☆MIN EN LA☆ - 15 By Dingdi Pachuau

 ☆MIN EN LA☆ - 15 By Dingdi Pachuau

Chhâng tawh lo chuan Polite-i lo țhutna lam chu ka pan ta daih a, ka hnungah min rawn zui ve tho tih erawh ka hria. Dawhkàna thingpui ka dah chuan Polite-i chuan polite zet hian làwmthu a lo sawi leh thlap a, ka nuih ve sak a, pu ber chu melh pawh melh chhin tawh lo chuan ka chhuak zui ta nghâl a.

Zanriah ei thlengin Polite-i chu a awm a, zanriah a ei ve dâwn a ni ngei ang chu. Ka haw phei a, zanriah chaw ka chhùm nghâl a, naktûk tlai tûn ang hunah chuan Zotei a rawn thleng ve tawh ngei ang a, ka chêt ngai lovin rawng pawh a lo bâwl fel leh vek ngei ang chu.

Zànah Nunhlima a rawn lêng a, vawiina an hna thawhna hmuna thil thleng nuihzatthlâk deuh deuh chu min hrilh a, a sawi thiam bawk nèn, kan nui bãwk bãwk a. Chutih lai chuan ka phone a rawn ri ta rang rang a, ka nu a lo ni a, naktûk lama Zotei rawn kal dàn tùrte chu a rawn sawi a, chawhmeh pawh a rawn keng nual dâwn ni àwm tak a ni. 

"Rawn ken kher a ngai hleinem, a buaithlâkin a bâwr buangbâr mai mai zâwk lo ang maw?" ka han ti a, ani chuan," Khatah kha chuan lei leh lei hlîr a nia, sum a hek alawm, dah rei ve deuh theih tùr a rêp lam leh thlai kan neih ang ang ka rawn kentîr ang, a bâwr dâwn hran lo," a rawn ti ve thung a, ka sawi zawm zêl duh ta lo va, kan thlai thar ngei ei pawh a khât leh tawh alawm.

Kan inbiak zawh hnuah chuan Nunhlima chuan," Zotei chu a pass țha si a, eng nge ka leisak ang aw?" a ti vang vang a, kei chuan," Nia, a làwmawm kan ti ve a nia, a zir ngawrh ve bâkah Pathian zârah liau liau a pass țha ve niin ka hria. Thil  leisak lam kha chu, a ngai teuh lo mai! Kei pawhin eng mah ka leisak dâwn lo," ka lo ti vat a, ani chuan," A, leisak ka ba ve hrim hrim, a ti țha êm mai," a ti leh a.

Ka phone a rawn ri leh a, ka nu leh bawk a nih ka ring, sawi theihnghilh a nei leh a ni ngei ang chu, en mang hlei lo chuan," Hello, Nu?" ka'n ti fân raih a, lehlam ațang chuan," Nu chu ka ni hauh lo," a rawn ti thûm ta dút mai a, ka phu deuh zawk mai! Tu nge ni? A aw ațang chuan ka hre thei mai lo, a thûm teh dût lutuk a. Phone chu ka han en a, ka nu hming a lo ni awzawng lo mai niin, number ringawt a lo ni, ka ngaihtuahna ka lo kalpui mah mah a lo ni.

"Sorry lutuk! Ka nu number emaw ka tih vàng a ni. Eng nge ... ni ta le?" ka ti ban deuh charh a, a rûk tak chuan ka zak angreng viau mai. Lehlama mi chuan," Naktûk zînga chawhmeh siam tùr rawn hrilh láwk che ka tum a," a rawn ti leh mai a. Tu nge a nih ka hre ta chiah, ka number chu a lo nei reng a lo nih chiah hi, fridge kawngkhàra thil ziak lo bel kha chu a kal pèl ve ta a nih àwm hi. A țha alawm, han sawi dûm teh se.

"Aw le, han sawi la?" Pu ber a ni ve bawk si a, zah ve deuh taka ka biak chu a ngai ve tlat. Ani chuan," Arsa hi i kang ang a, Hmarchapui leh Tomato i telh dâwn nia, Anțam hi a no chinah a sik chhum vek ang a, i chhùm so sawk ang a, 'Tauh' an tih ang chi khân i siam bawk ang, eng eng nge an telh chu ka hre vek hlawm lo, i thiam ang tiraw?" a rawn ti a, ka nuih za viau mah se ka nui duh hauh lo, țha tak chuan," Aw, ti thei mai ang," tiin ka chhâng a, ani chuan," A țhat chu, Josh-a'n a rawn be tawh che em?" a rawn ti leh daih a," Aw... " ka ti ban charh a, kan thil sawi a her kual daih chu ka duh lo kher mai. Bâkah, Nunhlima a la awm ve reng a, thil ho mai mai sawi chu mawi pawh a mawi chiah lo. 

Mahse," Naktûk zînga chawhmeh siam tùr ka sawi kha aw," a tih leh hnu chuan kan inbe tàwp zui a, Nunhlima bulah chuan thuphâ ka'n chawi leh rih a, ani erawh chuan," E, a ngai hauh lo mai, thil țûlah miin an rawn bia che a ni mai a," a lo ti vat a, chutah, hawi kualin sana a han en a," Ngawi teh, a lo tlai ve leh tawh reng mai, haw a hun tawh a nih hi, naktûk phei chu hma taka ka thawh a la ngai zui a, lêng rei thei pawh ka ni lo, la kham lo viau mah ila ka haw tawh ang e," a ti zui zat a, kei chuan," Awihawm loh e, a la hma alawm," ka lo ti ve ngial a, ani erawh chuan," Lêng reng pawh ni ila ka ning àwm chuang si lo che a, min nin hmaa ka haw thuai hi a țha," nui hmêl pu deuh hian a lo ti thung a, ka nui ve ringawt a, ka chelh lui bîk lo, veranda thleng ka thlah a.

A tûkah chuan Zotei chu a rawn thleng tlai deuh hlek a, a rawn chuanna sumo ke hma ding lam a chhe pek a ni àwm e, an thlâk a, rei pawh an tlàn leh hma chuan a hnung lam ke pakhat zâwk a chhe leh a, chu erawh an buaipui rei lo thei ta lo; mahse, him takin in a rawn thleng tho a, hun erawh an rawn hmang rei lo thei ta lo va, a làwmawm tho tho e.

Ka nu chuan thlai hnah rêp lam chu a rawn bâwk hrang thluah a, ka hmuh chuan ka nuih a za khawp mai a, tam lo tê tê ni mah se a hlu vet vet hlawm viauin ka hria, min ngaihtuah a, min rawn thawn hrâm hrâm a ni a, tlêm tê tê ni mah se min rawn thawn duhna thinlung hi a ropui hrim hrim.

Zotei chu a duhna taka school kaltîr chu châkin duh viau viau mah ila kan tân a hautak dâwn a ni tih hriain kan in ațanga kea thui vak lo kala thlen theih mai GHSS-ah chuan admission a lo ti fel vek a, a duh dàn takah chuan Sèrkàwna kala Science lâk a duh a; mahse, ke chuan a hla si a, lìrthei kan nei ve mang si lo, bus-ah nî tin chuan a ngai ang a, ni tin fare chàwi a ngai dâwn bawk a ni, kan sawi dùn ve nasa, thu tlûkna kan siam hlei thei lo; mahse, ngaihtuah der der hman kan ni tawh lo, admission tih thuai a ngai tawh. Ka han ngaihtuah vang vang a, keiin school ka zawm thei tawh lo va, ani chàwm hi ka hna pui ber a nih vàngin a duhna ngeia kaltír chu ka rilrûk ta a; mahse, amah chuan GHSS-ah admission a lo ti fel ét a," Ka ngaihtuah ka ngaihtuah hnuah he thu tlúkna hi ka siam a, ka tâna țha zâwk tùr a ni maithei a ni," a ti mai a, han sawi tùr pawh ka hre lo. Nia, a tih fel tawh chuan tihngaihna awm tawh hek lo le, a tân a lo țha phian thei asin. Commerce a la dâwn ta a ni a, eng tak ang ang maw? Science lák kha chu țha ka tihpui viau nain keini chhûngkua hian kan chãwm zo ngût ang em? Neuh neuh a tam si a, pawisa a hek viau lo ang maw? Mahse, han zir chhunzawm kha a châk kha a ni bawk si, ka ngaihtuahna a luah zui deuh reng nghe nghe a ni.

Nunhlima chuan pass lawm nân a duh ber a school bag tùr a leisak a, a lãwm thiam khawp mai. Kei erawh chuan ka lo sawisêl deuh a, Nunhlima chuan," A hlimpui êm hi maw, thil man to tak pawh a ni hleinem, en liam ve mai mai teh," a ti thung a, chutah," A pass lawmpui nân thil leisak hrim hrim kha ka duh bawk a ni, a phû êm asin," a ti zui leh a.

Zirtàwpní chuan pu ber chu ni dang zawng aiin Office a rawn bâng hma deuh a, ka rin loh deuh hian," I nau pass lawm nân zanin chu hetah chaw ei khâwm ang u," a rawn ti a, mak ti deuh hian ka lo en hâ a, ani chuan," A rawn haw tawh a ni lo'm ni?" a ti leh a, kei chuan," Aw, haw tawh e; mahse; chaw ei khâwm tak chu, làwmawm ka ti viau nain, a ngai ka ti lêm lo, ani phei chuan a duh lo tawp ang," tiin ka lo chhâng a.

"Duh lohna tùr a awm hleinem, Jivan-a'n a pui thei che ang a, ani hi khawnge a awm? Buai viauna tùr a awm phah lo tùrah ngai ila, zanin chu kan ei khâwm ve rêng rêng ang," a ti leh a, chutah," Zotei chu inah a awm ang tiraw? School hi an la țan chiah lovin ka hria a," a ti leh a, chhâng lovin ka en leh reng ringawt. Va sàwm a tum chu a ni êm lo ang chu maw? Va sâwm pawh ni se, Zotei chuan a lo hnial ngei ka ring.

A tih tlat avàng chuan rawng chu kan bâwl sauh sauh a, ani erawh chu kan inah a phei ve ta thung a, Zotei chuan hrehawm a lo ti viauin ka ring, a nèlawm lo bawk si, hnial pawh a lo hnial ngam kher ang em?

Ka vir buai viau lai chuan Pu ber Jakob-a chu Zotei nèn chuan an rawn inzui lût ta mai! A va sáwm ngei a, ani pawhin a lo hnial ngam lo ta chiah e. 

"Zanin chu a tui thei ang berin aw ni ang, Zotei pass lawmna tùr a ni dâwn bawk si a," Jakob-a chuan a ti a, amah pawh chu dawhkàn kîl chuan a rawn țhu a," Eng nge chêtna tùr a awm em? Ka lo pui ang che," a ti leh a, Zotei chuan," U, kei pawhin ka lo pui ang che, tih tùr han sawi la?" a lo ti ve a, kei erawh chuan han sawi mai tùr ka hre lo. Ka en dùn tawn sek a,a hnu deuhah erawh chuan," Anțam kha lo sil la, chuan i chan zui dáwn nia," tiin, chawhtawlha Anțam ka dah chu ka melh zauh a, ani chuan a pan zui ta nghâl a.

"Eng nge ka lo tih ve ang?"

Ka tír hreh viau nain amah a inhuam ve viau bawk si a, Jivan-a a chhuak ve rih bawk nen, ka buai ve êm êm mai si a," Alu lo vel la?" ka ti ta nge nge a, ani pawh chu phûr zet hian a ding nghâl hluai a," Pum eng zât nge ni ang?" a ti nghâl a, kei chuan," Tam a ngai lo ang, bâwngsa kana thlâk hlekah hian," ka ti ve leh mai a, a quarter a ni bawk a, eng ilo dahna chu a lo hre ve khawp mai, a zawng buai hauh lo.

Eirawng kan bâwl zo thawkhat tawh a, tih tùr pawh a awm tawh lo, Zotei leh pu ber Jakob-a chu sitting room lamah țhu pheiin Zotei nui leh hak hak țhìn chu ka hre zauh zauh a, anmahni hmu thei lo mah ila chu lam chu ka melh phei a, ka rin aiin Zotei hian a nêl daih mai si a, an la inhmu tam lo a nia; mahse, chuti chung chuan tunah pawh a nuihpui leh thei tawh a nia, engtin nge maw Pu Jakob-a hian a cheng a dehsak teh rêng ni?

"Yes, ka chak!" tia Zotei hlim au ri ka hriat chuan ka meng phâwk nasa mai! Eng an ti chu ni maw? Pu Jakob-a țawng ri deuh bul bul chu ka hre zui a, a sawi erawh ka hre lo, chutah, Zotei'n min rawn au lang lang a," U, lo phei lawk teh," a rawn ti a, ka fianpui ken lai chu dahin gas chu ka sim phawt a, ka phei ve ta a.

Chinese checker an lo khèl niin, in ka tih fel leh dah felin a board chu ka hmu ngai miah si lo, khawiah nge maw a lo dah țhat ni? He thil hi chu ka khèl thiam ve tlat asin, khelh thiam ka neih chhun a ni hial ang.

An han inkhèl leh a, an bulah dingin ka lo en ve reng a, tûn țumah hi chuan a mipa záwk a chak ve ta, Zotei chét khatin a chak lo a ni. 

"I tel ve duh em?"

Ka châk lutuk ringawt! Mahse, ka insûm ve deuh rih a," Ka la hman lo deuh, in pahnih khân ti leh rawh u," ka ti a, choka lamah chuan ka phei leh ta daih a, chutih lai chuan Jivan-a pawh a rawn haw ve ta hnuang hnuang e.

"I lo buai viau lo maw? Ka tum aiin ka rei ta si a," a rawn tih chuan," Buai lo ve, kan buai lo, i thil tih tùrah chuan i tluang thei vak lo a ni maw?" tiin ka zâwt lêt thung a, ani chuan," Aw, khâwl a chhia an tia, an siam chhûng ka nghâk leh rih a, chu vàng chu maw le; mahse, ka ti fel vek tawh e," a ti a. "A țhat hlauh chu," ka lo ti a.

Zanriah tui takin kan eiho a, Polite-i a rawn tel ve lo tlat. Hna thawhna pu berte nèna chaehlui han kîlho chu ka zak deuh hlek a, țawng pawh ka țawng mang lo; mahse, Zotei erawh chuan nuam a tih hmèl viau thung, a puala chawhlui siam a ni bawk a, a changtu a ni a, Pu Jakob-a lah chuan a titipui thiam khawp mai a, heti tak hian Zotei hi a lo țawng duh a ni tih zanin ațang chauh hian ka hria.

Cake-in a surprise bawk, a surprise ka ti tak nain keini pawh min surprise tho a nih chu! Cake a rawn hàwn tih hre miah lo le, mak kan tiin kan hlim tlâng a ni ber. Birthday Cake, lawmpuina cake tih vêl hi kan la siamtîr ngai lo va, kan ei ngai hek lo, kan têt lai kha chuan ka nuin chawțhing min kansak a, thingpui nèn hmehin kan la intithei ve viau a nih kha, tunah hi chuan engkim a danglam tawh a, tu mah hian chawțhing kan hi an bár hawng hawng tawh kher lo maithei a ni, hriat pawh an hre tawh kher nâng.

"U, Pu Jakob-a kha a fel ka ti ngawt mai, khatiang kha ka beisei phâk hauh lo asin, ka hlim tak zet a ni," Zotei chuan hlim tih hriat tak hian a ti barh barh reng a, a hlimna hi a luangliam nasa ngang a ni ang, ka nute pawh a han phone a, Pu Jakob-a'n thil a tihsak zawng zawng hrilhin thlalâk țhen țhen pawh chu a thawn nghâl a.

*I nau hlim hmêl kha hmuh a nuam viau, a fel reuh bawk*

Mut dâwna ka message dawn a ni, a tilawmawm, a number save lo mah ila tu nge a nih ka hre chiang, save kher pawh ka tum chuang lo, ho mai mai. 

*Hetiang hi ti zeuh zeuh ila a țhat dâwn hi*   tiin min rawn thawn leh a,  chhàn dâwnin chhàn dàn tùr ka hriat loh bâkah ka ngam meuh lo, pu ber kha a ni ve miau mai si a, bâkah, zàn a rei dâwn a, zawhna a ni lêm lo bawk a, chhàn lêt ka tum lo, chhàn chuan a phúr lutuk ang a, thil ni lo lo min zâwt leh palh ang.

A tûkah erawh chuan," Ka message kha engati nge min chhàn loh?" tiin min zâwt ta thung a, kei chuan," Zawhna chhàn tùr a awm loh kha," ka ti thung a, a rûm nghut mai. 

"Zawhna chauh i chhâng dâwn tihna maw?" 

"Zawhna ni lo a chhàn theih em ni, ka pu? Zawhna chauh alawm an chhàn țhin, " ka ti ve thung a, min rawn en duh ngang mai, ka en ve zawk nain ka hawi sawn leh daih a.

"Chuti, zawhna ka zâwt ang che, bialpa i nei mêk em? Josh-a nge Nunhlima zâwk, min chhâng rawh le."

Chuti teh tawp chuan min zâwt! Ka bul lawkah chuan a ding rùn mai a, ka chhâng lo, chhàn chi ni nghâl lo chuan maw le, ka bialpa neih leh neih loh hi ani hriat kher hi a țûl lo, bialpa ka neih ve hunah pawh tu vak mahin an hriat ka duh lo ang.

"A ho êm mai," ti ringawtin ka chhâng.

"A ho maw? Zawhna a nih kha, zawhna chu chhàn tùr i ti em maw ka ti?" a rawn ti leh sup sup a, kei chuan," I hnuaia chhawr ni mah ila ka mimal nun kher chu, min zahsak la?" ka ti ve thung a, chutah," Khawngaihin, ka pu, kei pawhin ka zawh loh che hi," ka tih zawm leh a.

"I pu ka ni lo, khatiang khân min ko tawh ngai suh."

Ka hmui chu ka pet a, a rawn țawng chhuah dàn chu a nuihzatthlâk thei lek lek nain ka nui ngam teuh lo! 

"I chanchin ka hre duh a, ka zâwt che a ni. Ka chanchin i hre duh a nih chuan min zâwt ve thei ang," a ti leh sup a, a inkuangkuah a, dawhkàn nghèng deuh hlek chuan a la ding ngur a.

*MI DANG NÈN INKHAIKHIN NGAI SUH, NIMINA NANGMAH NÈN KHÂN INKHAIKHIN ZÂWK LA, NIMIN AIA ȚHA ZÂWK ZÊL KHA NIH TUM NGEI ANG CHE*