☆MIN EN LA☆ - 14 By Dingdi Pachuau

 ☆MIN EN LA☆ - 14 By Dingdi Pachuau

Ka lài lutuk thup nân chuan," I taksaah khân eng emaw rannung bet hmuin ka inhria a," ka ti ta sap ringawt a, kei ngei pawhin ka thu sawi chu ka âwih lo a nia, ani phei chuan a âwih lo chiang ngawt ang chu.

"A bet em?" a rawn tih leh chuan," Bet pawhin ka hre tawh lo, a thlâwk tawh a ni ang," ka ti leh a, a hmël pawh ka en tawh lo hrim hrim, dâwt ka sawi tih a hre chiang nasa dâwn si a.

Room lama a phone ri ral ral avàng chuan kan inbe chhunzawm tawh lo, a kal sawn ta vat a, kei pawhin thaw huaiin, hmun chu ka phiah chhunzawm leh ta a, a rawn kal leh hlauvin ka phiat ta thuai thuai a,  ka haw ta thuai a.

In ka thlen hnu chuan a taksa ruak kâng mai, a mawi tâwk chauha sek  chu ka mitthlaah a rawn lang rauh rauh a. Engati nge chokaah ruakin a rawn kal rêng rêng ni? A pian nalhzia min hmuhtîr a tum a ni ngei ang chu, nalh chu a nalh thlâwt, hawi pawh ka hawi sawnsan thei lo chu a nih kha; min lo hmu ve kur bawk sia, a zahthlâk tak zet a ni.

Mahse, nuam a ti daih zâwk ang chu, han inshow vël chu, a pian kha amah pawhin nalh a inti ve tâwk ngei ang, inchhuang takin a rawn intilang a nih ngei kha. Ka la awm tih hriain kawr pawh ha duh lovin a rawn kal ngei a, kei lahin hmuhnawm ti takin ka lo thlîr reng bawk a... min ve hre chiang tak! Nalh ti takin ka lo thlîr dâwn a ni tih a lo hre reng a ni chiang.

Pu ber chu hmuh ka hreh chho thar ta riau a, hmuh loh theih dàn mawlh ka zawng ve a, chokaah a rawn lût a nih pawhin ka lo ngaihven lo lui tlat a, ka lo en duh ngai lo, a rûk tak erawh chuan en ka châk thei tawp. Ani lah hi zînga a walk zo rawn haw hi chokaah a rawn lüt tlang ziah a ni mai, fridge a rawn hawng ngei ngei a, tui a rawn in țhìn ni berin ka hria.  Min biak loh chuan ka be hmasa ngai lo a, be hmasa tùr ka ni tih inhre reng mah ila ka hreh tlat a, biak loh hrâm ka tum tlat a ni.

Nunhlima pawhin a rilru min hrilh tawh mah se ka rilru hrilh hre ve tùrin min nawr ngai lo va, min zâwt nawn tawh chuang hek lo. A hman châng apiangin a lo léng reng reng tho a, kan inkàwm a, Pathiannîah fellowship kan nei a nih loha a hman chuan a rawn lêng bawk. Hruaitu dang, a țhiante pawhin a rawn lêng ţhìn tih leh min duh a ni tih chu an hre vek tawh a, min dem fo a, kan inkawp niin an ngai vek bawk.

"Rêngpui, nawr che hi ka duh lo, i remchàn hun leh nangmah ngei i inpeih chhuah hun thleng ka nghâk ang che, chu aia rei pawh ka nghâk thei che, i rilru tibuai lo la, keimah vàng hian i rilru buai tùrin ka duh lo, i naute i dah pawimawhzia lah ka hria a, chuvàng chuan, i inpeih hun ka nghâk ang."

He thil hi vawi khat chiah a sawi chhuak a, a sawi nawn tawh lo. Pângngai takin kan inkàwm a, kei ve tehlul min han duh ve êm êm mai hi mak ka ti zâwk a, ka zah a, a lakah ka inthlahrung a, ka khawngaih ru tho bawk; mahse, tunah hi chuan ka chhâng ngam rih lo, chhâng thei dinhmunah ka la ding tlat lo a ni, nakinah, hun țha zâwk a rawn inher chhuak a niha min la duh reng a nih chuan...

Zoteite result pawh a chhuak țêp tawh a, ka hre châk tawh khawp mai. Ka nute nèn pawh kan inbiak chhûnga kan sawi zin ber pawh a ni. A fail chu ka ring lo va, a tih țhat ka beiseipui viau zâwk, ani hi chu kan unau zîngah lehkha a ti thei ber a, a peih bawk a, a fail ngai lo. A theih chhûng chu zir se ka duh a, ka hna thawh hian zir viau lo mah se ani ka chàwm theihna a nih chuan ka thawk zêl rih ang, ka hna leh ngaihzâwng neih a inhmeh loh êm avànga Nunhlima pawh chhâng ngam lo leh duh lo kha ka ni rêng a, pu ber phal china rei ka thawk ang a, hna dang ka thawh àwm tâwk tùr ka hmu hlauh a nih chuan nakinah ka la ngaihtuah ve ang, he hna hi hna nghet a ni lo va, dam chhûngin ka thawk thei dâwn lo, Lungleiah hian a thawk reng lo thei ve tlat bawk, hlawh hi a țhain in luah man a free avàng hian Zotei nèn kan pahnih tân a remchâng êm a; mahse, kum hnih kum thum hnuah chuan pu ber hian nupui a nei khut thei, chu lovah, a hna thawhna hmun sawn a ni thei bawk, chutiang chu dàwn ve reng a ngai, Pathian ringtu ang maia inring renga awm kan ngai a nih chu.

"En teh, Josh-a kha i la hria tiraw? I number ka pe a nia," Mami'n a rawn tih chuan," Leh ngawt tak hian! Tizahthlâk thei, eng atân nge maw i lo pêk rêng rêng ni?" ka lo ti vat a, ka au vak lo chauh a ni. Ani erawh chuan," Țha deuh zawnpui che ka duh ka tih tawh kha, a fel thei hlauh a nih phei chuan e, i vànnei dâwn asin, a fel ëm kha, hna țha tak a thawk bawk si," a rawn ti ve thung a, zahthlâk ka ti lutuk ringawt. Anite zawng, a sâng lutuk! A, a zahthlâk hi a ni tawp mai, thil àwm ang lo lutuk a ni tihte chu hriat ve àwm hi a ni asin.

A lo pêk tawh bawk si chuan tih theih lah chu ka nei dáwn dèr si lo, min rawn biak loh hrâm erawh beisei ang. Ani ang duh tùr chi ka nih loh bâkah biak pawh min rawn be peih lo tawp ang, Mami tak hi chuh, ka tâna țha a duh a nih si chuan lo pe lo tawp se ni mai tùr, ka zahna nikhua a sei dâwn asin...

"Min hmu khât riauin ka hria."

A thil sawi dàn chu ka hriat thiam chiah loh avàng chuan ka en vat a, ani chu mi pakhat chauh țhut theihnaah chuan țhuin min rawn en pah a, ka țawng hma chuan," Tunah tak kha chuan min hmu, harsatna a awm em? Min hmuh hrehna chhan lamte?" a rawn ti leh a.

"Aih, awm lo, chutiang a awm lo," pângngai thei ang ber chuan ka ti a, ani chuan," Chutiang a nih chuan a țha a nih chu," a ti sup a, sawi zawm lehin," Hmuh thiang lo chu ka ni bîk lo a nia," a ti leh a, a sam chu a tuai zui puat a.

Ka chhâng lo va, a țawng chhunzawm tâk loh avang chuan ka thil tih lai chu ka chhunzawm leh a, a duh tâwk mai dâwn emaw ka tih lai chuan," Josh-a'n a rawn be tawh che em?" a rawn ti leh a, enin lu thing deuh nak chung hian," Be lo..." ka lo ti leh vat a, ani pawh hian a lo hre ve tihna em ni? E, Mami'n a hrilh tak ang chu, a cousin a nia, Josh-a number pawh a hnênah hian a dìl tak kha maw le, a va zahthlâk tak! Mami chu ka rilru tak chuan ka ngei deuh rum rum hial a, a tihzahthlâk bâkah hre lo tùr tùrin a hriat phah zui a, ani pawh hian eng angin nge min ngaih ang? Kei, a hnuaia a chhawr mai mai tân hi chuan a țhianpa kha chu a sâng mah mah a ti ve ngei ang, zak lo min ti viau bawk ang.

"Beiseina siamsak suh ang che."

Zànah Josh-a chuan min rawn be ta ngei a, number ringawt a nih avàng chuan chhàn chu ka hreh khawp mai a; mahse, hreh viau mah ila thil pawimawh eng emaw min rawn hrilh tum pawh an ni thei tih ka ngaihtuah  chhuak leh phut a, amah ngei a lo ni a, a aw pawh a rawn zãngkhai viau mai.

Rei min be lo, min be lawk ang chauh a ni, min rawn biak zauh zauh a duh thu a sawi a, kei pawhin țawngkam țha leh mawihnai deuh chuan ka thlah a; mahse, min rawn biak chhunzawm zêl erawh ka ring lêm lo. Pu ber khân beiseina siamsak lo tùr khân min ti maw kha? A țhianpa a ni bawk a, a hauh ve viau a ni. A țhianpa Josh-a hian min duh a ring tak tak em maw ni? Âwihawm loh lutuk mai, ka nuih pawh a za lo. Mami'n ka number pe lo phei se chuan min rawn be tawp nâng, a fel vàngin min rawn be pawp mai mai a ni, thil dang vàng a ni lo.

Kâr loah Zotei result pawh chu a chhuak ve ta. Result en laia thil dangin min tihbuai ka duh loh avàngin pu ber quarter chu ka tifel sawk sawk a, dâr 12-ah tak an tih chhuah dâwn avàngin ka lo inhmakhua ve a, dàr 12 hmaa inpeih vek ka duh, result hre hmasa nih ve ka duh si a.

Vànneihthlâk takin Ist division-ah a pass ve hlauh mai, SS, Mathematics leh Mizoah Letter a hmu a, a làwmawm ka ti tak zet a ni. Ka nute ka phone thuai a, anni pawhin en chu an lo tum ve ngei a lo ni. Zotei pass thu ka han hrilh chuan an au rawi rawi mai a, a nuam ngawt ang chu, ka nuin," Au Zotei chu a pass țha bawk sia, zaninah âr talhin chaw kan ei khâwm dâwn nia, chumi hma chuan tu mah kha chhuak lo ula, Pathian hnênah làwmthu sawiin ka țawngțai ang, a làwmawm êm mai," a tih pawh chu ka hre thei, a va nuam dâwn tak! Ka tel ve châk!

Ka hlim êm avàng chuan kei pawh ka helhhawlh tlat a, Pathian hnêna làwmthu țawngțaina hun pawh ka la hmang miah lo tih ka hre chhuak a, chhuatah chuan țhingțhiin ka țawngţai zui ta nghâl a. Ka rilru a hlim êm avàng chuan  ka che vêl rêng rêng chu ka phúr sârh mai a, nui hmël ka pu reng lo thei lo, a làwmawm ëm asin, ka pass ve hun laite kha ka ngaihtuah chhuak hial a, ka hlimziate kha!

Pu ber pawh chuan a lo hre ve a, lawmpuina thu min hrilhin Zotei a lawmpui thu chu a sawi chhuak ve khiah a, school țha deuh, zirna chhunzawmna tùr hming a sawi diat diat a, ngun takin ka lo ngaithla ve a, Zotei nihlawhzia ka ngaihtuahna lamah chuan kan pahniha kan vànneihzia chu ka ngaihtuah chhuak a.

"Engtikah nge a rawn lêt ang?"

" Ka hre rih lo le," tiin Zotei rawn lêt hun tùr chu ka ngaihtuah a, ani chuan," School țhaa zawm thei tùr chuan hmanhmawh a ngai a nia, muangchànna chi a ni lo," a ti leh a, kei pawh chu ka lo bu ve nghat a, kan thil sawi a pawimawh ëm avàng chuan fiamthu lam a lang lo va, kei pawhin a thil sawi chu ka ngaithla ngunin taksa ruak kâng lam kha chu ngaihtuahnaah a awm thei rih lo.

"Josh-a'n a rawn be tawh che em?" A thil sawi avàng chuan amah chu ka en lo thei lo, ani pawh chuan min lo en ve kur bawk a, lu bu nghatin," Vawi khat chauh...." ka ti sap a, ani pawh chuan a lu bu nghatin chu lam chu a sawi chhunzawm tawh lo.

Chumi tlaiah chuan tui a rawn haw a, kan buai ve kher mai. Tui buai chuan kan buai a, Jivan-a'n a buaipui a, kei pawhin eirawng bâwl pahin ka theihna chinah ka buaipui ve tho a, buai belhchhah tùr ni àwm takin Polite-i a rawn lang ve leh a, rawng ka bàwl buai ve êm avàng chuan Jivan-a chuan an thingpui tùr a siamsak a, tui lam ngaihven lehnghâl a ngaih avàng chuan keiin thingpui chu ka va pe ta thung a.

Mahse, ka ding chawt a, ka ke chuan chhuatah zung a kaih ta em maw ni tih tùr a ni, eng thil nge ka hmuh hi? Ka rin dàn ang chu ni tho mah se a taka han hmuh thut chuan a dang daih mai, ka zak viau a ni, pu ber leh Polite-i chu an lo indût ngar ngar mai a, min hmu ve miah lo niin ka hria, ka hmu hnai viau, an la zei dùn hrep zui a! Ka inngaihtuah harh veleh chuan ka tawlh hnung hret hret a, hmu lo tâwk vêl chiaha ka tawlh hnun hnu chuan thãwm dim zet si, rang mangkhèn chuan ka kal sawn zui ta a, ka thin chu a phu dup dup ti ila a dik ber ang, ka thil hmuh zet chuan min tihamhaih ka ti dâwn nge, min tithinrim ka ti dáwn zâwk ni, ka hre thiam lo, ka zah vàng chu nge ni, ka khùr dar dar a ni tih chu ka hre chiang ngang mai thung.

An infawha an mut dun fo pawh ka rin viau laiin, khatia han hmuh dun kha chu... ka sawi thiam chiah lo, a nuam miah lo, ka áwm záwn chu ka han dek a, a lo la phu dup dup mai. Ka han maimichhîng a, an indút lai mawlh chu ka hmu zêl mai, lu ka han thing nawk nawk a, ka duh lo tak zet a ni. 

"Thingpui chu?"

Ka phu nasa kher mai! Ka bul maiah chuan pu ber chu a lo ding reng tawh niin, anmahni ka hmu a ni tih leh ka awm dàn chu a rawn hriat chhuah loh hrâm ka beisei.

"Aw...rawn pêk che u ka tum mêk a," ka ti sap a, ani chuan," Min han pe la?"a lo ti leh mai a, hmui pet zauh chuan thingpui dahna tray chu ka han chawi leh a, a hmel pawh chu ka en nawn tawh lo.

Ka kal pelh dáwn chuan," Nichin khân ngati nge i tawlh sawn daih kher a?" a rawn ti chhuak ta sup a, a țawng ring miah lo; mahse, ka hre chiang lutuk tlat, ka ding deuh dat nghe nghe, he pa hian min lo hmu reng tihna em ni? Ni lo ang, min hmu lo ang.

*TIHSUAL PALH I HLAUH VIAUNA KHA TÀWPSAN TEH, A CHÂNG CHUAN I TISUAL PALH VE REM RUM ANG CHU, CHU CHUAN I HRINGNUN HMAN CHHOH MËKAH KHÂN HMASÂWNNA A ZÎK CHHUAHPUI DÁWN CHE A NI*