☆MIN EN LA☆ - 2 By Dingdi Pachuau

 ☆MIN EN LA☆ - 2 By Dingdi Pachuau

Tûn țum chu day-off ka nei ve thei tawh dâwn e. Ka kal dâwn chuan Mami chuan," Min kalsan leh daih dâwn sia, ka kal ve leh châk reuh mai mai e a!" a ti a, kei chuan," Lo kal ve la, kal dùn ila?" ka lo ti zat a, ani erawh chuan," Ngawi teh, ka hlâwkpui ve lo êm mai a, ka tân chuan awmzia a awm lo êm a ni, ka pain ka nu pui tùrin min tia, ka u lahin eng eng emaw training turin min ti bawk a, ka indaih lo nasa!" tiin a han thaw hak a, ka kutah chelhin," Tluang deuhin i han thleng chho ang a, țha takin i han thawk leh ang a, dam chuan hun hi a kal chak a nia, i lo haw veleh ka lo hmuak leh ang che," a ti leh a, kan nunphung leh khawsak inang lo viau mah se Mami hi chu ka ngaina ve tlat, amah pawh hian min ngaina der ve bawk a, min ngaihtuahin min duhsak êm êm bawk.

Aizawlah ringawt pawh hian Singapore leh Macau lama Housemaid ni tura buaipuitu Agency an awm ve nual a, chutiangin Lunglei lamah pawh. Kan khuaa mi kal ve tùr chu khawi emaw ber Agency kal tlang hian a nih ve ngei ka ring, han inhre pawh ve hlauh ila, mahni khua ațanga kalpui neih chu a nuam dâwn êm asin; mahse, ka han zawh chian ve pawhin ka nu chuan a hre chhuak thei tlat lo, ka patea nupui Pite Nuni sawi a lo hre ve mai a ni si a, ka zâwt zawm zêl duh ta lo va.

Tûn țum chu German nupa inah ka awm ve ta thung, a hmaa ka awmnate kha chuan min la duh ve tho nain kan khuaa ka haw dâwn khân ka kal leh ngei ang tih ka hre chiang thei si lo va, ka haw rualin mi dang an la nghâl nghe nghe a nih kha. Tûn țum chu ui enkawl tùr ka nei tel a, Siberian Huskey niin a hmêl țhain a lian ve tawh khawp mai a, kan pahnihin nilêngin kan inawm ţhin. Nupa rek chauh niin inah an awm tam mang si lo va, zin an peih bawk si. Jet-a nèn nilêng lênga inawm ta chu, kan innêlin kan inngai a, ţhian kawm tùr leh biak tùr ka nei bawk si lo nèn, ka kalna hmun apiangah min zui tih theih a ni. Day-off ka neih nî erawh chuan ka piin inah a lo awm ve mai a, ka haw veleh Jet-a chuan min rawn panin min lo ngai tawh tih hriat tak hian min lo làwm a, ka tân pawh ngainat loh theih a ni lo.

In tihfel tùr a zau lutuk lo va, rawngbàwl a ngai lo va, thuamhnaw sûk, in tihfai leh Jet-a enkawl chu ka hna a ni mai. Tlai lamah hian Jet-a chu kan in piah deuh hleka park-ah chuan ka chhuahpui țhìn a, nuam a tiin kan haw dáwn hi chuan a huphurh ve țhin nge ni, ka kaih pawh hian a kal țha duh lo ve ngei zêl; mahse, engtin tin emaw kan inthlêm a, ka hawpui ve leh thei zêl mai bawk a.

Mami sawi ang takin dam chuan hun chu a kal ve duak duak a, kum chanve chuang ka thawk ve leh ta, ka chhûngte pawh thla tinin pawisa ka thawn zat zat thei a, keiin hmanna tùr ka nei si lo, thuamhnaw ni se ka piin a zin chhuah apiangin min rawn hawnsak ve a, a thuamhnaw hlui pawh min pe tam, incheina thuamhnaw a duh maksak thei viau erawh a buaithlâk, Mizoramah phei chuan ka ha ngam miah lo ang; mahse, min pe miau a, hlim takin làwmthu ka hrilh a, ka dah țha zêl tho. 

Thuamhnaw ka su zo a, Jet-a bualna tùr ka buatsaih hma chuan ka nu ka phone mai mai a, Inrinni a ni a, ina a awm ka ring deuh bawk a, a lo awm ngei bawk. Kan inbiak lai chuan Jet-a chuan min rawn nûl thuak thuak a, ka han bia a, a awm țha ve leh mai bawk a. Ka nu țawng lai mêk chuan Mâma aw chuan," Au Rengpuii chu, i hna thawh kha i thawk hlâwk lo bîk e! U Sângpuii kal ve kha chu, a hlawh ațangin bike an lei tawh a, in pawh sak țhat an tum leh mêk tawh bawk asin, a chhûngte pawisa a rawn thawn țeuh zêl an ti," a rawn ti vau vau a.

"Nu, Sângpuii chu kan biak in bula mi kha em ni?" tia ka zawh chuan ani chuan," Aw, ni e, Pu Chhûnga fanu kha. U Kimi fanu Zuii pawh kha a kal ve a ni awm e, in inhmu lo em ni?" a rawn ti zat a, kei chuan," La inhmu miah lo; mahse, Mizo pawh hi kan tam ve êm tawh mai a, kan off nî a inan loh phei chuan inhmuh a harsa ve a, kan off nî a inang lo a ni ang," ka ti a. Mâma chuan," U Sângpuii anga hlâwk chuan thawh tum ve la," a rawn ti leh a, ka nuin a han khap deuh zauh rî ka hriat chuan ka nui hak a," Eng hna nge a thawh bîk le aw? Sum tam tâwk thawh chhuah theihna thurûk chu hriat ve a va châkawm ve le! Bike ka han lei ve che ang a, Zotei leh Mercy i han phur kual vêl ang a... A, a ţha lo ang, lehkha zir nachâng i hre lo palh ang, țha deuh khân lo zir phawt mai teh," ka ti ve leh a.

Jet-a bual pah chuan Sângpuii leh Zuii chu ka ngaihtuah a, khawiah nge an awm ve ang le? Anni kha min sawi peih ve deuhtute kha an ni sia, an rawn kal ve duh pawh ka ring lo asin le.  Bâkah, annite chu an khawsak a harsa lutuk lo va, an chhûngte'n sawrkâr hna thawk bîk lo mah se an khawsak a harsa lo; mahse, an kut ngeia sum thawh chhuah ve an duh a ni ngei ang.

Chhûngte nèna inbe pawp reng niin social media lamah Mizoram lam chanchin kan hre reng thei bawk a, mite tân thil țha tih ve tumin țanpui ngai kan ngaihven a, sum tam takin țanpui thei lo mah ila tlêm tê têa kan thawh khâwm pawhin a lo tling khâwm ve ang a, hetah lah Mizo awm kan tam ve tawh tho si a tiin kan inrawt phûr a, mi dang dang pawh an lo phûr khawp mai, kan ţhian dangte, hnam dang pawh kan thil tih tùr chu kan hrilh fiah a, anni pawhin tlëm tê chu an lo ui bîk lo, kan han thawh khâwm tliar tliar a, a vaiin India tangka chuan Rs 35620 a lo tling ve thei ta mai, kan hlimzia mai chu, làwmthu sawiin Pathian hnënah kan ţawngțai a. Mizoram lama mi țanpui lama thawk țhìn hotute biain țanpui kan duh chhûngkua chu kan hrilh a, pawisa pawh chu kan thawn nghâl bawk a. Singapore ka awm chhûng ngeia chutiang ka ti thei leh ka thawh chhuah ațang ngeia mi țanpui thei dinhmuna ka ding chu ka hlim tak zet a ni.

Mâma chuan Jet-a chu a awt khawp mai a, ani hi a la mãwl ve a," U, rawn hàwn daih la, a nih loh pawhin i pi leh pu chu neihah dîl daih la," a rawn ti! Ka nui hak a, tlangvâl ve ûr tawh si, a thil ngaihtuah tlèmzia chu ka ngaihtuah a,  keini chhûngte zawngin kan chãwm zo teuh dâwn si lo. Enkawl tak tak a ngai ve bawk a, a ei tùr leh a damdawi, a sahbawn leh a thuamhnawte, a, a tam lutuk! Kan vulh chi a ni lo ve.

Pite Nuni a lo lèn lai tak a ni ang chu," Rêngpui, Sângpuiite nèn chuan in inhmu tawh em?" a rawn ti làng láng a, kei chuan," La hmu lo, kan off hun a inang lo a nih ka ring," tiin ka chhâng a, Pite Nuni min chhàn hma chuan Mâma chuan," U, anni chuan Scooty thar an lei leh tawh!" a rawn ti leh a, Pite Nuni chuan," An che thei riau! An sawi dàn chuan thla khatah hian nuai khat deuhthaw an rawn thawn thei ni àwm tak a ni, in thawh a inang lo em ni? Singapore-ah tho khân an kal ve bawk sia," a rawn ti leh a.

"An hre sual a ni ang, hetah hi chuan kan thawh ang hi chu a hlawh tam ber pawhin sîng thum a hlawh tling țâwk maithei tih a nia, hna dang an thawk a ni mai ang em?" ka tih chuan ani chuan," Ngawi rawh, ka lo zâwt leh chhin ang, ka ãwih vak lo rêng a ni; mahse, an che nuam tlat bawk sia, thil thar hi an nei reng mai a ni," a rawn ti leh a.

Sângpuii leh Zuii chanchiñ chu ka țhiante pawhin an lo hre miah lo, mak ka ti khawp mai a, hetah hian an kal ve ngei a nih chuan tu emaw takin hre tùrah chuan ka ngai asin, kum khat dâwn kan awm ta a, anni pahnih hmêl leh chanchin hria àwm tu mah an awm hauh si lo.

Ni khat chu Zâmi chuan," Englo, i sawi ve ziah Sângpuii i tihte kha, heta an rawn thlen tirha rai an tihte kha em ni le? Rai sa, thawn haw kha chu an awm ngei mai a; mahse, mi pahnih kha i sawi bawk sia, pakhat kha chu thawn haw chu an nei ngei mai a," a han ti a, kei chuan," A va mak àwm ve! A ni lo ang, anni chu an nih ka ring lo," ka lo ti vat a, Sângpuii phei chu țhalaiah pawh a inhmang chho ve riau a, Zuii pawh a inhmang chho hma a, ex-committee member pawh a ni tawh hial nghe nghe bawk, anni chu an ni thei lo ang.

"Nia tiraw? I sawi tâkah chuan ka hre chhuak leh deuh. Kan țhian hnam dangte'n an sawi sep sep ka hre tak! Mizo tiin an hre lo va, 'One Indian girl' an ti nghe nghe, a hmêl phei chu ka hmu lo va, sawi erawh chu an sawi ngei," Thangtei pawh chuan a lo ti ve a, kei erawh chu ka ngawi vang vang thung.

Pite Nuni chuan a rawn intihre chiang ta ngang mai. Ka nu ka biak laiin min rawn bia a," Singapore-ah khân an awm ve lo an tia, Delhi lamah an awm niin an sawi, Hotel lian taka thawk angin an sawi bawk.  Rêngpui, khalaia mi hnuaia hrehawm taka thawh ai chuan anmahni ang chuan hotel-ah thawhna zawng ve daih la, anni chu an chhûngte'n 'Chumi khami zât chu rawn thawn teh' an tih chuan an rawn thawn zat zat thei asin, a hlâwk viau a ni ngei ang," a rawn ti a. 

"A va țha àwm tak ve!" ka ti ringawt a, sawi thui tùr ka hre rih lo. Ani chuan," Țha a niang, hei kum khat êm pawh an la thawk lo a nia, chuti chung chuan thil thar an lei țawk țawk thei a, han thawk rei deuh phei se chuan concrete building pawh awlsam têin an sa thei mai ang," a rawn ti leh làng láng a, a țawng chu Mâma'n a lo hre pek a ni ngei ang," Sak an tum hnai alawm, rod pawh an lei khâwl leh țeuh tawh!  An hlawh a țha bîk ngawt mai, an naute thuamhnawte saw a changkãng tawh hlawm a nia aw..." a ti vang vang rî chu ka hre thei a.

Delhi lama an awm daih chuan Zâmi leh Thangtei sawi kha a dik tihna em ni ang? Rai ang khân an sawi bawk sia, rai chung chuan mi hnuaiah an inhlawh thei dâwn em ni?

"Singapore-ah hian an kal ve ni khán sawi a awm bawk sia, engtik laiin nge an haw daih ang le? Tu mah lahin an chanchin leh an hmêl an hre si lo va, Mizoho chu kan inhre ve țhûm hlawm a nia, Delhi lama an awm daih vàng chu a ni ngei ang kan hmuh ngai loh ni," ka ti a, Pite Nuni chuan," Mi sawi rûk dàn chuan Spa lamah an thawk an ti. Hlawh tam viau tùr leh hotel lian meuha thawk tùr chuan an thiamnain a tlin bîk lo tawp ang, a țhente phei chuan an inzuar a niang te an ti," a rawn ti leh a, ka nu chu rawn inrawlh ta vatin," A, mi sawi zawng zawng hi a dik bík chuang lo a nia, hre chiang lo hian an rinthu hi an sawi ta vak țhìn a, chu chu sawi chhãwngtuin a lo thutak sawi leh țhìn si a, rinthu mai kha thutak angah a lo chhuak mai țhìn, ãwih chin hi neih tùr," a lo ti ve a, chutiang lam chu kan sawi thui ta lo.

Ka pu hringtupa Germany-a a boral avàng chuan ka pi nèn chuan thlâwk thla nghâlin  min zinsan leh ta a, Jet-a nèn chauh kan awm leh ta. Ka chhûngte nèn chuan kan in-video call a, in chhûngte chu ka hmuhtîr bâkah pâwn lam pawh chu ka hmuhtîr ve bawk a, Mercy chuan," A nuam ngawt ang, ka kal ve châk e!" a rawn ti a, Zotei chuan," Nangmah chauhin i awm sia, i hlau lo em ni?" a rawn ti thung a, kei chuan," Jet-a nèn kan awm alawm, bâkah, helai chu a hlauhawm loh, security hi a țha a maw, hlauh tùr a awm lo," ka ti a.

"A nuam dâwn e, i kal leh hunah min hruai ve tawh rawh aw, Jet-a pawh kha ka kuah ve châk a," Mercy'n a tih leh chuan ka nui hak hak a, Jet-a kuah pah chuan," Au Mercy'n a kuah ve châk che a nih chu," tiin ka han bia a, ani pawh chuan bauh țhat țhat pah chuan a mei chu a'n vai thar thar a, a hmui chuan min nûl thuak thuak bawk a.

A hrisêl țha viau emaw ka tih laiin ka pite rawn haw ațanga rei vak lo hnuah chuan Jet-a chu a rawn nguai chho a, a khua a rawn sik a, a awm dàn chu ka hre thiam lo kher mai. Ka pu nèn chuan kan entîr a, a kawchhûng lamah dik lo a lo awm niin, zai loha enkawl dam theih a ni dâwn si lo va, zai lahin a tlin kher ang em, a dampui zo kher lo maithei tih a ni bawk si, Jet-a chu ka han en țhìn a, kan inkàwm ngeih si a, ka khawngaihin ka mittui a tling puau reng a, a tân tih theih neih ka châk kher mai.

Ka piin zai loh a duh laiin ka puin zai a duh a, ka pi chuan," A dam chhuahna chance a chhe êm mai, mihring pawh kan rawih tial tial țhìn a, ani pawh hi zai kher lo hian damdawiin enkawl ila, a tawrh zawh loh hnuah kal zâwk ta mai se," a ti a, ani pawh hian Jet-a nâ han tawrhtîr chu a khawngaih ve tih ka hria; mahse, ka pu chuan," A thihpui ngei ngei ang tih kan hre lo, bei nge sei rûndung an ti alawm, nâ tawrhtîr reng ai chuan beiseina nèn zai phawt ila, a dam leh dam loh chu Pathian thu thu a ni ang chu," a ti ve thung a.

Jet-a nawmsam loh ațang chuan kei pawh ka nunkhua a ngui a, ka hlim thei bîk lo, Mercy pawhin a lo hriat chuan a lo khawngaih hlê a," Ka țawngțainaah Jet-a tân liau liau damna ka lo dîl ang," a ti hial a, ani hi zawng naupang rilru thianghlim ngang hi a ni a, a ti leh ngei ang tih pawh ka hria a ni.

An zai ta ngei a; mahse, an zai laiin a thâwk chu a tàwp ta a ni, a dam chhuak zo ta lo. Chanchin ka hriat chuan ka țap chhuak lo thei lo, Jet-a nèn kan infiam tawh ngai lo tùr leh park-ah ka chhuahpui ngai tawh dâwn lo tih ka ngaihtuah a, ka khawngaih a, ka inkhawngaih bawk. A tel lo chuan khua a har hlê dâwn si a, min tihlimtu, ka țhian leh ka kawm ngeih êm êm a ni a, ka theihnghilh thei tawh kher lo ang.

Jet-a tel lo chuan a reh ruai a, in ka tifel in chhûnga ka kal kualte chu min zui kual zêltu awm leh dâwn tlata hriatna ka nei a, ka han hawi lêt leh ringawt țhìn; mahse, a reh vung vung a, Jet-a hmuh tùr rêng a awm lo, ka mittui a rawn hnai leh țhìn. Chutiang rêng rêng chuan thla khat chhûng zet chu hun ka hmang a, hlim tak leh tui tak pawhin hna ka thawk thei lo.

Ka pute Germany lama an insawn dâwn tâk avàng chuan kei pawh awmna sawn ka ngai dáwn ta; mahse, awmna tùr zawn kual leh ai chuan tiin haw ka tum ta zâwk a, ka nu pawhin a lo remti thlap a. Ka pute nupa chuan anmahni vàngin ka haw dâwn niin an ngai a, an inthiam lovin min khawngaih a, ka haw dâwn chuan pawisa min pêk belh bâkah kan chhûngkaw mamawh tùr eng eng emaw min hawntîr țeuh a, phurh man min chàwisak vek bawk a, ka lãwm teh asin. Ka pute hi Kristian țha tak angin lang lo mah se, Pathiannîah Mizorama Kristiante angin inkhãwm ve lo mah se an nunah hian Kristian țhate nun dàn tam tak ka hmu a ni, Pathian thu sawi ngai ve lêm lo mah se an nunah leh an thil tihah hian an rinna a lang ka ti mai, ka chunga an sual loh dàn ațang hian Pathian malsàwmna dawng tlâk an ni ka ti a, anni pawh hi ka theihnghilh tawh ngai lo ang. 

Singapore ka kal hmasak zâwk khán Kolkatta ațang khân Singapore kha kan direct lo va, Kuala Lumpur lamah kan thlâwk phawt a, chuta țang chuan Singapore kan thlâwk leh chauh kha a ni a, a vawi hnihnaah erawh kan direct ta a, tunah pawh hian direct lovin Kuala Lumpur International Airport-ah kan țum leh phawt a, ka kal leh ka rin tawh loh vàngin ka pute bulah khân ka dîl a, an tân lah chawi a lo tlêm zâwk bawk nèn, rem an lo ti nasa. Ka phone-in thla ka la kual a, video-in ka la bawk a, nakinah ka chhûngte hmuhtîr ka la duh ve dâwn si a.

Mami'n min lo hmuak leh a, ei tùr ka leisak chu ka pe a, in kan thlen hnuah erawh ka pi thuamhnaw min pêkte chu ka hmuhtîr a, a duh pathum vêl a la ve bawk. Ani hi chuan thuamhnaw tûnlai deuh tak a duh țhìn si a, ka pi min pêkho pawh chu a duh hlawm viau a; mahse, pathum bâk a la duh lo.

"Hna thawh tùr min lo ngaihvenpui reng tho la aw, thingtlâng ațang chuan ngaihtuah hi a har sia, kei ai chuan i hre thei záwk ang," ka tih chuan," Teh rêng mai, ka lo ngaihtuah dâwn nia, nang chu i taima a, thawh hreh i nei bawk si lo va, an duh hlawm ngawt ang che," a lo ti ve a.

Kan khuaah ka haw leh ta chu a ni a, ka rilru pawh a hahdam leh huai tawh e. Chhûngkaw mamawh ka hàwn nual si a, ka nu pawh a lãwm khawp mai, kan khua leh țhenawm hnaiah chuan min lawmpuitu ka neih rualin min îtsîktu pawh an lo awm leh tho nia! Mihring rilru hi chu a mak ve ngawt mai, a hahthlâk ka ti.

Mâma sawi ang chuan Sângpuii leh Zuiite chhûng chu an lo che nuam tawh khawp mai a, in an lo rel țan tawh bawk niin, concrete building lian zeta sak an tum tih a ruangam ațang chuan a hriat theih mai a, inkhâwmnaa an chhûngte incheina pawh a mawi hlawm khawp. Engtin nge sum chu an thawh chhuah bîk ang aw tih ka ngaihtuah ve ta hial a, sàwma pakhat ni se kan khuaah chuan a pe tam ber ber an ni phâk hial a, sawrkâr hna thawk ai pawhin an pe tam zâwk!! A, a țha vek mai, rinawm tak leh Pathian duh zâwnga an lâk luh phawt chuan.

Mâma'n IGNOU-ah B.A a lo ti ve a, Mercy leh Zotei erawh kan khuaah an la zir thei thung, Mâma college pángngaia regular class kal lova chutia a zir chu ka khawngaih viau a, ani erawh chuan," Ka nute ka kalsan daih chuan an khua a har ka hlau alawm, bâkah, ka pass țha ve tho ang, lungngai suh, hna thawh paha zir theih hi a țha, mipain in ka uap loh chuan a țha lo, nang i awm lo bawk si a," a ti ve tlat a, chutiang lama a rilru a lo puitling ve hret tih han hriat chu a nawm rualin ka lung a tichhe lek lek mai,  a duh ang tak pawhin college pângngaiah zirna a zawm thei lo chu a ni si a.

Ka puin," Bawihte, kal leh i tum em?" tia min zawh chuan ka tum tawh loh thu chuan ka chhâng a, ani chuan," Kan khuaah hian i awm reng tawh dâwn tihna a ni maw?" a ti leh a, kei chuan," Ka hre rih lo le, awm ngawt ngawt hi chu țha chu ka ti lêm lo va; mahse... Pathian thu thu ni teh se," ka ti ta ringawt a.

"U Sângpuiite thawhnaah kal ve la?" Mâma rawn lûtin a tih chuan ka pu chuan," Leh ngawt țhìn a.  An hna thawh tak pawh tu hriat va ni suh, bâkah, an chhúngte pawhin an sawi țha duh lo a nia, thil țha tak a ni lo a ni ang," a lo ti thung a. Ka nu chuan," Tihian, han awm ve rih se, nakinah thawh tùr remchâng a hmuh hunah a kal ve leh ang chu; mahse, ram dangah chuan ka remti tawh lo, inngaihtuah a na duh êm mai, damloh nikhuain a inngaihsak phâk bawk si loh a," a lo ti ve a.

Mami'n min rawn bia a," Rêngpui, hna thawh tùr chu ka hmuhsak che a, hlawh erawh a tam viau lo thung. Thla khatah Rs 8000 a ni dáwn a, i duh tho em? Dàwr nghah niin, dàwra riahchilh a ngai ang a, ei leh in erawh chawi a ngaih loh bâkah a hahthlâk hran loh ang," a rawn ti a, kei chuan," Min lo hmuhsak avàngin ka lãwm lutuk e, ka nute ka lo sawipui ve phawt ang aw, keimah mai chuan thu tlûkna ka siam thei mai lo va," tiin ka chhâng a.

Ka nu ka hrilh chuan," Ka hre thiam lo êm mai, hlawh lam chu thuhran, bâkah, Aizâwlah daih a ni bawk si a, thlaleh lehpek maiah i naute result a rawn chhuak ang a, zir zawm an duh ve ngei bawk ang a... Ka hre thiam mai rih lo," a ti a, a rilru a buai ve a ni ngei ang, a țawng buh ve nuai a, chiang fakin a sawi tlat lo.

Thu tlûkna mumal tak kan siam loh avàng chuan Mami chu ka ngaih dàn han hrilh pawh chu ka hreh hle a, phone ka tum lai tak chuan amah zâwkin min rawn be ta thung a, huphurh rilru tak chuan ka han chhâng a.

"Rêngpui, dàwr lam chungchâng kha chu dah țha teh ang. Thil dang daih, mi ina awm i hreh em? Awm tih lêmah rawng bàwlsak bâkah in tihfel chauh a ni mai, riahchilh pawh a ngai lo ang, tunah tak hian kan mamawh lutuk, Lunglei lamah a nia," a rawn tih chuan ka meng phãwk nasa mai! Aizâwla awm pawh ka nuin a remtih tawh loh laiin Lunglei lam daih phei chu...

"Teh daih chuan..!" ka ti ta ringawt a, ani chuan," Teh daih hran lêm em ni? Ka cousin Quarter-ah a nia, duh teh, remti hrâm teh! Ka rilru a tibuai lutuk tawh!" a rawn ti leh vat vat a, sawi zawm lehin," Hlawh pawh a sâng ang, an awmthei ve bawk a, sâng tùr a ni, duh rawh aw, nang chu i fel a, i awm theiin ka ring tlat a ni," a rawn ti leh nghâl a.

"Tunah tak hi chuan Aizawlah a awm rih a, kárleh lawk khian Lungleiah a phei tawh dãwn a... Remti mai teh, zawn tùr ka hre tawh lo a nia. Ka cousin chu a sual lo, hrehawm pawh i ti lo ang, hmuh pawh in inhmu ngai meuh lo ang," a rawn ti leh a.

"Aw... ka lo sawi chhin dâwn nia."

"Sawi chhin lovin sawi tak tak rawh, hlawh a țha ang a, a quarter bulah in i luah duh pawhin a thlàwnin i luah thei ang. E taka, i naute pawh kha i awmpui thei ngei ang, zirna an chhunzawm thei bawk dáwn asin, a țhadâwn lutuk! Chuan, remti hrâm rawh aw, nang bâk chu innghahna ka nei tawh si lo," a rawn ti leh bawrh bawrh a.

"I cousin chuan nupui a la nei nange?" tia ka zawh chuan," Pathlawi a nia," a rawn ti ta sap a, ka ner deuh sak.

"Ka sawi tawh chu, in inhmu ngai mang mang lo ang, rawng bàwlsak leh in tihfel a ni mai, vai awmpui pakhat chu a awm tho ang a; mahse, vai hi a ngaina tehchiam lo a," a rawn ti leh a, chutah sawi zawm lehin," Hlauthãwng duh suh, J-a chuan hmeichhia a ngaihsak hauh lo a nia, melh pawh a melh peih lo ang che," tiin a rawn nui zui hak a.

*HUAISEN TAKIN AWM RAWH, CHHÛNGRIL LAMAH I LO HLAU DEUH A NIH PAWHIN HLAU LO ANGIN AWM TLAT RAWH, CHU CHUAN NASA TAKIN A PUI NGEI ANG CHE*