☆MIN EN LA☆ - 9 + Bonus By Dingdi Pachuau

 ☆MIN EN LA☆ - 9 By Dingdi Pachuau

A awm rei lo, a chhuah dâwn chuan ka kal theih loh avànga pawi ka tih thu chu ka hrilh leh mawlh mawlh a, min rawn lam ve bawk sia, hrehawm ka ti viau rêng a ni. Ani erawh chuan hun dang remchâng a la awm leh mai tùr thu sawiin," Zànah ka rawn bia ang che," a ti leh a, a tlàn liam thleng chuan ka en zui vang vang a.

Ka inthlâk leh rih a, Zotei rawn lût chuan,"U, nichina rawn kal kha pu ber chu a ni em?" a rawn ti a," Umm..." tia ka chhàn chuan," A pà tawp, a inthuamna khân a tipà zual, pathlawi i ti em kha?" a rawn ti leh a.

"Umm..."

"Nia, a upa ve tawh tih a hriat, tlangvâl a nih ka ring lo rêng a ni. Miin 'Pathlawi zùna uai chu a na duh' an ti sia, a zùna uai vêk vêk chuan hrehawm an ti viau dâwn a nih chu," a rawn ti chhuak teh rêng a! Ka en vat a, ani ang kâ ațanga chutiang thu a chhuak thei chu mak ka ti a ni, a la naupang si, khawi ațangin nge a lo hriat ve ni!?

"A rawn bia che em ni?" ka tih chuan," Aw, bia e.  A rawn tih dàn chu maw,' Bawihi, Rêngpuii nau i ni maw?' a ti phawt a, ka ni tih ka hrilh chuan,' In inang hle mai,' a ti leh ringawt a, a nui suk zui a, hetiang hian," tiin pu ber nuih dàn chu a'n zir leh rih a. Mak ti ru tak hian," A nui maw?! Kha pa kha a nui maw?!" ka lo ti vat a, ani lah chuan," Aw, a nuih dàn pawh kha a pà ka ti, Mâma nui nèn chuan a inang teuh lo mai!" uar zet hian a ti leh a, chutah," Mahse, pathlawi a nia, Mãma nèn chuan tehkhin chi pawh a ni lo," a ti leh a.

Ka chhuak phei ta thuai a, mi 10 dâwn ei chu siam ve nual a ngai dâwn si a, la hma deuh angin lang mah se thlasik khua a ni tawh a, hma deuh emaw tih hian khua a tlai thut zêl tawh si a, zanriah an ei hma thei lo palh ang.

Chawhmeh chu ka buatsaih zung zung a, bai tùr ka buatsaih laiin chokaah chuan a rawn lút phei a, ka lo en zawk chauh. Ka thil siamna bulah chuan a rawn ding ve rèn ráwn a, ka en lo nain a mi dîp chu a nâ ka ti, min chhawrtu a nih vàng pawh a ni mahna!

"An rawn pui thei thuai ang che," a tih sup avàng chuan ka en chho ve rih a, Zotei thil sawi kha ka hre chhuak zawk zui a. A inthuamna khân a tipà a ti a nih kha, ka han en ve zawk pawh chuan a pà leh pà loh ka hrethiam ve lo, a dum hlîrin a inthuam a, kei chuan Choâk ka hre chhuak! Rawng dum aiin rawng vâr hi a thianghlim a, ka ngaina daih zâwk bawk, dum zuar ringawt maite chu a...

A mikhual tùrte  ka ti mai, zanriah rawn ei tùrte chu an rawn thleng ta thuai a, khawi ațanga lo kal nge an nih tih leh a chhûngte nge a țhiante tih lam pawh ka ngaihtuah lo, tui ti taka ka eirawng bàwl chu an ei theih ka duh ber, chuvàng chuan ka uluk viau a ni. 

Hmeichhe pahnih leh mipa pakhat hi min pui tùr chuan an rawn phei ve ta a, sil ngai, vel ngai leh chan ngaiah min pui a, siam tak erawh chu keimah ngeiin ka siam thung. An la upa vak bîk lo a ni tih an titi dàn ațang chuan a hriat ve theih a, pu ber țhian leh a kawm țhinte chu an ni lo ang, han inkàwm meuh tùr chuan an la nau deuh êm mai. An fel ve viau hlawm a, min biain tih ngai min zâwt a, min ko bawrh bawrh mai, kei pawhin ka nêl ve thuai, min ko bawrh bawrh na nâ nâ hi chu nèl loh an har a nih hi.

Chaw an han ei a, dawhkànah leng vek hek lo le, a țhen an inchawi a, a naupang deuhho an inchawi ni berin a lang, kei pawh chu ei ve nghâl tùrin min ti a; mahse, ei ka tum ve lëm lo. Puar takin, tui ti takin ei se ka duh a ni mai. 

"Ei ve nghâl rawh," pu berin a rawn tih leh chuan," A ngai lo ve, Zotei'n min lo nghâkin ka ring," ka ti tlat a, mi dangte pawh chuan," Âwihawm loh êm mai, thlèng han la ve nghâl rawh, a siamtu ber berin i ei lohte chuan a dik nâng," an lo ti ve tliar tliar a, kei chuan," E, kei chu min ngaihtuah s'u, tui tak leh puar tak khân ei țeuh rawh u, in ril a țâm tawh àwm si a," ka ti ve leh a.

Pu ber chu rawn tho vutin chhuara thlèng a rawn la ta mai, chaw chu khawrh pahin," Ei rawh," a ti a, a chaw khawrh sa chu ka ban theih tùr chuan a rawn chawi kãng a, zak ru tak chuan ka han hawi kual deuh phawt a, mi dangin min en țhap avàng chuan han hnial leh pawh chu nuam ka ti lo, ban loh theih ni tawh lo chuan, ka han la ve ta a.

Chaw ei pah chuan chawhmeh suah ngai a awm em tih chu ka ngaihven pah reng a; mahse, hmeichheho chu an fel khawp a, ka che hman mang lo. Bâkah, an heh lo hlawm khawpin ka hria, khawpui mi leh changkãng deuh chin hi chuan chaw hi an lo ei tlêm deuh chu a lo ni, keini ang thingtlânga sei liante hi chuan kan lim nghek zêl mai chu a nia, kan inang lo ve khawp mai.

Chaw ei khamah pawh hmun min tihfelpui vek a, an puar thu leh chawhmeh tui an tih thu chu an sawi tliar tliar a, chutih rualin min fak pah bawk a, kei pawh hlim takin ka nui ve var var reng mai. Fakna thu-ah tùm búr thu awm hek lo le, khiang rah tla ang maiin ka khi sûng reng mai a ni.

Polite-i a rawn lang ve hlawl mai a, a rawn lút deuh chiah tihah chuan sana ka en nghâl a, ka haw a hun tawh tih ka hria. Zotei chanchin ka hrilh mang si lo va, chaw ei tùra min lo la nghah reng phei chuan a fuh vak lo ang, tih tùr ka nei tawh lo bawk a, ka haw ta thuai a. Ka haw tùr chu min thlah ve liam liam a, an fel hlawm tak tak a ni.

Zotei chuan min lo nghâk lo teh mial a! Min lo la nghâk ni se chuan a ril a țâm tawh ngawt ang," I hna thawh loh níah thawk tùrin a rawn ko che a,  chaw eiah a sâwm nghâl lo che a nih chuan mi hawihhâwm lo tak a ni tihna a ni dâwn asin," a ti tlat a, ani tê hi eng eng emaw hi a hre ve tlat, ka tluk lo thuai thei mai dâwnin ka hria!

Nunhlima chuan inkhâwm bànah min rawn be ta ngei a, an fellowship boruakte chu ka han zâwt a, a nawm viau thu sawiin mi dang dangin ka kal ve an rin thu leh ka lan loh chhan amah an zawh thu chu sawiin," Ka hre ber tùrah an ngai hlawm a ni chêk ang chu; mahse, ka hre ve tho bawk sia," tiin a rawn nui a, kei pawh chuan," Ni e, nang lo chu hria an awm tawp nâng," nui chung vêk hian ka ti lêt ve a.

Pu berin 'Bonus' a tih kha a lo ti tak tak a! Ka Account-a a rawn luhin Rs 1,000 laiin a pun belh tih ka hmuh chuan tam ka tiin ngai lo ka ti khawp mai a, ka hna kaihhnawih tho a ni a, thil harsa lah a ni hek lo. Han pe lêt dâwn ila, a duh àwm hauh si lo va, rilru inkhâp rengin ka awm, han biaka sawi chhuah ka hreh deuh si, han ngawih bopui mai atân lah chuan tam ka ti bawk si, bâkah, làwmthu sawi pawh a ngai rêng rêng bawk.

Biak hmasak chu ka hreh viau nain sawi ngei țha ka tih avang chuan hun remchâng ka neih veleh chuan ka sawi chhuak ta a, ka sawi chîbuh  nuai nghe nghe a, ani chuan," Ka sawi tawh a, ka hlen ve ang chu!" a lo ti mai a, kei erawh chuan," Ni tho a; mahse, a tam lutuk alawm," ka ti ve thung a.

"Rs 1,000 ai chuan Rs 10,000 a tam zâwk lo maw?" a tih leh chuan ka en vat a, fiamthu a thawh ve a nih ka ring deuh a; mahse, a hmêlah chuan chutiang chu hmuh tùr a awm hauh lo.

"Miin an phal a, an pêk che chuan la mai rawh, làwmthu ka sawinaah i ngai dâwn nia, làwmthu hi ka sawi zen zen lo a nia," a tih leh kalh kalh chuan ka ngawi ta reng a, ka țawng zui tawh lo. Ni e, a lãwm viauah ngai mai ang, sawi zêl chuan a thinte hi ka tirim palh rêu rêu ang, a hlauhawm hmel ropui mai si a.

Zotei hi matric exam tùr a ni a, kan khuaa haw chu châk viau mah se a haw chuan lehkha a zir tam theih loh a hlau a, a haw chuan țhiante a kàwm lo thei si lo ang a, exam-naah a tihchhiat phah a hlau a ni; mahse, ka thiam ang tâwkin ka hrilh fiah ve a, chhûngkua kan inhmu khâwm lo rei ve tawh a, kum khat chhûnga kan nghahhlelh ber hunpui lo thleng chu chhûngkaw kim ngeia hman tlàn a hlutzia leh a pawimawhnate chu ka hrilh ve a, kan khuaa kan awm chhûngin a duha a peih phawt chuan lehkha chu a zir theih reng tùr thu ka hrilh pah bawk a. 

Pu ber chuan Krismas bazàr nân tiin ka hlawh tùr aia tam min pe a, hnial ka duh viau laiin a thil sawi kha ka ngaihtuah chhuak lo thei lo va, ka sawi nãwi ngam ta lo va. Hlim ru tak siin eirawng chu ka bâwl a, ani pawh naktûk maia Aizawl lam a pan tawh dâwn avàngin office a bâng hma a, a insiam ve bawk a, keini unau erawh chu naktipah kan haw ve dâwn thung, ticket pawh kan tifel vek tawh a, haw hlàn ka nghâkhlel tawh tak zet a ni.

"Engtikah nge in rawn lêt leh theih ang?"

A lam chu ka hawi vat a, ani erawh chuan lehkha pawimawh ni àwm tak hi a lo sam thung a, min rawn en lo.

"Ka hre rih lo, Zoteite hian class an țan hma deuhin ka ring a, an țan hma nía rawn thlen hman ngei chu a ngai ang," ka ti duah a, bâwnghnute ka chhuan lai chu a so liam țêp avàng chuan gas chu ka sim thuai a, ka chhêm pah bawk a.

Ka haw hma chuan Polite-i a rawn lang leh a, a rawn nalh lehpek khawp mai, a rawn lan zin theih dànah hian Lungleia mi a ni ngei ang, pu ber nèn hian an inhre țha viau a nih ka ring, mitmei hmu lo ni se a rawn kal zutin ka ring lo, eng emaw tak chu an inkârah hian a awm ngei ang. Ni e, nupui nei lai a ni tawh hleinem, a hlimna a ngaihtuah ve ang chu, dik lohna a awm hek lo.

Zànah Nunhlimate țhian dùn an rawn lêng a, nakzàn lamah chuan hun thâwl a awm thei tawh àwm si lo va tiin inthlahna hun kan hmang ho a, ei tùr an lei a, coffee nèn, hlim takin hun chu kan hmang a, kan hlim tlàn dar dar viau vàng nge, rei lo tê emaw tih chhûngin hun a lo kal leh duak a, kham lo takin anni pawh chu an haw ve ta thuai a. Pâwn thlengin ka thlah a, an tlàn liam thleng chuan ka thlír zui a, a hnuah ka lût ve chauh. Anni hi awm lo se, kohhranah leh țhalaiah pawh kan la mikhual viau ang a, Lunglei pawh hi nuam kan ti viau lo maithei a ni, kan tâna Pathianin a lo ruat liau liau an ni ngei ang chu.

A tûkah chuan Zotei pawh a class ta lo bawk a, muangchângin haw thei ve mai tùr chuan kan insiam a, haw hlàn chu ka nghákhlel tawh tak zet a ni, kan in ka ngai tawh a, ka nute leh ka naute pawh, chutiangin kan khua pawh ka ngai bawk, ka haw hunah kohhran hunah chuan a tam thei ang bera inhman ka tum ngei bawk ang.

Chhunah chuan Jivan-a tlawh pahin pu ber quarter-ah chuan ka va phei leh lawk a. Ani pawh Aizawl lam panin a lo chhuak daih tawh a, in pawh chu a reh ve deuh ruihin a hriat. Jivan-a chuan kan haw hun tùrte chu min lo zâwt a, ka hrilh chuan," Tluang takin in haw ang a, in lo lét leh thuai dâwn nia," a ti a,  ani hi chu a haw ve dâwn lo va, amahin quarter-ah hian Krismas a hmang dâwn a nih ber chu; mahse, lunglèn hi a nei ve lëm lo va, a khua a har ve deuh châng lahin a nupuite video call kha a ni leh mai.

Room chu ka fang thuak thuak a, Jivan-a'n," Ka lo tifel vek ang, haw tùr chuan insiam fel zâwk rawh," a lo tih chuan," Ka insiam nual tawh, ka han tifel thuak thuak zâwk ang e," ka ti a, pu ber room chu ka tifai hmasa ber phawt a, mikhual room lamah ka kal leh a, khum lo hnawk deuh niai avàng chuan nizàn lamah mikhual a nei a ni ngei ang, Polite-i kha a ni thei ang em? Ani kha a riak tihna em ni? A ni ngei ang. Khumphah chu pawt marin rizai ka han thlep dâwn a, a kâra puan dum ka hmuh chuan ka han pawt chhuak a, hmeichhe mutkawr dum, a hma pawha ka hmuh tawh ang ngei kha a lo ni! Anni pahnih hi an riak dùn a ni ngei ang.

Ka haw dâwnah a room dawhkàna card-a a thil ziak kha ka va chhiar leh rih a, a thu ziak hi mawi ka tiin ka thinlung a dek êm a ni. Ani tân chuan khawvêl hi eng mah lo mai a ni chu ka ti lo nain hlimna a vâng tawh dâwn êm a, hlimna chhar tuma a tlãn a nih pawhin ka dem thei lo ang. A tawrh ang tuar hi chu an awm ve tho ang a; mahse, ani hi chu a dang tlat, kum heti chen a ral hnuah pawh hian a hmêl leh awm dànah a la hriat tlat, a nupui, a kianga awm ve ta lo a hmangaihna chuan mi khawhar leh mal takah a chhuah lo thei ta si lo va, a khawngaihthlâk ka ti a ni, hlimna hi pawisaa lei theih ni se chuan...

Kan khua, kan in kan han thleng leh zet chu kan hlimin kan ri chèl chùl mai a, inhmuh loh chhûngin Mercy pawh a lo țhang ve uak mai, putea fate  lah chuti bawk, an chêr țhai hlawm a; mahse, an harh êm êm tho.

Sângpuii leh Zuii pawh an rawn haw ve niin, Sângpuii ka han hmu thut chu ka hai țhelh nghe nghe a ni, phone aiin a takah phei chuan a lo ngo a, a no sur mai. Mak ka ti hial zâwk, heti khawpa a lo ngo thei ta mai hi engtin nge maw a inenkawl bîk ni? Zuii pawh a no ve tho nain ani hi chu a la pângngai deuh, Sângpuii chuan a sam a tibuang pah bawk si a, a inhmeh phian bawk.

Krismas huna Biak in cheina tùr leh biak in cheitute thingpui leh a hmeh leina tùr Zuii'n a tum a, Sângpuii ve thung chuan pangpâr khawi tùr leh light chi hrang hrang a tum ve thung a, kohhranah pawh thawhlâwm an thawh tam thei viau ni àwm a ni. An ti țha khawp mai, thil phalna hi sum neih viau vànga lo awm a ni ngawt lo, rilru leh thinlung lam hi a ni záwk. 

"U Sângpuiite in chhûng nawmzia saw, pawisa an nei bawk a, thil țha ber ber an chah thleng zut zut a, in chhúng chei nân ringawt pawh sâwn an hmang tam tawh viau a ni àwm e," Mâma'n chaw thial pah chuan a ti a, Mercy chuan," Ka țhiante chuan khawvêlah  U Sângpuiite an hausa ber an ti țhìn," a lo ti ve vat a, ka nu leh Zotei nèn kan pathum chuan kan ngawi reng thung. Naupang hriata thil sawi mai mai țhat loh theihzia leh mi sawi an hriat ațanga an rilru puthmang danglam theih tùrzia chu ka ngaihtuah kai daih a.

"U Zuii saw chu a hlawh tam over lo a niang, U Sângpuiite ang êm chuan an in pawh an chei ve lo. U, inkhãwm leh hmasak ber hunah an chhúngkaw thuamhnaw hâk lo en ve mah teh aw, an ha nalhin an ha changkãng thei lutuk!" Mâma chuan a ti leh a, kei chuan," An thawk chhuak tamin an thawkrim tihna a nih chu, thawhrim loh chuan sum a lo awm thei ngawt lo a ni," ka lo ti ve ta thung a.

"Mahse, tûnlaiahte chuan a thiam apiangin pawisa hlâwk theih dàn an hria a, bianga thlan tui luang lo leh hahdam taka thawkin; mahse, anni pahnih hi chu tu mahin eng hna nge an thawh an hre lo, pawisa an neih dàn êm êm ațang hi chuan thla tina an lâk luh hi sawrkár hna thawk tam tak aiin a tam daih, an sâwma pakhat pêk pawh a tam thei khawp, kan thla khat thawh chhuah lo ni ve zâwk ta se tiin ka ngaihtuah fo a ni," 

Mâma chuan a ti leh dap dap a. Ka nu chuan," E lehkha i zir țha ang a, hna i thawh ve hunah keini pawhin tam táwk tak chu kan pe ve thei mai ang," dam thlap hian a lo ti a.

"Túnlaiah chuan hna a vâng tawh êm mai, hna hmu thei tùr chuan mi bík nih a ngai a, MLA hre țha nih a pawimawh viau laiin duhthusàmah phwi chuan Minister hriat nih a pawimawh leh a, mi thiam tak nih loha țha vak lova pass chhuak nih phei chuan hna hi a awm lo rëng rêng," Mâma chuan a ti leh kalh

kalh a. Ka nu leh kei chuan," Chutiang mi bîk chu i ni thei, i tum phawt chuan," kan lo ti ve ve a, kan lo fuih ve a ni.

Ka tum ang ngeiin inkhâwm leh kohhran thil tihah chuan ka tel tam ta rêng a, nuam pawh ka ti. Hei hi chu kan khua a ni a, ka mikhual lo va, min mikhual en bîk pawhin ka hre lo. Keimah ang chiahin Sângpuii leh Zuii pawh an rawn lawr zing, an che ve bawrh bawrh a, a hmaa kan boruak, kan inkára eng eng emaw thil awm kha tunah chuan hriat chhuah a ni tawh lo, thil țha lo lam hi chu theihnghilh hmiah ila, ngaihtuah chhuak duh tawh miah lo ila a țha ber.

Krismas thuamhnaw chu Serchhîp lamah kan lei a, naute pahnih hruaiin anni chuan krismas kawr leh pheikhawk an lei a, ka nu tân puan pheikhawk ka leisak bawk. Mâma chu Kamis ka leisak ve a, kei erawh chu lei ngai ka inti lo, kawr ka ngah lutuk, Singapore ațanga ka hawn pawh hâk loh a la awm nual, kawr ka mamawh ve lêm lo a, ka inlei duh ta lo a ni. 

Krismas chu hlim takin, dam takin chhûngkaw kimin kan hmang thei a, a nuam ka ti. Zaikháwm lah chu a han nuam êm êm khawp mai a, ka lâm lo chauh tak tak a ni. Làm hi chu ka thiam lo ve êm bawk a, nuam ti ve riau mah ila ka tum hlaehchham leh ţhìn.

Kumhlui thlah nân YMA-in field lamah group tinte inelna a buatsaih a, keini pawh kan tel ve. Items chi hrang a awm ve si a, group inelna a ni bawk nen, han tel ve meuh chuan țan a na duh khawp mai. Rs 200 ka thawh ve a, Sângpuii chuan Rs 1,000 a thawh thung. Thawh tlëm lua ka inti lëm lo, chhûngkaw khawsak harsa tân chuan  Rs 100 chhuak pawh hi harsa ve deuh mai a nia. 

Kumthar ni 9-ah Lunglei lamah kan lêt leh ta a, Inrinni a ni a, Thawhțannia Zotei'n school  a țan dâwn avàngin Pathianni hman tùrin min dãl pawh ni mah se class ni khat țhulh pawh kha a uiawm si a, kan phei ta chûk chûk a nih ber chu.

Kan thlen zàn inkhâwm bànah Nunhlima a rawn lang leh nghâl vat a, phone-ah inbe fo mah ila hmaichhanah chuan a hun hman dàn leh Krismas/ Kum thar an hman dànte chu ka zâwt leh tho. Thlen zàna a rawn lëng nghâl thei chu a làwmawm ka ti a, min ngai ve tak tak a nih ka ring hial!

Pu ber chu tlêmin a rawn phei har deuh a, a rawn phei tlaiah chuan mi pahnih tân rawng ka lo bâwl a, ka uluk khawp mai. Anni pawh chu an rawn thleng har lo va, nula nèn bawk a nih ka rin nèn, putar lam deuh nèn an lo ni ve thung a, a pu a nih loh chuan a pa a nih ka ring deuh ngawt a; mahse, ka lo ring dik chiah lo a lo ni, a hmel hriat pawh a lo ni chiah lo va, kawng laka a rawn hmuh niin a rawn phur phei ve tawp hi a lo ni a, chu putar chuan Tlabung lam mi niin a insawi a, an inhre sa lo; mahse, an han sawi an han sawi hnuah chuan Melo-i pasalte chhûng hnai ve tal a lo ni.

Chu putar chu a țawng duh khawp a, min be bawrh bawrh a, ka hmingin min ko a, fiamthu a thawh a, a tìrah chuan ka nui țha duh vak lo va, a hnu  deuhah erawh chuan ka nui ve ta vak vak a.

"Ka tlangvàl țhat lai la ni se chuan nang hi ka chhuah miah lo ang che maw le, i fel tlat, nupui atân tlâk an tih ang chi hi i ni dâwn tlatin ka hria," ka puin a tih chuan zak deuh tak chung hian ka han nui sak a," Ka vànduai ka ti dâwn nge ka vànnei ka ti zâwk ang le?" ka lo ti ve a, ani chuan nui chung hian," Vànnei inti mai rawh, ka chhuah dâwn si lo che a, min duh lo pawh ni la chhuah che chu ka tum dáwn si loh avàngin i buai viau ngei ang," a ti leh a.

Pu ber erawh chu a ngawi ngul reng a, a nui ve chuang lo. Putarin min han chhaih zârh zârh pawh chu a hriat hmèl loh, ngaihtuah ding tak nei a ang, eng tak ngaihtuah ang maw?

"Ka pu engtikah nge Tlabungah chuan i chhuk ang?" tiin ka han zâwt a, ani chuan," Naktûkah khian ka dam a nih a motor remchâng leh seat ka hmuh hlauh chuan," a lo ti a. Kei chuan;" A ni maw? Chuan, in khuaah Krismas i hmang lo tihna em ni?" ka ti leh a.

Pu ber a titi ve bawk si lo va, putara nèn chuan kan titi ta char char a, a nui duh pah ve bawk nèn, a thil sawi kârah chuan nuihna tùr țawngkam hi a zep ve ziah a, kei pawh ka nui lo thei lo.

Ka haw hma deuh chuan," Mikhual room i en fel lawk dâwn em ni ang?" a ti sup a, en ngai chu ka ti tawh lo nain ka en nawn leh ngat a, dah fel tùr leh dah belh tùr a awm lo.

"Ka room i check leh lawk thei ang em?"

Eng a hria chu ni maw? A rawn phei dáwn tih kan hriat ațangin a room ka tifai a, khum pawh a mutphah thar diai ka phahsak a, chutiangin lukham kâwrte pawh a thar vek, thar han tihah hian a fai ka tihna a ni ber zâwk ang chu.

"Ka en fel vek tawh e," ka tih chuan a bu nghat a, fridge chu kâwkin," A chhûnga Polythene vâr kha i khai haw dâwn nia," a ti leh nghut a, thil dang sawi tawh lo chuan putar lam pan chuan a kal zui ta nghãl a. Ka en zui deuh reng a, a inthuamna chu a dum vek a ni a, a inhmeh leh viau tho mai, Zotei'n hmu leh se pà a ti leh khawpin ka ring! Rawng dum hi a ngaina ve viau a ni ngei ang; mahse, kei chuan ka mitthlaah Choâk ka hmu leh tawh thung!!

*I DIK A NIH CHUAN THINRIMNA CHHAN TÙR A AWM LO VE; MAHSE, I DIK LO A NIH VE THUNG CHUAN THINRIM TÙRIN DIKNA I NEI LO THUNG*

☆MIN EN LA☆ - BONUS CHAPTER  By Dingdi Pachuau

"U, i pu saw tu nge a hming?"

"Jakob Lalhruaizêla," ka lo tih chuan," Vawiinah kan hmu a, ka țhiante nèn a nia, amah kha ka lo la hre reng a maw; mahse, a hming ka lo la hre miah lo tih ka hre chhuak thung. A inthuamna inhmeh lehpekzia chu maw, a dum vek kha a ha leh a, ka țhiante pawhin inhmeh an ti râp! An hre ve si lo va, kei chu ka lo hriat tawh avàngin intithei tâwkin ka'n sawi vêl a nih kha," a ti leh a, ka nui ringawt. Ani a hriat avànga han intihtheih ringawt mai chu, kum chhir a la tam loh thlâk êm mai a!

"Mahse, ka duh lo sa phawt, pathlawi a nih vàng hrim hrim pawh hian ka duh thei lo. A hmël erawh a țha tho a, a inthuamna pawh a nalh, a rim pawh kha a tui; mahse... a upa tawh. U Nunhlima hi a fel ka ti daih zâwk, ani chu tlangvâl țhalai a la nia, bâkah, ka nêl bawk a,  a nui duh bawk si. U, a ngaizáwng deuh che tiraw?" a ti leh bawrh bawrh a, a titi chu makti takin ka lo en reng ringawt a, chhàn pawh ka tum lêm lo. Sângin lian ve uaih tawh mah se a la naupang chhiain a rilrua awm awm hi a la sawi chhuak phawng phawng zêl a, Nunhlima lo lèn laia room ațanga a rawn chhuah chângte hian a'n titipui hlut a, a nuihpui vak vak a, hmaichhanah hian fel a tih thu leh fakna hi a chhâk chhuak leh duah țhìn. 

"Mahse, i pu pawh hi a fel tho, chawhmehte kha min pe ve a, ti ila puitling niin pathlawi a ni tawh a, fel ve tùr chin chu a ni tawh tho, nupui tùr a duh leh phei chuan; mahse, tlêm chuan a induh ve deuh chu ka ti, heti chen hi hetah kan awm ve tawh a, vawi khat chauh min la rawn tlawh a nia," a ti leh daih a, ani țhìn hi chu aw! Leh ta mai mai țhìn hian.

"A... Anite chu, rawn lêng tùrin hun a nei ve hleinem, bâkah, officer lian a nia, a buai thei lutuk, hna ni se office lamah a ngah thei viau bawkin ka ring, lêng mai mai hman a ni ve nâng," ka lo ti ve a, 'A hnuaia a chhawr mai mai inah a rawn lêng dûn dûn lo tawp ang' tih erawh chu a hriatah ka sawi duh hran lo. Ani pawh chuan,"Ni ve tho mai, nia, a buai thei viau a nih ka ring, hmuh tùr a awm lo thei êm mai," a lo ti ve leh mai bawk a, chutah, a la duh tâwk chiah lo a ni ang," Mahse, U Nunhlima hi chu a rawn lêng fo a, a hman viau bîk tihna em ni? Hna thawh tùr a nei ve lo a ni ngei ang," a ti leh a, kei chuan," Ani pawh zànah chauh alawm a rawn lèn, chhùn lamah chuan hna a thawk ve bawk ang chu," ka lo ti ve leh vat a, a ngawi vang vang phawt a, a tàwp tawh dáwn emaw ka tih lai chuan," Mi buai deuh hi chu kawm an nuam lo, U Nunhlima hi chu buai ve tho mah se a rawn lêng hrâm hrâm a, a fel ka ti hrim hrim, an awmna lah a hla àwm bawk si, mi fel tak a ni," a ti leh a, ka sawipui zui tawh lo, a tàwp hlei thei dâwn tlat lo.

Pu ber hian mikhual ti mai ang, chaw rawn eipuitu hi a nei theì riau mai a, a țhente phei chu an riak ve zauh zauh nghe nghe a, mikhual a neih azât hian Polite-i a rawn lang ve thei ziah bawk a, pu ber bialnu hi a nih ngei ka ring ta bur, a chhan chu eng emaw awm lo se chuan a rawn lang zut peihin ka ring lo a ni, bâkah, a bialnu a nih loh chuan rawn lan ve reng mai hi a zah ve deuh ka ring tlat. Vawi khat pawh Office lama a thawhpuite nèn zanriah an kîl dàwn țumin a rawn lang leh ta ngei a, ka haw dâwn chuan an fiam nak nak tih ka hre thei a, anni pawhin an hriat chuan a ni ngei ngei ang, ka ring nghet ta bur mai. Pu ber hian duh lo ni ta se chuan a rawn pan a rawn pan duh dâwn em ni? A hnar thei bîk lo ang. Ni e, ani hi a chhe lo va, a polite bawk a, nupui pasal nei lo ve ve an ni bawk nèn, an inkawp theih lohna chhan tùr a awm hleinem. Pu ber ni se, a nupuiin a boralsanna a rei ve deuh tawh tho a, lung pawh a phun daih tawh ang, hmeichhia aiin mipain khawhar an tuar thei lo zâwk si a, khawhar lunglêng taka awm ai chuan nei thuai se a tân pawh a țha daih zâwk ang chu.

A țhiante an rawn kal zàn hi chuan thãwm an nei ve laih laih țhìn a, hmeichhia an rawn hruai tel phei hi chuan làm hi an rawt a nih hial ka ring țhin, music an play ngei ngei a ni tawp. Engtin tak nge an va khawsak chu ka hre lo nain hlim erawh an hlim dar dar thei viauin ka hria, zu an in pawhin rui fâl an awm ngai lo va, nãwi taka che an awm ngai lo bawk, țawng nuam tâwk an tih ang chen vêl hi an in țhin niin ka hria. Lehkha thiam sâng deuh hi chu an hriat deuh em ni aw ka tih phah fo a ni. Pu ber pawh hian a in zauh zauh ve tho a; mahse, ani hi chuan a hming chauhin a in a ni ang, a chhan chu zîngah hian ka thawh khalh ngai lo tlat, exer lain a lo chhuak hman ziah tlat a ni.

Tlai khat erawh chu khawi lam ațanga a mikhualte nge ka hre lo, mipa pathum leh hmeichhe pahnihin zanriah an rawn ei ve thung a, tukin lamah zanriah ei tùr ka bàwl hnua haw rih lo tùr leh Jivan-a chêtpui tùra min hrilh lâwk tawh avàngin ka la awm ve rih a ni, chaw an ei kham deuh chiah ang tihah chuan Polite-i a rawn kal leh a ni ngei ang, a aw ka hre tlat. An nui leh dar dar țhìn a, an hlim tlâng viau a ni ngei ang, ka la che buai deuh hlek a, an bulah an mamawh hre tùrin Jivan-a a duty rih a.

Hmeichhe lam chuan khua a la vawh deuh avàngin intihlum nân coffee an rawn lam ni ngei tùr a ni, Jivan-a chu a rawn phei a, a rawn phun deuh sup sup a," Hmeichhia chu an tih a tam thei êm mai," a rawn ti bul bul a, za lo zet hian a nui suk zui a, a sawi ring ngam meuh bawk si lo," Chêr lam ai chuan thau lam hi an tih a tam zual,"a ti leh a, ka nuih chu a za ru khawp mai a; mahse, ka nuih duh êm bîk lo va.

"Eng thil nge i sawi kha? Han sawi leh teh!"

Aw lo chhuahna lam chu kan hawi rual țhawtin ka ring, ka thil tih lai pawh chu ka tàwp chiang lutuk! Pu ber mikhual zînga hmeichhe pakhat, thau zâwk kha a lo ni a, a hmai chu a sen țân mai a, a hmui pawh a sen duk deuh hlur mai.

"Eng thil maw, ka pi?" Jivan-a'n a tih chuan," I thil sawi kha sawi nawn leh rawh ka ti che, han sawi nawn leh teh, ve mai mai che hian," a rawn ti leh țhat țhat a, a awka chhuak leh mitmeng ațang chuan a rui a ni tih ka hre mai a, zu rui hi ka hrawn khât a, a rûk tak chuan ka hlau angreng khawp mai.

"Eng nge ka sawi leh ang?" Jivan-a'n hriat thiam loh hmel taka a tih leh chuan chu nu chuan," Ve mai mai che hian, Thau-i min ti maw kha?! Vai chhia, awmpui mai mai lehnghâl, hetiang hna hnuaihnung lutuk thawk hian Thau-i min ti ngam a maw!! Eng zât nge thla khata ka hlawh chhuah i hria em? Nangni ang hi chu 100 pawh ka chhawr thei ang chu, i thil sawi kha han sawi leh teh!" thinrim tih hriat tak hian a ti leh ta piap piap mai a, Jivan-a nèn chuan min en tawn a, a hmël leh mitmeng chu a sen nasa bawk si a, a hlauhawm tak zet a ni.

A rawn puh dik loh avàng leh Jivan-a chuan a thil rawn sawi chhuah chu a hriat thiam loh hmèl êm avàng chuan,"Ka pi, i hre sual a nih kha-" ka han ti țan dëk dêk a," Nang khân lo țan tum duh suh, nangni ang mi hnuaihnung leh mi hausate tirhchhiah, chhiahhlawh mai in nih hi, min chhâng lêt ngam tùr pawh in ni lo," a ti buan buan a, a mitmeng a lian si, a hnawih dumin a meng sen rûm bawk si, a thinrim hmêl chuan min râp tak zet a ni.

"Ka pi-"

"I pi ka ni lo! Engtin maw min sawi kha, han sawi nawn leh teh, mawh, han sawi leh teh!" tiin bân phar uaihin Jivan-a chu a rawn pan hnai nghâl ta mai, thil țha lo zâwk a thlen ka hlauh avàng chuan an inkârah tak chuan ka lo ding vat a, a kut chu ka mansak hman lo, ka biang vei lamah tak a rawn bêng ta sawk mai a, ka ding thlëk sawk rualin a thîp țhak mai!

"Eng thil nge thleng hi?!!"

Ka bianga min benna chu nâ ka ti vak lo; mahse, zahna leh hrehawm tihna chuan min rawn tuam nghâl hlup hlup mai. A zahthlâk ka ti a, chutih rualin kutthlâk ka ni chu ka rilru chhûngril a na tak zet, a chhan lah a ho hle si.

"An țang dùn a nih kha, awmpui mai mai, chhiahhlawh hnuaihnung berte pawhin min han hmusit ngam a nia, in zak lo'm ni? Ka han bêng leh teh ang, an sim mahna!" a la rawn ti, a la harh chhuak miah lo niin, min benna lamah khân a harh chhuah tawh ka lo ring asin le!

"Duh tâwk rawh!!!"

A awka chhuak, vîn deuh anga lang vak lo; mahse, hlauhawm ru zet si chu ka vawi khat hriatna! Ka îp chãwih nghe nghe a, chhûngril lamah hlauhna ka nei zui nghâl bawk. Ka en kual chuan mi dang pawh an lo awm kim vek tawh niin, Polite-i pawh chu hlauhthàwn hmel tak hian a lo ding ve ràn a.

"Jakob, anni khân min hmusit vei a nih kha," ani lah chuan a lo la ti a, a lo la diau awkawng lo niin, min rawn ben leh a tum a niang, a che sawn chu Jakob-a chuan hneh zet hian a kutah a mansak a, awka dam pawh a hmang peih tawh lo a ni ang," Duh tâwk tùrin ka hrilh che a ni lo'm ni?" a ti țèng ta chhuai mai a, ka hlauh avàng chuan chhûngril lamah ka tha a khùr nasa tawh mai.

"Eng thil pawh ni se, ka quarter-ah a ni emaw ka inah a ni emaw ka hnuaia thawkte kutthlâk hi ka remti ngai lo, hmuhsita an awm lah ka phal bawk hek lo, thleng nawn tawh suh se!" a ti leh charh charh a, ka biang chu rawn tawkin," A na viau em?" a rawn ti sup a, ka lo en hû ringawt, chhàn nachâng leh chêt sawn nachâng pawh ka hre lo. Chutah, kal sawnin fridge chu a va hawng a, a kekawr ipte ațang chuan rawmawl la chhuakin ice cube chu a fûn mawlh mawlh a, rawn phei lehin ka biang chu a rawn dep zui ta a.

"Jacob--"

"Jacinta, a tâwk!!" tiin a kut pakhat chu a'n phar a," Tûn atân chuan eng mah sawi a ngai tawh lo! In țîn tawh mai dâwn em ni ang? Țhian kawm mood-ah pawh ka awm tawh hrep lo ve," a'n ti zui zat a, a țawngkam chhuak ram hmuk leh nèlawm lo zet chu hriat a nuam lo kher mai. A țhian mipate pawh chuan eng vak an sawi lo, pawi an tih thu an sawi sap sap a, an inher a, an kal sawn zui nghâl a, Jacinta-i chu a țhiannu chér zâwk chuan kai hrang vatin an chhuak zui ta mai a nih ka ring, an thãwm a reh zui deuh nghâl mai.

"Ka pu, keima thiam loh a nia; mahse, ka pi khân a hre thiam lo a ni, a pawi ka ti khawp mai," Jivan-a chuan a lo ti ta vat a, Pu ber erawh chu a ngawi ngul mai a, ka biang min dehsakna chu han dawm vein," Keimahin ka ti thei," ka ti sap a, ani pawh chuan a thlah zui ve mai bawk a.

"Ka pi kha 'Thau-i' ka ti miah lo, a hre sual a, a thin a rim ta a nih kha," tiin Jivan-a chuan min rawn en a," A pawi ka ti hlê a ni, keimah vàng vek a nia," a ti leh a, ka țawng hma chuan Pu ber chuan," Duh tâwk ang u, nangni pawhin hre rùn lovin theihnghilh in tum dâwn nia," a ti vut a," Makim, i la haw nange? I haw ve ta nghâl emaw ka ti mai asin," a ti leh nghâl zat a, a awki pawh a dang leh vek tawh. 

Ani chuan," La haw lo ve, thil sawipui lawk che ka duh sia, ka la nghâk rih che a," a lo ti a, Pu ber chuan," A nih chu, he lamah hian phei ila," a ti leh a, sitting room lamah a phei zui a, a hnungah Polite-i pawh chuan a zui nghâl a, Polite-i chu Makimi a lo nih chu!

Chumi ni ațang chuan Pu ber chu ngainat rûkna riau ka nei ta, a hriat miah lohin a nia ka ngainat ni. A pà ka ti a, min ngaihsakna leh kan thlavànf a hauhna pawh khân min hneh tak zet. Jivan-a nèn kan pahnih vàngin a țhiante a hnar haw phah a, an inbe chhunzawmin thil thleng kha an sawi zui em tih ka hre lo, țhat lam pan lova kha thil khân an ințhianna a tichhe vek a nih teh chuan aw...

(Zanin chu Bonus ang chauh maiin aw, ka lú a na tluk tluk si a)

*THAWHRIMNA TEL LO CHUAN HLAWHTLINNA A AWM THEI LO, THAWHRIMNA PHÈNAH HLAWHTLINNA A AWM ȚHÌN*