☆MIN EN LA☆- 7 By Dingdi Pachuau

 ☆MIN EN LA☆ - 7 By Dingdi Pachuau

"A hmeichhe kawp zìngah chuan i tel leh si lo ang, ni dâwn tak, a theih loh, chhiahhlawh kher chu a kawp duh lo tawp ang! Mahse, in inkârah hian eng thil nge awm si hi? Zàn lamah hlawh bonus hlek nân i mutpui țhìn tihna em ni?"

A thil sawi râpthlâk ka tihzia chu, mit khap lovin ka en reng a, chhàn ngaihna pawh ka hre lo! Chháng tùr pawhin ka țawng chhuak thei kher lo ang, mak ka ti a, a thil sawi duh dàn leh min rinhlelhna chuan min dêng nghîng lawih lawih mai si a.

"Melo, hetah i lo awm a ni maw? Chhuak tawh mai ila, kan ban hman lo palh ang e, kawngah chawlh zeuh zeuh kha i duh leh àwm si a,"a pasal nia ka hriat chuan a rawn ti ta hlauh a, ani erawh chuan," A hmanhmawhthlâk hran lo e, duh leh zànah pawh thleng ila, thil țûl tak tih tùr kan nei pawh a ni lo va," a lo ti ve thung a; mahse, inher nghatin hawi sâng deuh vah hian a kal sawn zui ta tho a, a pasal chuan min rawn enin min rawn nuih sak a, an nu chu a zui ve leh nghâl a.

Thâwk ka la huai phawt. Ka lo inhûm ruh nasa viau a lo ni, khati khawpa inhmuhsitna leh indeusawhna kha ka la tawng ngai lo, Singapore-ah pawh khân ka awm țan tirh lai khân han vin deuh leh zilh deuh hlak kha chu ka tawng ve fo a; mahse, tuna mi ang țawngkam kha chu ka tawng ngai lo. Ni e, min hmusit thei ngei mai, kei chu mi ina inhlawha awm ve mai ka nia, hmuhsitawm ka ni ang; mahse, mihring ve tho ka ni a, rilru nâa hrehawm ti ve thei tho ka ni ang tih a ngaihtuah kai lo a ni ngei ang, hmuhsitawtak ni mah ila khatiang țawngkam hriat kha chu nuam ka ti bîk miah lo.

An chhuah hmain ka chhuak ta daih a, an chhuah hnuah ka phei leh mai ang. Ni e, chaw ka la ei ve lo tak, ka ei hnuah, an chhuah hnu fêah in tifel tùr chuan ka kal chauh ang.

Ngaihtuah chhuah ka duh lo viau nain Melo-i thil sawi kha ka hre chhuak leh țhìn a, ka rilru a luah leh ngut ngut țhìn. Ni e, chhiahhlawh mai ka ni; mahse, hlawh bonus duh vangin zàn lamah pu ber ka mutpui ngai lo, kha kha chu a ti dik lo, khatiang lam kha chu ngaihtuah pawh ka la ngaihtuah chhin ngai hek lo. Pa nei tawh lo, nuin rethei tak chunga a enkawl chhoh kha ka ni a, zirna leh chhúngkaw dinhmunah pawh mi phâk lo ka ni, kan harsat êm avàngin lunglèn leh hrehawm pawh pawisa thei lovin ram dang, vawi khat mah la kal ngai lohna hmunah ka kal a nia, mi min hmuh dànah chuan mi chhiahhlawh ka ni, a dik chiah, hmuhsitawm ka ni ngei ang; mahse, rinawm takin ka hna chu ka thawk a, hna hnuaihnung ber pawh chu a lo ni maithei, pawisa kha eirûkna ațanga ka hlawh chhuah a ni lo va, rilru leh taksa hrehawmna tuar chunga ka hlawh chhuah ve liau liau a ni a, ka chhûngte nawm ve theihna tùrin lunglèn leh hrehawmna pawh ka ngaihtuah thei lo rêng a ni. Ka naute ka chãwm thei ta rêng a, ka hlim asin, keimah vàngin zirna an zawm theih phah a, an tân chuan hrehawm ka pawisa lo. Ka thaw hawk a, ka ngaihtuah zêl chuan keimah leh keimah ka intihrehawm mai mai a ni, rilru tân a hrisêl lo, ka ngaihtuahna ațanga paih bo hmak ka duh.

"Melo-i khân i bulah sawi a nei em?" Ka hre sual emaw ka ti hial mai! Min be hmasain a țawng ve leh tlat mai si a, mak ka ti rêng a ni. Melo-i thil sawi kha chu a sawi chhuah chî nâng, mahni lo maha theihnghilh hmak duh tawh lai laiin.

"Nei lo."Ka chhâng rang leh lutuk a, a âwih kher ang em ka hre lo. Ni e, min biak kha ka ring lo ve ëm a ni, min biak ve țhin dàn lah lehkha hmangin a nia, țawngka hi chu ani tân hi chuan țûl tàwpkhãwkah chauh.

Min rawn en ta rùn a, kei erawh chu ka lo hawi sawn ta daih. Dáwt ka sawi tih a hriat ka hlauh vàng a ni

"A țhat chu!" ti nghutin a kal sawn zui ta nghâl a, ka en zui vang vang ringawt.  A țawng tuitam lo ve bawk si, tûnlai mipa țawng duh deuh deuhte nèn chuan an inang chiah lo deuh chu a ni.

Thla ruk zet Lungleiah chuan ka awm ve ta. Mi ina awm ni mai lova in luah kan neih ve avàng chuan kan khuate Lunglei lama rawn zin tùr an awm leh awm loh ka ngaihven thei khawp a; mahse, an awm ngai lo a niang, ka nu zâwt ve ziah mah ila a hre ngai lo, ka zawh ziah chhan pawh thlenna tùr nei remchâng mai lo an lo awm ve thei a, kan in luah hi zau viau lo mah se kan khuate tân chuan ka lo inhawng ve êm êm mai a ni.

Pu ber pawhin kan inhmuh chângin țawngkam tawi tê tê chuan min be ve ta zeuh zeuh. A țawng duh lo ve êm a ni, a nui hmël ka la hmu hauh lo va, tlêm têa a khi deuh sak pawh ka la hmu chuang lo, heti êm ëm hi chu mak ka ti ve a ni, hrisèl a har àwm êm mai.

Mami leh a țhianpa pawh an inkawp nghet ve ta deuh a; mahse, pakhatin lehkha a la zir a, hmun dang daihah a awm bawk si a, an inhmu ngai lo va, phone-ah erawh an inbe fo ni awm.a ni.

"Hetiang hi ka peih loh thil a nia; inhmuh theih si loha inngaizâwng ve si ang hi, nang chu nei ve miah suh aw.  I hmuh theih ngei, in in pawha rawn chuangkai thei, hmun hrana mi ni lo, chutiang chu nei ang che," tiin min hrilh ve ziah a, amah zâwk hian a ngai viau ţhìn a nih ka ring, han chhaih ila," Amahin min ngai daih zâwk, kei chuan biak pawh ka be hmasa ngai teuh lo mai, mi dang ka neihsan lah chu a'n hlau khawp lehnghâl a, khawngaihthlâk zâwk hian," tiin a rawn nui tak ang ar ar a.

Nunhlima ka hre chhuak zawk. Ani hian țawngkaa sawi dawt si lo hian min en dànah hi chuan eng emaw chu a awm tih ka hre chiang tawh a; mahse, ka hre lo der tlat thung. Țha takin ka bia a, kan inkàwm a, a felzia ka hre chho telh telh a, an chhûngkaw dinhmun pawh hre chho ve zêlin mitmei hmuh ngam tùr ka nih lohzia pawh ka hre chiang chho zêl; mahse, chutiang lam chu vawi khat mah kan la sawi chhin lo, zàn lam hun ãwl a neihah a rawn lêng zauh zauh a, a fel ka tih tawh kha, Zotei pawhin a nêl viau tawh mai. Vênglaia awm kan ni a, ani pawh chuti tho; mahse, kan inhnaih tehchiam lo.

Favàng boruak nuam zetah chuan kan khua ka hre chhuak vawng vawng mai. Ka han hawi vël a, khaw awm dàn chuan ka lung a tiléng ve deuh tlat nia. Ka nute ka ngai reuh reuh a, rawn zin ve chhin se, kan awmnate hi min rawn hmuhpui ve chhin se ka ti a; mahse, an rawn kal chuan Mercy school chawlh a ngai dâwn a, chu chu ka duh meuh si lo. Ka nu bulah pawh vawi khat chu ka sawi chhuak tawh nghe nghe a; mahse, ani pawhin châk viau mah se tihngaihna a awm rih si lo.

"Jivan, i chhûngte i ngai ve ţhìn em?"

Ani chuan," Aw, ngai ve tho; mahse, nikum khân ka haw ve zawk a," a lo ti a," Nangmah chu i lung a lêng a ni maw?" nui chung hian a ti zui zat a. Kei chuan," Lêng hran lo ve, kei chu ka chhûngte Mizoramah tho an awm a, kan inhmu zung zung thei alawm. Nang chu i haw khât sia, in inhmu zing thei si lo va, i lung a lêng thei viauin ka ring a ni, hetah hian i awmna a rei tawh em?" tiin ka zâwt leh a.

"Hetah hian kum 5 ka awm tawh, Mizoramah tak chuan kum 20 deuhthaw zet ka awm tawh tihna a nih chu," a tih chuan," Chuvàng a nih chu Mizo țawng i thiam êm êm ni, chuti a nih chuan i pu nèn hian kum 5 in lo inhrawn tawh tihna a ni maw?" ka lo ti ve leh a. Ani chuan," Ni lo ve, ani nèn chuan kum 2 chauh a la nih chu. Amah lo awm hmaa mi pawh ka lo awmpui tawh a," a ti ve leh mai a.

"I pu hi chu a țawng duh lo tiraw?"

"Aw, a țawng tlêm hrim hrim a nih hi,  nula bulah pawh a țawng tam chuang lo, a țawng peih lo a niang," nui chunga a tih chuan ka lo nui ve mai a, țawng tlêm viau mah se mi sual tak a ni lo tih Mami'n a sawi kha ka âwih ve deuh a; mahse, hmeichhe melh ngai lo anga a sawi kha chu ka âwih hauh lo, hmeichhia an rawn kal peih êm mai, melh ngai lo ni se an rawn kal peih ngût lo ang.

In tifel pah chuan ka zai rât rât a, thiam viau lo mah ila K. Hminga hla 'Tu nge inthlei thei' tih hla hi ka duh a, ka sa rât rât a, a hla thu ka hriat chian loh lai chu ka 'hmm... hmmm... hmm...' bawk a, tui tak chuan ka sa chhuak ve parh tho.

"Zai thiam lo si."

Ka phu chiang kher mai, ka inher nghâl vat a, ani kawngka bulah a lo ding reng tawh niin, engtia rei nge a lo din tawh ang le? A room chhuat ka nâwt zo chauh a ni si a, a thãwm lah ka hre hauh si lo.

"Ka nâwt zo chiah," ka ti teh ringawt a, chu chu ka ngaihtuahnaa lo lang hmasa ber a ni tlat, chhuat nawhna leh bucket chu khaiin ka chhuak nghâl vut a, en pawh ka en nawn tawh lo; mahse," Khum saw i pawt mar dâwn lo em ni?" a rawn tih leh chuan ka hawi lêt vat a, min rawn en chuang lo. Ner deuh sakin, ka thil khai lai chu dah lawkin ka tlãn lêt vat a; mahse, ka kut a balh avàng chuan," Ngawi lawk aw, ka kut a bàl a," tiin ka tlãn chhuak leh a, hmanhmawh takin ka kut chu ka va sil nawk nawk a, ka hrûk hul hnua a room-a ka luh leh chuan khumah chuan a lo mu ngût hman tawh!

Ka ding dat a, tûn ang hunah rawn hawin a rawn mu teh ngawt a! A dam țha lo tihna em ni ang? Mut a duh a ni ang tiin thãwm dìm tak chuan ka tawlh lêt zàl zál a, ka chhuak dâwn chiah tihah chuan," Kawng kha khãr nghâl la," a rawn ti leh a, ka hawi lêt vat a; mahse, a mut dàn ngai reng chuan a lo la mu a, chêt pawh a che hauh lo.

Ka zah lohna sâwm khâwmin," I damsam lo em ni?" ka ti ve thung a, zawh ka hreh teh nain thil mawi a ni ve bawk si a ka ti a; mahse, chhànna ka hmu lo, min chhâng lo va, a awm dàn ngai rengin a la awm. Hm, min chhâng lo mai mai teh se, tûn ang hunah thil pawimawh deuhah a nih ngawt loh chuan a rawn haw ngai lo va, a nuamsam chiah lo tihna a nih chiah hi.

"I nawmsam loh chuan damdawi ei la," tih ka duh viau nain ka ti ta lo, muangchânga kawng khãrin ka chhuak ta zâwk a, tihian, a damloh nikhuaah leh a nawmsam loh deuh pawhin amah chauhin a tuar țhìn chu a ni ngei ang a, han ngaihsaktu tùr mi dang chhûngte a nei si lo. Ka han ding deuh rèn râwn a; mahse, nichin khân chhàn pawh min chhâng duh lo a nia, va lút leh pawh ni ila awmzia a awm chuang lo ang.

Room dang dang chu phiat faiin ka nâwt fai leh vek a, Jivan-a'n a ţhianpa, thlai enkawltupa thingpui a pëk rual chuan," In ve chhin rawh, i la in ngai miah loh kha," tiin thingpui min siamsak ve tlat a, hnial viau dâwn ila thil mawi a ni meuh si lo va, ka in ve ta ringawt a, a lo siam tui phian zui.

Fridge bang ka hrûk fai lai chuan pu ber chu a rawn kal chhut chhut a, ka lo mitsìr ru deuh a, fridge chu rawn hawngin eng mah la chhuak lo chuan a khãr leh ringawt a, kei chu ka awm hmunah tiang dinin ka lo ding ngawi reng a.

"In tùr ka duh," a ti sup a, a hmêl chu en duh viau lo mah ila ka en chho vat a, a meng sen deuh rûm a, a biang pawh a sen tûn mai, a khua a sik nasa a ni maithei a ni.

"I khua a sik a nih chuan thil vâwt lam chu a in chi loh ang," ka lo ti vat a, a lo rúm nghut thung  a, en pawh min en lo chuan," Ka tih loh tùr lam min hrilh suh," ti supin a kal sawn a, thingpui no chu va lain thingpui chu a va inthlit ta a, ka ner deuh sak a, ngêt ngût hian, inla eng emaw leh lutuk mai, ka chunga a felnate kha ka theihnghilh lek lek a ni; mahse, a pawi lo, tuna a in tum saw chu thil vâwt a ni chuang hleinem.

"Ka lo siam ang," tiin ka kut ka sil zui nghâl a, ani pawh chuan ka sawi vàng chu ni maw, a tih chhunzawm lo chiang kher mai. A ding ngul a, en lovin thingpui chu ka siamsak sawk sawk a, ka han pêk chuan a tem chhin hlak phawt a," Thlum lutuk!" ti nghutin a no chu a dah thla a, a kal sawn zui ta nghâl a.

He pa hi, țawng tam chi a ni hauh lo mai, a țawng tlêm kha a lo țha a nih kha, a țawng tam chuan lungawi lohna leh sawisèlna lam a ri chhuak tam ngei dâwn a, chu vàng chuan, ţawng tlêm viau reng rawh se.

Ka siam țhatsak a, chu pawh chu a la thlum viau niin a sawi leh a, ka va siam țha leh ngat a, chu erawh chu a sawisêl ta lo. A rûkin ka thaw huai a, pu ber chu ni lo na se chuan nichin pawh khân ka siam nawn tawh kher lo ang; mahse, hna ka thawhna ber, pawisa min petu a ni a tiin ka insûm ngar ngar a ni, bâkah, a mikhualnu Melo-i laka min chhan dàn kha ka ngaihtuah chhuak leh a, a laka ka bâ rulhna hunah ka ngai ta mai.

Zànah Nunhlima'n min rawn bia a, ka vawiin hun hman dàn min rawn záwt a, thil ho tê tê kan sawi a, min duh thu min hrilh khut ang tih ka hlauhthàwn avàng chuan rilru nuam tak leh zângkhai tak pawhin ka awm lo, a rûkin ka hah a, phùrna ka nei pah tho bawk.

"Thil hrilh tùr che ka nei a," 

Kha maw, ka hlauh ang ngeiin. Min duh thu min hrilh ang a, chhàn ngaihna ka hre dâwn si lo, han hnar viau la dâwn ila, fel ka tiin kei min duhtu chu hnal phal rual niin ka hre bawk si lo, mi dang tân chuan ka ui ngawt ang, a fel si, lehkha a thiam a, a hmêl pawh a chhe lêm lo bawk.

Min duh thu chu a la sawi lo. A sawi erawh chu min ngaih thu a ni a, ni 4 lai chu kan inhmu tawh si lo va, a rawn lêng hman bawk si lo nèn, min ngaih thu a sawi pawh chu ka ring ve tho, ka nui ringawt a. Ka mitthlaaa hmêl hmu rauh rauh pah chuan kain inbe ve zêl a, kan inbe rei zêk mai. 

A tûk zînga rawng bâwl tùra ka phei chuan ka phûr sûrh súrh viau, nizàn lama kan inbiak dàn a dik deuh vàng pawh a ni mahna! Nimin lamah a nuamsam meuh si lo va, pu ber chu a lo la mut ka ring asin le; mahse, exer la tùrin a lo chhuak leh daih tawh niin, a dam tawh tihna em maw ni, chhuah rih loh ve mai tùr a nia, a va intihnat belhchhah mai mai ang tih pawh a hlauhawm alawm.

*Mikhual ka nei*

Lehkha chu ka en chiang leh a, mikhual a neih tùr thu pawh ni lovin mikhual a nei tih a sawi a ni a, chaw ka chhum kêp dâwn tihna a ni ngei ang, thil harsa a ni hleinem. 

Rawng chu ka bâwl mawlh mawlh a, chaw ka chhuan dáwn lai chuan," Tuilum in tùr a a awm thei ang em, khawngaihin?" ti ri ka hriat tâk thutah chuan ka phu dáwrh lo chauh a ni, a hmain thãwm ka hre hauh si lo, Jivan-a ni se a tho tawh nain a room lamah a la awm rih a niang, ka hmu miah lo.

Ka en chuan chhe lo deuh, polite deuh si kha a lo ni a, a lo nui sak a, tuilum chu thlitin làwm thu a sawi zauh a, a kal sawn a; mahse, choka a la chhuahsan lo thung. Hetah hian in zawh a tum a ni mahna. Nizànah a riak tihna a ni ngei a, khawi room-ah nge a mut ang? Pu ber bialnu a nih chuan room hranah chuan a riak tawp lo ang le. Tûnlaiah te chuan riak dùn mai mai an tam a, engah vak an ngai tawh lêm lo ni maw, rai zui lah hi hriat tùr an awm dèr lo thung a.

Pu ber lo haw thleng chuan rawng ka la bâwl a, haw hma ka tum ve nèn, a theih ngang loh, tukin chu chawhmeh ka siam tam deuh hlek a, pu berin mikhual, khual vak lo a nei bawk si a, siam lam ka ãm ta a ni. 

Ka haw dâwn chuan pu ber chu a mikhual polite-i chuan a bânah chelhsakin eng eng emaw a hrilh sep sep lai chu ka hmu a, a chângin a nui a, ka nui ringawt. Hmeichhe ngaihsak lo leh melh lo ve bawk hi, a cousin lakah chuan a lo inthup thiam viau a lo nih chiah hi; mahse, a inthup rei thei hauh lo ang le, chanchin Mami hrilh erawh ka tum chuang lo.

*J-a kha maw, a nupui Tluangtei'n a boralsan tawh a, a boral chuan neih pawh an la innei rei hman lo, dàwra a kal haw lam kawng sîra a kal lai chu motor chak zeta tlãnin a rawn hnâwl a, ka pawh chhàwn lovin a boral zui ta a ni, chutih lai chuan J-a hi hna thilah Aizâwla a phei lawk a tum nghe nghe a, Tluangtei chuan naute thla thum mi paiin a kalsan a nih chu, an khawngaihthlâk dùn asin aw... J-a hian a át phah lo chauh a ni*

Heti teh dep hian min la hrilh hauh lo, pathlawi a nih thu kha chu min hrilh ngei a, hmeichhe pakhat chauh a ngaihtuah thu min hrilh tel bawk. A chanchin dik tak han hriat chuan a lo khawngaihthlâk kher mai, a nupuiin a boralsan bâkah an fain a thih phah bawk a nia....

*I HRE NGAI EM? MI ZAKZUM VE  TAK THU SAWI I NGAITHLA A, A RAWN EN FUH PALH CHÂNG CHEA I LU I LO BÛK NGHAT NGHAT HIAN AMAHAH SAWI ZÊL TÙRA INRINTÂWKNA LEH HUAISENNA I PE A NI*