☆MIN EN LA☆ - 17 By Dingdi Pachuau

 ☆MIN EN LA☆ - 17 By Dingdi Pachuau

A hnua ka ngaihtuah lêt ka ngaihtuah lêt erawh chuan ka lungawi lo lek lek a ni. Eng nge ka chungah hian lo inrawlh ve phêt a tum ni? Nunhlima pawh chu lo kawp pawh ni ta tehrêng ila, ka hnaah ka buai phah lo tawp ang, ei ka siam tui loh phah lo ang a, zîngah ka thawh tlai phah chuang hek lo ang. Lo inrawlh ve sek a tum hi ka hre thiam thei lo, mi chungchânga lo inrawlh hi nuam a ti ve hrim hrim zâwk em ni ang? Mami lah khân Adonis-a nèn an chungchâng ka hrilh kha a hlau hle bawk a, hei vàng hi a ni thei ang em? A ni thei ngei ngei ang, 'Thu ràwn ka pe e' te chu min han ti ve bawk a nia, mi chungchânga inrawlh nuam a tih vàng a ni ngei ang chu, chu chu a nih loh tal pawhin hetiang lamah hian inla expert takin leh ka hma ngai ang takin min zilh ve a ni ngei ang.

A làwmawm ve rêng rêng e, ani lo thu ràwn min petu pawh an awm loh hi.

Pathiannîah chuan Zotei chuan inkhâwm tùr chuan 'A u Kob-a' chu a han sâwm ta ngei a, kei erawh chuan a sàwm avàng a rawn inkhâwm kher chu ka ring hlawl lo. Ka ring dik chiah bawk a, gate ațanga a rawn chhuah chuan," Hna a ngah lutuk ringawt, dawhkànah a inchhawp dul mai," a rawn ti a," E, a nih chu," ka lo ti mai a, a inkhâwm peih lovin a lo inchhawp hnawk a ni tih hriat reng; mahse, Zotei bulah chuan ka sawi lang duh chuang lo.

"Chawhnu lama a ina lêng tùrin min sâwm a, chinese checker khelhpuiah min sâwm bawk, a hma khân ka chak tam zâwk sia, phuba lâk a duh a ni ang," tiin a nui zui hak hak a, hna nei țeuh inti bawk si, chawhnu lamah hun ãwl nei leh dâwn bawk si chu ka hre thiam teh nuai lo ve.

Chawhnu lamah țhalai fellowship-ah ka kal a, ka kal dâwn chuan Zotei chu ka thiam ang tâwk chuan ka han zilh ve a, Jivan-a a chhuak leh ngei àwm si a, mipa mahni chauha awm laka fîmkhur a pawimawhzia chu pehhêl deuh hlekin ka hrilh a, ani erawh chuan," U, i ti nuihzatthlâk e, chutiang rilru a pu lo tawp ang, kan inkhèl ringawt dâwn alawm," a lo ti ve thung a, kei chuan," Engkima fîmkhur hmasak hi himna a ni, chu chu hriat reng tùr, hmeichhia chu kan hming chhe hma a, hun rei lo tê chhûngin kan hma hun tihchhiatsak vek theih kan ni, chumi thleng lo tùr chuan fîmkhur theihtàwp hi a pawimawh," ka ti leh țâlh a.

Hun kan hmang nuam viau mai. Ka tel khât leh ta deuh a, tlêmin chhûngril lamah ka lo mikhual leh deuh hmanin ka hria; mahse, mi hi an lo fel êm mai a, min be bawrh bawrh a, làwmthu min hrilh pahin," I lo lang chu kan phuisui sawt mai," te an lo ti a,  min fiam bawrh bawrh bawk a, nuam ka ti chhunzawm leh mai bawk.

Kan bàn hnuah erawh ina haw nghãl mai lovin Nunhlima țhiante pathum nèn kan lëng ho a, lêng tihah kan tlãn kual a nih deuh chu. Kei phei chu ka chhuak ngai si lo va, nuam ka ti, rilru a hlim a, a zãng haih bawkin ka hria, boruak dang han hìp zeuh zeuh hi a lo țha a nih hi.

Kan in thlengin min thlah a, a lo lút ve tawh chuang lo. Zotei chuan," Eu, nuam in ti hle mai, ka phone pawh i chhâng thei lo a nia," tiin fiamthu ti tak deuh hmél pu hian min lo en a, kei chuan," Min lo phone maw? Ni dâwn tak, ka mute daih tak alawm, thil pawi a thleng êm lo maw?" ka ti a, ka phone ah lai chu phawrhin ka han en nghâl a.

"Thleng hran lo; mahse, U Kob-a ei tùr tuin nge siamsak ang? Phone che a tum a," a tih chuan," A ei chhuak ve deuh ziah sia, chutiang ka lo ring pha hleinem. Chuan, engtin nge a awm tâk?" ka lo ti vat a, min phone a tum a, min biak theih si loh chuan a thin a lo rim ang em? Ka ning, vawiin tlai angah tal hi chuan a hma ang khân ei chhuak leh ziah tawh se ka ti tak zet, hun thâwl ka nei ve thei  dâwn hleinem, a thinrim a nih chuan a bulah ka sawi chhuak ngei ang.

"Ka hre lo, nula pakhat a lo kal a, an chhuak dùn ta a ni ang, ka hre chhunzawm tawh lo, ka hawsan daih sia," a ti leh mai a, a pawi loh chu. Eirawng bâwltu ber ka awm si loh chuan nula nen chuan an ei chhuak mai a niang chu, a hma pawhin a chhuak ziah tho alawm, hna min siam belh zêl lo teh se.

*******

"Nimin tlai khân engati nge ka phone call i chhàn duh loh?"

Ka thlêk zawk a nia, a Adidas tracksuit pãwl tak rawng hâk  inhmehzia chu ka hmu hman tho. Min en ve miah lo se, muangchânga chiang taka en chhuah dap ka châk!

"Kan fellowship hma khân ka mute daih a, a hnuah ka lo en leh tawh si lo va, chu vàng a nih kha," tiin ka chhâng mai a, thu dik a ni chiah bawk.

"I lêng kual nasa àwm hle mai," a tih leh chuan," Lêng kual nasa lêm lo; mahse, hun ãwl ka neih chhun a ni ve a, ka han duhãm ve deuh a nih kha," ka lo ti leh mai a, Dãl chu chhum tùrin ka siam pah mawlh mawlh a.

"Zin leh ang hmiang?" a rawn tih tâkah chuan ka en leh ta vat a, a ti tak tak a nih hmèl," Ka thei lo ang, Zotei awmpui a ngai alawm," ka ti ve thung a, ani chuan," Mahse, mi dang ei siam ka ei peih hleinem," a lo ti sup a, a țawng dàn leh a thil sawi chu inhmeh lo ka tih êm avàngin ka nui ru deuh sak a, patling pui a ni ve tawh a, naupang lungawi lo lam deuhin vui deuh nung nung paha a nu bula thil a sawi hi a nih duh hmèl ka ti tlat.

"Zin lo la a nih mai chu," ka ti a, ka nui pah deuh hlek a, ani lah chuan," Ka hnaah hian zin kual hi a bet tlat a, ka zin lo ngawt thei bîk lo, min zui ve thei la ka ti khawp mai," a lo ti leh a, a tih tak tak ka ring, ka thil siam hi tui a ti ve tlat si a; mahse, kan inbiak dàn hi a nuihzatthlâk ka ti, patling leh a hnuaia a chhawr ve mai inbiakna atân chuan a nuihzatthlâk  mah mah.

Thil ho tê tê pawh a lo sawi ve țhin tho a lo nih hi, mûk run leh țawng duh lo zet ni khân ka hre țhin kha a nia, officer lian tak takte pawh hian khùnkhàn leh tak deuh rùna awm hi an lo peih sêng bîk lo a lo nih hi, office-ah, a hnuaia thawkte bulah chuan hetiang hian a țawng bîk tawp nâng.

Chhùnah Mami'n min rawn bia a, Adonis-a chungchâng bawk chu a rawn sawi leh ta a, ka hnênah hian a duhna a rawn hri thla ve maiah ka ngai a, dawhthei takin ka lo ngaihthlâksak char char mai. Ngaithlatu nih hi a țha, thu sawitu tân a hlû tih ka hria.

"Min lo ning lo hrâm mai teh, hetiang tak hian ka lo duh ve ang tih ka lo hre lo a ni, LeRoy-a min țhen hnu kha chuan mipa melh leh hi ka duh tawh rih lo kha a nia; mahse, thil hi a lo mak thei ëm a lo ni," a rawn ti sar sar a, a țawng dàn ațang pawh chuan a phùrzia leh hlimzia chu a hriat theih ruak mai.

"Thu dang daih, J-a nèn chuan in inbe nêl ve tawh em? Ani kha, hmeichhe bulah hian a nèlawm loh theih lutuk a, hrehawm i tih loh hrâm ka beisei chho zêl a nia," a rawn tih leh chuan," Min ngaihtuah suh, harsatna a awm lo ve," tiin ka chhâng mai a, sawi duah kher ngai ka ti hran lo.

A tük zîngah pawh chuan pu ber chuan a bula zin ve mai tùr chuan min sâwm leh a, ka hnial dàn ngai bawkin ka hnial leh a.

"Min hlauh vàng a ni em?"

Ka nui ta hak a. A hlauhawm ka ti tawh lo, a hma kha chuan nèlawm lo lutuk hmuh khân ka hmu a; mahse, tunah chuan a ni tawh lo, a lo sual hran miah lo va, inla ngêng leh țawng duh lo zet nia ka hriat kha a lo ni lêm lo tih ka hre tawh bawk.

"Ni lo ve."

"Min hlau lo tak tak maw?" a rawn tih leh chuan en pahin," Ka hlauhna tùr chein i chungah thil tihsual ka nei lo tih ka hria a, ka hlauhna chhan tùr che ka hre lo," ka ti ta fak a, a chungah eng emaw tihsual chu nei ila chuan ka hlau ngeiin ka ring.

"Hmeichhe mak reuh tak chu i ni, mipa hian hmeichhe chungah thil țha lo tak tak a ti thei tih i ngaihtuah ngai em? Chuan, chu thil ka sawi chhuah avàng chuan min hlauh phah tawh em?" a rawn ti leh a, chaw chhuan pah chuan," Mi ã i ni lo va, mi pângngai chung lam daih niin officer pawimawh tak i ni bawk a, chutiang chu i ti duh hauh lo ang tih ka hria, i mi chhawr ve mai chungah hlauh phei chuan," ka ti duah a, fridge hawngin thlai hnah siam tùr chu ka la chhuak nghâl a. Ka chungah ţha lo taka a chêt duh ka ring lo, a cousin țhiannu ka ni a, a hnuaia cook hna thawk mai leh a in tifeltu mai ka ni bawk, a intihmingchhe duh hauh lo bawk ang.

"Hringnun kalphung hre tùrin thlasik i la hmang tlëm êm a ni," ti supin a kal zui ta daih a, ka en zui deuh reng a, a thil sawi awmzia 'Thlasik hmang tlêm' tih kha chu ka hre ve chiang mai, ka kum a la tam loh thu a sawina a ni; mahse, hringnun kalphungte hi zawng ka hre ve nual tawh asin, ka hun paltlang leh hrehawm ka tawrh zawng zawngte kha... Ani hian a hre lo zâwk ang, lehkha a zir lai pawhin chhûngte pawisain nuamsa takin a zir der der thei ang a, retheih hrehawmzia leh manganthlâkzia pawh a hre hauh lo ang le.

Fùr a rawn ni chho ve tawh a, ruah pawh a rawn sûr ve leh țan ta. Ruah sùr hun lai a nihna ang takin a hna a tlin viau mai a, June thla tìr lam ațangin a hna a thawk țha nghâl a, insûk pawh a ro har ve țalh tawh mai.

Zotei pawh ni tina chhuak a ni bawk a, kea kal ngai chin kawng a thui ve tho bawk si a, a lo haw hi chuan a mawza leh pheikhawk hi chu a huh ngei ngei ti ila ka sawi sual lo ang. Inhem rona tùr kan nei lo va, fùrah tak hian a țangkaina hre chiang telh telh mah ila, lei lam hi chu ka la ngaihtuah ngai lêm lo, lo nei ve pawh ni ta teh rêng ila current chhit man kan chàwi tam phah leh ngei ang.

Rin loh deuhin Josh-a a rawn zin phei a, a țhianpa quarter-ah a rawn thleng zui bawk. Mami'n min rawn hrilh hmasa vei thlap a, Josh-a ka ațang ngei pawhin ka hre lâwk tho. Pu ber erawh chuan a sawi lang hauh lo va, min hrilh lâwk phei chu ka ring lo hrim hrim. A țhianpain a ma chungchânga thu ràwn min pêk kha ka hre chhuak zawr zawr a; mahse, ani hi ngaihzâwng enin ka en lo va, ka en phâk lah a ni hek lo. Ani pawhin min biak dàn ațang hi chuan min en lêm lo ni chuan ka hria, min be țha reng tho a, mi fiam pawh a chîng; mahse, kan inkâr hi nula leh tlangvâl inkâra thil thleng ang chi hi a ni lêm lo, ani pawh hi a nihna phû lohin a induh lo va, a fel a, nakinah nupui țha deuh a la hmu ngei ang, ka duhsakpui e. 

Kan in luahah pawh chuan a rawn lêng lút ve ngei a, zànah a ni nghe nghe. Pu ber erawh chu zanriah ei kham veleh a chhuak thung a, tih tùr pawimawh a nei a niang, chumi hlàn chuan Josh-a hi a rawn lêng ve thung a ni. Kan titi a, fiamthu kan thawh a, kan nui a, phone lamah kan inbe nël tawh bawk a, ani pawh hian fiamthu a duh ve a, fiamthu kârah thu tak zep tel zauh zauhin min duh thu a'n sawi teh réng a! Kei lahin fiamthu-ah lâksakin fiamthu vêkin ka chhâng lêt ve zêl a, thu tak hla takah ka ngai duh lo.

"Ka thil sawi apiang fiamthu-ah ngai zêl lo la," a tih pawh chuan engah mah ka ngaihsak duh lo, ani pawhin tihngaihna a hre ta bík lo a ni ang, a hnuah phei chuan chutiang lam chu a sawi chhunzawm ta bîk lo. Dik tak chuan anite ang chin chhàn lêt hi ka duh lo hrim hrim, ka nihna ka hria a, a nihna ka hria, dinhmun inang lo tak inkawp hi chu a fuh thei lo, bâkah, ngaihzâwng neih ka tum rih lo, ani ang phei hi chu an luck dâwn lutuk a, thla tin thlâk dáwn pawh ni se a hmu zo ang tih theih a ni a, chutiang kâra inrawlh chu ka tum lo.

A châm rei thei lo va, ni hnih leh zan hnih a châm a, duh duha awm thei ni bîk hek lo le, a haw phei leh ta a, a haw hnu chuan Zotei chuan," U, i bialpa a ni lo tiraw?" tiin min zãwt a, a nih loh thu ka hrilh chuan," A țhat chu," a ti leh ringawt a, a chhan ka zawh chuan," A țawng vêl dàn kha a lêrh hmèl ka ti, i hmel hriat zîngah chuan ka ngainat loh pâwl tak a ni," a ti teh daih a! An inhmu fuhin an titi dùn pawh a ni hauh lo; mahse, room ațangin kan titi vêl chu a lo hria a ni ngei ang chu.

*******

Mâma result pawh a chhuak tawh a, a pass ve leh a, inhlawh lâwp lâwp chunga hlawhtlinna a chang chu ka lawmpui tak zet a, ka làwmzia leh hlimzia chu țawngkaa sawi thiam hleih theih pawh a ni lo, ka hlim a, ka lungawi a, keiin lehkha zir tawh lo mah ila nauteho hlawhtlinna chang chuan anmahni tluk zetin hlimna leh làwmna rilru min puttîr lo thei lo. 

Engthâwl takin thingpui tui tâwk no hnih ka siam rak rak a, ka siam zawh veleh ka va pe nghâl a, an lo ințhut hnaih khawp mai. Polite-i tih takah polite tak hian làwmthu a lo sawi leh thlap a, ka kal sawn hnu rei lo te hnuah chokaah chuan a rawn lút a," I hlim àwm hle mai," a rawn ti sup a, thingpui a inna no chu a rawn dah zui a. Kei erawh chuan," Hlimna tùr chhan ka ngah êm alawm," ka lo ti mai a.

"A làwmawm nasat chu! Hlim hi a țha."

"Ni e," ka ti leh hrâm a, a kal sawn hnu chuan ka ngaihtuah zui mai mai a, hlim țha ti viau siin a hlim lo viau chu a ni bawk si a, Mami sawi anga a nupui boral ta kha a la sûn zui reng a nih chuan amah a inhrem mai a ni ang, kum heti chen a ral tawh a, a sûn rei ve tawh a ni, hlimna zawng  ve tawh se tu mahin an dem lo ang; hetia hlimthla leh nunhlui, sulhnu mai a insal behtîr reng zawngin hlimna chuan a rawn zawng hmu thei lo tawp ang.

"Mak vung vung ve! Mi á ang mai."

Ka phu nasa lutuk a, ka bek chu bangah ka tauh zui dawt mai! Thãwm ka lo hre hauh lo va, ka ngaihtuahna kàwmin thil dang rêng rêng ka lo ngaihtuah lo a lo ni, a sawi ang deuh chiahin mi ã chu ka ang ngawt ang.

"A naaaahhh..!!"

Rawn hnai vatin ka bek ka tauhna lai chu a kuta rawn dawmin a tuai nghâl vat vat a, a rawn chêt dàn chuan min tihamhaih zui zat a, ka lu a tuaina kut chu ka han dawm ve chut ringawt. Min rawn din hnaihin kan inhmachhawn ràn bawk si a, a rim ka hre chiang ngang mai, rim tui tak a ni. A âwm leh ka mit a in-level táwk chiah a; mahse, hmu hauh lovin ka chunga a thil tih avàng chuan a áwm zâwn chu hnai fahranah ka en reng ringawt.

"A la nâ em?"

Ka hmai chu chung lam ațangin a rawn thâwk khum lum hakin ka hria, elaichi rim a nam deuh hlek a, a ei a ni ngei ang chu.

"Aw..."

Dìm ve deuh tho chuan a tuai leh vat vat a, ka sam pawh a tuai pawr ngei ang chu. Ka lu chu tuai pah chunga amah en thei tùra min kawih dâk deuh pah avàng chuan ka en chho lo thei lo va, a mitmeng nung ser sawr chuan min rawn en chhuk ve chiah a.

"A la nâ maw?"

A awki hniam reih rawih, thûm lek lek chu pà ka tih chi tak a nia, a mipa aw bîk hliah hliah. Chuan, a chal lai taka ser lian vak lo inrîn raih  ka hmuh rual chuan a inhmeh ka tiin a tipà zualin ka hria.

"Ummm..."

A vei nuih suk a! A live-a a nui ka hmuh vawi khatna! A nui ve tak tak, a thlalâk ațangin a nui nalh tih ka hmu reng tawh a, a taka ka han hmu ta phei chu a nalh zual ka ti, tuna a nui kha video-a lo latu awm se, ka en nawn tluk tluk ngei ang!

"I nui!"

"I lawmawm reuh lutuk a," ti supin a rawn kûn hniam deuh a, eng nge a tih dâwn ka hre hauh lo; mahse, ka chala a rawn fawh tâkah chuan ka maimichhîng sawk a, eng thil nge a tih hi? Engati nge min fawh? Min duh deuh tihna em ni?!

Ni lo, ni lul lo mai!!! Chutiang ngaihtuah tùr ka ni lo. Ka bek ka tauh vàng mai a nih hi.

"Min en teh."

*ȚAWNGKAMA THU ȚHA INHRILH LEH NGAWT ȚHIN AI CHUAN A HRILHTU HIAN A TAKIN NUNPUI ILA, A HRILHA TÂN PAWH AWMZIA A NEI THUI ZÂWK NGEI ANG*

(UCL FINAL EN TUI U)