☆MIN EN LA☆ - 3 By Dingdi Pachuau

 ☆MIN EN LA☆ - 3 By Dingdi Pachuau

Mami'n a rawn sawi hmanhmawh êm avàng chuan zanriah kan kíl laiin ka nute bulah chuan ka sawi chhin a, Mâma lo țawng hmasa berin," I peih dâwn em ni?" a lo ti vat a, ka nu chu a țawng ve lawk loh avàng chuan," A, peih loh chu awm hran lo ve; mahse, in rem tih leh tih loh lam kha a ni zâwk," ka ti ve thung a.

Ka nu chuan," Eng ang chhûngkua nge an nih a?" a rawn ti ta a, kei chuan," Ka hre chiang vak bík lo; mahse, mipa mahni chauha khawsa a nih duh hmèl, ka țhiannu ber khân chutiang chuan a sawi a, a duh hmanhmawh bawk sia," ka ti leh a, ka nu chuan," Chutiang bula khawsak te chu, a fuh lo tawp ang. I hre chiang bawk si lo, hriat chian loh mipa bula awm chu a fuh viau dáwn em ni aw?" a han ti vang vang phawt a, kei chuan," Mi dang awmpui chu a nei tho ni àwm a ni, riahchilh a ngai dáwn lo bawk a, a in bula quarter pawh a luah theih dâwn a ni àwm e," ka ti leh a. Mâma chuan," Chutiang a theih dâwn chuan a țha ngawt ang chu. Zotei pawhin sikul kal pahin a awmpui thei ang che a, a remchâng viau ang," a lo ti a, ka nu chuan," Mipa mahni chauha khawsa bula khawsak ve chu, a fuh meuh ang maw? Ka ring lo deuh a ni, i hriat ngai mî pawh a ni si lo," a lo ti ve leh thung a. Mâma vêk chuan,"Chutia tih ngawt, Singapore-ah pawh a hriat ngai miah loh bulah a han awm tho alawm le," a lo ti vat a, ka nu chuan," Ni ve tho mai, a, ka hre thiam lo, thu tlûkna han siam vat tùr chuan ka hre thiam mai rih lo tlat, an duh hmanhmawh viau bawk si a," a ti leh a.

Kei pawh, dik tak chuan Mizorama mi ina inhlawha awm chu ka peih lutuk bîk lo, dik tak chuan Singapore-ah kha chuan kan hlawh a sâng a, keini ang thoa housemaid ni ve tho hmun hrang hrang ațangin an rawn awm ve tho a, zah pawh a zahthlâk loh. Mizoramah hi chuan hlawh a tlèm bâkah khita kan hlawh ang êm êma sâng kha chu kan hlawh pha miah lo ang tih chu a rin theih ruak a, bâkah, mi min en dàn pawh a dang ngei ang, hriat thiam a har, Mami hnial ka hreh ve deuh bawk si, thu tih tlûk mai dàn tùr pawh ka hre bîk lo.

"Eirawng bàwl leh in tihfel chauh i tih tùr a niha in neitupa nèn in inhmuh zen zen lohte dâwn te chuan kei chuan țha ka ti, i peih phawt chuan, bâkah, hlawh a țhat tho bawk chuan," Mâma chuan a lo ti leh a, ka nu chuan," Mipa mahni chauha khawsa awmpui tak lai kha a ni ka duh loh lai ber chu, hlawh lam kha eng zât pawh lo ni se i tân a him loh hi ka hlauhthàwn ber chu a ni," ka nu chuan a ti leh ta nge nge a, ka nu hi hmeichhia a nia, a rilru tùr àwm ka hre thiam ve tho mai.

"Hmeichhe ngaihsak lo leh melh ngai lo niin Mami kha chuan a sawi a, kha lam kha chu ka lo hlauthãwng ve tehchiam lo va," ka lo ti ve thung a, ka nu chuan," Nangma thu tlûkna a pawimawh ta ber a nih chu, ţha i tih dàn dàn a ni mai, i thawk ta a nih leh rinawm takin i thawk ang a," a ti ve ta a, Mâma erawh chuan," U, hlawh zât tùr chu zâwt chiang phawt rawh, a zât pawh hriat loha thawh tum ringawt chu a fuh lo ang," a lo ti ve thung a.

Ka ngaihtuah ka ngaihtuah a, ka hlawh tùr chu sîng chuang a niha quarter ka luah theih bawka Zotei leh Mercy ka awmpui theih pah hlauh chuan a țha dâwn êm asin. Kan khua ai ngawt chuan khawpui lam zãwkah chuan zirna pawh a țha deuh nge nge dâwn a, ka hlawhin Zotei leh Mercy lehkha zir ka chãwm pah thei bawk ang a, a țha viau maithei a ni.

Lunglei lam direct nghâl mai lovin Aizâwl  lamah ka kal phawt a, chuta țang chuan Mami nèn Lungleiah chuan kan phei dùn ta a. A cousin J-a quarter hmunah chuan kan innghat phawt a, a hmun chu a lo nuam viau mai lehnghâl a, Mami chuan," A hrehawm viau dâwn loh hi maw?" a han ti a, kei chuan," Ka hre lo le," nui chung hian ka lo ti thung a. Quarter chhûng pawh chu a nuam viau mai, Jivan-a, vai pakhat lo awm sa chuan min en duh dùn khawp a, min hmu ngai si lo va, a àwm ve tho mai, Mami a tlângnêl bawrh bawrh bawk si a.

Ka luah theih tur nia sawi quarter ve thung erawh chu a zau phian mai, bungraw mamawh tùr tâwk leh furniture pawh a awm sa nual a, a țha khawp mai. Chhûngkaw pângngai ve tak pawhin luah ta se a nuam tâwk viau ang le. Kan han en kual vêl lai chuan Zotei leh Mercy ka mitthlaah ka hmu rauh rauh a, nuam an ti ngawt ang, kan pathum chuan kan leng viau dâwn si a, a fuh dâwn khawp e.

Mami chuan a cousin quarter-ah zàn khat min riahpui phawt a, thil tih dàn tùr min hrilh nual a, a țhen țhen chu Jivan-a pawh kan záwt pah bawk a, ani hi zawng ka tân hi chuan a fel ve ngawt mai. 

"J-a chu naktûkah a rawn phei ang a, naktûk tlai ațangin eirawng bàwl chu a ngai țan dâwn a nih ber chu, i in luah tùr chu naktûk zîngah kan tifai ang a, ka luah luhpui nghâl dâwn che nia. I in luahah chuan i riak lût zawk chauh dâwn a nih ber chu, hetah chaw i ei nghál thei zêl ang a, sum save a ni leh mai," a tih chuan," Ni lo ve, chutiang chu a fuh ber lo ang, eirawng bàwl zawh veleh haw ta zêl zãwk ila, office kal tùra a chhuah hnuah in tifel tùr chuan kal ve ta chauh thung ila a țha zâwk ang," ka ti ve thung a.

"I tih dàn dàn le. A hmêl hmuh i hreh vàngte hi a lo ni mai mai ang e, ka sawi tawh kha, melh pawh a melh peih lo ang che, a tân hi chuan hmeichhe pakhat chauh a piang a, hmeichhe dang rêng rêng hi chu eng atân mah a ti lo, hlauthãwng miah suh," a ti leh malh malh a, chutiang lam chu sawiin zàn rei tak kan meng a, a hnuah erawh chuan," Duh tâwk ang, naktûkah hna thawh tùr kan neih kha," a ti a, kan țawng zui ta lo va.

A tûkah chuan Jivan-a'n rawng a lo báwl a, keini pahnih chuan ka in luah tùr chu buaipuiin kan phiat fai a, chhuat pawh nâwt faiin bungbêl leh furniture zawng zawng kan hru fai a, cushion case leh parda pawh kan su nghâl vek. Jivan-a'n a lo tifai zauh zauh țhìn bawk a, tihfai harsa a awm hran lo.

Ka thuamhnawte ka dah fel hma chuan chaw ei tùrin kan phei leh phawt a, chaw ei kham hmun tihfel vek hnuah kan thil tih lai chu kan chhunzawm leh ta nghâl a. Bedding ka ken pawh chu kan phawrh darh a, ni sâah kan han pho rimtui leh rih a, ka thuamhnaw tam lo tê chu a dahnaah ka dah fel nghâl vek bawk a.

"A nuam reuh ngawt ang, i awm rei peih phei chuan hei ai hian i han tuai hnûm ang a, i chei nuam thei viau ang chu," a ti a, a han hawi kual vêl a, kei chuan," I lo zin zauh zauh bawk ang a," ka lo ti zauh a, ani chuan," Ni e, hun remchâng neih hunah ka lo zin phei ziah ang, i naute pawh chu awmpui ngei ngei rawh, a țha dáwn êm asin, school kal ve ve dâwn mah se an tân pawh  puitlin zirna a ni ve dâwn a," a ti leh duah a.

Hei hi heta awm ka hnial loh chhan a ni pakhat. Ka naute chãwm paha ka awmpui thei tùr leh an zirna an chhunzawm thei tùr hi, hei hi ka ngaihtuah vang vang hnua he thu tlûkna ka siam chhan a ni. Keimah ngawr ngawr hi chu ka inngaihtuah lêm lo, ka naute hian zirna țha deuh zâwkah zirna chhunzawm thei se tih hi ka duh ber chu a ni. Ka nu leh Mâma kan in lamah an lo țang bawk ang a, kan harsa bîk lo tawp ang.

Tlaiah eirawng ka bâwl a, Mami'n min lo pui ve bawk a. A țawng pah barh barh a," Hetah i awm ta daih sia, in khaw lamah lunglêng ru deuh deuh an awm ka ring deuh tlat," a han ti a, chhâng lovin ka nuih ringawt. Ka nu leh ka naute'n min ngai ang, chutiangin ka chhûngte dang pawhin min ngai tho ang, mipa lamah erawh chuan Mâma leh ka pu an ni deuh mai.

Ka in luaha kan haw hnuah Mami cousin J-a chu a rawn thleng a, Mami chu a rawn bia a, phei nghâlin kei erawh chu ka phei ve tawh lo. Jivan-a'n a buaipui thei vek tawh a, bâkah, Mami a awm ve tho bawk a, kei chuan tih tùr ka nei tawh lo va, phei vena chhan tùr ka nei tawh lo.

Mami rawn haw phei hma chuan ka nute biain ka video-call a, in chhûngte chu ka hmuhtîr a, Zotei a phûr kher mai," U, a nawm hmèl sia, ka rawn kal ve châk tawh!" a rawn ti chûl a, ka nuih a tiza angreng. Kan in lian fahran lo leh kan unau hmeichhe pathum room ințâwm, zau lo zet chu ka mitthlaa hmu rauh rauh pah chuan," I pass phawt chuan le, kàrlehah in result a chhuak dáwn a ni lo'm ni?" ka han ti a, ani chuan," Aw, chhuak dâwn. Ka pass loh pawhin rawn awmpui tùr chein ka rawn kal tho châk," a rawn ti leh a, Mercy chuan," Kei chu ka kal châk vak lo, Ânu a khua a lo har palh ang, kei pawhin ka ngai dâwn si a," a lo ti thung a. Ka nu erawh chuan min ngaihtuah tih hriat tak hian min rawn zilh malh malh a, fîmkhur viau tùr chuan min chah leh mawlh mawlh bawk a.

Ka nu hlauhthàwn hi ka hria alawm; mahse, Pathian zârah hetiang lam hi chu a thlen loh hrâm ka beisei. Kei chuan a thlen ka ring lo bur a, hmêl pawh inhre lo, hmuh pawh inhmu ngai mang mang lo tùr inkârah chuan ka nu hlauhthàwn thil chu a thleng mawh viau ngei ang le.

Mami chuan in tharah min riahpui a, a tûk zîng hma takah chuan eirawng bâwl tùrin ka thawhsan a, Jivan-a pawh a lo tho ve tawh a, hlim takin min lo nuih sâng a. A pu erawh chu a lo la tho lo a ni ang, a hmêl ka hmu lo. Ka duh daih zâwk,  ka haw hnuah rawn tho chauh zâwk se...

Ka duhthusàm ang tak chuan ka awm chhûng chuan hmêl thar ka hmu lo va, ka lãwm khawp mai. Mami sawi kha a dik ngeiin ka ring ta deuh bawk, ni mawlh teh se. Tihian, thawk mawlh mawlh ila, min ruaitu ka hmuh kher a ngai hleinem, hlawh ka hmuh țhat phawt te chuan.

Mami chuan rawng a lo bãwl ve ngei a, kan han ei dùn a, chawhnu lamah haw phei a tum tawh si a, a reh viau ang, ani hi chu a țawng duh bâkah a fel a, keimah chauh chuan a rehin khua a har duh viau ang le.

Chaw ei khama in tifel tùra kan phei chuan J-a chu office kai turin a lo chhuak tawh a, Mami chuan min pui leh bawrh bawrh a, Jivan-a'n thuamhnaw a lo su bawk a, kan indaih khawp mai. Kan indaih êm avàng chuan kan zo hma hle a, Mami chuan," Ka haw phei hmain kan chhuak lawk dâwn em ni ang? Lunglei i kal khát ve àwm bawk sia, tei chhuak lawk ila, kan rei chuang nâng," a ti a, ka lo hnial lêm lo. 

Ani hi zawng, khawiah pawh hian a leng halh vek mai a, zahna pawh a nei hran lo. Ka mamawh tùr nia a hriat min leisak nual a," Advance-in i hlawh chanve lâk ka lo dîl ang. Het, min hnial tum suh, he hna thawk tùra ka nawr luih i ni a, i tân chuan ka ti ngei ang, ani tân lah thil harsa a ni lo bawk a," a lo ti leh mai a, ka hnial zui peih lo, ka chak dâwn lo sa tih ka hre kar si a.

Ka hlawh chanve chu a tûk chhùn dâr 12: 30-ah chiah ka account-ah a rawn lût ta a, zahthlâk ti ru viau mah ila ka mamawh ve tho bawk si a, ka account-a awm sa tam vak lo lah hi chu a țûl tàwpah lo chuan lâk chhuah mai mai ka tum bawk si lo, zahthlâk ti viau mah ila ka lãwm viau tho mai.

Ka hna chu ni tin ka thawk chho ve ta zêl a, hrehawm pawh ka ti hran lo. Jivan-a lah chuan min nël chho viau ta lehnghâl a, min duhsakin chawhmeh pawh min pe ve fo. In bulah chuan thlai eng eng emaw an chîng ve nual a, chûng enkawl tùr chuan vai pakhat hi ni tin a rawn kal țhìn bawk.

Ka thawhna pu ber erawh ka la hmu lo tluang zêl. Kâr khat zet ka awm hnuah pawh chuan ka la hmu chuang lo, zàn lam meng rei, zîng tho har țhìn ang chi hi a ni ngei ang, chuti ni lo se chuan zïng lamah tal hi chuan vawi khat tal chu ka hmuh ka inring ve tawh a ni.

Zotei result pawh a chhuak ve ta ngei a, a ti țha ve hlê mai. First-ah a pass a, an pâwlah 5-na a ni phâk ve tlat mai, ka lawmpui tak zet. Ani lah chuan," Ka pass bawk sia, ka rawn kal ve tawh dâwn," a rawn ti deuh reng a, a châkzia hriain ka nu pawh chuan a phalsak a, a rawn kal ve ta ngei a, Mercy erawh chuan," Ânu ka ngai ang," a ti tlat a, a u chu a rawn zui ve duh lo a ni.

In ka chhuahsan hlànin inah chuan a lo awm a, a theihtâwp chuan in chu lo tifelin rawng a lo bâwl ve bawk a, kan chhûngkaw dinhmunin zir mawlh hek lo le, ka nuin in chhûngkhur chêtah min chhawr hma hlawm bawk a, a hnû chhui a ngai lo khawp mai.

Chhùn lama in tifel tùra ka phei chuan fridge kawngkhàra lehkha lo inbel vâ chu ka hmu a, ka han chhiar a, zanriah ei tùr mi pakhat eirawng bàwl kêp tùra min hrilhna a lo ni. A kut ziak chu a uluk fahran bîk lo a ni ngei mai, a hawrawp àwn dàn chu a inang lo hlawm tlat.

In chu ka han tifel a, pu ber room lam pawh chu ka tifel zung zung a, mipa mah ni se khum chu a thlep felin a bedsheet pawh a pawt mar țha viau mai. Mâma ka ngaihtuah chhuak lo thei lo, zîng tin a mutpuan ka pawh marsak lo chauh a ni a, ani ve hi chu a pawt mar țha khawp a ni. Mipa pawh hi an chétphung a lo inang lo nasa a lo nih hi.

Sitting room -a sofa pakhat hnuaiah chuan zungbun ni àwm tak hi ka hmu vuai a, ka han ban ngar ngar a, ka lâk chhuah chuan ka en vang vang a,  silver zungbun ngei a lo ni; mahse, hmeichhe zungbun a ni tlat. Jivan-a a insûk daih avàngin hmuh mai tùr a awm si lo va, TV hùnna bulah chuan ka dah rih ta ngawt. Mami zungbun a ni thei ang em? Mahse, ka ring chiah lo, tlereuh a uar lêm lo, a zungbun bun lai pakhat kha chu gold a ni tlat. A nih chuan, ani tã chu a ni lo ang, tu tã nge ni ta le? Engtiziaa helaia hmeichhe zungbun awm daih thei nge a nih le? Pu ber hian inlêng hmeichhia a nei a ni ngei ang.

Ka ner deuh sak a. Mami khân hmeichhe lam chu engah mah a ngai lo ni khân a sawi ngei a, chuti a nih chuan a hmeichhia țhian emaw amah rawn lènchilhtu gmeichhia tu emawin a thlauh palh a ni ngei ang le.

Ka va ngaihtuah thui peih mai mai tak! Tu tã pawh chu lo ni ang hmiang, ka lo ngaihven viauna chhan tùr a awm hauh lo.

Chhùnah thingpui inin ka haw phei a, chawhnu dâr 2:30 vêlah zanriah ei tùr buatsaih tùrin ka phei leh ta a, ka bãwl zo ka haw hma hret si chuan kawtah motor a rawn tlãn lût a, a thãwm chu choka ațangin ka lo hria a, tu tak ni ang maw, pu ber rawn tlawh tum tu emaw a ni ngei ang.

Jivan-a'n a chhûngte phone-a a biak mawlh mawlh avàng chuan tîm deuh hlek chung hian inlêng tùr chu ka lo ngaihven a, kawngkapui lama a rawn kal phei chu ka lo hmu a, a hmêl chu hmu chiang fahran thei lo mah ila patling lam tawh chu ni ngeiin ka hria, pu ber rawn hmuh a tum a ni ngei ang, ani lah chu office a la rawn bâng dèr si lo.

A lam chu panin,"Eng nge ni ta, ka pu? Pu ber chu a la rawn haw lo va," tiin ka lo be vat a, rawn lút lo chuan a ding ta dat a,  inbiak rei vak ka peih si lo va, ni e, haw thuai se a țha ang, kei pawh haw thuai ka duh.

Shades a vuah tlat avàng chuan a mitmeng ka hmu thei lo va, a khabe leh a hmai chu a hmul kual a ni tih chu chiang takin ka hmu thei thung. Ka hmel hriat ngai loh mipa, chîk zeta en ka duh loh avàng chuan ka mit chu la sawnin," A rawn haw țêp tawh ang, in chhûngah hian lo nghâk  la?" tiin in chhûng lam chu ka hawi a.

"Ka rawn kal leh zâwk mai ang."

Ka rin aiin a aw chu a fiah țhain a hmel en aiin a aw pawh a mawi e. Mipa aw ka tih ve țhin ang ngei kha a ni bawk. Eng hna thawk emaw  tak chu a nih ka ring deuh ngawt a, pu ber rawn hmuh tum a nih chuan a hna kaihhnawih lam thil vàng a ni ngei bawk ang chu.

"Aw le, i tih dàn dàn le," ka tih chuan a inher vut a, a motor hùnna lamah chuan a kal zui ta nghâl a, kei pawh ka apron hâk lai chu hlîpin ka bâng țha a, haw tùr chuan ka insiam zui ta nghâl a.

Pu ber hi ka la hmuh loh miau avàngin ei tùr ka siam réng rêng chu tui a ti ni maiah ka ngai a, chuti ni lo se chuan lehkhaah ziakin min hrilh tawh maithei a ni. Min biak teuhna ber chu fridge kawngkhàra a lehkha ziak a lo dah kha a ni mai a, eng ang hmêl pu nge, a pianphung leh a awka chhuak pawh ka la hre hauh lo. 

A duh chu fridge kawngkharah ziakin a lo dah ta zauh zauh a, mikhual a neih dâwn pawhin lehkha hmangin ka hre ta zêl a, a zia phian. Hmaichhana inhrilh ai chuan a țha daih zâwk, lungawi lo hmêl hmuh tùr a awm ve bawk si lo.

Tûk khat chu Jivan-a hnênah chuan," I pu hi dâr eng zâtah nge a thawh țhin? Zàn lam hi a meng rei țhìn a ni maw?" tiin ka zâwt chhin a, ani erawh chuan Mizo țawng pai hauh lo hian," I rawn kal hma hret hian exer la turin a chhuak ziah alawm, office chawlh nî, Sunday-ah pawh a chhuak tho, a tho hma thei lutuk!" ka rin loh lam daih chuan a rawn ti ta a. Ka en hau mai! A va mak dâwn ve! Chuti a nih chuan inah a awm tlêm àwm mang e, chaw ei nãn leh mut nân a hmang a nih ber dâwn chu.

"A lo nih tak chu. A nih leh, zungbun kha i pu chu i hmuh ta em?" ka ti leh a, ani chuan," Aw, hmuh e, a la nghâl daih a, ka hmu ngai tawh lo," a lo ti ve leh a, ka lu ka lo bu nghat a, a tibotu chuan a ui ve viau ang, a mawi reuh si a, a design lah kha a la mawi hrep zui.

"Nizàna ka pu hmeichhe rawn hruai chu a hmêl a țha asin aw...!!"

Ka lo meng phar deuh ãwk a, hmeichhe ngaihsak lo leh melh ngai lo deuhthaw ni khân Mami khân a sawi sia, a va mak dâwn ve! Hm, ni e, mipa ni ve si, hmeichhe ngaihsak lo tak tak hi chu an awm kher lo ang, anmahni lo duhtu an awm phawt chuan an melh ve àwm êm mai a!

*I THIL TIH HMANGIN HNEHNA CHAN TUM RAWH, ȚAWNGKAMA INHNIALNA AȚANG NI LOVIN*