☆MIN EN LA☆ -22 By Dingdi Pachuau

 ☆MIN EN LA☆ - 22 By Dingdi Pachuau

'Khawngaihin' tih a han sawi tel ve a nia, a bialnu Polite-i bulah a awm tam tawh lutuk a, a țawngkam pawh a la vek tawh a nih àwm hi. 

"Min thlah teh, Jivan-a'n min hmu rêu rêu ang e, ka duh miah lo a nia,"  tiin ka han tãl a, ani chuan," Rei lo tê chauh, vâwt ka ti a nia," tiin min kuah nghet sauh sauh a, min thlah chu a tum loh hmèl viau.

"Ka chaw chhuan kha a--" ka sawi zawh hma chuan," A rei dâwn lo, a lo ût hman lo ang," tiin ka beng chu a rawn thâwk khum lum ham ham a,  mipain min hnìmhnai ngai lo va, ani chauh hi min hnaih bertu a la ni, khumah min la kuah mu zui a nia...

"Min kuah nghet--" ka sawi zawh hma chuan," Shhh...!!" ka beng bulah tho chuan a rawn ti leh a, min kuah nghet lutuk a, min thlah dul deuh hlek se ka tih vàng mai a ni sia; mahse, ka sawi nawn fuh ta bîk lo, ka âwmah a kut a dah bawk sia, ka thinphu dup dup chu a hre thei ngei ang chu.

Minute 3 vêl zet chu che lo leh țawng lo chuan kan mu reng a, a hnuah erawh chuan ka rin loh deuhin min kuahna chu thlahin," Um, kal tawh rawh le, i chaw chhuan a lo ût palh hlauh ang e," a ti ta sup a, ka tho rang teh e. A rûk tak chuan nuam ka ti ve deuh tho; mahse, a zahthlâk ka ti, a duh duha a khawih theiha a mutpui theih ka ang ka ti.

Ka haw hnua chaw ka ei lai pawh chuan ka ngaihtuah zui reng a, a damlo zui tak tak ang em? Nge, a office leh tho ang em? A, a office leh tho ang, khawsik satliah han mutpui tawp chî a ni lo, amah lah hi a lêrh ve angreng si a, ina mut ai chuan chhuah daih chu a thlang ngei ang.

Mâma result a chhuak a, I Div-ah a lo pass ve niin, ka nuin min rawn hrilh chuan ka au rãih a, ka hlim tak zet. Ka lawmpui êm êm lo thei lo, ka nau a graduate ve tawh tihna a nia, a làwmawm êm asin, harsatna hrang hrang hnuaiah a zir ve hrâm hrâm a, a hlawhtlinna a hmu ta chiah a, làwm avàngin mittui pawh a hnai kuar lo thei lo. Kan chhûngkua ațangin graduate kan awm ve ta, kan dam chuan Zotei pawhin a u Mâma hnung chu a zui ve thuai ang a, Mercy erawh nghah ve deuh hlek a la ngai thung ang.

Mi fel ni kher lo mah ila Mâma'n hlawhtlinna  a chan avàng chuan Pathian hnênah làwmthu ka sawi a, chumi hnuah chuan hlim rilru takin quarter tifel tùr chuan ka phei leh ta a, ka hlim êm vàng chu ni maw chhûm han zîng deuh chuaite chu ka hmu thiang mawi riau! 

Hlim rilru tak chuan ka zai lút rât rât a, ka hla sak ber pawh ka hre chuang lo, pu ber nèn kan intâwk ta thut mai chu, ka zai tàwp chiang teh asin! Ka meng phâwk nasa sia, ka hmel chhe ngawt ang chu!

"Zâi tawh suh ka tih kha, thiam lo ropui si!"

Ka melh rum phawt a; mahse, a mit sen deuh râm leh a hmai sen deuh tân maite chuan a khua chu a sik nasa a ni tih a hriat nasa mai si a, bâkah, ka nu thil min hrilh vànga ka hlimna chu a thil sawi chuan a tih bo ka phal lo va, chu vang chuan thinrim pawh thinrim duh ta lovin," I khua chu a la sik reng a ni maw?" ka ti ta zãwk a, ka aw pawh a zãngkhai vah mai. Ruah chu a sûr tawh lo nain chhûm a zîng nasa a, damlo tân phei chuan a hrehawm ngawt ang chu.

"Aw...vawiin chu min awm ka ngai ang."

Tui lum chu a in thlit a, a in zui nghâl khawlh a, ka en deuh reng ringawt, a thil sawi pawh chu ka ngai haw chuang lo, min fiamah ka ngai tawp mai.

"A mak hle mai, damdawi kha i ei tawh tiraw? A la chhâwk miah lo che tihna em ni?" tia ka zawh chuan ani chuan," A nih ka ring," a ti sup ringawt a, kei chuan," I damdawi ei a chak tâwk lo a ni ang chu, chak deuh hlek ei la?" ka ti leh a, ani erawh chuan," Damdawi chak deuh ka ei ngai lo," a lo ti thung a. 

A damdawi ei chu ka ensak a, ka khua a sik chânga ka ei ve țhin tho ang a ni, ani ang chuan damdawi țha leh man sâng deuhte a ei ka han ring deuh ngawt a nia, damdawi man sâng a ei ngaih loh thu a sawi kha a lo sawi dik ve tlat mai.

"In chu tih fel a ngai lo, a fel sa vek, vawiin chu ka kiangah awmin min enkawl mai rawh," a tih chuan," I naupang chhia e, enkawl i ngai hran nâng, i kianga awm kher lovin thil mamawh i neih erawh chuan i koh phâkah ka awm reng thung ang," ka lo ti a.

"Ka bulah awm mai rawh."

Patling pui e ti lo chuan a kianga ka awm loh hlau chuan ka bulah lo kal ve zêlin min zui zêl a, mu tùra ka tih pawhin a duh si lo, a tàwpah a room-ah chuan ka luhpui leh ta nge nge a. A mut dâwn chuan," Ka bulah hian țhu ve rawh," a ti leh tlat a.

"Tu emaw kha ka ko mai dâwn em ni ang? A hre tawh àwm sia, a va rawn lang har zâwk ve!!" mei nei tak chuan ka han ti a, ani chuan ka kut vuan pah chuan," Tunah tak hi chuan ka bulah nangmah chiah awm la ka duh," a lo ti sup thung a, a mit sen rûm chu a khap leh suk ţhìn bawk a.

A bulah chuan ka țhu a, ka kut thlah duh hek lo le, kal sawn theih pawh a ni lo. A kut vawt tak kha tunah tak hi chuan a sa vur tawh a, ka kut a vawnna pawh a  lum vung vung tawh mai.

Țawng lova min en rùn reng avàng chuan kei chuan ka en țha duh vak lo va, bâkah, nuam ti ru viau mah ila ka lài ëm êm mai si a, ka lài a ni tih erawh thup ka tum ve hrâm hrâm thung.

"Min en teh."

"Eng nge?" tiin ka en deuh zawk a, ka melh sawn leh nghâl daih a, ani chuan," Min en la?  Thil zawh che ka duh pah a," a ti leh sup sup a,"Eng thil maw?" tiin a mitah chuan ka en a, ka mit chu ka zah leh laih avàng chuan ka khap deuh sak sak a. Ani chuan," Bialpa i nei lo niin ka hria a, a dik tiraw?" a rawn ti chhuak ta sup a.

"I va ho tak! Chutiang inzawh chi pawh a nih loh chu," ka lo ti thung a, ka nui pah a, ani chuan," A ho lo a nia! Thu dik takin min chhâng teh, i nei lo tiraw?" a ti leh a, kei chuan," Eng atân nge i tih?" lãp zet hian ka ti leh ta thung a.

"Ka bialnu ni rawh."

Teh hlawl mai a! Tûn țum chu mit khap hauh lovin ka en ta thung, ani.pawh chuan meng sen rûm chuan min en lêt ve rùn a, thu dik a sawi nge sawi lo hriat ka tum ve nain a mitmeng ațang chuan ka hre thiam ve chiah lo, min fiam mai mai ni chuan ka ring phal chiah lo deuh ngawt a.

"Engati?" Mãwli leh! Ka va mãwl tak! Chutiang zawhna chu tuin nge zâwt ngai ni!

"Ka bialnu ni tùrin ka duh che."

"Bialnu i neih reng kha." Ka lei chu engin nge thunun ni, ka duh loh dàn zêlin ka la țawng chhuak zui, ka thîk tih a hre ngei ngei ang, tih chi loh theih mang e!

A ngawih tâk deuhah erawh chuan sawi fuh ka inti leh hnuhnawh a, bialnu nei reng chunga a bialnu ni tùra min sàwm rêng rêng, ka rilru tùr a ngaihtuah ve lo em maw ni? Ka lo duh huam tùrah a ngai a nih teh chuan e, a tisual chhiava a ni mai, kawp min tum a ni ang e, a teuh lo!

"Bialnu ka nei lo ka tih kha."

"I neih reng kha, in infâwp lai pawh ka hmuh reng che u kha," ka ti leh ta zêl a, ani pawhin ka hmu tih a hre reng a nih kha, min bum te zawng tum hauh suh se, mit ka nei a, ka hmu ve thei alawm.

"Ka fâwp lo."

Chhàn ka tum lai takin Jivan-a țawng bul bul thãwm chu ka hria a, ka ngawi ta daih. Ka kut pawh chu ka pawt lét nghâl vat baak, a room kawngka a inhawng deuh a, chuta țang chuan thãwm chu a hriat theih a ni.

"He pa hian min tibuai ve ziah!" ti hlukin a rawn tho thut a, kawngkhàr chu nam khãr rawpin a kalh zui nghâl zat a, phâwk hrâin a che vêl chu ka lo en reng ringawt!

"Ka lu hi a puak keh dâwnin ka hria," tiin khumah chuan a rawn lâwn kai leh nghâl zat a, a lu chu a'n hmet nawk nawk bawk a, hlauthâwng ru tak chuan kei chuan," I thawh thut vàng kha a ni ngei ang, mu rawh, ka lo hrènsak dáwn che em ni ang?" ka lo ti vat a.

Gamchha lian vak lo chuan a lu chu ka hrènsak a, na lo tê téin ka hmehsak bawk a, zàwi tê têin ani chu a lo phun sup sup a, a sawi pawh ka hre thei mang lo, ruah a rawn tla țan leh tawh tlat si a. Ka ķal sawn dâwn chuan ka bânah a chelh tlat a, amah lah chu a maimichhîng tlat bawk si, a ngaihna ka hre lo lek lek, a arpui mit men tal a ni ang.

"Aw, ka kal lo ang, min thlah tawh la?" ka tih chuan," Min kalsan suh, ka kiangah awm rawh," chiang fê hian a rawn ti a," Aw, min thlah phawt la, min chelh nghet si a," ka ti a, ani pawh chuan min chelhna chu a thlah dul ve tial tial a.

A muhìl țan a ni tih ka hre mai, a damdawi ei kha a thawk țan ve tawh dâwn a ni mahna; mahse, a kut leh a chal erawh chu a la sa dùn khawp mai thung. Min dawm mai mai chauh nia ka hriat hnu chuan ka bân chu lâk sawn ka han tum a, ani chuan," Min kalsan suh ka tih kha," a rawn ti leh a, ka tàwp chat, a lo la muhìl lo tawp a nih hi.

Nilêng chuan ka awmpui chu a ni mai, a damlo pangchang tih tam avàng chuan kei pawh ka phe buai viau, ei tùr ka siamsak a, a ei duh lo phawt a, a dang ka siam leh pawh chu a ei duh lo leh a," Mai mai, ka siam tawh lo tawp ang," ka ti rilru hmak hmak a, ka siam tawh lo rêng bawk a.

Tlai lamah chuan a zia ta deuh a; mahse, rawng ka bàwl a rem ti leh tlat lo pek a nih chu. "Ka bulah awm reng rawh, vawiin na nâ nâ chu," a ti tlat a, kei chuan," Jivan-a ei tùr pawh bàwlsak a ngai alawm," ka ti ve leh a, ani erawh chuan," Duh leh ei chhuak mai rawh se," a ti leh tlat a, ka hnial hneh si lo, buaithlâk tak a ni.

Zànah chuan ruah tla siap siap kârah Nunhlima a rawn lêng hrâm hrâm a, a chhan pawh dàwr nghah tùr a lo hmu tawh a, phone-a inhrilh tawp ai chuan tiin min hrilh pahin a rawn lêng a ni. Dàwr chu Bazâr vênga awm niin tlereuh eng eng emaw leh puanthãn chi hrang hrang an zawrhna dàwr a lo ni a.

"A hlawh pawh a pângngai reuh khawp, a piah deuh lawka building hnuai pawh luah tùr a awm bawk; mahse, a zau lo thung, tuna in luah chanve ang chauh hi a nih ka ring," a tih chuan," A nih tak chu, a làwmawm lutuk e, min hrilh tùrin i rawn lêng vang vang bawk si a, thingpui tui tâwkin ka han siam ang che," ka lo ti ve a. Thingpui a in hnu rei vak loah chuan haw tumin a ding ta hluai a, ka han chelh lui ve ngial a; mahse, a kal lui ta tho, a kal ddwn chuan hna min zawnsak avànga làwmthu hrilh lehin 'ka nu ka han râwn ve hrim hrim ang e' ka ti a, ka thlah zui ta nghâl a.

Zotei chu Nunhlima haw hnuah chuan room ațanga rawn chhuakin," U, hna dang thawkin hmun dangah kan awm dâwn tihna em ni?" a rawn ti ta mai, engtin nge maw a lo hriat ve ni?

"Dàwr lam a nia, tlereuh leh puanthãn dàwr a ni àwm e, eng nge ang i tih? Naktûk lamàh ka nu engkim ka la hrilh ve ang e," ka tih chuan," U, engati nge he hna hi kalsan i duh tâk? U Kob-a'n a  duh tawh lo che tihna em ni? Nge a bàn che?" a rawn ti leh a.

Thil awmzia chu ka hrilh thuak thuak a, a pawi lo chin chauh ka hrilh. Ani hmêl erawh a lo ngui deuh raih a, chu chu hmuin," Tún tut tutah chuan kan chhuak kher nâng; mahse, ka sawi tawh ang khân ka hna hi hna nghet lo a ni a, chu chuan rilru a kap ve deuh reng a, a dang chàn lo neih kha a fuh viau ang.

Ka nu hnênah pawh chuan ka hrilh ve ta ngei a, ani erawh chuan ka ngaih dàn leh duh dàn chu a dah lal ber thu  sawiin ka thu tlûknaah a innghat tawp tih min hrilh a, ani pawh hi thil nihna dik tak ka la hrilh ngam chuang lo.

Engtin nge Pu berin a lo hriat ve ka hre lo, zînga ka kalin,"Ka thil hrilh vàng che kha a ni tiraw?" tiin min zâwt a, kei erawh chuan ka hai der lui hmak a, engtin nge a lo hriat tiin ka zâwt ta zâwk a.

"Chu chu a pawimawh ber lo, he hna hi bànsan i tum tih pawh zêp kher suh, hrehawm i tih vàng a nih chuan sawi hreh lo la, hrehawm i ti lo mai dàwn a ni, bansan i tum tih hi Carolene-i'n a hre ve tawh em?" a ti nghut nghut a, chhàn pawh ka tum lêm lo, a rin dàn dànin ring mai teh se.

"Kan pahnih inkâr vàng hi a ni em?" a rawn tih leh tâkah chuan ka hawi sawn ta daih a, a chhan dik tak a rawn sawi chhuak si a, ka mit meng ațangin min man chhuak ang tih ka hlau a ni.

"Ka kaltîr che i ring rêng rêng em?"

Phâwk hráa en pah hian," Min chelh ngawt thei lo ang, ka duh thlanna a nia," ka ti ve thung a, ani erawh chu a nui suk a," I tum chhin thei ang," a ti ta hmuk a, a damlohna avàng khân tlêmin a lang thû ve lek lek a, a la chauh hmèl viauin ka hria.

"Min dan tum suh," ka ti ve thâwr a, ani erawh chuan," Tum e, ka tum dâwn khawp mai," luhlul hmèl zet hian a lo ti leh a, kei chuan," Ka thawk rei tawh alawm, nin pawh ka ning ve thei tih te i ngaihtuah pha em?" ka ti leh kalh kalh a.

"Chuti, min nei mai la?"

Ka nui hawk a, mak pawh ka ti peih tawh lo, a duh duh hi a sawi mai a, a rilru ni tak tak lo hi a sawi mai mai tih ka hria a ni, dâwt hrilh hi ka nuam a ni ang e.

"Eng nge i nuih? 

"Nangmah kha, i fiamthu sawi nèn khân i inhmeh lo lutuk a! Fiamthu lah hi i sawi thiam lo ropui si--" ka tih lai chuan," Inlaichìnnaah fiamthu ka thawh ngai lo," a lo ti hmuk a.

Ka chawhmeh bai chu a liam țêp tih ka hmuh chuan ka han buaipui leh rih a, ani pawh chu a rawn kal hnai ve zêl a, thlan vàngin a kawr chu a huh hnuang bawk si a, mi tân chuan a hmuhnawm lutuk loh ngawt ang; mahse, kei chuan a inhmeh ka ti tho.

"Sawì tawh lo ang," ka tih lai mékin Jivan-a a rawn lút a, a rawn țawng lút barh barh a, a pu chu a awm ve tih a hre lo a ni maithei. Jakob-a'n," Jivan, dàwrah sangha țîn zu la teh," a tih tâk țhatah chuan a țawng lai chu tàwp chawtin," Aw le, ka pu," tiin a tlãn chhuak zui ta nghâl a.

"A țawng tam mah mah!" a ti zui hluk a, chutah, min rawn hnaihin," Min nei mai rawh," a rawn ti leh a, kei chuan," Duh tâwk teh, thil awmze nei deuh sawi ve la, ka pu," ka lo ti a, ka sawi zo chiah chu bangah ka bet nghâl rawk rawk a ni mai.

"Luhlulnu!" ti supin ka inring lo lai chu na zet hian min rawn fâwp a, ka hmui chu a thî hial maithei a ni, ka chhâng lêt duh hauh lo, ka inhûm sek a, a duh ang hmuhtîr ka tum bîk teuh lo mai!

"Hremna a nih kha!" a ti chhuak hluk a.

*ANMAHNI AN RINAWM LOH VÀNGIN MI RINAWM LOTE HIAN MI DANGTE RINNA AN TLACHHAM ȚHÌN, MI RINAWM ERAWH CHUAN MITE HI AMAH ANGA RINAWM TÙRAH A NGAI ȚHÌN THUNG*