãwng nalh zet hi bangah chuan a indawh kual chhuak deuh vek a, choka hmanrua engkim hi a awm kim vek ni maiin ka hria.

Kan phei chuan Mami chuan," Hei hi a nia ka sawi kha? Rêngpuii a nih hi, a chhe lo asin," a ti ta pek a! En lo mah ila min en țhap a ni tih ka hre tho, ka zak kher asin, ka zahzia pawh chu ka hmêl ațangin an hre vek ngei ang chu, Mami țhìn hi chu, min ngaihtuah ve tùr hi a ni asin le.

"A nih hi, fel pawh a fel ang, kei chu ei siam thiam deuh hi ka duh chi a nia," pakhatin a lo tih chuan Mami chuan," A thiam lutuk! Tuna kan ei lai pawh hi a siam vek a nih hi, Josh, hria maw? A fuh dâwn e," a lo ti vat a, chu pa vêk chuan," A hmêlin a zir bawk a, a ei siam pawh a tui narawh e," a lo ti leh a, tùm deuh tlat chi ni hek lo le, zak ru tak chuan ka nui deuh sak a, țawng erawh ka țawng lo. Mami lah chuan," A zakzum reuh lutuk a, nakinah amah nèn in sawi țha dâwn nia," a ti leh barh barh a, ka va ngei tak! Ka ngei ber țum a la ni hial ang.

Chaw kan ei kham ve hnuah pawh chuan an la haw mai bîk lo, țhut khâwmnaah chuan an țhu khâwm a, an titi a, Mami pawh an bulah chuan țhu vein an titi chu a lo zawm ve zauh zauh a. 

An in tùr ka siam laiin chaw an ei laia Mami nèna titi hlut, 'Josh' a tih ngei kha a rawn kal zân zân a, ka lo en zawk a, a rawn nui sâng a, tui in tùr min rawn dìl chuan ka lo kawh hmuh nghâl vat a. Filter tui dawh pah chuan," Rêngpui, i ei siam chu a tui tak zet a ni, chaw hi ka ei tam ngai lo viau a, zanin zet chu ka puar tak tak a ni," a han ti a, nui chung hian," A làwmawm a nih chu," ka lo ti sap a. 

"Ka lo pui ang che," tiin tray chu rawn ban a rawn rual a, kei chuan," A ngai lo ve, ka rawn keng phei thei reng alawm," ka lo ti thung a, tray kan vawn dun lai tak chuan pu ber chu chokaah chuan a rawn lût ve a, tray chu thlahin thlènga an hmeh tùr chu ka chawi ve ta thung a.

"Kan rawn chawi phei dâwn chiah a," Josh-a'n a tih chuan Jakob-a chu a ngawi reng a, a lu a bu deuh nghut a, filter tui no chu a ban zui nghâl a. Keini pahnih pawh chuan kan tih tùr chu tiin an țhut kháwmna lamah chuan ei leh in tùr chu kan chawi phei a, Mami pek chuan," A changtunu leh a changtupa an lo phei dùn e," a lo ti leh pek a, kut a lo bêng a, zak viau mah ila lai deuh chuan ka awm duh ta bik lo, ka nui leh ringawt.

An titi chu, lehkha thiam titi a ni bawk a, a rûk takin ka lo inhmu tê reuh reuh mai. An hna thawh lam chungchâng an sawi deuh ber a, sawi ve tùr rêng ka hre lo, heti mai hi ka ni si a, matric ka pass chhuak ve âwrh a, anni sawrkâr zêm zen, officer chin ka ti mai, bulah zawng  sawi tùr a vâng, ngawih reng a ni mai.

"Rêngpui, engtikah nge in haw phei ang?" Josh-a chuan a rawn ti sar sar a, en zawkin," Ka hre lo le," ka ti a, ka nui pah bawk a, ani chuan," Awm ve deuh reng thei ula tiraw? Ka inhre dâwn chauh si a, inkawm chian tak tak a châkawm, i ei siam pawh ei leh zêl a châkawm bawk a, awm deuh reng rih rawh u aw," a rawn ti leh a, ka chhàn hma chuan pu ber chuan," Josh, Delhi-ah khân Bma nèn khân dorm khatah in awm dùn em kha?" a rawn ti dût a, Josh-a chuan," Awm dùn lo, awm dun kha chu kan tum ve viau a; mahse, kan awm dùn thei ta lo a nih kha," tiin a chhâng a, pu ber bula țhu chuan," Hostel awm hun lai pawh khuarei a chang zo mai dâwn, a hun laiin nuam viau lêm lo mah se tûn hnua ngaihtuah lêt hi chuan a ngaihawm ve ta mai mai," a lo ti ve a, Josh-a chuan," A dik alawm, nunhlui an ni ta mai si, ngaihtuah tehchiam neih loh hun lai niin kan nghal thei mai si a, mipa hlang awmna ni bawk nèn, hmeichhia kan hmuh fuh tawh kha chuan kan va chhaih rethei țhìn tak! Hmêl țha lah kha kan han hre thei khawp a, Bma phei kha chuan vai nula mutpui pawh kha a nei nualin a nia ka rin ni, a sawi țha duh hauh lo lehnghâl a," tiin a han nui var var a, Mami chuan," Nghal hlawm viau ang! Mipa hi chu in nghal duh hrim hrim, hmeichhia ai chuan," a lo ti ve a. Chutiang lam chu sawiin an chanchin chu an sawi a, a chângin kan nui a, Josh-a phei chuan sawi tùr a lo ngah khawp mai a, a sawi thiam bawk si a, ka nui nasa viau a ni. Ka rin aiin chanchin an lo nei nuihzatthlâk a, mittui tla phungin ka nui alawm.

Mut hmunah chuan an thil sawi kha ka ngaihtuah lêt a, ka la nui sak sak mai. Josh-a ber kha, chanchin nuihzatthlâk sawi tùr a hre tam a, a sawi thiam bawk si a, min tinui nasa ber a ni.  An han sawi tliar tliar na khân pu ber khân a chanchin a sawi ve hauh lo tih ka ngaihtuah chhuak thut a, a ngawi deuh ngul reng  a nih kha, a țhiante thil sawi nuihzatthlâk laiah erawh chuan a lo kiai ve suk suk thung a, ani pawhin chanchin nuihzatthlâk chu a nei ve tho àwm sia, engati nge a sawi ve loh ni?

A tûk chawhnu dâr 1-ah Lungleiah kan phei leh thut a, a sawi lâwk miah lo. Chawhma chhûng chu a chhuak a, a rawn haw a, insiam tùra min hrilhin kan chhuak nghâl a ni mai. A hna a zo tawh pawh a ni mahna, nge a awm peih tawh lo zâwk? A țhiante an fel a, an bula awm pawh a nuam, kei ang duang pawh țha takin min bia a, an bula awmin insit a na duh deuh e tih mai lohah chuan an fel viauin ka hria, in chî lam an ti em tih erawh ka hre hman lo, an tih duh tho chu ka ring, tûnlaiah hi chuan ti lo tak tak pawh hi an awmin ka hre lo, anni ang chinah hlauh phei chuan.

Mami'n min rawn bia a," Zanin chu rawn lêng thla ve la? Ka rawn hruai ang che aw? Ka nute pawhin an hmu châk che a. Chuan, ka thlah leh mai che ang a?" a rawn tih chuan," Hei, kan haw phei mêk a," ka han ti a, ani chuan," Eng a?!! In haw phei maw?! Engati nge? Jalianchhûnga khân ni hnih vêl in la awm tùr thu kha a sawi chiang hle si a," a rawn ti a, kei chuan," Tuin maw chutiang chuan sawi a?" ka ti ve thung a, ani chuan," Aw.. Jalianchhûnga, Jacob Jalianchhûnga khân maw le, ka va ngei tak! Phone kha pe lawk teh," a rawn ti leh a, pu ber lam chu hawiin," Mami a nia, a be duh che a," tiin phone chu ka han pe mai dâwn a, ani chuan," Loudspeaker kha," a lo ti sup a, ka on hnu chuan," Aw, sawi rawh," a ti zui nghut a.

"Engah nge in lo haw phei thawt thawt a? Inrinnì vêla i haw phei theih tùr thu kha i sawi ve sia?" Mami'n a rawn tih chuan ani chuan," Sawi ang diak diakin a awm theih loh," tiin a chhâng bung vut a, rawn betu lah diau duh hek suh," I bialnu i ngai leh tawh a nih kha, zëp duh mah ta che, dian duan mai!" a rawn ti hlak hlak a, pu ber chu a nui ta hawk a!

Ka en vat a, pu ber a nui ve tlat! Ka lo inring hman lo asin, a nui lai ka la hmu lo va, a nui ri ka la hre miah lo bawk, mak ka ti kher mai! 

"Nui suh, ka bulah chuan awm la chuan i châk lo ang maw le," a rawn ti ngal ngal a," Rêngpuii pawh kan inah a rawn kal hman lo va, zaninah rawn lêng ve se tih laiin, in haw phei daih a, ka la inring hman hleinem, ani kha chhawr tlawk tlawk lovin hun thâwl pawh pe ve rawh, lènna hunte siamsak ve la, țhalai niin nula a nih kha hre reng bawk ang che," a rawn ti leh duah a.

"I sawi zo tawh em?"

"Zo țêp, Josh-a number kha min han pe teh, biak duhna ka nei a nia," a rawn tih leh chuan," Motor khalh laiin phone khawih a him lo," tiin a chhâng ta khut a, chhâng dik ka ti angreng khawp mai. An inbiakna lo ngaihthlâk ve reng chu nuam ka ti chiah lo va, ngaihtuah lo ang taka awm dâwnin an inbiakna phone lah chu ka chelhsak a ngai bawk si nèn, ka mit khap sak sakin ka hmui chung lam chu ka pet ka pet ringawt a.

"In thlen hunah min rawn pe ang che," Mami'n a tih leh chuan," Pe lo ang, eng atân mah i ti lo," pu ber chuan a ti leh a, an inchhàn vêl dàn chuan ka nuih a tiza angreng khawp mai. An naupang chhia ka ti a, an inngam ka ti bawk, pakhatin a u u u u rual vêl tùr chu a rualpui biak bawrh bawrh a, pakhat lahin a chhang chhang chhang chhangleh pawh rual pha lo tùr chu fa ang rual deuhthawa en thiam àwm tak, a chhang rual en ni berin ka hria.

"Min rawn pe ang che," tiin phone chu a hmet tàwp ta daih a, a thinrim a ni maithei, pu ber chu ka thlêk deuh zak zak a, ani erawh chuan engah mah ngaih loh hmèl zet hian steering vuan chung chuan a kut chu a tiche zeuh zeuh a, a rilruin a zai a ni ngei ngei ang.

Kan tlãn chak ve viau a, kawngah kan țawng vak lo, in kan thlen chuan a lo tlai ve deuh hlek tawh a, kan in kawtah chuan a ding phawt a, ka chhuk dâwn chuan," I chau àwm si , naktûk zîng chu i chàwl thei ang," a ti sup a," Chau lo ve, chauhna chhan tùr a awm hleinem," ka ti ve thung a, ani erawh chuan," Min hnial suh," a lo ti sup thung a, car kawngkhàr ka khàr fel hnu chuan inherin a quarter gate lo inhawng sa lamah chuan a tlãn phei zui ta nghâl a.

Ka mu tui lutuk a, thawh ka lo hai deuh tak tak a! Zîng chawlh min pe tho chu a ni a; mahse, nuam ka ti miah lo, tuin nge ei tùr chu siamsak ang? Restaurant-a chawlh ringawt chu a fuh vak lo ang, túkțhuan ei tluk hi a awm lo, pum tân a țha ber bawk si.

Rilru nuam lo ru deuhin tûkțhuan chu ka ei a, ka ei tam lo khawp mai. Office a kal àwm hun chu ka chãng reng a, dâr 9:15 hi a chhuah hunbî ang a nih avàngin dár 9 : 25-ah ka phei ta a, a  lo chhuak tawh tak tak bawk.

Jivan-a chuan min lo be vat a," I zin ve daih a, pu ber awm bawk si lo, khua a har lutuk! I zinna chu a nuam bawk em?" tia min zawh chuan," Aw, nuam e, ka kal leh hunah ka la hruai ve ang che," nui chung hian ka ti a, ani chuan," Aw le, tukinah i rawn kal leh ang chu ka lo tia, nimin lama chhang kan ei bãng pawh a la awm reng asin, chaw i ei tawh em?" a ti leh a, ka ei tawh thu ka hrilh chuan," Pu kha chuan a nghei ta ngawtin ka hria, nge pâwn lamah a ei tho dâwn ni?" a lo ti leh a.

A va ho mai mai tak aw...! Chàwl tùr khân min ti tlat si a, hnial a duh lo tih pawh a sawi. Hnial ta ila a nuam duh àwm si lo va; mahse, tûkțhuan a nghei ringawt chu a fuh lo thlâwt. Ni dangah chuan ka chàwl tawh miah lo, chàwl tùr pawhin min ti mah se, chaw a nghei phah chu ka duh lo. Thu dang deuh, Mami kha Josh-a phone number chu a pe ta em le? Nakinah ka hman veleh ka va bia ang.

Room hrang hrang chu ka tifai leh vek a; nahse, Jivan-a'n a lo enkawl reng bawk a, a bàl lo, a hmingin ka tifai a ni mai. Mikhual room pakhat zâwk ka chhuahsan dâwn tihah khum bula deuha thuamhnaw  ni àwm tak chuan mit a la leh zar a, langsàr lo viau angin lang mah se engtin nge ka lo hmuh loh aw ka ti hial a ni.

Hmeichhe mutkawr a lo ni leh ngei a, hei hi ka hmuh tawh hnu kha a ni, a dum ngei kha, engtin nge hetah hian a lo awm leh nawlh theih ni? Nizàn lamah nula riahpui a nei em ni ang? Ka ring chiah si lo, amah hian a ha zâwk em maw ni ka ti hial, mipa inti-mipa ve tâwk takin hmeichhe mutkawr a han ha vêl tùr chu ka mitthlà a, lu thing nak nakin ka nui chhuak hawk nghe nghe.

Nunhlima pawh zànah a rawn kal leh a, ani bulah hi chuan titi a nuam, ka îp ru chãwih chãwih ngai lo va, ka titi duh zâwng a hria a, a fel bawk. Mi awmthei tak fa a ni lo va, hna a awma a țûl a nih phawt chuan kâr tàwp Inrinniah hi chuan tih tùr ťûl a nei a nih lêm loh hi chuan a inhlawh lâwp lâwp fo a, kut hnathawh a zahpui loh bâkah amah pawhin a zei thlarh, hei hi min hrilh dàn a ni a, dâwt min hrilh chu ka ring lo; mahse, an awmthei ve thawkhat tho, in pawh an nei țha.

Zan tin chuan rawn lêng thei lo mah se a rawn lang zing ve reng, 'Fùr lo thlen hmain ka lo lêng lâwk hrep dâwn, ruah sùr hunah chuan lo lèn pawh duh viau mah ila ka rawn lêng thei mai mai tawh dáwn lo,' a ti a, ka nuih a tiza ru angreng khawp mai. 

*******

Ni khat chu Jacob-a room ka tih fai laiin Mami'n min rawn bia a," Nizàn lama kan boruak i hria em?" a rawn tih chuan," Hre nâng, eng thil nge thleng a?!" ka lo ti vat a, ani chuan," LeRoy-a'n min rawn țhen a nih chu, a awmna hmuna awm ve pastor fanu tleirãwl tê nèn min lo kawp a lo nia, kei nèn chuan kan inhmu thei bawk si lo va, a hmuh zin theih zâwk leh naupang záwk ta chu kei ai chuan a duh zâwk ta a ni chêk ang chu, dam takin țhenna min rawn hrilh tawp," a rawn ti chuai ve raih a.

"A nih chu, a va zia lo ve aw!! A mak hle mai, inneihte lamte kha a sawi zuai zuai tawh ni khân ka hre sia, a va theihnghilh leh hmâ si ve!" Ka tih chuan," A takah kan inhmu thei si lo va, min ngai bawk siin pastor fanu chu a kawp ta a ni ngei ang ka ti, hetiang hi a ni dâwn tih lo hre lâwk ila chuan ka nihpui miah lo ang maw le," a rawn ti vang vang a.

"Kan hma lam hun hre thei hek lo le, pawi ka tihpui viau na chein in ințhen hma hi a fuh zâwk, a chhan chu nakinah in inkawp ngheh viau hnuah ințhen thu sawi ta ngawt se, tún ai hian hrehawm i ti daih ang, in inkawp rei lo ta rau rau, nakinah a dang țha tâwk, i kum rualpui ngei i nei daih dâwn zu nia, chutih hunah chuan e, nuam i ti viau ang," tiin ka thiam tâwk chuan ka han hnèm ve a. LeRoy-a chuan a ti mak ka ti viau nain a la naupang a, rilru let but but rual chauh a la ni, hmuh reng theih a duh laiin Mami nèn khuahmunah an awm lo va, khuahmuna a lènpui leh a hmuh reng theih tùr Pastor fanu chu a rûka a khawharna chuan thlang zâwk turin a nawr ve pawh a ni mahna, he khawvêlah hi chuan ințhen leh tùrin an inkawp fo a, mi dang nèna inkawp leh tùrin an ințhen fo bawk a, hei hi zawng kan dam chhûng hian a reh lo ang, hringnun kawnga bet ve reng a ni tlat.

"Tûn hnuah chuan kei aia naupang chu eng anga țha leh fel pawh ni se ka nihpui tawh miah lo ang," a rawn tih leh sap sap chuan ka khawngaih ve reuh khawp mai a, lu bu nghatin," A țha, mite tawn loh dàn pawh a ni bîk lo a nia, tunah hrehawm ti viau mah la nakinah chuan a rawn her dik zaih mai ang," ka ti ve sap sap a, mi hnem hi ka thiam lo va, nulât tlangvàlna kawngah hlauh phei hi chuan mi ka hnem ve vawi khatna a ni chiang bal. Nia, tunah chuan hrehawm a ti ngei ang, a bialpain a țhen miau mai a, chu pawh intih thiam lohna nei lova hmeichhe dang a duh zâwk vang a nia, a țhena tân chuan a na ngâih ngâih viau ang chu; mahse, khawvêl hun inher hian thil thar hi a rawn inher chhuahpui ve a nia, Mami pawh a awmna ngaiah a awm reng bîk lo tawp ang, tunah chuan khutah awm rih mah se nakin lawkah chuan khîtah a awm thei a ni.

*******

"Tuilum min lo thlit lawk hman ang em?"

Tukin chu thawh a hai ve a ni ngei ang, ni dang ang chu ni se chuan tûn ang hunah hi chuan hmuh tùrin a awm tawh ngai lo, exer la tùrin a chhuak daih tawh ţhìn tlat a ni, ka han en a, nuamsam lo hmêl a pu bawk si lo va, engati nge maw ni dâwn ni?

Tuilum chu ka thlitsak thuai a, ka va pe a, a lo phun sup a, phone chu a en chhunzawm leh nghâl a, hna lamah a buai viau em maw ni le? Ka záwt ngam teuh si lo. Choka dawhkàn kílin a țhu ve khur si a, a mi dîp a nâin a uap a nâ ka tih tawh kha, ka chét chu a khawr deuh tlat.

"Engtikah nge i nau a rawn haw ang?"

Inher vatin," Ka hre mai lo nain result chhuah dáwn hnaihah a nih ka ring,"tiin ka chhâng a, a phun deuh sup chu ka hria a, a sawi tak erawh ka hre thei lo. 

Kan ngawih vang vang hnuah chuan,"Tuna hna i thawh dàn hi hrehawm i ti em? Sawisèlna tùr i hria em?" a rawn ti chhuak leh a, ka chawhmeh chawh lai chu ka tàwp chat a, a lam hawia inherin," Hrehawm lo ve, hna hahthlâk a ni lo vs, han sawisèl tùr pawh ka hre lo," ka ti charh charh a, ani chuan min rawn en phei reng a, a mit pawh a khap lo, thu dik ka sawi leh sawi loh hriat a tum a ni mahna, kei pawhin ka en lét ve ràn a.

"Tak tak??!  Țhalai i nia, lèn chhuah leh khawi emaw kalte i duh thei a... Inrinnî emaw Sunday emaw tal hi chu chàwl thei ila tihte pawh a sawi theih tho, a leng vek," a tih leh chuan," Duh hran lo ve, chawlh pawh a ngai lo, hma hun chu hre chuang lo mah ila tunah hi chuan chawlh ngai ka ti lo," ka ti leh a, min en vung vung a, chutah, bu nghutin," A țhat chu, harsatna i neih chuan sawi hreh lo la,  hrehawm ti taka i thawh hi ka duh miah lo a nia," a ti leh a, a tuilum chu tlâk pawpin a țhutna ațang chuan a tho zui ta nghâl a.

Jivan-a a rawn tho a, ani pawh nizàn lamah a meng rei deuh a ni ang, a mit a sen râm mai. Pu ber thusmhnaw sûk tùr lain keiin eirawng ka bâwl char char a, ka bâwl zo, choka hmun ka phiah lai chuan inbual zo tih hriat tak hian pu ber chu kekawr bùl chauh hain a rawn kal a, fridge rawn hawngin tui bottle a la chhuak a, ka lo en lai takin min rawn en ve chiah mai, a pian mawi zet ka lo en kual vêl a, Mâma tih loh mipa taksa ruak vek ka la hmu ngai tlat lo, ani anga dàr pharh mawi phei hi chu... kan mit a han intawng ta ka laihzia mai chu, ka zak lutuk bawk nèn, khûk ral daih theih ka châk tak zet! Ka beng sa hat hat ațang chuan ka beng chu a sen nasa ang tih ka ring a, chutiangin ka hmai pawh.

"I duh phawt chuan min en thei, ka kawm viau lo a nia," a rawn tih phei chuan ka zak lutuk chu ka bîng mup mup mai a, engtin chiah nge ka awm pawh ka hre lo, ka thlarauin ka taksa hi a chhuahsan lek lek ni hialin ka hria! Zah lutuk vàng hian a lo awm theih a nih dàwn hi.

A thiam loh vek, hêng laiah te ruaka rawn kal rêng rêng, chokaah tu nge kawr ha lova kal kal ngai ni, a in pawh ni se ka awm tih a hre reng àwm sia...

*MI THU SAWI I NGAIHTHLÂKIN I HRIAT NGAI LOH THIL SAWI TÙR ANGIN NGAI RAWH, I HRIAT NGAI LOH THIL A LO HRE KAR THEI SI A*