☆MIN EN LA☆ - 21 By Dingdi Pachuau

 ☆MIN EN LA☆ - 21 By Dingdi Pachuau

Chàm reng thu awm hek suh, a rawn haw ta ngei a, a rawn haw dâwn tih pawh Mami min hrilh a ni. Chuti khawp chuan a lakah hian eng mah lo mai ka ni a, kei hian ngaihtuaha vei tùr ka ni lo, a tân chuan a ei siamtu mai chauh ka ni.

A rawn haw tlaiah Polite-i a rawn lang zui zat bawk a, hei pawh hi Jivan-a a hman loh vànga thingpui ka va pêk laiin an lo țhu dùn a, an lo inhnaih dùn hle bawk si nèn, laih loh tum takin thingpui chu dawhkànah ka dah a, chutih lai tak chuan Polite-i chuan pangchang awka tih hriat tak hian," A mawi ka ti lutuk ringawt, ka lãwm tak zet a ni, ka làwmzia ka hrilh tawh tho na chein hrilh nawn mawlh mawlh che ka duh," a ti no hnalh a, eng emaw a hawnsak a ni ngei ang chu. A mipa zâwk lah chuan," Țawngka maiin a nia min hrilh, chutiang lo deuh pawh chuan a theih tho aw," a lo ti zui a, Polite-i chu hlim tih hriat tak hian a nui zui har har a, an lam melh nawn hauh lo chuan ka kal sawn zui ta vat a, țawngka ni lova làwmthu an inhrilhna zawng hmuh ka châk teh hrep lo ve, hmu ve lo mai ang.

Ka awm dàn a dik lo. Ka hlim lo êm êm ringawt mai a, ka thin lah chu a rim deuh țûn bawk a, a chhan erawh ka hre chiang, ka thiam loh a ni bawk.  Tuna ka hna hi chawlhsana hna dang ka zawn mai loh chuan thil eng emaw a la thleng ang a, ka awm dàn ațang hian amah ka duh a ni tih a hre chhuak ngei ngei ang, chumi hma ngei chuan ka hna hi ka chawlhsan a ngai a ni.

Zànah chuan Nunhlima'n min rawn biak chuan hna thawh tùr mumal deuh tak a hriat leh hriat loh chu ka zâwt chhin mai mai a, ani chuan," Ka hre mai lo, ka lo zawng ang aw. Tuna i hna kha i ning deuh tawh tihna em ni?" a rawn ti nghâl a, a awa hlimna ni àwm tak chu hre tel deuh theiin ka inhria.

"A, hna nghet a ni lo va, anni ang phei hi chuan awmhmun nghet tak tak an nei lo va, a post sawn a nih hun tùr a nih lah ka hre hauh lo, a nghet lo ve êm a ka ti maw le," ka ti ve zaih a, ani pawh chuan," A dik alawm, dàwr nghah lamte hi i peih zâwng a ni em? Mahse, hlawh hi chu a sâng mawh ve deuh thung a," a ti leh a, kei chuan," Nia, thiamna neih ve lêm loh phei hi chuan maw hlawh lam hi chu a sâng thei lo alawm," ka lo ti ve a.

Hna dang zawng ila he hna hi chawlhsan thuai ila a țha ber, keimah zâwk ka luh thûk zël hma hian. Ni tina ka hmuh theih reng si chuan nakinah inzêp zawh loh hun ka la nei ang, bialnu lah a nei reng tih ka hre bawk a, min hriat chhuah hma ngeia ka hlatsan vat mai hi a țha ber.

Ka mu dáwn tihah chuan min rawn bia a! 'Naktúk lama chawhmeh siam tùr bâk va ni suh' ti rilru chung chuan phûr lo zet leh lungawi vak lo chung chuan ka han chhâng a, a lo la ni tak tak zui! Polite-i aw ni àwm tak pawh hriain ka inhria! A la lêng reng a ni ang chu, Phone-ah leh zêl zawng a aw ka hre peih lo asin le.

A tûk zînga rawng ka bàwl lai chuan Polite-i chu mu tho hlim tih hriat tak hian chokaah chuan a rawn lût a, ka lo en hau a, min rawn nuih sak pahin," Khawngaihin, tui lum in tùr a awm thei ang em?" hawihháwm tak hian a rawn ti a, a thil sawi chu ka hre reng; mahse, ka chhâng lawk lo, mak ka ti êm a ni. Kha, mutkawr dum ngei mai kha a lo ha zui, amah ngei a lo nih chiah hi.

"Aw.. A,..awm ang," ka ti bah nak a, ka en reng a ni tih inhre chhuakin ka hawi sawn ta vat a, ani pawh chuan no rawn lain tui lum chu a rawn inthlit ve mai a, choka ațanga a chhuak phei tùr chu a hnung lam ațangin ka en zui leh hrâm a, a inhmeh khawp mai, mipa hrisêl țha pângngai tak thisen chu a tilum thei khawp ang le.

Eirawng chu ka bâwl mawp mawp a, thil dang ka ngaihtuah duh lo. Ka bâwl zo thuai a, pu ber min rawn hmuh hma chuan ka haw phei ta thuai a. Zotei chuan chaw min lo eisan tawh a, school kal tùrin a lo insiam zo tawh nghe nghe. Pocket money chu ka han pe a, pocket money tih lêmah chêng tam ka pe ngai lo, tiffin a keng tho a, a mamawh tam lo a ni.

Chaw châk fahran lo chuan tûkțhuan chu ka ei a, ka ei hnu ka țhut chawlh dar dar hnuah pu ber quarter-ah chuan phûr lo zet hian ka phei leh a, Jivan-a chuan min lo pan vatin," Vawiin chu ka chhuah a ngai dâwn tlat mai, i khua a lo har deuh dáwn bâkah hna ka pêk belh dáwn tlat mai che," tiin a han nui a, kei chuan," E, chhuak rawh, puan pho chu ka lo seng thei alawm," nui sak chung hian ka lo ti vat a.

A chhuah hma chuan sitting room lam ka tifel phawt a, ní a sat țhat lutuk loh avàng chuan pâwn lam chu ka hawi pah deuh reng a, ni a lan ve uarh nî pawh hian ruah a rawn hmî leh thut thut țhìn a, en ve deuh reng a ngai țhìn, in lamah pawh seng tùr ka nei tho.

Mikhual room ka ti fai leh a, khum chu nizàn lama mutna hnuhma àwm ka hmu hran lo, hmu rêng nâng, room hranah an riak lo tawp ang le, pu ber room-ah an riak dùn ngei ang. Tunah chuan a nupui boralna pawh kum a lo tam ve ta deuh a, a thinlungah a khat liam lutuk tawh bîk lo va, hlim lova awm reng ai chuan tiin hlimna nia a hriat a pan ve ta tihna a ni mai a, chumi kawngah chuan demna tùr pakhat mah a awm lo; mahse, bialnu nei lo anga a han insawi vêl kha ka ngei, mipa ve si dâwt a sawi thei ka ti.

A room ti fai tùra luh pawh chu ka peih lo tak tak a ni, khum lamin ka mit a la lo thei si lo, ka melh zawk a, a lo chuar nuai leh chuang miah lo, a lo mar țha leh pek khawp mai. Nizàn lama an chêt dàn tùr mitthlàa hmu rauh rauh chung chuan chhuat chu ka nâwt a, khum erawh chu ka tawk hauh lo, ka ten deuh tlat pek a nih chu.

Tukverh ațanga pâwn lam ka hawi chuan ruah a lo hmî leh seng seng tawh tih ka hmu vat a, tlãn chhuak vatin thuamhnaw pho chu ka seng vat vat a, dah lût vatin kan in lamah ka tlãn phei leh a, ka pho tam hran lo bawk a, a lo hnawm hman hlek chauh a ni.

Ka tlãn phei leh vat a, ina ka luh chuan ka thaw hluam hluam mai. Ka tlàn khàtzia leh chak deuh taka ka kal khàt tâkzia ka ngaihtuah a, ka in-fit lohzia chu ka ngaihtuah rauh rauh a, hna thawka thlan tlâk tih a awm ve tawh mang si lo. Singapore-ah kha chuan ina ka awm khân fan leh AC kha ka on ngam lo hrim hrim a, vacuum cleaner rit ve angreng deuh kha ni tinin ka châwi kual a, step-ah chhohpuiin ka chhukpui leh bawk a, khua lah a lum êm êm bawk nèn, thlan kha duhthusàmin a chhuak țha a, exer  lâk hran ngai lovin ni tin khân exer ka la a ni mai, chawlh hahdama ţhuta han mutchawlhna hun kha a awm mang lo a ni. Kan inah ni se, ni tin hna thawka chhuah a ngai a, exer chu ka la țha lutuk zâwk mah. Hetah chuan hna hahthlâk thawh a awm lo va, 'a lum' tih hunah fan on leh tawp a ni mai a, ka on ngam ve bawk sia, chhuat nawh hian thâ chu a heh ve deuh ber maithei tih chauh a ni.

Thuamhnaw pho ka seng chu ka han dah khàwm țha deuh a, tukin lama Polite-i hâk mutkawr dum pawh kha a lo tel niin, nichina ka seng lai khân ka hmanhmawh lutuk a, ka țhãm khâwm nawk nawk kha a nia, ka lo hmu miah lo a lo nih hi.

Ka awm laiin Jivan-a a rawn haw hman lo va, zanriah ei siam tùra ka phei erawh chuan a lo haw tawh a, he laia huan leh thlai enkawltupa kanin a chhuak a lo ni a, tûnlai tak hian ka hmu ngai lo ka lo ti rilru rêng a ni. Eng nge a an tihte chu ka han zâwt ve a, a tar ve reuh tawh a, rin aiin a lo la na reuh a ni àwm a, a rawn kal theih lawk a rin loh thu chuan min chhâng a.

Eirawng ka bàwl zawh hma deuh hlek chuan pu ber chu a rawn haw a, a rawn inlan hma, a motor rawn rûm deuh ham ham ațang chuan a lo haw tih ka lo hre daih tawh a, ka haw hman lo chiah chiah chu ka haw ru kher mai, a theih hrâm chuan hmuh loh hi ka duh a ni; mahse, țawngțaina zawng zawng hi Pathian hian min chhâng vek kher lo a ni tih chokaa a rawn lan chuan ka hre chiang leh zual sawt.

"I hman hunah min rawn hmu lawk ang che."

Ngenna awka a ni lo, thupêk a ni zâwk. Ka thinlung chu a na zawk nghe nghe a, a hnung lam chu ka thlîr zui vang vang, eng vàngin nge ka nat ve ngawt? Na tùr ka ni em? A laka thinrim tùr pawh hi ka ni lo, ka inhre ve reng; mahse, ka  thin a rim tlat si, ka rilru chhûngril hi hria se min va nuihzat dâwn tak!

Ka kut silin apron chu ka khai phawt a, Sitting room-a a awm ringin ka phei a, a lo awm lo va, a office ve deuhah a awm a ni zâwk maithei, ka en leh a, a lo awm loh leh avàng chuan a room lam chu ți deuh hlek chuan ka pan phei leh a, ka kik hma chuan thâwk ka la leh tê tê a, ka kik ta chauh a.

Min lo chhâng a, ka lût a, mipa room-a luh leh ringawt hi, an awm lai phei chuan nuam ka ti lo nasa, ani hlauh phei hi chu... mi nupa room pawh chuti tho, hmun danga hna ka thawh ve lai pawh khân room-a pu ber an awm tawh chuan luh kha ka hreh thei ngawih ngawih a nih kha.

"Hei hi ka lo hawn che a, i duh zâwng a nih ngei ka ring," tiin bâwm lian lo tê hi dawhkànah chuan a rawn dah lang a, bâwm rawng chu a dum pãwl lam niin ka hria, eng tak ni ang maw? Ka en ringawt a, va lâk erawh ka tum lêm lo. 

Chu chu a hmuh chuan," La la, en rawh?" a rawn ti leh a, kei erawh chuan," A làwmawm khawp mai; mahse, ka la thei lo ang," ka ti ve ta thung a, lâksak ka tum hauh lo. Thil min leisakna chhan tùr ngawt ka hre lo, a bialnu kha chu a leisak ngei mai a, ni e, a bialnu a nia, a leisak ang chu; mahse, kei chu ka ni lo, ka lâksak lo ang.

"Engati maw?"

Chhàn dàn tùr ka hre lawk lo va, ka ngawih deuh reng hnuah," Ka nuin a thlàwna mi thil lâksak a phal lo," ka ti ta ringawt a, chutiang chuan min hrilh ve țhìn tho, dâwt ka sawi lo; mahse, tuna lâksak ka tum loh chhan hi chu ka nu thil sawi vàng erawh chu a ni chiah lo.

"A țhat hlauh chu, a thlàwna lâk i duh loh pawhin a thlàwn lovin a tih theih tho alawm, inrulh dàn chu a awm zêl ang chu."

A nuih suk dàn ațang chuan a thil ngaihtuah tùr àwm chu ka hre thiam deuh a, nui ve hauh lovin, thinrim ru deuh țûn chung chuan ka melh râm a," I ngaihtuah ang thil kha chu a thleng hauh lo ang," ka ti a," Ka kal tawh ang e," ka ti leh sap a, ka inher zui nghat a; mahse, kawngkhàr ka thleng hman lo, hnung lam ațangin min rawn kuah teh rêng a nih chu! Ka au deuh țhat nghe nghe a, ka hmui chu rawn hupin kawngkhàr chu a khãr zui nghâl bawk a. Hlauthãwng leh thinrim ru tak chuan ka han tãl a, ani erawh chuan ka beng bul sêtah chuan," Shhh... engtin mah tih che ka tum lo, i kal ka la rem ti lo mai chauh a ni," a ti sup a, kei erawh chuan ka la tãl ãrh ãrh a; mahse, min kuah bet hneh nasa.

"Ka thu sawi ngaithla teh, tãl tawh suh," a tih leh pawh chuan ka hmui hup bet tho mah se, ka țawng thei tho tih hriain," Min thlah rawh, hetiang hian min ti thei lo," ka la ti ve țàng țáng a; mahse, tal chiam mah ila ka tãl chhuak lo ang tih ka hre tho, kan taksa innâwk nasa ka duh loh vàngin ka tàwpsan ta chauh a ni, a thu âwih vàng ni hauh lovin.

"Sakawr lâ, duhawm tak, kawlh ru zet leh la sawizawi loh min tihre chhuak," min thlah hnu chuan a ti chhuak sup a, kei erawh chu ka thin a rim avàng leh ka hah avàng chuan hmui petin ka thaw sang sang reng a,  amah pawh ka en duh lo.

"Ka thil hawnsak che chu la mai la?"

"Ka la duh lo a nih chuan engtia min tih nge i tum?" ka ti ve thung a, ani chuan," Ka pâwngsual maithei che a ni," nui hmêl deuh pu deuh chung hian a ti a, ka melh râm ringawt. Ka nuih pawh a za ve hauh lo.

"Ka la thei lo ang, ka pu--"

A duh loh takin ka ko leh tih ka hriat chhuah hma chuan ka chalah a rawn kuk fawk a, ka phu zawk lehnghâl, a na nghâl vawng vawng mai.

"A naahhh...!!"

"Khatiang khân min ko tawh suh ka tih kha, ka sawi chiang viau tawh a ni lo'm ni?" dam deuh dupa a tih chuan tùr deuh khai hian ka melh râm râm a, ka chal chu ka tuai pah bawk a, thinrim tak hian,"'Ka pu' ti lovin ka ko thiam lo che, ka pu i ni rêng bawk, ka pu, i hnuaia ka thawh chhûng chuan 'ka pu' ka ti zêl tho ang che, ka puuuu..." ka han ti leh hrãm hrãm a. Hlauhna pawh ka nei lo, min tithinrim laklawh tlat.

A nui hawk a,"I va luhlul reuh tak! Huaisen ru reuh zêk bawk si, hmeichhia ka hmuh tawhah chuan i la huaisen berin ka ring a ni, nang anga min ngam hi ka la tawng lo," a lo ti daih thung a, a thinrim ka ring a nia, mak ka ti lehling hial mai, kei erawh chu ka thinrim a la reh miah lo thung.

"Ka la dâwn chuang lo," luhlul zet hian ka ti leh a, ani chuan," I tâna ka hawn a nia, i lâk duh loh chuan ka paih mai dâwn a," a ti a," Paih daih rawh," han tih êm chu ka hreh ve deuh si a, ka rilru erawh chuan," I duh duh dànin ti rawh, duh leh thlawh bo daih rawh," ka ti țhuai țhuai a; mahse, sawi chhuak lovin ka ngawi reng thung.

Ka ngawih avàng chuan ka la duh a nih a ring a ni ang," A mawi reuh asin le," a ti leh sup a, ka la ngawi chhunzawm zêl; mahse, lâk erawh ka tum chuang lo.

Bâwm tê chu la kãngin ka lamah a rawn lek a," La rawh le," a ti leh a, luhlul chhuahin," Ka la dâwn lo ka tih tawh kha," ka ti ve thung a, ani pawh chu a dawhtheihna chuan a tlin ta bîk lo a niang," Chuti, paih ila ni mai alawm," tiin bawlhhlawh bâwmah chuan a paih zui nghâl a, min rawn en leh a, engah mah ngai lo ni àwm tak hian ka lo ner khum sak a, ka zah lo salh salh a ti ru ngawtin ka ring.

A hnua ka ngaihtuah lêt pawhin keimah ngei pawh chu zak lo ka intiin ka awm dàn chu zahpuiawm ka inti ru tak zet, mi dang bulah a bula ka awm ang khân vawi khat mah ks la awm ngai si lo, mak ka inti a ni. A bulah hi chuan ka thin hi a chhe tlat mai a, ka ngam êm ëm mai bawk si, ka inhre thiam lo a ni. Ka nu leh ka chhûngte'n ka awm dàn kha han hriain han hmu ve phei se chuan, ka nu chu a zak dâwn lutuk tlat, a thinlung ka tina ngawt ang!

Chuta țang chuan ka hmu khât ta viau, inah a awm khât a, a awm ve chhunah pawh a office-ah a inkhung a, hna a ngah viau a nih ka ring ve ngawt. Hna a thawk nasa bawk a niang, a office ka tihfel chãnga thil rim danglam deuh nam ram ram chu ka hre zauh zauh bawk, a hah tawngkhawng  tihziaawm nân a ti ve zauh zauh a ni mahna. Inhmu khât ta chu inbiak pawh kan inbe khât a, ka duhthusàm ang kha thleng mah se ka hlim phah chuang miah lo. Khami kan inchhàn tûk khân a thil paih kha a la awm em tih hre tùrin bawlhhlawh bâwm kha ka en chhin leh a, a lo la awm reng niin.  Lâk ka tum zuau zuau nain ka țhulh leh a, min nuihzat ka hlau a ni. Min rawn hawn ve êm êm a, en pawh ka ensak lo a nia, a tân chuan a tha natthlâk ve ngawt ang chu. A tàwpah erawh ka zu la ta nge nge a, ka hawng ngam lawk lo lehnghâl, ina ka haw hnuah chauh ka en. Țhi mawi tak a ni, mawi ka ti kher asin.

Nunhlima'n hna thawh tùr chu min zawnsak ve reng nain a hmuh chhun chu min duhpui meuh si lo va, kan la nghâk leh rih a ni. Ka tân erawh ngaihtuah dàn a vâng a, amahah ka innghat rih tawp mai a ni. Mami bulah chuan eng mah ka sawi duh lo thung a, kan inbe reng reng a; mahse, hna dang ka duh thu leh a cousin lam chanchin chu ka sawi chhuak ngai lo; amah zâwkin min rawn biakin a chanchin min rawn zâwt țhìn zâwk a, ka hrilh ve chauh zâwk a ni, ka sawi hmasa ngai lo.

Zîng khat chu ka thawh hma deuh hlek ațangin ruah a tla cherh cherh a, peih lo ru zet chuan ka han tho a, Zotei pawh chu a rawn tho ve nghâl mai a, a hma lutuk tawh lêm lo nain, ruah tla cherh cherh vàng chuan a la hma hmèl viau. Ka inphih fai hnuah ka hna thawk tùrin ka phei leh a, chawhmeh ka chan lai chuan ruah chu a rawn tla tam ta deuh a, a rawn bengchheng țan ta viau, quarter hi a chung ràngva a nih vàngin ruah a sùr tam ve deuh hi chuan a bengchheng ve thei viau tho. 

Pâwn lam ațanga choka luh dâwnah hian veranda ve deuh reuh hi a awm a, plastic chair pahnih a inhûng nghe nghe. Tukverh dârthlalang ațang chuan pâwn lama ruah tla sung sung chu ka en deuh reng a, chutih lai tak chuan pu ber chu huh hnuang chung hian a rawn haw a, ani hi, exer lain a chhuak tho a nih hi, tûn ang zîngahte chuan țhulh ve mai tùr asin le, a nih loh pawhin khawi hulhliapah emaw ding chàwl ve mai se.

Veranda-ah chuan a ding dîr tluk tluk a, chutah, ka lo en reng tih min rawn hmu ta, ka lo en reng tawh si a, hawi sawn nachâng pawh ka hre chuang lo, kan inen tawn ta reng mai. A awm dàn ațang chuan vâwt a ti tih ka hre mai, a huh zawr hneh ve êm bawk a ni, khawngaihna rilru ka pu thut mai.

Kawngkhàr chu hawngin," Lo lút thuai la, intihul vat vat rawh, i damloh phah ang e," ka va ti ta ngawt a, ani erawh chuan che lovin min en reng ringawt a, a sam ațang chuan ruahtui lah chu a la rawn far thla fup fup a, ka en kual zêl a, a taksaah chuan huh lo lai a awm hauh lo ang le.

"Ngawi rawh, towel ka rawn lâk ang che, lo inphelh rawh," tiin ka lût lehnghâl a, a room-a towel chu ka va la sawk sawk a, a chapal la telin ka lêt leh nghâl vat a. Ka va chhuah leh chuan ka ding chawt mai!! A lo inphelh ruak deuh vek niin, boxer nèn chauh a lo ding tawh!!!

"Engati nge..!! Kha.." tiin towel chu a hmaiah tak chuan ka theh phei a, a lo nui hawk mai, a chapal pawh chu ka theh thla a, ka lût leh nghâl daih. Khati êm êma ruaka a lo inphelh kha chu ka ring hauh lo asin, min tilài chhe lo chauh a nih kha le. Patling tawh mah ni se a taksaah kha chuan tlangvâl pian mawi tak ang a ni.

Ka va ngaihtuah ho tak! Ka lu ka thing nak a, ka eirawng bàwl chu ka chhunzawm leh ta nghâl a, ka mitthla suangtuahnaah erawh thil dang daih a awm, ka chawhmeh siam pawh chu a dik ngût em maw, a tui dik zân lo maithei a ni.

"Min lo pui lawk mai teh."

Chaw ka lo chhuang mêk a, chutia min rawn koh tâkah chuan ka sim hlek a, ka zui ta nghâl a. "Tukin chu Jivan-a hi a va tho har êm!" ti rilru chung chuan a room-ah chuan ka zui lût a.

"Apron kha phelh rih teh."

A khua a lo sik niin, damdawi chu a lo hmawm ve tawh a; mahse, a la rei lo êm a, a la chhâwk hman lo. Electric mutphah chu ka phahsak a, ruah sûr a do avàngin amah lah chu khawsik e ti lo chuan a vawt vur mai bawk si nèn, a inhmeh lo tak zet, a mit lah chu a sen rûm tawh a.

"Puan sin tùr ka lo lâk belh ang che," tiin ka kal sawn vat a, a thuamhnaw dahna almira chunga rizai awm chu dingdihlîp ãwk ãwk chuan ka han ban a, ka la mai thei lo, ka tum deuh fê hnuah chuan ka pawt thla thei ta a, ka va sintîr lai chuan a lo nui suk a," Inchi 5 vêl zeta i sàn belh ka ring," a lo ti sup a.

"Tukin khua angahte kha chuan chhuah loh ve mai tùr asin, a nih loh tal pawhin tawm hulna ngaihtuah ve mai tùr a nia, naupang chhia pawh i ni lo, patling ţhankin tawh i nia," ka ti hlak hlak a,  rizai chu a sír ka delh kilhtîr bawk a. Ani chuan," Ruah a sûr tih pawh ka hre hleinem," a lo ti sup thung a.

"Eng thil nge maw i ngaihtuah ni?" ka ti ve thung a," Nangmah," a lo tih chuan ka en zawk a, hmun dang en lehnghálin," Mu rawh, damdawi khân a chhâwk țêp tawh ang che," ka ti a, ka kal sawn tùr chu ka kutah a rawn man leh chat a, ka țe deuh țhat, min pawt hneh nasa mai a, khumah chuan min pawt mu ve nghâl zat.

"Min kalsan rih suh, khawngaihin."

*THIL RÊNG RÊNG, A PAWIMAWH CHIN CHAUH SAWI ȚHÌN RAWH*