☆MIN EN LA☆ - 16 By Dingdi Pachuau

 ☆MIN EN LA☆ - 16 By Dingdi Pachuau

"Tuna ka hna ang thawk tùr hian ka mimal nun min zawha min hriatsak kher a ngai tihna em ni?"

Ka en lêt ve ta siah a, ani pawh chuan mitko sàn ãwk hian min lo en ve a, ka zawhna avàng chuan mak a ti a ni maithei; a mitmeng ațang erawh chuan, ka hre thiam lo.

"Chutiang deuh chuan i ngai thei ang, ka hnuaia thawk chu a chanchin ka hriat ve pawh a ngai  ang chu," a lo ti sup sup a, a lu chu a bu nghut nghut pah bawk a. Kei erawh chuan," Mami hnên ațangin a tlângpui chu i lo hre tawh tùrah ka lo ngai mai asin. Chuan, ka mimal nun erawh chu pawimawh lo tùrah ka ngai deuh, țangkaina a nei àwm lo êm mai a," ka ti ve thung a.

A ngawi ta vung vung a; mahse, a hawi sawn chuang lo, a thin a rim deuh a ni maithei a ni, a rûk tak chuan nuam lo deuh chu ka ti ve reng, hetianga ka chhâng ngam hi kei ngei pawhin mak pawh ka inti; mahse, a thil min zawh kha a mak êm alawm, ka mimal nun min zâwt tùr êm chuan a hnêna intulût vek ka ni hleinem, a ina che tùra a chhawr ve mai ka nia, ka hna thawh atân ka mimal nun hriat vek kher kha a ngai lo, rawng ka bàwl tui loh phah sawt hran lo ang.

"I mak reuh e!"

Ka en zawk a; mahse, ka hawi sawn leh nghâl daih. A thin a rim deuh kha ka ring a nia; mahse, thinrim hnël a pu lo, a nuih a za deuh zâwk niin ka hria! Eng chuan nge a nuih chu tizã dâwn ni maw?

"I huaisen reuh ka ti, ka lawm zâwng tak i ni dâwn tlat mai."

A kal sawn hnu chuan ka âwm ka dawm a, thâwk ka la huai huai a. A thin a rim lo kha a làwmawm; mahse, a làwm vak chu ka ring lo ve ngawt thung. A mize țhenkhat leh a awm dàn ka chîk ve țhin ațang pawhin khatia ka han chhâng fak fak kha chu lãwm thei a ni tlat lo.

Mahse, a ni hran lo a niang, a hnu lamah pawh chuan lãwm lo hmêl a pu chuang lo va, min biak loh phah lo va; mahse, bialpa chungchâng tak erawh chu min zâwt tawh bîk lo. 

Zotei'n class a țan tawh a, a uniform pawh a inhmeh ve khawp e. A zirlai chu ka hriat thiampui lo nasa khawp mai a, en pawh ka enpui peih lo, class țan zàn ațangin a zirlaiah chuan a bûr leh nghâl chat a, zir tùra tih hran a ngai lo, a la naupan ang ai hian a rilru hi a puitling reuh ka tia, chàwm pawh hi a phùrawm hliah hliah ka ti.

Josh-a pawhin min rawn be zauh zauh a; mahse, nulát tlangvàlna lam hawi chuan min be ngai hran lo, fiam erawh min fiam ve zauh zauh thung a, kei pawhin fiamthuin ka chhâng mai mai tho. Mi fel tak a ni, kei ang duang pawh min be peih a nia, ka biak phâk a nih loh tehlul nèn, hun remchâng hmasa berah rawn zin phei a tum nghe nghe.

Pathiannî a ni a, Zotei nèn chuan kan inkhâwm a, inkhâwm bànah Nunhlimate nèn kan in lam panin kan inzui haw a, infiamin kan titi bawrh bawrh a, Nunhlima thil sawiah chuan Zotei nèn chuan kan nui nasa mai a, khawlai a nih avàng erawh chuan nui ring ngam lovin kan insûm nasa ve viau thung.

Pu ber quarter chu kan pèl dâwn chiah tihah chuan Zotei chuan," U Kob, engah nge i rawn inkhâwm ve loh a?" a ti chhuak ta hliai a, 'U Kob' tiin a ko nia!! A u atân chuan an kum a inthlau mah mah! Engtik lai ațangin nge an lo innèl ni? Ka hawi vat a, gate bulah ani chu a lo ding leh rùn tawh niin, a kekawr ipte zenin kàwisàwi lek lek hian a lo ding a, Zotei chuan be lo se chuan ka hmu hauh lo ang le.

"Min rawn sâwm si lo va."

"Ngawi rawh, kârlehah chuan ka rawn sâwm tawh dâwn che nia, kan inkhâwm dial dial ang chu," tiin Zotei chuan a be chhunzawm leh a, kan han ding ve deuh hlek a; mahse, anni pahnih inbiak avànga lo din ve reng chu, Nunhlima chu enin," Kan kal dâwn em ni ang?" ka ti a, a lo bu nghat a, in lam pan chuan kan kal leh ta a, engtin nge an inbiak chhunzawm zêl ka hre lo; mahse, rei erawh an inbe lo tih Zotei rawn haw thuai dàn ațang chuan ka hre mai.

Mami'n min rawn bia a, thil min hrilh tùr țha deuh a neih thu a rawn sawi phawt a, a aw ațang chuan a phúr tak zet tih ka hre thei mai a, kei pawh chuan hriat hlàn nghâkhlel tak hian," Min hrilh thuai thuai teh, ka hre châk a nia," ka ti vat a. Nunhlima a haw deuh chiah a, min rawn phone hun a hria ka ti khawp mai.

"En teh maw.." a ti leh phawt a, kei chuan," Aw.." ka lo ti ve leh a, ani chuan zàwi deuh hlek hian," J-a țhianpa Josh-a ni lo zâwk Rinawma kha i hria tiraw? Chaw pawh an rawn ei tawh kha, kha mi nau Adonis-a kha ka star thar a," tiin phúr tih hriat zet hian a han khêk leh rãih rãih phawt a, ka nui ringawt. Thil țha deuh min hrilh dâwn emaw ka ti a. A, a țha tho e, LeRoy-a nèn an ințhen tawh a, a rilru nâtna mi dangah chhâwkna a hmu a nih chuan, a țha a ni mai, lawmpui ang.

"En teh, a chhiat lohzia chu, a pic ka rawn thawn ang che aw," a ti leh sauh sauh a, kei pawh chuan," Rawn thawn thuai teh, chhe lo chu hmuh ve pawh a chãkawm alawm," ka lo ti ve a, whatsApp-ah chuan min rawn thawn a, ka han en chuan a la naupan hmèl deuh ka ti, țha ka tih zâwng chu a ni ve hran lo nain hmêl chhia phei chu a ni chuang lo.

"Eng nge ang i tih?" a rawn tih leh chuan," Eng nge ang ka tih pawh ka hre lo, mihring chu a ang ber a nih hi," tiin ka chhâng a, a rawn nui nasa mai.

"I va sual ve tak aw...!! Josh-a pawh ka tihpui tawh miah lo ang che," a rawn tih nang nang chuan ka nui hak a," Hei, vawi khat mah mi min tihpui tawh suh aw, ani kha a fel ém zâwk a, ka mualpho lo ni maiin ka hria, a fuh vak lo aw," thutak deuh zâwk hian ka ti leh a, ani erawh chu a rawn nui uar sauh a.

"I ngai thutak leh lutuk a nih kha, mualphona tùr a awm hleinem, nula leh tlangvâl chu inbiak tùr a ni ngai e, ani pawh nupui neih hun ve tawh tho a nia, in inkawp rem theih hlauh chuan a zia dâwn êm asin," a rawn ti leh bawrh bawrh a. Kan rilru inan loh theihzia hi aw... ani lah hian engah mah a ngai duh dèr lo mai lehnghâl a.

Pu berin min rawn koh avàng chuan ka phei leh ta rih a, zanriah a ei chhuak dâwn lo va, ei ka rèl leh a ngai dâwn tihna. 

"Rawn ei tùr an awm dâwn em?" tia ka zawh chuan," Awm lo," a lo ti mai a, lu bu nghatin," Siam tam a ngai lo tihna a nih chu," ka ti ve sap a, ani bengvâr ta na nâ nâ chuan a lo hre hman leh tho niin," Thil i sawiin chiang deuhin sawi rawh ka tih tawh kha," a lo ti leh sup a, 

Zanriah chawhmeh chu a duh angin ka siamsak thlap a, ka siam lai pawh chuan ka bulah a lo tâp ve reng a, țawng erawh a țawng vak lo. A ei tam leh tam loh hriat nân a tûk zînga eirawng ka bàwl dâwnah chawhmeh chu ka en kual dan dan a, a ei tam lêm lo nain Fridge kawngkhàra lehkha them lo inbelah chuan  *Nizàn chawhmeh kha chu duhthusàm a ni e* tih a lo ziak a, a nuam ve veng veng mai, ka thil siam tui a tih tluka hlû a awm hleinem, ka hlawh hmuhna a ni si a.

"U Kob-a chu ka sâwm ve tawh tak tak ang, sàwm kha a phût niin a lang bawk a," zanriah kîl laia Zotei'n a tih chuan," A ti tak tak lo ang, a inkhâwm peih lo chhuanlam a nih kha, hetah ni kher lovin, Aizáwl lamah pawh a inkhâwm ngai lo a nih ka ring asin," ka lo ti ve thung a, a inkhâwm ka la hmu ngai tlat si lo va. Ani erawh chuan," Khâwm ngai lo pawh ni se kan sâwm chhin ang a, a inkhâwm duh ve mial thei alawm, sàwm a phût êm kha," a ti leh a, ka ţawng tawh lo. Ni e, a duh chuan han sâwm chhin phawt se...

Mami lah chuan min rawn be sek mai a, Adonis-a chanchin chu min rawn hrilh sek a, a luangliam ve rih êm a tiin ka ngaihthlâksak liam puat a, a sawi ang êma hmêl țha hi ni se ka lo tihpui țhìn, kei chuan țha ka ti ve vak si lo va, a nungchang ka la hriat ve loh vàng leh hmaichhana ka la hmuh loh vàng pawh a ni mahna le. 

"In inhriat ţan dàn chiah kha?" tia ka zawh leh chuan," Rinawma kha eng emawah biak ka duh a, ka call laiin Adonis-a hian min lo chhâng a, a u bathroom lama a awm rih thu min hrilh hnuah tu nge ka nih tihte min zâwt a, WhatsApp-a ka dp kha a lo check kher a ni ang chu, a sawi dàn a nih chu, ka number chu a la ta a, chuta țang chuan min rawn be țan a nih chu. Dàwrah min rawn lènchilh rap mai a, min duh thu pehhêl hauh lovin min hrilh nghâl bawk a nih chu, a chhe lo bawk sia, a frank bawk si nèn, ka la chhâng chiah lo nain kei pawh hian ka duhin ka star ngawih ngawih a ni; mahse, Jalianchhûnga kha chu lo hrilh miah suh aw, min hau palh ang," a rawn ti leh barh barh a.

Engah nge maw ani chu ka han hrilh ngawt ang le? A âwihawm loh e, kei chu amahin min hrilh a, ani Jakob-a tân chuan hriat ngaihna a awm khet lo ang, hriat pawh a hre tawp nâng, an inkawp tawh tih pawh ni hlei lo, lo inkawp pawh ni se, nula leh tlangvâl an nia, an induh tawn phawt chuan an inkawp thei ang chu, Jakob-a pawhin Polite-i a kawp ve tho alawm, ani phei chu pathlawi a ni tawh lehnghâl a.

"Nunhlima nèn khân in inkawp chiang ta em?" tia Mami'n min zawh chuan thil awm dàn chu ka hrilh zawr zawr a, ani chuan," A nih tak chu, han chhâng ve mai la a țha ni mai tùr, a fel hmèl êm kha maw; mahse, nia, i thu tlûkna chu ka zahsak che, i thu thu a nia, lo sawi theih ka nei lo. A nih thu dang daih, J-a leh a bialnu kha an la inzui ve zêl ang tiraw?" a rawn ti leh a.

"Aw, ka ring, ka la hmu dùn zauh zauh," ka mitthlaa an indût lai hmu rauh rauh pah chuan ka ti a, ani chuan," A țha, a hlim theihna tùr a nih phawt chuan kawp char char teh se. E, taka, thlalâk ka lo thawn leh ang che, Adonis-a min rawn thawn a nia," a rawn ti leh a, Adonis-a hming sawi lang lo hian rei a titi thei lo chu a nih leh tâk ber hi.

Chu a thlalâk rawn thawn chu ka han en vang vang a, ka mit ka la sawn hlei thei lo, hmuhnawm ka ti tlat a nih chu. Pu ber Jakob-a leh Adonis-a lâk dunna a ni a, khawi hmunah emaw basketball khèl an en dùn a ni maithei, hetah chuan hlim hmêl puin a nui tlat, chuvàng tak chuan ka mit a la a ni, a inthuamna pawh a dum hlang a ni miah lo bawk. A inhmeh ka ti a, a hmêl pawh a țha ka ti tak zet, a nui lai hmêl ațang chuan mit lâk sawn har ka ti, a hmêl țha tak zet. A hmêl hi a țha tih chu ka hria; mahse, hetia a nui hmêl hi ka la hmu ngai tlat si lo va, a hmêl țhain a pà ka ti tak zet a ni.

"Adonis-a kha a lang chhe lo tiraw?"

Adonis-a lam rêng réng ka lo en tawh hauh lo, a tìra ka thlêk zawk bâk kha chu. Ka han en țha leh a, Jakob-a ai chuan a hàng hret a, a hmël pawh a chhe fê zâwk a nih hi.

"Aw, țha reng mai," ka ti ta ringawt a, ani lah chuan," Chhe lo tak a ni, an zin dunna a nih kha, J-a nupui neih hma ni àwm tak a ni," a rawn ti leh a, Adonis-a hmêl chu ka en leh tawh lo, nui hmêl a put theih chhan hi chu thihna avànga a nupui a chàn hma kha a ni tlat a, hetih hun lai hi chuan a la hlimin nuihna tùr pawh a la tam a ni ngei ang, a inthuamna rawng thlengin hlimna lam hmuh tùr a la awm tlat.

*******

"I țhianpa Nunhlima kha beiseina siamsak suh."

Mak ti zet hian ka en nghâl dâwrh a, ani chuan a hmui chu a lo tipawrh deuh a, nui hmêl leh fiamthu hmêl a lang lo, min lo en lêt rùn a.

"Eng vàngin?"

A mit chu a han khap zauh phawt a," A chhan chu i duh tak tak lo a ni, i inhria nang pawhin, ngun takin ngaihtuah ang che," a rawn ti chhuak ta a, kei erawh chuan mit khap hauh lovin ka en thung. Eng vàngin nge ka mimal nunah hian rawn inrawlh a tum ve ziah ni? A lo sawi tùr a awm lo.

"Ka mimal nun a nia--"

"I duh tak tak lo, a hnua i inchhìr leh ka duhpui lo mai che a nia," a rawn ti ve thung a, sawi zawm lehin," Thu ràwn a nih chu. I duh tak tak chauh kawp rawh, chumi hre thei tùr chuan i thinlung kha a pawimawh," a ti leh sup sup a.

Ka melh ràn ringawt.

(Zanin chu tãwi deuh teh se, naktûkah hmâ tâwkah ka thawh a ngai tlat)

*ENG ANGA HRIAM PAWH NI SE, THU DIK TAK HRILH ȚHÌNTU CHE CHU ZAH DÀN ZIR LA, HLUT DÀN ZIR BAWK ANG CHE.