☆MIN EN LA☆ - 8 By Dingdi Pachuau

 ☆MIN EN LA☆ - 8 By Dingai Pachuau

Pu ber hi vawi khat mah ka la ko lo va, a hming pawh hi ka la sawi ngai hek lo. A chanchin ka hre ve ta nual  a; mahse, Mami hnên ațanga ka hriat mai hi a ni a, Mami sawi dàn leh a nungchang, a awmphung hrim hrim hi inang lo ka tih êm avàngin a chanchin min hrilh tam zâwk hi chu thu dikah ka ngai hran lo va, nupui nei tawh lo (pathlawi) a nih hi chu ka ring thlap, hmeichhe ngaihsak lo tih lai tak erawh hi chu ka ring hlei thei lo chu a nih ber hi.

Mahse, ngaihsànna tak pakhat ka nei ve tlat. Driver a chhawr miah lo va, amahin a inkhalh chhuak a, a rawn inkhalh haw leh mai a, ani ang officer chin chuan driver pakhat tal chu a kawl theih ngei ka ring a nia, a kawl duh lo a ni ngei ang, bâkah, mipa ve si, a mutpuan a phah mar țha thei ât ât lutuk tlat bawk.

Ni khat chu a dawhkàn ka nawh fai laiin dawhkàn chunga lehkhabu inrem țhât chu chhuatah ka nêk thla palh ta hlauh mai a, keh thei a awm leh awm loh leh chhia a awm em tih chu hlauthãwng tak hian ka check vat vat a, ka rem țha leh malh malh a, lehkhabu kâra lehkhapuan khawng vâr țha taka hawrawppui mawi zeta thu ziak chuan ka mit a la ta zar mai. 

❤ZONUN❤

Tu nge 'Zonun' a tih hi le? Ka han ngaihtuah leh rih a, hmeichhia a nih ngei chu ka han ring ngawt pek a, a nupui kha chu Tluangtei tih kha a ni ngei si a, Zonun a tih hi tu chu nge ni ta ang? Polite-i kha a ni thei ang em? Ka han lek kual vat vat a, card siamchawp a ni tih ka hriat chuan a ma siamchawp ngei a nih ka ring nghâl. Kèu theih a lo ni nghe nghe a, ka han keu chiah chu inthiam lohna ka nei thut a, khup lehin dawhkànah chuan ka dah thla ta riai riai a, a thu hmu lova a thil ziak lo chhiar ve ngawt chu a káwlhràwnthlâk deuh mah mah a ni.

Mahse, ka dah fel hnu pawh chuan chhiar chãknain min tur ut ut reng mai a, chhiar ringawt chu a pawina a awm dâwn em ni? A hre chuang nâng, ka chhiar tih ka hrilh loh phawt te chuan.

Ka ban leh ta nge nge a, kut khùr deuh dar dar chuan ka han kêu dâk dâk a, hetiang hian a lo inziak a. 

*HAPPY BIRTHDAY IN HEAVEN, MY LOVE.  Losing you was one of the hardest things I had to go through but I take comfort knowing you're in heaven now and at peace*

*Ka tel lova vàn rama i piancham i hmang tùr chu ka lawmpui rual chein ka va tel ve châk si êm! Ka hmangaih, ka va ngai che ëm! Ka ngai tak zet che, Zonun. Pathian hi a awm tak tak a nih ngai chuan vawi khat tal hmuh leh theih che min lo dìlsak hrâm teh aw, i tel lova nun hman hi harsa ka ti êm mai*

A thil ziak chuan ka thinlung chhûngril ber chu a nghawr nghîng dawt dawt mai, a nupui, a hmangaih êm êm piancham lo thlen nîa a ziah a ni tih a hriat hlê si a, a nupui thlah har a tihzia leh a kalsan ta chu hrehawm a tihzia ka zu hriatpui thei hialin ka hria; mahse, thihnaah kher hi zawng, mihring hian tih theih kan nei dêr si lo, a tàwp chiang ëm asin. Thihna hi chuan tu mah a thiar si lo, nupa inhmangaih tak leh inthlahlel êm êmte pawh a pawt țhen țhìn tho si a.

A nupui kha a lo hmangaih tak zet a lo nih chiah hi, he a thil ziak hi a ziahna a rei tawh ang em? Ka han en kual leh vat vat a, a sír deuha kum zât inziak chu ka hmu ta chiah a, kumina mi ngei a lo ni, chuti a nih chuan Mami sawi kha a lo dik ngei mai ka ti rilru vawng vawng a. Hlim hmêl a pu ngai miah lo tih leh a nui hmël ka la hmu ngai miah lo tih chu ngaihtuah chhuak lehin a nupui hre reng leh ngaihtuah reng chung chuan a tân zawng hlim a harsain nun a harsa dâwn êm a lo ni, a nungchang nèlawm lo zet leh țawngmawh zet pawh hi a lo àwm ta viauin ka hria, hriat thiamna chin ka nei ta tlat; mahse, thil pakhat hriat thiam loh ka la nei tlat. Mami khân J-a nupui hming kha Tluangtei ti khân a sawi ngei a, tuna mi hi chu Zonuni a ni daih thung si! Mi thuhmun ni reng thoin koh dàn a inang lo a ni thei mai ang em?

Kha card-a thu inziak ka chhiar ațang kha chuan hriat thiamna nèn ka en rem chho thei ta hret hret a, quarter-a hmeichhia rawn kal țhìnte pawh chu anmahni thua rawn kal ve mai mai an nih ka ring ta a, pu bera hi chuan rilru tak taka a kawm theih ka ring ta hauh lo. Ti khawp khân a nupui boral ta kha a hmangaihin a la theihnghilh lo chu a ni si a, tu hmeichhe dang mah hian a rilru an kawih hersak thei hauh lo ang le.

Ka thil chhiar rûk chuan ka ngaihtuahna a luah chho ta reng mai a, Mami'n a chanchin min hrilh țantirh kha chuan engah vak ka ngai lêm lo a nih kha, a chhan chu a chanchin aiin a nungchang leh awm dàn khân thu a sawi tam zâwk ka tia, amah pawh ka ngei lek lek hial a ni; mahse, tunah chuan a thil tawn ka hre chiangin a rilru ka hre chiang tawh a, a awm dàn hi hriat thiamna chin ka nei tawh, ka khawngaih phâk ni lo mah se ka khawngaih ta deuh tlat a, a tân tih theih nei lo mah ila tui taka eirawng bàwlsak leh a in fai taka enkawla a tân ninawm zàwnga khawsak loh ka tum ta tlat a ni.

*******

"Nula fel tak chu i ni tiraw? Hrehawm pawh pawisa lovin i naute chãwmin i hun leh thâ i sêng a nia, i ngaihsànawm ngawt mai, i chhel pawh ka ti viau a ni," Nunhlima'n a tih chuan ka nui sak a,"Ka lãwm e. Fel tak ka ni chu ka ti hran lo; mahse, ka naute leh ka chhûngte chãwm theia ka awm hi vànnei ka inti a, ka hlim bawk a ni," ka lo ti ve mai a.

Nunhlima nèn pawh hian kan inkàwm ngun ta viau a, kan chanchin min zâwt ve fo a, zêp thu awm bîk hek suh, ka hrilh ve nual tawh a, a zawng zawng erawh chu ka hrilh kêlh bîk lo. A chanchin pawh ka hre ve nual tawh a, an ina lêng ve tùr pawhin min sâwm ve fo a; mahse, ka zah deuh bâkah hun ka nei lo va, Pathiannî hi ka hman ve deuh nî ber mah ni se kohhran țhalaiin fellowship kan nei deuh ziah a, bâkah, in ka awm ve theih nî bera Zotei chhuahsan ziah pawh chu țha ka ti lêm lo va, ka la hnial tluang zêl a ni.

"Kan ina lo lèn hi i hreh ni berin ka hria, ka chhûngte pawhin hmuh che an châk a, min hnial zêl lo la," a rawn tih chuan," Ina ka awm tam lohzia i hriat tawh kha, bâkah, ina ka awm ve theih nî bera Zotei han chhuahsan leh daih hi țha ka ti chiah lo va," tiin thu dik tak chuan ka chhâng a. Ani pawh chuan," A dik reng mai; mahse, engtik niah emaw tak chuan la rawn lêng r'u aw, Zotei pawh a rawn kal ve mai ang a, ani pawh kan inah a la rawn lêng chuang hleinem," a lo ti leh a," Nia, hun remchângte pawh a la awm zêl ang chu," ka lo ti ve a.

Krismas hma ngeia an ina lêng ve ngei tùr chuan min ngèn a, Zotei a cho phûrin a sâwm bawk a, ani lahin thil awmzia a la man thiam lutuk si lo, a lo châk nasa niin, hnial theih ni tawh hek lo le, kan lêng  ta ngei a. A nu leh pate pawh an lo awm a, min lo be siam siam a, an zaidam si a, an bula awm a nuam khawp ang.

*******

"Krismas-ah i haw ang em?"

Ka en vat a, chutia min biaa chutiang thil min han zâwt chu mak ka ti ru kher mai. Ani erawh chuan min en lovin chanchinbu a keu a, a chhiar ngei em tih chu ka hre lo, a en lâwr dun dun ni maiin ka hria.

"Haw ve àwm tak."

"Chêkàwnah tiraw i awm kha?" a rawn tih leh phei chuan mak ka ti nasa tawh mai. Ka awmna, kan khua a hria hi mak ka ti lo, min bia hi mak ka ti zâwk! Pângngai taka min biain zawhna min la zâwt zui a nia, a țawng mawh tehlul nèn, a piangthar thut a ni thei ang em?

"Aw..."

Chuti zawng chuan kan inbia. Chanchinbu chu a en kual reng a, mitsìr ru zauh zauhin keiin sitting room chu ka tifel a, a awm ve reng avàng chuan zài châk viau mah ila a bulah hi chuan ka zai ngam tawh lo, thiam lo min tih tawh kha.

Inrinnî a ni a, a chhuah daih ka rin tehlul nèn, a chhuak lo teh tlat a. In ka tihfel lai hi chuan awm miah lo se ka duh, chhuak se, ka haw hnuah rawn haw ve chauh se...

"Zanriah mi panga ei tùra siam a ngai ang," tih pahin a tho zui ta nalh a, a room lam panin a kal ta a, ka en zui vang vang ringawt. Khatiang kha chu frigde kawngkhàr mawitu atân a hman leh mai ka ring a nia, ţawngka ngeiin min hrilh ve teh tlat a! 

Jivan-a'n a ţhianpa, quarter bul vêla thlai leh pangpár enkawltupa damlo a tlawh avàngin a rawn haw har a, a awm loh hlàn chuan keiin mikhualte chaw ei chu ka lo buaipui ve thung a. A hman loh thu a sawi châng leh amah pui tùra min sàwm hi chuan hnial ka tum lêm lo va, remchàn loh pawh ka tum lo, kan theihnaah chuan kan inpui tawn ve ang chu.

A țhiante chu an mipa pahnih leh hmeichhia pahnih an ni a, a țhiante ni vek tùrah ka ngai a, an polite hlawmin an fel hmèl viau mai, an titi dàn ațang chuan mi mai mai chu an ni lo tih a hriat theih a, a chângin sâp țawngin an titi a, an nui a, vai țawng nèn an pawlh kual a, an ri bawrh bawrh hlawm mai, hmeichhe pahnih pawh an duai bîk lo, an dang a nãl hlawm bawk a, an thil sawi chu ka hre chiang ve hman lo.

Pu ber erawh chu a țawng ve mang lo, a țhiante an nuih châng pawh chuan nui pawh ni lo hian a țhen ve deuh sak sak ringawt a, chu chu nuiah ka chhiar ve thei hlek  lo. A thinlung chhûngril ber a hlim tlat lo va, hetia a bula a țhiante nui hawk hawk kárah pawh hian a malin chhûngrilah a rûm vawng vawng țhìn hialin ka ring.

Chaw ei kham veleh chuan in lam chi an rawn phawrh chhuak ta tlat mai, pu ber in lai hi la hmu ngai lo mah ila a in ngai miah loh chu ka ring hran chuang lo, officer a ni a, a àwm táwk in ve thei a nih ka ring țhìn a, tunah pawh hian a dawm ve ta ngei bawk.

Ka lo en ngun deuh bawk a, lem hnih chu a lem ve tih ka lo chhinchhiah kar a, a bâk erawh chu a in hauh lo; mahse, a țhiante erawh chuan an chanpual chu an khulh zo vek a, bottle an rawn phawrh pakhat pawh an in zo vek nghe nghe a ni. Zu in kher hi chu țha ka ti lo khawp a, pu ber quarter pawh a zahawm loh phah thei a, room dangah a rûk deuh taka in chu ni se chuan tu va thunun theih va ni hek lo le, an lo in ve a ni mai.

Thlèng ka seng fel hmain Jivan-a a rawn haw ve ta hlauh mai a, lawmthu min rawn hrilh nghâlin a damlo kan chanchin chu a sawi luam a, min rawn chêtpui nghâl bawk a. In lam chi an inna no chu hnìmin," Tui an va ti leh khep khep dâwn ve!Tuna a țhiante rawn kal sâwn an rawn keng leh a ni chiang mai, an rawn keng ve ziah," a ti sar sar a.

"A hma pawhin an rawn kal tawh a ni maw?" tia ka zawh chuan," Aw, kal tawh e, tûn hi an vawi thum lo kalna a ni tawh, an fel hlawm lutuk nghe nghe asin, in ve tho mah se rùi khawp leh nungchang hloh khawpin an in ngai lo, intihhlim nân an hmang a ni ber ang chu," a lo ti leh a.

Ka pum a rawn rîk rawih rawih tâkah chuan  chaw ei tùrinn Jivan-a chuan min hrilh a; mahse, Zotei amah chauha a awm thu leh in lama min lo chhum kêp thu chu ka hrilh a, min nawr lui ta bík lo; mahse, haw hnua zanriah han ei leh chu duh ai chuan a tlai deuh hret tawh chu a ni.

A tûkah pawh chuan mikhual dang a nei leh a; mahse, ei tùr siam a hautak lo. Ka ei siam hi a tam zâwkin ei thei se, tui taka ka siam theih chuan nakinah hotel emaw restaurant emaw pawh ka la din duh maithei a, hetia mi ina inhlawhfâk tawp hi chu a fuh reng bîk lo ang.

Chawhnu a ni a, fellowship-a kal tum chuan ka insiam a, room-ah chuan zai rât rât pah chuan ka hmai chu ka chei ve deuh a, chutih lai chuan pawn lama inbe thãwm chu ka hre zui a, Zotei'n," Fellowship-a kal tumin a insiam mêk a," a tih rî chu ka hre thei bawk a,  Nunhlima'n motor-in min rawn hruai ang a, kan bàn har loh ka beisei, Zotei fel viau mah se amah maia a awm tùr chu țha ka ti viau lo, ka kalsan tawh lo ang, tûn chauh hi kumin atân chuan ni tawh rawh se.

Room ațanga chhuah chuan kan țhut khàwmnaa Pu ber lo ding run chu ka hmu chawpchilh nghâl a, ka zai pawh a zuih ral nghâl bawk. Makti tak hian ka en hû ringawt a, eng nge a lo tih dâwn, eng nge a duh tih pawh zawh nachâng ka lo hre lo; mahse, amah zâwk chuan," In chu a nawm ve reuh hi le," a rawn ti chhuak a, a hawi kual pah a, kei chuan," Aw, nuam ve reng, a zau țha bawk a,"ka lo tih zawm ve a, a hawi kual chu enin hetiang mai mai sawi tùr hian a rawn kal chu ka ring chiah lo, a rawn kal vawi khatna a ni a, eng emaw tih tùr a awm a ni ngei ang; mahse, ka záwt duh lo, amahin sawi chhuak rawh se. 

A hnu deuhah chuan," Zanriah ei tùr mi sàwm dâwn lai ka nei dâwn a, vawiin tlai chu i kal hman loh hmèl riau mai," a lo ti vut a. Ka ring dik chiah, thil eng emaw pawimawh sawi tùra rawn kal a nih ka ring rêng a ni.

"Mahse, Pathianni tlai lamah hi chuan zanriah ei tùr ka siam ngai loh kha," ka lo ti thung a, ani chuan," Ka hria; mahse, vawiin chauh chu ti hrâm la, bâkah, a țhen țhente pawhin an pui thei ang che," a ti leh a.

Ka ngawi vang vang a, ka hmui chu ka pet deuh fan fan bawk a, chhàn mai dàn tùr ka hre lo a ni. Kekawr ipte zen run pah chuan," Thil harsa siam a ngai lo, puitu tùr che pawh an awm nual dâwn, ti hrâm mai rawh, bonus i dawng ang," a lo ti leh a, min rawn en rùn bawk a.

Min rawn en chuan ka hawi sawn ta daih a, ka hnial thri dáwn si lo va, ka chhâng buh nuai tùr chu ka duh lo. Bonus a sawi a, ngai ka ti hauh lo, a hnuaia thawk ka nih angin ka tih ngai lëm loh Pathianni tlaiah eirawng ka bâwl dáwn tihna a ni mai a, thil harsa lua a awm lo; mahse, min rawn sâwmtu tùr Nunhlima ka hrilh erawh a ngai thung ang, a rawn thleng țêp tawhin ka ring.

Mahse, ka hrilh hman  hma chuan kawtah motor a rawn ding ta tlat mai a, Nunhlima a ni ang tih ka ring a, a lo ni rêng bawk a. Min hmuh chuan nui sâng hian," I lo inpeih tawh maw?" a ti phawt a, pu ber chu a hmu zui lehnghâl zat a ni ngei ang, a ding deuh hlek a; mahse, a rawn kal leh a, Pu ber chuan a lo en ve vung vung a.

Thil awm dàn ka sawi lai chuan a ngawi deuh reng a, min melhin pu ber chu a melh leh zauh zauh bawk a,  ka sawi zawh chuan," A nih tak chu, remchàn loh tlat chuan tihngaihna awm hek lo le," Nunhlima chuan a lo ti a, chutianga a sawi chu ka ring rêng a ni.

"Ka ring che," tiin pu ber chu hawi sawn map lo hian kan in ațanga chhuah chu a rual zui nghâl a, a chhuah hnu chuan Nunhlima hnênah chuan," A pawi ka ti hle a ni, Krismas haw hmaa vawi khat tal rawn tel ve leh hrâm chu ka duh viau asin le," ka ti mawlh mawlh a, ani chuan," I pu chu ka rin aiin a la naupan hmèl daih mai, patling pui tawh a nih ka lo ring ve ngawt a," a lo ti daih thung a.

"Ni nâng."

Min rawn enin," Tlangvâl em ni a la nih a?" a rawn ti leh a, kei chuan," Nupui a nei tawh a; mahse, a nupui chuan a boralsan tawh thung, a pathlãwi tihna a nih chu," ka ti ve leh mai a, ka nui pah deuh a.

*I KAWPPUIIN A BUM CHE A NIH CHUAN, IN PAHNIH INLAICHÌNNA AIA NGAIHPAWIMAWH ZÂWK A NEI TIHNA*