☆MIN EN LA☆ - 20 By Dingdi Pachuau

 ☆MIN EN LA☆ - 20 By Dingdi Pachuau

"Engtin nge ka awm?" ka ti chhuak sap a, amah ka zâwt pawh a ni lo, ka phun chhuak a ni zâwk mah. Ani erawh chuan a lo hre pha a ni chêk ang chu," Vawi eng zât nge 'Ka pu' tia min ko tawh lo tùrin ka hrilh tawh che? I luhlul reuh tlat, ka luhlulna hi test i duh a ni maw? Ka châk zâwng tak alawm, i duh chuan i luhlul chhunzawm zêl thei ang; mahse, a lêt leh lam erawh tuar thei tùrin inbuatsaih țha la," a ti ta nghut nghut a, chutia a ţawng nghut nghut mai chu hlauh ahnêkin hmuhnawm ka tiin mak ka ti zâwk a, ţawng tui tam lo ve zet kha a ni si a, lungawi loh hmèl taka a han țawng nghut nghut mai chu hmuhnawm enin ka en tlat, ka hlau eih lo nia!

"Eng nge ka luhlulna chu? Infawh leh ka duh tawh loh vàngin maw?" ka ti a, 'infawh' tih thu han sawi chu ka zak ru ngei mai; mahse, sawi chhuah a ngai miau si a. 

"I luhlul ka tih chuan i luhlul a ni mai, ngawi tak rawh, hmeichhe luhlul tak enkawl hi ka châk alawm. Vawi khat tê chauh kan infawh vàng mai khân maw min huata en pawh min en duh loh?" a ti leh nghut nghut a, inkuangkuah thûn chung chuan a vei nghut nghut bawk a, a lung chu a âwi lo viau a ni ngei mai; mahse, ka nuih a tiza tlat mai a nih chu, a hmêl  leh chezia chu hmuhnawm ka ti tlat si a, patling pui, nupui pawh nei ngam tawh niin a chezia erawh a puitling lo riau ka ti bawk si, han hlauh deuhna lah chu ka nei dèr si lo.

"Ka hmui kha a la virgin asin aw, ka bialpa lah i ni lo va, i hnuaia ka thawh vàng maiin khatia min tih mai mai atân chuan ka inphal bîk hek lo. Bialnu nei lai i la ni zui, i bialnu tân rinawm ta che, sawi tawh lo teh ang, ka chhuak a--" ka sawi zo hman lo, min rawn hnaih dâwrh a, ka bânah a rawn vuan nghâl chawt  bawk. A chêt ran êm avàng chuan lo tàl chhuahna hun pawh a awm lo, ka en chho hau a, ka mitmengah chuan hlauhthàwnna a hmu thiam ngeiin ka ring.

"Bialnu ka nei lo--" choka lama Jivan-a'n Mizo hla ngei mai a rawn sak vau vau tâkah chuan a room kawngkhàr lam chu min panpui vatin a khãr vat a, chhûng lamah chuan a han kalh zui rap a, a chêt dàn chu mak ti leh mit pawh khap lo chuan ka lo en hau reng ringawt mai.

"'Awlsam têa ka kaltîr che i ring rêng rêng em maw ni, teuh lo mai! Min 'pu' man pawh ka la pe lo che," a ti sup a, chutah, rawn kûn hniamin," I hmui kha a la virgin i ti maw kha? A țha, virgin hi ka ngaisâng," ti lehin ka hmui chu hnai zetah chuan a rawn melh chhuk ta run mai a, ka hmui a melh rùn tih ka hmu ve kur bawk si a, tihngaihna ka hriat lohzia mai chuh, ka han pet ringawt a.

"Min thlêm suh?" 

Ka awm ngaiin ka awm ta vat a, ka hre thiam lo kher asin. Kan boruak chu dik dâwn lova ka hriat avàngin ka han tãl deuh laih laih a; mahse, ka bân a chelhna chu thlahin  a kut pahnih chuan ka bek tawn tawnah chuan a rawn dawm ta a, ka khawng awt lo chauh a ni. Tunah hi chuan hlauhthàwnna hlîrin ka khat tawh, ka thlêm niin a ngai tlat si.

"Min thlah teh."

"Hmui thianghlim, tu ma la fawh loh fâwp hmasa bertu ka ni a," ti supin a rawn kún hniam zual ta sauh a, ka lo täl ve ngei mai; mahse, ka tãl chhuak lo. Ka tàl avàng erawh chuan  ka hmuiah a rawn fâwp fuh ta bîk lo va, ka biangah a rawn fâwp; mahse, tàwp mai a tum lo nasa, chak zâwk nih tumin ka lu chu ka han chêt dâwn țhin a; mahse, min vuan nghet lutuk ringawt.

"Hrem deuh i ngai, nat erawh a na kher lo ang," tiin a rawn kûn hniam leh a. Min vuan nghet êm a, ka tãl chhuak thei lo, ka hmui chu a hmui chuan a rawn chuktuah ta a, ka 'pu' vàngin min hrem nân min fâwp a nih ber chu, hrem hi chu thil làwmawm a ni lo, nat chu na lëm nâng; mahse, ka fâwp lêt ve hauh lo ang.

*******

Tlaia a office bâng, chokaa a rawn luh chuan ka lo en duh hauh lo va, a la thinrim reng ka ring deuh ngawt a, chuvàng chuan ka lo melh ngam chiah lo. A chhuak zui leh thuai a; mahse, rei lo te hnuah a rawn lût leh a, pâwnah chhuakin Jivan-a a va ko a, eng nge a va hrilh phei chu ka hre lo, a rawn luh leh chuan ka bulah a rawn ding a.

"Tukina ka hmui i sehna hi han en teh."

A țawng chu Jivan-a emaw mi dangin emaw an rawn hriat loh hrâm ka beisei, ani hian chuan sawi hreh hi a nei tak si lo va. A awka chhuakah chuan thinrimna àwm hriat tùr awm hran lo mah se, ka zahna tùra chutiang a rawn sawi lang leh kher chu ka ngei ru roh zâwk, lungawi vak lo mitmeng chuan ka en chho rêng bawk a.

"A vûng a nia," a tih chuan," A vùn nasat loh kha," ka lo ti hlak thung a, a vûng ve deuh tak tak a!! Ani lah chuan," Vawiinah office-ah pawh ka awm a tinuam lo lek lek asin, mi dang seh ni phei se chuan min ti damlo thei hial ang chu!" a lo ti leh a.

"Patling i nih kha, khatiang mai mai," ka ti leh a. Mak hi ka inti ţhìn, a chhan chu a bulah hian sawi ka tum êm êm loh pawh hi ka sawi chhuak leh tlat zêl a, innêl lutuk ang mai hian ka țawng leh khut zêl, hei tak hi mak ka ti ţhin a ni.

"Zawhte duhawm tak, kawlh ru zet si ang i ni," a rawn tih leh chuan ka nui hak a, ka nuih a za tak tak alawm. A na fahran lo ve chiang e, zawhte ang tih mai mai, zawhte bàl tak tih ni mang hlei lote chu.

"Ka hmuia hnawih tùr ang chi chu i hre mial lo maw? Dettol hnawih ringawt chi a niin ka hre si lo," a ti leh sup sup a, ka seh khân ka seh na lutuk lo asin le, a thì phei kha chu ka ring miah lo a nih kha.

"Nei maithei; mahse, inah a ni ang," ka ti a, ka sawi zo chu a chhuak zui nghâl vut a, a lo na viau tak tak tihna em ni le?  Ka kawlhin a ring tak tak ang em? Mahse, ani pawhin min hrem nân ka duh lo chung min fâwp vei a nih kha, min hrem nân ti kher lo se chuan ka seh kher bîk nâng.

Rei lo te hnuah Tender care bûr keng hian a rawn lût leh a," Kha, min hnawihsak rawh," a rawn tih chuan," Ka kut a bàl, lo inhnawih mai rawh," ka ti ve thung a," Sil fai mai la," luhlul zet hian a ti leh a, che lovin ka bulah chuan a ding rùn mai a. 

"Ka ti laklawh asin."

"Dah phawt mai teh."

Ka en vang vang phawt a, hlau viau tùr ka nih tehlul nèn, ka hlau hran miah lo hi mak ka ti a ni. Ka pu, min chhawrtu a nia, ka zah lo mah mah țhìnin ka hria, miin ka biaknate hi lo hre ru ta se, mak min ti ngei ang, ka nu phei chuan mak a ti dâwn lutuk.

Ka kut fai taka ka sil hnu chuan ka han hnawihsak ta a, hla deuh ațanga inhnawihsak theih ni hek lo le, kan inhnìmhnai leh ta chu a nia. Hmun dang en lovin ka hmui chauh a en tih ka hre reng bawk si a, nuam lo duh tak a ni, nuam lo tihah zahna avànga nuam lo tihna ang hi, ka zãm ru viau bawk.

"A dam vat ang em?"

"Ka hre bîk lo le, ha hi chuan tûr a nei ve an ti bawk sia, ka hre thiam tawh bîk lo," tiin ka chhâng a, ka duh aia ka lo seh nâ chu a rûkin ka inthiam lo khawp mai, thil sâ leh thak lam phei chu a eiin a in thei kher lo maithei si a; mahse, kawng lehlam takah chuan min fawh a tum tawh lo ang a, a zia phian thei bawk a.

Zànah Nunhlima a rawn lêng a, a hmël ka hmuh veleh chuan inthiam lohna, chhûng ril lamah ka nei deuh tlat mai a nih chu. Ani hian min duh thu min hrilh a, keiin ka chhâng thei rih lo va, ka inpeih hun min nghah theih thu a sawi a nih kha, dawhthei leh thianghlim takin min kàwm a, kei lah chuan mi dang ka infawhtîr thei mai si, chu pawh ka bialpa ni miah lo lakah lehnghâl, hre ta se eng angin nge min ngaih ang le? A awm chhûngin a hmaa rilru nuam tak leh inhawng tak ang khân ka kàwm thei  ta miah lo a nih chu.

Mut hmunah pawh chuan ka ngaihtuah a. Ani tlangvâl fel lutuk leh nungchang țha hian min duh thei a nia, nihlawh tak ka ni; mahse, ka dik lo deuh tlat tawh si, ka hre thiam tawh lo. Ka han ngaihtuah thui zêl a, mi pahnih chu bùk miah lo tùr ka nih laiin ka rilru leh ngaihtuahnaa an rih dàn chu ka bùk tawn a, ka duh miah lohin pakhat chu a rit ta deuh tlat a nih chu. A hma pawhin ka duh ngai lo kha a ni sia, tunah chuan kan inhmu tamin kan inchènchilh tam ta lutuk a, ka tum hauh loh ka dâi thleng ta ni berin ka hria, chu pawh zanina Nunhlima rawn lan ațang chiahin a ni ka hriat chhuah ni.

A tûk aţang chuan chhûngril lama inthiam loh rûkna avàng chuan hêl ka han tum țha leh a, hmuh loh hrâm ka han tum thar leh a; mahse, a har a ni. Ani lah chu ka hmuh theih ngei tùr leh hêl theih hauh lovin ka lal vèna chokaah ngei chuan a rawn lût ta ziah thung a, thu han intinei viau dâwn ila a in a ni bawk si, kei lah a chhawr mai ka la ni zui.

"I damdawi hnawih kha ţha ka ti riau, a dam tawh viau asin," a rawn ti a, ka bul hnaiah chuan a rawn ding leh tawh a. Kei chuan en mang hlei lo hian," A țhat chu," ka lo ti ringawt a, he pa hi en loh hrâm hrâm ka duh, Nunhlima ai pawhin a búk kha a rit a nih kha, ka en zêl chuan a rih belh sauh sauh ang tih ka hlau.

"Naktûk chu Aizâwla ka phei lawk a ngai a."

Engtiziaa chu thil chu min hrilh ngawt nge maw a nih ni? Ka zâwt pawh a ni lo va. Eng nge a va tih dâwn? Hna thilah a ni ang em? Nge a lêng phei dâwn zâwk?

"Lo phei ve la?"

Kha, ka infawhtîr theih vàng khân a nulaah min ngai a ni chiang mai. He thil hi ka duh loh ber thil a ni asin, ani hi chuan sum a nei bawk a, sawrkar zêm zen a ni bawk nèn, nula chu a haihchham lo tawp ang, hetah lah viltu a nei țha si.

"Engah nge ka phei ve ngawt ang? I bialnu pawh ka ni hleinem," han tih țhuai țhuai ka duh viau a nia; mahse, ka sawi chhuak ngam teuh lo, tunah tak hi chuan ka dâwih ve tlat. 

"Zotei awmpui ka ngai," tiin ka chhâng a, ani pawh chuan," Chutia min chhàn chu ka ring rêng a," a lo ti a. Chutiang ring si, engah nge min zawh ni? Amahin va phei mai mai rawh se, lo hmuaktu pawh a nei țha ang chu.

Hmuh hreha hël ru țàng țáng e ti lo chuan a phei hnu chuan rilru thawven huai àwm tak, a thawven phah chuang lo, a reh tlawk tlawk ni maiin ka hria! Jivan-a'n a ei tùr chu a insiam thei tho nain ka phei ka țhulh phah lo. In tih fel ngai lêm lo chu ka ti fel reng a, September thla kan chuang hnai ta a, ruah sùr zawha ni tla tùrin thing leh thlai hnah a han chhun tle sút mai țhìn chuan lung a tilêng ve ta tlat mai! Ni dangah kha chuan ka thlír liam mai mai țhìn kha a nia, tunah chuan a ni ta mang miah lo, Singapore ka awm laia ka lunglènna ang kha a rawn lét leh a ni ang; mahse, tuna ka awm dàn hi chu chhûngte ka ngaih vàng chu a ni lo chiang hlê thung si. Ka awm dàn hi ka duh dàn chu a ni lo chiang alawm, he pa ngaih hi ka duh lo, a awm loh avànga khawhar pawh ka duh lo asin; mahse, tlai ni tla thlìr hian lung a va lêng si êm! Tu nge ka ngaih? Eng vàngin nge ka khua a har rûk tlat si?

Mami'n min rawn bia a, a hmasa berin Adonis-a chanchin a rawn sawi leh hrep phawt a, Jakob-a chanchin a rawn sawi leh a, an inhmu tawh a ni ngei ang," Zanriah kan ei khâwm dâwn a, Adonis-a nèn kan chanchin hi a hre chhuak tawh ngeiin ka ring; mahse, Adonis-Bawihtea hian a hriat a hun tawh thu a sawi tlat a, inthup tum rêng rênga hun hman a nin tawh thu a sawi a, ka hnial ngam lo va," a rawn ti sar sar a.

Kei pawh chuan," A ho êm mai, hre mah se engtin mah a ti lo tawp ang che, a sual loh kha," ka ti ve bawk a, ani chuan," I lo hre chhuak ve ta maw? Nia, a sual lo, pâwn lamah hian a lang nèlawm lo ringawt a, a chhûngril lam hi chu mi dang ang ve tho a ni," a rawn ti a, kei chuan," Chuti, engah nge a hriat kha i hlauh viau si?" tiin ka han zâwt zui zat a. Ani chuan," A ţhianpa nau a nia, a hre chiang bawk si nèn, min hauh ka hlau alawm," a ti a, a nui zui hak hak a.

Ani a reh vang vang a, Mami hnên ațangin a chanchin ka hre zauh zauh thung a, a thei ve khawp mai ka ti; mahse, engah nge min rawn biak ngawt ang? A eng nge ka nih? Vawi hnih khat min fawh avàng mai khân a bialnuah ka lo inngai em ni? Teuh lo lutuk mai! A fiamthu leh a thutak sawi hi thliar hrang thiam tùr asin ka nih, a thil sawi zawng zawng âwihsak duak duak tùr a ni kher lo bawk. Min han fiam deuh avàng leh min fawh avàng mai khân ka lo indah sâng a ni ang e, a màwlthlâk lutuk! Mãwl min ti ngawt ang.

Mahse maw, zëp lohah chuan ka ngai tak tak alawm! Nunhlima zin nèn kha chuan inang lo tak a ni, tunah hi chuan ka rilru chanve deuhthaw zinpui ve daih ang a ni tlat, ka rilruah a awm veng veng reng a, duh lova thil dang ka ngaihtuah ve pawhin a tàwpah chuan amah tho a ni ka ngaihtuah chhuah leh tho ni. Kei hian duh tak têin ka lo duh tawh a ni chiang mai, engtin nge ka tih tâk ang? Buaina zakhua min thlentu tùr a ni ngei ang, a bulah lah hian ka la thawh zêl hmèl rih bawk si, hna thawh tùr dang ka hmu a nih ngawt loh chuan.

"Eng emaw nawm lohna riau i nei em? I ngawichawi riaua ka hriat tlat chu," Nunhlima'n a tih chuan ka nuih sak a, zat erawh a za hlawl lo.

"Tûnlai tê hian ka mu țha meuh lo va, mut ka kham tâwk loh vàng x ni mahna," tiin ka chhâng ta ngawt a," Chuti em ni? Ka ngawichawi pawhin ka hre lo," han tih kual vêl kha ka peih lo, thu dik tak a sawi miau a, thu dikin ka chhâng ve mai. Zàn mutnaah thil ka ngaihtuah kual nasa a, ka muhìl thei lawk lo țhìn a ni.

"A nih tak chu, a va zia lo ve aw.. Zanin chu ka haw thuai a ngai dâwn tihna a nih chu," fiamthu deuh hian a ti a, a tih tak tak pawh ka ring.

"A ngai kher lo, mut hmà pawhin muthilh loh chuan awmzia a awm chuang hleinem," ka ti ve thung a; mahse, a sawi ang tak takin rei a lêng lo, a fel a, a hawihhâwm a, mi chin a man thiam êm êm bawk.

Mami'n min rawn be leh a, J-a'n Adonis-a nen an chanchin a hre tawh tih a rawn sawi chuan," A thin chu a rim em?" ka lo ti vat a, ani chuan," Rim hran lo, min en kur ringawt, ka duh naupang a ti tih ka hre reng nain eng mah a sawi chhuak lo," a rawn ti leh sar sar a.

"A țhat hlauh chu, in hman hunah rawn zin phei ula?" tiin ka han sâwm zui zat a, ani chuan," Ka châk lutuk! Adonis-a pawh hian zin chhuahpui atán min sâwm fo a; mahse, ka la hnial ve char char a, a lungawi lo lek lek tawh a ni," a rawn ti leh barh barh a.

"Chuti, rawn zin khawthawng ang che u, ka lo beisei ang che u," ka tih chuan," Nia, ka lo sawi dâwn nia, ani chuan a duh tih ka hresa a, ka hman chhuah hunah ka hrilh chauh ang," tiin a rawn nui phawt a, chutah," Ti ta daih ila, J-a leh Makimi kha an la inkawp zêl tiraw? En teh, a phone hi a bih leh ngur zêl a, an in-text ve ni hmiang ka ti mai, ka nuih an tiza dùn ve reuh lutuk ringawt. An induh a nih hlauh chuan innei vat se pawi kan ti dâwn lo nasa sia, țan lo lâkpui sauh sauh teh aw," phûr tih hriat zet hian a ti leh bawrh bawrh a.

"Ni e..."

Kan inbiak zawh chuan khumah chuan ka bawk vang vang a, ni e, bialnu nei lai a ni ka ngaihtuah hi. Bialnu a nei alawm, anni pawh an  infâwp a, a bialnu a ni miau mai a, a fâwp ang chu. Kei chu hremna avàngin min fâwp a nih kha, luhlul min tih vàngin hrem nân min fâwp a ni. Polite-i nèn chuan intehkhin chi ka ni lo, ani chu nula chhe lo leh nula pângngai tak, lehkha pawh zir sãng ve tâwk tak a ni ngei ang, kei ve hi, eng mah chhuan tùr ka nei ve lo, ka nu leh pa ka ngaihtuah kai zêl a, ka pa khân min la dampui ve se, tuna kan dinhmun hi kan thleng phâk lo ang, nge tûn aia dinhmun sângah hian kan awm ang tihte chu ka ngaihtuah kual a, thil țûl lo tak a ni tih hre tho mah ila ka piana hnu lama ka dinhmuna ka lungawi loh țum khatna ni tùrin ka dinhmun chu ka ngai hniam ta vawng vawng mai. Hei ai hian kan chhûngkaw dinhmun hi sâng ve hret se, kei pawhin college pawh ka chhuak ve thei ang a, mi hnuaia inhlawh reng ngai lo hian mi fate angin ka duhna hmunah pawh zalèn takin ka duh duh hunah ka kal thei ang a, tunah hi chuan ka duhna hmunah, ka duh hunah pawh ka kal thei lo a nia... Ni e, ani hi ka duh tùr a ni lo, ka duh thei lo, ka duh ve phâk tùra siam a ni lo, a sâng lutuk tlat. Boruak tak tak kan neih hmaa ka tàwpsan a ngai, bialnu nei lai a ni, ka lo duh ve ngawt hi a thiang lo. 

Kei chu vawi khat pawh min rawn text lo va, a bialnu erawh chu a text ziah a niang, Mami'n phone a bih ngur țhin thu a sawi kha. Vawi khat tê pawh min rawn be lo bawk, a tân hi chuan eng mah ka ni pha lo, a hnuaia a chhawr ve mai niin a khawhar lunglènna hrîkthlâkna tùr chauh ka ni.

"Màwli, Mãwl-chhahnu, harh chhuak thuai rawh i tlai chhiat hma hian, i pu nangmah chhawrtu che hi lo duh ve hauh suh, i zak lo'm ni?" tiin ka inhauin ka inzilh ru mawlh mawlh a, awmzia a awm ang em? A rawn haw hunah ka lo țih leh dui dâwn tihna em ni ang? En thiang lo leh biak thiang lo angin ka lo treat leh mai dâwn??...

*RILRU CHHE LUTUK MI HI CHUAN MI DANG PAWH HI ANMAHNI ANG MAIA RILRU CHHE TÙRAH AN NGAI ȚHIN*

Lo inen fiah rawh; mahse, group member-te hi chu kan fel tih ka hria, rilru chhe deuh kan awm lovin ka ring🤗