☆MIN EN LA☆ - 18 By Dingdi Pachuau

 ☆MIN EN LA☆ - 18 By Dingdi Pachuau

Kan inhnaihchilh tawh nasa mai si a, ka en chho leh a nih hlauh chuan kan hmai a insi deuhthaw ang a, ani a rawn kùn hniam phei chuan kan hmai mai ni lovin kan hmui pawh... en chhoh tawh chi hauh loh, ka hmui a la virgin zui. Bâkah, Polite-i kha, a la awm ve reng tak ang.

Nam sawnin ka hawi sawn a," A na tawh lo, i kal sawn thei tawh ang," ka ti chhuak ta hliai a, ka che sawn zui nghâl bawk, amah phei chu ka en ngam tawh lo, ka thil tih tùr chu ka ti nghâl mawlh mawlh a, min en zui reng em tih pawh ka hre lo.

"Jakob??"

A lo la awm tak tak!! Tlêma tlêmah thil a buai țêp lo chauh a lo ni. Aw nëmin a rawn koh ták vàng nge, a che sawn ve ta chauh a, a kal sawn ta a ni tih a thãwm ațangin ka hria. Thaw huaiin, ka maimichhíng leh vang vang a, a bialnu awm lai rengin eng thil emaw kan ti țëp a nih kha, zahthlâk hian. Eng angin nge min ngaih ang? Kei hi ka dik lo, ani hi ka pu, min chhawrtu a ni a, hetiangte chu a fuh lo hrim hrim, hming chhiat a hnai mai dâwn asin.

Chumi nî ațang chuan a lak ațangin ka inthiar fihlïm ta deuh a, hmuh loh theih hrâm hrâm ka duh tawh a, ka hmuh chhunah pawh ka be hmasa ngai lo va, min biak pawhin thinrim awka chhuah hauh si lovin a rùl tâwk chauhin ka chhâng țhìn. Ani erawh chuan ka boruak danglam chu a hai der nge ni, hre àwmin a awm lo va, min biak zauh zauh lah a țhulh phah hek lo, a châng phei chuan ka bul chêtah min dek chuang lo hian a lo ding ve reng a, ka ei siam chu a lo en ve reng țhin, Polite-i awm lai pawhin min biak a țhulh lo va, ani bulah phei hi chuan zawhna chhàn loh theih loh hi min zâwt țhìn a, chhàn a ngai țhìn si, hrehawm ka ti thei a nia, ani awm lai khera chutia zawhna min zâwt tlat mai țhìn chu a ngaihna ka hre lo țhìn hle.

Mahse, ni tin a ina chetla ta chuan ka hmu lo thei lo va, biak loh theih lah a ni hek lo, bâkah, a chhawr ka ni bawk si a, min biak tlat chuan ka chhàn lêt ve a ngai bawk. Ni khat phei chu Arsa ka kan sawr sawr laiin min rawn bia a, a sawi ka hre thei lawk lo va. Ani lahin a sawi ring si lo, a vawi thumnaah pawh chuan a thil sawi chu ka la hre thiam chuang lo va," Han sawi leh lawk mai teh? Ka hre thei tlat lo," tiin, inthiam lo ru taka a lama beng dawh pah si, amah en pah tho chuan ka han záwt leh a, ani chuan,"I hmël ţhat thu ka sawi mai a nia!" a lo ti ta pek a nih chu! Ka sen nasa ngawt ang, ka hmai a sa pup pup thei hial a ni.

"Ka pu, chutiang--"

"I pu ka ni teivet lo!!" a lo ti nghut a, ka țawng tàwp chawt lo thei lo. Min en rùn a, kei erawh chuan ka mit ka lasawn deuh zàl zál a, chumi pah chuan ka hmui chu ka han pet leh a, hei hi laih châng leh tihngaihna ka hriat loh chânga ka tih dàn a ni.

"Min chhawrtu i nih chhûng chuan ka pu i ni lo thei nâng, 'Ka pu' ti bâkin koh ngaihna che ka hre lo," ka ti a, ka aw chu a pângngai thei ang ber tùrin ka thunun a, ani erawh chuan," Ni lo ve, nulain tlangvâl a 'pu' thu a awm lo, ka hming chu 'Jakob' a ni, chutianga min koh duh loh pawhin 'Darling' tiin min ko thei ang," a lo ti thung a, zah nâk laiin chutia min han fiam leh kher chu ka ngei tak tak! Ngam ila chuan ka melh rum ngawt ang maw le. 

La naupangin eng ni lo mah ila a ina chhawr ka nih vàng maia min ngam viau chu ka duh bîk lo va, min zah chu ka phút hauh lo, khawi lamah a ni ringawt; mahse, fiam mai mai leh a ngam tak nih erawh ka tum lo bur. Mihring mihrinnaah ani hi ka zah tùr, kei aia u daih niin ka pa rual êm chu ni kher mah suh se ka zah tùr a ni tih ka hria; mahse, mi tin hian mihring kan nihnaah hian inzah tawn tùr kan ni a, ani pawhin a anpui mihring ka nihnaah min zah ve tùrah ka ngai tho, eng emaw chânga frank taka min fiam zauh zauh chu nuam ka ti hran lo, nula ka nih avànga min fiamnaah ngai tho mah ila amah hmuh pawh ka hreh zo vek tawh.

Inrinni vawi khat leh pawh inah a awm lo emaw ka ti a, chaw ei khama a quarter tifel tùra ka phei chuan a room chhûngah chuan țhuin eng emaw hi a lo ziak mawlh mawlh a, kei lah chuan a awm ring hek lo le, ka zâi lút rût rût mai si a, ka han hmu thut mai chu ka tàwp chiang teh asin!

"I zai thiam lo si, lunglèn i hnawt țiau!" Room ațanga chhuah leh nghâl mai ka nâp hial a; mahse, 'êm a' tiin ka insehruh a," Mi an zài hian an zai thiam vàng kherin an zâi vek bîk lo, an zâi chuan an zâi ve duh tihna a ni mai, zâi turin zalènna an nei vek bawk," ka ti ve ta hmiah a, zai thiam lo min ti hi chu ka pawm thlap; mahse, min lo khak ziah hi chu ka ngei ve deuh tlat.

"Kha, i zài vàng chiahin ka ziah sual phah," a rawn tih leh nghut chuan min fiam pah deuh tih hre tho mah ila," Ka zài vàng ni lovin i ziah sual vàng hrim hrim a nih chu," ka ti ve leh a, a nui ta hawk a.

"Min ngam sâwt hlê mai a..."

Ka chhâng lêt ta lo. Ni e, ka chhâng lêt ve zêl kha a nia, ani tân pawh amah ngam ta viaua min ngai ta chu a àwm lo miah lo, hetianga chhâng lêt vak tùr hi chu ka ni lo asin.

"Ka tih palh, ka pu--" Ka sawi sual ka hriat avàng chuan ka tàwp nghâl chãwih a, a thin a rim leh ngei dâwn chiang. Ka rin ang ngeiin rawn ding chhuakin min rawn melh nghâl rùn a," I pu ka ni lo tih hi vawi eng zât nge ka hrilh che i ngaih dâwn?" a rawn ti thûm chhur a, kei chuan," Ka pu ti lo chuan koh mai dàn tùr che ka hre lo a ni, bâkah, ka pu i ni alawm," ka la ti ve fan a.

"Nang kher phei hi chuan min koh naah 'pu' tih telh tawh hauh suh ang che, 'Jakob' tia min koh hreh chuan Carolene-i min koh dàn angin 'J-a' min ti mai rawh, a nih loh pawhin ka sawi tawh kha, 'Darling' tih emaw 'Honey' tih emaw pawhin min ko thei ang," a ti leh a, a tàwp lam chu a fiamthu a ni tih hre mah ila ka ngei țhelh tho, ka ko lo tawp bawk ang. A bialnu niin ka bialpa chu ni se chuan, emaw a nupui niin ka pasal ni se chuan emaw ka ko mahna le; mahse, chu kher zawng, a hnai lo lutuk!

"Mahse, min chhawrtu i ni sia, chutianga--" ka sawi zawh hma chuan lo inrawlh lehin," Chuti, ka hnuaia chhawr lo chein ka bialnu ni mai rawh?" a rawn ti chhuak ta! Phâwk zetin ka en a. A inkuangkuah thûn a, a dawhkàn chu țhut deuh pah hian a ke chu a khawkherh  a, kan inen dùn ràn mai, ani'n nuihza mitmengin min en a, kei erawh chuan râpthlâk ti melhin ka melh thung.

"A va râpthlâk êm!!" ka ti ta nge nge a, bialnu a nei reng a, kei lah a hnuaia a in enkawl tùr leh ei siam tùra a chhawr ka ni, engtin nge bialnu a neih lai reng lehnghâlin... ngaihtuah pawh ka ngaihtuah chhunzawm duh lo, fiamthu mah ni se a ti mah mah chu a ni.

"A phùrawm zâwk alawm," a lo ti leh mai a, ani chuan phùrawm a ti a nih chu! Râpthlâk hian a. Hetiang zâwnga a fiam mai mai tùr pawh hi niin ka inhre lo, lêrh vak lo kha emaw ka ti a, a lo lêrh tak zet a nih dâwn hi.

"Hetiang lam hi chu fiamthu pawhin i sawi chhuah tawh loh hrâm ka beisei," ti sapin ka inher a, a room ațang chuan ka chhuak a, room dang ka pan ta daih. Room dang tifel ila, a awm loh hnuah a room chu tifel mai ang, a awm ta reng a nih leh ka tihfelsak lo tawp ang.

Ka thin phut nasatzia leh ka tha khurh nasatzia chu khuma ka țhut chuan ka hre chhuak chiah. A thil sawi khân min țhâwng a, a fiamthu veah ngaihsak phêt ka tum pawhin ka thinphu leh thâ chuan thu dik nge fiamthu tih an lo thliar hrang thiam ve tawh si lo, ka âwm chu ka dawm vang vang a, ka thaw hawk hawk a, a hnuah chuan tlëmin ka zia ta.

Ka thin a tirim pawh a ni chuang lo, khatianga fiamthua min fiam ngam kha keima thiam loh zâwk a ni ngei mai, kei hian chhe lo ka ti a, pathlawi mah ni se chhe lo ka tiin ka khawngaih a, ka mitmeng leh chezia ațangin ani, pathlawi lungfing tawh chuan a lo man thiam vek ngei ang chu, chhe mawlh hek lo le, Choak pawh kha ka hre chhuak ngai tawh lo a nia. Ka thin tiphu dawt dawttu ka tawn vawi khatna pawh a ni hial ang chu! Mahse, Boss leh a chhiahhlawh mai chu, a lutuk mah mah deuh.

Mahse, amah chuan eng mah a thawk ve lo a ni ang, a boruak a ngai reng a, a awm dàn a danglam ve eih lo. Mami lah chuan ka boruak tawn hre ve hauh lo chuan Adonis-a nèn an chanchin min rawn hrilh sârh sârh reng a, a chângin a unaupa J-a chanchin min rawn zâwt a, Polite-i nèn an la inzui reng em tih nèn lam chuan min rawn zâwt a.

"Hmeichhia a ngaihsak loh tehlul nèn, Makimi maw kha a hming kha, ani khân engtin nge a lo dàwi ni, ka hlim phah asin, inkawp zêl tùrin ka duh a, ka beisei a, hlimna tak tak chhar thar leh se tih hi ka duh dàn a ni, nang pawhin țan lo lâkpui sauh sauh rawh aw,"a rawn ti bawrh bawrh a, kei chuan," Ni e, a theihnaah chuan le; mahse, keia lo inrawlhna chi pawh a ni meuh dâwn em ni? An hlim dùn a,  ka lo țanpui lah an duh loh dâwn bâkah min mamawh hauh lo bawk ang," ka ti ve thung a.

"Ni lo ve, nang tluka țangkai tùr an awm lo, an awm dun huna an rilru kuai danglam thei tùra room vêl i han buatsaihte pawh kha a țha a, an awm dun tam poh leh an induhna a zual bâkah an an inthlahlel dâwn asin, chuan, a tàwp chu inneih dâr ri mawi hriat a ni tawh mai," nui har har chung hian a rawn ti leh a, kei erawh chuan," Chutiang lam te zawng ka zei loh lam tak a nih chu, ka chikat hlauh. Ka thiam ve chu room tihfel tawp leh ei siam tawp a ni mai a, an rilru kuai danglam thei tùra room vêl buatsaih i tih chu ka hre thiam lo, bangah nula tlangvâl infâwp lai thlalâk leh awm dùn lai ka târ chuai dâwn tihna em ni ang?" tiin ka zâwt ve thung a, a rawn nui nasa ta mai.

"Kha lam kha chu duh tâwk mai ang. Zei lo ve bawk si, Nunhlima leh Josh-a bulah hian engtin nge maw i awm țhin le? Zei lo an ti àwm che êm mai, ka khawngaih dùn zâwk!" tiin a nui leh uar uar a, a pawi lo, ka bialpate an ni chuang hleinem, a duh tâwkin nui mai mai teh se, pu ber leh Polite-i an rilru kawih danglamna tùra room vêl buatsaih ka thiam chuang lo, bâkah, mahni thuin in tihfel bâk, thil dang eng mah ka khawih ngam lo, ka khawih sawn ngam teuh lo bawk!

Pathiannîah Nunhlima nèn kan inzui min lo hmu pek a ni chêk ang chu, a tûkah chuan," Kha pa bulah khân i hlimin i nui hawk hawk thei a, ka bulah hian engati nge i inlâk thutak chiam bîk a?" a lo ti sup sup a, kei chuan ka chhâng lëm lo, ka tih ngai chu ka ti mawlh mawlh a. A hnuah erawh chuan," Mi fel tak a ni a, fiamthu a duh bawk a," tiin ka chhâng a.

"Ka ring, i mitmengah a lang vek alawm; mahse, ngaihzâwng enin i en lo tih hi engtin nge a hriat loh zâwk le?"

Min chhaih thinrim a tum nge ka hre thiam chiah lo, engtin nge chu chu a lo hriat vek ni? Ni e, a sawi dik phian, ngaihzâwng en chuan ka en lêm lo. Chutiang chu ni mah se, Nunhlima hi ka ngaina a, a bula awm a nuam a, ka inpeih hun kan nghâk mêk bawk a ni.

"Kan hma lam hun kan hre hauh lo, ka la inpeih lo pawh a ni mahna!" Ka sawi zo chu ka inchhìr zat, ka inpuang vek alawm le, kha thil kha sawi lan kher a ngai lo asin.

Zotei chuan inkhâwm tùrin a sâwm hlawhtling miah lo. Chhuanlam eng eng emaw a siam a, bâkah, dáwt pawh a ni hran lo bawk, hna a ngah a, in lama tihfel tùr a hàwn nual țhìn a, a châng chuan ka khawngaih ve hial țhìn. Hun ãwl a ngah bîk lo va, chhùn lamah hian office ngawr ngawr ni lovah pawh a chhuak fo ngeiin ka ring a, in lama hna thawh tùr rawn hawn zêl chu hahdamna hun a nei lo ka ti a, a ti mah mah ka lo ti țhìn.

Tlai khat chu ruah a sûr deuh bur bur a, Jivan-a'n a țhianpa putara a thlah a, ruah a sùr nasat deuh avàng chuan ani pawh a dang ve leh ta si a, min rawn be nghe nghe. Keimahin ka awm a, ei siam a ngai si, Zotei pawh ka ngaihtuah hle a, a lo hlauh ka ring a ni; mahse, a dáwih hran lo va, kei aiin a huai tih chu hre tho mah ila nau zâwk a lo nihnaah ka ngaihtuah lo thei lo a ni.

Ruah sùr ringawt a ni chiah lo va, khawpui a ri leh rum rum țhìn a, kâwl a phe zawr zawr bawk. Káwl a phêt châng chuan a phe chiah tihah ka beng ka hup nghâl țhìn a, ka hlau ru viau mai. Jivan-a tal awm se ka ti, ka thla a muang deuh mahna.

Kâwl phe zawr zawr kâra ka hawi kual chuan chiang takin Jakob-a ka hmu ta, a rawn haw chiah a ni ngei ang chu, kawngkapui ka kalh vek a, khùr deuh dar darin a rawn luhna tùr chu ka hawnsak vat a, huh phunga a rawn lút ka hmuh chuan ka thla a muang sawt mai, awmpui ka nei tawh a, mahni ngawt ai chuan tawrh a hlauhawm tawh loh.

A chung bera a hâk jacket chu a hlîp a, tui dehnaah chuan rem takin a han khai a, ka hlauh avàng chuan gas pawh ka herh sáng lutuk lo va. Chawhmeh kan a hmin tawh leh hmin tawh loh ka en lai chuan țêk ring zetin a rawn tla a, ka phu nasa lutuk a, kanbêl chhinna ka ken lai pawh chu ka thlauh chiang ngei mai! Ka la țê țhawt zui.

Engtik laiin nge min rawn hnaih pawh ka hre lo, a taksa si chét chuan min kuah a, kei pawhin ka lo kuah lêt vat a, ka khùr nasa viau a ni ang, ka khabe chu a inkhâwng dat dat a, nghet zetin ka kuah tlat bawk.

"Țêk mai mai, engtin mah a tina dáwn lo che, i bulah ka awm tawh alawm," ka beng bulah chuan a ti sup sup a, ruah a sûr bengchheng viau nain ka hre thei tho. Ni e, a bulah ka awm tawh a, min tinâ emaw tina lo emaw țêk hi chu a hlauhawm ve êm mai a, hriat nuam ka ti lo.

Mahse, țêk chu a lungawi har deuh a, a êng leh zawk zawk țhìn, current phei chu a thimna a rei tawh a, inverter ka ti êng ve nain chu pawh chu ka hlau tho, țêk chuan a rawn den ka hlau a ni.

"Rêngpui.."

Chhâng lovin ka kuah nghet leh sauh thung a, țêk a rawn tla leh chiah phei chu ka țap lo chauh hi a ni tawh mai, ka chhípah a khabe nghatin min pawm bet reng a, ka hnung erawh min hnem tumin a chûl ka ti mai, min kuah reng chung chuan a chûl hliau hliau pah reng a.

"Țêk tla hi ka tân chuan vànneihna a ni hawt e."

A fiamthu pawh chu ka ngai haw tawh lo, a ângchhûng nuam taka thlamuang taka awm chu ka duh ber,  min muan hlê mai si a.

"Tlai tin hetiang hian hun hmang thei ila..."

Țêk tla chu a zia ta deuh a, ruah erawh a la baw tlãwrh tlãwrh thung. Ka hlauhna a kiang ta deuh bawk a, kan inkuah chial mai chu a rûk tak chuan nuam ti viau mah ila tàwpsan a hun tih ka hria, ka kuahna chu ka han phelh a; ani erawh chuan min la kuah reng tho.

"Rêngpui--"

"Ka hlau tawh lo ve," ka ti vat a, ka hlauhna a lo kiang ta deuh bawk nèn, min kuahna hi a thlah thuai loh chuan thil eng emaw a thleng thei tlat.

"Rêngpui, min en phawt teh."

Min thlah ve tâk avàng chuan ngaihtuah lo fahran chuan ka en chho ve mai a, kan inmelh ràn mai, kha ka sawi tawh kha, thil eng emaw a thleng thei ka tih kha, a thleng dâwn chiang mai; mahse, ka che sawn thei lo, a mitmeng nalh zet chuan min aikaih tlat.

Min rawn hnaih leh ta sauh a, a kut oahnih chuan ka bek tawn tawnah chuan a rawn vuan zui bawk, dang tùrin ka che sawn thei lo va, hmun dang ka en sawn thei lo bawk, min aikaih tlat a ni ber mai.

"I hmêl a țha."

Ruah sûr bur bur kârah pawh chuan a phun sup ri chu ka hre tho, a rawn kûn hniam zui zat bawk. A tih tùr chu ka hre thiam ve reng a; mahse, ka che sawn thei lo ka tih tawh kha, ka lo maimichhîng a, ka lo dawh tawp.

"Rêngpui?"

Ka meng chhuak leh vat a, a rawn kûn hniam leh zat. Kan hmui chu a inbawh thuah zui ta chat a, chumi rual chiah chuan a taksa thlâwp zatin a lamah min pawt bawk. He khawvêla thil ri zawng zawng hi a reh țhup ni betin ka hria, ruah súr rî pawh ka hre tawh lo va, kan lungphu inchhàwn dup dup rî chauh chu ka hriain ka hria! Vawilehkhatah ruah a hàn thut a, khawvêl hun pawh a chàwl țhup a nih ber chu.

Mipain min la fâwp ngai si lo, kei lahin ka la fâwp bîk bawk si lo, tihngaihna ka hre hauh lo a nia; mahse, mak deuh mai chu, min han fâwp a, a tih ang chuan ka lo ti ve nghâl zêl thei mai nia! Ka lo dawh tawp bîk teuh lo, a chêt rual chuan ka lo che rem thei ve zél mai.

Ka thluak a buai miah lo, a fîm kar a; mahse, nawmna avàngin ka vài lek lek thung, hetiang hian infawh hi a lo nuam ang tih ka lo la ring chhin ngai hauh lo!

*KAN THUNUN LEH THEIH BÂKA NGAIHTUAHNA SÈN VAK VAK HI THIL ȚHA A NI LO, THIL THLENG TÙR CHU A RAWN THLENG MAI A, LO DAWNSAWN THIAM DÀN KHA A PAWIMAWH LAI TAK CHU A NI*