☆MIN EN LA☆ - 19 By Dingdi Pachuau

 ☆MIN EN LA☆ - 19 By Dingdi Pachuau

Kan infâwp ve ringawt a nia, induha inngaizâwng pawh kan ni hauh si lo, a hnu lama hmuh ka hrehzia tak kha! A theih chhûng chu ka hël a, min hmuh loh theih dàn tùr leh ka hmuh loh theih dàn tùr ngawt zawng ta chu, ani pawhin a hre thiam ve deuh a ni ngei ang, kan infawh ațangin kâr khat a a ral dâwn ang tihah chuan," Min hmuh hreh chhan hi kan infawh vàng kha a ni thei ang em?" tiin min zâwt ta a.

A awm loh ringin mikhual room ka tifai ve a nia, min rawn hmu ta tho mai. Ni e, ka hmu hreh lutuk! Theih ni se hmuh loh char char ka duh asin.

"Ni e..." ka ti sap a, en pawh ka en lo, khum chu ka phah țha mawlh mawlh a.

"Eng nge, thil sual kan ti em ni?"

"Aw, thil sual nasa lutuk maw le! Sawi mai mai chi pawh a ni lo," ka ti rilru a, sawi lang lo mah ila ani pawh hian a hre thiam thoin ka ring.

"A dik lêm lo alawm," ka ti leh a, ani erawh chuan," Min hël tawh suh, i intihah thlàwn mai mai a ni. Fawh leh che ka châk viau zâwk asin, thil nuam tak a niin ka hria," a lo ti ve thung a, ani hi chuan sawi serh leh sawi zah a nei ve lo a ni ngei mai, kei erawh chu ka biang a sa hut hut thung a.

"A thleng tawh tùr a ni lo, thil dik a ni lo," ka ti leh a, ka awmna lam panin a rawn kal phei a ni tih hriain hlauthãwng tak chuan ka lo en hrâ a,  ani chuan," Eng maw han sawi nawn leh teh," tiin ka bul chêtah chuan a rawn ding a, hlauthãwng ru viau mah ila a inkuangkuah thûn avàng chuan min khawih a tum lo a nih ka'n ring deuh ngawt a.

"Kan infâwp tawh tùr a ni lo," ka ti sap a, ani erawh chuan," Eng vàngin maw?" a lo ti nghut a, ka ngawi deuh dat phawt a, chutah,"Min chhawrtu i nia..." ka tih leh chuan a lo bu nghat a, sawi zawm lehin," I tân chuan eng mah a ni lo maithei; mahse, ka tân chuan hetia awm hi a țha lo," ka ti ta ringawt a, ka sawi chhuah duh tak pawh a ni chiah lo, min din hnaih lutuk a, min en reng bawk sia, ka ngaihtuahna a tibuai zo tlat a ni.

"Kan infawh kha ka tân eng mah a ni lo ang i tihna maw?"

"Ni mai ang chu!"

"Eng angin nge min ngaih a? Mi lérh leh lepchiah... Casanova ang hialin maw?!!" Ka chhàn loh avàng chuan che lovin min en reng a, chutih lai tak chuan Jivan-a zai ri chu kan hre ta vau vau mai! A dàwr kal a rawn haw tawh tihna, min rawn hmuh dun ka duh miah lo, ka bula ding hi a kal sawn ngei beisei ngawt teh ang.

A kal sawn ta mai rêng a, ka thaw huai mai. Ka bula a awm chuan chêt sâwt a har a, min be ve ţhìn bawk sia, bâkah, ngaihchàn ve reng a ngai bawk nèn, hna thawh a sâwt thei lo.

Pathianni apiangin Zotei'n inkhâwm tùrin a sâwm zui zël a, a la sâwm hlawhchham zêl ka ti mai, pawi ka ti chuang lo. A inkhâwm ve duh ka ring ngai lo hrim hrim a, bâkah, hetiang lam hi a ngaihsak lêm lo, officer lian deuh chin hi chu an ni duh deuh a ni ang, inkhâwm peih deuhho ka hmuh ve chhunte hi chu pa upa lam tawh an ni tlângpui, ani hi chu a la țhalai deuh a, a la ngaihsak peih rih lo a ni ang ka ti mai. Nakinah a upat zual deuh hnuah chuan a la inkhâwm ve mahna le, tu hriat va ni suh.

Ka ngaih dàn ang nia a sawi ang ëma lêrh tùrah chuan ngai bîk lo mah ila a unaunu Mami sawi anga hmeichhe ngaihsak lo a ni lo tih chu ka rin dàn bur a ni tho. Ka ngai lérh chu a haw deuh a nih ka ring, țûl viauah lo chuan min be duh ta hauh lo, kawng lehlamah chuan ka nuih a tiza zâwk, ani ang puitling tawhin ka thil sawi han huat tâk viau chu a nuihzatthlâkna lai a awm ve tlat. Chokaa ka awm laia a rawn luh pawhin min be ngai lo va, min rawn en ngai pawhin ka hre ta lo. Ka en ngai bîk chuang lo nain chu chu ka rin dàn a ni, ni e, a hnuaia a chhawr ve maiin khatiang ngaih dàn ka nei kha a hua pawh chu a ni mahna, nuam chu ti chiah lo mah ila pawi lo ti mai ang, hetia a awm hian kan inkârah thil thleng a awm lo thei zâwk ngei ang chu.

Mahse, Zotei a kàwm ngeih thar thut nge ni ka hre chiah lo, kan inah a va lêng țhìn a ni àwm e. A office bâng hi a quarter-ah a rawn lût zawk a, a chhuak leh nghâl vut țhìn a, khawiah nge a kal ka hre ngai lo; mahse, zanriah ei laia Zotei'n kan ina a lo kal thu a sawi chhuah ațangin ka hre ve ta chiah. Eng nge a lo tih tih ka zawh chuan," A lo lêng ve a ni ber ang chu, bâkah, a hnuaia thawk i nia, min  rawn tlawh kual ve a niang, a fel roh phian zui, ka zirlaiah ka thiam loh a awm leh awm lohte min zâwt a," chaw țhial țãlh țãlh chung chuan a ti barh barh a.

A lo nih mai mai chu. A țha e, hmuh ka hreh a, ka hmuh loh tùrin a awm ta rêng a, a fel vêl vek mai. Kan ina a lo kal țhìn kher erawh chu mak ka ti deuh hlek thung, hmun dangah lènna tùr chu a hre țeuh àwm si a.

Ka nuin min rawn biak azât chuan a leipuia thlaite chu a țhat vvezia thu a rawn sawi uar thei hle a, video call dàn a thiam loh avàngin thlalâk min rawn thawn țhìn a, chu pawh chu Mâma hmehsak a ni hlawm. Tih dàn a zirtîr ve viau nain thiam thei tlat lovin a inhria a, a hrilh buai peih tawh lo a ni. A sawi angin thlai chu a țha hlawm ve reuh khawp a, a tak taka hmuh pawh a châkawm, a țhen ţhen chu a hralh ve bawk a, eitu tùr pathum chauh an nia, an ei a tam lêm lo bawk nèn, pawisa a lo hmu chhuak ve hlek hlek chu tihzia ka lo ti khawp mai.

Pathianni tûk khat chu ruah a súr a, inkhâwm tùr chuan kan insiam tho, súr buan buan a ni lo va, han inkhâwm loh ngawt chu kan ngai ngam lo deuh a ni. Zotei chuan," U Kob-a sâwm leh ila, motor pawh a thawh duh maithei asin," a ti a, kei erawh chuan," A peih lo ang, sâwm duh tawh suh, a lo ning ru viau záwk thei che a nia," ka ti ve thung a.

Mahse, a va sâwm leh tho. Ka lo nghâk ve deuh a, gate bulah chuan hulhliap a awm si lo va, a thlang deuhah ka lo ding a, inkhâwm tùr ni àwm takte chu motor-in an tlãn liam zêl a. Rei ka din hma chuan ka bul lawka car rawn ding ațang chuan Zotei aw chuan," U, lo lût rawh, ke chuan kan huh vek palh ang," tiin min rawn ko a, ka en vat a, an insâwm hlawhtling a ni ngat mai. Jakob-a'n a khalh tlat, thil mak tak a ni.

Hnial duh viau mah ila Zotei ber a țhu tawh miau si a, hreh angreng tak chuan ka țhu lût ve ta a, ka mitsîr chuan hmu deuh tho mahin a lam hawi erawhin ka țhu lo, pâwn lam chu ka hawi deuh tlat a. Zotei nèn chuan an inbe zauh zauh nain kei erawh chu ka ngawi reng thung.

Biak in bul kan thlen chuan kan chhuak thuai a, a rawn chhuah ve mai ka ring deuh a nia; mahse," Car-ah hian ka lo nghâk ang che u," a tih tâkah chuan inkhâwm tum lovin  min thlah a lo tum mai zâwk a ni tih ka hre thiam chiah, nge Zotei hian car-a min thlah mai tùrin a lo ngèn ni zâwk? A nih teh chuan a zahthlâk haih haih ang chu!

Zotei chuan a țhiannu a biak tâk nghâl daih avàng chuan zawhna hun a awm ta mai lo va, inkhâwm bàn hnuah erawh chuan ka hmu remchâng a, ka zâwt ta a, ani lah chuan," Ka tifiam mai mai a nih kha, engtin nge chutiang chuan ti ngam se min tih rêng rêng ni? Ka ti ngam teuh lo mai!" a lo ti thung a, âwih vak lo hian ka en deuh reng a. Nia, a ti ngam tak tak hauh lo ang, chuti a nih chuan min thlah ve hrim hrim a lo nih àwm chu.

Min lo nghâk reng a ni chêk ang chu, Biak in gate ațanga kan chhuak chu Zotei a lo ko a, ani lah chuan," Min lo nghâk reng elo?!! I haw nghâl daih ka ring asin, i lo ning àwm mang e," a ti bawrh bawrh a, Zotei a chuang leh miau mai si a, ruah a la tla cherh cherh reng nèn, kei pawh chu ka lût ve leh ta nge nge a.

"Zote, chhùn hmeh tùr chhang i siam thiam em?"

Ani chuan," Thiam chiah lo, Rumpum chhum leh chow kan tih vêl hi chu ka thiam ve mai a, chhang lam hi chu... U Rêngpuii hian a thiam lutuk! Ani hi chuan a siam țhang a, Singapore-ah khân a han thiam vek alawm," a ti leh barh barh a, ka lo ngei deuh lek lek, duh aia thui mah a sawi leh tlat.

"Ka quarter-ah siamna hmanraw kim a awm a, siam ila?" a tih leh chuan Zotei chuan," A tih chi viau ang, khaw chhe kâra chhang lum vat vat ei chu, a tui dâwn lutuk!" tiin phùr hmèl zet hian a lo chhâng a. Kei chu min telh ve hauh suh se, mut mai mai ka duh, Nunhlima a zin daih a, a rawn lang dâwn lo tih ka hre chiang bawk a, chàwl hahdam pahin mu mai mai ang.

Mut tuma ka intintuah lai tak chuan min rawn bia a, tih dàn an thiam loh thu leh ka puih an ngaih thu a rawn sawi chuan," Thiam lo pui chuan engah nge siam in tum phêt ni? Mut mai mai ka duh asin," ka lo ti zêk a, ani lah chuan," Lo kal mai teh, nge i pu rawn biak kher che i phût zâwk?" a rawn ti ta reuh a nih chu, ka va ngei tak!

Ka va phei a, ka va buatsaih zung zung a. Anni pahnih lah chu ka thlen phei veleh inthiar fihlîmin chinese checker an khèl daih zui a, a rûkin ka thin a rim bûr mai. Chuta kârah Polite-i a rawn lang leh zui bawk a, ka mood a off tak zet, ka thil siam ei ve tùrin a va phone a ni ngei ang chu.

Ka siam zawh hnuah chuan in lamah ka phei leh ta daih a, ei pawh ka ei ve lo. "Ei ve nghâl la, kan tihbuai tehlul che nèn, i siam a ni bawk sia, ei țeuh rawh khai," an tih ve pawh ka rin nèn, chutiang lam chu an ka ațangin a ri chhuak hauh lo, ei an hmu a, pakhat lah a bialnuin a rawn pan leh tawh a, eng dang mah a ngaihtuah leh tawh lo tih hriat reng.

Ka muhìl hlek tawh ang tihah chuan ka phone rîin min rawn tiharh a, mumang ka nei hman tawh asin le, phak chuap chuan ka han chhâng a, Jalianchhûnga a lo ni a.

"Zanriah ei tùr min bàwlsak leh mai dâwn em ni ang?"

Ka thaw hawk a, ka insûm hman lo, ka hàm bài bài zui a, a nui hawk rî ka hre chhunzawm zat bawk a," I muhìl lai ka rawn tiharh che a ni maw? Ka inthiam lo hlê mai a..." a rawn tih leh chuan ka inseh ruh a, a aw ațang chuan a inthiam lo tak tak lo tih a lang chiang nasa mai si a, min rawn țawng el a ni tih ka hriatna chuan min tilãwm lo zual a ni.

"Lo phei ang che," zàwi deuh sup hian a rawn ti leh a, a phone chu a titàwp zui nghâl hmiah bawk a nih chu. Ka va ngei tak! Thinrim zetin ka phone chu ka en reng a, ka inseh ruh bawk. Heti khawpa min han tham lo mai chuh, ka infawhtír theih vàng chiah kha a nih ka ring ber. Ni e, ka infawhtír miau alawm le, khami chungchângah kha chuan thiam ka inpe thei lo; mahse, ka mu tui lai min rawn tiharh kher chu ka ngei bâkah order taka min han ti vêl chu ka ngaithei bau lo.

Hna dang zawn mai duhna ka ngaihtuahnaah a rawn lût ram ram mai. 

Room ațanga ka chhuak phei chu Zotei chuan," I muhìl emaw tih a! Ei chu ka lo rêl thei reng alawm, va mu leh rawh," a lo ti a, Maian a lo hîk mêk a, kei chuan," Sawtah rawng ka bàwl a ngai alawm," lungawi lo zet hian ka ti nang nang a, ka muhìl lai min rawn tiharh bawk nèn, ka mood a chhe tak zet a ni.

"A ni maw? Va bâwl tak rawh. E taka, vawiina min hruai avàng khân U Kob-a hnênah khân làwmthu i sawi ve kha ka lo ring a nia, i phei chuan hrilh ngei ngei rawh aw, a remchâng hlauh e," a tih leh chuan," Ngawi teh, ti lo zâwk teh ang," ka lo ti thung a, tunah tak hi chuan làwmthu sawi lam a lang chhin eih lo, chhûm dum chhah pui pui a inzial tup tup a ni zâwk.

Jivan-a a lêng chhuak daih a, ani hi zawng Pathiannîah chuan tûkțhuan  ei kham ațangin a lêng chhuak daih ziah a, khua a țha emaw țha lo emaw pawh ni se; nilëngin a reh vang vang a, zànah a rawn haw chauh țhìn a ni, tunah pawh hian inah chuan a pu chu Polite-i nèn chauh an awm ngei ang.

Ka va phei a, muangchâng lovin ka bâwl nghâl char char a, min rawn tibuai lêm lo, vawi khat erawh Polite-i a rawn kal zawk a, chu pawh fridge-a thei ei tùr rawn lain a nia, kan inbe lêm chuang lo, kan innuih ringawt, chu pawh za lo tâwkin.

Ka bâwl zawh meuh chuan khua a thim ruai chu a ni tawh mai, thil dang ngaihtuah lova bâwl ka ni bawk a, ka che rang khawp e. A tàwpna ber tùr hmarcha ràwt ka buaipui laiin Jalianchhûnga chu a rawn lût ve thung a," A rim tui hle mai," a rawn ti a, eng tin mah ka lo chhàwn ve lo.

Hmarcha ka ràwt zawh chuan," Min siamsak nghâl mai dâwn em ni ang?" a ti leh a, ka en zawk ringawt. Ni e, a chhawr ka ni miau mai a, min tîr thei tùrin dikna a nei tlat, thil hahthlâk lutuk lah a ni hek lo.

Ngawi rengin ka siamsak zui leh ta a, Polite-i hi chu a duat ve ngawt mai, chaw ei siam mai maiah pawh a tîr phal lo a nia, keiin rawng ka bâwl tawh a,  hêng an pahniha chaw eina tùr siam mai maite chu a harsat loh tehlul nèn.

"Thlèng pahnih i la a, i ei ve nghâl dâwn tihna a ni ang maw?" a tih chuan ka en deuh hau a, min tihzah dàn a hre lutuk hi a mak ka ti záwk! Engah nge ka ei ve ngawt ang? A bialnu nèn an ei dùn dâwn alawm.

"Pahnih alawm ka lâk, pathum ni lovin," ka ti ve thung a, Polite-i hi a room lamah a awm rih a ni ngei ang chu, an sùlhnu pawr a chingfel rih pawh a ni mahna.

"Ei rawh, i lâk tawh tho kha."

Ka ngawi reng a, ei erawh ka tum lo. Ka siamsak zawh chuan ka kal sawn a, chaw eina pindan ațanga ka chhuah dâwn chuan," I bâwl tam si, ei ve nghâl mai rawh," a rawn ti leh a, kei chuan," Tam lêm lo, mi pahnih tân bâk ka bâwl lo," ka ti lêt khauh a. Ani erawh chuan," Mi pahnih tân a nih chuan i ei thei tihna a nih chu, nang leh keia ei tùr," a rawn ti leh thung a.

"Ni lo ve, ka ei châk lo ve."

Chaw an ei chhûng chuan choka lamah ka awm tlat a, an ei zawh àwm huna ka va phei chu, amah chauhin a lo țhu a, ka han hawi kual a, thlèng pakhat chu khawih a ni miah lo tih ka hmu nghâl mai.

"Khawnge i bialnu kha? A ei ve nange?" tiin ka zâwt ta phawng a, ani lah chuan," Tu ka bialnu maw?! Chutiang an awm lo, bialnu ka nei lo, nang tih loh chu," a lo ti zui zat a. Min fiam a ni tih hre mah ila, a rûkin ka zak lehpek. A fiamthu mah ni se ka nuih a za hauh lo bawk.

"Fiamthu i thiam lo êm mai a," ka ti hlak a, ani lah chuan," Fiamthu ka sawi hauh lo, engti tiha fiamthu sawia min ngai nge i nih?" a rawn ti ve thung a. A ni lah tak a, a hmêlah leh awka chhuakah chuan fiamthuna rêng a lang lo.

A tûkah erawh chuan rawng ka bàwl laiin," I zawh veleh ka be lawk duh che," a rawn ti a, a kal sawn zui leh nghâl daih a, eng lam thu-ah nge min biak a duh tâk ang? Eng nge ni ang aw?

Jivan-a a awm ve reng a, hlauhthàwnna ka nei lêm lo. Ka bàwl zawh chuan a țhutna sitting room lam chu pahin," Eng nge ni ta, ka pu?" ka va ti ta nge nge a. Min rawn en lawk lo chuan a ngawi reng phawt a, chutah, rawn ding chhuakin," Ka room-ah min rawn zui rawh," a ti nghut a, a room lam pan chuan a kal zui ta nghâl a.

Ka huphurh viau nain ka zui ve ta tho a, ka va luh chuan dawhkàn bulah a lo ding ngur a, a lo inkuangkuah thûn bawk, min lo en a," Engati nge hetiang hian i awm?" a rawn tih chuan a ngaihna hre lo zetin ka en ringawt, engtin nge ka awm? Ka va hre thiam lo!

*KAN NGAIHTUAHNA HIAN KAN CHÊTPHUNG A TIDANGLAM A, CHU CHUAN KAN CHÊT CHHUAH DÀN THLENGIN A TIDANGLAM VEK ȚHÌN*