☆MIN EN LA☆ - 6 By Dingdi Pachuau

 ☆MIN EN LA☆ - 6 By Dingdi Pachuau

Jivan-a a dam chiang ve tawh bawk a, a pu lo thleng chu a lo chiau-au vat a, kei erawh chuan eirawng ka la bâwl zo lo deuh a, an rawn thlen lai pawhin Alu ka lo la chan mawlh mawlh a. Sana lam ka melh chho vat a, a rawn thleng hma hle mai, zanriah ei hman tùr țâwka a rawn thlen ka ring a nia.

Mipa țawng ri kâra hmeichhe nui ri ka hriat chuan ka ner deuh sak a, rawn hawpui a nei a ni maw? Hm, ka lu ka thing deuh nak a, Mami hian dâwt min hrilh ngai si lo va, min hrilh anga a unaupa J-a hian hmeichhia a melh ngai lo a nih si chuan, eng nge thu dik tak chu ni ta? Ani hian dáwt min hrilh a ni mai lo'ng maw? Nge a lo inthupru reng zâwk? A, ka lo ngaihtuah tùr a awm lo ve, hlawh neih duhin ka thawk a, ka hna chauh hi ngaihtuah tùr ka ni, thil țûl lo ka ngaihtuah tùr a ni lo.

Alu ka kan zawh hnu chuan apron phelhin haw mai ka tum a, chutih lai tak chuan sitting room lam ațang chuan hmeichhe pakhat hi chokaah chuan a rawn lût a, ka lo en deuh vat a, min rawn en vein a han nui sak a, fridge chu melh leh nghálin," Khawngaihin, tui váwt min pe thei ang em?" a rawn ti a.

"Aw..." ban deuh chat hian ka ti phawt a, fridge chu va hawngin tui bottle pakhat chu la chhuakin ka pe nghâl a," Ka lâwm e," tiin a lo la vat a, sitting room lamah a phei zui nghâl a, hmui chung lam pet fan fanin ka en zui reng ringawt. A chhe lo va, a polite viau bawk, a la naupan hmèl viau bawkin ka hria, kei aia a upa a nih pawhin kum hnih khat bâkin a ni tawp lo ang.

Ka chhuah hnu pawh chuan sitting room tukverh inhawng ațang chuan chu nu nui rí chu chiang takin ka hre thei a, nuam a ti har har viau a nih dâwn hi. Zanriah ei ve tùr a nih chuan ka thil siam kha tui a tih ngei ka beisei, ka uluk ve bawk a, a tui viau ang.

Zanriah kan ei kham hnu lawkah chuan inlêng ka nei tlat mai a, kan kohhran țhalai hruaitute pahnih, U Zâma leh Nunhlima an ni. A hmaa rawn kal tawhte zînga pahnih kha an ni a, an titi bawrh bawrh a, an nui duh tho bawk si a, an bula awm nuam ka tiin kei pawh ka țawng ve nasa viau mai. An lêng rei hran lo va, an haw dàwn chuan Pathianni lo awm tùra fellowship-a tel ve ngei ngei tùr chuan min sáwm a, kei pawh chuan aw ka lo pawh ve mai bawk a, heta ka awm hnu hian ka la kal ngai miah si lo va, kal ka châk ve tho a ni. Pathianni zîngah tak hi chuan eirawng bàwl bâk hna ka nei bîk lo va, tlai lamah ni se rawng ka bàwl a ngai lo, pu ber hian Pathiannî hi chuan zanriah a ei ngai tlat lo va, a chhan ka hre hauh lo nain ka ãwl ve thei hlauh si a, țha ka ti riau.

A tûk zînga rawng bâwl tùra ka phei chuan exer la tùrin a lo chhuak leh hman tawh a, fridge kawngkhàra lehkha a intàr loh avàng chuan boruak a pângngai a ni ngei ang, nimin lama chawhmeh ka siam chu ka han check dan dan a, ka rin aiin an lo ei nasa daih mai, ka nui sak a, tui an ti ve chiang a nih hi.

Chaw ka sil lai chuan hmeichhe awin," Khawngaihin, tui lum in tùr a awm thei ang em le?" a rawn tih chuan aw ri lo chhuahna lam chu ka hawi vat a, nimin lama nula bawk kha a lo ni! Ka chhàn hma chuan a inthuamna chu ka melh chhuk vat a, mutkawr a lo la ha niin, hetah a riak ve tihna maw!?! E khai, pu ber chuh, ka hre thiam ta.

"Aw... "

No lain ka thlitsak vat a, ani pawh chuan," Ka lãwm e," tih sap pah chuan min nuih sak a, a kal sawn zui ta nghâl a. Ka maimichhîng vang vang a, thâwk ka lâk hawk hawk hnuah meng chhuak lehin ka thil tih lai chu ka tih chhunzawm leh chauh a.

Mami'n Chapal min leisak kha a unaupa hi a rawn thawn mai ka ring deuh a nia, an zin tlâng niin a lang tho bawk sia; mahse, a rawn thawn lo niin a lang, eng mah a sawi si lo va. Mami va zawh dawt lah chu ka duh bîk lo va, ka haw hnua min rawn biak chuan," I chapal tùr kha maw, ka rawn thawn aw, in inah an rawn dah thei bawk ang, ka hrilh chiang vek tawh bawk," a rawn ti ta chiah a, kei chuan," A ngai chûk chûk hleinem aw... I hmanhmawh mai mai a ni, i rawn zin phei hunah rawn keng phei mai la ni tùr a nia," ka lo ti thung a. Ani erawh chuan," Lungngai mah ta che, kid ka nei țha alawm," nui hak hak chung hian a rawn ti a, chutah," A hmêl kha lo en chiang la aw, eng nge ang i tih tih ka rawn záwt leh ang che," a rawn ti leh a.

"I bialpa a ni maw?" ka lo ti vat a, ani erawh chuan," Ka hre rih lo le, i thu tlûknaah pawh a innghat ve ang chu, chiang deuhin lo en ngei ngei ang che," a rawn ti leh a, kei chuan," Dâwn chiang lutuk!" ka lo ti ve leh vat a.

Chawhnu dár hnih vêlah ka chapal tùr chu Mami kid chuan min rawn pe ta thlap mai. Lo en chiang tùrin min ti bawk a, ka lo en chiang ve ngang mai a, ka en nasa leh lutuk chu ka inthiam lo lek lek záwk hial a ni! A la naupan hmèl viau mai a, sa pan lam deuh niin a sâng vei gawi a, eng ti tiha intawng ve nge an nih ang aw ka ti rilru vang vang, a vun a ngo lutuk lo nain a fai vang reuh a, a țawng ve duh phian zui bawk. 

A chhuah hnu chuan chapal chu ka han inthawlh chhin a, ka inhmeh ve lutuk tlat. Ke a ti lang ngoin inhmeh pawh a awl phian a lo nih hi; mahse, a tlo lutuk kher lo ang.

Zànah Mami chuan min rawn biain," Vawiin chuan i lo en chiang em?" a rawn ti hmasa ber a, kei chuan," Aw, en chiang lutuk, a la naupan hmèl ka ti," ka ti nghâl a, a rawn nui hak a," Nia, chu chu alawm ka duh lohna chhan ber, kei aiin kum 3-in a nau a nia," zàwi sap hian a rawn ti a, kei chuan," Mahse, a fel reuh tho kha, a țawng duh bawk si, a hmêl paeh a chhe lo, chutin a sâng reuh bawk a," ka ti duah a.

"Ni ve tho; mahse, a hmêl mawlh kha, a la nau tih a hriat lutuk a," a rawn tih leh chuan," Kum thum chauhin a nih chu in inthlauh," ka ti phawt a, sawi zawm lehin," Engtin nge in intawn rêng rêng a?" ka ti leh a. Ani chuan," Tûn hnai lawka kan zinnaah khân maw le, kan awlsam tiraw? Kan bazàrnaah khân an lo bazâr ve a, kan rawn haw rual leh bawk sia," a rawn ti leh a.

Tihian, mi hi chu an intawng nawlh mai zêl a, kei hian eng tikah tak tawng ve ang maw? Pathianin ka phû tâwk leh ka tâna ruat hi a lo nei ve ngai a nih chuan ka la hmu miah lo nge ni ang a, ka lo hmu reng tawha ka hre lo mai mai ni ang? Tu nge ka tân hian a lo ruat ve ang le? Ka ngaihtuah thui zui duh ta lo, kei ang hmeithai fanu hi chu tu mahin min duh lo ang, bâkah, hetiang lam ngaihtuah thei pawh ka la nih miah loh hi, ka naute chàwm hi ka thupui hlapui ber tùr a la ni rih, thil dang ngaihtuah thei ka la ni lo.

Mahse, mak ve deuh mai chu, kan kohhran țhalai hruaitute zînga mi Nunhlima min biak dàn leh min en dànah hian thil eng emaw a awm tlatin ka hria a ni, ka hre sualin ka hre lo, min ngaina der ve hlê a, a țawng duhin a nui peih a, min be peihin rem lo deuh hlekah pawh min be hrãm hrãm țhin, ka be hmasa ngai lo, ka ngam chiah lo bawk; mahse, a awm dàn hi ka hai der lui tlat thung a. Ani zawng lehkha thiam leh mi fel tak a ni tih a hriat a, ka tân chuan han beisei ngam ve chî a ni hauh lo.

*******

Chaw ei khama in tifel tura ka phei chuan frigde kawngkhàra lehkha lo inbel vâ chu ka hmu a, ka han en a, zàn lama mikhual a neih tùr thu min hrilhna a lo ni, mikhual room en fel tùrin min ti bawk, mikhual a neih zât tùr erawh a sawi hauh lo. Mikhual room hi room hnih a awm a, in ka tihfel hian ka tifel tel ziah a, mutphah lam erawh insûk lama Jivan-a ka tihpui ve lêm loh avàng hian engtianga zingin nge a sûk ka hre miah lo va; mahse, a su zing vak lo a ni maithei, a ngai char char a phah ni maiin ka hre țhìn nghe nghe a; mahse, a ngai reng a phah chu ka ring vak bawk si lo.

Mikhual room chu ka tihfai lai chuan mutphah chu ka'n hnìm kual chhin a, bàl rim chu a nam hran lo. Khum síra cupboard chu ka'n hawng chhin a, chutah chuan tuna khuma inphah mêk ang mutphah chu inthlep dal hian a lo awm a, panga vêl zet a ni ngei ang, hei vàng hi a lo ni chiang, a ngai char char phah emaw ka lo tih chhan kha. Drawer ka han hawng leh chhin a, tah chuan mutkawr, a sen leh a dum ngei mai kha ka hmu ta mai! Ka en deuh reng a, inthlep fel thãna ka hmuh avàng chuan Jivan-a thleh a nih ngei ka ring, ani hian a pu chêtphung hi a hre chiang viau ang chu, nula a awmpui țhin leh awmpui țhin loh thlengin.

Khumphah chu a dang ka phah a, phah lai chu sùk tùr dahna bâwmah ka dah zui a. Engtia rei nge phah a nih ka hre chiah si lo va, sawisèl loh nih hrâm ka duh avànga thlâk ka ni, ka thlâk zo chu fai rim a nam vang vang mai, lukham case pawh chu ka thlâk zui nghâl a.

Zanriah ei laiin Zotei chuan," U, i hna thawhna pu ber hi ka va'n hmu ngai lo êm êm! A awm ve ngei chuan ka ring bawk sia, a  quarter lah saw a nawm hmèl ka ti, ka kal ve chhin châk a nia aw, a bul vêl leh a kawt vêl saw a zâwl zau nuam bawk sia," a ti duah a, kei chuan," Awm e, hna a thawk nasa a, kei  ngei pawhin ka hmu khât lutuk! Nilênga office kal chuan hmuh khàt loh theih pawh a ni lo, a chènpuite lah kan ni si lo va. Nang pawh hi ka chènpui i ni na vàng vàng a, kan inhmuh tam êm êm bîk hauh loh hi, inah ka awm tam hman bîk si lo va," ka ti ve leh a.

Mut hmain Nunhlima'n min rawn be teh tlat a, mak ka tiru kher mai. Vawiin lama ka hun hman dàn min zâwt a ni ber ang chu, min be rei lêm lo. Hmaichhanah hi chuan kan inbe ve ta fo a, sawi tùr pawh a hria; mahse, zanin chu sawi tùr a vâng deuh chu a ni, phone-ah hian kan inbe ngai lo va, zanina min rawn bia pawh hi mak ka ti lo thei lo a ni, ka phone number erawh a neihna a rei ve deuh tawh thung.

Min ngaizâwng deuh niin ka hre deuh tlat, eng emaw tak hi chu a awm a ni, keimah lamah hian a awm ve em tih erawh ka la hre lo, hetiang lam hi chu ngaihtuah loh rih ka duh bâkah ka hna hian a zir lêm lo bawk a, bâkah, ani hi chu a fel a, a fel êm vàng pawh hi a ni maithei, min biak peih viau chhan hi, min duh tak tak teuh lo ang, ani ang mi fel phei hi chu kei pawh hian ka phû lo hrim hrim bawk, a zahthlâk.

Mikhual chu a lo nei ngei mai a, nupa ni ngei tùr an ni. Ka hriatna chhan pawh tûkțhuan ei tùr ka siam laiin an nu zâwk chu ka bulah a rawn kal a, ka thil tih lai chu a rawn thlêk ve a, min be hauh lo. Kei pawhin ka be hran chuang lo va, ka thil tih lai chu ka tih chhunzawm mawp mawp mai.

A kal sawn daih tih pawh ka lo hre lo va, ka hawi chhuah chuan a lo awm tawh lo va; mahse, mipa ka hmu ve ta thung. A patling viau tawh a, a kum pawh a tam ve deuh tawh ang chu, ani erawh chuan hmeichhia ang lo tak maiin min rawn be nghâl bawrh bawrh mai a, min be ta bawrh bawrh chu chhàn loh theih ni hek lo le, a thil min zawh apiang chu țha takin ka lo chhâng ve zêl a.

"I va rei tawh ve! Lo phei tawh teh!"

Min rawn enin a nui suk a," Ka'n phei tawh ang e, ka tibuai rei tawh êm mai che, nizàna chawhmeh tui tak tak i siam ang kha siam leh rawh aw," a ti zui a, ka nuih ve ringawt. A phei hnuah chuan ka thaw huai a, ani hian ka chawhmeh siam kha tui a lo ti a ni chiang mai, a làwmawm e, lehkha tàr chhiar leh ngawt țhin ai chuan hmaichhana min biaa min titipuitu chu a ngainatawm zâwk.

Jivan-a chhûng hnai tak zînga nula pakhat  Sèrkàwn damdawi ina an luhpui thu Jivan-a'n a hriat avàng chuan hmuh ve thuai a duh si a, a pu lo haw veleh chuan thil awm dàn chu lo sawiin a  chhûngte damdawi in lút chuan pawisa an mamawh thute pawh chu a hrilh tel nghâl a. 

Jivan-a a kal daih avàng chuan keiin a ai ka lo awh a, ka tih ngai loh ni mah se rilru buai leh mangang taka Jivan-a dah ai chuan tiin a tih țhin, pu ber leh a mikhualte tân tûkțhuan chu ka siamsak a, nakina an ei zawh hnu lamah pawh chêt ka la ngaih dâwn miau avàngin ka ril a țâm hman ve viau ang chu, an ei rei phei chuan...

An chaw ei vil a ngaih pah avàng chuan an țhutna bul hnaih lamah chuan ka ding reng a, hmeichhia chu a țawng lar lar reng a, an pa ni ngei tùr chu a lo țawng ve zauh zauh bawk a. Pu ber erawh chu chaw ei laiin a țawng ngai lo a niang tih tùr khawpin a ngawi thei a, ei erawh a ei tam lo.

Hmeichhiain," Awmpui i nei fuh khawpin ka hria, hmeichhia a la ni zui, hei a thil siam pawh a tui viau mai, awmpui neih fuh hi a har asin, i vànnei khawp mai," ring vak lova a ti rî chu ka hre pha tho. Pu ber chu a la ngawi reng a, hmeichhe pasal ni ngei tùr chuan," Țawng ring vak lo la, a lo hriat phâk chuan nuam a ti lo mai ang," tiin a lo khap vat a, kei erawh chu an thil sawi hre pha lo ni àwm tak hian ka kut chu ka elh niap niap reng a, a rûk tê erawh chuan ka lo ngaithla kur tho. Mi awmpui han nih ngawt chu kawng lehlamah chuan zahthlâk deuh mai a ni, duh angin a awm ve theih si loh, tunah pawh hian ka ril a țâm teh asin.

"Min lo hawhtîr ve la a țha ang, kan chhûngkawho chaw ei khâwm huna chawhmeh siamtu atân," Hmeichhia vêk chuan a ti leh a, ka en phei ngam lo va; mahse, a nuih pah ka ring tlat, a aw ațangin a hriat vek a ni. A pasal chuan," A mak thei! Țawng zàwi deuh rawh," tiin a lo khap leh a, Pu ber a ngawih ngul reng avàng chuan a thin a rim em maw ni aw ka ti, chawhmeh siam thiam tia a țhiannu hmeichhiain min sawi vàng kha a ni ngei ang chu.

Hmeichhe chaw ei kham chuan," Fridge-a grape ka dah kha min rawn lâk teh," a rawn ti a, ka kal nghâl vat a, ka va pe thuai a. Ka va pêk lai chuan melh pawh min lo melh lo va, hawi kual vêl pah hian," Nizàn ka mumang kha a tak ni thei se ka ti hle mai, pawisa ka chhar nasa si a,"a ti làr lár a. An pa chuan," Kan hausa lutuk palh ang, i mumang  chu ni reng zâwk mai teh se," nui chung hian a ti a, ka va en lai a nì bawk si a, hlim hmèl deuh hian min rawn nuih sak bawk a," I ril a țâm tawh àwm sia, ei ve nghâl daih la?" a ti leh a.

"A ngai lo, a țâm lo ve," ka lo ti vat a, an bul hnaih deuha an titi ngaithla anga awm ka duh loh avàng chuan ka tawlh hla zui nghâl a. Pa zâwk chu polite ka tih bâkah pa nèlawm tak niin ka hria, hmeichhia zâwk erawh chu a nèlawm loh ka ti, a bula awm ka hlauh chî tak, a bula awm chuan invêng renga awm a ngaih dâwn bâkah thinthi diaia awm a  theih loh ang, hlauthãwng rengin ka awm ang tih ka hre thei a ni.

"Ei rawh."

Ka en phei vat a, a țawng chhuah ve vawi khatna a ni hial ang, min lo en ve ngur a; mahse, kei chuan," Ka ril a țâm lo ve," tiin pu ber mah ni se ka lo hnial thung a, ka kal sawn hla zui nghâl bawk. Hmeichhia chuan," I pu thu i hnial ngam dâwn a ni maw?" nui deuh chung hian a ti phawt a, chutah," I ei dâwn si loh chuan tui bottle min lo pe leh mai teh," a ti leh a, ka kal tùr chu," I lâksak a ngai lo ang," ti aw ka hriat avang chuan ka ding chawt a, ka en nghâl vat bawk, pu ber chu a țhutna ațanga lo ding chhuakin fridge lam pan chuan a kal zui ta nghâl a, ka en zui reng tawp! Bottle kenga a rawn lêt leh chuan a mikhualnu bulah chuan dingin," Nangmah ang bawkin hming a nei tih hria la," a ti leh sup a, bottle chu dawhkànah a dah a, țhu leh tawh lovin a kal sawn zui ta nghâl a.

 

An inchhàn dàn chu mak ka ti tak zet. Pu ber hian a mikhualnu hi a ngaithei vak bîk lo em maw ni chu aw ka tih phah rum rum mai, a țhian kawm țhin nge a nih a a pasal hi a țhian ni zâwk ang? Unau an nih chu ka ring chiah si lo, an inan loh bâkah, a, an ni lo tawp ang.

An chaw eina ka seng fel a, ka tifel nghâl mawlh mawlh a, Jivan-a a lo la haw dáwn rih loh avàng chuan thlèng pawh ka sil nghâl vek a. Thil dang ngaihtuah hauha lova tifel mawlg mawlh ka nih avàng chuan ka sil zawh hnua apron ka pho tùr chuan fridge kawngkhàra lehkha intâr chu ka hmu ve chiah, tukinah a awm lo tih ka hria.

*Mi dang chhiahhlawh i ni lo tih hria ang che*  tih të hi a lo ni. Eng a sawi tumna nge ni ang? Mi dang ina awma an chhiahhlawh☆ ka ni lo tihte chu ka hre ve bawk, a ina hna thawk ka ni rêng a ni. 

"I pu chuan a hauh viau che a nih hmèl, nge nang pawh hi a lo mutpui thei reng tawh zâwk che?"

Ka inher vat a, chu thu rawn sawitu chu râpthlâk ti rilru zet hian ka en reng ringawt.

*MIMAL TAKA AN RAWN HRE CHIANG CHE A NIH NGAWT LOH CHUAN NANG PAWHIN SAWISÈLNA LEH SAWICHHIATNA CHU I MIMAL NUNAH LO DAWNGSAWNG DUH BÎK SUH*